كان في حاله من التوتر ماقدرتا انوم نهائي بقي يتخيل لي الحلم في عيوني وانا شغاله اردد اللهم اجعله خيرا ..
كنت بتصل على رائد ما كان برد ودا الزاد توتري لحدي الساعه وحده جات رائد ما كان برد لي كنت مساهره لحدي الصباح حاولتا تاني مره دقيت لي رائد فصل الخط ورجع لي لمن رجع يدي رجفت لمن التلفون وقع من يدي رديت ليهو قال لي يا ملاذ اطمنك إيهاب طلع من العنايه المركزه والدكتور قال حالتو مستقره الحمد لله قلت ليهو بالجد يا رائد🥺 قال لي اي والله الحمد لله،، يا دوب إرتحت رائد إتكلم معاي حبه وقفلتا منو مشيت صليت ركعتين شكر ولبست ملابسي ومشيت المستشفى بقيت شغاله في العمبر كان عندنا حالات كتيره ما قعدتا نهائي وما خلصتا إلا وقت التسليم سلمتا ورجعتا البيت مره باقي اليوم كنت بطمن على إيهاب كل شويه إتصل على رائد قال لي كويس بس مانعين منو الزياره
الصباح لبستا و إتصلتا على رائد كنصل،، طوالي بعمل الحركه دي ما حصل ردا لي بالجد إحترمتو شديد رجع لي بي مكالمة فيديو رديت قال لي ملوذه الاخبار قلت ليهو تمااام الحمد لله الاخبار عندكم قال لي تماام الحمد لله قلت ليهو إيهاب بقى كيف قال لي اسأليهو بي نفسك وجه ليهو التلفون شفتو كان لافين ليهو راسو بي شاش وملامح وشو كانت باهته شديد لمن شفتو عيوني دمعت دا ما إيهاب الانا بعرفو حسيتو إستسلم لي المرض قال لي بي صوت متعب ملاذ كيفك قلت ليهو تمااام الحمد لله انا كويسه إنت كيف قال لي الحمد لله وسكت قلت ليهو في حاجه واجعاك قال لي لالا انا كويس الحمد لله قلت ليهو إيهاب 🥺 قال لي ايواا قلت ليهو عليك الله ابقى كويس يا إيهاب والله انا حلمت لي حلم مخيف شديد يا إيهاب قال لي انا كويس يا ملاذ وبي صحتي وعافيتي شوفي قلت ليهو طيب مادام بقيت كويس تعال راجع يلا ديل تلاته شهور وإنت مافي كفايه كدا قال لي حاضر ح اجي،،، بس قلت ليهو بس شنو؟! في شنو قال لي عشان عندي شكوى لي ابوك قلت ليهو شكوى؟! قال لي اشكي ليهو منك قلت ليهو وانا عملتا شنو عشان تشكي ليهو مني قال لي ح اقول ليهو حاجه بس إنتي مالك قلت ليهو إنت ماشي تشكيني وتقول لي مالك🥲 قال لي اي ما تكتري معاي براي عيان بتكلم مع ابوك وبس قلت ليهو سمح غلطانه انا ما إنت وقفلتا ....
بعد شهر طلعتا بدري كنت طالبه ترحال مشيت المطار واقفه مسافه شفتا رائد وهو ساند إيهاب ونازلين من الطياره ❤️ مشيت سلمت عليهم وحمدلت ليهم السلامه قلت ليهم السعوديه نورت قلت لي رائد ليه ساندو خليهو قال بقى كويس وعاينت لي إيهاب رائد قال لي يابت كويس دي اسمو التالت طبيعي في لسانو قال لينا هسي زول مريض بدل تريحوهو تشاكلوا فيهو رائد قال ليهو نريحك بي شنو كوبرا ولا تراب الذهب انا وإيهاب ضحكنا ضحك قلت لي رائد مبالغه لكن دي حلوه بس حاسب صحبك مريض🤣🤣
عربية المستشفى جات رائد ساعد إيهاب يركب قلت لي رائد هسي يا رائد إيهاب ح يمشي البيت ؟ قال لي اي قلت ليهو طيب واهلوا ما عارفين بي مرضو ح تقول ليهم شنو لمن يشوفو راسو ملفوف قال لي اهلوا خلاص عرفو قلت ليهو كيف؟! قال لي انا كلمتا أختو وهي إتصرفت كلمت أمو بي طريقه هاديه وأمو إتقبلت الموضوع وخصوصا لمن كلمناها إنو إتعافى وبقى كويس قلت ليهو اي كان لازم تعرف قال لي ارح اركبي عشان نمشي قلت ليهو انا جايه بي ترحال ح امشي المستشفى طوالي بقيت مزحومه قال لي الله يعينك قربتي ترجع لي شغلك 😉 قلت ليهو إن شاء الله لانو زهجت من قسم الطوارئ دا بعدها هو ركب وانا مشيت ركبتا ومشيت المستشفى كنت فرحانه لمن خلصت شغل مشيت إتونست مع سحر قالت لي غريبه طول الايام الفاتت ديك مكتئبه مالك قلت ليها ظروف بس قالت لي الحمد لله الاتحلت ما كنتي عاجباني نهائي قلت ليها طيب ارح اعزميني في مطعم🐸 نفرق سواا قالت لي من عيوني ارح طلعنا سواا مشينا مطعم ظريف إتغدينا وحاسبنا وإتمشينا لحدي ما وصلنا السكن طبعا سحر ساكنه جمب المستشفى لكن ما معانا ساكنه مع امها وابوها كان حكت لي إنها جابت امها وابوها السعوديه طبعا هي بتهم الوحيده دخلتا الشقه رقدتا ومرت الايام عاديه طبعا سحر عرفت بي مرض إيهاب وكان مشينا ليهو زياره سواا وإتصادفتا مع شيرين وعرفتا إنها اختو يعني بت عمي❤️ وطلعت متزوجه بس راجلا شغال في امريكا بجي من فتره لي فتره السعوديه
يوم قاعده في المستشفى في قسم الطوارئ بتكلم مع ريم تلفوني إتصل لقيتا أمي عملت لي جرس رجعتا ليها ردت قالت ملوذه الاخبار قلت ليها تمااام الحمد لله إنتوا كيف قالت لي تمااام الحمد لله قلت ليها كيف ناس ريم وزهره ما منها خبر قالت لي ريم كويسه قاعده تجينا من فتره لي فتره يا حليلا وزهره زاتا جات قبل كم يوم زياره لي ناس امها وجاتنا بي جاي قلت ليها يا حليلهم إشتقت ليهم والله قالت لي دايره تنسيني هسي انا إتصلتا دايره اقول ليك في زول متقدم ليك ودايرين نشوف رأيك فيهو.....
قالت لي دايره تنسيني هسي انا إتصلتا دايره اقول ليك في زول متقدم ليك ودايرين نشوف رأيك فيهو قلت ليها ما يكون محمد ولد اختك والله يا امي اختك دي عايزه تلصق فيني ولادا ديل بي الغصب قولي ليها انا ما دايره اعرس قالت لي لالا دا ما محمد ولا مجاهد قلت ليها دا منو كمان قالت لي يعني ما عارفه؟ قلت ليها يا أمي اعرف من وين يعني انا قاعده اعلم الغيب قالت لي العريس ود عمك عمر إتصل لي ابوك وإتكلم معاهو وشرح ليهو إنو هو مديرك في الشغل !! لمن قالت كدا إنصدمتا قلتا ليها قصدك إيهاب قالت لي ياهو زاتو ،،يا داب عرفت ليه كنتي بتسألي من عمك قلت ليها والله يا أمي إيهاب دا ما قصر مننا كلنا وقعدتا احكي ليها لمن إنتهيت قالت لي إنتي عارفه يا ملاذ انا مافي حاجه واجعاني غير إنو عمك مات دون ما يتعافوا هو وابوك والحاجه الوجعتني ووجعت ابوك إنو ولد عمك مريض سرطان وابوك ما قدر يقيف معاهو ولاقدر يقيف مع اخوهو في مرضو قلت ليها الحمد لله بس على كل حال قالت لي بجد الدنيا دي ما فيها اي حاجه مستاهله هسي شوفي ابوك ندم كيف وفي وقت ما بنفع فيهو الندم لكن يابتي كان دايره الحقيقه ايهاب دا راجل بي معني الكلمه نعمه التربيه هسي دا لو واحد تاني كان زمان نسى إنو عندو عم قلت ليها فعلا يا أمي إيهاب وقف معانا كتير ضحكت وقالت لي هسي يعني نقول مبروك اصلوا الكتاب باين من عنوانو قلت ليها قولي مبروك🙈 قالت لي سمح امشي اكلم ابوك وقفلت مني فرحة فرح مره الوقت والممرضه جات سلمتها ومشيت البيت....
《》《》《》《》《》《》《》
في بيت إيهاب كان قاعد مع امو وبتكلم معاها ومعاهم شيرين امو قاطعتو قالت ليهو خلاصة الكلام يا إيهاب داير تعرس بت عمك؟ قال ليها اي قالت ليهو يبقى على جثتي يا إيهاب!! إنت عارف الحصل لينا شنو بي سببهم ولا ناسي لمن ابوك مات منو الوقف معانا فيهم؟ ياخ جدك طرد ابوك من بيتو زي الكانو ما ولدو ابوك عاني بي سببهم يا إيهاب ومات بي سببهم مات من الوجع والحسره ياخ ديل ناس معقدين انا ما دايره ليك تقع في مشاكل وقعتا فيها انا زمان قال ليها يا امي الكلام دا من الماضي وابوي زاتو لمن مات عفى لي عمي وبعدين ملاذ ما عندها دخل بي الحصل زمان يا امي قالت ليهو انا وريتك وما بعيد كلامي تاني داير تعرس اي بت تانيه انا معاك لكن البت دي بزات لأ....
يتبع