قالت ليهو واو مكتبك حلو
قال ليها حلوات عيونك مدى ليها القدامه شالت حلاوه قاطعهم دخول السكرتيره
قالت لي: يادكتور محمد المريض جا
قال ليها طيب خلي يدخل
طلعت تكلم المريض
اتلفت علي مزن قال ليها انتظريني هنا تماام ما بتأخر عليك
قالت ليهو عهد!! انا نسيت انو دي عياده نفسيه!!!
قال ليها مالك خايفه كدا؟ المرضى ما بياكلو على فكره
قالت ليهو انت اهبل اكيد انا ما خايفه من المرضى اول مره ما تفهمني..
قال ليها منو القال ليك ما فاهمك.. خايفه على مستقبلك يقولو الاعلاميه المشهوره مزن فارس في مستشفى الامراض العقليه!! بس حاب اطمنك نحن ما في السودان هنا المرض النفسي زيو زي اي مرض عادي زي ما انتي لمن تمرضي بتحتاجي لي دكتور كمان النفس بتحتاج لي دكتور هنا الناس ما بتفكر التفكير العقيم داك وماخدين الموضوع بي بساطه
قاطع حديثهم دخول المريض عهد مشى عليهو وسلم عليهو بي بشاشه وكأنو بعرفو من زمان ودخل معاهو الغرفه التانيه اشر لي مزن وقال ليها ما ح اتأخر ساعه بالكتير لو زهجتي شغلي الشاشه وفي كتب في الرف جمبك حلوه لو دايره تقري
ومشى خلاها واقفه
عاينت لي الكتب في الرف شالت منهم كتاب وقعدت في الارض وجابت قدامت الحلاوه ختتا جمبها وبدت تقرأ كان الكتاب عباره عن روايه
🌺🌺🌺
🇸🇩
في السودان❤ كان قاعد مع صحبو في مطعم ويتونسو كان فرحان شديد صحبو قال ليهو يعني في النهاية ابوك وافق على زواجكم حاجه تحير والله يا حازم
قال ليهو تحير بالجد يا مصطفى بس المهم انو وافق يمكن يا داب حسه بالعطف تجاه بت اخوهو
مصطفى ضحك وقال ليهو اليشوفك الليله ما يشوفك قبل ايام كنت عابس وبائس وحزين
الاتنين ضحكو سواا وكملوا باقي ونستهم وبعدها كلو زول مشى بي اتجاه
🌺🌺🌺
التلفون كان برن شالو من فوق الطاوله راجل عجوز (والد حازم) ردا بعد سلم قال لي المتصل اها في اخبار جديده....كويس...انا دايرها في اسرع وقت تجيني هنا فاهم...تماام وقفل الخط ابتسم ابتسامه كبيره وقال تعالي يا حبيبة عمو لي عمو لانو عمو محضر ليك مفاجأه حلوه وقعد يضحك
🌺🌺🌺
عهد طلع من المقابله ومعاهو المريض والاتنين انصدمو من الشافوهو مزن كانت قاعده في الارض وتبكي وحوليها ورق الحلاوه وماسكه الكتاب في يدها
المريض قعد يضحك وطلع خلاهم
عهد مشى قعد جمبها قال ليها دا الجن ولا النفسيات مالك هسي؟!
قالت ليهو انت بتعالج المرضى ولا تمرضهم زياده؟!
قال ليها كيف يعني؟
قالت ليهو شوف رفعت ليهو الكتاب الكانت بتقرأ فيهو وقالت ليهو الروايه دي ما حلوه تقطع القلب وفي النهايه البطله تموت حرااام😭😭
عاين ليها مسافه وانفجر بالضحك واي بطني ما قادر هههها يابت انتي مجنونه🤣🤣🤣 انا اقول ياربي تبكي مالا وانتي مع الروايه🤣🤣 ما معقوله...
قعدت تبكي بي اعلى صوت عندها قفل ليها خشمها وقال ليها يابت خلاص اسكتي موش الروايه دي شالا رماها في السله اها ارتحتي
جا تاني قعد جمبها وشال حلاوه من القدامه قالت ليهو بس دا ما بغير حقيقة انو البطله ماتت💔
قال ليها لا ياخ كتلتها انا وما عارف خلاص يامزن
مسحت دموعها وقالت ليهو انت خلصت صاح يلا ارح البيت
قال ليها طيب دقيقه اقفل المكتب ونمشي مشى رتب الحاجات وقفل المكتب وجا لقاها رفعت القدامه ولمت ورق الحلاوه قال ليها يلا نمشي
طلعوا سواا ركبو العربيه ومشو البيت...
🌺🌺🌺
مرت الايام بي روتينا المعتاد وفي يوم مزن صحت بدري اتجهزت وطلعت كان عندها تصوير مشت مكان التصوير....
اما عهد صحى لقى مزن مافي عرف انو عندها تصوير مشى اتجهز وطلع على الشغل...
🌺🌺🌺
عند مزن طلعت من مكان التصوير ومشت على البيت دخلت وقفلت باب الحديقه فجأه يجي زول من وراها ويخت ليها منديل مخدر حاولت تقاومو بس ما قدرت وفي الاخير استسلمت لي مفعول المخدر
🌺🌺🌺
🇸🇩
في السودان كان قاعد منتظر تلفون وكل شويه يعاين لي التلفون لحدي ما جاهو اتصال ردا وقال الوو بشر في اخبار... بقت عندك!!؟... طيب تمااام اسمع حا تعمل شنو...................... فاهم؟!... تماام يلا سلام
ابتسم ابتسامه كبيره وقال واخيرا يابت الغالي حا نتلاقى
🌺🌺🌺
عند عهد طلع من الشغل بعد خلص دوامو ركب عربيتو ومشى على البيت....
وصل لقى باب الحديقه فاتح دخل اتلفت يمين شمال ما لقاها دخل البيت ونده عليها بس مافي رد قال يمكن دخلت نامت فتح غرفتها برضو ما لقاها فتش البيت كلو ما لقاها استغرب تكون مشت وين وخلت باب الحديقه فاتح
🌺🌺🌺
الوقت مره ولسه مزن ما جات وعهد بدأ القلق يظهر عليهو ما حصل اتأخرت كدا اتصل على ديفد مديرها في الشغل
Ahd: Hi Dived How are you?.... am good thanks... I wont to ask you about mozan.... what?... No!! she didnt come!!... ok thanks...
هنا توتر عهد زاد وقلقو... دور عربيتو وبقى يفتش فيها شارع شارع محطه محطه لحدي ما الوقت اتأخر شديد وقف العربيه وضرب الدركسون بكل قوتو
وين مشيتي بس يا مزن وين؟!!
🌺🌺🌺
بعد مرور تلاته يوم...
في 🇸🇩
عمر: اهلا اهلا كيفك يا سعيد اخبارك شنو
سعيد: والله تمام الحمدلله
سعيد كان واقف في الباب يتكلم مع عمر
عمر: وين امانتنا يا سعيد؟!
سعيد: اهي اتفضلي ي حلوه
دخلت مزن!! ودخل معاها سعيد
عمر: ياهلا بيتنا نور يابت اخوي...كيفك عساك بخير
مزن ردت ليهو بمضض وين القى الخير انا بس يا عمي
عمر حمر ليها وعاين لي سعيد وابتسم قال ليهو هه بت اخوي بتحب الهظار... اآاتفضل يا سعيد...
سعيد: معليش يا عمر مره تانيه انا هسي مستعجل والله
عمر: معقوله يا سعيد لازم على الاقل تتغدى معانا... دا اقل حاجه ممكن نعمل ليك بالنسبة للعملتو لينا...
سعيد: معقوله يا آخ دا الواجب
عمر: شكرا ليك يا سعيد ما قصرت والله معانا الله يديك العافيه
سعيد طلع وعمر طلع معاهو يودعو بينما كانت مزن غارقه في زكرياتها اتذكرت كل لحظه مؤلمه ليها في البيت دا اتذكرت زوجة عمها وكيف كانت بتعاملا وبناتا التلاته تبيان وتالين وتوسل وولدا حازم
اكتر اتنين كانو قريبين ليها في البيت دا توسل كبيرة البنات وحازم كانو بقيفو معاها دائما
توسل اتزوجت ومشت مع راجلا قطر اما تبيان بعدها طوالي عمرها25 سنه وتالين الصغيره عمرها19 سنه
وحازم كبيرهم عمرو30 سنه
..
خلوني اعرفكم على مزن وعهد كمان اكتر مزن خريجة اعلام زوله طموحه امها وابوها اتوفوا وهي بعمر صغير عمرها تقريباً كان 14 سنه عاشت مع عمها قريب8 سنه وعانت ما عانت واتزوجت من محمد سليمان(عهد) وكان عمرها 23 سنه كملت تعليمها الجامعي واتخرجت وزي ما تابعنا كانت شغاله اعلاميه طبعا ابوها فارس اخو عمر يعني عمر عمها
عمرها حاليا26سنه
نجي لي عهد
اساسا هو اسمو محمد اصبروا حاتعرفو سبب التسميه بس ما هسي😁
ابوهو اسمو سليمان وامو رجاء ابوهو مهندس بترول وامو صيدلانيه عندو اخت وحده اسمها موده يلا اوصف ليكم محمد عمرو29سنه طويل حبه حلبي وزنو متوسط لاسمين لا ضعيف زول وجيه بمعنى الكلمه ابوهو وابو مزن اولاد عم..
الباقي حا تعرفوهو من الروايه تابعواا
عمر: اتفضلي يابت الغالي اتفضلي اكيد تعبانه لازم ترتاحي اتفضلي
مزن مشت وراهو وكانت ما مطمنه نهائي من تصرفو اللطيف دا فتح ليها باب غرفه قال ليها دي مخصوص نضفناها وبخرناها عشانك ي حلوه ارتاحي
وطلع خلاها بعد مسافه جات مرت عمها سلمت عليها سلام حلو جابت ليها شاي واكل ختتهم ليها ومشت
الغرفه كانت كبيره وواسعه ولونا كلها بالوردي ومرفق معاها حمام داخلي فتحت الدولاب لقت ملابس طلعت لبسه ومشت الحمام استحمت وطلعت رقدت في السرير تفكر في الحصل
فلاش باك
بعد ما الزول خدر مزن بعد مسافه مزن صحصحت وعاينت حولها كانت في مكان شبه القبو...
بدت تكورك بأعلى صوت عندها كان جسمها مكسر من مفعول المنوم لسه ما زال بالكامل
دخلت مره كبيره لكن ملامحها تدل على انها قاسيه
طلعت تلفونا واتصلت مكالمة فيديو..
بعد مسافه ردا الطرف التاني المره قالت ليهو بصوت غليظ: صحت بت اخوك!!
ووجهت التلفون جهة مزن اما مزن اتسعت عينيها من الصدمه لمن شافت عمها وزاكرتها رجعتا لي زمان لمن كانت عايشه معاهو والمعامله حقتو قدر ما اتخيلت بشاعتو نهائي ما اتخيلت انو تصل بيهو الخباثه لي الدرجه انو يخطفها!!
عمر: معليش يابت اخوي ما كنت داير اصل معاك لي درجة الخطف بس انتي راسك قوي سبحان الله زي ابوك تماما
مزن: اياك تجيب سيرة ابوي في لسانك انا مستعره من انك عمي اساسا
عمر: ليه كدا بس والله انا طيب..
مزن: هه اكيد انت طيب لي درجة انك تخطف بت اخوك وقبلها كنت بتعزبها دي الطيبه في قاموسك صح؟!
عمر: مزن احسن تتكلمي معاي زي الناس والا والله العظيم تشوفي مني شي ما بعجبك
مزن: انت داير شنو مني؟!
عمر: لمن تصلي السودان كل حاجه بي اوانها تمااام يلا يا حلوه مع السلامه...
وقفل الخط
المره فكت الرباط لي مزن وطلعتا بره القبو وفتحت ليها باب عربيه كانت قدام الباب وقالت ليها اركبي كانت دايره تعترض لكن قبل تدي اي ردة فعل المره خدرتها تاني ولمن صحت لقت نفسها في الطياره متوجه لي السودان!!
واثناء ما هي بتسترجع في الزكريات دي شالتها نومه اخزتها الى عالم الاحلام...
🌺🌺🌺
صباح اليوم التاني
صحت مزن من النوم على صوت ضرب في باب غرفتها
فتحت الباب لقتها دي توسل طوالي نطت فيها وحضنتها: والله يامزونتي مشتاقين معقوله نحنا لينا اربعه سنه ما شفنا بعض حرام عليك وين مشيتي بس والله قلبي اتقطع وراكي...
مزن: والله انا زاتي مشتاقه ليك شديد يا روحي
توسل: طيب احكي لي الحصل معاك شنو؟ وانتي ليه هربتي ابوي عمل ليك شنو؟!
مزن ماردت ليها كل العملتو انها قعدت تبكي
توسل ضمتا عليها وبقت تهدي فيها
توسل: مزن عليك الله ماتبكي واحكي لي الحصل معاك ماتقطعي قلبي
قبل ما مزن تحكي ليها جاتهم تبيان قالت لي مزن ابوي بناديك
مزن وتوسل طلعوا ليهو بره
عمر قال لي توسل: اطلعي ياتوسل غرفتك!
توسل: بس يا ابوي...
عمر: توسل😡
مزن: امشي ياتوسل!
توسل: بس يا مزن...
مزن: ما عندي حاجه اخسرها بعد اليوم يا توسل.. امشي
توسل مشت
عمر لي مزن: دايرك تتصلي على محمد وتطلبي منو الطلاق..
يتبع