رواية مشوار بدور الفصل السادس 6 بقلم سلوى عوض
سند خلو بالكم، الست بدور والست أحلام عاملين المشروع ده يسترزقوا منه، ربنا يوسع رزق الجميع يا رب
المعلم مخلوف صاحب محل خضار وفاكهة كان جالسًا على القهوة
مخلوف الفلفل والطماطم والليمون والبصل من عندي، كاتوه لامؤاخذة عشان بنات حتتنا الجدعان
العم عزيز البقال كان أيضًا جالسًا على القهوة
عزيز أنا بقا عندي الزيت والملح والبهارات، بقولك إيه يا مخلوف كمل جميلك واديهم حاجة السلطة
مخلوف يا سلام، إنت جيت في جمل، عيوني
سند وإنت يا معلم أبوالخير، إيه مافيش حاجة جاية منك؟
أبوالخير بمسكنة وأنا حيلتي إيه ما إنتوا عارفين
مخلوف يا راجل عيب عليك، اقف مع بنات حتتك بأي حاجة
أبوالخير ما هم هيبيعوا ويكسبوا، يبقوا يصرفوا
سند إيه رأيك بقا، كل يوم هتطلع خمسين رغيف عشان السندوتشات
أبوالخير كل واحد يحكم على نفسه، اللي عايز يوجب يوجب من جيبه مش من جيب غيره، لامؤاخذة
سند خلاص يا أبا، الله الغني عنك، بس لامؤاخذة بقا من هنا وجاي هتدفع حساب المشاريب.
أبوالخير يا سلام، بتبيع صاحبك عشان جوز البنات دول؟
سند دول ولايا يا صاحبي ومحتاجين حد يقف في ضهرهم
أبوالخير عليا أنا ولا عينك زاغت على البت بدور؟ حقك يا أبا، البت ملونة وفرسة
سند أخص عليك، إنت تعرف عني كده؟ أنا باعتبرها زي بنتي
أبوالخير زي بتك زي بتك
سند اه يا جدع
أبوالخير البت تحل من على حبل المشنقة، مش الغفر اللي عندي في البيت جوز عجول وأنا بعلف فيهم وبس، بس لأ دي لسه أوزة وأنا بحب العتاقي، الوله نواشي طول بعرض وتهز الأرض، وليه عفية بصحيح، هي دي الحريم اللي تتأني في البيوت، وكمان معلمة ومرسملة، ده شكلها كده هتلعب، هنحط الدقيق على الحليب ونعمل أحلى بسبوسة بالقشطة، وميضرش برده لو حدقنا وكلنا كبدة من عند بدور
سند والله شكلك هتتروق يا أبوالخير
وهنا يذهب أبوالخير حيث تقف بدور
أبوالخير إيه يا أبلة بدور، ألف مبروك عليكي، أنا كمان حلفت إني كل يوم هطلع خمسين رغيف هدية مني ليكي عشان تعملي بيهم السندوتشات
بدور كتر خيرك يا معلم، كلك واجب
أبوالخير أمال فين الست نواشي؟
بدور الست نواشي فوق عند جدتي بتاخد منها الإيجار
أبوالخير طب اعمليلي كام سندوتش أدوق كده
أحلام هتدوق كام سندوتش؟ ده إنت كرشك واسع أوي
أبوالخير عينك يا أبلة، هو أنا هاكل ببلاش؟
أحلام خلص، عايز تاكل إيه؟
بدور براحة يا أحلام
أحلام اسكتي إنتي
ونذهب إلى طاهر وهو يتذكر فلاش باك، فها هو طاهر يتصل على طه
طاهر عملت إيه؟
طه كله تمام، بكرة هيكونوا في اليونان، أنا كده مهمتي خلصت، ممكن ترجعلي مراتي وبناتي أرجوك
طاهر لا يا متر، لما يوصلوا عندي وقتها أبقى أرجعهم، يعني هعمل بيهم إيه؟
ليغلق طاهر الهاتف في وجه طه، ليجلس على الكرسي الهزاز ويشعل سيجارًا فاخرًا وهو يتحدث مع نفسه بصوت عالٍ
طاهر عنايات الغبية هي وابنها الحمار خدموني من غير ما ياخدوا بالهم، هههههه، كلهم بهايم وأنا هسوقهم بمزاجي
وهنا يدخل عليه أيوب
أيوب إيه يا بوص شكلك مبسوط
طاهر لازم أكون مبسوط عشان المغفلين جايين بكرة
أيوب يعني نويت خلاص؟
طاهر طبعًا
أيوب غبار كان بيقولي لو عايزني أخلص عليهم في مصر أنا جاهز
طاهر لأ.
طاهر ده برده كلام يا راجل؟ أمال مين اللي هيشيل البلاوي دي كلها؟
أيوب برافو عليك، دماغك دي سم
طاهر امسك الخشب يا راجل
أيوب اديني أهو مسكته
طاهر عايزك بقا تسرح الرجالة يلموا الحاجة
أيوب إحنا مجهزين طلبيات كتير
طاهر تمام أوي كده، المهم تاريخ الصلاحية لسنة قدام
أيوب حاضر
طاهر المصنعات بقا زودوا فيها البهارات أوي والألوان، خلي الناس تاكل
أيوب إحنا عملنا زي ما إنت قولت، فرمنا الأحشاء كلها حتى الريش، ولمينا الفراخ الميتة من المزارع على إننا هنعدمها، وطبعًا ظبطناها واتفرزت واتحطت في أكياس وهتتصدر
طاهر حلو أوي أوي، كده المغفلين بقا هيمضوا على الطلبيات وإحنا صاغ سليم
أيوب ده إنت الشيطان يقولك يا عمي
طاهر ماشي يا ابن أخويا، وبعدين القعدة ناشفة كده ليه؟ عايزين نطري القعدة، كلم البنات
أيوب أنا كده أحبك
طاهر طب يلا يا خفيف
باك
ليعود طاهر بالذاكرة
طاهر آه يا دنيا، كل حاجة بقت بتاعتي والكل شغال تحت أمري، برافو عليك يا طاهر، بقيت إمبراطور المصنعات في العالم العربي والمورد الوحيد للفراخ المجمدة.
ونتركه ونذهب إلى منزل زهيره، كانت زهيره تجلس مع نواشي
نواشي وهي ممسكة بمبلغ في يديها: قولتيلي كام دول؟
زهيره: دول إيجار الشهور المتأخرة والشهر الجديد كمان
نواشي: إنتي وقعتي على كنز يا ولية ولا إيه؟
زهيره: ولا كنز ولا حاجة، دي حتة صيغة كانت عندي وبعتها
نواشي: ولما إنتي كان عندك صيغة، كنتي منشفه ريقي على الفلوس ليه؟
زهيره: أصلي كنت ناسية
نواشي: فين حق إيجار العربية وبياتها؟
زهيره: حاضر
نواشي: أيوه كده، طول ما بتسدي تبقي حبيبتي، غير كده لأ
لتتركها نواشي وتذهب، لتجلس زهيره تتذكر الماضي
فلاش باك
اليوم هو موعد زيارة نجوي، فها هي زهيره قد ذهبت لزيارة ابنتها
زهيره: مالك يا بنتي؟ وشك أصفر كده ليه؟
نجوي: الحمد لله على كل حال، عملتي اللي قولتلك عليه يا أما؟
زهيره: اه يا بنتي، روحت لصاحبتك وشافتلي شقة أوضتين، الله يكرمها، وقالتلي متشيليش هم
نجوي: هي طول عمرها جدعة
زهيره: والله يا بنتي جابتلي حتتين عفش، وجابتلي بوتاجاز وأنبوبة، ربنا يراضيها
نجوي: خلي بالك من بدور يا أما
زهيره: في عيوني يا بنتي
نجوي أوعي يا أما حد يعرف مكانكم
زهيره متخافيش يا قلب أمك، ربنا يهون أيامك على خير
نجوي يا بخت مين بات مظلوم ولا باتش ظالم
زهيره أنا سيبتلك قرشين في الأمانات عشان لو احتجتي حاجة
نجوي ليه بس كده يا أما؟ ما أنا باكل وبشرب، هعوز إيه تاني؟ خليهم عشانكم
زهيره ربك مبينساش حد، وكمان صاحبتك شافتلي شغلانة فراشة في مكتب
نجوي منه لله اللي كان السبب في اللي إحنا فيه ده
زهيره مقدر ومكتوب يا بنتي
باك
لتعود زهيره بالذاكرة وهي تدعو المولى عز وجل
زهيره يارب طول في عمري لغاية ما أطمن على بدور
ونتركها ونذهب إلى جاسر، حيث كان جاسر يجلس في مكتبه ليتصل على شخص ما
جاسر ها عملت إيه؟
الشخص ويدعى تامر لسه، متقلقش، أنا مكثف كل جهدي وقريب أوي هبلغك بأخبار حلوة أوي
جاسر وأنا زي ما وعدتك، ليك عندي مكافأة كبيرة
وهنا تدخل عليه نجيه
نجيه إيه يا حبيبي، مش هتتغدى؟
جاسر حاضر يا ست الكل، هخلص المكالمة وجاي وراكي
نجيه طيب، بس على الله متجوعنيش زي كل يوم وفي الآخر تقول كلي إنتي يا ماما مليش نفس، إنت عارف إني بسببك بقالي كذا يوم مخدتش علاج القلب
جاسر يا خبر، إنتي بتقولي إيه؟ إزاي كده؟ إنتي مش خايفة على نفسك؟
وهنا تشعر نجيه باختناق
نجيه الحقني يا جاسر، مش قادرة أخد نفسي… هوا… هوا… روحي بتروح مني
جاسر أمي… أمي! إنتوا يا اللي هنا، حد يلحقني
هيب الخادم خير يا بيه؟
جاسر اتصل بالدكتور بسرعة وتعالى شيل أمي معايا، هنوديها المستشفى..
الفصل السابع من هنا