نوره: ببكاء انتي بتضربيني يا اما.
حليمه: واكسر راسك كمان. مالك يا بت، فيكي ايه. واد خالك زي الفل، تتمني العين تنضره، من دمك وهيشيل همك ويحافظلك علي حاجتك، ولا تروحي تعرينا وتجيبلنا عيل بايظ بيطرجع باللبانه. عشان كت احش رجبتك بالمنجل حش.
لتتركها نورا لتجري مسرعه الي القصر.
وها هيا نورا تدخل القصر وهيا تبكي، ليراها والدها الذي كان يجلس في بهو القصر.
محمود: مالك يا نورا، وفينها امك، وحاطه يدك على وشك ليه. الله، وايه الدم اللي نازل من خشمك ديتي.
نورا: امي ضربتني.
محمود: ضربتك ليه، اتجنت.
نورا: عشان خالي جالها عايزين نجوز ولادنا لبعض، بدل جومت جولتلهم اني هكمل علامي ومش هتجوز دلوك، شتمتني وضربتني. ايه يا أبا، هو الجواز بالعافيه.
محمود: حجك عليا يا بتي. اطلعي اغسلي وشك وغيري خلجاتك، وانا هتصرف مع امك ديه.
نورا: ببكاء حاضر يا أبا.
محمود: اسمعي يا بتي، طول ما انا عايش وفيا نفس ورجلي بتدب علي الارض، اوعاكي تبكي تاني ولا تزعلي، ده لا عاش ولا كان اللي يزعلك وله حتي يدوسلك علي طرف.
لينظر عليهم زين من فوق الدرج.
زين: في ايه يا أبا، مالها نورا.
ليقص عليه محمود كل ما حدث.
زين: وه وه، يعني امي وخالي جاعدين يخططولنا حياتنا وكأننا ملناش اي عازه. علي العموم متزعليش يا نورا، وكيف ما ابوكي جالك، محدش يجدر يغصبك علي حاجه.
نورا: ربنا يخليكم ليا، ومتحرمش منيكم واصل.
زين: ولا يحرمنا منيكي ابدا يا بت، انتي بتي جبل متكوني خيتي، نور العيون وروح الجلب، واطلعي بجا.
نورا: لكن جولي، انته لابس ومتشيك ومتعطر كده ورايح علي فين.
زين: رايح مع عدنان عشان يشتري ملابس وحاجات، اصل الحمدلله اخيرا هيتلم ويتجوز.
محمود: والله الف بركه، ربنا يهديه ويعجل.
نورا: وديه مين اللي امها داعيه عليها ديه.
ليضحك زين.
زين: الأبله ليلي المدرسه.
نورا: ايه كيف يعني، ديه ابله ليلي محترمه ومختمره ومؤدبه جدا، لكن عدنان يعني اعوذ بالله، الشيطان يجوله يا عمي.
ليضحك زين ووالده علي جمله نورا.
وينقضي الليل.
وف القاهره نجد أن اميره قد ذهبت الى منزلها لتجد داده ناديه ف انتظارها.
ناديه: حمدالله على السلامه، هو كل يوم سهر للصبح كده.
اميره: وبعدين معاكي يا نونو.
ناديه: عايزه ايه، ما هو الدلع ده مش ببلاش.
اميره: بصي بقا، عايزه البس لبس زي بتاع زمان.
ناديه: اللي هوا ازاي يعني.
اميره: انتي كنتي بتلبسي ايه ف شبابك.
ناديه: انا، ده انا كنت فرسه.
اميره: اخلصي يا نونو.
ناديه: كنت بلبس يا ستي حبره ويشمك وملايه لف، وتحتها فستان قصير بكرانيش، وكت عليه كلوش.
اميره: وانا كمان عايزه البس كده.
ناديه: بس مافيش لبس زي ده دلوقت.
اميره: مليش دعوه، اتصرفي.
ناديه: خلاص هروح شارع المعز اجيبلك، دائما كده واجعه قلبي معاكي.
اميره: حبيبتي يا نونو، وفي طلب كمان.
ناديه: خير.
اميره: عايزه اروح كوافير شعبي.
ناديه: انتي شكلك اتجننتي.
اميره: وحياتي يا نونو.
ناديه: ماشي، حاجه تاني.
اميره: اخر حاجه، تتصلي علي ياسمين وتقوليلها متقولش لاي حد انا مين، اصلي ناويه اعمل مغامره.
ناديه: بقول اتجننت، محدش مصدقني.
اميره: اسمعي الكلام بقا، هطلع اخد شاور وانام شويه، تكوني جيبتي اللبس ورجعتي.
ناديه: اطلعي يا مغلباني.
لتتركها اميره وتصعد الي جناحها.
اميره: ايه ده، انا جسمي متكسر خالص.
اما يسري، فها هو قد عاد إلي منزله ليجد زوجته ف انتظاره.
يسري: يووه، ايه الصباح ده، انتي قاعده كده ليه، خشي اتخمدي.
نبيله: الحق عليا عشان استنبتك.
يسري: متبقيش تستني تاني.
نبيله: طاب هتعوز حاجه مني.
يسري: لاء، وغوري بقا من وشي.
نبيله: نفسي اعرف انته بتعاملني كده ليه، عملتلك ايه.
يسري: انتي هتغوري وله اقوم أصبحك.
وهنا يصدح صوت بكاء الطفله.
يسري: خشي سكتيها.
نبيله: حاضر، بس نفسي اعرف انته ليه مش بتحن علي بنتك وتشيلها ولو مره واحده ف حياتك.
يسري: انا بقول جتتك نحست وخدتي علي الضرب.
ثم يقوم من مكانه ليركلها ركله شديده في بطنها.
نبيله: اه، حرام عليك، ليه كده.
ليخلع يسري حزامه ويضربها بكل قسوه وعنف.
نبيله: كفايه، حراك عليك، خلاص حرمت، والله مش هقولك كده تاني، ارحمني، حرام عليك.
يسري: عايزك بقا تبقي تفتحي بوقك تاني. غوري عند بنتك، جاتكم موته تاخدكم انتو الاتنين.
نبيله: حسبي الله ونعم الوكيل فيك يا شيخ.
وتدخل الغرفه عند ابنتها وتغلق الباب خلفها وهيا تبكي من شده الآلام النفسيه والجسديه.
اما ف الصعيد، فها هيا حليمه قد وصلت إلي منزلها وهيا غاضبه، لتجد زوجها يجلس مع نورا في بهو القصر.
حليمه: يعني جاعده جار ابوكي بعد ما كسفتيني جدام خالك.
محمود: مش جولتي هتجعدي يومين عند اخوكي.
حليمه: ياسلام، يعني انته مكتش عايزني اعاود تاني وله ايه.
محمود: له، حمدالله على سلامتك، بس اسمعي، عيالي خط احمر، انا كان زين وله نورا، واللي يجربلهم اكله بسناني، حتي لو كتي انتي وله خيك، فاهمه. انا بتي مش بايره، وولدي لما ياجيه مذاجه يتجوز، وريحي حالك، محدش منيهم هيتجوز من عيال اخوكي، وعلي الله الموضوع ديتي يتفتح تاني. سامعه الحديت.
حليمه: ازاي يعني، مالهم عيال اخوي، هو حد يطول نسب اخوي.
محمود: احنا مش عايزين نطولو ياستي، واجفلي خشمك خالص.
حليمه: طيب يا محمود، انا وانته والزمن طويل.
محمود: ايه، عايزاني اظلم عيالي عشان ترتاحي انتي واخوكي.
حليمه: انا مهردش عليك، هطلع أسبح وانام احسن.
محمود: احسن، تريحينا من وجع الراس.
ويمر اليوم دون إحداث اخري تذكر.
وها هو فرح ياسمين في احدي المناطق الشعبيه.
لنجد ياسمين تجلس بجوار صالح وهم في منتهى الفرح والسعاده.
صالح: الف مبروك يا قلبي.
ياسمين: ربنا يباركلي فيك يا نور عيوني.
صالح: عارفه مين هيحضر الخطوبه النهارده، وزمانه جاي.
ياسمين: مين يا تري.
صالح: الباشا العقيد بتاعي، أصله راجل طيب وامير ومحترم ومتواضع، وبيحبني. الصراحه هوا بيعاملنا كلنا زي اخواته.
ياسمين: يشرف وينور.
لينظر صالح أمامه.
صالح: اهو الباشا وصل، عن اذنك اروح أرحب بيه.
ياسمين: استني اجي معاك اسلم عليه.
صالح: ايه الحقي ده، جاي علينا.
ليقترب منهم سياده العقيد موسي الصياد، اصغر عقيد ف البلد نظرا لمهاراته وشجاعته.
موسي: محتضنا صالح الف مبروك يا عسكري.
صالح: الله يبارك ف معاليك يا افندم.
موسي: افندم ديه تقولهالي ف الموقع. اتفضلو، حاجه بسيطه بمناسبة الخطوبه السعيده، ربنا يتمم لكم علي خير إنشاءالله.
صالح: بس كده كتير يا باشا.
موسي: بس يا ولد، والف علي خطوبتك.
موسي: والف مبروك علي خطوبتك، وخلي بالك من عروستك، وأجازه اسبوع عشان تفسحها.
ليتركهم موسي وينزل وسط المعازيم.
لينظر حوله، ليجد فتاه جميله رائعه الجمال ترتدي زي شعبي، ملايه لف وحبره ويشمك، وفستان لونه احمر قصير، وتاركه شعرها الأسود الحالك الطويل جدا خلف ظهرها.
لينظر لها موسي بانبهار وهيام، ثم يصعد الي المسرح مره اخري ليساءل صالح عنها.
موسي: بقولك ايه، مين اللي واقفه هناك ديه.
ليشاور صالح عليها.
موسي: متشاورش، متخليهاش تاخد بالها.
صالح: لمؤاخذه يا افندم، اصل معرفهاش.
ثم يساءل ياسمين.
موسي: مين ديه.
لتنظر لها ياسمين.
ياسمين: ديه لاء، معرفش، تلاقيها من اي حاره جنبنا.
صالح: منعرفش يا بيه.
موسي: طيب طيب.
وينزل موسي ليقترب من اميره.
موسي: اهلا بيكي، نورتي.
اميره: وهيا تمضغ العلكه شكرا.
داده ناديه: في حاجه يا ابني.
موسي: هاه، لاء مافيش، عن اذنكم.
ناديه: ماله ده متنح كده ليه.
ليراقبهم موسي من بعيد.
وهنا يصدح صوت الاغاني الشعبيه.
لترقص اميره في وسط المعازيم علي اغنيه:
الأغنيه: اميره اميره حلوه طعمه جميله بنت ناس يا اميره.
ليصفق لها المعازيم بحراره.
ليغصب موسى وينصرف ليستقل سيارته، ليقودها بسرعه، ليتحدث مع نفسه.
موسي: ايه ده، هو انا مالي، زعلت ليه لما رقصت، وانا مالي بيها، بس مش عارف ليه، من وقت ما شوفتها وانا قلبي بيدق.
موسي: ياله، انا هشغل نفسي ليه بواحده شفتها لمدة دقائق.
اما ف الفرح، فها هيا اميره مازالت ترقص علي اغنيه.
الأغنيه: اميره اميره اميره حلوه خفه جميله دم شربات والحلويات، اميره ديه حياتي نفسي تبقى مراتي، وافقي يا حماتي.
لتدخل الداده ناديه وسط المعازيم وتاءخذ اميره من يدها.
اميره: ايه، سيبيني.
ناديه: انتي فاكره نفسك ف المعادي هنا الاباجيه يا اما، يعني حته شعبيه اوي، عاجبك يعني لمه الشباب عليكي كده وعمالين يقولو الرقاصه واللي يقول فورتيكه.
اميره: وانا مالي، ميقولو.
ناديه: طاب ياله، وكفايه كده، احسن بعد كده مش هنعرف نروح.
اميره: يعني مش كفايه مخليتيش البنات صحباتي ييجو، وقولتي مش هينفع، سيبيني انبسط بقا.
ناديه: قولت ياله بينا.
اميره: طيب تعالي نسلم علي العروسه.
ناديه: لاء، هنمشي، اتفضلي قدامي.
ليلتف الشباب حول اميره.
الشباب: الحقو الرقاصه ماشيه.
ناديه: شوفتي اخره عمايلك.
ليغادرو الفرح مسرعين ليستقلو السياره.
اميره: خلاص بقا يا نونو، متزعليش، الصراحه الافراح الشعبيه ديه جميله اوي.
ناديه: اه، تقومي ترقصي وسط الناس.
اميره: طاب خلاص، اخر مره.
ناديه: كل مره تعملي المصيبه وتقولي اخر مره.
اميره: هو صحيح انتي ليه متجوزتيش.
ناديه: عشان نصيبي مكانش جيه، ولما جيه كانت الست خديجه والدتك اتوفت وسابتك حتت لحمه حمرا، فقولت اقعد اربيكي واخد باللي منك.
اميره: طاب ليه مش بتخلي اي حد من الشغالين يوضبلي الجناح بتاعي، ولا حتي يعملولي اكل او اي حاجه.
ناديه: عشان بخاف عليكي من الهوا الطاير، وزي ما انتي عارفه انك والدك رجل اعمال كبير اوي، والعين عليه، والنفوس ضعيفه. اخاف حد من المنافسين بتوعه يشتري حد من الخدم ويؤذوه فيكي.
اميره: يا حبيبتي يا نونو، ربنا يخليكي ليا.
ناديه: ويخليكي ليا، وتعقلي بقا، نفسي افرح بيكي واشيل عوضك علي ايدي.
اميره: يوووه بقا.
ناديه: خلاص ياله شهلي، خلينا نوصل عشان تلحقي تغيري اللبس ده، احسن البيه يشوفك ويطين عيشتي.
اميره: بابي زمانه ف سابع نومه، ما انتي عارفه بينام بدري ويصحي بدري، راجل ملتزم.
ناديه: امال ايه.
اميره: قوليلي يا داده، صحيح هو احنا ملناش قرايب خالص.
ناديه: وهو في حد ملوش أهل.
اميره: طاب هما فين، ليه عمرنا ما زورناهم ولا هما حتي زارونا.
ناديه: الدنيا مشاغل، ولاهيه الناس.
اميره: رد مش مقنع.
ناديه: هو ده اللي انا اعرفه.
اميره: شكلك عارفه كتير اوي يا داده ومخبيه عليا، قولي بقا.
ناديه: طاب هقولك، بس متقوليش للبيه والدك اني قولتلك حاجه.
اميره: اوك، قولي بقا.
ناديه: اصل البيه والدك من الصعيد، من عيله كبيره اوي، بس هو حب والدتك وكانت وحيده اهلها زيك كده واتجوزها، بس جدك غضب عليه وطرده وحرمه يدخل الصعيد كله.
اميره: يا حبيبي يا بابي، وبعدين.
ناديه: وبعدين جيتي انتي، والبيه خدك وسافر الصعيد لجدك عشان يحنن قلبه عليه، لكن جدك برده ركب دماغه وطرده تاني، فرجع والدك حزين، وبعد ولادتك بحوالي اسبوعين والدتك اتوفت بحمي النفاس، وجدك وجدتك مستحملوش وحصلوها ف نفس الشهر.
اميره: الله يرحمهم. طاب وبابي عنده اخوات.
ناديه: عنده اخ وحيد اكبر من والدك، بس جدك برده منعه يزور والدك أو يتواصل معاه خالص.
اميره: اكيد عمي ده عنده اولاد.
ناديه: افتكر عنده ولد وبنت، سمعت مره البيه بيقول كده.
اميره: عشان كده بابي دائما حزين وعيونه مطفيه.
ناديه: امال ايه، متغرب ف بلده وبعيد عن أهله وناسه، وكان دائما يوصيني لو بعد الشر جراله حاجه اخدك ونروح لعمك ف الصعيد عشان ياخد باله منك.
اميره: بعد الشر علي بابي، انا مقدرش اعيش من غيره، ده هو كل حياتي ودنيتي.
اما ف الصعيد، فكان ناجي يجلس مع زوجته نعيمه وأولاده يوسف وصابرين.
نعيمه: بجا انته يا واد يا يوسف، معارفش توجع بت عمتك وتخليها تحبك وتوافج تتجوزك.
يوسف: وده اسمه كلام بردك يا اما، عايزاني اشاغل بت عمتي اللي ف مجام خيتي عشان اوجعها ف غرامي.
صابرين: اللي يشوفك كده يجول انك مش ميت ف العتب موت.
ناجي: جوليله يا بتي.
يوسف: اسمعوني بجا، انا اه بحبها واتمنى تراب رجليها، لكن برضاها. لكن اعمل حركات، له، نورا ديه شرفي وعرضي زي صابرين بالظبط.
نعيمه: طاب خلاص، اجنع زين يتجوز خيتك، اهو صاحبك جوي جوي وبيعزك.
ليضحك يوسف.
يوسف: هو في ايه ياجماعه، حسستوني كده اننا انا وخيتي رخاص جوي. ده بدل يا اما متجولي بتي تجعد معززه مكرمه ف بيت ابوها وياخدها السلطان، وولدي يجعد علي البساط وينجي ست البنات.
ناجي: يا سلام، والخير بتاع محمود ده كله يروح لمين.
يوسف: خير ايه بس يا أبا، ما احنا الحمدلله عندينا اللي يكفينا وزياده حبتين تلاته كمان.
نعيمه: وماله، البحر يحب الزياده، متبجاش غشيم.
يوسف: انا بردك اللي غشيم. اروح انام احسن، الوجت اتاءخر جوي، تصبحو علي خير.
نعيمه: يعني بردك هتعمل اللي ف راسك.
صابرين: انا بحب زين يا اخوي، اوجف معاي، حرام عليك.
يوسف: خلي عنديكي كرامه. زين مش شايفك من أصله، يعني وجودك بالنسبة ليه زي عدمه. مترخصيش نفسك يا بت ابوي، انتي مش ناجصك حاجه، ونصيبك هياجيكي، بس انتي اصبري، اعملي لنفسك جيمه، الناس كلها تعملك الف حساب.
ثم يتركهم ويصعد الي اعلي، ليدخل الجناح الخاص بيه، ليسمع صوت رنين هاتفه.
لينظر للهاتف بفرحه.
يوسف: ايوه يا نور حياتي، اتوحشتك يا ضي عيوني
الفصل الرابع من هنا