صباح يوم جديد
صحت مزن على صوت تلفونها وهو يرن فتحت الخط
جاها صوت بت
مزن :الو ..اهليين منو معاي
=يابت لحقتي تنسيني انا نسمه
مزن:لالا ما نسيتك بس نسيت اسييف الرقم😅
=ما مشكله اطلعي انا منتظراك لانو الوقت اتأخر
مزن:ااا طيب خمسه دقائق بس واجيك
مزن الراويه
قفلت الخط من نسمه ولي الصراحه نسيت موضوع الكورس كلو كلو جريت سريع طلعت لي عبايه استحميت وسريع لبست عملت قلوص وطلعت براحه بقيت اتلفت لو زول شافني اقنع من المشوار،، لحدي ما طلعت شكلو ماف زول صاحي غيري😅
جري مشيت لقيت نسمه منتظراني ركبنا مواصلات لحدي المكان وصلنا مع زمن المحاضره حضرناها وطلعنا حازم اتصل علي مارديت 😅 نسمه قالت لي ارح نفطر قلت ليها والله انا مستعجله وناس البيت لو عرفوا اني طلعت ح يعملوا لي قومه وقعده
قالت لي طيب تمام ارح البيت ركبنا المواصلات نزلنا في بداية الشارع نسمه مشت بيتهم وانا مشيت الدكان اشتريت لي كم حاجه كدا ومشيت البيت ، دخلت بس كان تلاقيني سلمى مرت عمي قالت لي كنتي وين؟
قلت ليها مشيت الدكان
قالت لي ما شاء الله عليك وجبتي القروش من وين؟
قلت ليها ديل حولهم لي حازم قبيل
قالت لي انتي اصلك م ح تريحينا وعمرك طويل ما دايره تلحقي امك وابوك
قلت ليها والله انتوا المتمسكين فيني لو ما كدا هسي بمشي وبخلي البيت
قالت لي ياريت ياخ،، امشي رتبي مع البنات ديل في ضيوف جايننا بعدين
تبيان جات قالت ليها اي عليك الله يا امي خليها تشتغل بدل ما قاعده طول اليوم في غرفتها زي الوارثه
،عاينت ليها مسافه وابتسمت ليها وقلت ليها ما اصلا وارثه هي وامها عاينوا لي بي صدمه كدا مشيت خليتهم
تبيان قالت ليها شفتي يا امي البت دي بقت تتمادى كيف، المهم ما اشتغلت بيهم طلعت غرفتي غيرت ملابسي وجيت نازله اشتغلت معاهم حبه لحدي ازان المغرب مشينا صلينا بعد المغرب بي مسافه جات رجاء وراجلها (نسيبتي زمان) وبعد مسافه جو الضيوف كانوا ناس كتار زي عشره رجال ومعاهم حريم والحريم تقريبا كانوا زي حداشر او اطنااشر مره كانوا جايين يتقدموا لي تبيان وكانوا جايبين معاهم حاجات خرافيه قالوا قولت خير جايبين ليها تلاته فساتين ودهب وقروش كتيره وكريمات وبارد المهم جايين يتقدموا عديل المهم اتونسوا كدا وبعد شويه نسمع صوت الطلق عقدوا ليها عديل وحددوا العرس بعد اسبوع والله اول مره اسمع بي عرس بالسرعه دي ناس من اول يوم جايبين قولت خير وعقد طوالي .. ما علينا المهم بعد الناس طلعوا رتبنا البيت وخالتو رجاء كانت ماشه بس سلمى مرت عمي اصرت عليها انو تقعد معانا ليوم العرس ما عارفه ليه بس حسيتها ما طايقاني نهائي المهم بعد إصرار من سلمى مرت عمي خالتو رجاء قعدت هي وراجلها
تالين وتبيان شالوا الحاجات دخلوها في الغرفه حقتهم وقفلوا الباب نظام ما اشوف ولا اهتميت بالموضوع مشيت غرفتي قفلت الباب ورقدت نمت
🌺🌺🌺
صباح اليوم التاني صحيت بدري عشان امشي الكورس نزلت لقيت خالتو رجاء قاعده مشيت اتجاها صبحت عليها بس ماردت علي قلت في نفسي ياربي هي ليه بتعاملني كدا المهم قلبي كان بقول لي احسن اكسر الحاجز البينا على الاقل يمكن اعرف حاجه من الماضي حقي حاسه انو هي الوحيده بتقدر تجاوب على اسئلتي مشيت عملت شاي وكبيت ليها معاي وجبتوا ليها قلت ليها خالتو كبيت ليك شاي عاينت لي بي طرف عينا وقالت لي كتلتي ولدي وهسي دايره تكتليني
قلت ليها والله انا ما عارفه انتي بتتكلمي عن شنو لكن متأكده يا خالتو انا ما لي دخل ..
قالت لي بالله دور المسكينه دا ما تلعبيهو علي عامله نفسك ما متزكره انتي من دخلتي حياتنا خربتيها لينا بي سببك انا اتبريت من ولدي وبي سببك هو طلع خلى لينا البيت وبعد دا كلو عرسك و ما استفاد حاجه غير خسر روحو كل دا عشان كان حاسي بالذنب ياخ انا ما عارفه انتي دايره مننا شنو ولا بتنتقمي مننا لي شنو نحن عملنا ليك شنو بس ؟ ولا انتي طالعه زي عمك نفسب العملوا عمك زمان في اخوهو انتي دايره تعمليهو فينا سبحان الله نفس الدم زمان كنت بشوفك مسكينه وبقول انو انتي ضحيه لكن انا طلعت الضحيه
قلت ليها انا متأكده انو في سوء تفاهم بس انا ما متزكره حاجه حالياً وما بقدر ادافع عن نفسي..
قالت لي ياريت تمشي من جمبي بس حسبي الله ونعم الوكيل فيك وفي عمك
مشيت زي ما قالت لي بس عقلي ما قادر يتجاوز كل كلمه قالتها لي طلعت لاقاني عمو سليمان صبحت عليهو قال لي اوو كيفك يا بتي
قلت ليهو تماام الحمد لله كيف اصبحت
قال لي تماام الحمد لله
قلت ليهو معليش يا عمو ممكن طلب
قال لي عادي يا بتي اطلبي
قلت ليهو ممكن اشوف صورة محمد
قال لي قصدك عهد زمان كنتي بتقولي ليهو عهد
لمن قال كدا اتزكرت الحلم كان حلمت انو في ناس لاحقني كتار وفي زول جا مسكني وقال لي انا عهد ياربي الحلم دا فيهو رؤيه ولا مجرد حلم عابر قطع تفكيري صوت عمو سليمان قال لي دي صورة محمد
عاينتا لي الصوره مسافه على امل اتزكر اي حاجه بس ما كنت قادره اتزكر ،جات مكالمه في تلفون عمو سليمان قال لي معليش لازم ارد مشى بعيد وردا
وانا طلعت مشيت مكان المواصلات وانتظرت نسمه بس راسي كان مصدع شديد شويه كدا وينفجر من شدة التفكير وما قادره استوعب اي حاجه قاطعتن نسمه وقالت لي انتي سرحانه وين من قبيل بتكلم معاك الشاغل بالك يتهنى بيهو
قلت ليها الشاغل بالي مات
اتخلعت وقالت لي بسم الله المات ليكم منو؟ مزن اتكلمي في حاجه حاصله معاك؟
كنت مستغربه من ردة فعلها كانت مصدومه شديد حسيت انو هي بتعرفني من زمن ما من كم يوم بس
قلت ليها كنت بفكر في امي وابوي بس
قالت لي الله يرحمهم!
قلت ليها نسمه انتي بتعرفيني؟
انصدمت من السؤال قالت لي دا سؤال شنو اكيد بعرفك اتلاقينا قبل كم يوم تتزكري
قلت ليها لأ ما كدا انتي بتعرفيني من قبل افقد الزاكره ؟
قالت لي اكيد لأ انا يا داب اتعرفت عليك
قلت ليها طيب كيف عرفتي انو امي وابوي متوفين وانا ما حصل اتكلمت ليك عنهم
قالت لي شكلك نسيتي، اول يوم لمن اتونسنا ونحن في المواصلات حكيتي لي انك فقدتي الزاكره وانو امك وابوك اتوفوا !
قلت ليها مامتزكره شكلي نسيت
قالت لي عادي ماف مشكله ، ارح نركب عشان ما نتأخر
قلت ليها يلا
ركبنا مشينا المركز حضرنا المحاضرات كان عندنا اختبار مفاجئ حلينا وطلعنا نسمه قالت لي تخيلي ولا قريت لكن ما كان صعب قلت ليها حتى انا ما قريت ياهو المتزكراهو من المحاضره لكن بجد كان ساهل
رجعنا البيت بس قلبي ما كان مطمن من نسمه دي انا واثقه انو انا ما جبت ليها سيرة امي وابوي نهائي كيف عرفت بالموضوع دا شاكه انو هي بتعرفني لكن من وين؟
دخلت البيت لقيت تبيان نزلت دخان وشغالين ليها مديده كوريه طالعه وكوريه داخله مشيت قعدت معاهم حبه مع انو ماف زول شغال بي بس من الزوق ..
بعدها مشيت غرفتي نمت حبه قمت مع ازان العصر صليت ومشيت المطبخ عملت غدا حازم اتصل علي بتكلم معاي كدا وانا ما منتبهه رفعت الحله في النار وما قعدت كويس فكيتها قربت تقع مسكتها في اللحظه الاخيره بس تلفوني وقع وانكسر رفعت الحله ومشيت رفعت تلفوني لقيت الشاشه كلها اسود والله بكيت بكى تلفوني هو الوحيد الكان مرفه علي في البيت دا الطبيخ نجض نزلتوا من النار كنت عامله طبيخ بطاطس ومكرونه بالبشمل وسلطة اسود عملت الغدا ووديتو ليهم طبعا قاعدين مع تبيان في الحوش كانت بتدخن ختيتوا ليهم وجيت ماشه عملت صينيه تانيه ولبست توبي وديتها لي ناس عمي في الصالون وجيت حشيت حشوه بي سلطة اسود ومشيت غرفتي ما كان عندي نفس امشي اكل معاهم خصوصا ماف زول كان شغال بي حسيت بالملل اكلت وشربت مويه سمعت صوت باب الغرفه كان في زول بدق فيهو مشيت فتحت الباب لقيت دي تالين مدت لي التلفون عاينت ليها ومسكتوا رديت كان دا حازم قال لي تلفونك مقفول مالك؟
قلت ليهو ماف حاجه شحنو خلص
قال لي طيب ختيهو في الشاحن وافتحيهو ح اتصل ليك فيهو
قلت ليهو حاولت افتحوا بس ابى لي شكلوا الشاحن كعب
قال لي طيب بحول ليك قروش في حسابك امشي اشتري شاحن
قلت ليهو لالا ما تحول انا عندي قروش من الرسلتهم لي واساسا ما عندي حاجه اصرفهم فيها بكره ان شاء الله بمشي اشتري واحد
قال لي لا لا ديل خليهم معاك..
قاطعتو قلت ليهو لو احتجت لي قروش بقول ليك رسل لي بس هسي ما محتاجه
قال لي تمام لي بكره اشتري شاحن وافتحي التلفون تماام
قلت ليهو ان شاء الله قفلت منو
لقيت تالين تسكت وتحمر لي مديت ليها التلفون
قلت ليها خير مالك بتعايني لي كدا
قالت لي اخوي دا حلي عن طريقوا بالله خلي يشوف حياتو انتي اصلك ماشبهو
قلت ليها ما شاء الله بقيت اسمع ليك حس كمان.. احترمي نفسك لمن تتكلمي مع الاكبر منك فاهمه😒.. يلا يا حلوه امشي شوفي اختك يمكن تحتاج لي حاجه وتاني مره اياكي تطاولي علي عشان ما ابلعك لسانك دا شافعه قليلة ادب
حمرت لي مسافه ومشت..
🌺🌺🌺
يتبع
الفصل الحادي عشر من هنا