جيت يوم الصباح المستشفى فتحت الدولاب بتاعي عايزه اغير البس ملابس الشغل لقيت القلوفزات شبه إنتهت والكمامات خلصت مشيت لي الاسيستن قلت ليها ليه ما طلبتوا قلوفزات وكمامات الفي الدولاب خلصوا قالت لي ما لاحظت ليهم والله قلت ليها تماام ما مشكله انا بمشي اجيبهم واجي راقبي العمبر معاك قالت لي تماام مشيت مكتب المدير الطبي دقيت الباب ما كان في رد دقيت شديد برضو ماردا قلت ياربي رائد مشى وين فتحت الباب لقيت المكتب فاضي قفلت الباب ومشيت راجعه العمبر شفت دكتور رائد كان واقف ومديني ضهرو وبتكلم في تلفون قلت إنتظرو لحدي يخلص واكلمو مشيت عليهو سمعتو قال للزول البتكلم معاهو الحصل شنو وإيهاب كيف هسي ؟ عمليتو متين ؟... لمن سمعتا الكلام دا راسي بقى يودي ويجيب ياربي إيهاب مالو؟ إنتظرتو خلص إتلفت لقاني واقفه إتخلع لمن شافني قال لي ملاذ مالك في شنو؟ قلت ليهو ليه متوتر كدا قال لي ما متوتر ولا حاجه بس خلعتيني قلت ليهو على فكره سمعتا الكلام !! إيهاب مالو يا رائد قال لي يا ملاذ إيهاب كويس قلت ليهو يا رائد عليك الله قول الحقيقه ياخ ليه داسي مني قال لي يا ملاذ... إيهاب ما كويس والله💔 إيهاب مريض قلت ليهو مريض مريض كيف يعني؟!! مالو عندو شنو!! قال لي إيهاب مريض سرطان!! لمن قال كدا إنصدمتا وإتزكرتا مرضو كان بغشني إنو إلتهاب قلت ليهو إنت بتهظر صح؟!! مستحيل اصدق كلامك دا.....
قال لي ياريت لو بهظر ياريت يا ملاذ بس إيهاب مصاب بي سرطان في الراس وفي مرحله متأخره يا ملاذ هو محتاج دعواتنا يا ملاذ قلت ليهو هو اسي وين ؟ وسمعتك بتقول عمليه؟! قال لي هو حاليا في الهند سافر معاهو واحد زميلنا مافي زول من اهلوا عارف بي قصة مرضو كل العارفنوا إنو في سفرة شغل قلت ليهو كيف يعني ما عارفين رائد انت فاهم بتقول في شنو ديل اهلوا وهو في اللحظه دي محتاج ليهم اكتر من اي زول قال لي يا ملاذ امو مريضه وما بنقدر نقول ليها حاجه زي دي يمكن نكلم اخواتو بس امو هو موصي إنو ما نكلما سكتنا انا إتزكرتا معاملتو معاي في الايام الاخيره والكلام الكان كاتبو عني والهدايا الكانت بتجيني ورسوم الجامعه وطريقة كلامو معاي من دون ما اشعر قعدتا ابكي رائد قال لي كلو لي خير إيهاب محتاج مننا الدعوات يا ملاذ قلت لي رائد انا ما ممكن اشوفو ما ممكن امشي الهند؟! قال لي صعبه دي وإنتي بت براكي كيف تسافري من دون محرم ما صح قلت ليهو طيب هسي هو كيف؟.. ممكن تتصل ليهو قال لي هسي هو كويس بحاول إتصل لي صحبي فعلا إتصل عليهو مكالمة فيديو وإتكلم معاهو قال ليهو ممكن تدي التلفون إيهاب ادى التلفون لي إيهاب رائد سلم عليهو قال ليهو تفتكر معاي منو إيهاب قال ليهو منو قال ليهو ملوذه عايزه تسلم عليك اداني التلفون عاينت ليهو كان راقد في سرير المستشفى وواضح الارهاق في وشو قلت ليهو إيهاب💔 قال لي ملاذ كيفك قلت ليهو تمام انت كيفك قال لي انا تمااام الحمد لله قلت ليهو كنت بتغشني وتقول إلتهاب انا كلمتك دا ما إلتهاب لكن ما بتسمع كلامي ومصر إنو إلتهاب ليه سمحت لي نفسك تصل لي المرحله دي يا إيهاب قال لي دا قدري يا ملاذ ربنا كاتب لي كدا عايز اقول ليك حاجه بما إنو رائد كلمك خلي بالك من نفسك انا إتمنيت إنو ،،إنتي تكوني مرتي وحلالي والله كنت بتمنى كدا اكتر من اي حاجه يا ملاذ بس ربنا ما رايد لينا كدا يمكن نتلاقى قدام يا ملاذ خلي بالك من نفسك وسلمي على عمي انا ماعارف بكره ح يحصل شنو بس....قاطعتو قلت ليهو مافي اي كلام زي دا إنت ح تبقى كويس وح تجي راجع وح تتأمر فيني كمان وح تقول لي متأخره خمسه دقائق وانا ازعل واقول ليك اصلا الليله ماعندنا عمليات ح تجي راجع وتسلم على ابوي بي نفسك وتتطلبني منو كمان وانا موافقه يا إيهاب موش كنت بتقول دي أمنيتك انا موافقه اتزوجك بس تعال راجع يا إيهاب عليك الله تعال راجع حتى المستشفى من دونك ما بتتقعد يا إيهاب...
يتبع