جمال مسك مختار من هدومه وهو بيقول بجنون..مراتي فين...ودتوها فين يا ولاد الكلب
مختار فهم فورا ان ده جوز نسيم، نفض ايده بقوه وبص لروعه وقال بثبات....اطلعي اوضتك انتي ياروعه
روعه قلقت عليه وقالت....لا انا...
بس مختار قاطعها وقال بحسم....قولت اطلعي
روعه اتنهدت بقلق شديد وطلعت وهيه بتدعي ربنا يسترها
مختار بص لجمال وقال بسخريه ...خير امرني
جمال بصله بحده وقال..اخوك خطف مراتي من قلب بيتي وداها فين ...اخوك الدكتور فيييين
مختار قعد على الكنبه ببرود يحسد عليه وولع سيجاره وقال....حمزه مش هنا....وبقاله ايام مبيجيش البيت
جمال قال بغضب شديد...وحياة امك و...
بس قبل ما يكمل وبسرعه اثتثنائيه كان مختار وقف ومسكه من رقبته بشده وقال بطريقه ترعب... اوعى تفكر ان علشان انا وحمزه خوات يبقى طبعنا واحد...تؤ غلطان حمزه بلسم بالنسبالي ....فلو هتطول لسانك اعمل حسابك هتخرج من غيره ...حابب تخرج من غيره
جمال اتخض من طريقته وحس انه مش قادر يتنفس من قبضته قال بالعافيه...انا..انا اسف...سيبني
مختار سابه لما قال كده وجمال وقع على الارض وهو بيكح جامد
مختار بصله بسخريه وقال...اسمع يا حبيبي انا معرفش مكان حمزه انا وهو مش بنكلم بعض اصلا ومعنديش اي خبر هو فين ولا بيعمل ايه لو جيه البيت هبلغك
جمال وقف وقال بغل..اخوك خطف مراتي من قلب بيتي...لو هو فاكر ان اخري هبلغ البوليس يبقى ميعرفنيش...وصله الكلام ده امتى ما تشوفه...قوله اني مش هحله وهرجع مراتي وهمحيه من على وش الدنيا هو واللي يتشددله
مختار رفع عينه فيه لما قال واللي يتشددله وجمال اتوتر من نظرته وقال بارتباك.....قصدي اني مش هسيبه
ومشي بغضب شديد
مختار اتنهد وقال بقلق....ايه اللي عملته ده يا حمزه ..ليه تقلقني عليك كده
ولسه هيطلع على اوضته غانم وقفه وقال بقلق... اخوك فين يا مختار..... والراجل ده عايز منه ايه ارجوك يا ابني رد عليا
مختار اتنهد والتفتله وقال بهدوء...اولا انا مش ابنك ومتقولش ابني تاني الكلمه دي لما بتطلع من بوقك بتقلب بطني ..ثانيا حمزه فين... ومين ده.. وكل الاساله دي اكيد اكيد مش هجاوبك عليها حتى لو اعرف....خلي حمبوزو ابنك وحبيبك يقولك لما يرجع ومتدخلونيش وسطكم علشان ريحة العرق
قال كده وطلع على اوضته وغانم بص لطيفه بغضب شديد وقال...هانت...هانت قوي يا مختار
عند حمزه دخل البيت لقى نسيم قاعده على الكنبه وبتبكي واول ما شافته قالت بانفعال...سمعت اخوك قال عني ايه و....
بس قاطعها وقال بسرعه....انا قولت نفس الجمله دي عن البنت اللي معاه قبل كده وبيردهالي مش اكتر...انما هو عارفك كويس وكلامه ده بيعصبني بيه مش اكتر..ممكن تهدي بقى علشان نتفاهم
نسيم مسحت دموعها بقوه وقالت وهيه بتحاول تكبت غضبها...تمام..تمام نتفاهم..انا اصلا قبلت اجي معاك هنا علشان نتفاهم ونحط النقط على الحروف علشان ارجع بعدها لحياتي ....وانت ترجع لحياتك و تنساني خالص
حمزه قرب منها وقال بصدق واضح في عيونه ....مش هقدر...مش هقدر انساكي عارفه ليه ..علشان انتي هترجعي لحياتك انما انا معنديش حياه من غيرك
نسيم اتنهدت بوجع وحاولت تحبس دموعها وقالت ...هيبقالك ...وهتعيش احلى حياه كمان لسه العمر قدامك وصدقني كل حاجه بتتنسي و...
حمزه قاطعها وقال بسرعه وعصبيه...لما نكون عايزين ننسى يا نسيم انما انا مش عايز انساكي متحاوليش تصبريني بكلام ملوش لزوم انا مش طفل
نسيم زعقت بعصبيه وقالت ....وهيه دي تصرفات كبار وعاقلين...انت خاطفني فاهم يعني ايه..انت بتودي نفسك ورى الشمس وانا مش هقدر اتفرج عليك وانت بتغرق كفايه اللي اتاذو بسببي
وقعدت على الكنبه وحطت ايدها على وشها وبقت تبكي بقهر
حمزه اتنهد وقعد جمبها وقال ...جوزك ليه عمل كده في ابوكي ...ليه سجنه ...علشانك ولا فيه سبب تاني
نسيم التفتتله بصدمه وعيونها هيطلعو من مكانهم والكلام اتجمد على لسانها
حمزه طلع منديل وادهاولها وقال بهدوء...امسحي دموعك وهنتكلم زي الكبار العاقلين زي ما انتي عايزه
بقلم......زهرة الربيع
عند مختار طلع على اوضته لقى روعه مستنياه جريت عليه وقالت....ايه اللي حصل اتخانقتو مشي ولا ليه
مختار اتنهد وقال... مشي ....فهمته اني معرفش حاجه عن حمزه دلوقت لحد ما اعرف هعمل معاه ايه
روعه قالت بقلق....المهم تتصرف بعقل يا مختار بلاش تهور علشان نعرف نحلها
مختار قال بتوتر...شكلها ملهاش حل المرادي الجدع عامل زي المجنون على مراته معتقدش تتحل بفلوس ولا مفاوضات
روعه قالت بقلق....طيب هنعمل ايه
مختار فاجأها لما شدها قعدها على رجله وبقى محاوطها باديه علشان متقومش
روعه اتخضت وبقت تدفعه وعايزه تبعد مش عارفه وقالت...ايه الجنان ده يا مختار.... فيه ايه
مختار بص لعيونها وقال ....قبل ما حمزه يكلمني قولتيلي انك محبتيش لان لو كان قلبك دق قبل كده مكانش دق تاني ...قصدتي ايه...هو انتي بتحبي من ورايا
روعه اتوترت جدا وحاولت تبعد وهيه بتقول....سيبني يا مختار عيب كده.... وبعدين ايه فكرك بالكلام ده دلوقت ..ابعد سيبني
مختار قربها ليه اكتر وقال.... متحاوليش مش هتقومي غير لما تجاوبي.... لو عايزه تخلصي اتكلمي
روعه بلعت ريقها بتوتر وقالت...انا...انا كنت بقول يعني ..اللي قصدته اني لو كنت حبيت قبل كده كنت افتكرت اي حاجه يعني
مختار بص لعيونها بقوه وقال ...بس انتي قولتي مكانش قلبك دق تاني
روعه داست على شفتها بكسوف ونزلت عيونها وقالت ...عديها بقى ورحمة الغالين
مختار ضحك جامد من قلبه ضحكه صافيه جدا لاول مره وروعه ابتسمت وعيونها بيلمعو وبقت تبصله باعجاب واضح
مختار خد باله لنظراتها وقال بابتسامه ...عموما انا كمان محبتش قبل كده ...علشان لو كنت حبيت مكنتش هقدر احب تاني
روعه قالت باستفهام....بجد....ولا حتى منى
مختار اتغيرت ملامحه لقرف واضح وقال ....يع اعوذ بالله ملقتيش غير دي
روعه قالت بغيره بتحاول تخبيها....اصلي مره سمعتها بتقول لصاحبتها انكم كنتو عايشين مع بعض واللي بينكم كبيييير
مفهمتش الكبير ده سنه قد ايه يعني
مختار ضحك بسعاده وقال.....دي غيره دي ولا ايه
روعه قالت ..لا طبعا هغير من دي
مختار ابتسم وقال ...ولا من دي ولا من غيرها اللي زيك تغير ازاي بس.... ده الجمال ساب الدنيا كلها وسكن عيونك
روعه ابتسمت بسعاده وقلبها بقى يدق بعنف من تأثير كلامه ومختار قرب منها وهو مغيب تماما بس لحقت نفسها ودفعته بسرعه وقامت جريت على الحمام وهيه مش قادره تبصله اكتر
مختار اتنهد واترمى على السرير بارتياح وهو حاسس ان ملامحها محفوره بعيونه ومش قادر ولا عايز ينساها
بس فجاه اختفت ابتسامته والحزن بان على ملامحه لما افتكر مكالمة شاكر وانه خلاص بكره هيعملها العمليه وهيسلمها بايده لمصير مجهول لو قتلوها هيبقى رحمه بالنسبالها
لمعت عيونه بالدموع ياترى هتحس بايه لما تعرف بكل اللي عمله معاها ياترى هيحصل ايه بكره ..وازاي هيسلمهالهم بايده ويودعها وهو عارف اللي هيحصلها ...طب لو مقدرش يسلمها هيعمل ايه...دماغه بقت تدور بيه نام من غير ما يغير ولا ينزل ياكل وهو بيتمنى ينام وميقومش ابدا ويخلص من الحيره دي
بعد شويه روعه خرجت لقته حاضن المخده بقوه ونايم زي الاطفال ...بس اتفاجات بدموعه على خدوده قربت منه باستغراب ومسحت خده بكفها وقالت بحزن...متقلقش ...بكره هيبقى احسن ...اوعدك
وقربت بتردد باسته من جبينه.... وطلعت تنام على الدولاب زي العاده
اول ما طلعت مختار فتح عيونه لما حس باللي عملته وابتسم بوجع اكبر وراح في النوم تاني وكانه المهرب الوحيد من صراع قلبه وعقله
عند حمزه كانت نسيم مصدومه من اللي قاله وقالت بتوتر..انت قصدك ايه
حمزه اتنهد وقال...نسيم مفيش اي مجال للكدب والاسرار بنا ...خلاص لازم تتكلمي علشان اساعدك...انا عرفت ان عمي نصار اتحبس من سنه....وعرفت اتحبس ليه ...وعرفت كمان ان جوزك ماسك عليه ايصالات اشتراهم ودفع فلوسهم مخصوص علشان يسجن ابوكي...ليه عمل كده..علشان يتجوزك ولا فيه حوار تاني
نسيم نزلت دموعها وقالت....علشان يتجوزني....جمال كان ساكن في نزلة السمان وبعدها اخد الشقه اللي في وشنا علشان معاه تجاره وهيقعد فيها لحد ما يخلصها ....وهناك شافني ومن يومها وهو حاططني في دماغه....اتقدملي وانا رفضته...وحاول معايا كتير بس كنت بصده ...لحد ما في مره بعتلي هديه زباله زيه...وانا اتنرفزت وروحت رمتها في وشه على القهوه وبهدلته قدام رجالته ..والموضع كبر معاه وشافها اهانه ...ولما حصلت المشكله مع ابويا راح اخد الايصالات فورا وحبسه من غير انذارات حتى
حمزه كان بيسمعها وحاسس بنار في صدره لانه مكانش معاها في كل ده ونسيم كملت وقالت بدموع...روحتله وطلبت منه يطلعه وانا هدفع...قالي موافق ...بس يكتب عليا الاول ووعدني هيخرجه بعدها ...طلبت يخرجه الاول بس قالي يضمن منين اني هتجوزه لو ابويا خرج ....وقالي انه قد كلمته وهيخرجه..وكانت غلطتي ان خوفي على ابويا خلاني اوافق وامنتله.... ومن يومها وهو بيتحجج.... لما نكمل شهر ....لا لما اطمنلك ..لما تحبيني ...لما نخلف ...وابويا مرمي هناك وامي واخويا مرمين في اوضه على السطوح لانه اخد شقتنا في الدفعه الاولى من الفلوس
حمزه قال بحزن شديد ....ليه مرجعتيش لاهلك طالما كده كده موفاش بوعده
نسيم نزلت دموعها بحسره وقالت ....حاولت ....بس بعد ما رجعت كلمونا ان ابويا في مستشفى السجن....وعرفنا ان فيه ناس ضربته جامد هناك....وطبعا هو اللي مسلطهم علشان يضغط عليا....انت متعرفش هو حقير ازاي ..انا قولتلك كل حاجه اهوه يا حمزه..ممكن بقى كفايه عليا اللي انا فيه وتبعد عن السكه دي انا مبقتش مستحمله ....خليني في هم واحد
حمزه بصلها بوجع وقال..انا اسف....حقك عليا....كل ده حصلك وانا...انا مكنتش معاكي....انا مطلعتش قد وعدي لما قولتلك هكون جنبك دايما....حقك عليا...والله في الفتره دي كانت ظروفنا وحشه قوي ابويا اتوفى وامي كانت بتموت والشركه راحت وكل حاجه كانت فوق دماغنا...انا عارف ان ده مش مبرر يخليني مسألش عنك بس حاولي تسامحيني
نسيم قالت بسرعه..مسمحاك ومش زعلانه والله منك ....عارفه الدنيا اتكركبت معاكم ازاي...... وانت اصلا سافرت بعدها ومعرفتش اتواصل معاك علشان كنت عايزه اقولك اني هتجوز...المهم...دلوقت اللي حصل حصل خلينا في النهارده....صدقني احنا دلوقت احسن بكتير..احنا الاتنين مرينا بظروف وحشه وحاولنا واتخطينا جزء كبير منها..وهنكمل ....انت هترجع تكبر شغلك واسمك اللي تعبت عليهم...وانا هرجع علشان اكمل واقدر ارجع ابويا وامي بيتهم...يلا بقى علشان خاطري رجعني يا حمزه
حمزه هز راسه بالرفض وقال....مش هسيبك لوحدك تاني...وكل اللي انتي عايزاه هيحصل هنرجع ابوكي واهلك بس وانتي معايا
نسيم وقفت بغضب وقالت...يووووه بعد كل اللي حكيتهولك...يا بني ادم افهم ...ده واحد بلطجي زباله ....انا خايفه عليك وعلى اهلي بلاش نتصرف بانانيه وناس كتير تروح في الرجلين
حمزه وقف وقال بحسم....البني ادم ده محدش فرعنه غير خوفكم منه ...ومحدش هيوقفه عند حده غيري وهدفعله فلوسه على الجزمه وارجع لاهلك كرامتهم حتى لو هبيع كل اللي عملته ولو هبيع هدومي كمان والموضوع منتهي
واخد مفاتيح البيت من على الطاوله وراح قفل الباب بالمفتاح وحط المفاتيح في جيبه ونام على الكنبه وقال علشان ينهي النقاش...انا تعبت وعايز انام ...وانتي كمان ادخلي الاوضه اللي جوه دي و نامي علشان السهر غلط على الحمل....ومتحاوليش تخرجي علشان الباب مقفول بالمفتاح وهتتعبي على الفاضي
نسيم بقت تبصله بدهشه وقعدت بيأس وهيه شايفه مفيش فايده من الكلام معاه وفكرت ان ممكن الصبح ترجع تحاول معاه تاني يمكن ربنا يهديه... فضلت مكانها تفكر ياترى جمال ممكن يكون عمل ايه لما فاق وملقهاش ....وفضلت وسط افكارها لحد ما نامت مكانها على الكرسي
بعد شويه حمزه فتح عيونه وابتسم لما لقاها نامت مكانها افتكر كلامها وحس بوجع جواه من اللي سمعه منها ....اتنهد وقام شالها ودخلها على السرير وغطاها وخرج نام على الكنبه وهو بيفكر ايه اللي ممكن يعمله علشان يخرجوا باقل الخساير
في صباح يوم جديد كانو روعه ومختار في شقة المعادي والدكاتره بيجهزه اوضة العمليه
بقلم...زهرة الربيع
روعه قالت لمختار بقلق...هو احنا ليه مش بنعمل العمليه في مستشفى او عياده
مختار بصلها بحزن وقال ...علشان..احم....علشان هنا اسهل من غير اجرات ولا تعقيدات
روعه بصتله شويه لقته متوتر وبيفرك باديه وعيونه مليانين دموع مسكت ايده بحنيه وقالت.....متقلقش هتبقى بخير
مختار بقى يجاهد علشان يحبس دموعه وقال...المهم انتي تبقي بخير
روعه لسه هترد جيه الدكتور وقال...يلا اتفضلي معانا علشان التخدير
روعه وقفت وبصتله بقلق ...وقالت....هو التخدير حقن مش كده
مختار حط ايده على خده وابتسم بدموع وقال...اه حقنه...ياترى مين صاحب النصيب
روعه ضحكت بخفه ولسه هتمشي مسك ايدها وبقى يبص لعيونها وقال بوجع....سامحيني
روعه قالت باستغراب...ليه بتقول كده
مختار نزلت دموعه وشدها ليه ضمها بقوه حضن طال بينهم وهو بيفتكر كل ثانيه قضاها معاها زي شريط سينمائي بيتعاد.... كل لحظه وكل ضحكه شقاوتها وحنينها وكل نظرة حلوه هونت عليه الدنيا
فاق على صوت حمحمه من شاكر وبعدو عن بعض وايده لسه ماسكه ايدها مش عايز يسبها
الدكتور اخدها معاه واتسحبت ايدها من ايده وفي اللحظه دي حس ان روحه اللي اتسحبت منه قعد على الكرسي وهو مغيب عن الدنيا كلها..... حاسس نفسه اوسخ انسان في الدنيا حاسس بعجز ووجع ميتوصفش
شاكر كمان قعد وعيونه مليانه دموع وحط اديه على دماغه وهو بيحاول يتحمل
بس مفيش دقايق ومختار اتنفض من مكانه وهو بيقول...لا...لا
شاكر بصله باستغراب وقال..فيه ايه يا باشا
مختار مردش عليه ودفع الباب ودخل ودفع الدكتور اللي هيديها الحقنه وشدها من على السرير وهو بيقول...لا مش هتعمل حاجه...مش عايز ...مش عايز خلاص
روعه قالت بصدمه...... فيه ايه يا مختار
مختار قال بدموع وهستريا ...مفيش..مفيش انتي مش هتعملي حاطه.... مش عايز ...مش عايز اعيش...مش على حسابك ابدا.....ابدا مش هقدر
روعه قالت بذهول...انا مش فاهمه.... هو فيه ايه
مختار قال بحسم...يلا معايا هرجعك لاهلك ....
روعه قالت باستغراب..... اهلي..طب وانت.... والعمليه
مختار حضن خدودها باديه وقال..مفيش عمليات ...انا كده كده ميت ...لو معملتيهاش هموت مره واخلص...بس لو خسرتك هموت مليون مره ...مش هقدر..... يلا هرجعك لاهلك حالا
وشدها من ايدها من غير ما تفهم حاجه ولسه هيخرج بيها من الشقه اتصدم بسلاح في وشه وكان عزيز وابنه ورجالته
عزيز بصله بابتسامه ترعب وقال...على فين يا مخ
وبص لروعه من فوق لتحت وقال...حد برضه يفكر يغير الوش العسل ده...... ده انت جاحد يا راجل
مختار اتجمد مكانه وروعه بصتله بصدمه ووووو
يلاااااا قولو رأيكم في الاحداث وعايزه حماس عالي عااااالي لان في مفاجأت متتعدش في الللي جاااي يلااا انطلقو علشان ننزل بسرررررعه🏃🏾♀️🏃🏾♀️🏃🏾♀️🏃🏾♀️🏃🏾♀️