رواية خطايا واجتثاث الفصل السادس والخمسون 56 بقلم نور علي البصري
سأكتب رواية تختصر👈🏻 «نحن الذين غرتهم البدايات نحن ضحايا المنتصف بأنتظار النهايات
ــــــــــــــــــــــ᭓ـــــــــــــــــــــــــ
مــــــــاجد..
صوت فضائل.. وبجيها صرت أحسه بعيد عبالك وشوشة طنين دوخة و دوار خلتني أكعد وتمددت وسط الجام مال الصورة
أجيت أدور على الحقيقة بغرفة الأسرار حقيقة أختفاء رحـمة.. الغامض لازم أعرف مصيرها بس ما لگيت أي شي عن رحـمة.. لكيت مصيبة أكبر مصيبة العائلة اللي أنولدت و عشت وياهم جانوا صورة مثالية لعائلة مضطهدة من النظام بس الحقيقة هنا بين سطور أوراق وتقارير و صور قديمة تاريخ بعضها أصلاً قبل ولادتي و قبل زواج أبوي يعني بكل مراحل حياته قوائم اسماء وهواي أدلة بس ما تخص رحمة
رجعت أباوع للأوراق و للصور بكل خذلان صور مكتب وشخص ما أعرفه صورة أسود وأبيض و احتمال لفترة السبعينات أو قبلها و مكتوب خلف الصورة (تمت المهمة) هواي أمور بس تواريخها ترجع لزمن جانت بيه رحـمة بعدها طفلة.. وأزمان قبل ولادتنا.. من جان عازب طلعت هاي حقيقته اللي ضمها بإتقان وهو يمثل علينا دور الضحية الحقيقة تعبتني حقيقة أب ما جنت أعرفه شنو من أب ياما نظرت اله على إنه مظلوم شخص أنجبر يترك كولشي بسبب إعدامات ولد مرته.
الغراض مطشرة گدامي أكلب بيهن بهستيريا وهنة بالگاع أصفطهن وأرجع أخربطهن من جديد أدور بينهن عن أي شي يكمل الحقيقة.. أي شي بس كون يبين مصير أختي.
صحت متوجع:
ــ ولج خوية رحمة.. تعبتيني عايشة ولج لو ميتة ولج تعاي شوفي المصيبة تعالي شوفي أبونا شمسوي بالعالم ولج بيا عين بعد أباوع لماجدة جنت أعتبر أبوها لـؤي عار.. هسة آني اللي طلعت عار أبن عارات.
باوعت لفضائل اللي جانت مدنگة وتبجي صرخت بيها:
ــ هسة عرفت خوفج من شنو؟ الغرفة هاي مسويتها مخزن أسرار العائلة ماعدا صاحبة الغرفة مجهولة المصير فضائل.. تعرفين شي؟ أي شي بس أفهم رحمة.. أنخطفت من البعث؟ زين شنو جان شغلها؟ كم مرة ماجدة.. تكول هي قررت هذا المصير وهي راحتله برجليها زين أنتِ والعقد هذا والج هاي الورقتين شنو ؟ ولكم الله أكبر.. صدمة العمر هاي الله لا يوفقكم ولا ينطيكم.. فهميني شنو هاي الأوراق ولج هاي مصيبة.. ناس أنعدمت من ورانا.
ــ لا.. لا خوية أنت معليك أنت معليك بشي من ورى هيج ما ردتك تعرف أي شي أعرفك تظل تلوم بروحك وتاكل بنفسك.
رديت عليها وصوتي يرجف من القهر والدموع ترس عيني:
ــ ولج شلون معلية طلعت أبن علاس أختي الجبيرة متزوجة زواج سري بعدوي ومطلقة منه لكيت ورقتين وحدة زواجج والثانية طلاقج اما الزغيرة مصيرها مجهول وعليها تهمة تتعاون وي البعث لا هي موجودة و تدافع عن نفسها وتفهمني لا هي يمي و تكولي لا خوية.. غلطت بحقي وآني مظلومة ولا لكيت هنا دليل قاطع بخصوصها كولشي مجهول رحمة وينج خوية.
دنكت فضائل:
ــ شنو شو دنكتي تعرفين؟ شي عنها أحجي.
ردت علية بصوت مخنوك بالبجي والتوسل:
ــ الأفضل تبقى ذكراها بعقلك طيبة لا تسألني أي شي عن رحمة فدوة والله ما ردتك تكتشف حقيقة أبوي.. وأمي..
هاي أكتشفتهم وشوف شصار بيك عوف رحمة أن جانت عايشة أو مية الله أرحم بيها
جمدت بمكاني و باوعتلها:
ــ أمي؟! هلا.. هلا أحجي بلة.
رفعت راسها باوعتلي و عضت شفتها وسكتت لزمتها حيل:
ــ احجي ولج احجي شنو هاي الصور أغلبهم ما أعرفهم بتواريخ قديمة بس هذا هذا مألوف يا ربي بس أذكره منو هذا.
مديت الصورة بوجهها وصحت بيها:
ــ باوعي منو هذا ولج.
دنكت وما حجت فشمرت عليها وحدة من خشب إطار الصورة:
_ احجي منو هذا و ليش هاي الصور هنا.
ــ هذن.. يخصون أبوي.
ــ إي.. قريت إنجازات أبوج اللي أفتخر بيها بس ذني صور منو خاصة هذا منو ولج؟
ــ البقية ما أعرفهم.. يمكن تخص ناس بوظيفته وآني أكتشفت حقيقتهم متأخرة و بيوم الإجاني يرجف وگالي
فضائل.. ركبتي بين إيديج إذا أنعدم أو أنفضح كل خواتج يتطلكن وأخوج يضيع خوية آني أحبك وأحب خواتي وأنت بالذات أحسك أبني رغم عمري مو مال أم إلك بس مستعدة أموت ولا تنمس بشعرة كرهت مرتك لأنها بعثية بنت بعثيين وذول اللي يدخل بينهم يضيع ما حبيتها حاستي جانت تكول وراها طلايب.
_ دعوفي المرة.. هسة مو كل شوية شايلتها وداگتها آني قريت الورق رسائل تعليمات وأوراق كولها تدل على وظيفة أبوي السرية مخبر سري هذا دسألج عنه قوائم أسماء وتواريخ إلقاء القبض عليهم.. ومن ضمنهم أسماء ولد مرته لعد شكد جان حقير وبلا ذمة ولا ضمير جان يمثل علينا حزنه لفقدهم ويمثل كرهه للبعث اللي هو أصلاً جان مرتزق عدهم باعهم للبعث وسفة عليك يابة.
ظليت مصفن مسحت دموعي بعكس
إيدي آني شخص أمني ومارة علية هاي السوالف سالفة زرع المخبرين بدوائر الدولة وظيفتهم مرتزقة يكسرون رگاب العالم ومرة ثانية لزمت العقد اللي بي بصمتها وتوقيعه للـؤي.. هنا اختنكت وظليت أنهت وبإيد ترجف لازم الورقة وبإصبع إيدي الثانية صرت ألمس بصمتها:_ دسألج أيضاً عن هذا ولج من يمتى؟ من ورى ظهري هذا اللي أشوفه.
وكفت وآني برجلي أرفس بالغراض وبالهوسة اللي صايرة بالگاع وأصرخ بكل صوتي:
ــ شنو عقد زواج شيخ وبالسر محد يدري بي وشنو طلاق دخت.. ولج شگول للعالم من هيج متقبلين بأي واحد يتقدملج شنو سوالف مخبرين للبعث شنو الصاير بهذا البيت وآني أطرش بالزفة؟
_ أنت تدري بذاك الوكت الما يطيعهم مصيره موت لو التشويه وأبوي.. خاف ياخذون كل بناته فضحى بية للمرة الثانية.. المرة الأولى مجنت أعرف حقيقة أبوية ولا لويش جبرني على مؤيد النذل هة عبالكم ما تزوجت لأن خطيبي انعدم وظليت ناسكة وراه أصلا نذل جان بس هذا حجة جانت كدامكم وكدام العالم شحجي شكول على واحد نذل. وقتها ما أعرف بشغل أبوك.
ــ طلعتي خبيرة وصايرتلي منتجع للزلم.
رفعت راسها وعيونها و صرخت بية وهي تناشغ:
ــ آني ضحية مثلكم آني ثمن حياتكم كولكم الأولى مؤيد اللي خطبني جنت مراهقة طفلة متفهم ولا تعرف شكو طلعت السالفة صفقة لأن أبوك لاعب لعب مقابل كم فلس يسوي كولشي جان مخبر للبعث و بنفس الوقت يدز أمور حساسة لجهات معارضة للبعث مؤيد كشف أبوي وبالأدلة وهدده يفضحه ويسكت مقابيل ياخذني آني.
_ كـملي..
نزلت راسها وهمست:
ــ شكمل عقدولي عليه على إنو هو خطيبي بس أبوي.. يعرف شنو الثمن وأخذه مني وكسرني وآني طفلة ما فاهمة شي ولا أعرف ليش صار هذا كل الأعرفة شنو صار لازم أسكت لا انفضح.
_ سنين تحجين خطيبي اللي أستشهد وكرهت الزواج من بعده ترفضين كل اللي تتقدمولج.
ــ يعني شكول أعتدى علية وبموافقة أبوي جنت الثمن.. وسكتت فقط هاي هي خطيتي.
ــ الله لا يوفقج يوم السكتي..
همست بـقهر:
ــ على أساس متوفقة آني المهم والظاهر أبوي.. تربص لمؤيد وظل وراه لمن وكعه بفخ الإعدام الوحيدة اللي خسرانة بهيج لعبة هي آني.. خسرت نقائي وخسرت شبابي صرت كبش فداء لأبوي.. و لأخواتي.. ولأخوي.. إلك أنت بالذات.
_ الله أكبر آآآخ يا راسي أحس نفسي بدوامة عايش بنص بيت الناس اللي بيه مثلت علية الفضيلة و الشرف و كولكم طلعتوا عارات وانطمغت بگصتي استزوجتوني.. استغفلتوني وأنتم تحجون على مرتي وطلعتوا تبيعون روحكم للفلوس وللبعث ولغير البعث كرهتوا مرتي خليتوها قربان لوصوليتكم وقذارتكم وعقدج على لـؤي.. شلون صار مفاجأة المفاجآت طلع الكلب أبن الكلب أبو نسب وآني ما أدري هاي شيلمها والله ما تلم ولج هذا عقد عقد زواج مو رسمي يا سگط أنتِ وأبوج.. الله لا يرحمكم دنيا وآخره دمرتوني خذلتوني.
هنا صرخت منتفضة وباوعتلي وهي ترجف:
ــ هذا ذنبك أنت.. أنت اللي فوتت بنت البعثيين لبيتنا آني أكثر وحدة عانيت وانبعت مرتين تدري أبوي.. اعتزلهم بآخر عشر سنين من عمره من ورى سالفة مشاركته بتسليم ولد مرته للإعدام جان خايف لا دخولها لبيتنا يفتح السوالف القديمة وهذا اللي صار لرحـمة.. و الصارلي ذنبك أنت وحدك وبذمتك جبت بنت البعث ببيتك و خليت لـؤي.. يلتف علينا مثل الحية لـؤي.. اللي ما يترك ثاره أبداً.. اعتبرك تحديته من أخذت بنته دون رضاه هنا جان لازم يردها إلك بينا لؤي اللي تبين جان ينتقم من بت أخوه بالربى و بنت حبيبته اللي خانته وضاعت ناس بريئة راحت ضحايا وإجثتت أعمارها بسبب هذا الصراع بين إثنين عشاق هديل ولـؤي.. لا تباوعلي طـيف.. سمعت عمة مرتك ونقلتلي المفاجأة الكبرى كل اللي صار بينا طلع لعبة إنتقام من بذرة خيانة.. ماجدة جانت هي البذرة اللي لؤي نكل بيها علمود.. يمحي واقع بذرة خيانة أخوه وحبيبته أما زواجي من لـؤي جان ثمن حياتك أنت وحياة أبوي وطلاقي مل مني جنت نزوة وعدت
كدر يوصل لماضي أبوي المشبوه و شلون جان يلعب على الحبلين يشتغل لصالح البعث وبنفس الوكت لجهات تعارضهم يعني هدد بإنكم تنعدمون ما أعرف ليش أختارني وليش عقد وهو يگدر ياخذني بالحرام هو أصلاً لا يحلل ولا يحرم بس بوكتها من صرنا وحدنا كالي بيج صفات شرسة و انا سليطة لسان وآني أميل لهيج نثايا هذا جان تعبيره المريض گال أميل أكسر جبروتهن آني أكره النساء بيج صفات هديل والظاهر بي طبع يدوس عرض اللي يعتبره أخذ شي يخصه ودون رضاه أصلاً كل اللي صار إلي ولرحمة جان إنتقام منك أنت وتنكيل وإشباع لشهوات سادي مجرم.. منحط.
وكفت وضربتها راشدي:
_ أنتِ **** وعجبج الوضع مرتين تصيرين متعة إي.. أسميج ونسة للزلم وبحجج ما قنعتني وين جان عقلج و شلون تقبلتي على نفسج ولج أنتحري ولا تخلين نفسج بخانة الساقطة ولو بعقد زواج.
فشرت عليها مخليت فشرة ما حجيتها بحقها دنكت:
_ حقك تفشر.. بس بوقتها جان صعب أرفض و أسلم أبوي.. لو أسلمك أنت لو أسلم خواتي.. آني ضعت من جنت مراهقة بقت على هاي المهم جان لازم أنقذكم والله ما ردت توصل لهنا ولا تكدر خاطرك بشي راح و أنتهى وآني اللي تدمرت مرتين المرة الأولى اللي باعني أبوي.. بيها وأنت المرة الثانية اللي دخلت الثعبان لبيتنا فلا تحاسبني
ظلت تناشغ وتجر حسرات وعينها على الأوراق:
_ كم مرة أحبس نفسي هنا و اكعود أصفن أباوع لصورة الريس ومن يوم اللي أبوي ضم العقد ورقة طلاقي وراها وي باقي أسراره المضمومة سنين جنت كل ما أمر للهول و الصورة معلكه أباوعلها لو أمسحها من التراب أگول شيصير لو كل الخفايا الي بداخل هالصورة ماله وجود شيصير لو عشت مثل البنات أتزوج و أخلف وعندي رجال وحياة خوية أنت أستقريت وعشت حتى لو بعد كل هاي السنين بس آني.. آني أنعدمت حياتي.
_ لـؤي..تزوجج لغايات بعيدة تزوجج علمود يسيطر على عقلح وزرعج ببيتنا جاسوسة.. جنتي تنقلي أخبار ماجدة حتى تنكلين بيها وحتى تحاصرينها و تسلميها إله مو لو آني غلطان.
دنكت:
_ بنت البعثية أنذال.. و هو نذل بعثي يطبهم طوب راس براس إي.. سويت كولشي حتى أتخلص منها لأن جنت أعتبرها نحس وشؤم دخولها لبيتنا هو اللي دمرني بالمرة الثانية جنت أگول هالنحس لازم يغادرنا حتى نعيش بس اللي صار عكس راحت تضحيتي بلاش كوله بسبب عناد مرتك اللي ما طاعته إي.. لا تباوعلي هيج ما طاعته و الثمن شنو راحوا أهلي و خواتي وأنت.. أنت اللي عليك حكم إعدام غيابي ولو ما هربك جان هسة أنت ميت آني سويت كولشي حتى أنقذكم بس الحقير غدرني أخل بالإتفاق وأعتقل العائلة ودمر كولشي.
ــ وأمي.. أمي شنو سالفتها بلة.
ــ أمي.. جانت تكعود بتجمعات النسوان وشتسمع تنقله لأبوي.. أي شي مشبوه نكتة ضد الريس جفصة لسان كلمة منا منا كولشي تنقله إله وأبوي.. ما يكذب خبر يركض يرفع بعائلة الحاجية تقرير أمني يشيلها هي وعائلتها.
_ برافو.. ما شاء الله جنت گاعد بنص عصابة وآني ما أدري تدرين كم روح ماتت ظلم كولها بذمتهم تدرين الأهالي لو عرفوا منو اللي عالسهم وباع ولدهم شراح يصير آني اللي أوگع بيها آني وبنتي وابني ميجون يحاسبوج أنتِ و لا يحاسبون خواتج يجون على الإبن على حمال الحطب آني تدرين هاي سالفة جبيرة لو طلعت آني اللي أروح بيها و هسة لازم تحجيلي عن رحمة.. بريئة؟ مذنبة؟ مغدورة؟ لو غادرة؟ أريد التفاصيل.
_ ما أعرف عن رحـمة.. شي والأفضل تحتفظ بذكرى حلوة بذاكرتك عن مدللتك رحـمة..
_ كلامچ هذا.. وحده دليل على انج تعرفين كولشي عنها بس حقيرة و كلبة بنت كلب نذلة ما تحجين بعد اللي عرفته منج صار صعب نتعايش هاي فضيحة وصرت بيها بلاع موس بس فضائل.. لهنا وانتهت خوتنا تبريت منج ليوم الدين وفوكها تضمين عني أهم سر عندي اللي جنت أدور عليه رحمة وين أنخطفت أنقتلت؟ لو جانت هي الثانية هم عدها سالفة تجيبلي العار و إضافة كرهج لمرتي الدون مبرر هذا وحده خانة تخليني أتبرى منج مع العلم الصار بينا أعتقالات واعدامات و اللي أختفت كله حوبة العالم اللي راحت من ورى امج وابوج الله سلط عليكم الأقوى منكم (لؤي) مثل ما تسلطتم على الأضعف منكم شراح تكولون لألله من عدمتم ولد المرة الماتت وراهم قهر بعتوهم للبعث مرتزقة أهلج وسفة علية.
عفتها وطلعت فتحت الباب وشفت ماجدة.. واكفة بالهول أول ما شافتني توترت وعيونها جانت تحجي والظاهر سمعت الحقيقة المرة وموقفي يمها جان مخزي العار راكبني من كل جهاته نظرتها الي نظرة تشفي والله حقها اللي جنا نتهمها بالبعث وقذارته طلعنا إحنا اللي عايشين بوسط مستنقع.
ــ طـيف.. دتنظف فوك فنزلت أگولك أريد أشوف أختي وأبقى آني وطيف يمها هاليومين اللي تروح بيهن لذيج.
_ وإذا رفضت تروحين.. راح تسمعين كلامي ومكانتي وهيبتي أنهزت كدامج أكيد سمعتي المفاجآت العظيمة سمعتي حقيقة العائلة اللي ولدتني واللي جنت أرفع راسي وأفتخر بيهم.
كلت آخر كلماتي وآني أستهزئ من روحي ومن وضعي ومن حظي الأغبر اللي ولدني بهيج عائلة لا ذمة ولا ضمير ولا شرف كما تدين تدان عقوبة أمي وأبوي و إعدام خواتي اللي راحوا ضحايا بلا ذنب وفوكها أختفاء الزغيرة رحـمة.. اللي ضاعت وضعها شبهة ما أدري عنها جانت ظالمة لو مظلومة.
ردت ببرود :
_ سمعت كولشي وآني مو أنت حتى أحمل إنسان ذنب أهله آني أحبك إلك لشخصك.. لنفسك من غير مسميات ولا عوائل ولا أصول ولا عشاير أحبك مهما جانت جذورك.. حتى لو لا سامح الله جنت أنت أبن حرام هم أتقبلك
أبتسمت لقصفها وهزيت إيدي :
_ هو عوزي بس أطلع أبن حرام وتكمل السبحة الحمد لله ورى هالمفاجآت ما طلعت أبن حرام جان طلقة براسي وأخلص النوب تضحك الفطيرة ولِج سمعتي اللي سمعته آني مصدوم أنتِ همين عبري عن صدمتج.
_ آني تجلدت كوتلك گلبي بعد ما يهتم ياما مريت بصدمات وخذلان كسر ظهري هي بقت على هاي يمعود أنسى بس لازم نغادر البلد لا أحد يكتشف فعايل أبوك وآني ما أتحمل ما أشوفك تنقتل.
شايل بإيدي الأوراق والصور عدا عقد فضائل وورقة طلاقها تركته إلها علمود تواجه بي مصيرها باوعت لماجدة وگلتلها:
ــ ما أترك بلد بنيت إلي بي مكانة ومحلاتي وشغلي الله يعرفني شنو وحاشاه أنظلم بأفعال أهلي حضري جنطج وجنط طـيف.. مستحيل أبات ليلة وحدة ببيت الأسرار هذا خلاص.
ــ بس وين نروح هسة؟
ــ لـبيتي.
صرخت وهي معترضة:
ــ يم أم عطوب؟
أبتسمت أغورها أحاول أطلع نفسي من مود الصدمة والخذلان:
ــ وشمدريج بعطوبها.. شايفتها؟ ترى فيروزة تخبل.
ــ لا والله ما تخبل أم عطوب مو شفت صورة أبنك بنقالك أكيد يشبه أمه مو مثلك حلو.
ــ كفي غراضنا ورزميها القرار ننتقل لبيتي وما أريد مشاكل هناك لتجفصين وتسمينها أم عطوب گدامها.
ــ وآني شمدريني بنتك تلقبها هيج
ــ لا تصيرين فقيرة دخيل الله خليلج گلب وبعدين مالج علاقة ببنتي آني سحبتها من عمتها وجبتها يمج حتى تصقلينها و تتعلم الأدب والأخلاق والأحترام منج مو هي اللي تصقلج وتعلمج الهباشة و العذربة.
عفتها وصعدت فوك للمشتمل كعدت بالمطبخ والقهر ياكل بگلبي شغلت الطباخ وحطيت يمي إنجانة كبيرة بديت ألوح الأوراق والصور للنار وحدة ورى الثانية وآني أباوع لإرث عائلتي وهو يتحول لرماد جنت أريد أمحي ماضي غير مشرف ماضي أدري بگلبي إنه ما ينمحي بأي نار وراح يبقى مطبوع بذاكرتي بس لازم أكون أكثر حذر من أبوي ومن فضائل لازم أعدم كل خيط يربطني بيهم خوفاً لا بيوم من الأيام تطلع ورقة منا لو صورة منا بالغلط وتصير سبب بإغتيالي أو موت عائلتي اللي مالنا أي ذنب بأخطاء وإجرام ماضي مسموم دفعنا ثمنه وإحنا مالنا بيه ناقة ولا جمل.
مـــــــــاجدة..
سمعت اللي سمعته بس كالعادة صايرة بهيج مواقف مشاعري باردة مثل الثلج وگلبي صخر صعد وطلب مني نترك البيت ونروح لبيته الثاني بس آني ما قبلت النوب خاف عوزي مغثة أروح أعاشر مرته.
رحت بسكته ما أرتاح إلا أودع عدوتي بشماتة هو منو يدري فرصة وإجتني لحد رجلي أرد جزء من أذيتها إلي بالماضي حيل شدت وياي وباگت بنتي مني ومن أجيت أتوسل وأبجي أريد ضناي طردتني و گالتلي ماتت طليت على فضائل.. اللي بعدها گاعدة بغرفة رحمة.. رحمة اللي للأسف جانت نقمة بحياتي و صدوك عليها المثل (لا يغرك ضحكة من وجه صبوح هاي دنيا لبست الضباع أثواب الأسود) مديت رأسي لهاي الغرفة اللي صارت شؤم بحياتي تلفتت لبرى خاف أنلگف زحمة وعيب من مـاجد خطية الصدمة بأهله كسرته وهدت حيله بس السولة بية صارت إلا أشمت بيها ضحكت بشماتة وگولتلها:
_ اايييه.. دار الوكت يا فضائل تذكرين من أجيتج أستجدي منج التفهم.. بس الفرق بيني وبينج آني جنت مظلومة وأنتِ ظالمة والله شمتانة بيج كد ما أذيتيني وأذيتي العالم بلسانج وهسة كولشي أنكشف مممممم أثاري هيج الحقير لـؤي دزلج بنتي وفهمني ماتت أثاري جان إتفاق بينكم هههههههه طلعتي أنتِ المورطته.
تعمدت أگلب الكلمة بدلع:
ــ طلعت بينكم سوابق وعلاقات أنتن شلون ترخصن روحجن للزلم بهاي السهولة دون مخافة الله شنو ضحيت لأجل أبوي.. شنو لأجل أخوي وخواتي ههههههه گولي عجبج لـؤي..
ظليت أحجي وزعت كل اللي بگلبي من قهر وسنين الظلم ودرت وجهي عليها وبحدة گولتلها:
ــ من حفر حفرة لأخيه وقع فيها وگعتي يا فضائل و عموماً بنتي بعد ممنوع تتقربين يمها من هاليوم أريد أعيد تربيتها من جديد ما أريد رحمة.. ثانية تطلعلي بالعائلة Oh my God دتبجي عجوز البين لا عيني بعد بنتي خط أحمر ما أريدها تطلع على عماتها الساقطات أوييي.. طلعتن بيئة ولج هههههههه الله فشلجن وفضحجن وحوبة كل مظلوم ظلموه أهلج طلعت بيجن وحدة ورى الثانية.
همست مكسورة:
ــ آني ضحيت لأجل أهلي لأجل أخوي و خواتي وما محتاجة تقييمج إلي يا ماجدة على الأقل أمي بقت لأبوي بس بحياتها ما جانت معبر وجسر للطيبين مثل أمج شاكر وسهيل و إحتمال لـؤي ماخذله نصيب بالسر المثل أمج هي الساقطة يا أدبسز رجلج يقبل بهيج فشاير وغلط على خواته أما طـيف.. أخذيها واشبعي بيها بس وربج البزر يحن لرباه.. مو لرحم الخلفة.
عفتها ودرت ظهري وصعدت للمشتمل مغثوثة منها طايحة الحظ كل هاي البلاوي وتحجي بعذربة وصلافة لو منها أدنك وما أرفع رأسي.
دخلت المشتمل ببرائة ولا جني فوخت گلبي.. باوعلي مـاجد وكال بحدة:
ــ تشفيتي أخذتي كفايتج.
استحييت:
ــ شنو شلون عرفت رحت أضايقها مثل ما جانت تضايقني بلسانها.
ــ صرت أعرفج مـاجد.. الجديد يفهمج أكثر من الفاهي اللي عرفتيه قبل و الأفضل تتركينها.. يكفيها هسة حتظل وحيدة وخسرتني إلي الجنت سندها لملمي أهم الغراض وأنتِ طـيف.. ملابسج جيبيهن وفضنها خل نطلع.
ظلت تبجي:
_ ليش وعمتي.
صاح بيها:
_ يلة لا أبيس بيج من أنعل أبوج لأبو عمتج.
خافت منه ونزلت تركض وگالي بحدة:
ــ نزلي وراها وممنوع حتى تسلم على عمتها لو أكولج لملمي غراض المشتمل وآني راح أنزل وأنتِ همين ممنوع بعد تفكين حلگج وياها خلاص هاي ماتت عندي وتبريت منها ليوم الدين.
نزل وراها لأن خاف بنته تروح لعمتها لميت ملابسي وهو هم جانت عنده كم قطعة هنا لملمتها إله وأخذت شكو غرض أو ذكرى من زواجي جانت باقية بالمشتمل ومركونه من سنين حتى ملابس نوم ليلة دخلتي قبل سنين شلتها وهواي ذكريات عفتها وراية أخيراً حترك هذا البيت اللي خنگني بس وين لبيت بيه ضرة وطلايب.
مـــــــــــاجد..
واكف على رأس بنتي وهي تلملم أغراضها ملابسها كتبها وحاجاتها وهي تبجي بحرگة وتنشغ:
ــ ولج عمة.. فرقونا الظلام.
خزرتها وصحت بيها:
ــ بلا لغاوي يلة بلا نفس لمي غراضج بسكوت.
ــ بابا بلا نفس يعني أموت.
ــ ومـوتتهم.
صوت مبحوح بالباب:
ــ أسم الله من عمري على عمرها هي الشي الوحيد الربحته بحياتي وهسة تريد تحرمني منها خوية حرام عليك أذكر كسرة ظهري وسهر الليالي أنت هارب من البعث وجابوها تنزف ميتة أحيتها بين المستشفيات والدكاترة.
درت وجهي عنها متجاهلها :
_ طـيف.. أستعجلي.
عينها على عمتها وتلملم تبجي:
_ ولج عمتووو الحنينة فرقونا الكلاب.
رفستها:
ــ أحترمي ولج.
بلواتة ردتني:
ــ جان أحترمت عمتي الكبيرة وصرت إلي قدوة أقتدي بيها.
فضائل: كافي بنيتي.. دموعج غالية لا تورم عيونج وأنت خوية.. مو كوتلك لا تطك طـيف..تطك گلبي لو طكيتها.
هم تجاهلتها كملت تلملم أخذت جنطها برى للسيارة ولكيت ماجدة.. منزلة جنطتين ومبدلة مكملة وتنتظر:
ــ روحي للسيارة أجيب الهبشة بنتج.
رجعت لداخل بيت فضائل.. لكيتهن متحاضنات جريت بنتي بقسوة أسحل بيها
_ يلا.
وخزرت فضائل:
ــ خلي أسرارج تفيدج خسرتيني ظلي ضامة علية سر رحمة.. خلي هذا السر يملي عليج وحدتج.
عاندت طيف وظلت حاضنة عمتها وذيج متمسكة بيها ويتباجن بنحيب صحت بيها:
ــ يلاااا.
دفعت فضائل لورى وجريت طيف من حضنها ظلت تزاگط وتضربني بوكسيات على صدري وهي تصرخ:
ــ بابا لاااا.. بابا عمتووو لا تفرقنا.
من شفتها فرفحت وفقدت السيطرة عليها سطرتها راشدي حتى خشمها نزف شوي وظلت مصفنة ومصدومة من قوّة الراشدي جريتها وراي بدون حجابها اللي وكع من متنها للكاع شمرتها داخل السيارة وقفلت الأبواب ببصمة السويج ورجعت أخذ سلة بيها أغراضها وكتبها لكيت فضائل.. حاضنة حجاب طـيف.. تشم بيه:
ــ لا خوية.. بنيتي أترجاك مو هيج تعاقبني.. أقتلني و أرتاح المن مبقيني بين هاي الحيطان وحدي والله أتخبل.
ركضت و ركعت بالگاع بكل أنكسار وحضنت رجلي تتوسل وخرتها بقسوة وعفتها و طلعت وسديت الباب وراية وانتهت خوتنا.. وما بقت بيناتنا بس ذكريات جانت حلوة بيوم من الأيام وهسة لبست أثواب الخذلان والانكسار والصدمات.
مـــــــــــــــاجدة..
أنتقلت لبيته وطلابة شكبرها وشعرضها ما تقبل بية و تعال طلك.
فيروز : هاي شنو ماجد.. شنو هاي منو.
باوعت لطـيف.. ورجعت باوعتلي وصرخت كامت تخمش بوجهها وتدك على عيونها:
ــ صخام الصخمج فيروز جايبلي ضرة للبيت وصلت بيك تجيب لبيتي أم طـيف.. تريد تموتني أنت المن جايبهن إلي.. المن.
واكفة وأباوعلها عاد ما تحملت الواحد صحيح تربيته ما تسمحله و يسكت بس لا والله إلا أصير إلها بيئة فرديتها متخوصرة واخوزرها أريد أثبت شخصيتي من أول يوم لا تستضعفني:
_ لو تنجبين وتاكلين تبن عاجبج هذا الموجود ما عاجبج الباب يفوت جمل هذا بيتي أصلاً.. وأنتِ الدخيلة علية آني الأولى بحياته آني أول فاكهة يتذوقها موتي بغيضج آني أول أمرأة بحياته ويكفيني فخراً هالشي.
ما أعرف شلون رتبت الحجي بس بإرادة الله ترتب طـيف جانت خانسة من الكتلة ومقهورة وممرودة على حرمانها من حضن عمتها راحت گعدت على باية الدرج مدنگة وبس تناشغ وأبوها واگف متونس بالمواجهة بينا والغيرة عليه بين نسوانه ومرة يرجع بقلق وخوف على طـيف.. وبس دنكت رأسها رجع خشمها نزف خيط دم أحمر راح ركض عليها گمبص كدامها و طلع كلينس من جيبه يمسح بخشمها وحضنها لصدره وهو يذب حسرات.
_ وخر وخر فرقتنا يالظالم بس خليها بعقلك الظلم ما يدوم.
_ اشش أهدئي بنتي أنسيها هنا مكانج الطبيعي يم أمج.
مرت أيام فوك ضيم فيروزة وطلايبها طلعلي ضيم بنتي وعنادها تمرضت على عمتها ووصلت للموت لو ما الله سترنا ولطف بحالنا بس ظل أبوها معاند وحلف ما تشوف عمتها وحتى نقالها سحبه منها الصراحة آني ما تدخلت نهائياً مردت طيف.. تگول أمي دتوز أبوي علية ولا ردت ماجد يتصور آني متونسة لأن أخذها من عمتها ذيج الحرامية بواكة البنات
و لاحظت شي ماجد.. صاير يتغاضى هواية عن طلايبي وية مرته ذيج أصلاً ميشكيها يسكت لو أشتكت مني يمكن موقفة وأهله خلوه ميتجرأ علية أبد بس هذا ما أريده اله أريده يبقى بطبيعته بالأول ما حجيت لصاحباتي كلت سره و أضمه بس بعد منو يكدر يضم سالفة على سـؤدد.. وهي هم مشاكل وي رجلها تزعل و تطلع حامل وترجع تولد ويتصافون وهم نفس القوانة (حسن)
دخلت لغرفة بنتي.. ما فتحت وياها الموضوع ولا عاتبتها بس أنطيتها تنبيه حازم:
ــ هالمرة هاي عديتها بس بعد لتعيديها فكينا من أبوج لو عصب.
و الحمد لله رجعت بساع لأن ورى جيتها بشوي سمعت صوت سيارة ماجد.. وديهورن
كوتلها :
_ فتحي سلايد الكراج لأبوج.
رفعت جتفها و نزلتهن:
_ مااا.. مزاعلته.
هزيت إيدي:
_ بكدج هو وتزاعليه عمي مال يلوي أذاناتج.
كمت فتحتله الباب ووخرت جانب فوت السيارة وسديت الباب نزل:
_ وين طيف.. شكو أنتِ فاتحة الباب تستعرضي للشارع.
سديت الباب عدل:
_ الشارع فارغ دنيا الظهر.
ــ تاليتي أخلي باب على ريموت وأخلص لو هسة سند.. كبير يتلكاني
ويفتحلي الباب.
نزل من الصندوق علاليك المسواك وساعدته بيهن:
_ بنتج أكلت لو بعدها معتصمة؟
_ سويتلها تفاحة ونوتيلا.
باوعلي وصفن:
_ طيف.. وأكل الكيوت شنو؟هاي مال تشريب عظام مال باجة وراس بصل هههههه والله يا ماجدة.. هي جاملتج من أكلتهن.
أبتسمت:
_ المهم أكلت.
فات وتلكته فيروز.. شايلة سند عريان طرك الحفاظة وهي تهز بروحها متضايقة :
_ اوووف همزين أجيت هاك ابنك أوي خاصرتي متت يريد شيل وما كفيت شغل وهاي بنتك توها رجعت آخر مدارس تحل بالثنتين الظهر وأم طيف كاضيتها تسوي حلويات وتخلي بالثلاجة صدوك ماكو أكل ما طبخت.
عيني على فيروز التذب سم وعلى نقالي ومريم تتصل على الشريحة.
ترخصت اخذت النقال للطارمة فتحت الخط صوت مريم يبجي خوفني لأن ننتظر تحاليلها والزرع يطلع.
_ دزيت بصمة بالكروب مطفية النت فتحيه وسمعيها.
_ شصاير وكع گلبي ولج بس لا.ااا
يتبع...
الفصل السابع والخمسون من هنا