بقلم نور الشمس
غزالة ..
بهوسة التحضيرات والخبصة الچنت بيها وخوفي من الجاي وارتباكي من فكرة العيشة بعيد عن ابويه وخواتي ووي ناس الهسه اجهل واقعهم رغم العرفته عنهم بس البشر مينعرف الا بالعشرة واني بطبعي حذرة كلش من الصغر واتعامل وي الناس بحذر
وحالتي تخليني افكر الف مره قبل كل خطوة اخطيها حتى لا اواجه جدار من الصد وانصدم بيه
ومدري شلون صارت الخطوبة بسرعة واقتنعت بعلي وحبيته هم واشوفه يستاهل المحبة والاحترام علي من الأشخاص اليتميزون بشهامتهم وعنده كارزمه هم
افكاري اخذتني واحس براسي هوسة جريت دفتر المذكرات اراجع وبديت اقرا لا على التعيين وجذبتني ورقة دونت بيها اهم يوم بحياتي العلمية هو اول يوم دوام كلية
قريت شكاتبه وكأني هاوي يقرأ ذكريات مو صاحبة الذكرى نفسها
(چنت مخليه ابالي اني معاقه ..
مااحلم ولا اباوع للبعيد ولا اخليلي سقف عالي بأمنياتي
جنت اگول الى النهاية ايدي بأيد بابا وبس
طالما انحرمت من امي بأهم مراحل عمري ورغم خواتي وحنيتهن بس اكو شعور بداخلي ماينملي
عشت واني مخليه ابالي رفيق محطاتي اجمع بابا لاغير
الى ان فتره قليلة تغير هذا المسار
وبسرعة عجيبة تنافي واقعي العشته بأيام ولحظات بطيئة مرت بعمر مر ابرود وجمود الكل مشاعر
اليوم اقدم بجامعة بغداد كلية الصيدلة وأيدي بأيد خطيبي ..ومو اي خطيب رجل بمعنى الكلمة بصفاة رجولية عجزت ارفضه او اتأنى خوفًا من انعدام الفرص
يكفيه يكون اخ وقريب الأقرب شخص الي بعد ابويه
اخوي الغالي صخر )
اتنهدت واني اقرأ اسمه.. صخر صار فتره احسه يتجنبني بس لأني بفترة خطوبة شلون هو يتقدم بزواجه والله شايله همهم هو وهاجر ومااگدر احجي
سكتت وگمت اشوف اخر جنطه بملابسي شباقيلها وتكمل تليفوني كل هالفتره الافكر بيها تجيني اشعارات من البنات ..فرحاناتلي هوايه وهاي الفتره احسها قربتنا اكثر
شلت التليفون ارد اكمل سوالف وياهن لگيت هوايه رسائل ع الماسنجر
علي استأذن وطلع يكمل نواقص البيت منو محاجيني هالگد
بعدني افكر واجاني اتصال رقم غريب ماجاوبته
بس بداخلي خوف غريب مااعرف ليش حسيت اكو شي راح يصير
فتحت اول رسالة بفوني متجاهلة الاتصالات
..شلونج عيني ست غزالة حسابچ هكرته وجميع الصور يمي ومو اي صور الصور الي بينج وبين خطيبچ هم
رجفت ايدي وارتبكت واني اطلع من محادثته بدون مااكمل باقي الرسايل ورحت المحادثتنا اني وعلي مليانه صور صور عادية وبيها كاشخه بيهم واشوفه الملابس الجابهم عليه
شگد غبيه اني شراح يخلصني ليش ماحذفتهن ليش كل شويه هو يوصيني ويكلي حذفي
رجعت اقرا واتأكد هو شكاتبلي لطمت وجهي من قريت
طلعت اشوف رشا بلكي نشوفلنا چارة.. لگيتها نايمه ابنها متعبها وتهلك نفسها بالشغل حتى تخفي قهرها عنا سوده عليه عبالها مانحس بيها اني وبابا بس قهرها ياكل بگلبنا وهي تكابر عثمان ماردلها اعتبارها صح يراسل ويتصل بس بالوقع مااتقدم ولا اجه البابا وجدو وحاول يرجعها يريدها ترجع من ذاتها وهو كرامته متنمس ويعتقد بأعتذاره راح تنمس كرامته
رجعت اقرا الرسائل مستمر يدز
..شوفي ياحلوه عندي حسابات ولد عمچ كلهم وراح اسوي مجموعة وادزلهم بت عمهم المصون شنو بينها وبين شخص مجرد خطيب اكو عاقلة ادز كل هالصور الواحد مامتمم زواجه منها شبقيتي اذا زنودج وصدرج طالعات
لزمتني رجفه اباوع للصور والله عاديات بين خطيب وخطيبته بينا عقد شرعي ومحكمة ويومين واني ابيته بس هاي الصور لو شافوها ولد عمي مصيبة
..منو انت وشنو غايتك
كتبتها وايدي ترجف
..اني حبيبة خطيبچ الضحك عليه سنين مااخليكم تتهنون وهذا واعد عليه
..حبيبة خطيبي متأكده؟ الأعرفه ماعنده حبيبية شلون اصدگچ
..اني مامجبورة اثبتلچ صدگتي او لا
..تردين مقابل حذف الصور؟
..اتركيه وعرسكم ينلغي بس هذا الي يخلسني احذفهن
..اكيد تشاقين؟
..شايفتني تافهه مثلچ
قريتها وقبل لا ارد دزتلي فشار عليه وعلى ابوي
..انتِ مو بنت اسلوبچ اسلوب ولد
اجاني فشار اقوى يمسني و ابويه وصخر هم
ورجعت دزتلي صفحات الولد.. صخر ..مهاب.. عبد الإله.. وسام.. واحمد وحمزة وحارث ومتت من شفت عمار وعزام هم والبقية كلهم يمكن راح ادزهم
يمه عززه بعينچ غزالة امداچ فرحانه عبالچ ادوملچ الفرحه
بنات عمي يراسلن فرحانات وهاجر كل شويه شامرتلها هوسه ومحتفلات بدون اي مقدمات كتبتلهن
..الحگلي وگعت بمصيبة بس الله يطلعني منها
حاجتني سراب
..شبيچ ولچ اجتچ الشسمه
..ياريت على هاي
وهاجر كتبت
..اسم الله شكو شبيج غزالة ناصبه علينا مو
بطة ونوره بعدهن يكتبن ودزيت سكرين التهديده
هاجر سألت
.. منين هذا تعرفي؟
..لو اعرفه احتار هالحيره احرگ اهله غير الذابحني مااعرفه مدري مااعرفها تكول حبيبة خطيبج من سنين
دزلي فويزات
نوره :عزززه بعينچ غزالة طلع يحب غيرج ومقشمرها واجاچ
بطة: الله يحبچ وكشفتي بس ليش تهددج بالصور شنو غايتها خو تكلج بعمايله وبس
اني صافنه واسمع بصماتهن والدمعة بطرف عيني ونار بصدري تلهب وهنه مستمرات
سراب: غزالة شكتيلها شحجيتي عززة هاي شكاتبه ولچ هاي مو اسلوب بنيه متقشمره هايه مبينه تعبانه واخلاق سز خاف تريد تخرب بينكم
هاجر:عوفن كلشي وركزن اذا حبيبته منين تعرف ولد عمامنا بالعدد وتريد تجمعهم هاي مو يم خطيبج هاي منا من يمنا
لزمت راسي صدع
..بنات الحل شنو شسوي هسه انطتني مهله نص ساعة والا كلشي يوصلهم
محتارات اكثر مني ينطن حلول ويلغنها وبعد وقت المهلة ماخلصان اجاني سكرين بي تم انشاء المجموعة والصور كلها جاي تحمل ارسال الهم
احس بروده لزمت راسي ونزلت ع جسمي كله.. شويه ويغمى عليه واني اترقب السكرين الأخير بي اغلبهم طالعه صورهم اسفل المحادثه يعني شايفيهن لطمت وجهي ومن حيرتي عضيت اصبعي بخوف وقهر وندمانه حيل خليت الصور لزمة عليه
وكل هذا واني خجلانه شلون يشوفوني ادز الخطيبي هاذه الصور وطلع كلشي هين يم الرسالة الدازتها الهم وصلتني بداية الرسايل مكتوب
..بت عمكم تلعب ع الحبلين الحد قبل ايام اني بعلاقة وياها وادزلي صور وهي بذمة رجال واليوم عرفت باجر حنتها اذا مالغيتو العرس افضحكم وافضحها مو اني الينضحك عليه
بلحظتها حسيت الدنيا انطبگت على صدري وسحگت ضلوعي سحگ ..ارد اتنفس مااگدر انتهيت.. والله لحظة من اللحظات گلت يمكن خلص راح اموت وهذه نهايتي الم غريب اتمكن من روحي وجسمي
البنات اتصلن وبطة كتبت
..عززة بنات وصلتهم الرسائل حمزة واحمد اتخبلو
تليفوني ماوگفت منه الاتصالات وصوت ابويه عله
رجليني انشلت ماگدرت اتحرك خطوة
وصوت رشا اجاني بخرعة تسأل
..وينج غزالة تعاي بابا يريدج احجيلي شصاير دايخه من گعدني مافهمت
فتحتلها الباب واني منهاره
..مصيبة ووگعت على راسي مصيبة رشا مااظن اطلع منها
..اسم الله ولچ شبيچ اتنفسي اهدي خل افهم
بعدهي تحاول تهديني وفات بابا اول مره اشوفه اعصاب الهالدرجة وتليفونه بيده
مدري شلون گدرت اوگف گدامه واني اشوفه بهالعصبية وقهر الدنيا كله بعيونه
..بابا والله جذب لاتصدگهم
..صورچ منين جابوها ؟
اختنگت بعبرتي
..من تليفوني مهكره
..شلون هكره لتخبليني الصور هذه المن دازتهن مايندزن ذني الصور ..اساسا ليش تصوريهن انتِ.. غزالة چنت اظنچ عاقلة ومتربية بس للأسف الصار ماينغفر
گعدت رجليه مايعينني ابچي ورشا تهدي بي وصوت الباب البره اندگت طلع هو
ورشا هدتني وطلعت وياه صوت عمار وصخر
گمت ارجف عمار شجابه جان ملتحق حظي جابه وصخر شلون اواجهه شراح اگله شنو عذري هو اصلا مبتعد هالأيام ..ويشوف هالكلام عني والصور شراح يفكر
شويه ورشا گالت
.. يولي الموضوع جبير انطيني تليفونچ يشوفوه
..شلون بيه شراح يسوون احجيلي رشا راح اموت
..ماادري بس اكو لعبة والشي المتأكدين منه عمار وصخر هذه الرسائل مو من طرف علي ومن طرفنا والعدة اسباب اهمها محد من اهل علي ومعارفه يعرف حسابات ولدنا كلهم
واكو مواضيع انحجت تأكد شكهم جاي يجرجروه بالكلام واني حجيتلهم شكوكي واعتقد هاي مرة ابوج بس ابوج ماقبل عليه من حجيت يمهم ومااهتم قبل او لا.. هي هددتني
وهي تحجي وياي اتصل بيها رقم جاوبته كل ظنها مرت ابويه ورادت تتأكد من شكوكها طلع عثمان وبدون اي كلام گلها
..اني جاي اشوف الصار شنو ويارشا والله لو طلعت اختچ صدگ هيچ مااخليچ على ذمتي لحظة
..تعال وانعل ابوها التظل على ذمتك بعد
بچيت اكثر ابد مامتوقعة هيج الموضوع يكبر
رشا راحت وعلا صوتها وهي تحجي وي ابوي وعمار وصخر اصرو لازم اروح واحجيلهم
مااگدر اوصف شگد چنت فشلانه ومكسورة بكل خطوة امشيها واقرب الهم.. جسمي يرجف اكثر وگلبي ينعصر اتمنيت بلحظتها ميته ولا شايفه هذا اليوم طول عمري بنظرهم البنت الهادئة العايشه بعالمها الخاص شلون اخلي عيوني بعيون صخر
نظره اولى شفت كمية القهر بعيونه ومبين گوه لازم اعصابه وجهه متشنج الدرجة فكة بارز بشكل يوتر المقابل وحواجبه معقودة وعمار ماباوعتله اصلا لأن متأكده مااتحمل تفاصيل اعصابه
حاچاني ابوي
..شكم مره حذرت من التليفون ومصايبه اني... الصور بالذات محذرجن منها لو لاااا
شهگت ابچي وصوت عمار يگله
..اهدأ عمي صح غلطانه بس كلنا واثقين منها واذا الخطيبها دازتهن هي كلها هيج هسه الخطوبات مو مثل قبل ومدام كله بأطار الشرع مقبول وان كان يترتب عليه اشكالات بمجتمعنا ميخالف نتغاضى عنها وخلينها بالمهم كلامه وياها صريح هو مهكرها وكلامه ويانا طعن مايخلص منه لا بالعرف ولا بالقانون
رفعت عيوني الهم ونزلتها بسرعة من شفت وجوهم متبشر ابد وتليفوناتهم ماسكتت جاوبو الولد يحاجوهم ويكلولهم اهدوو نفهم احنا ونفهمكم
صخر حاجاني
..گعدي غزالة.. علي يعرف ؟
اشرتله براسي لا
..هذا هو اني احجي وياه وافهمه ونشوف الموضوع هذا ماينسكت عنه واني وي رشا بشكها
بچيت اكثر خفت هو هم يصير ضدي وابوي يگله
..ماتوصل لهنا ..الا رايده الخراب فد نوب
بالگوه شجعت نفسي وحجيت وكلت العمار اقرا محادثته وياي ترى كلامه غير على اساس بنت يحبها علي وتريد تنتقم مني ..حسيت ابوي اتمنى هذا الكلام هو الصح ولا الشكوك الثاروها هم
طلعو المحادثة وظل يقارنها وي الرسائل الاجتهم ويحجون الهفوات بين المحادثتين ورجع صخر اتصل بعلي جاوبه عادي علي ميعرف شصاير وصخر گله باجر الصبح اريدك يمي هنا بموضوع مهم
لح علي يعرف شصاير حجاله صخر باختصار اتخبل هو وگله هسه جايك
عمار رفض يجي بهالوقت وكله خطر عليك مناطقنا زراعية وظلمة بالليل كلشي يصير لاتوصل بس اريد منك من يحاول يتواصل وياك سوي نفسك متعرف وجرجره بالكلام جنك مصدك بكلامه
بهالأثناء اجه عثمان رشا اخذتني وطلعت وعرفت علي ظل على اتصال وياهم ساعات وهم موجودين ماطلعو للفجر من بيتنا وابويه سوده عليه اتحطم
اني انتهيت جسمي عبالك اتعطل ايدي گمت مااگدر ارفعها متمدده بفراش رشا وهي گاعده يمي ابچي وهي تبچي وابنها ويانا اسمع صوت الأذان اذن طلبت منها تگومني اتوضى واصلي وادعي ربي المالنا غيره عمرنا مااذينا بشر ليش هالأذية بأهم ايام بعمري الأيام المفروض افرح بيها
صليت ودعيت ربي واني ارجف وبگلبي حسرة ولوعة
بس هو يعرف بيها
اسمع البنات كل شويه وحده منهن متصله برشا وعثمان بعد ماطلع اتصل برشا يريد يسولف وياها عادي بعد ماشاف الاختلاف بين كلامه وياي ووياهم شك بالموضوع وراد يرضي رشا يمكن مااعرف يسحب كلام منها لأن صخر وعمار ماانطوه مجال وهي هم حسيت انطته مجال واتهاونت وياه وبگلبي اگول حقها هي مقهوره وماكو اقرب منه الها يهون عليها
ماادري شوكت نمت ماچان نوم عادي چان هروب وهوان نمت محملة قهر مدري شكد غفيت
گعدت على صوت رشا عالي وهي تتحلف اذا الي صار وراه خالتي او احد قريب منها راح تتصرف بنفسها وتگل للمتصبه بيها نصحيها تضم روحها مني لأن لو لزمتها اجرم بيها وادخل سجن
خفت على رشا حيل اعرف اختي اعصاب گمت ارد اهون عليها بس ماعندي قوة تعيني وصوت ريمه اجت تصيح على رشا وتگلها اهدي ولاتنطين لزمه على نفسج ترى الحبايب كلشي يسجلن لاتأمنين
شافتني واجتني
..عمت عيني غزولة ضيعن فرحتج المايخافن الله الله يطلع حوبتچ حبيبتي حضنتتي وشبعت بجي بحضنها ريمه اختنا الجبيرة وحنونه حيل اشوف بيها امي
باستني وهي تكلي
. والله اتحلمت بأمي البارحه واني ماادري بالصاير رجعت منكم تعبانه ونمت ومامكعدني عزام الصبح ومن سولفلي عرفت الحلم شنو امي چانت مقهورة وتبچي وزعلانه زعل ثگيل بس من شافتنا لمانا بحضنها وگالت دعائي حافظجن انتن وابوجن
اجت رشا
..اتصل عليه صخر مراسلين علي گايله خطيبتك عدها علاقة وياي وچانت ادزلي صور والحد البارحه هي تتصل بيه وكلام هوايه علي مستدرجه ومخليه يتصل بيه هم ومسجل المكالمة
سكتت مابيه احجي واسأل وانصدم اكثر وصدمتني من گالت
..گومي يلا روحي حجزج بعدله نص ساعة ريمه تاخذج وسراب هسه اتصلت بيها گالت اني اروح وياها
..ياصالون شبيجن انتن صالونيش بحال صالون وعرس اني
..علي اتصل ويريد العصر يجوج يحنوج هو واهله والعرس بموعده ويگول اي تأخير ممنوع وهذا كلام ابويه هم ..يلا حبيبتي انسي كلشي وافرحي رجلج وياج ومامصدگ بشي وولد عمچ هم وعمار وصخر حلفو يطلعونه ومحد يخلصه منهم لأن المتصل بعلي ولد وعرفو رقمه وصوته وقدمو بي شكوه هم بأسم ابويه
..الله ينتقم منه مرمر حالي والله ايدي مابيه حيل ارفعها حبابه گليلهم يأجلون كلشي
..كلشي مايتأجل اذا اجلوها يكولون الكلام صحيح والعريس اتخلى
..كلكم حاسبين حساب الناس ومحد حاسب حساب نفسيتي اني مو حاهزة للعرس ابد
حاجتني ريمه
..ميخالف حبيبتي عديها شلون ماكان الله يسهلچ ويسعدچ حاولي تفرحين ومتفكرين بالصار
سكتت هنه هم مجبورات يمشن الموضوع وياي وابويه ماموجود طالع احسه يتنجب يشوفني ماادري زعلان مني لو عليه
واني اتجهز اطلع اجو عمامي يسألون عليه ومن مالگوه حاجو رشا وصاحوني باسوني موقفهم ريحني شويه وعززلي نفسيتي
تليفوني ماادري عمار مرجعه لو باقي يمه
جابتاي رشا التليفون
..علي يريد يحاجيج
اخذت التليفون وبس گال الوو صرت اشهگ اريد اسكت واسيطر على عبرتي مااكدر
..غزالتي عليمن هالبچي بويه يرحولچ فدوه لاتهتمين اريدچ تنسين كلشي وتخلين بالچ وياي.. اني وبيتچ منتظريچ بفارغ الصبر شوكت تنورينا وتزهي دنياي بيچ انسي كلشي حبيبتي لاتهتمين وداعتچ ماافوتها اله وراح تشوفين
..شو سمعيني صوتچ غزالة ..غزالتي حاجيني شو
..اجيج؟
بالگوه گلت
..لا زينه مابيه شي
..فدوه الصوتچ ..لاتهتمين غزال البراري ارتاحي وخلي كلشي عليه اني والولد
نهى الاتصال واني بودي اشرحلهم قهري الموضوع كله يقهر مو لأن مصدگين او لا اني واثقة من نفسي بس حسيت بكسرة من الصار ومهضومة حيل والهاضمني ابوي وقهره وزعله مني
طلعت وي ريمه وسراب عزام وصلنا سلم عليه عادي ماگدرت ارفع راسي رغم هو سوه نفسه ماكو شي ولا سأل
ومدري شلون مر الوكت سلمت نفسي خرسه كلشي تکلي اكلها بكيفج وبالي يم الرسائل والصور والفساتين الاخذت بيهن والتنورة القصيرة ومعالم جسمي شلون شافوها ولد عمي المايوم شافو شعراية مني هم حيل يحترموني راح ابقى بعيونهم بنفس الصورة لو خرب كلشي
كملنا وريمه وسراب شگد يردن يكسرن الحاجز ويحاجني نفسي ماتتقبل اضحك ابد والم صدري يزيد ماينقص
من خوفتنا ولا صورة اخذنا
رجعنا البيتنا الطريق طويل يسولفن بينهن وعزام يحجي وياهن والفهمته يگل الريمه خالتجن لاتتصادمن وياها ابد لمن تنكشف اللعبة كلها وجاملنها شكد ماتكدرن خاص رشا حاجنها تهدأ
رجعت وانصدمت اول ماطبيت خالتي تلگتني تهلهل واطش چكليت عيوني صارت على رشا من بين الحضور شفتها تزهي كاشخه وهلاهلها ترست البيت الكل مخبوص باجواء الفرح ولا عبالك البيت البارحه مليان بصياحهم وبچيي اليوم كلشي يوحي للفرح الا اني وملامحي وبفرحتهم ووجودهن يمي خاص البنات وكشختهن وركصهن الي وبوساتهن ونظراتهن الي تگلي انسي بدت تلين ملامحي واهدأ واحس شويه بطيف الفرح مرني
ومرت الحفله احلى مايكون بس بعدني متوجسه واراقب خالتي يسألنها شعجب رجعتي سليمان رجعچ
وبكل حيلة ترد
..هو من ثاني يوم رادني ارجع واني عاندت بس بنت الغالية عروس واخليها لا والله ماترهم عيون اختي صارت گبالي وگلت كلشي يهون الأجلها
ايدي على گلبي من رشا خايفه تچفص بيها والملامه تصير الها وهم سألنها على عثمان وكاللها وصلنا كلام متراضين انتو بس مخليچ الخاطر اختچ بعد الزفة ياخذج وهي لا كالت اي ولا گالت لا بس تضحك تسايرهن
خايفه منها ومن نظراتها صحتها عليه
..خالتي شوكت رجعت
..قبل شويه عين الله عليها اجت والخير وياها
..عوفيها رشا ختولي ابوي عرف ؟
..لا بعده مضمومتله هالفرحة ..بس اصبريلي شراح اسوي بيها
..رشا بذمتچ سكتي ترى گلبي على ساعة يوگف مااتحمل خرعات بعد
..هو اني شمصبرني غيرچ ..مو هسه من افرح بيچ وارتاح وكلشي بوكته حلوو
..رشا عليچ الله لاتخلين بالي عليچ ديري بالچ على نفسچ وابنچ وكل من رايد اذيتنا الله قبيله
الحنة خلصت باجواء حلوه خففت عني خاص حضوره هو واهله وفرحتهم رفعت معنوياتي هواي وحضور عمه شهله وهي تحجيلي عن صخر وشلون باله يمي چنت مفكره يكرهني بعد الصار
يوم العرس مر كلشي سريع وصارت الزفة وأول عهد اخذته منه يخليني براحتي الحد ماارتاح وتستقر نفسي ومزاجي يلا نتمم الزواج وراد اوعده اخلي هالشي بيني وبينه بس ارتاحيت وگدرت انام براحه ليلتها
....
هاجر ...
انخبصنا بالصار الغزالة متنا قهر عليها فرحتها ضاعت وحتى احنا بعد ماجنا فرحانين وياها انمردنا مرد وكلساع حاجين قصة وفلم والسالفة طشت صح ولد عمها واثقين بيها بس ضاجو من عرفو بالصور طالعه واعتبرو تهاون منها وغلط وخاص اذا صدك دازتهن الخطيبها وهوايه كلام اني فكري صار يم صخر بيومها مارد عليه ثاني يوم جاوب بس ماطايق نفسه
وفهمت منه علي متفهم الموضوع ومصر على ان الزواج يتم ومتفق وياهم يوگعوه الهكر حسابها
وفعلا سوينالها احلى حنة والعرس هم للزفة احنا وياها بسيارة صخر وعمه شهلة اني وبطة ونوره وريمه ورشا گعدنا حشك وجهال ريمة بحضنا بس حتى مانتفرق صح اتونسنا وفرحنالها
بس بالي يم صخر مبين عليه حيل مزعوج وروحه بخشمه چانت مايضحك الا من يشوف علي وخالته واحسه يجاملهم ومن يبتعدون يرجع النفس وضعه
سألت ريمه ليش هيج ضايج ريمه گالت مابي شي بص تعبان
جاوبتني نوره
..ترى صخر بكل عرس هذا وضعه واكثر يضوج مو علمود وضع اية هو هيج
سكتت وبدل ماارتاح خفت اكثر
من رجعنا راسلته مارد متعوده من اراسله اما يراسلني او يتصل
تركته على راحته اجتنا بطة فرحانه بردود افعال الاقارب عن رشاقتها وشگد شكلها متغير وذكرتها بكلام عمتها ام مهاب وخواته شكد فرحانات بيها وشگد حجلها على ملحة حارث على ابوها يخطبها خطوبة وبس وينتظر الزواج بعد السادس وجانن يسألنها ويجسن نبضها تقبل لو لا وكلنا شفنا فرحتها
سألتها نوره
..موافقه انتِ تنخطبين اربع سنين ع الأقل؟
..اذا ابويه واخواني وافقو اوافق طبعًا
..وامي؟
..شبيها امي مصدگه ابوي يرجعها؟ ابويه قافل عمامي كلهم حاجوه وولد عمه وهو رافض وطلاقها صار رسمي وهي موافقه اصلا عليه
..والله ماادري شگلچ ..المهم اني جوعانه تنزلن ناكل تعاي هاجر اني وياج مااكلنا زين وبطة هسه تسويلها اكله صحية متفيدنا
نزلنا كلنا ولاكانا حمزة واحمد هالثنائي ذوله مايتفارگون ابد واثنينهم جوعانين طلعنا كبة وخلينا قوري چاي ع النار وحميت خبز وصوت عمي ابراهيم من ذاك بيته طلع شويه وعله صوته وصوت صخر صار اعلى اسمعه يتهدد على شخص وابوه گوه يصبر بي طلعو الولد ومناك اخوانه هم
ماادري منو المقصود واليتحلف بي اشهل يطيح حظه ويدفنه هو وشكو واحد يطلع وراه اجه ابالي عرفو الهكر حساب غزالة بس بعد السمعناه وفهمناه طلع عثمان هو المقصود بعد الزفة رايد يرجع رشا ورشا متفقه وياه ترجع بس حتى تعدي زواج اختها ومن صخر وصلنا هي نازلة وياه ورافضه ترجع وهو عباله يم اهلها رايح هناك ومتجاوز بكلامه على عمي سليمان .. گايله انت مصدگ مخلفلك ولد وتردوني اتعامل وي صخر وكأنه ولي امر الهن واني مااعترف بي وصايره هوسه بعد ماجدي وعمي طارديه بس هم لايمين رشا ويگولون السوته غلط وكل هذا مو هو الجاب صخر العمي ابراهيم الجابه شي اكبر عمي عثمان گايل اذا مارجعتلي رشا صخر ماله مره وبت اخوي ماانطيها وهو جاي يحذر عمي ابراهيم يخضع الضغوطاتهم وينطيني الهم او يقبل يساومون بيه والا راح يخرب كلشي واطلع من طوري واسوي اشياء مامتوقعيها
عمي حاول يهديه وكله شحده اليوصل بس اهدأ وبت عمك لاتشجعها ع الطلاگ
راح صخر البيت جده وعمي لحكه ومن رجع حاجه اخوانه حتى عبد صاحه وگلهم قنعولي صخر يتزوج هالأسبوع وبدون مشاكل منريدها اطوول ذوله ولد عمي مو اوادم ظلو تايهين بدون جبير وصارو ملطشة للنسوان وحجيهن
اتوترت واللسل مانمته وصخر ابد مااتصل بيه ولا رد على رسالتي ولا شافها
...
صخر ...
كل مااتقدم خطوه تصيرلي مواقف ترجعني الف
الصار وي غزالة مو هين ابد بلعته بغصة واتغاضيت عنه مجبور اثنينهم يخصوني هي اختي وعلي اخوي بس ماعجبني الصاير بينهم هو صح حلال بس ماهضمت الصور ولا المحادثات والوصلتني بشكل خاص
حاولت قدر الامكان يتممون زواجهم بموعده وبعدها اتصرف رجعت من الزفة وبالي كله يم هذا النذل ومنو وراه صدمتني رشا من نزلت وگالت اني اريد اطلگ اني وامي حاولنا نثنيها عن قرارها حجت شگايل الها امي گالتلها بهاي حقچ واني تمنيته يمي وافلش راسه بكله انسيه بيها حليب امه
هو شفتهم ويهدد رشا بالطلاگ علمود موضوع يخص اختها
اذا مكيده او خطأ منها هي شنو ذنبها هذا الرس والدم النجس شوكت يصفى من الحقارة هاي گمت افور وحاجيت عمي ورغم عمي ماقبل گتله اني وياها وعدها حق عثمان نذل والنذل ماينعاش وياه ابنها تربيه هي ولا يربى على ايده ويطلع نذل مثل ابوه هوايه كلام صار وعمي حاول مايجرحني بس ذكرني الصار وياي مو ضروري ينعاد وي غيري ولازم افصل بين مشكلتي ومشاكلهن
گتله اجيك ونتفاهم وفعلا مريت بأبوي حجيتله الصار وكل ماحاولو يهدوني اعصابي تثور اكثر وهسترني من ربط مصير هاجر بمصيره وكل ظنه يلزمني من ايدي التوجعني
ثاني يوم وبدون اي تردد قررت قرار رغم مرورته الماتنجرع انجبرت اقدم زواجي واسوي نهاية الأسبوع وشيصير خلي يصير وبدون ماابلغ احد الا قبل الحنة بيوم
هاجر ..
وگفت اخذ اخر نظرة النفسي قبل لا اطلع للدوام حاجتني نوره
..يلا هجوره المراية يمعوده ملكان انتِ بس لفة شالي اليوم ممرتاحه الها
وخرت عنها
..تخبلين والله منو بجمالك ياحلوو كل اللفات تلوگلچ
. بس خشمي اووف شوكت اخلص منه ذاك اليوم اجيت اسوي واتحسس صدري ورفض الطبيب يسويها الا بعد العلاج وتالي راحت عليه وانشغلنا
طلعنا احمد خبصنا يدگ هورن
وسألتني نوره
بالي يم حلا مورمه فد مره وكملت شهرها واليوم الها ثالث بالعاشر يمكن... ميسوولها عملية ويفضوها طبيبتها عقدتني ترى المفروض حالتها خاصة يراعوها اكثر
..البارحه حاجيتها شفت عمو يحجي عليها تغير الطبيبة بس تكول انطتني جنص الباجر
قاطعنا احمد
..على شنو تحجون؟ على حلا ..راحت قبل ساعتين وابويه اتصل بعبد اخذو ملابس الطفل هو ومرته ولحگوهم
..لا عليك الله ؟
..اي والله جنتن نايمات متعرفن
نوره گالت ليش بابا ماحچه خطيه حلا منو وياها هسه
فتحت فوني اتصلت بعمي اريد افهم
..هلا عمو شلونك
..هلا يابه هجوره الحمدلله گولي
..سلامتك حبيبي عمو بس اريد اسأل عن حلا
..جابت الحمدلله الولد بالحاضنة شارب مي گالو مااعرف شنو بس زين وضعه مستقر وامه زينه نايمه هسه
..الحمدلله جابت يعني صدقه الالله ..الف مبارك عمو الحمدلله على سلامتهم
اخذته مني نور تباركله سألته منو يمهم گال عبد ومرته وفارس وسراب
احمد هم حاجاه ارتاحينا وخلصنهاها ضحك من احمد گال هسه وضعي ولحيتي هاي مال اخو يجيني اني لو متزوج من وكت ابني اكبر منه
ورجع يضحك ويحشش رن فونه وصوت مرت وسام تبجي هو رابط فونه بالسيارة
..عمي ابراهيم وين جاي اتصل وميجاوب يعني اني شنو ذنبي اعيش بالعوز وقلة القيمة
..ابويه ملتهي حرمته جابت ..خيرچ شناقصكم ليش هالكلام وسام وين ؟
..نايم وسام ولامهتم موسم جديد اجه ماحرك نفسه واشترالهم اعراس اجت كومه من اهلي وعرس عزالة هم ماكلف نفسه واشترالي اني شنو وحد عن هالنساوين اريد افهم ليش محد يحاجيه ينصحه
اتنهد احمد واني ونوره گطعنا النفس ونوره بشفايفها تأشر تاخذها يمنا ويسرا واحمد بقلة صبر حاجاها
..اني طالع هسه ماخذ البنات الدوامهن ومناك اطلع الشغلي هم ..ارجع العصر وتدللين نتفاهم ونسولف بس خاف مثل كل مره انتِ تخلينا بوجه المدفع ونعاركه علمودج وانوب تظلين تنشريله حبچيات وغزل
نوره تأشرله بأبهامها تشجعه واني اضحك على سوالفهم لأن عندي عليها مقدمات
بس نهى الاتصال ونوره صاحت
..صكاك يالعوبة هاي كل مااستفلس يسوولهم تمثيلية على ابوي تريد تطلك من ابوي ينطيهم ويشترولهم شيردون تنشرله ابو بيتي وتاج الراس عوووع وسام ومرته يكرهوني بالزواج ..عبد يرممم وسراب تلون الصوره عن الزواج ويجي وسام ومرته يهدمون ويشخبطون كل جماليه اله
احمد گال اتركونا منهم راح توصلن واول وحده هاجر ونوره بعدج ..هاجر ماحاجيتيلي البنيه
..واحاجيها ليش افتح عين المسكينة يجوز تعجبها وتبني عليك امال وبعدين تجر ظهرك ادمر صديقتي بيدي ترى بنين ماتستاهل
.. واني ناقص اعلقها واجر ظهري شو ماتعرفين تحجين يلا اطلعها من رجلج مااعاتبج انتِ حقي منه ينوخذ
..كلشي ولا اشهل عليك الله ..بس والله حبابه بنونه اخاف عليها
..يولي منين تخافين بربچ جسيلي نبضها وبس.. خاف الها عمام يردوها شي سمعان بالجنوب الأولوية للعمام
..لا حسب ماسمعت عمامها زينين
نوره ظلت تسأل وهو يحجيلها
..ولچ عجبتني ماكو شي بينا والله مجرد اعجاب مني مو اكثر
وصلت واول وحده شفتها بنين ابتسمت لا اراديا من شفتها
شافتني من بعيد گامت تعدل بعباتها ومبتسمه تباوعلي
..اليوم الوجه يضحك مبين اشهلج جابچ
..لا والله ضحكت الشوفتج ..ذاك الواحد مبين مفكر بيچ صدگ مو مجرد نظرات
..ياواحد ولچ بس لا احمدكم ..ولچ انه هذا الأسم يخوفني ابو نسوان وماشاءالله سجل عوائلكم حافل بالنسوان اكثر من غيركم
ضحكت
..اني ماقلقته وگتله اسمك واهلك مصدر قلق الها ومتريد تفكر بيك لا صرت راقية وگتله صديقتي مااريدها تتعلق بيك وتنكسر لأن مامتأكده منك
..كسر گلب عدوج هاجر حتى اني قنعتيني سوده عليه الحلوو ماله نصيب وهو حلوو ابن رزق
..اسم امه تعرفيه ؟
خرطت خدي بالجذب
..يبووو راح اخوي وابن عمي راح ..هسه تسحريه
..يا دخيل ابو فاضل يمه امامي وامام امهاتي اسم الله من السحر ودروبه بس بيني وبينج لزمتلي ختمة دعاء حطيته بيها كون بي خير يصير واذا لا يبعد ويبرد كل طاري بگلبي اله
..فدوه الأسمه ..شلون صارت خاله ام غزوان
..الحمدلله زينه وراح تجيني هي وخالتي ام نبيل
عدهن زياره الابو الجوادين وراح اروحلهن اني منا
ماتجين نشوفج شبيج
..شوكت يجن
..يمكن عشر ايام
..هلا بيهن وان شاءالله اكدر
..ولج المحاضرة راح تبدي احجيلي ابو عيون الشهل شلونه
..زين الحمدلله
سكتت وبالي راح يمه مشغول بقضية رشا وغزالة وتواصلنا كلش قليل صح يحاول يطمني ويضغط على نفسه بهدوءه وياي بس التنهيدات بصوته تشرحلي حاله بدون مااسأل
دخلنا اول محاضره والثانية الثالثة اتصلت بيه غزالة
..هلا بعروستنا الحلوه
..فدوه الگلبچ انتِ الأحلى ..هجوره فدوه لاتعوفين رشا وحدها عليج الله روحيلها سراب جانت يمها البارحه وتتصل بيها من ترجع بس اليوم نشغلت بولادة حلا عينج انتِ عليها ريمة ماتقصر بس مو مثل افكارها مايتوالمن يعني تسمع منها بس ماتقتنع تخليها تروح وتسوي الي ابالها
..حبيبتي غزولة ليظل بالج اروحلها والله ..شلونچ انتِ رجلج
..الحمدلله بخير
..دومچ بخير يارب
كمل الدوام رجعت للبيت تغدينا نواشف عمي ابراهيم يم حلا وحمزة ابيت عمي الجبير واني ونوره وبطه والصغار كلشي ناكل
بعد الغده اتصلت برشا وكتلها العصر اني يمچ
وفعلا حاجيت حمزة يوصلني بعد مااتصلت بعمي ابلغه وراسلت صخر
اتصل بيه صخر
..اهلا بالغايب الحاضر
..هلا هجورة وعيونچ مشغول ومن الدوام لهنا ماشوف دربي ..منو يوصلج الرشا لطلعين وحدج
..حمزة هسه يوصلني
..لا اني جايج اريد احجي وياج بينا هم
..تعال نسولف وبعدها نروح
..تعاي اخذج للبستان نحجي العدنا ونروح الرشا
غيرت اللابسته ولبست عباية كتف ارقى ورتبت نفسي ورشيت العطر الي يحبه وطلعت
غمزتلي بطة
..كل هالجمال وين
..اشهل ماخذني الرشا
..عيني عيني يستاهل اشهلنا الأهتمام
طلعت مبتسمه لگيته بالباب عاقد حواجبه وبرجله يضرب الحجار بعيد مبين يفكر
بضحك حاجيته
..كوووول
ابتسم وهو يلتفت منا ومنا
..ياهلا بهالوجه التسعدني شوفته ..شلونچ ولو اني مقصر وياج صار يومين اعرف بس تعرفين الوضع شنو
..ولايهمك مقدره الوضع اكيد
طلعنا نتمشى للبستان واخذني المكان تهنا بي بين الاشجار رايحه اكثر من مره بس ولا مره داخله هالمكان الاشجار غطتنا بظلها اني صافنة اباوع للمكان وهو ايده بجيوبه وصافن بيه بعيونه نظره تسولف اكثر من اي كلام ممكن يبوحه بدت نظرته تركز اكثر وابتسامته تزيد ابتسمتله اني هم
طلع تليفونه واخذلنا صور لأول مره يتصرف هيج ولأول مره يقرب كل هذا القرب مني
اني اعرف شنو يعني خطيب وخطيبه وشنو جمال الخطوبة غير بهذه المواقف بس مقدرة حالته ووضعه ماانكر واكول مااضوج وانقهر واتمنى اتقربله واريد قربه اكثر بس مااريد احسسه اني مخليه ابالي استوعب حالته مثل مااستوعبني اني ووضعي وحارب الكرامتي ورفع من قدري وشأني وهو ياخذ حقي هو وعمي ابراهيم لو اموت ماانسى فضلهم عليه ولأن احبه هم الي يحب يتحمل كلشي وكل تصرف يفسره بجانب ايجابي اكثر
كل هالافكار تعصف بيه الى ان اجاني عصف مشاعر اقوى جمدلي الدم باطرافي لما حضني بأيد وحده عليه خلاني تحت جناحه وباس راسي ومااعرف التقط صوره بهالوضع لو لا ماجنت مركزة بحركاته بقدر تركيزي بالموقف نفسه
جمدت مو لأن الحركة ممتوقعتها جمدت لأن هذا تقدم بالنسبة العلاقتنا اني حبيت الخطوبة اطوول الهذا السبب يتقبل الزواج ومايترتب عليه الحاله
وصدمني وطير كل فكري من گال
..هجوره اريد احجي وياچ بموضوع اعرف راح يخربط وضعج اني هم مو سهل عليه بس اتخذته الأجلچ مااريد تصيرين ورقة ضغط ووسيلة يستخدمها عثمان الحل مشاكله
اني بالنسبة الي ماارضخ واخذج من بين عيونه بالوقت الي اني وانتِ نقرره ..بس رشا اني غالي عدها وانتِ واعرف اذا ساومها بوضعنا راح تضطر ترجعله وهو مايستاهلها لهذا قررت زواجنا الخميس هذا
صفنت بوجهه
..اليوم ثنين الخميس شنو صخر ..وليش هيج تكول قررت اني وين من قرارك
..انتِ بنص عيني وگلبي مااقرر قرار يضرچ واسويلچ احلى عرس الدنيا كلها تسولف بي لتظنين اختصره بس الأفضل النا نسويه ونخلص من هاي المشاكل الي يقحمونا بيها انتِ بالذات ماكو مشكلة ماخلوج طرف بيها
..بس على كيفك ويايه شلون يومين شسوي بيهن شحضر
..شتحضرين انتِ من اخذج هسه وياي بهذا وضعچ وانتِ عروس تحتاجين تحضير انتِ الي تكدرين عليه والضروري وبعد العرس كلشي بنفسج جيبي وازيد عليه اضعاف والله ادللج واعوضج كلشي بس اريد رضاج هسه
..قبل شويه تكلي قررت وهسه تكول رضاج شو مافهمتك هسه مقرر لو اني شريكة بالقرار
..لا طبعا كل قرار بدون انگعه واشرب ابراهيم مايه
ابتسمت وهو ضحك
..عوف ابراهيم محتار بأبنه الجديد هم عرفت شنو سموه
..خابرته وباركتله امه مسميته عباس
..فدوه عاشت الأسامي الله يحفظه
..ها شگلتي
..القرار صعب والله بس اكيد الي يريحك ويخلصنا من مشاكلهم نمشي بي وفدوه الك كل التحضيرات والطقوص
..فدوه الخشمچ والهالعيون ..يلا نروح الرشا
..اخذلي صور حلوات للذكرى
ظلينا نصور ونضحك ونسولف طلعنا من البستان وبوجهنا صارو ولدنا جاي يشتغلون سلم عليهم وهم ردو السلام عليه وسلمو عليه هم
..شلونج بنت العم ان شاءالله بخير
رديت السلام ومشيت
..اگلك عشيرتنا شنو فلمها بيها شباب ونسوان ينحطون ع الجرح يطيب امثال بنات عمي ابو فارس وخواتك كلهن طيبات بنات عمو سليمان والولد هم واكو كم نفر لاعبات جولة بالعشيرة ولحكهن عثمان انوب
..عادي كل مجتمع متقارب ويعيشون سوه تكثر بي هالامور مثل مااكو ايجابيات الوجود الاقارب الفزعة المساعدة الفرحة سلبياتها هاي مجموعة تمتهن القال والقيل واثارة المشاكل والجدل وابتلائنا هذا شنسوي يعني
..هم فكرت بيوم تبتعد منا انت وعمتي شهلة
..قبل من جنت صغير هسه مااگدر الگاع احبها ومااتخيل اگدر اعيش بره اليوسفية واخواني وولد عمي هم جدي وعمي مستحيل اترك كل هذا واطلع
سكتت من وصلنا البيت عمي سليمان
دگ الباب ومن سمع صوت رشا گالت هلا بصخرنا الاشهل فوت.. دفع الباب وفات بيوتهم هنا بيبانها ناصية الاغلب ينشاف منها الطويل
..هلا روشه شلونج
..بخير بعد اختك انت شلونك
باوستها وسألها
..خالتچ وين ؟
..ياخاله ؟..غير من رجعت من بيتك لگيتها ماكو ابوي طاردها
عگد حاجبه مستغرب عمي ؟
..اي والله متلاغين الظاهر رادت تبخ سمها على الصار بغزالة وهو ماطايق نفسه گايلها لاتبقين هنا اتكفي شري ورجعي البيت اهلج البيت مو تايه اطلعين وترجعين وجن كلشي مامسويه ..بس سمعت مارايحه البيت اخوانها متعاركات وياها نسوان اخوتها رايحه يم مرت عاصم گاعده
..خوش لمة ..عمي يدري بيها يم مرت عاصم؟
..لا وماگتله لأن راح تصعد غيرته ويجيبها واخاف بساعة اكتلها كتل موت
..على كيفچ وي روحچ رشا ..ماتسوى يرحلج فدوه لاتحرگين اعصابچ ..انتِ حتى وي عمي مختلفه احس هاليومين مو؟
..اي لأن غزالة راحت مكسور خاطرها ماهون عليها الصار زعل هو الحاله هم ادري بي زعلان لأن ماسمعت منه محذرنا من التهكير والصور بس هي هم خطيه شمعرفها شراح يصير
..عمي تعبان رشاوي على كيفج وياه ترى ماساكت وكلنا راح نكلع حقها بذيج الساعة اخذي موقف عود عينچ عليه واحجيلي قرارج الأخير شنو وي عثمان
..والله لو يموت ويحفى ماارجعله عثمان خلاني بموقف مااتمناه العدوي صخر اني مااستاهل هيج معاملة ولا هيج انسان
اني قويه والله مو بس انتم تكلولي اعرف بروحي قويه وهو جبان والجبان مااتحمل عيشته الا ادفن عمري كله وياه واظل بخوف من كل تصرف مني ومن الحواليه خاف ينسجله فلم عليه ويعيش بطولاته براسي
..اني وياج القرار مو سهل بس هو مايستاهلچ
..انت ياريت كلها مثلك اني عندي اخو مثلك واحسب للمثله حساب ؟
..گليلي هسه تعوفين كل مشاكلج وتحضرين العرس اخوج الخميس
..ياخميس؟
..الخميس الجاي
..شبسرعة صخر وين نلحگ نحضر
..تلحگن ع السريع
..عليك الله خو ما من وراي سرعته ..ابد لاتتأثر مستحيل اصير سبب بأذيتكم
..هسه العرس وين بي اذية بالعكس هالككو هذا يصير يمي
ضحكت على صوت ضحكتها وعيني على ابتسامته التاخذ روحي
سألته هي
..وهاجر موافقه ؟
..سأليها ..راح اخليها يمج وامر على عمار اشوف وين وصل بالقضية
..الله عليك بشرني اذا وصلتوله
..صار ..يلا اني اروح
صحته
اوگفلي اني اجيت بالي يم رشا وشفتها زينه الحمدلله وانت صدمتني بالطلب خل ارجع الحك استوعب اتحضر
ضحك هو ورشا تگله مبين مقتنعة وماصادمها ضحك هو واني كتلها لا لا ماجبرني والله سأل ووافقت بس مرتبكة
..حقج حبيبتي روحي واني اجيج ومن باجر نجهز وياج وتدللين شكم مرت اخو عدنا هو اشهلنا واحد
اني ورشا نسولف منطلقين وعينه تباوع النا بفرح
رجعني للبيت من الباب صحت
..تعالن ولچن اتلاحگني
فززن وبطة صاحت
..اسم الله شبيچ ولچ
..صخر قرر عرسنا الخميس الجاي
نوره وبطه اثنينهن صاحن
..جذب
..لاصدگ والله ويلا عاملني معاملة عروسه من هسه يلا حبابات
بعدني اسولف ولمحت عمي طلع من الحمام عززه بعيني سمعني شگد عيب بيدي اشرتلهن اسبهن بسكته وهنه ضحكن
والحمدلله عمي ماحسسني ابد ان هو سمع شي راد يبدل ويرجع الحلا باجر تطلع وهو سراب يباتون يمها
عبد ومرته هم راجعين وياه
صعدت ويايه نوره تسأل
..لچ شنو هالقرار السريع عززه الكوري الاول راسبه اني بأكثر من مادة لامحاله غزالة احسن مني مداومه واني من زواجها اليوم يلا قررت اقرا واجيتيني انتِ بهالقرار بعد جيبي الواهس الي يخليني الزملي ماده اقراها
..ولج يا مادة اني حايره شجهز هسه
..دشوفي فرحة ابوي هسه قبل ساعة حاجه خمزة واحمد ع اساس هو وياهم حاجون صخر يقبل بالزواج ع الاسبوع الجاي طلع صخر مستعجل اكثر منه
..ماانزل اني اليوم
ضحكن عليه وهو صاحني
نزلت بالگوه مااريد اشوفه خجلانه
شفته مبدل ويريد ينزل صاحني باسني وهو يعتذر عن القرار السريع ويگلي اعوضج اني عن كل تقصير يصير بالتجهيز والكم سفرة عليه ماعرفت شرد بس شكرته بصوت ناصي اتصل بصخر وطلع يكمل كلامهم بره ووصانا نبات هناك بالبيت الجبير
بليلتلها كوه نمت وماداومت هو اخذلي اجازة والبنات بلغتهن اتمنيتهن يحضرن الزواج بس اعرف صعبه عليهن عوائلهن محافظة مثلنا ماعدهم هيج طالبه وتروح العرس لو بقاعة ممكن بس ببيوتنا ومزارعنا صعبة عليهن
من اول مافتحت عيني لگيت سراب جايه وياها مآرب ورشا ابويه مكلفهن يرحن وياي
مدري شنو من شعور اجاني اتمنيت امي وياي والدمعة صارت بطرف عيني بس اني من اخر كلام بيني وبينها رجعت حظرتها من كل البرامج وظل تواصلها وي عمامي وبس حتى عمي ابراهيم قطعت كل تواصل وياه واعتبرته سبب بتغييري حسب كلامها
بالباب لاگتنا عمه شهله بدعائها وفرحتها الماتنضم غيرتلي واهسي
والبنات بسوالفهن وضحكهن ماينطن مجال للتفكير ونسني ونسه ولاصايره وياهن
احمد ابتلى بينا وكلساع افكر بكلامه واتمنيت بنين فعلا تصير اله
اني مكياج عندي وقليل نواقص اخذتها المكياج اليجي البشرتي ماالگه منه الا ماركات وغالي مو مثل باقي المكياج الي يوالم غير بشرتي متوفر بكثره لهذا بديت بي وملابس هم للطلعة عندي هوايه واشتريت شغلات قليلة بس ملابس بيت اخذت وشغلات عروس والذهب هم
ويومين مرن عليه بسرعة عجيبة واليوم اني اجهز الحنتي مكيجت نفسي لأن مااثق بغيري يضبط مكياجي ولبست فستان احمر قاتم چنت متخوفه منه بس النتيجة وي المكياج طلع يجنن مثل مااريد واكثر
البارحه بالليل عمي اتصل بعمامه والاقارب وعزمهم ومن ضمنهم عمامي وصخر نشر دعوه عامه هم واليوم سوو عشه وبعد ماتخلص حنتي تبدي حفلتهم وبعدها عشه الهم والعرس غده وزفة
اتوترت حيل من صار وقت النزول ولازم انزل
للنسوان الجوه
نزلت والهلاهل علت والجكليت انكش بكثره
الدنيا مگلوبه وكلها حاضره شي اعرفهن وشي لا
فرحة البنات ورگصهن وعمه شهله وخواتها الماگعدن ابد يهوسن فرحانات خلني انسى شعور الوحده وياهن اني مو وحيده كلهن وياي وفرحانات الي مثل مافرحانات اله
خاص نوره وبطة مافارگني بيومها
گعدت بينهن اشكال صار همس شي يعيب عليه سماري ومن نظراتهن وتأشيرهن واضح وشي بصوت عالي يحاجني مبهورات بملامحي وشلون انجمعن هالسمار المميز وي باقي تفاصيل شكلي
وصار لازم يفوت هو وعكسهم من يحنون بدشاديشهم لأن يطلعون للچوبي هو فات بقاط هذه اللحظات السرقتني من الكل الحواليه العالمه جنت افكر بي هو فعلا مرتاح مثل مااشوفه لو يخفي قهره لأن من البنات عرفت هم عارفين الوره المشكلة الصارت ومنتظرين العرس يخلص ويعلنون كلشي لأن موهمينهم السالفه ماتت بزواجها
لمحني شلون مركزه بي قرب عليه اكثر مبتسم وعيونه تلمع
..شطالعه دارك جوكليت من هذا الي يموع موع
ابتسمت نزلت عيوني خجلانه اخذ ايدي حناها وبعاداتهم يخلي فلوس ويلفها وطلع
بالليل اتصل بيه احس بداخله كلام يريد يحجي ويتردد بس هوايه اتغزل بيه
ثاني يوم العرس مر اليوم ركضة بركضة ونفس الشي التسريحة بسيطة سويتها والمكياج اني اتكفلته والبدلة چانت تجنن موديل راقي ومستور ومبين تفاصيل جسمي ورشاقتي بفصال مميز كلش اختاريتها گصة السمچة سمنها البنات
وصار وقت الزفة واخذوني من بيت عمي البيته
الغرفة مااعرف شوكت لحك ينصبها هو واخوانه والولد ماعافوه ابد
كلشي چان تمام الحد الزفة وصار لازم يدخل عليه جنت ارجف ومتوتره حيل وادعية امه تهديني وخالاته مبينات كلش طيبات هم
صارت هوسه بره اكو كلام وهوسه سألت گالو رشا متعاركه وي عثمان ومصره ع الطلاق وعمامي محاولين يقنعوها ورافضه وهالمره حتى ابوها رافض رجعتها
صار الوضع هدوء وكلها راحت ودخل هو ابتسم من شافني قرب عليه اخذ كف ايدي باسه وگال اخذي راحتج بدلي اجهز الأكل واجيبه
گمت ابدل لبست روبي الابيض وانتظرته يجي جاب الأكل واجه وعمتي اختفى صوتها عبالي طالعه وي البقية واستحيت اسأل ظل يفتح ويايه مواضيع خفيفه ويضحك
سوالي لفات كوه اكلت لفة وحده متوتره ومبين عليه راد اكل اكثر ماكدرت وهو هم مااكل اصلا
گمت اغسل من شال الصينية شفت عمتي بغرفتها تصلي وتدعي
رجعنا الغرفتنا
اتفاجأت من گال
..تعبانه انتِ كلشي صار بسرعة نامي ارتاحي
حجاها وطلع ظليت الف فكره ابالي مااعرف متوقعه لو مصدومه ماجاي اجمع بس حسيته متهرب بحركته هاي هدأت روحي وعذرته باوعت من الشباك شفته يدخن بالحديقة وهاي اول مره اشوفه يدخن!
اجاه اتصال اتحرك وجاوب وظل يحجي ويفتر متوتر حيل فزيت على صوت عمتي وهي تحاجيني ودموعها بطرف عينها
..هجوره عمه لاتضوجين يحبچ والله بس البي مو شويه خلي ياخذ عليچ ويتعود وكلشي يصير تمام
يتبع...