بقلم نور الشمس
نور ...
هذه العطلة بديناها بداية حلوه اعراس وافراح بعد مافتره اخذ منا الهم مأخذ بانفصال امي والفوضى العشناها بالبداية... بسكن ابويه يمنا وحلا اترتبت الحمدلله
بس القاهرني حمزة ..حمزة مو بس توأمي روحي من الدنيا واقرب شخص على گلبي
اني من اشوفه مرتاح تلقائيًا ارتاح وصار فتره ماشاف الراحه حبيبي
امي انتقمت منه ومن ابويه بشلعان گلبه
ابويه صح بي سيئات يحب نفسه عنده اهم شي راحته مايهتم الامهاتنا مايحب يبرر بس بنفس الوكت مايتحمل يشوف واحد منا مقهور وزعلان ولا يتحمل واحد من اخواني يحب من صدگ ويتحارب بحبه
امي من البداية شادة وي حمزة على رادته البنت اخوها لأن تكره امها .. وابويه علموده شكد فوت مشاكل وصبر ماراد يتخارب وياها ويأثر عليه
بس المشكلة الاخيرة جانت قوية وماينسكت عنها ونهت كلشي وظل باله يم حمزة ويهتم الاخباره
بت خالي اختلفت على حمزة كلت يمكن تشوف ماكو طريق العلاقتهم وتريد تكرهه بيها وينسحب هو من ذاته
لأن اعرفها تموت عليه ..وجان احتمال مطروح هذا بيني وبين نفسي لأن اشوفه ميحب يطرق الهالأمور يمي يخاف اتأثر بي واحب واسوي علاقة ومن هالأمور
بس الي صار بعد فتره اختفى ذاك النفور و رجعت تتودد اله مثل قبل واكثر وطيرت عقله من جديد وقنعته جان الكلام تحريض من امي وامها وهي مالها ذنب
رجع حمزة فاتح ابويه
..مستعد تخطبها الي بعد الصار
ابويه گله
..بعيني اسوي العليه والباقي يم ربك
وهيج ارتاحينا اخر التحاق حمزة چان مرتاح
وهي طالبه تشوفه بمكان عام تحجيله كلشي بالوقت المناسب
بهالفتره وگعت ام صخر وگعه قوية قلقتنا كلنا عليها
كل تواصلي وي احمد
اول يوم دخول الها متخربطين اثنينهم صخر وابويه احمد يقسم يكول الطبيب من شاف وضع ابويه گال لو واگع بره المشتشفى ومتأخرين باسعافه دقايق ينجلط لامحال
بس هو عنده حظ ووگعته صارت بنص المستشفى وافضل الأطباء سعفوه ونزلوله ضغطه بسرعه
بس ظل قلق عليها يجي هنا اسأله عنها
قهر الدنيا كله بعيونه وهو يشكي وضعها
واكثر شي قاهره ومدمره هذيانها بأسمه
ومن سألته على صخر يگلي زيد همومي هموم ضايع بدون امه وحتى عصبيته وخشمه العالي وطبعه الصعب كله راح مكسور وكسرلي ظهري حرت شلون اخفف عنه واني احتاج من يخفف عني ويريحني عنها
چنت اسمع كلامه بأهتمام و تأكدت صخر حيل غالي على ابويه واغلى من مانتصور كلنا
وحبه الأم لعنة مو حب لا هي ارتاحت ولا هو وبيومين من وكعتها وجها انبلع واتغير
بأيام دخولهم للمستشفى ماعفنا هاجر ولا صخر اخوتي وكفوله وكفه وهالوكفه خلت ابويه يفرح ويهون تعبه من شافهم گلب على گلب بس وسام ومرته عمو على نفسهم وخلص رصيدهم يم ابوي
قبل طلعة ام صخر بأيام اتصلت بيه مرت وسام تكلي بلغي عمي مخلصين مسواك ومصرف ماعدنا والجهال مرضى نريد نراجع بيهم ليش هيج ناسينا ..اتصل عليه وميرد عليه ولايجاوب وسام هم
جاوبتها اني مثل ممبلغني ابويه مسبقًا
..ابويه يگول مبلغ وسام من زمان هالشهر مااله مصرف بس مصرف امه وصل وقبل شويه هي متصله بسراب تكلها ماوصلني وسام صارفهن وبلغنا بس يوصل لو يتصل نبلغه بلسان ابويه يرجعهن الامه بأقرب وقت والا يتصرف غير تصرف وياه
ردت عليه متنرفزة وتنتر
..ياااا ..صدك يحجي ابوج شنو معناها هاي
..كولي عمي ولتنترين بوجهي
..معليج شكول عنه بكيفي ..بس احنا وين نروح ابنه الجبير هذا احسن مايتصدق على البعض خلي ينطيهن النا يفرحنا احنا مسؤولين منه الغريب بشنو يفيده
..حبيبتي فيدو نفسكم انتو ولتفيدونا.. واذا هو يتصدق ينطي ايتام لو مرضى وكبار بالسن مو ناس تنام للظهاري بليه عذر
..وانتِ شعليج وهيج ادافعين لو تردن الفلوس بس الجن .. طبعا يا نوره مو كل فتره مخلصتها سفر وذهب وارقى الملابس ميشتريلج الا من نص بغداد وشوكت ماعجبج كلتيله اسافر كلج تم .. من غير التوصيل وحتى عمليتج لو مامرت ابوج مريضه جان اخذج تسويها من زمان ..بس وسام حرام ينطيه
..عزيزتي ترى ماخذه من ابويه مو من ابوج ولا من رجلج ..و معليه اني هذا كلام ابويه بلغتچ بيه من الاخير فلوس ماكو بحححح
نهيت الاتصال ووره دقايق لكيتها منزله ستوري وواصفه العمام ظلام والعمات حيايه
هي تقصدني اني حيه هزيت ايدي ولا تأثرت
وگمت امشي بالبيت واسوي الحلا وبطة
تسسس وهنه يضحكن
وطلعت متصله بأحمد هم تريد فلوس الوسام كايلها منو يكد عليه وهو نايم خل يحرك نفسه
على اساس يصير بعينهم يعني اخذنالنا بيها يومين محتوى خففت عنه قهرنا على صخر وشهله وابويه واحنا نضحك عليها
حتى الي يسويلهم زين مخلصان
عابد ماتاركهم ابد وحتى الجهالهم وي جهاله يشتري ..ومن تجي حتى سلام عليه وعلى مرته متسلم وتوصل كلام الزوجته تكلهم من يشتري ويجيب ممتفضل كله حلال عمي
عاد هو هم تركهم من ابويه وصاه وظلت محتاره وين تنطي الوجه
ثاني يوم اجو اهل ام صخر خطار جابهم وياه صخر من المستشفى وعزم ابويه وجدي وعمي سليمان ع وياهم لأن طبيعتهم هم هيج يحبون اللمة وي الخطار واحنا هم درنا لأن الفهمته ميعرفون اكو قطيعة بينهم وبين ابويه
مرت خالهم ماتت بجمال بطة وكل شويه وگالت من العرس اني حطيت عيني عليها القسور ومادريت مخطوبه الا هسه وانوب رجعت عليه وكتلها والله ابد مو ابالي زواج ولاغيته من بالي
ومن عرفنا المنو تخطب طلع
قسور ابنها الصغير توه متخرج من كلية القانون واني اضحك على بطة بكل مناسبة وسفرة لازم تنخطب ومحد ينتبه للحلقة بأيدها ولا عبالك بعدها صغيرة تجذب حيل مرات اكلها خلصنا منج حارث
ومرت خاله سألت على رشا هم.. وضاجت من عرفت بالجديد منفصله گالت ماتستاهل وفعلا رشا ماتستاهل ابد خاص عدها ولد بعده صغير خطيه ويحتاج ام واب
بس متأكده راح تعوضه هي سباعيه ومينخاف عليها
ظلت رشا منطلقه وياهم تسألها عن حالة ابنهم وفهمتها لازم ابوه يسوي كتاب استثناء مااعرف قبول من التربية لأن المثل حالته مينرفضون من المدارس.. الطفل حالته مو قوية ولاحالة ينخاف منها او تأثر على مستوى الطلاب الوياه
بيبيته فرحت وگالت
.. ادعيلج وي صلاتي اذا الله التفت للولد واتعلم والله اني وجده ماكلين همه نگول بعدنا بالدنيا نريد نشوفه حاله حال الاولاد ابوه هم رابط نفسه بيه ومايقبل يتزوج يخاف ماتجي وحده ع المرام وتظلمه
وحلا ادخلت وكالت بنات الحلال هوايه مو كل مرت اب مو زينه
عاد هنا ادخلنا اني وبطة وايدناها لأن هي راعت اخواني الصغار بهالفتره اكثر من امنا ومنا
مرات يطلبون شي نتعاجز منه نغلس عليهم هي ابد متتعاجز وهذا الي خله ابويه يأمنلها ويدللها اكثر
وبهاي الجمعة جانت عيونا على رنا زوجة عمي سليمان
رنا مواليدها نهاية السبعينات حسب ماسمعت وحلوه حيل طويله ورشيقة وسر جمالهم كلهم هي واهلها العيون ميزتهم كلها بعيونهم كلش حلوه وتجذب تنطي شبه الشهلة بس شهلا احلى رغم هي اكبر
اني صافنه اباوع الها وهي تسولف عن عمي جنها تسولف عن واحد ثاني
عمي وياها راجع شباب عشرين سنة وهذا الكل لاحظة بحيث ابويه نصب على عمامي كلهم بالعزيمة البعد عرسه وكلهم هو هذا سر تجديد الشباب ولتظل دوم عينكم عليه على ابو ابراهيم ميكبر
اتذكرت خالتهن وجهه اليلطم وحاجيت رشا
..رشا احلى شي سويتي اختيارج الها ..تدخلين الجنة بسبب عمي
ضحكت
..هو غير جان شارد مايدخل البيت الا اخر النهار بسبب الحيزبونة خالتي وهسه مايطلع من غرفته
والله مجننته الابويه اني لو مااستحي جان كل شويه وكتله شلونها افكاري
ضحكت
..والله لو اني جان قطيته قط مصاير
..عابتلج طلعتي صدگ محد يلحگج بالقط سمعت عنچ وعبالي يبالغون
..بس حمزة مثلي اني وياه بينا صفة مشتركة لأن توأم تعرفين
وحجيتلها ع الگتر والكيك البعناهن بيع الابويه لأن من شهلة
رشا خربت ضحك تگول سوده عليه عمي جان اني مشبعته بيهن من زمان بس مگايلي
خلصناها ضحك وساعدنا بتعزيل البيت هم ماخلينا شي ورانا
ومن طلعنا منهم وكت النوم رشا بالباب بره حجت خبر حمل هاجر طرنا من الفرح ووگفنا ابابنا ساعة واحنا نسولف بي وحجتلنا شلون شاك بيها من ريحة التراب ومحللها بدون متدري وبعده محاجيلها كايلها بالليل اگلها
وهسه عرفت سبب فرحتها المبالغ بيها
بنات عمي جنا نغار ونضوج من علاقتهن بي خاص من غزالة لأن قريبة العمرنا بس بعدين عرفنا السبب منا ومن اهلنا مو منه وشفنه حنيته والتمسناها وصار صخر بعز روحنا وفرحته تفرحنا مثل مانتشارك وياه الهم دعينا ربي يعمر داره بالفرح صخر مو مجرد اخ من اب وعازل نفسه لا كلشي اتغير
وهسه هو الأخ السبع ابو المهمات وذاخريه للشدد اني وخواتي وحتى اخوتي لو احتاجو شي يوسطوه على جدي وابويه وعمي ابو ريمة هم كلشي بأيدهخ
الله يحفظه ويفرحه بسلامة امه ويتمم حمل هاجر بخير وسلامة
قبل لانفوت بيتنا واحنا بالحوش لزمت بطة وحلا
رفعت اصبعي مهدده
..تحذير بالجن وحده منجن تسولف الابويه على حمل هاجر اريد اقطه قطة معدله
حلا ضحكت وردت
..والله موو بس تقطيه اطيرينه للسما من تكليله
صار العرسهم شگد كل شهر يگول بس لا هو مايريد اولاد ومانعها لو هي مفضله دراستها لو يخلفولهم ولد ويفرحون شهلة ع الاقل اذا مايهتملي المفروض يفكر بأمه
وهاي كل فتره يسولف عليه واكعد اقنع ترى بعدهم عرسان ويمكن مو ابالهم هذا كله
بطة باوعتلي ماقابله وهزت ايدها
..شگد تحبين الفلوس نوره
..اكوو عاقل ميحبهن
..اني مااهتم
..خل نشوفج من يحرك جيبه ويوزع بشاير هالخبر گليله مااريد
..لا من يوزع افرح طبعًا بس مااستغل المناسبات والفرص مثلچ
دفعتها ولي لاانگعج واسويج بطة من صدگ انوب ضعفت وبعدنا نسميج بطه اني انسى اسمچ براء
..ههههههه والله اني عاجبني مايفرق عندي خاص حارث عاجبه اسم بطة ويدلعني بطوط هم
كفختها على راسها اني وياها رويسية ونتعارك منا ونتصالح منا
..بعدج تواصليه هسه تنلگفين
..ابويه يدري بيه يراسلني ويتصل ومنعني بس من اللقاء لاتخبثين وياي حبابه
..وصدك ناويه تلغين نظامج لأن كلج احب السمن اكثر
..لا طبعا اني من قررت اضعف قررت النفسي وهم الصعف احلى عليه بهوايه ووزني حلوو هسه لانحافه ولاسمن
..اي عفيه لتتأثرين
فتنا بيتنا وصعدما الدرج ودخلنا الغرف يلا انتبهنا احنا متواصلين نسولف وماخذين راحتنا محد هنا وبس سمعنا صوت بابا اجه
نزلنا
حلا تحجيله شلون صخر شال عباس وشمه حيل وكايلها ريحته طيبه
وفرحانه حيل الفطيره بس لأن ابويه راح يفرح وصدگ هو فرح وشاله يشمه هو هم
..يابه شمام مو ولد
حاجيته اني
واديه الظهري واتمايل بدلع عبالك ضامتلي ضمه
..هلوو يابه
باوعلي وعباس اكل خد ابويه اكل خلاه محتار يدورله كلينس
..هلا بنوارتي سولفي بابا شنو العندج ..عمليتج اذا شهلة زينه وتمم فرحتنا وهي بأمان منا لأسبوع وتطلع .. اعتبريها تمت قبل الدوام
..حبيبي بابا متقصر فدوه العينك بس مو على هاي عندي الك خبر والله لو عرفته مااضمن من فرحتك شراح تسوي
عقد حاجبه
..يا الله خير ان شاءالله ...بس شسوي يعني وشنو هاي الفرحه
..خمن انت
..مااريد اخمن ترى راسي دايخ توني متجادل وي عبد وروحي طالعه
ماسألت شمتجادل وليش غمزتلي حلا احجي وهي تسأل
..شنو حاب تشرب چاي گهوه
..لا هاي ولا ذيچ مااشتهي وتعبان المفروض هسه نايم بس عابد لح ويايه واخرني ..هسه غير تحجيلي شنو الخبر
..راح تصير جد للمره مدري شكد نسيت والله الولد والبنات شكد كل وحده جايبه وي عبد ووسام
وصدك تاهت عليه وارد احسب باصابع ايدي اعدد ماخلاني استرسل من شفته خله ايده على راسه
..لاتگليلي وسام العاطل مرته حامل هم ..من الله يطيح حظه وحظها
..لا لا هو هذا هم خبر مهم عندي
ضحك يدري بيها لاهي اطيقني ولا اني اطيقها من زمان
..كولي اريد استغلك عبد ادري بي مرته على وجه ولاده وسراب هم حامل .. لو كايله اريد هالگد انطيج بدون هاللغوة هايه
..لااا يابه شنو هايه والله متخلي متعة للحدث مو ردت افاجئك هالمره انت جد من الطرفين ..هاجر حامل
اني حجيتها وهو بفرحه صاح
..يا الله رحمتك يارب ... تدللين على هالخبر اطلبين الي ابالج واگلج تم وبدل الطلب تلاثه وحلاوه وبطة يشهدن
ضحكت واني احارك ابطة افرك بحرحارة ايدي الها
..عملية خشمي منتهين منها ماتدخل من ضمنهن ..اخر اسبوعين بالعطلة ادزني سفرة واذا وي مآرب وعهود يردن يرحن للعمره بعد احسن وقبلها يتسلم بيدي مبلغ زين تعرف مو شويه من الحية تروح عمره لازم الصواغ ثگال ..وثالث طلب واهم طلب اتعلم سياقة
باوعلي مقلص عينه
..سياقة شنو ولچ
..انت گلت ماينرفض وكله تم
..كلتي اذب هدومي هم اكلج تم ..گعدي مالي خلگ اركض وراچ مراكز ومستشفيات.. السياره اخاف عليجن منها اخوانجن موجودين واني موجود والمكان التردنه ناخذجن
..لا بابا عليك الله بداعة عزازك ذولاك ..والله بس اتعلم واسوق بحضورك وتشوفني وتقيم يلا اكلك على سيارة
..السيارة منو يجيبها الچ اني هم؟ ..ابن الكلب الياخذج شيجيب ..يولي مو خواتج ذنيج مايوم طلبن طلباتچ كل طلب الچ تخليني اكل بروحي عليهن ماخذه طمع فيحاء كله بس روحج حلوه تشفعلچ
ضحكت وادلعت زياده
..بابا مااتزوج اني ابقى يمك ..والبنات انت هم ممقصر وياهن مامنتظرهن يطلبن
..شسوي بيچ باقيه يمي
اتقربتله وحضنته
..ماأگدر افارگك
اخذني الحضنه باسني
..ادللي وهاي لعيون ابن ماادري بنت صخر.. اخوانج يعلمونج سياقة وسيارة تجيج هم السنة الجاية بأذن الله اداومين بيها
..احلى اب بالمجرة ويلوموني شگد احبك بس بيناتنا والصدك غير انت من اتزوجت حلا صرت الطف بهوايه ملاحظ هالشي
..يعني اذا انتو ملاحظين اني ماالاحظ ..حلا عدها عقل امج وام وسام يطبگن عقولهن طبگ مايجي ربع من عقلها
ضحكت وقررت اصعد واخليهم براحتهم وبطة اجتني ضايجه
..والله احسج فرحانه خلصانه من امي شبيج هسه اني احب حلا بس احسج انتِ تتعمدين تبينيله الفرق وتخليه مرتاح ابعدها اكثر
..هايه الحقيقة مااحب اجامل امج عمرها ماخلتنا بعينها وحاولت تحتويه الخاطرنا ع الاقل.. وتخفف مشاكل ولج هم اكو يوم مر ماسوتلها عركه شكدها بعدين اني من صغري هي معتبرتني حصته وتكلي انتِ بنت ابوج مو بتي
انتِ بس لاعاجبج ترحين الامج لو ترجع ..احجيلچ شي وتأيسين؟
باوعتلي بزعل
..شنو
..امچ مخطوبة حبيبتي الواحد جبير وارمل عنده اربع اولاد متوسطة وابتدائية وناويه هي تراعيهم والله يعينهم على امچ مصيبة وكعت على روس هالأيتام والله ينتقم من خوالج لأن يدرون بتهم ماتصلح ترعى ايتام وانطوها تراعيهم ع الاساس هي شوكت راعتنا خلف الله على سراب ..وهم خوفها من ابويه مشانا سنين
ومو بس هيج موصين الابوج خسرتها عبالهم راح ينوح عليها ابويه ملتهي بقهره على شهلة ومو بحالها من الاساس وحمزة مايدري وشايله هم لو دره شيصير بي سوده عليه هسه ينقهر
امج اكرهه نفسيا بس خوفي من الله يخليني انجب ومااحجي لاتستفزيني انتِ زين
عفتها تبچي الهسه تحن عليها بطه.. اني صح الومها بس هم اعذرها بعدهي صغيره وتحتاجها وتشوفها مهما سوت تبقى ام ومحد يعوض مكانها مو مثلي اني من الصغر اختلف عنها
خليتها براحتها مرت فتره حسيت بيها نزلت من سريرها واجت يمي
..بس لابعدج تبجين
اتجاهلت سؤالي وشهگت
..يعني راح تصير ام الغيرنا
..الله يعينهم بس
..هي صح تبسط وتصيح وقاسية مرات بس تحبنا والله وانتِ كل مشاكلها وياج لأن تريدج الابن اخوها وانتِ رافضته
..حسبي الله عليه كرهني بالزواج كله وجانت تدري وتتغاضى وين اكو ام تتقبل ابن اخو يتحرش ابتها وتجبرها تروحلهم بس حتى اقتنع وارضا.. مافكرت مره بنفسيتي شيصير بيها وشنو من ليلة رعب تمر عليه
حضنتني
..الله عليج جانت تدري
..تنكرني تكلي تتبلين عليه وميسويها ويريدج صدك
حبيبتي بطة لاتتخيلين اني مااحبها محد ينولد يكره اهله بس المواقف تخليني اشوف البعد رحمه مرات
..زين ليش الهسه تواصليها
..اواصلها طبعا تبقى ام لازم ينسأل عنها وهم هي تحتاج مصرف وادزلها لأن حمزة مقاطعها ووصاني عليها
..منين ادزيلها مصرف منج
..من حمزة ومني ..وحتى ابويه عرف بينا وماحجه ..بس اخوج گلي مااريدها تعرف مني وامشيتهن عليها كلهن مني ..وعبالج جازت نفسها امي ماتتغير تحسسج بمنية جابتج للحياة
بليلتها تأخرنا يلا نمنا
ايام وطلعت ام صخر من المستشفى
ابويه وصخر بهاليوم عبالك ضراير يتسابقون
ابويه جهز ذبايح وصخر هم جهز واحمد وعبد مبتلين بيهن لازمين سجاجينهم ومنتظرين لأن الاثنين راحو يطلعوها
واجه عزام عمار وعمي هم جابو فدا السلامتها من عمي سليمان
الكل فرحان وصارت طلعتها عبالك عرس لأن هي وصلت الموت حسب كلامهم ورجعت للحياة يعني طلعتها ابد ماجانت عاديه
حتى اخوانها جايين بس عوائلهم كالو بعدين يجون من ترتاح هي
فاتت السيارة نزلتها قريب وياها خواتها اثنينهن
هاجر طلعت اطش جگليت وياها سراب هم واحنا نباوع من بعيد منتظرين جيتها
انتبهنا احمد ذبح الذبيحه وابويه صاح بعبد يجيبها هنا يقربها يذبحها يمها هم
اما عمار ذبحها وراهم على جهه مامهتم ولا عمي شرط مثلهم الا جوه رجليها
ومن فاتو عمامي للأستقبال الولد ناصبين على عمي سليمان يكولون الذبح هذا مو الصخر صخر بيش كيلو هذا شغل العروس والنسب
بدينا بالمطبخ نغسل اللحم ونجهز الخضار والتمن انكعه وانغسله وهم بره يطبخون صخر ومهيب وعمار والبقيه يساعدوهم
واول مافاتو الولد يشيلون اللحم صاح حمزة من شاف مآرب وعهود
..هلا بالحية الجبيرة هلا بام ياسر ..ام انس حية خانسة سمها يذبح اكثر
ضحكن البنات وعمار يسأل
..ليش ولك شمسويات الك
.. مو الي مرت اخوهن سمتهن حيايه مرت وسام الله يعلم شمسويات الها حجاها وغمزلي
عمار گالها
.. مابيجن خير وتلزمنها تشوفنها السم على اصوله
ضحكنا كلنا واحمد گال
..هنه ذني يمتى بيهن خير ووكفنها عد حدها حتى تسميهن ..اني ونوره الحيايه والظلام وبس البقيه هيج خلتهم تحصيل حاصل
ادخلت اني ايده
..اي والله كالتها عليه المچلوبه
ضحكو وطلعو والبنات رجعن فعلنها محتوى الجلسة
انظف بالخضره ونغتاب بيها بدون اي شعور بالذنب وبهالاثناء وبدون مقدمات اتصلت بسراب
جاوبتها سراب وشالها على خشمها خلصت نص الرابع وبعدهي تكره ريحة فور اللحم الملا الحوش بره ووصلنا للمطبخ اشرنالها تفتح مايك
بس گالت الوو حجت بطرف خشمها
..هاسراب انتِ وين
سراب حست بيها تستجوبها يم امها حتى تخلق مشكلة وهي بدون شي عالگه وكل شويه موجهه موجة الدعاوي على وحده منهن
..يم اهلي وين يعني ابيت صخر من البارحه بلغنا غدانا يمه مسوي فدا السلامة امه
ردت بكل وقاحة
..اي زين عفيه من يجهز الاكل بلغيني ادز جداري بيد سيف واخوه وخل واحد من عمامهم يزتهم بيهن ماطبخنا اليوم حسبي حسابنا ..حسبي الله من الي چان السبب بجوعنا ام خشم تلاگيها بعافيتها ان شاءالله
فتحت عيوني يااا هاي قاصدتني الي
بسرعة سحبت التليفون
..ولج مو اني محترمه العمر البينا ام خشم منو ترحين فدوه الخشمي
وشنو مجوعتكم اني انتِ ورجلج ماعدكم احترام لا الجبير ولا الصغير شايفين نفسكم على مدري شنو لابيكم فايده النفسكم لا الجهالكم عيشتيش عيشتكم هسه اني مانعتكم لو شغل ميشتغل ويعين نفسه نايم على وجهه يمج شكو .
سراب تخرط بخدها وتعضلي اصبع وتتوسل اسكت ومآرب وهي تصفي بالكاونتر صاحتلي
..بعد ايدي
وعهود تضحك ولايمها
حلا فاتت وي رشا لكنها عالكه وهي ترد عليه
..العانس حقج تغارين مني لأن اخوج نايم على وجهه يمي كد مايحبني ميحب يطلع ويفارگني ساعات
..اي نايم على وجهه على فطور رجليج ام جيفه نظفي بيتج من الوصخ المخمخمة هو انتِ وياه صنف
سحبت التليفون سراب من ايدي كوه واتمشت بعيد عني سدته ورجعت تحجي
..ولج نوره ام السان اجنج جينات فيحاء طفرن عليج اليوم ولج شبيج مو كنالج ختولي خلتج براسها ماترتاح الا تخلي وسام يهيج عليج
كتلج تركيها تريدلها حجه وعيب منا لو سامعينا صخر وامه وخالاتهم هنا والله صوجي اني
رشا ضحكت كالت
..لا ماوصلنا صوت ابد
وحلا اخذت صينية ملتها عصير وراحت ضيفتهم ورجعت تفتهم من حجيت
شاورتني
..نوره سكتي ولج ختولي هو الوضع على وشك الانفجار ابوج البارحه بلغ عبد يفك غرفة امه ويوديها البيت وسام يشدها هناك يعني مالها رجعه على هالبيت ابد ..وحسب معرفتي القليلة بيها ماراح تسكت تتخبل وابوج يقسم يمين رزق انتهت وممنوع تدخل بيت يفوته هو
وعبد ماراضي البارحه وكايله اني ابنها ويجوز يعجبها تجيني تطردها شلون
ابوج كايله انت اطلع هم بيتك كمله واطلع
..ليش هو عبد عنده بيت
..اي بس مو هنا باني هناك بنص بغداد وقريب الاهل مرته وقريب الشغلهم هناك بس ماناوي هسه يشيل متردد يكول خاف مااتحمل العيشه هناك متعود ع الريف هنا
..عبد دومه سكوتي لو عرف وسام يتخبل صدك
بعدني احجي وفاتت بطه وجهه اصفر وخايفه
عضيتلها اصبع متحلفه بيها
..وين جنتي
بعدهي تريد تحجي واجانا حمزة بركان
بطة انهزمت وهو يتحلف والبنات بصوت ناصي يهدنه ماسكت الحد ماحاجيته اني واترجيته الخاطري يهدأ ويحجيلي واني اشلعله اذنها
گال
شفتها راحت للبيت كلت تحتاج شي بس من شفت حارث لحكها كلت ميخالف خطيبته وخل يشوفها من الباب بس من فاتو فتت وراهم الادبسز مدخلته جوه وحاضنها
رزلته وطيحت حظه وهي حسابها يمي
..بس اهدأ واني اتصرف حبيبي انت لحد يسمع منك بس احنا وبينا زين ياعيني
غسل وجهه بمي بارد وطلع
رحتلها گرصتها ع الكاتم خليتها تشيط وماتكدر تحجي وجهه صار احمر دم
..اني الج نرجع وسهلة ..هاي سوالفه موو هو راد هيج
..شبيكم شمسويه غير خطيبي وحلالي صاير براسي فد مره حمزة ميشوف نفسه البارحه ملتقي هو وبنت خالج ماگال عيب وحرام
خزرتها وبگلبي صح كلامها بس شسوي ماانطي بي
..انجبي ولتراددين هو يريد مصلحتج ابوي مانعج واخواني هم وكلتو احنا نتحمل وين صبركم اذا ادورون بيوت فارغة وختلات
...
هاجر ...
خفت من جية حمزة مبين اعصاب نار لو لازمها بلحظتها ينهيها حاجنه البنات مااهتم الا النوره اتعجبت على قدرتها وشلون امتصت غضبه بحجايتين مبينين يختلفون بعلاقتهم ماجنهم اخوه ام وابنها عبالك
طلع واعصابه اتحولت النوره وجهه جمر ومن عرفنا الموضوع وشغلتهم بسيطة
هديناها وفهمنا بطة ترى اهلج ماعدهم عداوه وياج بس خوف وحرص عليج
اني عن نفسي مالحيت لأن كلت حقها بوكتنا اني وصخر يومية نشاوف وسراب هم فترة خطوبتها صح قليل بس حتى قبل حنتها بساعات اجاها فارس ويوميه جايب هدايا
اما حارث هم الولد متخوفين منه وخوفو عمي
وهم لأن خطوبتهم مطولة
بعدين سولفن بعركة نوره ومرت وسام ماجنت حاضرتها جنت يم عمتي ضحكت على نوره تلوم بسراب ماخلتها تحجي اكثر
سألني على صخر شلون استقبل خبر الحمل وحجيتلهن فرحته فرحلي اكثر صرت بهالفتره اقرب الهن خاص الكبار ماجان بينا قرب هالكد
مآرب كالت
..فدواته هو اليوم مبينه عليه الفرحه اول امس من شفناه وجهه مبلوع بلع ولا عبالك هو
...مو مياكل كل هالفتره وجبه ميكمل بس البارحه مانام للصبح عبالك ليلة عيد عنده والله محتار شلون يستقبلها تدرن حتى الاضوية مال البيت غيرها احتار شنو يسوي وشيتسوك ويجهز من غير النذور الناذرها السلامتها
..الحمدلله قر عينه بشفائها وجازاه بفرحه ثانيه
سمعنا صوت عمي ابراهيم يم عمه شهله وخواتها وزوجات عمامي هم جايات ام عمار وام فارس وام مهيب
قبل شويه كد السلام وانسحبنا سوالفهن مو يمنا ومتناسبنا وهم عدنا شغل .. بس من اجه عمي الفضول صار الف عدنا محتاره شلون اروح وعمي صاحني
وصاح البنات وزع فلوس للكل حتى الزوجات اخوته بشاير سلامة عمتي وحملي
متت خجل من باركلي يمهن وباسني
بلحظتها حسيته ابويه واقرب
عيون عمتي شهلة تشع فرح ومغورگة واحنا بهالوضع وفات صخر
خليت ايدي على گلبي بس لايفشله كدام هالمجاميع كلها بس صار العكس گعد بصفه وگله
..شدعوه هالگد لو صار وانولد شتسوي
ورد عليه عمي بكل ثقة
..اسويله المايخطر على بالك ..كلشي ماسويته الك ومتندم عليه الهسه اسويه
ماحجه صخر دنگ
واحنا سكتنا كلنا هدوء غريب ونسوان عمي مستغربات حيل وخالاته مافهمات الوضع
وغير الموضوع هو من حاجه عمتي وكلها اتمددي ارتاحي لاتبقين هيچ ..سولفها بميانه چنا يمها ولا بيوم هم مفترقين وطلع
عيونه كلنا جانت تتنقل بين عمتي وصخر من طلع عمي راح باس راسها وجف ايدها وسلم على نسوان عمه وشكرهن على جيتهن وطلع وراه
اتحولنا احنا كعدنا يمهم وعمتي شهلة من شافتني صاحتني وصتني مااتعب واتشكرت من البنات ودعت الهن على جيتهن وفرحتهن ومساعدتهن الي والصخر والازواجهن واخوانهن
دعاء عمتي يطلع من كلبها باحلى واعذب الكلام
نسوان عمي رادن يرحن قبل الغده ماخلتهن وكالت الاختها رنا بالج يطلعن اول طبتهن البيتنا هاي
وفعلا اكلتهن بلسانها وماخلتهن يتحركن
سألتني خالتهم ام علي شكد الي
..والله خاله مااعرف حسابي مضبوط لو لا بس على حسابي شهر ونص
عمتي شهله بفرح گالت
..احمد ربي واشكره ..وريت بزرك يالحنين كثر الثريا والميازين ..انه طبت من سمعت بصخر جايه جاهل كل الم راح مني بعد روحي اول وحده من بعده دريت
الدمعة صارت بطرف عيني مااعرف شرد الها بس حسيت بشعورها وكلامها لامس گلبي حيل
وبيومها احلى يوم عشناه بعد الغدا ماطولو بس كملن البنات تعزيل وترتيب وياي راحو
وظلت بس خالتي ام علي
لأن رنا ماخلتها عمتي شهلة طردتها طرد
وبالليل ارد انام واجت رسالة بكروبنا من سراب
..دريتن بالخبر
..شكو شصاير ؟
..طلع اليوم حنة عثمان النذل علكوها هسه والله گلبي يم رشا
البنات راسلن نوره وبطة يسألن وحجن ضايجات
واني انشغلت باتصال صخر
فات وهو يحجي
..من عيوني ابو سجاد صار بسيطة هايه اني افهم وابلغك
زين ليش ماتفهم انت احسن ..لا شكو بيها استفسار شياخذ قابل ..شنو مااعرفك اني اجربك قابل
باوعتله ودز رقم
..منو هذا
باسني بخدي
..تعبانه حبيبتي
..لا والله مو كلش البنات ماخلني اسوي شي
..تدرين شگد فرحان احس كل الخير على وجهج شفته ..هاي المحبة ووكفة اخواني وخواتي ماحاس بيها قبل وكل الخير اجاني وياج
..ياحبيبي انت الخير كله
..شلونها رگبتج
ضحكت
..مشتاقتلك ..كلتها وغمضت اضحك
وهو ضحك على ضحكي براحه اليوم كلش مختلف رجع الطبيعته الحلوه
دنك عليه باسني بيها بلهفه
كطع مشوارنا احمد اتصل
جاوبه لأن يعرفه ميتصل اذا ماكو شي
سمعته گال
.. بسرعه تعال
طلع مستعجل ووصاني
..لتحجين شي الامي لو كعدت وسألت كولي نايم
ظل بالي يمه ورجع وره فتره ضايج وتعبان
..شكو اسم الله ظل بالي يمك وماسألت احد خفت موضوع متحبون تحجون بي
..حمزة عارف بأمه مخطوبه وعاقده وكم يوم وتتزوج واتخبل يريد يهجم عليها ابيت خواله
..مو من حقه ترى
..كلنا كناله مو من حقك وطيحنا حظه منطيناه مجال ابد بس بالحقيقة الموضوع مو سهل وحقه ينقهر بعد هالعمر مو سهلة
سكتت افكر البنات ماحجن يجوز ميدرن خطيه
ورجع اتنهد بحسرة وكال
..اليوم حنة عثمان النذل
اتصلي بلا برشا
اتصلت مشغول
گال شويه ورجعي اتصلي
لكيته مقفول
ظل باله يمها ثاني يوم داوم ووصاني الصبح اتصل بيها
وصدك انتظرت الضحى واتصلت جاوبتني زينه ماحبيت اقهرها واطرق العثمان وعرسه
حاجيتها
..عمتي وصخر يسألون عليج جيبي حمودي وتعالي
..اني هم اريد اجي اليوم ابات يم عمتي
..هلا بيج حبيبتي تعالي
وفعلا اجت وره شويه من اجه وشافها اخذها يحجون بينهم ومن رجع حاجه عمتي ع الزيارة هالمره اخذج ويانا الكربلاء بس امي تتحسن اكثر اخذكم
وعبالك بهالايام مايمر يوم بسلام
العصر اتصلت نور تبجي تريد صخر يروحله لأن متخبل من عرف الليلة زفة حبيبته يكول شلون زفتها وقبل اسبوع اتشاوفنا واتفقنا على زواج
صخر راحله طول فتره بس من رجع وحجينا عنه يگلي
..صح مجروح ومصدوم بس حمزة سبع ماينخاف عليه من شافنا ملتمين عليه ونريد نهديه كال
شنو قيمتها وهيج ملتمين عليه وحده مثلها مشكلة وي اثنين بوقت واحد قندرة ماتسوى
بس بداخله جرح مايلتم ونظراته تشرح كلشي
..اذا هو هذا موقفه الهوسة الصارت شنو
..الهوسة طلعو اليوم دازين غرفة ام وسام وهي متخبله وعايفه بيت وسام ورايحه الاهلها ومتخربطة عدهم واجو اخوانها يحاجون ابوي وتعرفين ابراهيم باله واسع وخلگه طويل استقبلهم خوش استقبال
انوب خلاهم يعوفون سالفة اختهم ودزهم طرف على اهل مرت عاصم مدري شعنده عليها هم
لأن بلغهم ترجع البيتها وتسكن امها يمها وتعوف كل مخطط الها وتصير ادمية والا اني اتصرف وكلشي بدليل
..شنو مسوي عليهم صولة عمي
..الظاهر صولة
رجع رن تليفونه
قريت اسم اسعد
واسمعه يتشكره وصخر يكله ماكو داعي هي هم بلغتني ماسوتلكم شي وشتريد اني حاضر بالاگدر عليه وبلغ عمتي رنا هم اذا احتاجيت شي بعد اي استفسار متگول شي
..يحجي عن رشا ؟
..اي ..احتاج منها استفسار ويعرفوهن خواتي ذني ويخصني حيل
وينها هي شو صيحيها
..بسابع نومه هسه
..اخذت منوم اكيد اليوم وصتني عليه ..الكلب عثمان مامرتاحله من البداية النذل والله ندمه شلون انطيناها
صفنت عليه ومثل اللكيتلي سالفه صحت
..اكلك
جريتها جر بيه طبيعه مرات هيج من عندي موضوع متردده احجي
ابتسم على طريقة كلامي وگال
..اي گولي اسمعچ
اتقربت عليه حيل وهو باسني واتمدد وجرني عليه
..خاف نفسها الي يحبها حمزة
رد متعجب
..معقولة؟ راحت من بالنا والله ولافكرنا بيها
شال تليفونه وابتعد عني وفجأه قرر يطلع
طلعت وراه للحوش
وهو يتصل اجاه احمد من الحايط صاح
..يمعودين خبلتوني والله أريد بس اخابرها شبيكم كل ماكلت الوو اجتني سالفة طيرت نص يومي حتى البنيه ملت
..وين رايحه يمعود لاحك على الاتصال ..تعال اطلع اريدك بموضوع مهم بس حمزة وين
..حمزة جاي ينركل ولايمه السالفه
..مو حمزة هذا ..فعل وضعية ابراهيم ووراه مصايب
طلعو واني رجعت
لكيت عمتي كاعده تريد تتوضى هي متنام الا على وضوء اجيت اساعدها كالت لا زينه عمه
..صخر وين
..نام عمه تعبان
..نوم العوافي بعد روحي..روحي عمه ارتاحي انتِ هم
مشيت عنها
اتظاهرت بالنوم وبالي يمه واريد اعرف الدار بعقلي وعقلهم صدگ لو مشتبهين بيه
باوعت تليفوني ماكو رسالة
شراح يصبرني
اتصل بيه عمي ابراهيم سأل على صخر
كتله طلع وي احمد نهى الاتصال وماحجه شي
اليوم الكل مو طبيعي
وظلت ايدي على گلبي
تأخرو حيل يلا اجه والصدمة طلعت هي شكنا بمحله
سألته متعجبه
..هو مايدري بحمزة يريدها
..مااعتقد يدري ..بس امه شلون ماعرفت تتصرف وتمنع هذا الزواج
..عجيب والله وهم شلون اتكتمو ع الخبر وگالو غريبة الخطبها
..يمكن ابالهم بنات عمي ملطلطات مثل نسوانهم ويخربن عليهم
ثاني يوم لكو حمزة صاعد الكليته
والاسبوع الثاني مااجه ومن سألو عليه صديقه كلهم نزل ويايه
احتارو بحمزة وين ماخلو احد ماسألوه
اخر شي اتصل بيهم الجمعة بالليل متأخر وكلهم باجر صاعد اني و زين لتقلقون بس ماالحك اشوفكم
بعدين نسولف
عمي گلهم خايف ليروح الغير درب
وهيج استمر حتى من ينزل يجي اخر الليل بس ومانزل يوم كامل بس من سوت نوره العملية
صخر واحمد مصوريها اله بالبنج بس هو تذكره وكل كلامها اريد حمزة
وخطيه اجاها وخلص اجازته يمها
بهالأيام قررو يزوجون احمد وامه ابد ماقبلت تصالحه وعمي ماقبل ترجع
وحددو عرسه بعد اسبوعين اتصلت ابنين واتي اعرف عدها علم مسبق قبل لاتخلص العطلة هم متزوجين
بهذا الأسبوع قرر صخر ياخذنا نزور ويانا رشا وابنها وبطة هم لأن صخر شايفها ضايجة كلها بدلي وتعاي ويانا
چانت زيارة حلوه ومريحة واتونسنا بيها نسينا كل همومنا
واني بالفندق اتصلت امي تريد تجينا وبلغتها يومين وراجعين
حجيتله بصعوبة وعيني تراقب ردة فعله
لو جايه قبل الصار جان طار بيهم من الفرحه وتمت فرحتي بجيتها بدون احراج
بس من عرف مافشلني وگال كل الهلا بيهم وعمتي رحبت اكثر منه
رجعنا واتصلت بيها تجي
وقررت تجينا هاليومين بديت احضر وبگلبي شعور غريب مااعرف شنو خوف لو فرحه لو احراج بس ماجنت طبيعية ابد حتى هو حس عليه
صفنت افكر واتذكرت بزيارتنا كل واحد منا اله طلب رشا جانت تبجي وتدعي مبين بگلبها نار مخمودة واني بگلبي ادعي ربي يصلح علاقتي بأمي وارتاح
وبطة دعائها كله الحمزة الشاغل بالهم هم وعمي
متأملين خير بعرس احمد يغير من نفسياتنا الكل مجروح ويداري جروحه والله سبحانه ماقصر حسيت اول بوادر للخير جية امي اتمنى تفهم وضعي وتبطل شك بعمي وتثق بيه
وسبحان الله بنفس اليوم القررت بي امي تجي اتصلو خوال صخر وبلغوه بجيتهم
وبهالحالة وحدي مااكدر طلبت من البنات يساعدني نوره عمليتها بعدهي مطايبه
وبطة يمها اجني حلا ورشا
اول ماطبولنا خواله وبعدهم بساعتين اجت امي وجايبها خالي وياها مو زوجها
حيل فرحت بيه حضنتني بدموع وعينها تتفحص كل مكان وكل الوجوه
متعرف ابو البيت من الخطار ومن عرفتها بيهم وشافت صخر
گالت
..شكله مو يم اسمه وصوته ..صح مبين انفه بس شكله يشفعله
ضحكت وهو دار عينه عاگد حاجبه الها جنه يكلها سمعتج ومو هاضمج بقيت مثل الهبله بينهم اضحك واصفن
الحد ماعمتي رحمتني وكالت اخذي امج ترتاح بغرفتج الحد الغدا
اخذتها وعينها تتجول شافت غرفتي
وسألت
..انتِ زينه
..زينه ماما الحمدلله شتشوفيني
..الف الحمدلله مبينه مرتاحه وعمتج خيره
..كلش اكثر متتصورين ..واني حامل هم ماحبيت ابلغج بالتليفون خفت من ردة فعلج
..ليش ياماما خفتي غير متزوجة.. صلوات الله يتمللج يابعد روحي
اتقربت عليه حضنتني
وانطلقت اسألها ع الكل
على جدي وبيبي رغم جرحي منهم بس ماناسيه بيوم من الايام ربيت بينهم واتمنى بيوم اوصلهم واشوفهم حنين بگلبي عصف حتى للشباك الاباوع منه الصديقاتي الي جانن كل حياتي وفجأه انقطع كل وصل
كالت هوايه يسلمون ودزولج هدايا وحجتلي عن صديقاتي واهلهن
جنا منطلقين نسولف بكل حب واهتمام رجعنا الايام قبل من جنا نخلص ساعات نتسامر بيها سوه
الحد ماطيرت مخي بسؤالها من سألت
..بيت عثمان قريب اباركله بزواجه
..يتبع ...