بقلم نور الشمس
......
سراب...
چنت گاعده متخطيه المشاكل الصارت كلها واتمنى الكل مثلي ينشغل بفرحتي ويترك القال والقيل ورغم بالي ينشغل بهاجر ووضعها وابويه وحيرته بيها بس الفرحة الي بداخلي تسرقني من بين كل هالضوضاء الأجواء الفرح
مستمتعة بالهلاهل ووجوه المهنئين،
عيوني وبالي يمهم وگلبي بمكان ثاني .. عند ذاك الحبيب الأنتظرته هواي ..چان حلم و صار حقيقة گدام عيوني مشاركني احلى واجمل لحظاتي وسبب فرحتي هو.
اكتشفت سعادتي الحقيقية بلحظة ادراكي ان الأنسان الانتظرته سنين ورغم بعد المسافة وانقطاع التواصل
بقى وفي البذرة حب فطرية انزرعت من الصغر
بلحظة الزفة وگعدته ويايه ابيت اهلي
كلما وگعت عيني عليه.
رجف گلبي بفرح يشبه فرحة المسافر من يرجع ويشوف الوطن بعد غيابٍ طويل.
چنت ابتسم بدون مااشعر وأخفي دمعة صغيرة كلما اتذكر الأيام الچنت اكتفي بيها بالأمنيات والدعاء.
واني اخفي حبه بين ثنايا القلب والروح.
بهذه الليلة.. حسيت أن العالم صار أكثر هدوء.
وأن كل الطرق المتعبة المشيت بيها قادتني إلى هذه اللحظة بالذات.
بطلت اخاف المستقبل.. من صارت ايدي بأيده
طلعت من بيت ابويه واني اسمع ضحكات الأهل والأحباب ..و بچيت من سمعت صوت ابويه المخنوگ بعبرة وهو يوصيه بيه .
حتى اخواني ودعوني بحزن ودارو دموعهم عنا واحساسهم بفراغي الاتركه بينهم وصلي و بينلي شگد وجودي چان يفرقلهم ماقصرت وياهم يوم ولا راح اقصر بيوم حبي الأهلي وابويه بالذات ماله حدود
انتقلت البيت عمي نفس وجوه الحبايب الرافقتني بيت اهلي رافقتني الهم
ماكو شي غريب
ماچنت محرجة بينهم احسهم اهلي ومراح نطول هنا عدا شهرين وننتقل البيتنا الخاص بينا
اشوف الكل يحجون مندمجات من اصوات الغنى والهوسات مايوصلني الكلام بس انتبهت البطة تروح وترجع الهاجر وبنات عمي ووجهه ابد مو طبيعي ..صحتها وكتلها صيحي هاجر وياج
اخذوني الغرفتي وردتها وياي بحجة ترتبني بس ردت ابعدها عن هذه الاجواء لأن حسيت صاير كلام عليها
دخلتلي مبتسمه رغم حسيت بقهرها من عيونها
عندي علم بظرفها بس احس اكو شي اعمق صار واكدتلياه بطة بشكل مختصر من كالت الحبايب وتقصد بنات عم ابويه خوات مرت ابوها وكرايبنا من خوالي واقارب فيحاء هم
خلن هاجر بتخته وثرمنها واشكال الحجي الماسامعيه يتناقلونه هنا ورشا وريمه متلاغيات وياهن خاص خالتهن مرت ابوهن من ضمن اليحجون
ردت اشغلها دزيتلها مقاطع الحنة مال الولد الدزهن الي فارس متأخر چانو مسوين جوبي وجايبين مطربين ودفوف واجواء تجنن وكل ولدنا بيها يچوبون وعايشين احلى الاجواء
واحلى مابيهم وجود ابوي ولعبه بينهم
شافت منها مقطعين انتبهت الصخر سألت عنه
..ليش هيج كئيب لأن زواجج وانتِ اخته لو غير سبب
..مااعتقد هذا السبب بينا احنا العمام عادي بس شوفيه اباقي المقاطع يچوب وياهم گلبي بيهن على راحتچ .
وهي تگلب بيهن گالو راح يجي العريس يزفوه
اتبخر كل ذاك الهدوء توترت وهنه طلعن
ولمن اقترب مني . حسيت وكأن الزمن تباطأ لحظات. باوعتله بعيون تلمع بالسعادة.
وشفت عيونه وكأنها تكلمني و تبوح بمشاعر مدفونه:
"ها نحن أخيرًا... بعد كل انتظار، وبعد كل شوق، أصبحنا بدايةً واحدةً لحياةٍ حلمنا بها طويلًا."
چانت ليلة زفافنا بالنسبة الي مو نهاية قصة حب هي أول صفحة من العمر الي اتمنيت أعيشه وياه يوم بعد يوم، وقلب إلى قلب.
اباوعله مبتسم وعيونه مليانه ثقه
سماره الأحبه ولمعة عيونه البنية الي تشع فرح من شافني بفستاني
وواگفه منتظرته بيدي شمعة مضوية من تقاليدنا تشعلها العروسة العريسها
استلمها من ايدي وطفيناها سوه باسني بوسه سريعة بطرف شفتي واني انفخ الشمعة وياه
اتراجعت مرتبكة ضحك وهو يخطفني بحضن سريع
بعدها ساعدني اغير بدلتي
وگدر يهدأ خوفي وهو ياخذني بسوالفه البعيد الأيام حبنا العذري ابداياته من صرنا نستحي نرد حتى السلام البعضنا گدام الأهل منا وعرفنا بدواخلنا اختلفت من ابناء عمومه المشاعر اعمق
جابولنا العشه اتعشينا وبدا تليفونه يرن رنة بعد رنة طفاه وهو يسب ويلعن وبس صارت عينه بعيني اختفت ضوجته وحل محلها الفرح والسرور
وابتدا مشوارنا الحقيقي متحدي كل الظروف
في تلك اللحظة ومن أعماقنا كنا نردد بصمت: الحمد لله على هذا الفرح الذي جاء بعد صبر، وعلى هذا القلب الذي وجد قلبه، وعلى هذه الليلة التي ستبقى أجمل ذكرى ما دامت الحياة.
...
بطة ...
رغم مشاكل امي وابوي صرت متعوده عليها امي من النوع الي تلح وابويه يجمع يجمع وينفجر
وهاجر قبل لايجيبها حذر امي وبلغها هذه امانة شخص غالي و ماممكن افرط بيها ووعدها كل مدللها تتكرم وتزيد مكانتها بقلبه والعكس اذا اتصرفت تصرفات تضايقها
بس للأسف امي بدت تتغير ومااعرف شنو اجه ابالها حتى احنا صارت توزنا على ابوي من جهة يرفض عرسان يحبونا ميريدنا ندلل ونرتاح مثل بناته الكبار حسب كلامها ومن جهة مدلل هاجر اكثر منا
نوره علاقتها بأمي بدت تنعدم واني على كد اسمع منها واحاول اغيرلها افكارها او اشرح قناعاتنا واكوم من اشوفها بدت ترزل وعلى وشك انبسط اشرد البيت ابويه الجبير وهذا البعدني عنها قبل وهسه بزعلتها صارت ابعد
اساسًا بهالوقت بالي مو يمهم بالي كله يم سراب الي تحضر العرسها شلون ممكن اتحمل فكرة فراگها
وعيت عليها ماخذه دور الكل ولامتنا يمها شلون اتقبل بيت ابوي بعدها
وشلون ممكن اكدر ارجع وانسجم وي امي وابيتنا حتى لو رجعت .. والأسوأ بزواجها امي ماجانت موجودة وابويه منع رجعتها ظليت على تواصل وياها وماخلصانه من الرزايل والمسبة مااعرف شنو تريد نسوي تريدنا نهجج هاجر احنا وترضا عنا ومستحيل نزعل ابوي بأي تصرف يضوج منه وخاص هاجر صارت اختنا وحبيبتنا نموت عليها مؤدبة محبوبة وتبقى بت عمنا مانفرط بيها مو معناها مفرطين بأمنا بس هي لازم تستوعب الي تفكر بي غلط
وسراب هم هوايه وصتنا بيها والهسه متخوفه من فراكها
المهون عليه هي مو بعيده واذا اضوج موجوده هاجر وحلا وبيت صخر ونستنا الثانية اني والبنات
بهالفترة بديت الاحظ تعلق هاجر بصخر واهتمامه هو بيها وماحجيت لأن الحمدلله وعيت مو كلشي ينحجي بس واضح اعجابها وواضح هي تفرقله
خاص بعد ماصار يدزلها اكل بعمره ماسواها حتى وي بنات عمنا شكد مهتم بيهن يعزمهن صح بس يدز اكل لا اول مره تصير
بيوم العرس بنات عم ابوي ظلن يحجن عن هاجر واي بيت تفوته تهجمه لأن ابوي رفض امي ترجع حتى للعرس والكل عرفها زعلانه او مطرودة
شگد چنا متونسين بس انكسرت فرحتنا من الكلام واحنا بالذات اني ونوره جنا كلش مكسورين امنا ع طرف كل السان مو حلوه بحقها مهما كان الي يلوم ابوي والي يلومها
بليلتها شي واحد الفرحني نظرات حارث الي ورسالته بيد اخته خلتني اطير من الفرح
ثاني يوم العرس كعدت ابيت ابوي الاجواء فول كآبة
ابويه بالليل شبه المتعارك وي صخر او بالأصح هو صخر غاثه بالكلام ومانعرف ليش بس الولد گالو ماندري شنو الصاير بينهم من جديد
راحو امي رزق وابويه يسلمون على العرسان ماخذونا گالو بعد السبعة نعزمهم وتشوفيها
وبعد مااجو ابويه اخذ هاجر وراح البيت جدها تعبان ورايد يشوفها
...
صخر...
بخضم هذه المشاكل والحيرة الي بداخلي اتحرر من هذا التفكير بدوامي بدخلتي الباب المستشفى اغلق باب كل صراعاتي ..
ومن أجمل قصص العلاج الطبيعي أن البطولة بيها تكون هادئة.
ماكو انتصارات صاخبة ولا احتفالات فوضوية .
لحظات صغيرة ممكن ميلاحظها احد سوى المريض والمعالج.
حركة إصبع. ثبات لثوانٍ إضافية..خطوة أولى بعد أشهر..أو قدرة على القيام بمهمة يومية بسيطة چانت شبه مستحيلة.
اجاني المسؤول يطلب مني اتابع حالة چانت بيد م
زميلتنا الي اتعرضت الوعكة صحية وتحتاج رعاية
ورغم ماعندي تواصل يخليني افهم المريضة واستوعب نوبات القلق والعصبية الي من الممكن ترافق الجلسة مثل هوايه حالات مع هذا اخذت ملفها اراجعه واقرا حالتها
المريضة بدت مرحلة التدريب على جهاز المشي .
اشرفت عليها وزميلتي جهزتها ورتبت وضعها على الجهاز
چانت لازمة القضبان بجوانب ال الجهاز بقوة
واني واگف الجانبها أراقب حركة الحوض والركبتين والأقدام . بدقة.
حاچتني وهي تلهث من التعب
..كل الناس تمشي بدون متفكر... وأني صرت أفكر بكل خطوة شلون اخطيها وماافشل
عيوني على اقدامها مركزة حركة خفيفة بعضلات وعصب الاقدام تفرق عندي وممكن الاحظ بيها امل جاوبتها بدون ماارفع عيوني لعيونها كل تركيزي الاقدامها
..لأن تتعلمين المشي من جديد .. الطفل يحتاج محاولات حتى يگدر يخطي ..وأنتِ هسه تعيدين بناء كلشي فقدتيه من قدراتچ
حاولت نقل وزنها إلقدمها الثانية ..لكن الخوف خلاها تتوقف.. بفزع صاحت
..راح اوگع فدوه
..لا ..اهدأي وركزي وياي ..خلي عينچ بمقدار خطوة رجل مو النهاية الطريق باوعي على قدر خطوة وعوفي الطريق ..البداية دائمًا صعبة
قطرات العرگ غزت وجهه وواضح الجهد عدها ماخذ اعلى مستوى
ركزت وعيونها بأقدامها
نقلت وزنها ببطء.
وقدمت قدمها سنتيمترات قليلة ..
ابتسمتلها بفرح
..هذه أفضل خطوة من بداية الجلسة الهسه واذا استمريتي هوايه اكو تقدم بالجلسة القادمة ..
باوعتلي بأستغراب وبعيونها فرحة تريد تتأكد
..والله؟ ترى حركة عادية
اشرتلها على ركبتها
"لأن ماشفتي الشفته اني . ركبتچ ثبتت بشكل أفضل..والحوض چان أكثر توازن ..واعتمدتي على نفسچ أكثر
وهذه اهم ملاحظات بتطور العلاج
نزلت دموعها دارتهن بأبتسامة وتنهيدة تعب ..تعب مخفي محد يشوفه ويحس بيه
ولأن بحكم دراستنا نعرف شنو هذه الخطوات العلاجية وكم جهد تستهلك نشعر بالمرضى والضغوطات العليهم ..وكذلك نفسيًا السوته امر ايجابي
اتمنى فد يوم اتنهد هذه التنهيدة الي بخروج الحسرة بيها تخرج كل مآسي الشخص والامه شوكت اخلص اني هم من شلل دواخلي
احس باصرار المرضى تحدي الي وكشفت مدى التناقض الاعيشة واني انصح المرضا وتارك نفسي من خطوة العبور والظفر بالفوز على صعوبة البدايات
طلعت منها واني استلم حالة ثانية
حالة رافقتني من زمان الشاب عنيد جدًا يشوف بمرضه جرح الكرامته وكبرياءه مو بس عجز وآلام
مريض لولا امه ماممكن يستمر من اول جلسة لكن دموعها تجبره على تحمل كل مصاعب علاجه وخطواته المعقدة
ابتسمت من شفتهه رغم اعرف مراح يبادلني الابتسامة ولازال اليأس مسيطر عليه
رحلته ماچانت سهلة المختصين يعرفون شنو يعني رحلة تأهيل لحالة عصبية شديدة
چانت الساعة تقترب من العاشرة صباحًا ..
بهذا الوقت الممر مقتض بمرافقين المرضى واصواتهم توصلنا
دخلت القاعة التأهيل. بالزاوية البعيدة گعد المريض على كرسيه المتحرك.
يراقب الأرض بصمت. ماچنت اشوف التعب الي يحمله بعيونه تعب يوم أو أسبوع اعرف وضعه شنو ويوصل الاي شخص يدقق بنظراته
اعرف شنو يعني تعب شهور طويلة من المحاولات. والسقوط والانتظار.
اتقربتله وخليت ملفه على جانب .
وبهدوء گلت
..صباح الخير
رفعلي راسه بصعوبة وبدون ميرد السلام سأل بنبرة باردة خالية من اي لهفة .
..بأعتقادك جاي اتقدم ؟
ماجاوبته بشكل مباشر . اعرف السؤال مو عن جلسة اليوم وبس .سؤاله عن رحلة كاملة يخوضها المريض من إصابته للآن.
وبعد تفكير وادراك وقتي گلت
..نحاول. وهذا النگدرله بكل وكت مادام اكو امل مانتوقف .
بديت الجلسة بتدريبه على الوقوف. خطوة يشوفها الناس عادية.لكن بالنسبة اله چانت اشبه بتسلق جبل شاهق
خله المريض ايديه على المقابض.
ساعدته على ضبط وضعية الأقدام والركب. چانت العضلات ضعيفة.والتوازن هش. والجسد فاقد ثقته بنفسه.
جليت صوتي وگلت
..عد للثلاثة
أتنفس نفس عميق
..واحد... اثنان... ثلاثة.
بدا بالصعود .
رجفت ساقه فورًا.. وبديت الاحظ عدة علامات .. شدّ عضلات ذراعه بقوة ..حتى برزت العروق بساعده
چانت كل خلية بجسمه تبذل جهد جبار وهو يقاوم الجاذبية.
واخيرًا وگف .
لكن الوقوف مو نهاية المهمة، الوقوف بدايتها.
مرت كم ثانية
وبدت ركب رجليه تهتز
ظهره بدا ينحني .
والجسم يبحث عن أي طريقة للهروب من الجهد.
حاچاني بصوت متقطع ..
..مااگدر بعد
قربتله اكثر احسسه بأمان
..أنت واگف هسه
..بس راح اوگع جسمي انتهى
..وأني هنا ماتوگع ..اني يمك
بقي واگف واني اعد
عشر ثواني
عشرين
ثلاثين
كل ثانية چانت بالنسبة اله أطول من دقيقة.
..حاول تگعد يابطل
انحنى للأمام محاول التقاط أنفاسه بصعوبة .
چانت قطرات العرگ تتساقط على الأرض،
وصدره يرتفع وينزل بصعوبة
باوعتله مطمئنة ومديت ايدي للمساعدة
..أربعين ثانية وگفت
ضحك بمرارة حاس بصعوبة احساسه بس لازم يقتنع
هالشي مو عادي
..كل هذا التعب علمود كم ثانية؟
گعدت بجانبه
..لا كم ثانية شنو ؟
باوعلي منتظر امل اكبر
..كل هذا التعب لأن جهازك العصبي حاول أربعين ثانية إضافية. لأن عضلاتك عملت أربعين ثانية إضافية. لأنك ماتستسلم وجسمك يتعاون وياك ومطيع الك
سكت شويه
وباوع الرجلينه
..هذه الرجلين الحملتني سنين طويلة تنقلني الأي مكان بدون ماافكر ليش وشلون وبدون اجتهاد چنت اوصل بفضلهن اليوم صارن محور حياتي وعاجز اعينهن اني
تعرف الشنو اشتاق ؟ اشتاق الشغلات بسيطة
افتح الباب مثلا ..واني الرجل الوحيد بالبيت بدون ماانتظر امي او اختي تفتحه وگلبي نار عليهن واني مااعرف البره الباب منو وشنو يريد
مشتاق اوگف واحضن امي بطولها ..وماتنجبر تنزلي هي
وتترس روحي بحسراتها وهي تجاهد من تحول بچيها الضحك وتخونها دموعها الي اداريها وتفشل
بسبب وضعي
مشتاق احقق مراد امي
شغته اختنگ صوته وحاولت اكسر هالحاجز واني اخذ وانطي وياه
..شنو مرادها الوالدة؟ ان شاءالله بدعمها الك واحساسك بالمسؤولية وتتحمل مشقة العلاج يتحقق
..مرادها اتزوج وامليلها البيت جهال وچنت معاند بمكابره وهمية ان مااتزوج بعد الحبيبة البعدتني عنها الظروف حرمت امي هذه السعادة وحرمت نفسي من دعم اقوى لو چانت انسانة تشاركني بكلشي
..متندم؟
..هواي متندم لأن ظل بنفسها ولأن باقي مشاعري امام عجزي لاشيئ چنت بنعمة مو حاس بيها
..ان شاءالله هالندم زائل ..وبهذا اصرارك فتره وتمشي الحيلك وتحقق منى الوالده الله يحفظها الك ويفرحها بسلامتك ..سلملي عليها هوايه مشتاق الدعواتها بوكت چانت هي ترافقك
..امين يارب.. الله يسلمك كلي ثقة بربي ولو الموضوع كلش صعب
..هذه الثقة تووصلك ان شاءالله ..عندك العافية يابطل
طلعت واني افكر بالحديث الدار بينا هي رسائل لو شنو؟
ماادري ليش الصار حسيته بي رسائل ألي
لأن حافظ امي واعرف نظراتها وشنو من حزن تضم بسبب تصرفاتي وحياتي الماعرفت اصفيها وارتبها صح
وظليت افكر هواي قطع افكاري الطريق وياها هاجر تنسيني كل تعبي وهمي بوقت تكون هي اقرب الي من غيري وبمجرد مانفترق يرجعلي خوف الفقد وخوف القرب اكثر وجع
ظليت الحد الليل الفتره البيها يزداد هذا الصراع
اتذكرت الدار بينا اني وابوي بحنة فراس
چنت ضايج من الصار بهاجر اعتبرت ابوي فشل للمرة الثانية بالحفاظ عليها اول فشل اني وامي والثاني هي
اشوفها گدامي تذبل يوم بعد يوم وخطوة ابوي بطرد فيحاء متأخرة
لمن اني حذرته وكتله تتحلف بيها بشنو شتريد تسويلها يعني
وحجيت باستفزاز وطلع مايعرف بكل هذا وطردها
وبالحنة زاد الحجي حتى من عمامها طالبو تجي يمهم او ترجع الأمها افضل هنا صرت افور
وابوي بكل برود يتجاهلهم لو يستهزأ بكلامهم بوكت اني منتظر منه رد قوي وموقف اكثر جدية
چان متجاهل الكل حتى كلامي اليجرح
علگوها چوبي واجواء العرس ابد مااتهنيت بيها منا اساسا اني بالاعراس مزاجي ينگلب كله واحتاج فتره يلا ادخل بالجو ومنا الصار وبرود ابويه وشفته شلون نزل نزله مال شاب
بي كل الحيل رغم چان كلش مغثوث من كلامي وتعقيبي على بروده وتذكيره بفشله باحتوائنا وكتله هاجر على نفس الطريق ترى
اتجاوزت الحديث الدار بينا واتعمدت ادخل وياه بلعب الچوبي وبتحدي گلت
..لاتعب روحك حجي صحتك تخونك ترى
وهو يدبچ رجله بالگاع ويطفر اقوى من طفرتي خلاني أگابله واجتهد اكثر وهو يجاريني مبتسم يريد يشوف وين اوصل بالتحدي وياه
حاجاني وبطرف شفافة ضحكة
..بعمرك اني اتحدى اي شخص يلحگني لو يطفر طفرتي ويوازنها بلعبه
الي يشوفنا يگول ماكو هيج انسجام بينا
..تعلمني بيك ابراهيم واعي اني بوكتها واتذكر الجوبي والهجع واجوائك .. بس حاليا ميفيدك خلي ابالك مو لأن انت اشطر او اني غشيم ..اول جانب اني اعرف اوازن جسمي والعب بثقة بدون اي ضرر مستقبلي يگعدني عن كل هواية .
خل احجيلك شنو راح تعاني باجر من هاي طفراتك الي تريد تثبت بيها الي وللناس ان انت شباب ماتهتم لا للحجي الياكل بگلبك ..ولا العمرك والمرحلة التترتب عليها
سجل يمك .. وركك راح يلزمه دمار من اسفل ظهرك الحد كعب رجليك .
اقل خطأ بعلاجه وتهاون يكلفك هواي .
..اثنين ضغطك على فقراتك راح يسببلك الم حاد بالظهر واحتمال الوثاب عندك مصاب هسه
حاليا من حاجيتك شنو ممكن يصير بدا جسمك يذكرك بمواقع الألم وراح تبدي تطلع التشنجات
حمام دافي من ترجع وي دهن فگس تتلافى اوجاعك باجر
..اثنين اتمنى اتمنى تارك برودك الاستفزازي وتهتم بأمانتك صح
وگف وبطل لعب قرب الي حيل وگال
..اشوفك هواي مهتم
..ليش انت امانتك مو شغلتني بيها وصارت جزء من مسؤولياتي
..اعترف صح هذا السويته وحقك باحساسك ..بس عيني على حملها وياي ولا تلوم ترى البية كافيني والله
انسحب من يمي وكملت وي الولد العب وبالي يمها ويم تلميحه وكلامه
قطعت افكاري وذاكرتي من الصار بالايام الراحت وخل اشوفه هسه شسوه
طلعت صحت حمزة اسأل عن ابوي واريده يصيحه الي وافكار ابالي تروح وتجي شنو الممكن نسويه اني وهو ونخلصها من هالدوخة والكلام الماله داعي شنو فايدة حمايتنا الها ومحد مخلصها من حجيهم
لگيته طالع وماخذها وياه صرت افور
مثل احساسي بيوم الحنة
الناس كلها نامت وارتاحت ورجعت فرحانة من الاجواء
الا اني اكل راسي التفكير وزادت غيرتي اضعاف
شنو اغار ؟
يعني اشوف نفسي بكل يوم أحترگ بنار هادئة تستهلك طاقتي وتدمر عقلي وتفتت گلبي قطع
ابراهيم مااكتفى ان دمجها ويانا واتعرفنا عليها وعلينا ظل يتردد بيها البيته الاكبر بين اخواني وهذا وحده موضوع من اگعد افكر بي اطلعلي شغل من جوه الگاع يشغلني حتى ابقى محافظ على اتزاني
تجي ابالي فكرة واصدك كلام حمزة وخوفه وخاف يطلع صدگ مخطط الها ساعتها شأحجي وشكول
ويجي ابالي احمد وهي بعمره وممكن يقنعه بيها اعرف ابراهيم من يخطط يقفل على الموضوع الى ان ينهيه ومال يترك بنيه مثلها وامانة حبيبه بينا بدون ضمانة وجودها واستقرارها مستحيل .
وكلامه ويايه وتلميحاته ماجاي اشوفه شي طبيعي وقريب ولا بعدها ينحمل
ومرت ايام وزاد البيه مانقص وهي هم احسها اكثر مني تعبانه
وهالأيام طالعلي بشغلة جديدة ياخذها العمامها وجدها بين يوم ويوم وهناك ماشاءالله كلها رايحه راجعه الجدها المريض تودعه بآخر ايام عمره
ولأول مره وبغير العادة الحكهم بحجة رايح اسلم على جدها هم .
ابويه من شافني حسيته ارتاح وملامحه صارت تستفزني بدل ماتريحني ومادامت راحته
بطلعتنا عمها حاجه ابوي يحاول يرجع مرته ويخلي هاجر يمه بين مايتفاهم وي امه
ابوي ضاج من حله واني اتعجبت الصراحة شلون يفكرون هم
رد عليه ابوي وكله مرتي مالكم علاقة بيها ترجع لو لا
وهاجر ماترجع الامها خلص.. تريد تشوفها يوم يومين وبس وبرضاها هم خل ترضي بتها بالأول يلا تفكر تاخذها لو ناوين تشمروها هم؟
وعيب يومية عايدين هالكلام
واني وكدام عمي ابو مهيب ومهيب وولد عمامنا بيهم خمسة وي عمامها واگفين سوه
.
بانفعال وتسرع رديت على ابوي مستنكر واحسه هو سبب خاص هي اكيد تسمعنا تريد تطلع ويانا واخرها النقاش بره
..ليش تلومهم انت جايبها يومية الهم شنو تسوي الجدها مثلا تحييه لو تمنع ملك الموت عنه
لو تريد تحننهم عليها ؟
خاف تريد تخلص من المسؤولية انت هم
لو اتفاق بينكم وبين امها وهي اطرش بالزفة
مايصير يومية هازيها هزة بشر هي مو حجر
عمامي ماقبلو عليه يردون الكلام ينتهي وعمها صاح
..انت بالذات لاتدخل مو اقرب الها منا
..ليش اني بالذات ؟ لأن ابقى ابن الغريبة بنظركم مو؟ ابن الشروگية والنفس السبب مو هامتكم هي هم لو هم باقية ابالكم قصة اللون ونسب سلالة الملوك نسبكم
نسيبة رد مناك
..زين تعرفها ليش تحرج نفسك وتسأل
..انت مالي كلام وياك بيه طبع اللوگي من الله مااحسبله حساب وانت معروف للكل شنو المايحجيها يمك يحجي وراك
عمها رد يحذر
..هذا الحجي لاتحچيه ترى يصير بينا زعل وزعل هواي وماينلم ابوك نعتبره اخونا صح بس لهنا وكافي
..احجي واتعدى الكلام بفعل واذا مو برضاكم على خشومكم هم مو انت التعلمني شحجي وشوكت
عمامي ادخلوو ماقبلو على حجي اخو عاصم
وابوي دفعة بقوة يکله كلمة وحده تخص صخر وامه بعد ظهرك اكسرة وانسى الگربة كلها
بقلة صبر گلت
..خليه يحجي مصدوم بتفكيره انت؟ مو هو اخو عاصم شيطلع منه
حجيت هالكلمة وعيني صارت بعينها طالعه ووراها صوت نسوان وخيال ثيابهن مبين متجمعات
رد بانفعال
..اذا عاصم ماعاجبك عليش صاير شوفير البنته
..عاصم الله يرحمه انتم تربيته واي ماتعجبوني بس براسي غيرة تمنعني اتخلى عنها واذبها لفلان وعلانة وطينتها مو من طينتكم هم طينتها من طينتي وهذا المهم
..شو چنك رايدها انت؟
رده ابوي بعصبية
..استحي وكافي تسولف التهي ابيتك ومعليك بالباقي متأكد لو جبتها بيدي الك مرتك ماتتقبلها
مسويات حلف عليها بنات العمام غريبتهن ماترتاح
..امها موجودة وتريدها
..امها اتزوجت واهلها حاكميها ماتعيش بتها يم رجال غريب لو عد اهلها لو عدهم وعدهم مااخليها ماامن
سحبوني الولد من بينهم وبديت استوعب السويته والراح يترتب عليه .. اخذوني وبدون مايحجون شي بس يهدون بيه وابويه انفعل اكثر وراي
قريب للباب مهيب حاجاني بهمس
..يول انت تحبها؟
صفنت عليه بدون رد فعل فتت للبيت هلكان
هذا اول الجنيته والراح تجنيه هي من دفاعي
حتى امي ماخليتها تشوفني واني بهالحال
گطع افكاري صوت التليفون اتصل بيه مهيب
..صخر شبيك ؟ ترى صاير مو طبيعي انت
..واني شوكت طبيعي وهسه اختلفت
..لا صاير فد مره والله اتلاحگ نفسك
..شسوي برايك ؟
..الي تسويه الناس
..اني مو مثل الناس
..احسن الناس انت بس يرادلك موقف وخطوة اني اعرفك من زمان ومغلس وصرت مفضوح للكل وراح تجيبلها الحجاية لو تبعدها صدك لو تفكر بجدية
..نفسي ماتتقبل الفكرة
..وهم مليت راسك بي كافي اصحى
..خليني هسه اريد ارتاح معدتي اشتعلت نار
اتصلت بيه هي مارديت راسلتني
..اني السبب مو ترى والله دمرت العالم ..اني اسفة صخر والله لو حلال انهي حياتي جان نهيتها بس اخاف عقاب ربي
اتصلت بيها
..شنو هالحجي هاجر ..على شنو تبجين
..كل هذا الصار وتسأل
..هاجر اهدي وخلينا نحجي
..شنو نحجي اني ماادري وين اروح بروحي
..تعاليلي
سكتت وهي هم وبدت دگات گلبي تزيد والنفس ضاق عندي متحدي فكرة سيئة محاول ابعدها
..اني احميچ من الكل بس يحتاج تعرفيني
ومو ابالج عطف لا ابد والله انتِ هواي تعنيلي
احميچ من الكل بس خايف عليچ مني هذا اللازمني وبس
..منك انت شنو شجاي تحجي ماجاي افهم
..اذا اگلج اني مريض تحاولين تنقذيني
..شنو مرضك صخر
..مراح تكرهيني
..اكرهك انت شنو هالكلام ليش تحجي الغاز احجيلي
بوضوح
..باجر نحجي هسه مااگدر تعبت هواي بس امانة احفظيلي نفسج لو اگلج خلي بابج مفتوح
نهيت الاتصال مو فاهمه شي اتصلت بأبوي وبدون كلام بتعب حجيت
..صعد نوره يمها لو تنزلهن يمك لاتعوف هاجر وحدها
..شصار صخر
..تعبان مابيه احجي بس خلي بالك يمها وباجر نتفاهم
نزلت طلعت بره اريد اشتم هوا خطيت هالخطوة وراسي ماجاي يصفى ماارتاحيت الا ذبيت من راسي وطلعت امي على الصوت مخترعة
..عمت عين امك نايمه وانت هنا متعذب
..مابيه شي يمه
..شبيك يمه شيوجعك
..گلبي يمه حيل يوجعني رايدها وروحي ماجاي اطاوع
نزلت دموعها مقهوره على حالي خليت ايدي بيدها فتت وهي وياي صرت اصبرها بدل مااريد منها اعرف بعدها محمله نفسها ذنب
ومثل السحر چان دعاها نمت براحة وگعدت محتار شلون ارتب كل هذا وشلون اطلع منها
اجاني اتصال وانگطع من بطة وبعدها رسالة مكتوبة
..الحك الهاجر تعال
ذبيت الملابس من ايدي وطلعت مستعجل فتت البيت ابوي ناوي اصعد الغرفتها بعد ماشفت البيت فارغ
اتسائلت بداخلي بطة وين
اتصلت بابوي واني ع الدرج واول ماكال الوو صوت صياح اجاني من بره
هو يصيح
ها يابه شكو واني بصياح حجيت
..هاجر شبيها ..هاجر وين
يتبع...