جمال اتصدم لما فتح الباب ولقى حمزه في وشه وفي ايده سلاح قال بغضب ...نعم يا دكتور فيه حاجه
حمزه بصله بغضب شديد وصدمه لما رفع السلاح في وشه
جمال اتجمد مكانه ونسيم جريت عليه بلبس النوم من الصدمه وقالت بذهول ورعب ..حمزه انت بتعمل ايه....نزل البتاع اللي في ايدك ده
حمزه بصلها من فوق لتحت وداس على اسنانه بغيره لما لقاها بلبس النوم وجمال حاول يتماسك وقال.....متتدخليش انتي يا نسيم...روحي البسيلك حاجه
نسيم خدت بالها للبسها وقالت وهيه بتتحرك ناحيه اوضتها وبترتعش...حمزه وحد الله متوديش نفسك في داهيه ارجوك... انا جايه...جايه حالا
وجريت على الاوضه برعب
جمال قال بغضب..انت جاي لحد بيتي و بتهددني بالسلاح ...فاكر اني هسكتلك ...لو مش عايز تروح لناسك في شوال خد اللعبه اللي في ايدك وهوينا قلقت منامنا
حمزه قرب عليه اكتر وابتسم وقال بقوه...ههويك... واوعدك هتلحس تراب الارض علشان تقدر تشوفني تاني
جمال بصله باستغراب وقبل ما ينطق فاجأه حمزه لما ضربه بضهر السلاح فوق دماغه بقوه شديده
جمال حط ايده عل دماغه وحس الدنيا بتدور بيه وقال بالعافيه...يا ابن الكل....
بس مكملهاش ووقع مغمى عليه على الارض
في الوقت ده خرجت نسيم وهيه لابسه العبايه وفي ايدها الطرحه هتلبسها بس لطمت بذهول لما لقت جمال على الارض جريت عليه وهيه بتقول ببكا وصدمه..يا مصبتي السوده ليه كده يا حمزه عملت ايه...عملت ايه حرام عليك ليه تودي نفسك في داهيه كده ليييييه
حمزه كان واقف مش بيرد بيبصلها وبس
نسيم لقت الدم نازل من دماغ جمال شهقت برعب ووقفت بسرعه وشدت منه السلاح وبقت تمسحه بايدها وهيه بتقول امشي من هنا بسرعه...يلا من هنا يا حمزه يلا انا هتصرف امشي
حمزه ابتسم على برائتها كانت بتمسح السلاح باديها اللي بترتعش عايزه تمحي بصماته ببصماتها مسك اديها بقوه وقال ...حمد الله على سلامة قلبي.... متخافيش هو عايش
قالت وهيه بتتنفض..لا..لا فيه دم و...انت..انت مش لازم تكون هنا.... ابوس ايدك امشي
حمزه ابتسم وقال ....هنمشي انا وانتي هنمشي ...يلا بينا مش هسيبك ليه تاني
نسيم قالت بصدمه ...انت بتقول ايه ...انا مراته يا حمزه مراته
حمزه حط صباعه على شفايفها وقال بغيره شديده..اششس متقوليش الكلمه دي قدامي....انتي مش مراته ولا عمرك هتكوني ...يلا يا نسيم يلا قبل ما يفوق وهنتفاهم في كل حاجه
ومسك ايدها ولسه هيتحرك رفضت تتحرك معاه وقالت باصرار...لا..لا يا حمزه انت مش فاهم حاجه ..انا خلاص مكاني هنا...ارجوك يا حمزه بلاش نضيع احنا الاتنين
حمزه قال بثقه....محدش فينا هيضيع ...احنا الاتنين هنعيش احلى عيشه ...يلا يا نسيم امسكي ايدي وانا اوعدك مش هتخلى عنها ابدا
نسيم هزت راسها برفض ودموع وقالت.... امشي علشان خاطري ارجوك يا حمزه امشي
حمزه زعق فيها وقال..اسمعي الكلام...يلا قبل ما هو يفوق او حد من العماره يصحى يلا مقدمناش وقت
نسيم قالت بدموع ....مش هقدر مش بايدي
حمزه قال بغضب ..يا نسيم يا...
بس قطع كلام لما شاف الحبل اللي مربوطه بيه الستاره
ابتسم وبصلها وقال بحزم...لاخر مره هتيجي معايا بالزوق ولا لا
نسيم قالت برعب ....لا لا مش هاجي وانت امشي من هنا ....يلا من هنا ابوس ايدك
حمزه اتنهد وراح فك حبل الستاره وقرب منها وهيه بتبصله بذهول وقالت ..انت..انت هتعمل ايه
بس اتصدمت لما لف اديها ورا ضهرها وبقى يربطهم بقوه وهيه بقت تقاومه بس مش قادره ومش عايزه تصوت علشان محدش يأذيه
وبتقول بذهول...حمزه ..حمزه بتعمل ايه.... سبني... سيبني يا حمزه هصوت واوديك في داهيه
حمزه بص لعيونها وهو بيربطها وقال ...صوتي...لو كنتي قادره تعمليها مستنيه ايه
نسيم استسلمت وبقت تبكي وقالت برجاء....ارجوك يا حمزه سيبني وامشي ..ابوس ايدك ..لو ليا خاطر عندك
حمزه اتاثر جدا بدموعها بس عقد الحبل بقوه وقال ...انا بعمل كده علشان خاطرك عندي بالدنيا ...سامحيني
نسيم لسه هترد اتفاجات اكتر لما مسك طرحتها وربط بيها بقها بالقوه وشالها على كتفه رغم مقاومتها الشديده وخرج بسرعه قبل ما حد من العماره يصحى ويوقفه
عند مختار كان واقف جمب روعه وهيه بتبص للحقنه في ايد الممرض بخوف وقالت ...هو...هو مفيش طريقه تانيه تسحبو بيها العينه غير الحقن
مختار ابتسم على طفولتها وقال....فيه ....ممكن نسحبهالك بحبل
روعه بصتله بغيظ وقالت.... بتتريق حضرتك...مهو لو انت اللي هتتشك بالحقنه مكنتش اتكلمت
الممرض قال..... يلا بقى يا انسه بقالي ساعه واقف
مختار اتنهد وقال..انا همسكلك ايدها وانت اسحب
شاكر قال بسرعه وقلق...لا بلاش...انت ابعد منها خالص وهو يسحب لوحده
مختار بصله باستغراب وقال ...ليه يعني
شاكر قال بتوتر...اسمع مني وخليك بعيد
مختار اتنهد بخنقه منهم وقال ..يلا يا دكتور مش ناقصه لعب عيال انا لسه مفطرتش على الصبح
ومسك ايد روعه وهيه غمضت عيونها بخوف واول ما سن للابره لمس ايدها ضربت مختار قلم قوي وسريع بايدها التانيه وهيه بتصرخ
مختار حط ايده على خده بصدمه وقال بذهول...يا حلاوتك
روعه بلعت ريقها بخوف وقالت بهمس...اسفه
شاكر مشى ايده على خده هو كمان وقال ...قولتلك خليك بعيد مسمعتش مني
الدكتور سحب الحقنه وهو عايز يضحك ومختار كان بيبص لروعه بغضب وغيظ وتوعد
واول ما الدكتور اخد العينه وخرج هو وشاكر روعه جريت علشان تطلع على الدولاب بس مختار جري وراها وجابها من شهرها وقال ...وحياة امك ....ده انتي ليلة اهلك مش معديه
عند شاكر كان بيتكلم مع الدكتور على السلم وبيقول بقلق ...التحاليل هتاخد وقت قد ايه
الدكتور قال...مش كتير متقلقش انهارده ابلغك بالنتيجه مش هتطول
شاكر اتنهد وقال بهمس...ياريت تطول
الدكتور مسمعهوش كويس وقال..نعم
شاكر اتنهد وقال....لا ابدا...المهم اول ما تظهر تبعتها للدكتور اللي اديتك رقمه علشان يشوف هيعمل العمليه امتى... يلا اتفضل معايا
ومشي معاه خرجو من البيت تحت انظار غانم اللي كان واقف ورى السلم وسمعهم قال بحيره ..هو فيه ايه..تحاليل ايه ....وعملية ايه
واتصل على رامي فورا وقال بهمس.....بقولك ايه.... فيه حاجه عجيبه حصلت دلوقت
عند حمزه حط نسيم في العربيه وطلع بيها بسرعه وهو بيقول...متخافيش ..محدش هيقدر يأذيك تاني...انا معاك خلاص
نسيم كانت بتهز راسها برفض وخوف وبتحاول تفك اديها مش عارفه
حمزه اخدها على البحر في نفس المكان اللي كانوا يتقابله فيه زمان...
وقف العربيه وبصلها بابتسامه جميله وقال....ايه رايك فاكره المكان ده ....ولا هتمثلي انك نسياه هو كمان
نسيم بصت حواليها ونزلت دموعها بحزن وحسره
حمزه حاول يمسح دموعها بس بعدت وشها وهيه بتبصله بقلق
حمزه اتنهد وقال بحزن....بلاش النظرات دي يا نسيم.... بلاش احس انك خايفه مني انتي عارفه اني مستحيل اءذيك
نسيم بقت تهز دماغها بغضب عيزاه يفك الطرحه من على بقها
حمزه اتنهد وقال .....تمام حاضر هفكها بس من غير جنان ملوش لزوم
واول ما فك الطرحه قالت بعصبيه..انت اتجننت خلاص مبقاش فيك ولا ذرة عقل ...رجعني بيتي حالا
حمزه قال بعصبيه.... متقوليش بيتي ....انتي ملكيش اي بيت مع ذكر الخرتيت اللي هناك ده
نسيم قالت بزعيق وانفعال...ذكر الخرتيت ده يبقى جوزي...قصدي جمال جوزي دي حقيقه متقدرش تنكرها....يلا فكلي ايدي وانا هروح لوحدي يلا قبل ما يفوق و يعمل مشكله
حمزه اتجاهل كلامها وابتسم وقال...وحشتيني.... حتى عصبيتك دي وحشتني
نسيم لمعت عيونها بالدموع وقالت برجاء...حمزه ارجوك ...انت كده هتروح في داهيه..مش خايف على مستقبلك ولا على اسمك اللي كنت بتحلم تكبره....طيب مش خايف على حياتك حتى
حمزه بص لعيونها وقال ....خايف اخسرك تاني.... ده الشئ الوحيد اللي بيخوفني ...كل اللي قولتيه ده ملوش اي معنى من غيرك يا نسيم
نسيم كان قلبها بيدق بعنف واعجاب بكلامه بس حاولت تقوى ومتبينش وقالت ..تمام انا بقى خايفه ....انا ست متجوزه وخايفه على سمعتي وسمعة اهلي وجوزي ....ممكن تسيبني في حالي بقى
حمزه غمض عنيه بضيق وقال...لو قولتي جوزي تاني قدامي هقلب العربيه بينا احنا الاتنين واريحك وارتاح ايه رايك
نسيم بصتله بدهشه وقالت ..بس دي الحقيقه يا حمزه ...من امتى بقيت خيالي كده..... انزل الارض وعيش معانا انا متجوزه خلاص ..و..وحامل كمان واللي في بطني لو جراله حاجه بسبب عمايلك دي مش هسامحك
حمزه افتكر قصة حملها وان فعلا التوتر والجهد ده غلط عليها قال باستفهام.....اه صحيح انا نسيت...طيب انتي تمام فيه حاجه وجعاك
نسيم بعدت عيونها عنه وبلعت ريقها بتوتر وقالت ..لا...بس قلقانه وده غلط
حمزه كان حافظ حركاتها وعارف انها لما بتكدب مش بتقدر تبصله قال بشك....نسيم انتي حامل اكيد.... ولا دي كدبه من بتوعك
نسيم قالت بغيظ ....وانا امتى اكدبت عليك ان شاء الله
حمزه ابتسم بسخريه وقال ...هعمل مكالمه مهمه...واجي اقولك امتى كدبتي عليا....بس نلاقي مكان نقعد فيه الاول
نسيم اتصدمت بجملته وبقت تزعق وتقول ...مكان ايه الي نقعد فيه.... انت اتجننت رجعني بقولك فكني يا حمزه
بس حمزه اتجاهلها ونزل وسابها بتزعق بجنون
عند مختار كان ماسك روعه بقوه وقال ...انا بتضربيني بالقلم يا بت...ده محدش قدر يعملها قبل كده ..ده انا ابويا معملهاش
روعه كانت واقفه زي الفرخه المبلوله وبتقول بخوف..اس..اسمع بس هفهمك ..انا...انا والله مش قصدي ....انا حتى لما عملت التحليل المره اللي فاتت مره ضربت شاكر ومره الدكتور دي عاده عندي لما حاجه توجعني بضرب اللي قدامي
مختار هزها بقوه وقال...لا والله وهو اي حد قدامك يتضرب عادي.... انا مختار الديب يا بت الظاهر دلعتك ذياده
روعه قالت بدلال علشان تهديه و يسيبها...وفيها ايه....من حقي اتدلع طول ما انا معاك ...هو انا مع اي حد
مختار هدي شويه وشدها ليه بقت بين اديه وقال ....اممم هو تثبيت انا عارف ..بس تم بنجاح
روعه ضحكت بخفه ضحكه جميله زيها وقالت ...يعني مش زعلان ...طيب ممكن تسيبني بقى
مختار شدها عليه اكتر وقال ....تؤ ..انا مش زعلان بس خدي لسه زعلان ...صالحيه
روعه قلبت شفتها لما فهمت قصده وقالت بتحذير..... اصالحه بنفس الكف ولا بالكفه التانيه
مختار بصلها بحده خوفتها فقالت بسرعه وخوف...ياعم خلاص متبصليش كده حرام عليك هيجيلي تبول لا ارادي بسبب عنيك دي
مختار ابتسم وبص لعيونها باعجاب وقال...طب ما انا هيجيلي السكر بسبب عنيكي ومستحمل
روعه ابتسمت تلقائيا ونسيت نفسها قدام نظراته ومختار نسي الدنيا كلها وهو تايه في عيونها وكانت بينهم نظرات بتقول كتير
قاطعها صوت تليفونه طلعه من جيبه بضيق وكان هيفصله بس اتفاجا برقم حمزه وقلق جدا لانه مش بيتصل عليه بالعاده رد بسرعه وقال ...فيه ايه يا حمزه
حمزه قال بحرج..احم ..مختار انا عملت مصيبه ....انا خطفت نسيم من جوزها و محتاج مساعدتك ...ممكن تيجي بسرعه ؟؟