بقلم نور الشمس
...
رشا..
نهيت الاتصال بعمتي شهلة اضحك تكول سويدات عمج طفرت عليچ
رحت اشوف ابني نومته وكل شويه فاز وخاف يبجي ومااسمعه نومته يم غزولة لأن هدوء غرفتها
اتصلت بيه سراب
جاوبت واني مبتسمه حسيت سامعه شي عن الصار
وبأول كلمة گالت
..ها ولچ رشا سويتيها صدگ وديتي المره الأهلها من الصبح
..مرمره على گلبهن امهات قال وقيل شبسرعة طشنها شعليه اني ووديت ابوي وداها
..هههههه من الصبح حديث الخوات وبنات العم انتِ وعداوتج الخالتج والموضوع بين مؤيد الخطواتج وبين معارض والوضع لووز
...خل يشيلن ذنوبي من الصبح ..هو اني غير من ريمه دريت حتى ماادري ابوي ماخذها الاهلها
..مو بس هيج جدي لاعب بيها لعب وهو كايله دزها حسب ماسمعت انتِ ساحرته الجدوو بعصيرج مال البارحه ..احجيلي وين مشتغله اعمالج
..يمه اسم الله عليه مخليتها على الله لا اعمال ولا مكر ..نويت وهو سهل
ضحكت على ضحكتها انتهت من الضحك
..سراب لازم فارس مو يمج واعترفتي بمشاكل العائلة واتنزلتيلها وناقشتي
..اي والله لو يمي انشغل بعيونه وسماره فدوه لعيونه الحلوات
..الله يسعدكم ..يستاهل الخلوق فارس وانتِ بعد الله يحفظه الچ
..حبيبتي رشاوي الله يسلمچ ويحفظج ..يلا راح اجهز نفسي العرس عمي بس خاف انوب يعجبه الموضوع ويصير نفس ابويه
.. هههه الف عافيه خل يتزوج براحته منو من عدنا تعترض
نهيت الاتصال وصرت افتر بالبيت اريدلي شي نقص اسويه ماكو واجاني نشاط غريب مااجذب فرحت لأن خالتي اذتني هوايه وخاص بكلامها الاخير بسببها صار شرخ بيني وبين عثمان يمكن مراح انساه ابد بطبعي مو من النوع الي يعبر كلام ومايهتم احب شنطي اخذ واني كلش محترمته ومااحترمني هو
رحت اخذ ملابس جدو اغسلهن كل ظني نايم من ارد اطلع صاحني
..تعاي جدو رشا
اشرلي اروح اكعد يمه جنت خايفه من الرزايل مالي خلگ انغث بس صار العكس
..تعاي ابوسج جدو انتن بنات سليمان بمعزة روحي عندي وبالذات انتِ صح من صغرج حركة والسان بس گلبج ماكو احن منه ..كبرتي بعيني من دريت الصار وياج وسكتي وماسويتي مشكلة الخاطر ابوج وخاطري
كال ابوج بطريقتي خليتها تفهمني الصاير
وحجي خالتجن مايرضيني ابد اول شي اني وسليمان مانربي عوج وانتِ وصخر تربيتنا وحشاج من الاتهام الكالته ماينكال الا للموزينات حشاچ اني گتله وديها الأهلها بدون ماتحجي واتعب نفسك خل تتأدب
..جدو هاي مو اول مره تختلق مشاكل وكل مره تستعطفك وتوگفلها
..المشاكل تصير ياجدو بكل بيت بس من توصل للأعراض لا هاي مو مشاكل هاي انسلاخ من قيمنا وتقاليدنا وادبنا واتهام مو الكم اولادنا وبس يمسني ويمسها ويمس ابوجن الماخلتله احترام وصخر هذا من خيرة اولادي من الاحفاد والكلام لو عن احفادي غيره هم مااقبل عليه والبنية بت عاصم دمنا ولحمنا وشرفنا هم يعني الصار ماينقاس بمشاكل بسيطة
سكتت واحاول اشجع نفسي واحجي
اتحديت روحي وحجيت
..بس ياجدو اني احس بذنب بابا بسببنا انظلم وحتى انت شريكنا
جدو گاعد على سريره وايده ع عوجيته قبضها حيل بيده جنه يتحضر يريد يكوم عيونه صارت بعيوني خازرها وبصدمه سأل
..شريك بشنو
..بابا من اتزوج خياراته جانت افضل لو مااحنا رادلنا خالتنا على اساس احن وانت ردتله بنت اخوك لأن ماتخلف رغم هو يحتاج ولد واحنا بنفسنا اخ
يعني ماجان مضطر قبل بس بعد وفاة امي الله يرحمها جان يكدر يفكر بخلفه بس احنا بسببنا انجبر بيها وياريت لو فاهمته ومريحته ماانقهر ولا افكر
خله ايد فوك ايد ع العوجية وباوعلي
..ابوج لو رايد زواج واباله خلفه والله مااجبره عليها بس جان رافض يفكر بالموضوع اصلا وشفتها فرصة تراعيجن وهو مكتفي بيجن وبابن اخوه
..وشفتها راعتنا ؟
نزل راسه وگال
..لا انتن انسجمتن وياها واتقبلتن منها ولا هي صبرت وسايرتجن بمحنة ترى الخالة مثل گلب الأم بس هي الله يسلمها ماتتفاهم ودومها شادة الراس ومعصبه وانتن واگفاتلها ع الكلمة
..حتى وي ابويه ماگدرت تنسجم مو بس ويانا
..ابوجن صبور ريت كلها مثله الله يعوضه بيجن ان شاءالله
كلت هي عالكه عالكه خل احجيها واخلص
..جدو ليش متفكر تزوجه؟ ترى بعده ابويه مو شايب
باوعلي بنظرة عجزت افسرها وسأل
..هو رايد؟
..لا اني اريدك تقنعه احنا صح بناته وحنينات عليه وهو ماقصر ويانا وماممكن نقصر وياه بس بنفسي اله ولد يشيل اسمه ولو سعيد بزواجه وبينه وبين خالتي تفاهم والله ماادخل ولا يهمني الولد
سكت ماحجه شي واني گمت على صوت ابني گعد
العصر اجه ابويه سأل حاجيته شنو حاجين عني الريمه بيبي وخوالي
گال
..يعرفونها كلش زين ومايتحملوها لأن بكلشي تدخل ومالين منها لهذا لاتهتمين اكثر ناس يعرفون طينتها هم.. خل يحجون
ومرت اسبوعين عثمان كل مايتصل عليه برقم غير رقمه انطيه حظر وهو من فشلته ماوصل بيت ابويه
صخر من عرف گال مع الأسف احترمته الخاطرج فتره
ليش هيج يندفع ورغم زعلي ماحبيت انطي بي كتله اني كبرتها ارد اتوبه لأن سمع من مرت ابويه وخفت تدخل بأمور ومواضيع اكبر
وبعد مااخذتنا السوالف رجع سأل
..خو ماضايجه روشه ..يرحولج فدوه لاتهتمين اني حجيهم مااهتمله ابد
..لا والله مرتاحه الحمدلله
خليته يم جدو يحجون بينهم وجدو ظال باله يمه يگله لاتأخر زواجك وهو يكله بعدني مامستعد.. بيها مجال تأخير شويه هي هم تدرس هسه
بالليل قبل نومي رن فوني رقم بيبيتي ام امي جاوبت ومخليه ابالي استوعب حجيها وعتابها
من الصوت عرفتها خالتي
..ها رشا مرتاحه عبالج تهجمين بيتي وتخلين ابوج يهيني ويشمرني على اهلي ويطلعني كلي عيوب يمهم ..و اخليج ترتاحين وحق الله اطلگج انتِ وذيج الخوينسه غزيله مااخليجن ترتاحن
..شتسوين يعني ؟رجال ويمشي وره حجيج مامأسوف عليه لا ادوخيني ولا ادوخين الترديه شنو من الاخير
..اريد اعرف كرهجن الي شنو معناه مو خالتجن اني ليش متخافن الله
..ماخفتي الله انتِ من تتهمينا بسوالف مالها كل صحة
..خليجن هيج اذا ماهجمت الدنيا على روسجن بسيطة وابوجن بشنو مان عليه مو زين متحملته لو بي خير مو بهالعمر والرتبه الوصلها ويبجيله على مره الهسه لو مااختي اني اسكت اعبرها ترى محد تتحمله غيري
شايفني عارفني هو ؟
..انتِ ماتعرفين تكسبيه بعدين اني شعليه بالبينكم شفتيني يوم ادخلت لا
بس مادام عرفتيلج ابن عم وادخلتي بمشاكل بينا اني ورجلي اني هم الواعدتچ بي اسعاله وانفذه ان شاءالله
نهيت الاتصال وحظرتها مرات المواقف والخبث والظلم يسوي القريب الك عدو ومتكدر تجامله ولو شويه ماادري اني هم حقوده والله حتى بروحي حرت من الصار
....
صخر...
گعدت وحدي بعد الخطوبة وعقدنا الرسمي امام الله وبأشهار للناس وبعد ماراحو كل الأحباب الشاركونا الفرحة .
واني اراجع نفسي وافكر بجدية هالقرار ..گلبي چان مليان ومشرق بيها واحساسي وياها مختلف حبيتها بصدق... أشتاق الصوتها.. واطمئن لوجودها أكثر من أي شخص ثاني...
بس كلما ارجع وافكر اقترب موعد الزواج . مية صراع يشتغل داخلي..
جزء مني يركض الها والذاك اليوم بكل لهفة..
اريد أبني وياها بيت هادئ ..أشاركها أيامي وأحلامي وكل تفاصيلي...
وجزء باقي أسير ذكرى قديمة تركت أثر عميق بنفسي ..
مشهد مزعج شفته بيوم مايتجاوز الدقايق دمرني سنين وأيام طويلة سلب حتى النوم من عيوني
بعقلي ربطت الزواج بالألم ..والخوف.. والاختناق، الحد ما كبرت واني اشرد من الفكرة كلما حسيتها قريبة مني
ومن ارجع اتخيل وجهها گبالي أشعر بالسكينة.. ومن افكر بكلمة "زوجة" يرجعلي الأضطراب القديم يطرق أبواب روحي وابعده .
وكأن گلبي يعيش زمن.. وعقلي عالق بزمن ثاني وجرح ماشفيت منه بعد ..
ما چنت خايف منها.. بس خايف من الصورة المشوهة الي سكنت داخلي السنوات طويلة.
احس بروحي واگف بين حقيقة اشوفها بعيني تاخذني الأمرين
بنت أحبها وأثق بها.. وصوت مخفي يحمل رسائل مملوؤة بخوف قديم الهسه يحاول إقناعي بأن السعادة القادمة مجرد وهم...
وبكل ليلة قبلها چنت اخوض معركة صامتة..
محد يسمعها غيري .. معركة بين ماضي يجرني للخلف..
ومستقبل تزينه هي بابتسامتها الحلوة التسحر روحي وتخليني طاير بيها
وبين هالصراعين واگف على اكتافي حمل من التعب والهم اقاوم وبديت اتعب وامل من المقاومة
بس للمرة الأولى بطلت اشرد من هذا التفكير وبديت اتقبلها واعترف هي أول إنسانة گدرت تغير بحياتي وروحي ولو قليل وكلش كافي تبهج الروح شوفتها
بديت اشعر ان الحب احيانًا يكون أقوى من الخوف، وأن بعض الجروح لا تشفى بالهروب منها..بل بالسير نحو النور رغم ارتجاف القلب.
گمت من مكاني اشوف امي احس بيها رغم فرحتها بداخلها خوف عليه مثل خوفي واكثر
لگيتها تصلي گعدت يمها شويه وكملت وبجادر صلاها وهي على مصلاها اشرتلي
وبكل لحظات تعبي انسى كبري وارجع ذاك الطفل اليهوى حضنها
اتمددت وخليت راسي بحضنها الحضن الي انحرمت منه فتره طويلة من ذاك اليوم الحد ماكدرت اتجاوز الشفته واعزله بفكري واقتنع هي فعلا ضحية چانت وغلط اشملها بالعقاب وابقى مبتعد
ماتعبت وياها من رجعت جانت اكثر مني متلهفه وبگلب حنين اتجاوزت وياي حتى مرحلة العتاب..
..دعيتيلي يمه
..كل دعائي الك يابعد امك وروحها ..اليوم اني الگاع ما ماخذتني ..والدنيا هذه ماسايعتني فرحتي بيك ماتنوصف الله يتمم عليك بفرح واشوفكم احلى اثنين واولادكم بحضانكم وراها شيصير بهالدنيا احيا اموت مااهتم
..فدوه اروحلچ شهلة الحنونة ..هو اني بدون دعائج شگدر اسوي تعيشين وتدعيلي واعوضج ايام تعبچ وحزنج بكلشي يفرحج
..امين يارب فرحتك هي عوضي بهالدنيا
خلت ايدها براسي تحرك شعري بخفة وسألت بصوت متردد ومتوجس
..عرسك قريب يمه؟ لااطولها اگفضها وريح راسك وهي بينا وبحضنك محد يگدر بحجي البنيه هم مامرتاحه بالبيوت
گعدت الحيلي فركت وجهي
..هو عيب لو عادي اگلج بعدني خايف واني صاير نصين نص متلهف للعرس ونص متردد
..انت عاقل وليدي مايحتاج اوصيك بس خليني احجيلك ..البنية يايمه يتيمة وشافت ويل من هالدنيا وهي بأول شبابها ماناقصها بعد قهر ..لاتخليها تحس بخوف وياك ..الخوف بالزواج ماينراد بيك وماتأمنها وبنت الاصول تعذر واني احسها مأصلة مثلك وازيد
على كلام امي واخذتني افكاري الصورتها بعد العقد لوحة فنية متكاملة ابتسمت واني اتذكر بسمتها ورغم ماكدرت اكسر الحاجز اكثر واخذها الحضني بعمق اللهفة الي بداخلي واكتفيت بلمسة بسيطة عبرت بيها بدواخلي
اتنفست بعمق وحاجيت امي باعد اصل الموضوع
..شفتيها شلون حلوه ؟ترى بيها شي يسحر سحبني من اسفل قاع بروحي المنطقة امان عرفت اكدر اميز بيها شنو يعني الأنسان يحب ويشوف محبوبه بغير منظار وكأن اشوفها بعيون ثانية هذا الحب الچنت اقرا عنه ..بالاضافة الجاذبيتها وشخصيتها وصلتني لهنا واني اليوم بفضلها جاي اتقدم
..هي سبحان الخلق ملامحها وابدع وانطاها هالمحبة دمها يلعب وصارت بمعزتك عندي
..بمعزتي والله ؟
ضحكت من گالت
..عن حلفة الله شويه اقل ..انت اعز من روحي انت تختلف مو بس ولد انت ام وابو واخو وصديق واهلي كلهم انت
..شهلة المزيونة ام السان معسول امووت بيچ اني شعندي غيرچ دنيتي كلها انتِ
..مو بحلاة السانك ورسمك ..خل نرجع السالفتنا
..ياسالفه منهن
..مرتك وحلاها عين الله عليها ..گبل اگول اخذله وحده هيج ووحده هيج ومواصفات ابالي لو كبرت ومن كبرت وايستني گمت اگول بس خل يرضا وخل ياخذ حجاره والها عيون راضيه وكل دعائي يارب اهديه وريح باله وي كل من تميل الها نفسه لو بت عدوي وبشكل دمدمه هم اقبل
ضحكت بصوت عالي
..دمدمه شنو
..هيج گبل امي تگول الطين ندمدمه ونحضره للتنانير يعني لاهو عجن صح لا شكل صح لاهو كوره لاهو مستطيل ادمدم
..زين ليش هيچ راضيتلي چن اني انسطرت وماحسيت غير امي تنبهيني
..يا ولك انه اريدك بس تزوج وتفكر بزواج انوب الله ماگصر انطاك لعابة سمره
.. غير يكولون خير الأمور اوسطها اني عندي خير الأمور اسمرها ..هي سمره لو تاخذ الروح
وبفرحه شهگت مامصدگه يطلع مني هالكلام
..يمماا فدوه الروحك وللأخذها
..اليوم ابراهيم خوش مستغل فرص هم حاجاج لو بس سلام
..المسودن هو يعرف يسولف سالفة بيها خير
..هههههههه ابراهيم مايعرف يسولف يمه؟ متأكده!
لو السنين نستج ايام الدراسة وامثاله وشلون علمچ
..هو انت هم مسودن مثله الله بلاني بيكم شذكرك بهالسوالف انوب اني مامخليه سالفه ماحاجيتها الك الحمدلله والشكر على مابلاني
..ليش ضايجه مني لو منه .. ترى والله مابالي نهائيًا من فات عقلي جان مو براسي بعد مااخليه يوصلچ
سكتت ومثل عادتها من تريد تسولف وتشغل نظرها عني حتى لاتتأثر بملامحي وتتردد بالكلام
..انت يايمه اذا تريد تبدي بداية جديدة والله يوفقك بيها ..تتعامل وي ابوك كأب مو عدو لو ند
بانفعال رديت
..ها اتعامل وياه أب طبيعي وانتِ تعامليه كزوج حقيقي وعفا الله عما سلف
..لا اني احجي وياك انت مااريد تصير عاق وتظل كل هالسنين وتخلف وولدك يشوفون تعاملك وي ابوك يعكسوه عليك ..
لا تحجي خليني اكمل صح انت من صغرك تعتبر عمك سليمان هو ابوك وتعامله معاملة اب حقيقي بود ومحبة واحترام وصح هو يستاهل ويستاهل اكثر لأن سوه شي مامفروض عليه
بس يبقى كدام الله ابوك ابراهيم ..قصر بحقك ربك يحاسبه تتحاسب وياه ليش يابعد امك ليش
والله يومية ادعي الله يمسح على گلبك ويرضا عليك بگد رضاي ويهديك الكل صالح
ابوك انه مااريده لأن مو عادل ..ولأن مو امين مايتأمن الما أمني بخوفي وجار عليه بعز قهري مااريده بالنفاه اني نفسي رافضته لاتخلي روحك بالواجهه وجنك انت المانع وتشيل ذنب مو ذنبك
اني الارفضه من ذاتي
..هسه لو مااعرفج اكول حنت من شافته وحاجتني هيج
..حنيت مو ماحنيت بس حنيني لأبراهيم ابو السنة ونص العشتهن وياه يغنن عن عمر كامل بعدها ابراهيم كتل روحه بعيني 12سنة نهت كلشي وشره جان يغطي خيره اضعاف
والهسه تصدك لو كتلك مااكرهه بس مااريده ابد ولو بيدي السنين وترجع عمت عيني اذا صديتله وعمت عيني اذا وافقت عليه لو اظل بالشارع انام ولا بيته الذلني بي سنين گبل لايعرف الصارلي مو جذبه مني جان كل همه شلون اني جذبت عليه وقشمرته
اتقربت بستها براسها
..اليرضيج شنو انتِ
..ارضي ربك بتعاملك وياه ..وفرحني بزواجك وبعد كلشي يهون
..اني هم مو بيدي ..كل مايتعامل وياي زين اذكر تفرقته بيني وبين وسام والبنات وحتى ولد عمي جان يعززهم كدامي واني انهان..اتذكر الايام الردته بيها يحضني مره وحده وماحصلت الحضن ..اتذكر مشاكله هو وعمي وبالاجبار يلا سجلني بأسمه هذا زرعه يمه اني مو متعافي
..ميخالف يمه غلط وغلطه جبير بس صحح صار سنين يصحح ومتحملك واني ادري بي مايتحمل شعره من غيرك لو عاملوه وحاجوه مثلك مايتحمل بس يدري بروحه هو سبب ..والله سبحانه يكول خير الخطائين التوابين
..هو تايب هسه ..بربچ اني توني عرفت مرته تريد تجيب يخلف بهذا العمر مافكر ابنه شلون ممكن يتعامل وياه شلون يراعيه بهالعمر
..انوب حتى بعاي نعترض الله التفت المرته ورزقها بعد حرمان سنين وهو يدبر امرنا وامره
وليدي شباب وجاي تموت وتترك ايتام صغار تصير وتكبر وراهم ..وشياب يعيشون عمرين ويربون اولاد اولادهم .. بعدين ابوك مو شايب وعمره بيد ربه لاتعترض على حكمته .
..والله سالفه واگفه جد واب بنفس الوكت
..چا شوف رشيوه ماخذه سويده من عمها تريد تعرس الابوها وتخطب خالتك ام كرار
..والله عمي يستاهل ليش لا ..مرته بوجهه مأتم وولد يحتاج ابراهيم عنده فايض ماينقاس بي ..والاهم اختيار رشا عجبني ..رنا بعدهي جديدة ماماشيه هواي بس عمي شيقنعه
..شوف سوالفك اني انلام من اگلك مسودن عليه يمه لاتزعل بس وابو فاضل انت عليه هيج يطگن براسه مثل طگاتك انت ورشا
..هههههههه هو اني احب بس سويدته منه وواهسه للطرب
گمت منها مترخص وابالي يدور حجيها
اني اعرف الاسويه عقوق بس من قهري شسوي يعني مااكدر اتعامل وياه طبيعي وحيل اتونس بمغثته
نمت بعد هواي محطات من التفكير وكل محطه يتراوالي بيها ضحكتها وخجلها من شفتها وبست ابهامي الحركته بشفايفها گعدت من وكت حاجيت امي نزور واتصلت بابوي من الصبح
..صباح الخير ابراهيم
..هلا بأشهل گول
..اريد مرتي نزور اني وياها
..منيلك مره عدنا
..مو مره مخليلي لعابة يمك اني وهسه اريدها
..لا ياناقص شو ماتخجل انت
..منين اخجل؟
..اي صدك قابل انت شايفني اب حتى اخجلك ع الاقل شوفني اب الها واكسر عينك
..من اليوم اني ابوها انت اطلع من الحمرة
..امشي لك روح حبيبي زور عنك وعنها بنتنا ماتزور الزيارات الك
..الي والها وظل انت هنا لو الله هدانا واتذكرناك ندعيلك
..انت تدعيلي الا معجزة هاي
..هسه انت واگف على دعائي 13نفر غيري من ولدك يدعولك وجايك جديد بالطريق هم ماشاءالله توني دريت ادک الخشب على صحتك ابو البراهم
..طاح حظك خوش تلمح ..الله يبارك بيك ماتحسد انت ماينخاف منك كلشي لا ادگ لاخشب ولا حديد
..هسه مرتي وين اريدها واذا عارضت وعشتلي دور الأب اخذها وبعد ماانطيها ومااخليك تشوفها هم
..واني هذا الاريده اخذها بابا لااطولها اخذها هسه زور وعرسك هم لاتأخره وعليه تكاليفه
..لا لا لا ..عليك شنو عوف هالسالفه وخلينا حبايب
..وتالي اشهل وتاااالي مو اني تعبت والله تعبت واني اعجز شلون ارضيك وانسيك
..ترضيني بشنو اني مو زعلان يابه ..وتنسيني ماانسى والله لو اكو طريقة انسى بيها اشتريه شرايه النسيان اني مامتونس بيهن اني اريد انساها ذيج السنين ع العموم لايظل بالك اني مامحتاج ان شاءالله
..اتصل عليها وگلها بلغت ابويه خاف تستحي تحجي ويايه ..صخر بابا امانة عندك هاجر اني مراهن نفسي عليك لاتاخذها بذنبنا اني وابوها والناس هي مالها ذنب بالشفته قبل واني اعرف غيرتك شنو بس احجي حتى اطمئني وارتاح
..لايظل بالك لو مااحبها مااخطي واحمل نفسي ذنبها
اتصلت بيها جاوبتني تضحك
..وهذا احلى صباح
..كل ايامي وصباحاتي وامسياتي وياج حلوه أكيد وايامج وياي احلى ان شاءالله
..خجلتني والله مااعرف هسه ارد ..اليوم نزور لو عندك شغل
..لا نزور اكيد اتحضري ماعدنا شي منتظريج اني وأمي وياي حتى عمامج ماتصيرلهم فرصة للحجي
راحت تجهز شويه وطلعت صحت امي وفتحتلها الباب وعيني تجول بتفاصيلها اكثر من كل مره وماخذ راحتي للآخر
سلمت على امي تباوسها ودي اخذها الحضني هيج وماتوگف نفسي صد
وبأول ماحركنا وعيني عليها من المراية باوعتلي بنظرة سلبت بيها روحي
حچيت مسمعها
..شلون احنا بالسمران
..وشبينا عيني
..حلوين من الله
ابتسمت والتهت بتليفونها
شويه واجتني رسالة منها
..چا انه شگول شايف عيونك شلون حلوات ويلمعن بالشمس
ابتسمت باوعتلها ماخلت عينها بعيني اتهربت
وصلنا الزيارة وهناك وفينا نذرنا وطلبت الأصعب عليه يسهله ربي ..ورجعنا وثاني يوم ارد اخذها للدوام من الصبح اتصل بيه ابوي واني توني مكمل الخبز وجاي المه وارد اتريك المخلمة بعدهي ع النار طفيتها وجاوبته
..متريگ ابو البراهم ادزلك ريوك
..الي لو المرتك ولك
..لا مرتي اريگها اني هاي للنسيب ابراهيم وتدلل
..دعوفك من سوالف المغثة من الصبح عندي وياك موضوع اتمنى تتفهمني بي
..ياساتر بي فهم وامنيات ومنك يعني اكو خطورة بالموضوع
..هاجر خلي احمد هو يوصلها هالفتره الحد زواجك
..ها يا الله شنو ابالك من مخطط بعد تريدني اكلك يلا نزف
..لا وداعتك مو هذه غايتي ..بس عمامها زمايل وقفلو ع المشاكل هسه يكلولك مادام عاقد عليها لاتاخذها وتطلع بيها الا بزواجك ..وليش نخليهم يملون علينا من البداية لاننطيهم مجال
..ولو هو سبب صح بس مو مقنع انت تهتم الخواطرهم وطلباتهم مامعقولة وراح اكول ياصخر لاتفكر ابو البراهم يضغط عليك وعبرها
ضحك
..بعد انت فاهم مايحتاج افهمك اكثر المهم اتوكل هسه الله وياك واحمد يوصلها
..خل نطلع سوه انتظرهم ماعندي شي
شويه ودزتلي رسالة
..عمو مبلغك مو ..راح نطلع
طلعت لاگيتهم بالباب سلمت عليهم ووصيت احمد عليها وطلعو وحركت وراهم الحد ماافترقنا رحت الدوامي وهي الدوامها وابالي جنت ناوي اتزوج بالعطلة بس هسه بديت افكر اقدمه
...
هاجر ...
گعدت اتحضر للدوام تأنقت ع الآخر كل ظني هو ياخذني فاجأني عمي من كال احمد يبقى يوصلج الحد زواجكم خاف كلشي يصير منريد كلام يغثج لو مشاكل وهذا صخر خلكه مو طويل ومتحامل عليهم
وافقته بكلامه
واحمد اشرلي بحواجبه فرحان وضحكت بداخلي اعرف سبب فرحته شنو راح يشوف بنين ذبح نفسه عليها بهالفتره وهي ماتدري كل شويه يسألني منين هي وشنو افكارها ومبين عاجبته حيل
وبالدوام وبعد المحاضرات عيون البنات صارن على ايدي والخاتم المزينها
اتذكرت من لبسنياه بحضرة ابو الجوادين اشترالي الذهب من زرنا
ايدي رجفت بفرح وايده بتوتر ساعدته واني اعدلها بأيدي ونفس الشي حلقته عفتها ع النص وهو عدلها و وعدني يكون كد الثقة .. ويطلب مني اكون اقوى واسنده وهذا الكلام الي اعتادت اذني على سماعه منه ومااعرف شنو القصد بالضبط بس صرت اسلم نفسي الأسوأ الأحتمالات ومخليه ابالي اصبر ..
سألني من شافني افكر ولاعب بيها بيدي
بنين گالت
..ولچ شنو مخطوبه صدك لو فيكه وتغورين ذاك الولد
ضحكت
..لا هو ذاك الولد صار خطيبي وعقدنا
..عليچ الله
..اي والله شبيچ حقج متصدكين اني هم مامصدكه بسرعة صارت
گامت تباركلي والبنات هم
اباوع البنين واتذكر سوالف احمد عنها واسألته وقررت اسألها واشوف والله يقدم البي خير
بيومها بالليل اتصل بيه مرات احسه طاير من الفرح مرات كئيب وعجزت افسره بس فرحانه بوجوده وياي مهما كان شعوره ومتأكده من يكون كئيب مو مني من اشياء وسلبيات يخفيها و يريدني اخفف عنه
مرت فتره وبدينا نحضر الزواج غزالة
احنا والينات اجتمعنا كلنا بمجموعة ونحجي بالتحضيرات وشنو ممكن نسوي ونظز مقاطع غنا وهوسات ورگص وماخذنا الواهس من يمنا
بالليل وقبل حنتها بيوم دزت رسالة غزالة صدمت بيها الكل وطيرت نومة عينا وهي تگول
..الحگلي وگعت بمصيبة بس الله يطلعني منها
يتبع...