الاتنين إنتبهن معاي قلت ليهم في حاجه إنتوا داسنها مني؟ ريم قالت لي حاجه شنو قلت ليهم بتعرفوا دكتور إيهاب؟ الاتنين حسيت بيهم إرتبكوا زهره قالت لي دا مديرك في الشغل صح نحن نعرفوا من وين ؟ ريم قالت لي زهره مافي داعي نكزب عليها أكتر من كدا يا زهره هي لازم تعرف الحقيقه،،إتصدمت من كلام ريم طبعا قلت ليها حقيقة شنو يا ريم إتكلمي قالت لي إيهاب ولد عمك عمر قلت ليها ولد عمي؟! قالت لي زمان عمك كان ساكن جمبنا وبتزكر كان في مشاكل بينو وبين ابوك الكلام دا إنتي ما بتتزكريهو كنتي صغيره زمان المهم حصلت مشكله كبيره وعمك سافر وخلى البلد هو واسرتو ما عارفه التفاصيل كلها بس البتزكروا إنو عمك تقريبا باع بيت جدك من دون علم ابوك وسافر بي قروشو المهم هم سافروا وكان عمك متواصل مع ابوي حتى مرتو كانت متواصله مع امي بعد فتره جانا خبر موت عمك كان مريض فشل كلوي ومن الفتره ديك إنقطعت اخبارهم لكن قبل كم سنه لمن كنا في تالته ثانوي تقريبا مرت عمك إتصلت على أمي وإتونسوا مسافه بتزكر قالت ليها إنو إيهاب جاي نازل السودان وطبعا عشان ليهو فتره طويله ما جا كانت بتوصي في أمي إنو ابوي يمشي يستقبلو في المطار ولانو ما عندوا زول بعرفو غيرنا المهم ابوي مشى جابو بتزكر كان قعد معانا تلاته يوم تتزكري لمن كنا طالعين سوا ولاقانا قلت ليك دا واحد قريبنا قلت ليها اي بتزكر قالت لي يلا أمي كانت موصياني ما اقول ليك حاجه ومن يوم شافنا سوا جا إتكلم معاي بي خصوصك وإنك بت عمو قلت ليهو عارفه الكلام دا لمن سافرتو من جمبنا ما كنت صغيره متزكره المهم وصاني عليك وكان برسل لي قروش سنويا لي وليك ولي زهره وطبعا كنا بنشتري ليك بيها هدايا وكان برسل لي كل بداية سمستر قروش ادفع ليك منها تتزكري لمن قلت ليك قالوا في منظمه خيريه بتتدفع ٨٠ بالميه من القروش تتزكري قلت ليها اي بتزكر قالت لي دا هو كان بدفع ليك ولينا انا ما عارفه يا ملاذ مشكلة اهلك شنو لكن إيهاب دا بحبك حب مميز شديد يا ملاذ طبعا ما بقدر اقول ليك اكتر من كدا الباقي خليهو للزمن بس البقدر اقولو ليك إنو إيهاب دا ضحى كتير عشان يصلح علاقتو بي ابوك ويصلح صورة ابوهو في نظر ابوك بس ابوك رافض وانا ما عارفه السبب شنو وهو عشان كدا ما حبا يعترف ليك بي اي حاجه..
قلت ليها خلاص ياريم اسكتي خليني إستوعب الكلام دا حاسه نفسي في حلم نهاي الموضوع ما راضي يدخل لي في راسي قمت خليتهم طلعتا مشيت البيت راسي وجعني شديد من التفكير فتحت دولابي وطلعت الهدايا كلها وبقيت اعاين للهدايا والرسائل قريتهم كم مره كنت حاسه إنو في حاجه غلط مستحيل يكون الكلام دا حقيقه يعني انا كنت بطلة الروايه ديك انا؟! إتزكرت لمن جاني رابط الشغل فتحت تلفوني رجعت بالرسائل لحدي ما لقيت الرقم نسختو ومشيت بيهو كاشف الارقام ما ظهرت لي تفاصيل بقيت اقول يمكن حتى التقديم دا جاي بي طريق ناس زهره وريم بعد الكلام دا كلامي مع ناس زهره وريم بقى محدود حتى مرات يمر يوم وما إتكلم معاهم كنت ملخبطه شديد سألت ابوي كم مره في الاسبوع دا عن قصة عمي بس ما كان بجاوبني ما كنت بمشي لي زهره كتير لحدي ما جاء يوم نضافة الخدار بالليل مشيت خدمت معاهم وصباح العرس صحيت بدري مشيت ليهم خدمت معاهم لحدي بالليل وقت الحفله رجعت لبست لي فستان بيجي زي ما إتفقنا بس كان عادي قعدتا جات ريم قعدت جمبي قالت لي بعتقد كدا كترتيها يا ملاذ قلت ليها يا ريم اسكتي مني يعني إنتوا ما كترتوها ياخ كم مره كزبتوا علي على الأقل تجوا تصارحوني ما فكرتوا مره وحده إنو انا ممكن إضايق إذا عرفتا تخيلي طول السنين الفاتت دي كنت مفتكره القروش دي قروش المنظمه الخياليه دي في حين إنو كان في إنسان بصرف علي وانا ما عارفه حاسه نفسي عايشه في مسلسل هندي قالت لي يمكن دسينا عليك وما كلمناك بس في النهايه إنتي عرفتي الحقيقه وعرفتي الانسان الكان بصرف عليك يلا امشي ردي ليهو جمايلو وقامت من جمبي كلاما صح والله جمايلو كتيره انا متأكده لو ما كان هو بدفع لي مصاريف الجامعه يمكن لحدي يوم الليله اكون ما قريت والمكانه الانا فيها هسي دي بي فضلو بعد الله سمعتا صوت الزغاريد إنتبهت لقيت العرسان جو داخلين كان في ناس كتار حوليهم إنتظرت الناس خفو ومشيت باركتا لي زهره حضنتها وقعدنا نبكي مسافه وباركتا لي راجلا وجيت طالعه طوالي مشيت البيت طبعا كلهم كانو في الحفله لمن وصلت لقيت ابوي جا قلت ليهو متين جيت قال لي قبل شويه دخلت غيرت الفستان وجيت قعدتا جمبو قلت ليهو انا بعد بكره مسافره قال لي ما قلتي ما راجعه قلت ليهو متين قلت كدا قال لي مزمل ح يمشي معاك الدوره دي يوصلك قلت ليهو كويس وبعدها مشيت غرفتي نمتا....
يتبع
الجمال ياكي ستو والجمال صفه من خصالك❤️