الحقيقه يا ملاذ ما زملاء رائد خطيبي قلت ليها بالجد!؟ قالت لي اي قلت ليها ما شاء الله متين عملتوا خطوبه ولا كنتوا مخطوبين اصلا قالت لي طولنا مخطوبين لكن كنا مختلفين حبه كدا وهسي رجعنا قلت ليها كويس والله ودكتور رائد إنسان مهزب شديد مناسبين لي بعضكم ربنا يخليكم لي بعض قالت لي امين يارب وعقبال ليك قلت ليها انا هسي ما دايره اعرس لحدي ما اصلح اوضاع اهلي قالت لي كلنا في البدايه قلنا كدا يا ملاذ بس كمان لمن يطرق إنسان بابك بالحلال ما ح تقدري ترفضي😉 قاطع حديثنا صوت دكتور رائد ودكتور إيهاب بقولوا السلام عليكم ردينا بي وعليكم السلام جو قعدوا معانا بقينا نتناقش في الشغل وكدا لحدي ما الجرسون جا طلبنا مقبلات خفيفه كدا وعصائر طبعا طلبت عصير فراوله لانو انا بحب الفراوله مووت اكلنا سحر قالت لينا ارح جمب البحر كلهم وافقوا قالت لي ملاذ ارح مشيت معاهم بقينا قاعدين جمب البحر سحر ورائد نزلوا جمبوا وبقينا انا ودكتور إيهاب قاعدين قال لي إنتي ما بتحبي البحر قلت ليهو بحبو قال لي طيب ليه ما نزلتي معاهم قلت ليهو دا نظام خليني براي ولا شنو قال لي إنتي فصيحه زياده عن اللزوم قلت ليهو اسفه قال لي بهظر معاك،،، روحك حلوه شديد قلت ليهو شكرا ليك بس يا دكتور إيهاب في سؤال محيرني شديد عدل جلستو وقال لي قولي لو بقدر اجاوب ليك قلت ليهو انا مستغربه في السرعه الجيت بيها هنا انا قدمت في المستشفى دي قبل يوم جاني القبول اليوم التاني طوالي حتى ما متزكره كيف وصل لي رابط التقديم فرحت شديد إنو إنتوا قبلتوني لكن يا دكتور إيهاب إتوقعت اي حاجه إلا كوني ادخل قسم العمليات دي حاجه كبيره شديد قال لي هسي إنتي فرحانه ولا زعلانه ولا شعورك شنو قلت ليهو اكيد فرحانه يادكتور وطبعا دا بي فضلكم بعد الله سبحانه وتعالى قال لي يا ملاذ اول حاجه كونو إنتي جيتي هنا ودخلتي قسم العمليات والكلام دا كلو دا قدرك يا ملاذ وربنا رايد ليك تكوني هنا وفي المكانه دي وبعدين نحن جينا هنا عشان نستمتع فكك من جو الشغل دا قلت ليهو طيب قال لي ابوك كيف قلت ليهو كويس الحمد لله قال لي وصل كيف يوم داك قلت ليهو والله تماام الحمد لله وبقينا نتونس فتحنا كم موضوع كدا في نص ونستنا قال لي إنتي ما عندك اعمام قلت ليهو عندي عم واحد قال لي طيب عندك عمات قلت ليهو لالا بس عمي عمر قال لي ايواا قلت ليهو بس ليه السؤال قال لي عشان شبهتك على زول بس وكنت مفتكرو عمك قلت ليهو ايواا قال لي طيب ارح ننزل تحت قلت ليهو تحت وين قال لي البحر😅 قلت ليهو انا ما بحب البحر من قريب بخاف منو احسن من هنا قال لي غريب اي بت صافيه وبتحب الهدوء بتحب البحر قلت ليهو الا انا ما بحب البحر عندي معاهو سابقه قال لي اها كدا ممكن بقينا قاعدين نعاين للبحر من بعيد وللموج عيني وقعت على سحر ودكتور رائد كانوا حلوين مع بعض حتى ظاهر التفاهم في علاقتهم من دون ما أشعر إبتسمت في زول مدى لي بارد قدام وشي إتلفت لقيتو دكتور إيهاب قال لي سرحانه وين قلت ليهو مافي محل مدى لي البارد قلت ليهو شكرا بس ليه مكلف نفسك إبتسم وقعد في كرسيهو قال لي وين التكلفه في الموضوع...
مره الوقت ورجعنا بي عربيه دكتور إيهاب وصلنا رائد وسحر حتن وصلني انا اخر حاجه لمن جيت أنزل قال لي خلي بالك من نفسك قلت ليهو كويس نزلت دخلت الشقه كنت تعبانه قمت عملت لي حاجه اكلها المغرب ازن صليت وجيت أكلتا وفتحت التلفزيون حضرت حبه العشاء ازن صليت وقفلت التلفزيون ونمت طوالي عشان اصحى بدري قمت الصباح جهزت نفسي ومشيت المستشفى لاقاني دكتور رائد قال لي اوو الليله الصباح غير😉 قلت ليهو كيف اصبحت يا دكتور رائد قال لي تمااام الحمد لله وتاني ما تقولي لي دكتور بقينا زملاء مافي داعي للرسميات قلت ليهو إن شاء الله بحاول قال لي امشي طوالي مكتب إيهاب عايزك قلت ليهو طيب ومشيت المكتب لقيت المكتب مقلوب والباب مفتوح دخلت لقيت في عمال بنظموا في أدراج وفي طربيزات إتنين ودكتور إيهاب واقف يوصي فيهم قلت السلام عليكم حتن يا داب إنتبه لي وجودي قال لي ملاذ صباح الخير قلت ليهو صباح النور قال لي اها مستعده تبدي الشغل قلت ليهو اي مستعده قال لي الليله عندنا عمليه الساعه ١٢ ح نعمل عملية قلب مفتوح وإنتي ح تكوني معاي تمااام قلت ليهو إن شاء الله قال لي وبالمناسبه دا ح يكون مكتبنا قلت ليهو كيف يعني؟ قال لي دا مكتبك ودا مكتبي قلت ليهو طيب،،
مع إنو الفكره ما عجبتني خالص لكن قلت في نفسي ما مشكله اساسا ما بكون في عمليات كتيره العمال رتبوا المكان وطلعوا دكتور إيهاب طلع معاهم وانا مشيت قعدت في طربيزتي وبقيت إتأمل في المكتب كان رهيب شديد كان مطلي بي لون بني غامق ورهيب فيهو كم كسره كدا بالابيض في الزوايا....
لَن تقوَى إلَّا بالتَّقْوَى،
وَلَن تَتَخَطَّى إلَّا بصِدْقِ الخُطَى💜ُ...
يتبع