ليلى
النهارده الأمتحان الأخير لمروان.
صحيت الصبح بدري جهزت له فطار حلو كدا.
ما أنا بقيت زوجه صالحه .
دخلت الأوضه وشيلت الغطى من عليه :
__مروان فاضل ساعه على الأمتحان ...يلا قوم أفطر.
إداني ضهره وقال بتذمر:
__خمس دقائق كمان.
حطيت إيدي على وسطي وأنا بقول بغيظ:
__إنت بقالك نص ساعه بتقولي خمس دقائق.
يلا قووم.
مردش
طيبيب!!!
وفي ثواني كنت ماسكه إيده وعضاه.
صرخ وهو بيتلوى بين إيدي:
__إيه دا يا ليلى ...حرام عليكي.
سيبت إيده وقولت بإنتصار:
__أحسن عشان تبقى متسمعش الكلام أوي.
وبعد دقائق كان خارج من الحمام .
بصيت له ثواني وبعد كدا ديرت وشي على طول:
__أستر نصك الفوقاني.
ضحك وهو بيقعد قدامي:
__بتتكسفي أوي إنت.
بصيت له بإمتعاض:
__دي تريقه دي؟!
سرح شويه وقال:
__حاجه زي كدا.
إتحركت وقومت أجيب له تيشرت :
__لو جالك برد ممكن أتعدي.
كان بيراقبني بعيونه وقال بضحكه:
__قولي إنك خايفه عليا.
متتكسفيش.
رميت التيشرت عليه وأنا بقول:
__لطيف
بص للتيشرت وقال:
__لا أنا مش هلبس دا.
أنا هلبس الطقم اللي لسه جايبه.
بصيت له بإستغراب:
__إشمعنا؟
رد وهو بيبدأ أكل:
__آخر يوم إمتحانات وهنخرج وكدا.
كنت زعلانه لأنه كان بقاله كتير مشغول عني بسبب الامتحانات.
ويوم ما يخلص يخرج مع صحابه!
بصيت له بتفهم وبدأت آكل وأنا بقول بحزن حاولت أداريه:
__هتخرج مع صحابك؟
رد وهو لسه بياكل:
__لا مش هخرج معاهم.
عقدت حواجبي أكتر وقولت بسخريه:
__ هتخرج مع بنات ولا إيه؟
هز راسه بتأكيد ف فتحت عيوني بدهشه.
وساعتها بس ...كان نفسي أخبطه بطوبه في دماغه
كمل أكل من غير ما يبصلي:
__بصراحه هم مش بنات.
هي بنت واحده.
ورفع عينه ليا وهو منشكح
لو كان يعرف اللي بفكر فيه دلوقتي عمره ما كان هيبتسم كدا:
__وإسمها ليلى.
أول ما نطق إسمي إبتسمت تلقائي :
__هتخرج معايه؟
هز راسه وقال:
__معاكي إنتي وبس.
حسيت بفراشات في كل حته وإحساس بالفرحه غمرني مره واحده.
قومت بفرحه من مكاني وأنا بقرب منه وحضنته:
__حبيبيييييي.
وخرجت من حضنه وأنا بتنطط في كل حتى.
وبعد دقائق حسيت إني خلاص همدت.
رجعت وقعدت تاني مكاني وقولت بحماس:
__كل كل عشان تتغذى.
لكن مسمعتش منه أي رد .
رفعت عيني لقيته بمحلق فيا بطريقه غريبه.
بلعت ريقي بتوتر:
__في إيه؟
__إيه اللي قولتيه؟
عقدت حواجبي بخفه:
__قولت كل عشان تتغذى؟!
هز راسه برفض:
__لا يا ليلى اللي قبله.
حاولت أفتكر أنا قولت إيه ...وقولت إيه؟!!
آههه
أول ما أفتكرت حسيت الدم هرب من وشي ورعشه خفيفه .
رجعت أبص في الأكل من تاني وقولت بجديه مزيفه:
__كل وإنت ساكت.
ضحك وهو بيسند بكوعه على الترابيزه:
__عارف إنك واقعه فيا .
بصيت له بغيظ وبصيت الناحيه التانيه وتمتمت:
__مغرور
بعد دقائق كان لابس تيشرت اسود وعليه كلام باللون الاسود.
وبنطلون باللون الاسود وساعه.
كان شكله عسول وهو واقف قدام المرايه بيعدل في هدومه.
هو بجد هيطلع وبنات دفعته هيشوفوه كدا
بجدددد؟!!!
قاطعني صوته فجأه:
__سرحتي في جمالي مش كدا؟!
بصيت له بضحكه وأنا بقرب منه:
__ربع ثقتك وهحتل العالم.
سحبني لحضنه وحط راسي على صدره.
كانت ريحته جميله أوي .
بصيت له بدهشه وسألته بفضول:
__إنت حاطت بيرفيوم إيه؟
__والله دي الصابونه اللي في الحمام.
ضحكت على براءته وأنا ببادله الحضن.
__ريحتك حلوه أوي.
إبتسم بخفه وهو بيمسح على شعري:
__شاكك إني بتعاكس .
ضحكت وأنا بخرج من حضنه:
__لا إتأكد.
وفجأه إفتكرت ...إمتحانه!!!!
سحبت إيده اللي فيها الساعه وبصيت عليها.
شهقت بصدمه وأنا ببصله وبرجع أبص على النضاره:
__فاضل ربع ساعه على الأمتحان!!
أتنهد بضيق
وسحبني تاني:
__فكك.
كنا بنتكلم في حاجه أهم.
بصيت له بغيظ:
__مروان!
إبتسم وهو بيبص في عيوني:
__قلبه.
__لو سمحت إمشي عشان هتتأخر عن إمتحانك .
دا آخر إمتحان
خليه يخلص على خير بقى !!
إتنهد بثقل وهز راسه بالموافقه.
خد تليفونه وإتحرك ناحيه الباب.
وقبل ما يخرج قاطعته بسرعه:
__هبقى أعدي علييك!!!
هز راسه وقال:
__ماشي يا قلبي.
وخرج .
كنت حاسه بفرحه مش سايعاني... مش بس عشان هخرج معاه .
لكن عشان حاسه بحبه ليا في كل كلمه منه.
حاسه بالأمان والونس اللي إفتقدهم.
و إن ليا ضهر وسند في الدنيا.
واكتشفت حاجه مهمه أوي.
إن عمر ما كان السن عائق ولا مشكله .
الفكره كلها في عقليه اللي قدامك ...في مدى رجولته ...في مدى أحترامه لنفسه وليكي.
في مدى قدرته على إنه يحتويكي.
يمكن السن بيفرق في حاجات.
لكن اللي متأكده منه إن الحب ...يخليك تتأقلم مع أي حاجه وكل حاجه.
بل كمان يخليك تلاقي حل لأي مشكله بينكم.
ببساطه لأن في حب وموده بينكم .
ودا اللي بيفرق.
"ولو رجع بيا الزمن ألف مره..هختار مروان كل مره."
المهم هخرج عشان اشتري فستان جديد .
طلعت الأول عند ماما أعرفها إني خارجه وأقعد معاها شويه.
طلعت وقعدت معاها شويه.
وفي وسط كلامنا ماما فتحت موضوع فتون.
__مش هتصالحي إختك بقى؟
بصيت لها بدهشه:
__أنت يا ماما اللي بتقولي كدا؟!
هو مين فينا اللي غلطان!!
__عارفه إن أختك غلطانه من ساسها لراسها.
وهي نفسها أعترفت بكدا.
مش هنعلق لها المشنقه بقى.
رديت بسخريه:
__والمفروض أنا بقى اللي أروح أصالحها؟!
وقبل ما ماما ترد ...قاطعنا خطوات فتون وهي داخله علينا.
كانت باصه فى الأرض دموعها مغرقه وشها:
__أنا اللي جايه لحد عندك عشان تسامحيني.
أول ما عيني وقعت عليها حسيت بغصه في قلبي.
وشها كان شاحب وتحت عيونها إسود.
ووزنها قل على الآخر.
كملت وهي بتشهق:
__أنا عارفه إني غلطانه ...وصدقيني أنا مش عارفه عملت كدا إزاي.
أنا خسرت كل حاجه ...بس أنا مش مستعده أخسر أختي الوحيده.
بصيت لها ثواني وأنا حاسه إن قلبي خلاص ...مش قادر يستحمل قسوه أكتر من كدا عليها.
إتنهد بمعق وأنا بشاور لها تيجي تقعد جمبي.
جت بخطوات بطيئه وتردد.
لغايه ما قعدت .
وجهت نظري عليها وأنا بقول :
__عارفه يا فتون ...أنا مش زعلانه منك.
في الآخر إنتي أختي مقدرش أقطع علاقتي بيكي.
ولا أتجنبك طول الوقت.
حسيتها بدأت تاخد نَفَسها براحه وكأن كلامي طمنها شويه.
كملت بعتاب:
__بس عمري ما تخيلت إنك تعملي كدا.
هي بس صدمتي فيكي محجماني ومخلياني مش قادره أسامحك.
بلعت ريقها ودموعها بتنزل بغزاره ...وقربت مني وباست راسي:
__حقك عليا والله ..أنا آسفه ليكي.
إبتسمت بوجع ودموعي خانتني ...فتحت لها حضني وكأني بكدا بفتح معاها صفحه جديده .
بصيت لي بدهشه وفرحه في نفس الوقت.
وقربت مني بسرعه وبادلتني الحضن وهي بتبكي بحرقه.
خبطتها على راسها بخفه وهي لسه في حضني وقولت:
__بطلي عياط بقى.
صوتك مزعج.
ضحكت بين دموعها وهي لسه بتضغط على حضني وقالت:
__حاضر.
"بعد ساعه"
كنا في الشارع أنا وفتون وصفيه.
كانت فتون ماشيه جمبنا وهي بتنهج وقالت:
__أنا مش عارفه إيه اللي جابني معاكوا في الجو الحر دا .
رديت بضيق:
__أنا غلطانه إني خدتك معانه تغيري جو.
إتكلمت صفيه وهي بتمسح وشها بمنديل:
__هو الجو حر بس فداكي.
إبتسمت بخفه وأنا بضغط على إيدها:
__قلبي.
وقفنا قدام محل لبس فساتين .
دخلنا وبدأنا نبص على الفساتين .
مكنتش أحلى حاجه فخرجنا ...ودخلنا المحل اللي قصاده.
بدأنا نبص على الفساتين تاني.
وكل فستان كان أحلى من اللي قبله.
لغايه ما وقفت عند فستان طويل باللون البرجاندي ... برباط من عند الرقبه من غير أكتاف.
وفتحه صغير من عند القدم.
بصراحه خطفني ...كان شكله جميل أوي.
دخلت أقيسه وبعد دقائق كنت خارجه .
أول ما صفيه شافتني شهقت وبصت الناحيه التانيه.
بصيت لها بذهول وقولت:
__في إيه يا بت مالك!
ردت من غير ما تبصلي:
__الفستان عريان أوي ...مظنش إن مروان هيبقى مبسوط.
رديت بثقه:
__متقلقيش ...هجيب عليه جاكت فرو هيداري كل دا.
قربت فتون مني بإعجاب وقالت:
__واو بجد تحفهه.
إبتسكت بفرحه وأنا بلف بالفستان:
__إلهي يجبر بخاطرك يا شيخه زي ما جبرتي بخاطري.
وبعدين وجهت نظري لصفيه اللي كانت واقفه وبتبص للفساتين بإعجاب.
قربت منها وأنا بحط إيدي على كتفها:
__ عمي قال الخطوبه إمتى؟!
ردت بتوتر وهي بتبص على الفساتين :
__قال بعد إمتحانات مروان .
إبتسمت بخفه وقولت:
__طيب يلا أتفرجي على الفساتين وشوفي حاجه حلوه للخطوبه.
بصيت لي بذهول ورجعت بصت للفساتين وهي بتفرك في إيديها بتوتر:
__مش لازم
بابا هيخلي واحده تفصلي الفستان.
قربت فتون وقالت:
__التفصيل بياخد وقت كتير وعمره ما هيخلص في الوقت القصير دا.
بصيت لها فتون بحزن ورجعت تبص للفساتين.
كنت شايفه في عيونها توهان ...وكأنها أول مره تشتري فستان بنفسها.
مسكت إيديها وقولت:
__مالك؟
إبتسمت بتوتر:
__أصلي أول مره أختار فستان ليا.
بصيت لها فتون بدهشه وكأنها مش مصدقه إن واحده عندها واحد وعشرين سنه.
عمرها ما أختارت فستان..
لكن أنا إبتسمت لها وقولت وأنا بشدها من إيدها:
__تعالي أحنا هنساعدك.
وبدأنا ندور على فستان ليها ولفتون برضه عشان تحضر بيه الخطوبه.
ومره صفيه تقول دا مفتوح ..ومره تقول وحش ..وبصراحه كنت فرحانه.
لأن لأول مره ألاقيها مبسوطه وبتقول رأيها من غير أي ضغط من أي حد.
من الآخر أول مره أشوفها حره.
في الآخر أستقرينا على فستان باللون الزيتي محتشم زي ما بتحب ...وفي نفس الوقت شكله لائق ورايق.
أما فتون ف إشترت فستان باللون الكحلي بأكمام طويله ووسط ضيق بأشرطه من الضهر.
كانوا الأتنين أحلى من بعض .
خلصنا وروحنا على البيت .
كان فاضل ساعه على إنتهاء أمتحان مروان.
ف كان لازم أجهز.
دخلت شقتنا وبدأت أجهز ...لبست الفستان والجاكيت الفرو و هيلز باللون الأسود .
حطيت ميكب خفيف وبيرفيوم بريحه الفانيليا.
وبس بقيت جاهزه!!!!
إتحركت على مكان مدرسه مروان .
وبعد ربع ساعه بس كنت واصله.
لكن ملقتش حد واقف قدام المدرسه.
تمتمت في سري:
__أكيد لسه مخلصوش.
فضلت واقفه دقائق ..وبعد عشر دقائق تقريبًا.
بدأ الطلاب يخرجوا.
كان في ولاد كتير وبنات أكتر خارجين.
اللي بيضحك واللي بيهزر ...واللي بيشتم وهيصه.
وكل ما حد يعدي يبحلق فيا كأني فضائيه!!
بلعت ريقي بتوتر وأنا شايفه كل واحد واقف عمال يبص عليا شويه.
ساعتها بس لعنت نفسي مليون مره على إني خرجت بالفستان دا.
حاولت أبعد عن المكان شويه ...بس في نفس الوقت أكون قريبه عشان أقدر أشوفه.
وأنا واقفه مستنياه يخرج.
سمعت بنتين بيتكلموا ..وواحده فيهم بتقول:
__شوفتي كان لابس إزاي؟
ولا عروق إيده كانت حلوه إزاي؟!
زعقت فيها البنت وهي بتقول:
__يا بنتي حرام عليكي دا متجوز.
ضحكت البنت ضحكه سمجه زيها:
__دا كله هبل يا بنتي.
ما كل البلد عارفه هم متجوزين ليه.
كلها مسأله وقت وهيطلقوا.
حسيت الدم بيغلي في عروقي وعيون أحمرت من كتر الغضب.
قربت من البنت بثقه وأنا بقف قدامها.
بصيت لي بذهول.
حطيت إيدي قدام صدري وقولت:
__أنا عارفه إنتي بتتكلمي عن مين.
عقدت حواجبها بأستغراب وقالت:
__أفندم؟!
إبتسمت إبتسامه مصطنعه وقولت وأنا بمد إيدي ليها:
__معرفتكيش.
أنا ليلى مرات مروان.
بصيت لي بصدمه واتوترت ومدتش إيديها.
لحقتها صاحبتها وهي بتمد إيديها وبتسلم عليا:
__أهلا إتشرفنا بيكي.
نقلت نظري للي كانت واقف جمبها وقولت:
__ما تقوليلي لو معجبه بجوزي.
ميغلاش عليكي.
بصيت لي بدهشه ورعب وكأني شبح قدامها:
__إنتي مجنونه ولا إيه؟!
ولسه بتتحرك من قدامي مسكتها من شعرها جامد:
__لما أكلمك تقفي مكانك.
إتأوهت بوجع وقالت بغضب:
__سيبي شعري إيه الهبل دا!!!
ضحكت بغضب وأنا بجز على سناني:
__إنتي لسه مشوفتيش هبل.
ميغركيش الفستان والجاكيت .
الناس بدأت تتلم واحد ورا التاني وكلهم كانوا بيبصوا بدهشه.
وكأنهم مش مصدقين إن البنت الكيوت دي ماسكه واحده من شعرها.
وفجأه لقيت حد بيمسكني من إيدي وبيقول بدهشه:
__ليلى؟
في إيه؟!
رديت بغضب وأنا بحاول أوصل للبنت اللي صحابها سحبوها مني إيدي:
__الأستاذه بتعاكسك قدامي .
أقسم بالله لو مسكتك لشلوحك.
بصلي بصدمه وسحبني من إيدي وهو بيقول:
__تعالي يا ليلى.
كنت ماشيه معاه وأنا لسه ببص للبت وبزغر لها .
وكنت كمان شويه وهاكلها بعيني.
سحبني في ركن وهو بيبصلي:
__أنا مصدقتش صحابي لما قالولي مراتك بتتخانق هناك.
حطيت إيدي في وسطي بغضب وقولت:
__كنت عايزني أسكت وأنا شايفها بتعاكسك قدامي يعني؟!!!
رد بذهول وقال :
__لا بس...
وفجأه بدأ يتفحصني ويبص لي من فوق لتحت.
وبرق فيا.
وشكل كدا اليوم مش هيعدي على خير .
إدعولي.
يتبعععععععع
الفصل الأربعون من هنا