بقلم نور الشمس
هاجر..
لحظات الناس اتحمدوله على السلامة ابتعد عنهم وهو يسوق بتركيز مسافة مقابيل ماركت صف السيارة
نزل جاب مي بارد وعصير وصعد
..شربي وغسلي وجهج وارتاحي الحمدلله الله خلصنا ونجانا .. صوجي اني المفروض اضبط اعصابي..خو ماتأذيتي؟
عيني عليه العرگ ينزل من جبينه وشعره مبعثر نازل منه خصلات مبعثره مديت ايدي عدلت شعره وانطيته كلينس رغم الجو زين بوكتها مو كلش حار
..زينه مابيه شي الحمدلله على سلامتك انت شلونك هسه خو مابعدك تعبان
..الحمدلله.. مابيه شي ..شربي وارتاحي
وبلمحة سريعة خله عيونه بعيوني وگال
..ابراهيم خابري مااريده يجي ابد ولا اريد اشوفه هسه ..گليله لاتجي
اتنفست بعمق كل ظني چان مشغول وباله مو يمي
اتصلت عمي ابراهيم مشغول.. حاولت مرتين الثالثة حصلته وبسرعة حاجيته.. متجنبه ثورة وفورة البركان اليمي يجاهد وهو يخمد عصبيته والظاهر ارتكبت غلطة بالاتصال بعمي بس همزين نبهمي بدون ملامة لأن گلبي خلصان ومالي خلگ انلام
جاوب عمي مخبوص
..ها يابه هجورة وينكم هسه؟ ..اني بالطريق ومهيب قريب عليكم جايكم خل صخر يجاوبه
..عمو حبيبي زينين احنا وطلعنا للبيت مايحتاج تجي اني اتواصل وياك ليظل بالك
..هجورة بابا متأكده بخير انتو؟
..الف الحمدلله بخير والله مابينا شي ..وماقبل عليه اشغلكم الخاطري لاتجون
فهم هو رافض جيته اتنهد وگال
..راح انتظركم على نار لاتخلون بالي انتِ اتواصلي وياي وهو لايلتهي عن طريقه عينچ منه وهديه
..ان شاءالله
نهيت الاتصال محتاره بشنو احجي وياموضوع افتح
تليفونه ماسكت ثبت التليفون وجاوب وهو مركز بطريقة
..ابو ايهم الحبيب الله يسلمك ..لا ماكو شي عدت
..صخر بداعة امك انت بخير
..بخير والله الحمدلله ..ليظل بالك اكيد ابو خابصها اتصل بيك
..والله قلقني عمي ابراهيم اريد بس اعبر الازدحام واوصلك
..هو هذه مهمته يقلق الناس
..خاف انت اتعمدت ترعبه عليك ..ترى ميت خوف والله لاتحچي عن خوفه ابرود يبقى اب ترى
..واني بحاجة خوفه شبيك؟ ..ويايه هاجر وهو اتصل بيها بلحظتها وحجتله وقلقنا كل شويه متصل ينگط حنية عمك اعرفه خووووش اب
..تستهزأ عود يلا مااريد اجادلك اظل احبك ماتسوى نتجادل ..انت شلونك قبل الحادث يعني شخبارك
..بنص الخير ..العصر نتشاوف بالگاع مو ماتجي
..بت عمك هالأيام جايتها رعصة وكل شويه مرعوصة كرهتني بشغلي ودوامي وحياتي كلها اتخيل حتى الگاع تسويلها مشكلة من اروحلها
..اول طيحتك شنو ؟
..هم گلتلها اول طيحتي ترى عتگت اني هسه ويادوب شسمه
..الشسمة خلها بجيبك ولاتلعب نفسي اني مو وحدي والمايك مفتوح هم
..خرب عيشتك صخر حتى السوالف مانعها
..ولي اتعس من عمك ماتنعطون عين
ضحك مهيب بصوت عالي ولاحت على شفة اشهل ابتسامة خلتني افرح فرحه ماحاسه بيها قبل وكأن سعادتي ارتبطت بسعادته لااراديا ابتسمت واتوسعت ابتسامته وضحك من شافني ..نهى الاتصال واخذ ايدي باسها
..تعبتچ اني
..انت كلشي منك راحة بس تعبك يتعبني اذا تحبني فعلا خليك على طول مرتاح راح تشوفني اسعد وحدة بالدنيا
..يرحولچ فدوه كلهم
وبدلع گلت واني ارمش بعيوني بفرح
..منو هم
..كل الي ابالي واني اولهم
..اسم الله عليك لاتحجي هيچ .. ماگتلي شلونه دوامك اليوم
..متعب والله ويومي ابد مو تمام
سكتت وابالي اريد اطول الحديث بمواضيع متمسه ومااريده يسكت ويفكر بالشي الصار التفكير ياخذه بعيد ويتأذه وحتى اني اظل احسب للكلمة حساب يلا احجيها بس هسه احسه اهون طبيعي يسولف
اخذني من افكاري وهو يحجي
..اجتني حالة الشاب عاجز وانهياره اذاني وبدل مااهدأ واستوعب الصار وياي بعقل واكون طرف مقصر واجب عليه استوعب انفعالاتج انتِ انهاريت اني و صار العكس يعني بدل مااخليچ تفكرين بنفسج صار تفكيرچ بيه وهذه انانية واذا ابقى هيج هم ماراح افرق عن ابراهيم بشي ..استغلالج عاطفيا مااشوفه امر يليق بيه ابد ولا عاجبني خليها ابالچ جاي اصارع روحي اني
صفنت عليه مااعرف شحجي اني وين افكر وهو وين
..وليش انفعل اني ؟
..امر طبيعي هذا
..لا طبيعي لو چنت واهمني ..بس انت مصارحني بمشاكل بسيطة والهسه اشوفها مو شي صعب صح مااعرف واجهل حيثيات المشكلة مثل ميكولون بس تبقى هالأمور ناطيني عنها علم وهي امور خاصة بينا مراح تأثر علينا ..واذا تقصد كأحساس وشعور ممكن اتأثر وانفعل ابد والله اني عندي انت تسوى الدنيا وقربك يمي ووجودك يحسسني بأمان ماشفته بحياتي كلها الا وياك
يمكن لو بغير ظروف ولو واني اجهل صراعك الطويل قبل الخطوبة وبعدها افكر بيه خلل يمنعك او يمكن لوني او هوايه امور تخليني انفعل وانقهر بس هسه لا
المهم انت ترتاح ..صح هو الموضوع يمكن حساس لكن متأكدة انت اقوى وراحتي براحتك وابد من ناحيتي لتفكر
..انتِ اصيلة ماعندي شك بهالشي واعرف كل الحجيتي وواضح عليچ واعرف حبج وخوفج ولهفتچ من عيونچ قبل لاتحجين
وهذا الي مزيد محبتچ عندي ..بس اني ماحجيت الحيثيات لأن اني مااعرفها الياحد
اني اجهل حالتي نفسيا ماجنت اتقبل الفكرة كلها بس من دگ گلبي الچ وشفت نفسي اغار عليچ ومااتقبل فكرة تروحين من ايدي ماگدرت
ترى لو ماحبچ مااخطي وافكر بخطوبة وزواج
لأن اني مو نذل بحجة الظروف اخلصج واوگعچ ابير اغمگ
اني شفت نفسي وياچ اختلف وشفت نفسي مضطر اواجه مخاوفي او اخسرج وخسارتج بالنسبة الي موت لأن الأمل انولد بداخلي وياج وبفقدچ مو بس افقده افقد كل طعم بهالحياة .
لهذا الواجهته بهالأيام مو شي سهل ولا چنت اعرف اني مكسور نفسيا الهذا الحد ..صرت اتمنى يصيبني فقدان ذاكرة جزئي او شي يخليني امحي هوايه مشاهد من حياتي
ابتسمت اخفف منه وبحركة عفوية لطمت صدري بخفه
..خاف تنساني انوب ..وين اروح ساعتها
..لو عقلي نساج گلبي الحبچ ماينسى تعالي بگلبي وانعل ابو عقلي اني هم انساه ..وين اكو عقل صاحي ينسى جوهره مثلچ
..الله ..لو ماوصلنا وذاك عمي بالباب جان تشوفني گامزه بحضنك على هذا الشعور البيه
..تعاي نلوف و نرجع احسن من السوالف وي ابراهيم ماراح يعوفني عمج الحنيييييين
ضحكت
..شرايك العصر نطلع للبستان
..اليوم عدنا شغل الولد كلنا هنا احتمال بالليل اخذچ بس مابي جماليه بالليل اظلم
..الفجر نروح؟
..هذا هو الفجر ليش لا
صف السيارة ونزلنا وعمي واگف بقلق مچتف اديه الظهره ودشداشته ترفرف بالهوا وشعره متخربط وحالته حاله الي يشوفه ويسمع كلامنا قبل لحظات ويشوف وجوهنا هسه يگول ذوله ناصبين عليه المسكين
اول مانزلنا صاح
..الحمدلله على سلامتكم ..شلونكم خو ماتأذيت يابه
رد صخر ابرود
..مابينا شي تشوفنا نمشي على طولنا
..الحمدلله شأريد اني. تعال صخر نسولف اني وياك
..ماعندي شي احچي
..والحچيته قبل شويه غير نتفاهم عليه
..راح وكته بعد .
حجاها وهو يدفع الباب ويفوت واني وراه عيون عمي عليه
ابتسمت بوجهه
..ماكو شي عمو ليظل بالك
واني احجي صاحني اشهل يريدني افوت
عمي بأيده ضرب كتفي بخفه
..فوتي عمو المسودن هذا عينچ عليه والي كلام وياچ بعيد عنه ومااريده يعرف
بلعت ريگي بأرتباك اخاف واخجل ومااريد احجي اي شي ولا اگدر اگبح وي عمي وامتنع من الكلام
اتوكلت على الله وفتت للبيت الله سبحانه يحلها ويقدرني اكون طرف خير بينهم ويبعد عني وعنهم المشاكل يارب
شفته فات يطمن على دجاجات عمتي واستغرب ماذابه الهن اكل ولا مغيره المي
حاجاني
..هجورة .. شوفيلي امي وين مو عوايدها تخليهن بلا ماي واكل
انطاهن ماي واني فتت للبيت عمتي بالهول متمدده ومدثره بغطى حتى راسها متغطي وشكلها يوحي بعدهي بردانه قربت عليها
..عمه شهلة نايمه شنو
رفعت الغطا جست جبينها وجف ايدها نار
بعدت الغطا عنها جرته بتعب
..بردانه عمه لاتكشفيني مااگدر الرجفة بعظامي ..صخر جابچ لو احمد
..لاعمه صخر جابني جاي ينطي اكل للطيور وگال شوفي امي وين مو عوايدها طلعتي مريضة صدك
كومي عمه شدي حيلج اغسلج وبدلي واسويلج شي دافي واخذي علاج لاتثگل عليج من يجي الليل
..سوده بوجه امه.. شبيه عمه مابيه شي ..هو شلونه
..كلش زين لايظل بالچ حبيبتي ماكو شي
سندتها واني افكر لو تدري بالراد يصير شيصير بحالها .. يمكن الله سبحانه عطف علينا الأجلها هي هيج ومنتهيه على قهره مقهوره
فات شافني اسندها اجانا متفاجأ.. بچفه مسح گصتها وجف ايدها شاله باسه
..مشتعلة نار ..شبيچ يمه شيوجعچ
نزلت دموعها تريد تكله عليك موجوعه وحاشره الكلمة بحلگها
اكتفت باالدموع وهو احتضنها وشالها شيل كوه سحبت منه نفسها وهي تتوسله يعوفها مابيها شي تريد تمشي بس گوه تنقل جف رجلها
..يمه ليش هيچ حالچ منين تشكين احجيلي ..اخذچ للطبيب
..ماكو شي يابعد امك انه بخير كونك بخير يمكن اخذت برد وصخنت
حاجاني
..ساعديها بين مااسويلها شوربه تاكلها ..يمه حتى ريوگج على حطته ليش هيج ماماكله وماخذه علاج
ماحچت بس نزلت دموعها رجعلها حضنها وخله راسها بحضنه
.. لاتاكلين بروحچ عليه ..مابيه شي
بچت حيل وهو شدد حضنته
..انه جبت عمري قوى واتناطح وي الحياطين مو بس وي البشر بس حتى مااشوف ضعفچ لاتنهيني بدموعچ يمه باقيلي شويه حيل
..اسم الله عليك يابعد حيلي ..انت ماينخاف عليك دموعي قهر مو خوف وقهر مو منك من الوكت الخلاني سبب بأذيتك
باوعلي بعيونه يسأل حرك حواجبه وطرفه شفته
..حاجيه شي
اشرتله براسي
..لا
سكت وغسللها وجهه وجفوف ايدها ودنك على رجليها وهي لازمته تمنعه ماسمع منها وبالصونده ظل يغسل الها
ورجعها لفراشها ماقبل تتغطى بهوايه غطى
اتحركت عنهم
..خليك يمها ارتاحو اني بس ابدل واسوي اكل الها
ماقبلت هي ورادت منه هو يسوي حتى يسوي اكل النفسه وياكل على واهسها وأول ماگام لزمت ايدي
..هجوره يمه الله شاهد صرتي بنتي من يوم الرادچ وگلبه دگ الچ مو من اجيتي وهسه وبعد الصار لو عندي بنيه ابديچ عليها ..شغله وحده اريدها منچ الصبر
..عمه بعيوني شهلة واشهل ..والله اني هم ماعندي غيركم ليش محسسيني ممكن اتعب وامل ابد والله وترى شغلته بسيطة والله بس يحتاج يكسر الحاجز واذا يشوفج هيج تزيد ماتنقص حالته ينقهر عليج وترجعله كل ذكرى
..هم صح كلامچ ..اذا عليه اگوم لو جمر جواي مااخليه يضوج ابد وبس ارتاح اروح الاخواني اسير عليهم صار سنين يردون اروحلهم ايام طويلة واتعذر بي وصدك اني مااكدر اخليه وحده بس هسه لا انتِ يمه ماعليه ويمكن لو غبت عنه ينسى
..خاف يضوج من يحس بيج تتهربين منه ويعرف الغاية
..لا مااخليه يحس بس لاتحجين يمه شي انتِ
رحت بدلت ونزلت وبالبيت وياهم اخذ راحتي باللبس ربع ردن البس وثياب قصيرة والوان فواتح واخلي مكياج ماخذه راحتي وممحسسته بشي ابد رغم مرات اظل بحوف اراقب ردة فعله واشوفه طبيعي هم يتغزل وعيونه ميشيلهن مني لو ماالخنگة التجي فجأه طبيعي هو وفوگ الطبيعي بس مااعرف شلون اخلي يتجاوز هاللحظات اليفصل بيها بعالمه الخاص
هو يجهز اكل واحسه نعسان وتعبان گوه واكف واني اغسل واعزل وراه
وگفت ع السنك اغسل مواعين وفززتي من حسيته باسني بظهري فتحة الثوب چبيرة
..فززتني
..ككوو مايتقاوم ..عذابي بس الله يعلم بي شنو
ورغم حسيت بقهره والكلام قاصده فعلا جاي يتعذب بس ماردت اگلبها دراما حاجيته اجاريه واتعمد القرب منه حتى ينكسر هذا الحاجز
مهما كان صلب وقوي اهدمه يعني اهدمه وهذا تحدي ووعد
قربتله خدي
..منا اطيب
..كله طيب والله
حجاها وقرب باس خدي وطرف شفتي
وصوت عمتي قريب اجانا بيدها علاج تريد مي
..صبريلي يمه خمس دقايق وتجهز لاتاخذين علاج قبل الأكل رحمه الروح امچ
..بس تاكل ويانا
..طبعا اكل ميت جوع
حاجته عمتي تضحك فرحانه بينا ومامصدگة تبقى الأمور طبيعية هيچ
..شو صارت دخانه شمسوي وي الشوربة صخر الا ادخن البيت يلا ترتاح
..مالي خلگ اشغل المنقلة وشويت اللحم هنا بالطاوة
ردت اسوي زلاطة واتذكرت خاف ماياكل من ايدي
ظليت متردده وشفته ع الشريع هو قطعها ورتبها عبالك مشتغل بمطعم گبل بين ماافكر هو نفذ ورتب خل ابقى اني اتعلم واسكت الحاجتها اكون جاهزة
كملنا كلشي وخلينا غدانا اكلنا وهو يلف بيده العمتي والي
..اكل انت حبيبي اني الف النفسي
..اكل لاتهتمين
شبعت وگمت اغسل ولميت البيت وهو منصي الچاي على مهداره مخدره طفيته ومااخذته ردت هو ياخذه مااريد اثر عليه بكلشي واخربط حياته فجأه البي كافيه
وفعلا جاب الجاي وصاحني شربنا گمت عنهم واسمع عمتي تحجي وياه
..صخر يمه يابعد روحي اني اشوفك متغير ومالك خلگ حگك حياة جديدة ..ومسؤولية مامحسبها بس صحتك اهم قالونك معدتك الصارلك البارحه مايصير الا بمغثة قوية
..يمه لاتمثلين عليه ماتدرين ..مااضوج منچ انتِ اني وگايلچ من سنين انتِ مرايتي ولو مااحس انتِ عارفه وفرحانه الي بدل القهر التخفيه عيونچ اگول سهلة اتبدلت والأيام غيرتها وحساباتك بأمك مو صحيحة ..لاتضمين عني خوفچ اني ماضميت عنچ وضعي وگدامچ شفتي الصار
..ماامثل.. بس مرتك اصيلة ومارادت تحس بيها مبينه الي لو شاكية والعندك ماسة حافظ عليها ولاتفرط بيها ابد
..وي النفس هي وبعد الصار محبتها زادت اضعاف ..بس منطي نفسي مهلة فترة محدودة ومااظلمها بعد
..لايمه لاتحجيها
..يمه اني اكره الانسان الاناني ومااريد اصير مثلهم اذا خليتها واني على وضعي واظل طمعان بأخلاقها ونبلها اوگع من عين نفسي واكره حتى روحي
..والله يايمه جنك ورد لاتخلي ابالك هالشي بس اصبر وقوي گلبك ودوس على كل فكرة تبعدك عنها
انسحبت وبگلبي غصة شكبرها اني مستحيل اتخيل نفسي بعيده عنه ماصدگت اكون ابيته وتحت جناحه
حتى مااتهنيت بهالأيام واني قريبة اله شلون ابتعد شلون يفكر يتركني
راسلت الطبيبة وهالمره اتعمقت واني احجيلها شنو شايف
وسألتني هي
..كم مره شايف ابوه يعنف امه بالعلاقة
..حسب مافهمت هو واعي فتره طويلة وكان يظن هذه مشاكل معتاد عليها بس اخر موقف شافه بالكامل وفهم ان الي فات ايضا كان تعنيف بنفس الطريقة مو مجرد عرك ومشاكل والي مأثر عليه الكل مفهميه هذه العلاقة الطبيعية ومو من حقه يتهجم على ابوه ويتوعدهوبالقتل لأن هم زوجين وطبيعي يصير بينهم هالأمور
هم رادو يخففون صدمته بأبوه بس الي صار رد فعله اقوى وكره مو بس ابوه كره العلاقة كلها
..فهمت قبل لانتناقش بوضعه شلون صار زواجكم واذا كاره العلاقة شلون قرر يتزوج
..قصة طويلة بس اني بنت عمه يعني وصارت ظروف وايتمت وهو اتكفلني ياخذني الدوامي ونرجع واتعلق بيه وحبني وظروفي هم يمكن سبب
..يعني مو زواج اجبار؟
..لا ابد ماكو اجبار
..اهله انفصلو بعد الحادثة بفترة طويلة لو قليلة
..بعدها مباشر كل واحد منهم صار بمكان وهو واستقر وي امه وابو اتزوج وخلف وماوصلها بعد لأن هي رافضه
..تمام لهنا كلش زين ..نرجع الموضوعه
بالحقيقة تبرير اهله خطأ المفروض بدل الدفاع عن ابوه وصورته يبينون سخطهم ورفضهم الهذه الجريمة تحت مسمى الزواج حقه يكره العلاقة اذا هذا تصوره عنها
هذا اول خطأ
الثاني امه يشوفها كل الفتره الراحت هي متحمله هذا التعنيف وقابلته وبنفسها مفهمته الصار طبيعي حتى تحتويه وهنا اتولد عنده شعور ان امه انفصلت مو لأن الي جان بينهم خطأ وانما انفصلت بس حتى ترضيه وتبعده عن المشاكل وي ابوه ..هذا شعوره حتى لو مامبينه الها تفكيره هذا جربي بيوم من يسمحلج النقاش وياه بهالموضوع راح تشوفين كلامي صح
الثالث ..الحواليه وممكن لأن هم مجتمع محافظ عدهم هالأمور تموت بمكانها افضل من ان تنعاد وينحجي بيها بس غلطو غلط جبير كلفه راحته واستقراره ..لو مفهميه بالحقيقة او ع الاقل من يعرفون عنده وسواس من كل شخص متزوج الهذا العمر المفروض اقرب الاشخاص اله من الرجال يتولى مهمة الكلام وياه والى اي مدى هالشي مأثر بي
اني اعتبر هو من الحالات التأثيرها شديد لكن علاجة بسيط يعتمد عليچ وعليه
..شنو الأكدر اسويه دكتورة ؟
..اتمنى تكدرين تجيني واذا وياه افضل ونحچي براحتنا اني وقت ماعندي هالگد للفون بس رسالتج وموضوعچ ثار استغرابي وحالة من الحالات الي نادر ماتحدث وتجيني
..والله يادكتورة وضعي حاليا مايسمح ..اتمنى اگدر اجيج وحدي بهالوقت ..ووياه صعب كلش اخاف من ردة فعله يفهمني خطأ
..روحي بيوم على امچ او اختج وبدون علمه تعالي ولو هالشي مو صح انصح بي بس للضرورة احكام
نزلت دموعي واني اراسلها ورديت بقهر
..للأسف گتلج يتيمة ماعندي ام ولا اخت اخوتي صغار حيل والدنيا هم تلطش بيهم ماعندي بيت اهل اروحله اهلي كلهم هو وابوه واخاف التجأ الابوه وازيد المشكلة اكثر واعقدها
..ياحبيبتي الله يرحم اهلج ويحفظه الج علاجة بسيط ان شاءالله لاتقلقين بس يعتمد عليه وعليج بالاكثر يحتاج منج قوة وجرأة بالتعامل مو الجرأة بمفهومها العام لا
جرأة باتخاذ القرار المناسب شوكت تقتربين شوكت تنتظرين منه مبادرة شوكت تبادرين وكل هذا ماينجح اذا مو هو يتقدم يحتاج منه قوة يواجه نفسه اذا يحبچ مثل مافهمت راح يحارب الأجلچ
..اني مستعدة الكلشي ..اخاف اليأس يتمكن منه ويضحي بيه
..لا ماتوصل الهذا الحد ان شاءالله مشكلته ابسط من قرار صعب مثل الانفصال ..المثله صعب يتعلق صعب يعشق وتنعدم منه الثقة مدام هذه الحواجز متخطيها هو متقدم هوايه وباقي الحاجز الاخير
المثل حالته وواعي على تعنيف الاب للأم مثل الشافه زوجج بصغره معرض الامرين الاول تكون رغبته مرتبطة بالتعنيف بدون التعنيف مايشعر برغبة ولايكون علاقة زوجية وهذا صعب علاجة بس ممكن ليش صعب لأن اي امر يتعلق بي برغبة صعب السيطرة عليها حتى لو كان هو كارهه ..الامر الثاني المشكلة العند دزوجج بوعية وكامل ادراكة يعرف الي صار خطأ العقدة العنده بأصرار منه وبرغبة الچ راح يتغلب عليها لهذا حمدي ربچ ان الموضوع مگدور عليچ
بدت تشرحلي هوايه امور وچنت دقيقة بشكل اي معلومة ممكن تفيدني احتفظ بيها ووصتني ابقى على عفويتي وطبيعتي بدون تحضير وترتيب مثل المره الفاتت افضل لأن ممكن هذا الاختلاف ينطيه قناعة ان لازم ينجز وهذا يأثر عليه ويوتره
واني بطبيعتي من الأساس اعشق الترتيب والنظافة
حذفت الرسائل بينا احتياط اخاف يفقد الثقة بيه انوب رغم مشايقته بيوم ماخذ فوني وشايفه بس حرص مني
مر اليوم وعمتي رغم شافتنا وارتاحت بس ماصحت حتى ع العلاج الجابه الها
بالليل واتصلت بيها اختها رنا وعرفنا غزالة محاجيه خالتها ام علي وطالبه رنا الابوها وجانت رنا متخوفه وعمتي متردده متكدر تشجع لو تمنع واتعذرت بمرضها وكالتلها اتحسن واخابرج اخذ هو التليفون
..شنو الي مخوفج ست رنا
..هلا حبيبي .. والله ياخاله كلشي يخوفني ..اخاف اتزوج واتندم واخاف ابقى والندم ياكلني اكثر اولادي هسه مامهتميلي ويردون ابوهم منو ميت عليه بعد كم سنة وهسه اني بقوتي وحيلي واخواني موجودين وممقصرين وخالتك هم بس الى متى مااعرف دايخه والله
..حقچ اني لو اولادج موجودين وياج رأيي يختلف ومااشجعج بس هسه مو لأن عمي بس سليمان ذهب صافي ووياه ماينخاف عليچ واني كفيلچ شتردين بعد ؟
..والله ماادري شگلك الله كريم ..امك من شوكت مريضة
..اليوم والله رجعت من الدوام لكيتها مالها خلگ
..عدها العافية نجيها نشوفها ان شاءالله
..كل الهلا بيچن ..اخيتي شلونها يمكم عينكم عليها
..غزالة بعين راعيها علي مامنطينا مجال الها لايظل بالك
سلم ونهى الاتصال
عمتي نامت رحت للغرفة خليت مرطب الوجهي وجسمي وجنت ادهن بديه وفات ينشف بشعره قرب عليه اخذ معطر الجسمة ورش عطر وابتعد لفراشه
جنت حذره واجاني خوف بوقتها يكرر الموضوع ويصير بي نفس الصار البارحه
حاولت اعطل نفسي بلكي ينام قبلي ومااحرجه وانحرج
بعد دقايق گال
..ماناويه تنامين؟
..لا ميته نعاس اصلا اكيد انام
درت من الجهه الثانية خليت مسافة ونمت ع حافة السرير الثاني حتى النفس كتمته سحبني عليه
..ليش تبعدين
..لا مو ابعد هيچ
..اني فاهمچ وحقچ بخوفچ
..ماخايفه اني بس مااريد اضغط عليك
..اني مو ساكت ترى جاي اعالج ومن فتره مو قليلة هم ..وعلاجي مو عضوي حتى لاتحتارين اكثر ..وحضنچ وقربچ علاج الي. الخلل مو بيج حتى تبعدين يمي الخلل
..زين خليني اساعدك وعلمني شنو ممكن اسوي وشوكت ابتعد وشوكت اقترب
..مااريد احملج هم واضغط عليج بموضوع يعتمد عليه بشكل تام ..ولا هين عليه ابقى بعيد عنچ او انتِ بيدي وماانولچ.. عذاااب مااستحقه
بس ارجع واكول كلش كافي واثق بيچ ان انتِ سند الي واختياري الچ كلش صحيح وهذه المرحلة بفضلچ هانت وبفضلچ هم راح اجتازها
..شنو اهمية الثقة بالنسبة الك
..كل الأهمية الها
غمضت واتنفست وگلبي يدگ بخوف وتوتر
..واذا تعرف سويت شي بدون علمك بس الصالحك وحتى اكون الك عون تقبل لو لا
..ترك ايدي وعدل نومته ارتكى على ذراعه ودار عليه فتحت عيوني مركز بعيوني .. عجزت افسر نظرته رضا لو غضب قبول او رفض احتاريت
وهو اشرلي بحاجبه اكمل
..كملي اي
..اني استشاريت طبيبة نفسية بس والله منطيت عنوانك ولا اسمك الحقيقي وابد ابد مو قصدي اطلع اسرار كل همي اساعدك بس
غورگت عيوني بالدموع مااعرف محتاره تورطت وحجيت اخاف اسكت والمه الموضوع ماينلم واخاف احجي واكمل وكلشي ينقلب
..كملي اي
..شنو ؟
..غير اسمع منچ اني..احجيلي
..انت تعرف غايتي صح
لزم اديه وخلاهن بين اديه وبحنية حركهن بين چفوفه ..انتبهت النفسي افرك اصابعي بقوة واطگهن وهذه عادتي من اتوتر واخاف حيل
..اعرف طبعا ..بس احجيلي اكو امل شگالتلچ ؟
بعدت اديني من بين اديه وطفرت حضنته مثل الهبلة عبالك طفلة وبحضن ابوها ولا عبالك مساع متوتره وميته خجل الأمان الحسيته بهاللحظة عمري ماحاسه بي وزادت فرحتي ودگات گلبي من شدد حضنه الي
..يعني شنو يجبرچ تدورين حلول لو مامهتمه الي وتحبين راحتي مو مجرد واجب يسقط ..احچيلي اكو امل
...طبعا اكو
وبكل هبل وبدون مااحسب حساب الكلشي حجيت كلشي حجته من حلول بدون مااطرق القصته الي خافيها عني ومن شافني الهذا الحد مهتمه اله اكثر من نفسي شرحلي كلشي ومن شفت نزلت من محجر عينه دمعه مسحها گبل لاتنزل دموعي ماوگفت ولاسيطرت عليها جنت اظن بس اني وامثالي ضحية مجتمع بس ع السمعته منه الشفته والمر عليه لاشئ
وعينا على نفسنا والضوء توه بادي يكشف
..گومي نطلع للبستان
..صدگ مانعست
..نرجع وانام باجر عطلة لاتنسين
طلعنا وبنفس المكان الرحنالة قبل وهالمره منظر اجمل واجواء تختلف اجواء الفجر بالريف بين الخضار وعلى اصوات زقزقة العصافير وتغريد البلابل وبقية الاصوات الي تخليني اعيش اجواء الريف الجميلة
گعد قريب الشجرة جبيرة ارتكى عليها الثيل بارد حيل الجو ربيع وحلوو بس لزمتني بردة ورجفة قليلة سحبني عليه وصرت بحضنه اشرلي ابقى بمكاني ورخى شالي من يم حنجي وظل يحجي شگد جانو يجون هنا ويلعبون وذكريات هوايه وختمها بآخر ذكرى اله وياي من قدمنا الزواج يگلي
..لون عيونچ هنا ولمعتهن اخذتني العالم ثاني
واني مبتسمه واسمع منه وعلى كل كم كلمة ارد امم لو اي انباع الساني مدري شبيه
الحد الصبح وباول طلعته اتصل بي عمه سليمان يبلغه بالعزيمة
وبدون اي خجل گله
..يابه احنا الهسه مانايمين وحاليا بالبستان راح نروح انام وخلي عزومتك عشا
ضحك عمه وگله ولو جدك مايحب العزايم بالعشيات بس ادلل نوم العافية يابه
گمت انكت بملابسي وفليت شالي ارد اعدله وهو طلع يأشرلي ع الزرع من المخضر وشلون طالع واتي وياه فرحانه اتقدمنا ونشوف عمي ابراهيم وياه وسام وجان عصبي ويحجي من شافنا حاجاه وسكت وسام سلم من بعيد وراح وعمي اتقدم علينا والفرحة مو سايعته
..ولك ناقص ليلي مانايمه منك ومن سوالفك وخايف عليها اكثر منك تالي هنا تتختلون
..اجينا هنا نغير شويه لو ندري بيك تغبش جان جايين من الليل
..واوي انت وبالليل تجي؟
..طالع عليك ابو وسام بكل وكت موجود وتطلع بوجهي
..اريد اعزمك انت وزوجتك تجي لو تفشلني ؟
..لا اجيك انت ابو ونسيب شلون مااجي
..اختك تسأل عليك هم جابوها مريضة
..عهود؟
..لا سراب
..شعدها
..تعبانه ويمكن طفل عدها
..يا الله ..ان شاءالله خير ماادري والله ..امرلها اذا ابيتك ذاك
..لا يم امها ..گالو شايف عباس بغيابي
..شفته اي وسلمت على امه..لأن صاحبة واجب معذورة ومريضة .. وموجبة امي بيد نور دازة الها واجب بالعرس
..حلا بنت اوادم ..ماادري بيها والله بس هي تعرف بالاصول
..انت محظوظ شگول اكثر
..لاتستحسفها بيه المر عليه هم محد يدري بي والناس الها الظاهر
..يجي يوم ونتكاشف اني وياك ولو اقنعك انت باطل لو تقنعني اني عاق
..الله يرضا عليك ماازعل منك اني لاتحجي هيچ
نسوني واكفه بينهم اتحمحمت وسألت
..عمو سراب شوكت اجتكم
..البارحه بالليل متأخر اجت
سلم علينا وراح وظل بالي يمها قررت اتصل بيها الظهر خاف نايمه هسه
وصلنا عمتي گاعده وفرحت اكثر من شافتنا بس ماعجبني وضعها بعدهي مريضة رغم تكابر وتبين هي متحسنه بس وجهه مبين حيل اصفر
..يتبع..