في بريطانيا
كانت قاعده في حديقه البيت الكان بشكل البيوت الانجليزيه القديمه 🏫
فارده شعرها ومنزله رجليها في المسبح والدموع في عينيها شديدة السواد طاقي عليها الحزن الشديد كانت تزيح في خصلات شعرها البتنزل على وشها من لحظه لي التانيه كانت لابسه في يدها اسواره سوداء مما زادا جمال كان لونا ابيض ووشها مدور وكانت قصيره ووزنها متوسط
الجو كان حلو وضبابي والوقت كان بدري شديد والجو حلو
طلع من البيت يفتش فيها لحدي ما لقاها قاعده جمب المسبح مشى قعد جمبها ولاحظ لي دموعا
قال ليها مالك!؟
قالت ليهو تتزكر تاريخ الليله بشابه ياتو تاريخ؟!!
قال ليها بشابه ياتو تاريخ؟
قالت ليهو هه اكيد ما بتتزكر
قال ليها انتي بتتزكري لمن جيتيني وانتي بتبكي وتشكي لي من عمك وانا قلت ليك سافري وانتي فكرتي فيها وجيتي هنا...
قالت ليهو اكيد بتزكر داك كان اسوأ يوم في حياتي!!
قال ليها ندمانه!! ندمانه لانك جيتي هنا
قالت ليهو لأ ماندمانه لاني جيت هنا .. هنا نميت نفسي جيتي هنا خلتني انسي الماضي وعزاب عمي لي بس ظهوروا تاني في حياتي دمر كل حاجه وبي سببو انا هنا
قال ليها ندمانه لانك هنا ولا لانك معاي؟!
عاينت ليهو بي طرف عينا وقالت ليهو ندمانه بس
قال ليها الليله زكرى زواجنا
قالت ليهو ما قلت ما متزكر
قال ليها كيف ما اتزكر اليوم داك كنتي غضبانه لو عليك تمحيني من الوجود.. وكانو ما انا الانقذتك من عمك...
قالت ليهو هه ممكن يادكتور تتزكر منو الكان السبب في اني اجي هنا!!؟
قال ليها لا لا ممكن تزكريني
وقفت على حيلا بي غضب وقالت ليهو عهد ماتلعب بي اعصابي احسن ليك انت السبب في الانا فيهو دا انت السبب جمودك وبرودك دا اكتر شي بكرهني فيك
عاين ليها بي حده واتحرك من جمبها خلاها واقفه
قالت ليهو عهد اقيف انا بتكلم معاك مية مره قلت ليك لمن اتكلم معاك تقيف وتتكلم معاي عهد!! دخلت وراهو لقت الصاله فاضيه سمعت صوت من المطبخ دخلت لقتو قاعد يعمل في قهوه مشت وقفت جمبو وقبل ما تتكلم خته ليها موزه في خشمها سكتا بيها كبه القهوه في كبايتين شال كبايتو وخته ليها كبايتا
طلعت بره لقتو قاعد جمب التلفزيون يحضر في فلم
قعدت جمبو وفتحت تلفونا فتحت الشبكه جاتا كميه رسايل تطاقش من كترتا شالت تلفونا ودخلت غرفتا كان بعاين ليها لحدي ما دخلت
اختارت ليها لبسه حلوه وطقمتها دخلت الحمام استحمت وجات لبست ملابسها عملت ميكب خفيف وختت تلفونا في شنطت يدها وطلعت
لقت عهد لسه قاعد قالت ليهو انا طالعه عندي تصوير
قال ليها ماتتأخري
قالت ليهو اتأخر ما اتأخر ما شغلتك فاهم
قال ليها روقي قولت ليك كدا لانو الليله متوقع ينزل تلج اكيد عارفه انو الليله اول ايام الشتاء
طلعت خلتو ركبت تكسي كانت حاجزاهو وقفت قدام محل كدا رهيييب ظاهر انو مكان تصوير
دخلت لاقاها واحد بريطاني
قال ليها Hi miss mozan
قالت ليهو Hi Ali
قال ليها? How are you
،،، am okay thanks and you?,,,, am fain very fain
مزن مشت خلتو دخلت لقت طاقم التصوير في انتظارها
جاها واحد بريطاني اسمو ديفد قال ليها Hi mozan
,,Hi Dived,,,are you ready?,,,of course,,,come on,,,,ok
جهزت مزن حالا واستعدت لي جلست التصوير
ديفد123......
كانت بتقدم برامج توعويه وتناقش مواضيع مهمه بي لباقه كان عندها القدره في انها تدخل في الموضوع بي قوه وحماس لغتها الانجليزيه كانت قويه ودا الخلاها يكون عندها عدد كبير من المعجبين في بريطانيا وامريكيا وعدد من الدول البتتكلم انجليزي....
كان قاعد في مكتبو بعاين ليها في التلفزيون كانت حلوه شديد وهي بتشرح وبتحرك في يديها كانت في منتهى الروعه قطع انتباهو صوت الباب كانت السكرتيره قال ليها اتفضلي كانت بت حلو من ملامحه ظاهر انها سودانيه
قالت ليهو دكتور الليله عندك موعد مع تلاته مرضى هسي عندك موعد مع جورج كان شخصت حالتو بالاكتئاب وبعدو في ساندي واخيرا انطونيو
قال ليها جورج جا؟
قالت ليهو اي
قال ليها خلي يدخل
قالت ليهو ثواني وادخلو ليك
السكرتيره طلعت وهو رجع يعاين لي التلفزيون اتنهد بعمق وتعب زاكرتو رجعت بيهو لي اليوم دا لمن جاتو وهي بتبكي كانت بتحكي ليهو عن معاملة عمها ليها بحكم انو ابوها وابوهو اولاد عم وانو العائلتين كانو اكتر من اصدقاء ما كان عندها زول تلجأ ليهو وقتها
كان بكرها من دون سبب ما كان بطيقا قال ليها طيب وقت كرهانه عمك لي الدرجه دي سافري!!...
وقتها هو خزلها هي كانت منتظره مساعده جديه منو ما كان متوقع انو هي حا تسمع كلامو وتهرب بالجد...
_Doctor!
Hi jorge How are you?
طلعت من مكان التصوير كان في ناس كتيره بره راجين توقيعها وناس عايزين ياخدو معاها سلفي وقعت لي دا واخدت سلفي مع دا بعدها ركبت التكسي واتحركت وقفت جمب حديقه كانت دايما تزورا بعد الشغل كان في باعه متجولين يبيعو فشار وفطائر وحلويات وحاجات كتيره اشترت فشار وبقت تتمشى وشويه تقيف تعاين لي الحديقه الجو كان حلو والغيم مالي السماء الجو كان مريح لي الاعصاب من دون اي مقدمات في زول ضماها من ورا وختا راسو في كتفها في البدايه اتخلعت اتلفتت لقتو دا عهد قالت ليهو خلعتني حرام عليك قال ليها الجو هنا حلو ولا انتي المحلياهو؟ تعالي نقعد هناك
قالت ليهو لأ انا ماشه البيت
قال ليها طيب ارح
اتمشو لحدي البيت
وبعدها كل زول دخل غرفتو
بره التلج بدا يتساقط والجو برد...
في غرفة مزن
طلعت ليها ستره من الصوف تقيله بعد ما بدلت ملابسها بي ملابس بيت طلعت مشت المطبخ عملت شكلاته بالحليب دافيه
طلعت بره فتحت التلفزيون وجابت الفشار وجات
عهد جا طالع لابس ملابس النوم لقاها مشغله التلفزيون مشى قعد جمبها وشال الكبايه شرب من الشكلاته
قالت ليهو بصدمه:عهد!! دي كبايتي
قال ليها عارف كنت داير اضوقا عشان لو سمحه امشي اكب
قالت ليهو بي غضب عهد كم مره قلت ليك ماتجي جمب حاجه تخصني نطتت فوقو وخنقتو
قال ليها يابت فكيني!! يابت انا بموت...دايره تكتليني...
،،،موت احسن زاتو كرهتني حياتي ماممكن معاك ياخ...
لمن شافتو ما بتحرك خافت
عهد!! عهد انت كويس عهد انا بتكلم معاك
كانت خايفه ووشها شحب مسكت تلفونا فتحتو وبقت تفتش في الارقام وهي بترجف
وينو رقم الدكتور ياربييي!!!
فجأه في زول سحب منها التلفون
اتلفتت لقتو دا عهد
كان بيضحك
من الصدمه نطت فوقو وحضنتو وهي بتكرر الحمد لله
ضحك و قال ليها مالك خايفه كدا معقوله خايفه عشاني ولا خايفه على نفسك من السجن!!
زحت منو وقالت ليهو عهد انت كنت بتهظر!! وانا كنت خايف دايره اموت من الخوف حرام عليك
مشت خلتو دخلت غرفتا وقفلت الباب كانت قاعده تبكي
سمعت صوتو من بره بنادي عليها: مزن افتحي الباب،،، ماتقول لي مزن انت انسان عديم المشاعر،،، افتحي الباب وخلينا نتفاهم،،، لا ما حا افتحو خليني في حالي
لمن ابت تستجيب ليهو مشى خلاها دخل غرفتو....
صباح اليوم التاني
صحت مزن على صوت ناس كتيره بره فتحت الشباك (نافذه لغير الناطقين بها🤣)
لقت الناس منهم البلعب بالتلج ومنهم الواقف يستمتع بالجو
دخلت الحمام استحمت بي مويه دافيه ولبست ملابسها ولبست ستره تقيله طلعت الصاله ما لقت زول طلعت الجنينه بره برضو ما لقتو قالت في نفسها معقوله لسه ما صحى فجأه جاتا كورة تلج في وشها وقبل ما تستوعب الاولى جاتا الكوره التانيه
اتلفتت لقتو دا عهد واقف يضحك فيها
عملت كوره بي يدها وجرت وراهو قالت ليهو ما حا ارضى الليله الا اضربك بيها في وشك يا كلب
عهد كان جاري وكل شويه يتلفت ويضحك عليها لحدي ما اتعتر ووقع اول ما رفع راسو جاتو كورة التلج في وشو والتانيه وراها
مسح وشو لقاها تضحك عليهو جراها من يدها لتستقر جمبو في الارض🤣😂
قالت ليهو عارف نفسي في شنو،،،، في شنو؟
نفسي اعمل رجل ثلج
قعد يضحك قال ليها لمن اقول ليك عقلك ما نامي ما تزعلي
قالت ليهو تصدق زمان كنت بشوفو في الافلام نفسي اعمل واحد زيو
قال ليها طيب ارح نعمل واحد دقيقه امشي اجيب جزره واجي
مشى جاب الجزره وجا لقاها عملت الكوره الاولى عمل معاها الكوره التانيه وختاها فوق الاولى وهي عملت الكوره الاخيره مدى ليها الجزره عملت الانف والعيون بالحجر
قالت ليهو صورني معاهو
صوره كم صوره كدا مع الرجل الثلجي وتاني اتصوروا سلفي
الصور كانت حلوه شديد
اتهابلوا سمح،،، قطع الحظات الحلوه دي صوت باب الحديقه عهد مشى فتح لقاها دي جارتهم ليزا بريطانيه
قالت ليهو Hi mohamed
,,, Hi liza how are you?
,,, am fain and you?,,, am good thanks
مزن: عهد منو في الباب
oh liza how are you?
,,,, am fain thank you,,, fit in,,, oh am sorry I can't.. am very Hastier...
اتكلمت ليزا مع مزن وسألتها عن احوالها واخر الاخبار ومشت
جا اتصال لي عهد من السكرتيره... الووو.... طيب... شويه واكون في العياده .. مع السلامه.. مزن لازم امشي محتاجني في العياده دخل البيت غير ملابسو وطلع....
يتبع