ايهاب
كنت قاعد في المكتب الوقت كان بدري شديد رائد جاني قال لي اها مستعد قلت ليهو لسه قال لي ما تخاف اهلك مافي زول ح يعرف حاجه و ملاذ بشيلا في عيوني لحدي ما ترجع وربنا يكتب ليك الشفى وتتزوجوا قلت ليهو بحلم يا رائد بحلم بي كدا بس لو ما جيت راجع خلي بالك منهم و منها وطلعت ليهو دفتر من الدرج قلت ليهو لو إتأخرتا اديها ليهو مسكو مني قال لي يا إيهاب ربنا اكيد بجبر بخاطرك إنت حبيتا وحبك كان صادق ليها شديد ورغم محبتك ليها هي قدامك ما قدرتا تعترف ليها الا بالحلال ربنا ما بكسر بخاطرك وانا واثق انو هي مهما عملت م ح تلقى احسن منك بس لازم تجي راجع سريع عشان هي منتظراك طلع لي شريط الحبوب قال لي ديك اكيد خلصتها قلت ليهو يا رائد ح تمسك محلي خلي بالك من المستشفى حتى لو ما رجعتا المستشفى امانه في رقبتك إتفقد المرضى كلو فتره وخلي ملاذ تشتغل في الطوارئ انا ما بضمن ناس الطوارئ ديل بس واثق من قدرات ملاذ وسحر برضو واثق من قدراتا قال لي ما تخاف كلو محلول امشي وقلبك مطمئن
في كلامنا الباب دقا قلت لي رائد اكيد دي ملاذ امشي بعد دا فتح الباب سلم عليها وطلع جات داخله طوالي مشت قعدت قلت ليها الناس الطبيعيه بتقول السلام عليكم صباح الخير قالت لي بردها ليك على فكره قلت ليها كويس قالت لي الليله مافي عمليات صح قلت ليها لأ مافي سكتت وطلعت تلفونا وبقت شغاله فيهو عاينت ليها مسافه ح إشتاق ليها بقيت اعاين لي إنعكاسي في التلفون وبقيت اقول في نفسي حتى لو جيت بعد العلاج كويس هل ملاذ ح تحبني وانا اصلع وعلامات تعب الكيماوي في وشي !! هل ح تحبني وانا ضعيف وهزيل وملامحي باهته قلبت التلفون وختيت يدي في راسي كان في وجع خفيف طلعت الحبوب وشلت منها حبه بلعتها...
ملاذ
إيهاب كان غريب الليله حسيت من تعاملو معاي إنو في حاجه عملت نفسي منتبه مع التلفون وهو زاتو فتح تلفونو كان منتبه معاهو مسافه حسيت بيهو متأثر بي حاجه وفي عيونو لمعه غريبه كنت عايزه اسألو بس إتراجعت خفتا يحرجني زي الساعه ١٠ كدا طلعنا العمبر إتفقدنا المرضى وحالاتهم وجينا طالعين إيهاب قال لي الليله مافي شغل كتير تقدري تمشي قلت ليهو طيب فعلا مشيت شلتا شنطتي ومشيت لي سحر إتونست معاها حبه ومشيت الشقه
مره كم يوم تعامل إيهاب معاي إتغير ١٨٠ درجه بقى يتونس معاي ومرات بناقش معاي الحالات مره قال لي عندي امنيه ممكن تحققيها لي قلت ليهو شنو قال لي بوريك بس ما هسي قلت ليهو على حسب الامنيه قال لي تمااام يوم جيت لقيتو راقد في المكتب قلت السلام عليكم ما ردا على قلت ليهو إيهاب مشيت عليهو وشو كان احمر عديل طبعا هو لونو ابياااض لمست راسو كان عندو حمه مبالغه جريت ناديت دكتور رائد جاء جاري قعد يتفقدو قال لي خليك معاهو دقيقه واجي مشى جاب مويه بارده ومنديل قماش وبقى يعمل ليهو مكمدات لحدي ما فتح عيونو طلع حبوب من الدرج واداهو منها وشربو مويه بقيت مستغربه مالو امبارح كان كويس قلت لي رائد مالو قال لي إلتهاب بجيهو من فتره لي فتره بتعب شديد قلت ليهو مستحيل يكون دا إلتهاب يا رائد لازم نمشي نفحص ليهو الاتنين عاينو لي بعض إيهاب قال لي مافي داعي انا عارف علاجي وهسي ببقى كويس وبعدين هو التهاب اصلا بجيني صعب في البدايه وبروح تدريجيا قلت ليهو زي يوم داك راح اليوم التاني طوالي يا دكتور انا برضو قاريه مجال طبي وبعرف الالتهاب احسن تمشي تتطمن على نفسك قال لي حاضر بمشي افحص..
وفعلا رائد سندو وطلعوا بعد مسافه جو قلت ليهم اها قالوا شنو رائد قال لي إلتهاب ما عندو حاجه سندو لحدي ما قعدت في كرسيهو ابدا ما كنت مقتنعه بي قصة الألتهاب دي دكتور رائد طلع بقينا قاعدين انا وإيهاب كنت بعاين ليهو بس إنتبه لي قال لي مالك؟ قلت ليهو متأكد إنك كويس قال لي كويس الحمد لله ما تشغلي بالك....
يتبع