بقلم نور الشمس
نوره ..
..اي بالضبط حية كوبرا مثل الوصلتلك هاللقب اني وياها صنف
ضحك بصوت عالي يكهكه ابتسمت على ضحكته الولد فحط مدري شبي
..يلا مع السلامة وهذه اليمك گلها الحية تگول بسيطة
..اليمي تليفونها اخذته بحيلة كتلها اتصل بفارس ماعندي رصيد ..واتصالي مرايد منج شي بس ردت اكلج رقمج وحساباتج اخذهن واحاجيج مو تكولين ماگال وخصوصية ومدري شنو عندي كلام احچيه وتبقى يمچ بعد
نهى الاتصال هزيت ايدي ..هسه هذا شحچي وياه
نزلت من غرفتي منتظره حمزة وصخر يجون اخذو احمد للطبيب يكملون بقية التحاليل يارب يشافيه ويعافيه
احمد حنين وطيب وضحكة بيتنا هو
وشايل نص شغل ابوي وحده وقريب للصغير والجبير
وابد مايوم سمعته اشتكه من مرض لو وجع فجأه صارت وگعته قلقنا كلنا
وحمزة من الاساس چان متكأب وگوه يطلع من غرفته ينزل ويانا بعد الصار وي احمد ماعنده غير الگعده وحده ويدخن بشكل مو طبيعي ابد ماعنده واهس الشي وصارن هوايه عليه امي والنذلة سالي ووگعة عزيزه وتوأم روحه واقرب اخواني اله هو ومن بعده صخر صارن هوايه عليه لو يروح يمه لو ينعزل وحده نهاره كله صرت اتمنى يبقى بالدوام احسن وينشغل تفكره ع الأقل
اني گلبي مرتبط بگلبه شگد مامقهوره على احمد قهري عليه زايد لأن اعرف الوضع الي جاي يمر بي مهلك وثقيل عليه
ضجنا من عرفنا اول تعليمات من الطبيب منعو عن احمد السياقة.. وحذرو الولد يخلوه يطلع وحده.. وممنوع ينسد عليه باب وهو وحده لحد ميعرفون شلون يسيطرون على النوبات لأن ثاني يوم بعد ماجابو بأول وكعه الفجر هم اجته نوبه وبنين متصله بهاجر وصخر هم رايحيلهم و الصبح بلغونا بوگعته
وهذه الامور احمد مستصعبها مامتعود عليها
وخوفتنا رغم كلهم يكولون شغلة بسيطة
وكل هذا وبعده نفسه ضحكته مافارگت وجهه
اتمنيت المرض مو اله
البارحه اجنه خواتي البنات وقبل جيتهن مارات بأمهن يشرحلها وضعه بلكي تحن عليه وتشوفه وتقبل الصلح وياع هو حاول هوايه وهي رافضه زعلها ثگيل عليه وشروطها اثگل
كلهم تواصلهم الا هو وخلته سبب بالصار واعتبرته هو القوه عمي عليها وخلاه يطوول بالهجر
وبدل ماتجي عليه وتشوفه وتدعيله
گايله هايه حوبتي طلعت بي مو كتله خاف من الله دعاء الأم مستجاب اذا مقهوره وهو هوايه قهرني تاليها اني معزولة وماسمع مني وتركها واخذ شهلة وصارت امه مكيف يتكشخ بيها يم اهل مرته
وكايله جابلي وحده مناك من شوكت صار عادي زواج ولدنا من الشروگيات وكل هذا من ابراهيم وسوالفه مدعيه عليه وعلى ابويه هم
حاجيه حجي ماله كل داعي وهنه ماقابلات عليها طاردتهن سراب اجت عيونها حمر گد ماباجيه وحالفه بعد ماتروح الها
ومآرب قهرها ياكل بگلبها وكل شويه عضت اصبع ايدها وضربت رجلها
تگول شلون الواحد ينجبر يسكت ربي معقولة تسمع دعاها انت اعلم بالحال اهديها علينا وعلى نفسها
رغم كلشي ميكدرن يحجن اكثر عليها بقهر اني رديت ويمكن زعلتهن بس بلاشعور گلت ان شاءالله هي بمكانه وكل وحده متخاف الله بضناها
ماحجن شي بس حسيت ماهان عليهن سكتت
خواتي من هالناحية اقر هنه احسن مني گلبهن على امهن ميشيل وينطردن ويرجعن بس امهن هم مو مثل امي الي ..جانت احن ع الأقل تتخبل اذا سمعت احد مسهن بشي
حاجيت بنين هذه هم مسكينة دموعها ماوگفت ابد يمه تسولف وتضحك وعبالك ماكو شي وبس يروح يراجع لو يطلع تبجي بقهر
شلون صار عنده صرع فجأه وشلون يوگع بين ايدها وكلشي ماتگدر تسويله
رحت يمها اشوفها واهون عليها البنيه رغم مصارلها هوايه بينا بس محترمه كلش وتبقى زوجة اخونا وبعيده عن اهلها ابويه كل شويه يوصي بيها اتصلنا بيهم فرحونا بس كالو نرجع ونحجي
ومن رجعو المغرب كلش فرحونا من گالو النتائج زينه وعلاج بسيط يحتاج وكلشي تمام
ابويه من عرف ذبح خروف السلامته ووزعه
وهيج هم وخلصنا منه وبنفس اليوم بالليل قريب الساعة اثنعش اتصل بأبويه فارس يبلغه بولادة سراب كملت شهرها هي ودخلت بالعاشر. ومقرريلها بعد ايام عملية اذا ماولدت بس الحمدلله الله سهل
انخبصنا خبص وابويه كلش ارتبك وظل باله يمها سراب يسميها ام الكل لأن حنينه حيل الله عوضها بفارس كلش يحبها ومقدرها ومحترمها
راد ياخذ حلا ويطلع خليت نفسي وياهم مااعوف سراب بهالوضع اخيتي هذه وحبيبتي فتره من الفترات صارت ام النا رغم صغر سنها
وصينا بطه على عبوسي چان نايم كنالها نزلي نامي يمه وطلعنا وحمزة يمها ومحمد ووياسر هم
بالطريق اتصل ابويه بفارس يعرف وين رايحين گله طلعنا المستشفى الراهبات طبيبتها هناك
حركنا وراهم مسافة الطريق تقريبا بالطبيعي من اليوسفية للراهبات اربعين دقيقة ابويه سواها نص ساعة الحمدلله بالليل ماكو ازدحام
دخلنا وراهم لگينا فارس ماخذ الممر رايح راجع ومتوتر حيل وامه على جهه وبيدها جنطة الطفل
وتدعي وهم كيفت بينا
هذه الساعات مدري شلون تمر اول مره اجربها
الدرجة عظامي صارت ترجف من اتخيل نفسي سمعت صوتها
اني مادخلت بس ابويه حاجاهن وخله حلا تدخل وياها
وهم طلعو عنا وظلينا القلق ذبحنا خلصت ساعة واجت ساعة ثانية وماكو
طلعت حلا
سألتها بخوف كالت عدها ولاده الام قوية تجيها وعلى لحظة الله يسهل ادعولها
وطلعت بلغت فارس مااعرف شطالبين منها اباوع ابويه يدعي ومبين على ملامحه شگد خايف عليها
رجعت حلا فاتت
ومر الوكت والفجر صارت التليفونات ترن اول وحده اتصلت عهود بيتها قريب ورادت تجي كتلها ميحتاج هو احنا هنا شمسويلها وتجين انتِ جهالها محد الهم وزوجها يطلع الشغله من وكت
وام فارس قلقتني اكثر المريه رادت تتخربط كل مايتصلون عليها تنطيه الي عمي مرتين حاجيته كتله بعدهم وادعولها يسألني فارس وين ليش ميرد
هو فارس كوه واكف على طوله
ماادري اني مااعرف بس حسيتها ولادة صعبة من خبصتهم وخفت اكثر
ورجعو اخواني صخر اتصل واحمد وحمزة اخر شي كمت مااجاوب الحد ماكالو الحمدلله ولدت بخير وسلامه ونور الدنيا (خطاب)
الفرحه الفرحناها بولادته وسلامة امه ماتنوصف فارس سجد الوجه الله وابويه من الفرحه باسني
واول ماطلعوه اخذتله صورة وهنا عمتي ام فارس خرجت عن صمتها و ماقبلت وظلت تحجي مو زين الاشعة عليه بعده طفل مايتحمل
هي كامره بدون فلاش اشعة شنو سويت روحي طرشة مااسمع ووثقت كل هذه اللحظات السعيدة اول ماخذه ابوه وكبر واذن باذنه وسماه
وابويه وهو يورق ويوزع بشارات
وام فارس من تبوس فارس وتباركله ودموعها بعينها
حتى وجهه المعقوج من تصويري صورته
حلا وفرحتها وي سراب ضحكات سراب الي انخلطت بدموعها من شافتنا كلنا ومن باسها فارس وظل لازم ايدها
ابويه وكلامه وياها كلشي وثقته
وگبل ارسال على مجموعتنا بالواتساب وصلتهم الصور اسرع من البرق وكلها تبارك
اول مره اعيش هالشعور حبيته شعور الارتباك والخوف والقلق يتحول لحظات سعيدة
طلعنا الصبح للبيت وكالعادة يبدي النقاش وين يرحون فارس گال براحتها ولو اتمناهم يمي
والبيبية كالت ابيتها واحنا يمها بس حلا كالت لاخلوها يمنا نداريها كم يوم وتاخذهم وهم بأحسن حال ع الأقل هي تعين نفسها وابويه دعم هالراي وصفينا عليه
ولگينا بطة وعباس بالحوش يهوسون
بس فتحت الباب عافها وشمر نفسه عليه واحتار بيني وبين حلا ومن شاف ابويه عافنا اثنينا وراحله
لگينا بطوط النادرة منظفه البيت ومحضره سرير السراب وفارشته ومرتبته ومفورة حليب ومجهزة ريوگ وابويه موصي على معلاگ السراب
خلينا الطفل بكريكوت عباس واتريگنا وشفت عهود اجت يمهن واستلمت المخدة ماتركتها للعصر
گعدت على صوت اخوتي عبد جاي وحده ودلع الولد دلاعة حلوه زوجته هم قبل فتره جايبه
و اجونا هاجر وصخر وهديتهم كريكوت وفلوس الكريكوت يجنن بلون ازرق وفلوس من شهلة هم
واحمد وبنين وراهم اجو وهديتهم جانت كرسي هزاز للطفل
الحد الليل كل اخوتي اجو عدا وسام وامه حتى حسام اتصل بيها وكلها دلاعته تجيج تحويل
وگلهم نوره بعد اخذوها للتوثيق خسران المياخذها
لأن شاف الصور ويكول عيشتيني وياكم لحظة بلحظة
گلت الصخر واحمد من هسه حسبوني وياكم وحسبو حسابي هم تدللوني
اشرت بيدي على فلوس وضحكوو يعرفوني ام فليس
هم يضحكون وحاجيت سراب
..الصور انتِ ورجلج ابيعهن عليكم بيع
كالت
.. عمتي كل شويه تكل الفارس خل يودولك الصور
..عمتج غير عوجت حلگها ماقبلت عليه ولا انطيها اوديلها صورتها من عاوجه حلكها وماعاجبها بس
ابويه حاجه مآرب اجت تبات يمها اداريها گلها اتصلي بامج اذا تحب تجي تشوفها خل تجي
واني صافنه عليهم اجتني رسالة عرفته الفارس من صور حسابه
مخلصها سفرات شمال وتركيا وعمان
رجعت اقرا الرسالة كاتبلي
..بلكي تتفضلين علينا ونشوف صور ابنا
رديتله عم بدون سلام مثل مادخل هو وكتبت
..كلشي بحسابه
..مافهمت؟
..يعني اني متفقه وي امه وابوه ينطوني حقوقي وادزهن الهم
..حقوق شنو ترى دخت والله
..فلوس التصوير
اني اضحك وهو شكد طوول يكتب
كتبت
..دخيل الله اني ماسامعه عدنا ساس للبخل انتو بخيلين ؟
اتصل رفضته
..شو ماصدگت شنو هالميانة ..الصور من فارس يجنك بس خل يجيب هديتي لو فلوس للصور
..بشارب جدچ تحجين صدك
..هسه هذا هم حلف تحلفني بي متحمله حرام وخبصه على شارب جدي ماسامعه بهذا القسم ابد
..عوفي استفسارچ بس يولي انتِ ابو نجيب فرع النساء؟
..عززة ابو نجيب قصدك سلوم حداد بزمن البرغوث گول اي هو اني اريدلي حجة احظرك بيها
دزلي ملصقات هذا اليضحك بدموع ضحكت
طاح حظج نوره هسه تطلع عليج دعاية واطش القابج بالريف الحية وام نجيب
نبهني صوت الرسالة
..لا يابه فارس ابو نجيب مو انتِ اني منه ادزلج على كل صورة ورقة
..اي والله انت طيب وكريم الله يوفقك خاص اترزلت من والدتك بسببهن وسويت روحي طرشه عميه المفروض وياها مكرمه هم
ضحك اكثر
..يلا مدام حجيت الحق وسعرت من يمك راح ادزلكياهن مجاني وانت اربح بيهن من فارس اني يمي سراب اتقاسم دلاعة ابنها
بعد ماصبر
دزلي بصمة شطولها بس صوت ضحكته كل مااسمعها اضحك
غيرت بمحادثته جوو
ورجعت للكآبة من ثاني يوم
اجت رزق متغيره وباين القهر عليها توني باديه اتعاطف وياها واتراجعت من فات احمد سلم كالتله ابد ولاتوصلني ولا اريد سلامك
مرته جانت وياه موقف ابد مو حلو كدامها
كالتله شوكت ماطلگت هاي الجابنها الك حبايبها مناك يلا تجي وتگول عندي امي اوصلها
احمد گلها هذا هو مو لازم و طلع مختنك
خفنا عليه يوكع وسراب شبعت قهر وصارت بوجهه عبالك هي السبب دموعها ماوگفن
ابويه من سمع تحجي بالطلاگ ومضوجته الاحمد وهو مريض صاح مسمع الكل وموجه كلامه السراب
.. امج شافتج هذا هو خلي تروح البيت ابنها عبالي صارت ادمية الظاهر اطبعت بعد ماتگدر تعيش بدون حقد وكراهية
هي هم ماسكتت صارت لغوة مو وكتها وسراب كوه لزمناها ماتتصل بفارس وتروح البيتها
وبنين بچت وراحت البيتها مقهورة واحمد بقى يم حمزة من طلعت امهن
ودن عليه البنات حاجنه يهونن عليه وهو ساكت
اخر شي گال طلاگ مااطلگ ولا يجي ابالي هالاحتمال واحد بالمية ..امي خل تنسى ولا تفكر بهالموضوع ابد وعادي خل تعتبرني ماموجود ولاجايبتني ولا ربت
..
هاجر ...
كملت تحضيراتي الباجر وعزلت البيت وغسلت الحوش وعمتي شهلة راحت الاختها ورشا البيت الجد الي صار يفرح بجيتها ويفتقدها لو ماراحت يومين وهي طلعتها الصدك علمود رشا تسولف عليها وتصبرها وهم الخاطر اسعد يوميه يتصل بيها يوصي
واني بدلت ورتبت نفسي اتصلت بصخر طالع يسگون الگاع وماادري شيجهزون بيها
بلغته ادور البيت عمي ابراهيم گلي روحي
قفلت البيبان ودرت ومثل عادتي فتت بصوت عالي اصيح
..مرحبا وين ام البيت ..حلاوووه على كولت عمي جبتلج خلية نحل من ايد اشهل الردتيها منه قبل كم يوم
طلعتلي كاشخه تجنن مكياج وگلبية حلوه وذهبها
من شافتني ضحكت
..يمه فديت اشهل ومرت اشهل
غمزتلي بعينها
..ام وسام هنا
فهيت فاتحه حلگي عبالي رجعت وفتت سلمت ماردت سلام لگيتها تحجي ومقهورة وهوايه حجت على عمي محروگ دمها الظاهر وتعرف بي هنا وماطلع الها ابد
وبعدها انهدت بأحمد من سلم عليها حسيته يتمنى الگاع تنشگ وتبلعه موقف ماينبلع خاص لمحتلي اني وعمتي هم وجنه احنا الجبنا بنين مو هو رادها واتوسل
بنين ام دميعة بسرعة بجت وطلعت البيتها بدون متگله وتحجي شي
بعد ماطلعت خواته طيبن خاطره وماقبلن على امهن وظلو هوايه يحجون گلهن
..كل عقلها امي اطلگ مرتي والله شنو تكره النسوان مناك لأن شهلة هم منهم اكو حرمه بعمرها تعرف الله وتخافه تطلب بلسانها هجمان بيت ابنها ومرتي حامل ماگالت بنته لو صارت منو الها بعيد عن ابوها زين اكو واحد براسه غيره يترك حرمه وبنت مامولوده بحجة رضا الوالدين بياشرع هذا الكلام
هنه يكلله انت اسمع وعبر ولاتهتم ولاتنغث نفسيتك اهم ومن هالكلام بس هذا كله ميصرفله وظل يحجي كل قهره من اول زواجه من دز عليها وراد يرضيها
وهي رافضه
وبعدين گلهن اني سويت العليه كدام الله واشهده واشهدكم القطيعة منها مو مني واني مو قاطع الصلة الرحم ولا عاقها وهي الگاطعه وبتصرفاتها تحثني ع العقوقها واستغفر ربي واتراجع ومن اليوم بعد مالي علاقة بيها انتظر هداية الله الها وهذا هو
هنه رادن يغيرن جو سألنه على بنين احتار شلون يمدح بيها وبتقدير اهلها اله وشلون متلگيه من رايح وشكد مواقف حجاها لو سمعتها بنين تفرح
راسلتها
..وينج بنين تعاي سمعي زوجج شكد مدح بيچ طيرج فوگ الغيم ..تعاي عيب تزعلين ترى ماناقص قهر هو
..لا والله مازعلانه شعليه هو بس اختنكت وكلت اروح اغسل واصلي واجيكم
..يلا تعالي سمعي كلامه بحقج يجنن
صاحتني حلا تريد تسبح عباس وكالت هجورة هذا الكعك والخلية هم والجاي ع النار بس جهزيهن واني اجيكم اخذيهن يمج قدمي للبنات واحمد وراح اصيح حمزة ينزل هم
راحت وحمزة نزل من فوك
سلمت عليه وبديت اجهز صحون التقديم والصواني وي الاستكاين وطلعت لگيت بنين وحمزة شويه ويتكامشون بعدين كالتله
..ترى انت ماخذ فكره غلط عني اني مو هيج ابد
وعيب هذا التلميح غلست وسكتت مره الخاطر اخوك مو دوم تستغل سكوتي
حجتها وفاتت حمزة ظل بره ماعقب على كلامها واني سويت نفسي ماسمعت
تأخر متعمد
واني فتت شفت احمد اشرلها تكعد يمه لأن گعدت يم مآرب بالأول جانت اطيب خاطرها وباستها
كامت گعدت يمه وهو حاجاها يشوفها زعلانه لا
مآرب العاقلة الجبيره الي ماخذه دور الخياط يخيط وره كل شگ
وعلى كلامها تگول هذا العقل اجاني وره تجارب وغلطات هوايه مو من بدايتي اني هيج بس عمار الظاهر اله ايد وفضل حسب كلامها
وبعد ماصاحه احمد يلا اجه حمزة وگعدنا وكملت الگعده بجية صخر وطلعو بالحديقة يجهزون عشا
عمي من يشوف صخر بينهم وابيته مدري شيصيرله عيونه تظل تلمع فرحه وقهر بنفس الوكت
صاحني عليه حضني وباسني
عينه على صخر وهو يشوي گال
..كل هذا بفضلچ
..شلون عمو والله ماسويت شي
..طيبتي جرحه بابا والله چان نظره ماينظر الي وبيتي مايدخله شگد حجيت اعتذرت كلشي سويت وهو قافل الانسان من يرتاح من الداخل ويعالج نفسه ينعكس هالشي عليه وهذا الواضح
ابتسمت ومااعرف شرد وكلت
..عمو صخر طيب بس ..سكتت من شفته صار قريب النا وعمي غير الموضوع من گال
..شرايج اكعد وياج اني وابو شهاب واشرحلچ شگد نسبتج من الارباح هالشهرين بس
..على راحتك عمو الي تشوفه ...امج لو سألتچ لتجيبين يمها سيرة اي شراكة ويانا اكو من يقرا براسها وتصدگ
..ان شاءالله مااحجي
وجه كلامه للولد
..منو منكم يتولى تعليم نوره السياقة
كلهم دارو وجههم ونظراتهم رافضه على مستغربة
صخر يراقب ردود افعالهم وعاكد حواجبه ويهفي ع المنقلة
واحمد كال اني لو مثل قبل اعلمها تدلل نوره بس هسه مااكدر
وحمزة سأل
..شنو لزمة تعليمها هسه ؟
..بشرتني بأبن صخر ووعدتها تتعلم على طلبها ومو بس تتعلم بسلامه السنة التجي سيارتها عدها
رد حمزة مامقتنع
..تفتح علينا باب وحجي ماينسد احنا هنا اجواء وناس اهل ريف لو لزمو الف شهادة تفكيرهم نفسه
يرحون يكولون ابراهيم مديح بناته ومن هالحجي
صخر وهو يهفي وعينه عل. الجمر وهو يوج گله
..منو هم
..عمامك وخوالها وهذه النمايم التكره قبل التحب
..لاتحسبلهم حساب وانت واني نعلمها
بعد ماجانت نوره حابسه انفاسها وعينها تتوسل حمزة
صاحت
..حي الله الاشهل
وصخر گال الحمزة
..لا امنعها مو مال تتعلم
..لا لا حي الله صخر صخر اشهل منو
حمزة گالها
..عوفو الضحك راح اعلمج بس مامقتنع واعلمج بشرط ماتسوقين الا واحنا مشغولين عنچ
وعمي رد بدون اهميه
..حمزة اني الگلت ترى لاتناقش وراي ..من شوكت اني احسب حساب الحجيهم خلي ابالك شگد ماتسمع وتحسب حساب للسمع اتأكد انت ماشي بخراب حياتك بدون ماتحس مااكلك عاند العناد مايفيد وجربته بس لاتسمع من البداية ولاتهتم
اتعشينا بسفرة وحده وبالليل رحنا البيت لكينا عمتي شهلة جاية ومقرره تروح الاختها وبيت اخوها فتره
وصخر كلها اني اوصلج
ثاني يوم من راد يوصلها رحت وياهم ندلع غزل هم جابت حسين قبل فتره
بقت خاله يمهم ورجعنا ثاني يوم اتصلت بيه بالليل تشوفني شمجهزة الي متت بيهن ملابس تجنن
وگالت اوديهن بيد علي الكم واني واختي رايحين لأخواني يردون يشوفونا واحنا هم مو مثل گبل نتعذر بولدنا ماظل النا عذر
كلنالها اتونسي وروحي وراح نشتاقلج وفعلا البيت بدونها وحشه
ثاني يوم طلعنا للدوام وسألت بنين من وصلنا حتى لايسمعنا صخر عن موقفها هي وحمزة
طبعا البنات من يشوفنا نحجي بينا يضحكن علينا يكولن انتن غير سوه متتشاوفن هناك ميدرن الاحداث اكثر من وقتنا
گالت
..مو دزيتيلي رسالة وكفت اسمع كلامه وفرحت بيه لحكت عليه بعده يسولف عني. ..والله يابنين بالبداية كلت حبه مات ومن اتمرض متت گلبي اشتعل شعل نار ماتهدأ وخوفي عليه ماتتوقعيه ولا اني جنت اتوقع هالگد احبه وزايد حبه بگلبي والله مدللني وممقصر عليه ابد رغم بكلامه بارد وكلشي عنده عادي يحجيه ما يهتم بس حيل عزيز عليه وممقصر بشي وفرحت من مدحه كدام خواته
حمزة افتهم اني جاي اتصنت وكال
..لتخافين البنات مابيهن طبع يحجن بغيابج مايحتاج تسمعين وتسويلج سالفة شكدها وتكولين مااريدهن ابيتي هنه هم مايطبلج هواي امني
بقهر رديت
..انت شنو سالفتك ؟
رفع حاجبه مستهزأ يگلي
..ماناسي عركتج وي احمد حتى يعوفني يول اني امي وامه مافارگتنا انتِ تفرگينا عن بعض
وبعدها سمعتي الصار
اني الخاطر احمد قررت بعد ابد مالي علاقة بي واصلا جنت ناويه اخلي احمد يعزمه واصحح هالصورة بس من ترك التلميح وصارحني بفكرته بعد عيب هسه يكول تتلوگ واني مااحب ابين لوگية ابد
..بعدكم المواقف تبين معدن الناس والايام طويلة تعرفي ويعرفج زين لتخلين ابالج
..على گولتج ..اني هم اتسرعت بس بعد صارت ..احمد كال يراجع باجر ويشوف وضعه حتى بعدها نسافر ثلاث ايام لسليمانية ..مدام خلصنا الكورسات قبل النهائية عندي فرصة
..اي روحو اتونسوا ..اكلج طبيبتج اكدتلج البيج بنيه
..كالت نسبة جبيره بس مو اكيد
..شو احمد عبالك متأكد ههه
..اي هو فرحان بالبنية اكثر ويدعي تكون بنيه صح
..ان شاءالله تفرحون بيها يارب
..امين حبيبتي هجوره
بعدنا نحجي و وكفت يمنا وحده من البنات النعرفهن بس ماعدنا وياها صداقة وميانة قوية
گالت
..ماشاءالله متعلمنا شنو السر العدچن؟ مامعقولة صدفه
زواج من ناس طاگين وحمل ونجاحات مستمرة .ورجعت باوعتلي وگالت
صدك لو گالو الحظ عدهن وبس
بنين كالتلها
..ذكري الله حبابه وعيب هالاسلوب وشويه ابتعدي عنه ترى مختنكين الحالنا نفهي عنا شويه
والثانية ردتلها
..لا وانوب متزوجات اخوه نسوان حمه متصادقات
..حبيبتي كولي يالله قابل اول اثنين نتزوج اخوه وندرس شنو الغريب بالموضوع
حجيتها وجريت بنين المدت السانها وهي تكلهن
..الله يوفقجن وتعرفن السر من تنشغلن بحياتجن وتبطلن تراقبن غيرجن
..كافي سكتي لتلمين الناس علينا اتجاهليهن شبيج
..شنو جهال واتجاهلهن خيولن
اجنا هولير وريحانة ويسألن بالبداية انتقدنها وبعدين شبعن ضحك
..ترى صدك تجذبن النظر انتن والميعرفجن يستغرب علاقتجن وكلها عرفت انتن نسوان حمه من الدكتورات لأن كاللجن خو ماتتعاركن اكثر من وحده اشاقت وياجن
وهاجر من زمان يسألون ع رجلج وشويه بعد ويزحفله
ضحكت وكلت
..لو يطيرن طير مو بس زحف مااتأثر لأن هو مستحيل يأثرن بي اعرفه وحافظته
والحقيقة ماكو بنت تتجرأ كلش وتذب نفسها اذا مالكت مجال ونفس شي الولد
طلعنا للبيت وبنين اخذت اجازة مرضية وهي رايحه سليمانية اخذهم عمي وصلهم ورجع لأن حمزة التحق والرجعه گال عبد لو صخر يجيبهم
مرت الايام واجت عمتي مقنعيها تسوي جواز سوالها صخر تريد تروح وي زوجات اخوانها تزور الامام الرضا عليه السلام
وصخر قرر نسافر اسبوع احنا هم بوكت سفرتها
جنت شايله هم الفنادق شلون اذا مو احنا نطبخ او هو بالذات مياكل وكلش كلش ممكن يتحمله شلون ماجان يومين مو اكثر
بعدها استقر راينه نسافر كربلا ونگعد بفندق بالاول نتأكد من مطبخه مسموح يفوت اله لو لا
ولگينا فندق قريب الامام العباس عليه السلام مسموح بي ننزل للمطبخ وخلصناها مخلمة وطماطة ودجاج
احلى اسبوع شفته بحياتي
بالنهار ناكل وانام وبالليل نطلع بين الحرمين الحد الفجر نرجع
وهم رحنا اسواق شعبية مولات كلشي بيها حلوو
وبعدها قرر ياخذني للبصرة يوم
امي ماكدرت تجي لأن اتمرضت وماكالت شنو تكول تعبانه وهشاشه بعظامي بس مااعرف ليش شكيت هي حامل وتخاف من الطريق ومتريد تكلي
گلي اني عاجبني ازور البصرة من زمان وانتِ شوفيها بمكان عام وبس
وفعلا اتفقنا نشوفها بالحدايق الحلوه هناك ومثل هوايه عوائل ماخذه عدة الشوي
صخر بدشداشته البيضه الضايع بيها وي اهل هالمكان
سگف السمچ وامي انتظرتها واتفاجأت من اجت هي وبيبي وخالي وعائلته وجايبين وياهم عشاهم انواع الاكلات مسوين هم وامي
فرحو بيه واتناسيت الصار واتفاعلت وياهم بجيتهم
مرت خالي كل شويه وكالت
..والله متغيره وحليانه الخير يخير
كلت
..الحمدلله وراحة وروح الحواليه هم تفرق
سكتت ماعاجبها وامي حست الوضع اتوتر
بعد العشا گامت امي تودعنا وتكلهن هم يلا نروح
اني عيني على صخر حسيته اتضايق واخر محطة ابد ماعجبته بس كوه الخاطري سواها
وهم سألتها
..ليش ماجبتي ابنج ماما
..متحسس الليل كله منام وخليته يم ابوه ع الجايات نشوفج ان شاءالله
استأذنت وكامت وبكومتها حسيت بخبث من مرت خالي گالت
..على كيفج بكومتك حملج مو زين عليه
امي انصدمت وهي كالت
..يا بس لا ماحاجيه واني چفصت
بدون ماأتأثر گلت
..لا اعرف ليش جفصه قابل شكو اسم الله ..باوست امي وكتلها بالج ع نفسج
راحت وهي مصدومه بيه واني فعلا مااتأثرت يمكن الصدمات خلصن
بس منا وقررت بعد فعلا مااحجي اي شي مو خوف من كلام امي او طمع بس الظاهر هيج احسن نبقى كد السلام والسؤال من بعيد
رجعنا من سفرتنا لكينا احمد وحمزة رايحين الاربيل على اساس مراجعه بسيطة نمنا والمغرب اتفاجأت من صخر كال جهزيلي ملابس بسرعة الحكهم
سألته لأن خايف ومرتبك ونكر يكلي يكولون ونست مرتك تعال تونس ويانا
سكتت ومامقتنعة بكلامه ابد
وصاني اليوم ابات ابيت اهله وعمتي باجر جايه
..انت متأكد تعوف عمتي باجر جايه من الزيارة ومسافره صارلها 15يوم وتروح تتونس شو كلامك مو مقنع
سكت وفرك وجهه
..احمد عنده عمليه وضروري اروح حمزة الوحده صعبه عليه
..صخر متأكد عليك الله عملية شنو
..يكول بسيطة رفع مرارة وهو يراجع متأذي هناك وقررو دخوله انتِ لتحجين شي ميريد ابوي وبنين يقلقون
طلع منا واني درت الهم وضع البنات طبيعي وبنين يم نورا تنظف گاعدات يسولفن ويضحكن وحلا محضره صبغ الشعرها وصاحت بنين تصبغ الها واني اندمجت وياهن بس بگلبي خوفه وممرتاحه وفعلا ثاني يوم كلشي اختلف
...
رشا ..
گمت اذب حيلي على الشغل مااخلي شغل مااشتغله اريد عقلي ينشغل وحتى اسعد صار كل وقته ويايه يهون عليه ويشغلني اكثر بس بهتفون احجي وياه واجلف حتى هو يحجي عليه يكلي تهلكين صحتج هيج فكرج مو بهالطريقة ينشغل خليج عليه ولاتفكرين
انتبهت رنا تعبانه حيل وجهه مصفر
حاجيتها بجدية
..رنا خاف انتِ حامل
فزت مامصدگه ومستبعده هالفكره كلش
راسلت نوره تشتريلي بطريقها من تروح الدوامها ودزتلياه بيد محمد
انطيته الها اختبار منزلي وطلعت صدك حامل فرحت الها من گلبي ودعيت الله يعوضني ويجبر خاطري بأخ متمنيته عمري كله واول مااجه ابويه كتلها روحي بلغي
استحيت احاجيه اني او اباركله ماادري ليش استصعبتها ومن طلعت تكول فرح حيل بس انقهر شلون راح تعرفين مايدري بيج انتِ اكثر وحده فرحانه النا
العصر من طلع شجعت نفسي اباركله وجدي سمع وفرحته ماتنوصف
مااعرف هالموضوع يخلي ابويه يقرر عني ويستعجل بموضوع اني حاليا رافضته
متصل باسعد مبلغه اذا مكمل اموره ليأخر الزواج ومن اجه صارحني اتخبلت
..مو بهالسرعة يابه هسه يكولون صدك ماصدكت تخلص من ابنها عمت عيني توه صارله شهرين اروح اتزوج
..يابه قابل كتلج احتفلي ودكي طبول مو زين الرجال صابر ومتحمل تطلع منه احسن مو منا لا هو ابن عمج ويصبر لا اقارب رجال مخلي خاطر للنسبة هو هم وضعه مخربط ويريد يستقر هو وابنه ليش حارمه نفسج خاف فلان وعلان يحجون
..خيولون مااهتم الاكبر واحد بس نفسي ماتتقبل والله
حجيتها وبجيت وبهالاثناء اتصل بيه اسعد
ابويه طلع وهو يستغفر واني رديت ومبينه من صوتي ابجي
..والله عرفت الموضوع مو منج ..وبعدج ماتتقبلين وحگج معليچ بأحد انه وياج واجيج من تگليلي تعال اخذني اخذج ومااسأل على اي بشر بعد
دموعي نشفتها والعبره البصدري تحولت ضحكه
مدري شلون بكلماته البسيطة يطفي نار بكلبي تسعر
..والله يااسعد فضلك ابد ماانساه
..ماابينا فضل ..بس فتحيلي كامره اشوفج
..لا مو وكتها لو تشوفني هسه تكنسل الموضوع كله ضحك
..خاف يصير العكس وادگ بيج دكه واجيج بليل اخذج
ضحكت
..يلا فتحي كامره اشوف الله شخالق من جمار
فتحت الكامره واني اعدل بشعري ودموعي لساهن حمر ومغورگة
متمدد ع جربايته ايد لازم بيها الفوك وايد جوه راسه وبصفه سجاد بس شافني
انطاني بوسه
هو ضحك
..بعد ابوك انت ..ترى والله داخله گلبه انتِ مثل گلب ابوه من اول ماشافج داخ
بعدين ذكرت الله وكلت مع الاسف البنيه طلعت متزوجه وابنها هذا
وحيتني رنا من كالت الماخذها نذل وماصانها كلت ابوه لابو اصله الجواهر الثمينة قليل الي يقدرها ويحب يحويها مثلي
..تحب الجواهر انت
..اي والله
..اسعد انتبه جاي تجمع كول جوهرة وحده مو جمع
ضحك حيل
..جوهرة جوهرة ..يعمي والله دايخ بهداي وياي
..هسه تقنع بابا انت
..تشلعين عيوني هاي ماكو اسهل منها اكول عندي دورة وتدريب وانتظر الترقية هم وتدللين عليه
..هواي اشكرك
..عوفيها هاي انوب احظرج مو بس اسد التليفون
ضحكت ورضيته بكلمة حلوه ونهيت الاتصال ونزلت
لليل اجه ابويه وجهه مگلوب لا نام ولا ارتاح
الفجر گعدت بعده على گعدته يفتر
..يابه شصاير
..ابن عمج احمد داخل عملية خطرة ادعيله وعمج مايدري ولا اهله لاتحجين
گلبي اشتعل نار وظليت ادعي ومااخذت عيني نوم اروح وارجع بالعشرة الصبح طبنا خبر وفاته وهذا الخبر رجعني مذهولة وفاقدة وكل صبر صبرت نفسي بي راح وظل الموت يتراوالي النوم طار من عيوني اراقب ابوي وكل غالي حسيت الموت يمي وداير ميدوري ومهددني اني وكل انسان احبه
...يتبع