رواية مشوار بدور الفصل السابع 7 بقلم سلوى عوض
ليحمل جاسر نجيه ويذهب مسرعًا بها إلى المستشفى، وما أن وصل حتى أخذوها منه، ليتصل جاسر على سمير
سمير يا ابني إنت إيه زومبي مبتنامش؟
جاسر الحقني يا سمير، أمي تعبانة أوي وأنا هنا في المستشفى
سمير أنا جايلك حالًا
وبعد نصف ساعة يخرج الطبيب
جاسر طمني، أمي حالتها الصحية إيه؟
الطبيب خير إن شاء الله، مافيش حاجة، بس والدتك محتاجة قسطرة للقلب
جاسر ودي صعبة يعني؟
الطبيب لأ، سهلة جدًا، هو مجرد أنبوب بس عشان يوسع الشريان
جاسر يعني مافيش خطر عليها؟
الطبيب إطلاقًا، أهم حاجة لحالتها إن محدش يزعلها
جاسر محدش يقدر يزعلها
الطبيب طيب، إيه نبدأ؟
جاسر اه ماشي
الطبيب خلاص، حضرتك انزل الحسابات، هتودع مبلغ وإن شاء الله خير
جاسر مش مهم أي حاجة، المهم أمي، أنا ماليش غيرها
وهنا يصل سمير
سمير في إيه يا جاسر؟ طنط مالها؟
جاسر بعدين بعدين، انزل بس الحسابات حط مبلغ لأني مش قادر ألم على أعصابي
سمير استهدي بالله وقول يارب
ليبكي جاسر وهو يدعو الله
جاسر يارب أنا ماليش غيرك يارب، متحرمنيش منها يارب، مد في عمرها يارب… يارب خليهالي يارب
وتمر ساعة ليخرج الطبيب
ليهرول جاسر مسرعًا نحوه
جاسر خلاص خلصنا؟
الطبيب خلاص
جاسر وأمي؟
الطبيب مافيش حاجة، والحالة زي الفل، وكمان ممكن بعد ساعتين تروح معاك، الموضوع بسيط بس لازم تاخد علاج القلب بانتظام
جاسر حاضر تحت أمرك، طب ممكن ممرضة تيجي معاها البيت تمرضها؟
الطبيب والله الموضوع ده مع مدير المستشفى، اللي أنا أقدر أخدمك فيه أرشحلك ممرضة كفء
جاسر تمام، متشكر جدًا لحضرتك يا دكتور
الطبيب عن إذنك، وقبل الخروج همر عليها.
جاسر شكرًا يا دكتور، تعبتك معايا
لنترك جاسر ونذهب إلى الحارة، لنجد أن بدور قد ذاع صيتها في كل الحواري المجاورة، وأصبح لها زبائن يذهبون إليها، حتى طلاب المدارس كانوا أيضًا يأكلون من عندها
أحلام شوفتي بقا وشي حلو عليكي إزاي؟
بدور إنتي حبيبتي، وبعدين إحنا شركا
أحلام طب بقولك إيه، متيجي نتوسع شوية كمان؟
بدور إزاي؟
أحلام أقولك، نعمل سندوتشات بانيه
بدور إزاي يعني؟ البانيه غالي أوي والناس هنا غلابة زي حالاتنا
أحلام وإنتي فاكرة إننا هنعمل بانيه فراخ؟ لأ، ده فوق أحلامنا
بدور أمال؟
أحلام إنتي ناسية إن أبويا قبل ما يتعب كان شغال شيف سندوتشات؟
بدور اه، وبعدين؟
أحلام قولي بس إنتي اه وملكیش دعوة
بدور ماشي يا ستي، اعملي اللي يريحك
أحلام أيوه كده
بدور بتبصي حواليكي ليه؟
أحلام أصل راسي مصدعة وكنت عايزة بكار يجيبلي شاي
بدور سلامة نظرك، ما ستي أهي بتعمل أحلى شاي
أحلام ستك بتعمل شاي يعدل الدماغ، لكن أنا عايزة شاي يعدل القلب
أحلام إلا قوليلي صحيح يا بدور، إنتي ليه عمرك ما كلمتيني عن راجل لا معجبة ولا بتحبي، مع إننا متربين مع بعض؟
بدور مش عارفة، بس مش عايزة أشغل نفسي بحد.
وهنا يقترب عليهم المعلم أبوالخير
أحلام بوذ الغراب جاي أهو، يخربيتك على بيت رخامتك
أبوالخير ١٠٠ مسا يا أبلوات، عايز ١٠ شندوتشات كبدة وسجق وكتري الفلفل
أحلام فوت علينا بكرة، شطبنا
أبوالخير يعني إيه؟ أنا جعان دلوقت، آكل إيه؟
أحلام ما إنت عندك بيتين، روح كل في واحد فيهم
أبوالخير اعملي الشندوتشات أحسنلك
وهنا يراه بكار ليدخل القهوة لمعلمه
بكار الحق يا معلم، أبوالخير واقف يزعق للبنات
سند إيه يومه مش معدي، تعالى ورايا يا واد
بدور حاضر يا معلم، هعملك السندوتشات بس وطي صوتك
زهيره ميصحش يعني يا معلم تقف تزعقلنا، ولا عشان إحنا ولايا وملناش راجل؟
وهنا يقترب منهم سند
سند إزاي تقولي كده يا ست زهيره؟ رجالة الحتة كلهم ولادك وأنا أولهم، وما عاش ولا كان اللي يدوسلكم على طرف
أبوالخير كل ده عشان طلبت كام شندوتش؟ أصل الحريم لامؤاخذة خدوا العيال وراحوا يفسحوهم، أقول جعان، الأبلة أحلام مش عاجبها كلامي
سند غلطانة يا أبلة أحلام، اقعد يا أخويا ارتاح، لامؤاخذة يا أبلة بدور اعملي الشندوتشات للمعلم وحسابهم عندي، اقعد جنب الست زهيره، دي ست بركة على فكرة
ثم يذهب سند نحو أحلام
سند عايزك تعملي الواجب وزيادة
أحلام وجب يا معلم
سند خديني بقا جنبك عشان أشرب كوباية شاي من إيد الست زهيره
زهيره وإحنا نطول يا ابني
سند بقولك إيه بقا، أنا عايز الشاي اللي بتعمليه بالقرنفل، شربته كتير وقليل، محدش بيعرف يعمله زيك
زهيره يسلم ذوقك ولسانك يا معلم
أحلام السندوتشات
سند كل يا أخويا، الأكل جاه أهو
أبوالخير كترتي الشطة؟ أصل أنا بعشق الشطة، أصل الراجل اللي مياكلش شطة لامؤاخذة ميبقاش راجل
أحلام اه أمال إيه
ثم يأخذ أبوالخير الساندوتش، ومن أول قضمة يحمر وجهه وتدمع عيناه ويصرخ
أبوالخير نار نار
سند إيه؟ لما إنت مش قد الشطة بتاكلها ليه؟ ناولني أنا الأكل، أنا ليا في الشطة.
أبوالخير: إنت بتقول إيه يا جدع؟ الشطة دي لعبتي.
ليلتهم أبوالخير السندوتشات جميعها وهو في حالة يُرثى لها، وما إن انتهى من التهام الطعام حتى أصبح يشعر بتقطيع في أمعائه، ليصرخ:
أبوالخير: آه آه! الحقوني، بطني بتتقطع!
سند: ما قولنا بلاش.
أبوالخير بصراخ: هو ده وقته؟ ودّوني المستشفى الله يخربيتك.
ليذهبوا بالفعل إلى المستشفى.
سند وهو يضحك: خدوه على المطافي، عنده حريقة في بطنه.
وبعد الكشف على أبوالخير—
الطبيب لسند: المريض ده لازم يعمل البواسير حالًا.
سند: اعملهاله يا بيه.
الطبيب: تمام.
ليتصل سند بأهل الحارة جميعًا.
سند: أبوالخير هيعمل البواسير، اللي عايز يوجب معاه ييجي المستشفى. ابقوا بلغوا حريمه.
ليغلق سند الهاتف.
سند: اللهم لا شماتة… بس أنا شمتان عشان تبطل ترازي في مخاليق ربنا. راجل سوء.
وبعد ساعتين يخرج أبوالخير من العمليات وهو تحت تأثير البنج.
سند: والله شكله حلو كده… أصوره صورة للذكرى عشان أبقى أذله بيها. والله ربنا خدلك حقك يا بدور، بت غلبانة والمفتري عليها ربنا.
أما جاسر فكان قلقًا على نجيه، ليقول وهو يجلس بجانبها وهي تحت تأثير البنج:
جاسر: ألف سلامة عليكي يا أمي، أوعي تمشي وتسيبيني، إحنا ملناش غير بعض. يارب يا أمي الشمس متطلعش من غيرك أبدًا، يارب خد من عمري واديها.
وهنا تفيق نجيه
نجيه: جاسر… ابني حبيبي
جاسر بفرحة: أمي!
نجيه: إنت بتبكي يا حبيبي؟ أنا بخير، كويسة
جاسر: بجد؟
نجيه: اه والله، وكمان عايزة أروح
جاسر: طب ثواني أشوف الدكتور وهنمشي من هنا
نجيه: طب يلا بسرعة، البيت وحشني
جاسر بفرحة: حاضر حاضر
ليذهب جاسر إلى الطبيب ليبلغه بما حدث
الطبيب: طيب زي الفل، هطمن بس عليها وبعد كده تقدروا تروحوا
وهنا يقترب سمير من جاسر
سمير: طنط أخبارها إيه؟
جاسر: إنت روحت فين؟
سمير: أبدًا، كنت في الكافيتريا بشرب قهوة
جاسر: وطفحت؟
سمير: اه
جاسر: أصلك معندكش دم، أمي بين الحياة والموت وإنت بتطفحلي قهوة
سمير: طنط نجيه ميتخافش عليها
جاسر: طب يلا روح قفل الحساب عشان نمشي
سمير: ما خلصت يا عم من بدري، هي صورة؟
وبعد أن اطمأن الطبيب على نجيه أمر لها بالخروج
جاسر: يلا يا بطة، هنروح بيتنا يا قمر
نجيه: يلا يا حبيبي
وما إن وصلوا إلى المنزل—
جاسر: يلا بقا يا سمير، منعطلكش، روح مش عايزين زحمة، خليك حِسّيس
نجيه: لاء يا جاسر، أزعل منك، سمير كده يزعل
ليضحك جاسر
جاسر: طب وهو ده عنده دم؟ ده ساقع
سمير: طب عشان طول لسانك ديه، هقعد معاكم واتغدى عندكم كمان
نجيه: تشرف وتنور يا ابني
سمير: قلبي يا طنط
جاسر: طب قوم يا أخويا ساعدني نعمل الغدا
سمير: إنت هتشغلني باللقمة اللي هاكلها؟
نجيه: متخلي الطباخ هو اللي يعمل الأكل؟
جاسر: لاء طبعًا، محدش هيعملك أكلك بعد كده غيري، وهاكل كمان معاكي من الأكل الصحي ده.
ونتركهم ونذهب إلى الحارة، حيث كان سند يقف مع بدور وأحلام
سند: اتفرجوا على أبوالخير وهو متسطح
بدور: ليه كده بس يا أحلام؟
أحلام: أحسن، يستاهل، راجل سوء
سند: هو هيخرج بكرة من المستشفى، أنا بقا موضبله حتة مفاجأة
أحلام: قشطة عليك يا معلم سند
سند: بقولك إيه يا أحلام، عايزين نفرح بيكي إنتي وبكار
أحلام: يارب يا معلم، بس زي ما إنت عارف الظروف
سند: أنا يا ستي عليا الدبل والخطوبة، وإن شاء الله كلها كام شهر وشقة تفضى عندي في البيت خدوها، وأنا هساهم معاكم في الفرش
بدور: ربنا يكرمك يا معلم، والله إنت ونِعم الناس، ياريت الناس كلها زيك
سند: حفظتي يا أبلة بدور؟ شوف البت متنحة إزاي
أحلام: طب اقرصيني كده يا بدور، أصل شكلي بحلم
بدور: لاء يا أختي، إنتي صاحية
سند: عن إذنكم، العصر وجب
ليتركهم سند ويذهب
أحلام: الراجل ده طيب أوي، ربنا يكرمه ويسعده
بدور: يارب يا عروسة
أحلام: هي ستك منزلتش النهارده ليه؟
بدور: قالت مش قادرة
أحلام: كتر خيرها برده، ربنا يخليهالك
بدور: يارب… أنا مليش غيرها.
أحلام: ويخليلي أبويا وبكاري حبيبي
بدور: ربنا يجمعكم على خير يارب
ويمر اليوم دون أي أحداث تُذكر، ويأتي اليوم التالي، والساعة الآن العاشرة صباحًا، لنجد أن الحارة مملوءة بالعمال لتركيب وصلات الغاز.
ليذهب بكار إلى بدور
بكار: صباحك كله رزق
بدور: الله يكرمك
بكار: بقولك إيه، فين البت أحلام؟
بدور: زمانها جاية
بكار: طب شدي كده واعملي خمسين شندوتش وكتري المخلل
بدور: إيه ده؟ لمين؟
بكار: للعمال بتوع الغاز، شقيانين. وخدي حسابهم أهو، وأنا هطلع أنزل ستي عشان محتاجين مشاريب، والصراحة المعلم قالي هاتلهم شاي من عند ستك زهيره
بدور: ربنا يكرمه ويراضيه يارب زي ما بيراضي الغلابة
بكار: خدي بقا المفاجأة، أنا بنفسي هقف أساعدكو
بدور: طب وشغلك؟
بكار: ما هو المعلم حاسبني على اليومية وقالي اقف معاكم
بدور: طب أنا أعمل إيه في الجمايل دي كلها؟
بكار: يا ستي ربنا يحبب فيكي خلقه
وبعد أذان الظهر كان المعلم سند قد أحضر فرقة حسب الله، ووضع فرعين نور أمام القهوة، ووقف ممسكًا بالخرطوم يرش المياه، ثم يترك الخرطوم ويستقل سيارته، وقبل أن يذهب يهمس في أذن قائد الفرقة ثم يذهب، ليعود بعد ساعة ومعه المعلم أبوالخير.
ليشير المعلم سند للفرقة أن يغنوا ويعزفوا.
ليغني أفراد الفرقة:
حمد الله على السلامة يا معلم أبوالخير يا وش الخير
أبوالخير: ألف شكر يا سند يا أخويا على الاستقبال الجميل ده
ليكمل أفراد الفرقة الغناء:
ألف سلامة على بواسيرك يا معلم
بس ابقا كل عضم مواسير
وبلاش تاكل شطة كتير
أصل كترها بيجيب البواسير.