بقلم نور الشمس
بنين..
من يوم الي صارت مشكلة حارث وي بطة الكل احوالهم مو تمام
الولد حسو نفسهم هم المغدورين مو بطة الهضمه البيهم من عيونهم تنشاف شلون ابن عمهم هيج يسوي بأختهم
حسام رغم هو اهدأهم حسب ماشفت بس من خلال عيونه ينعرف وضعه اساسا چان مقهور من امه والكلام السمعه ومن اجه راد يروح الأمه خواته ماخلنه من وسام خاف يتعاركون گدام العالم لأن لاوسام يسكت ولا هو يتحمل ..قرر يخابرها امه وكل ظني تگله تعال واخوك اني احاچيه بس هي ولا كأن راحلها ولد وبينهم زعل هم عادت نفس الحجي رغم تحجي بصعوبة گلها
..مااريد اسمع منچ شي اشوفچ وبس وبنين مرتي مو هسه لا من زمان فالحچي مايفيد بعد اتعبين نفسچ وتغثيني بدون اي داعي
وفعلا بالليل گلوله وسام مو هنا وراح شافها وبس گد السلام وطالع
وهم محاجيها ومبلغها تعقل وسام لايوصلني المرحلة اضربه بيها الهسه نتجنبه ..الظاهر وسام حاجي على حسام بغيابه وعليه وواصله حچي
هي كايله البناتها اجه يهددني مو يشوفني ومن سألن عن روحته وشنو حچه گال
.. امي تبالغ ماحچيت وزينه امورها مادامها مصره على الخلافات مابيها شي
بهالأيام من اول يوم عمي گله روح البيتك يم مرتك ممنوع تبات هنا وهو استقر بالطابق الثاني بس مجرد وجوده بالبيت قيدني الى درجة وضوء الفجر گوه اطلع اتوضى اخاف مااعرف من شنو اخاف منه لو من واقع مأجليه مااريد اوصل نهايته ابد
بيوم اني بغرفتي سهرانه كملت جزء من القرآن واخذت تليفوني اشوف شكو ماكو لكيت هاجر مراسلتني
..بنين وتالي وياچ
رديت
..ها اسم الله شعدچ ولچ فاشختچ وانه ماادري
..يعني چنتي ضايجه لأن مبومه وحدچ وهسه عايفه الرجال مبوم شبيچ متكليلي دگعدي عرفي شخصيته اطباعه شنو درسيه صادقيه حتى بالمستقبل القريب البعيد المهم تعرفين شلون تتعاملين وياه
..يا شبيچ انهديتي بيه شكالچ شنو
..لا والله ماحچه الرجال بس يحجون هو وصخر وافتهمت من حجيهم ..ترى اخوانه وابوه هم يلوموه ان هو مايعرف يتعامل وياچ ويكسبچ وذابين الصوچ ابعده وان انتِ مامجبورة تتحملين الحچي من قرر يخلي الموضوع سري ولا مجبورة تبقين برهن اسمه وبس
ومذكرينه الأمانة من قبلها المفروض يكون كدها وهذا ضغط عليه هسه جاي يگل الصخر هي البنيه متريد تشوفني اصلا شلون اگدر افرض نفسي عليها
احس گلبي دگ مااعرف شسوي
..هم شعليهم بهالحجي ليش يحاچوه من الأساس
..مو من صارت المشكلة وامه وحچيها كلها لامته اله وهو يگلهم اني ابتعدت كل هالفتره حتى انطيها وانطي النفسي مجال الاثنين صعبة علينا والبنت بطبيعتها عاطفية اكثر مااريد ادمرها اكثر
..يعني انه شسوي هاجر شبيدي والله گلبي تعب وعقلي هلكه التفكير
..لتفكرين ليگدام وتشغلين نفسج بشراح يصير وشنو نسوي وشلون اتصرف عيشي يومج حبيبتي شوفي. مثلا حجايه سالفه اعتبري صديق مو اكثر
..وانه منين اصادق ولد حدي وي صداقتهم بالابتدائية واخر صداقة انتهت بشگ راس الولد وخيطوه وانه شبعت بيها كتله من ايد ابوي
ماعندي صداقات ناجحه
..بنين تلام امج من تگلج تعلين الگلب والله ماتلام
..هههههه روحي الرجلج حبابه بوسي ونامي ومعليچ
..تعلم هي ام حلگ
دزيتلها ايموجي ماد السانه عافتني ايست مني
وظلت الافكار تتلاطخ براسي
اني هم مااعرف شريد اختنگت حيل
مديت راسي من باب الغرفة ماكو صوت طلعت اتختل وصلت البراد شربت مي وصوت البووق بوق اليطلع منه خلاني اغص بالمي امداني شبيه خايفه ام بيت اني لو حرامي وخايفه من طاح حظچ بنين الجبانه
اريد ارجع وصار بوجهي نازل من الدرج بيده كاسة بيها بقايا زلاطة وكوب كبير بي ثلج ومي وشرائح ليمون ونعناع
مديت ايدي اخذهن اغسلهن لأن بلحظتها ماعرفت شلون ادارك الموقف
بقاهن بيده وگال
..هسه گعدتي لو مانمتي من الاساس؟
خفت تبين جذبتي وحجيت الحقيقة
..بعد مجايني نوم
..يلا مدام ماعندج دوام نامي ساعتين واكعدچ نطلع
صفنت عليه
..وين؟
..شعليچ خليها عليه ..وفطومه اخذها يم عماتها
..لا الفجر نگعدهم شنو شبينا
..محمد گاعد ياخذها لو يبقى يمها
..وين نروح
..نطلع ونشوف ونقرر
سكتت هذا هم مو صاحي والله ..ليش هي رزق مو زين وطلع منها هيج عينات الحمدلله مو اكثر هذه السويدة هم رحمه
ظليت بقلق دزيت نقطة اصيد بيها هاجر گاعده لو لا ترشدني شويه ماكو
هاجر بحالي هسه
ظليت الوب ماگدرت انام طلعت وهو هم گاعد
..تعالي بنين نسولف شويه
گعدت گباله ع التخم
..شالچ ذبي مايحتاج تلبسي انتِ مو صغيره وتعرفين هالأمور بينا عادي بحكم الي بينا عقد شرعي
نزلت عيوني ساكته بس انفاسي تصعد وتنزل
..اني ماردت اضايقچ ابد ..وهم ماينفع ابقى بعيد عنچ للأخير تبقين انسانة ومن ابسط احتياجاتج تحسين ان الأنسان المرتبطة بي يستاهلج ولو كان ارتباط شكلي اساس الارتباط هذا الحماية والي صارلچ ينقض حمايتي الچ ..ويحتاج مني موقف جدي يحفظلچ كرامتچ وهي محفوظة ان شاءالله
اتجمعت الدموع بعيني اول مره اسمع هيج كلام واحس انسان يحسسني بقيمتي عنده
شعور غريب عليه اني متعوده على ان انفذ وغلط اناقش حتى احمد الله يرحمه يشوف احساسي شي يخصني الي ومامجبور هو يبرر ويعتبرني مبالغه وشي زايد مني
..لاتنزلين راسچ من احچي وياچ اني مااريد احرجج ولا اريدچ تضوجين وتتقيدين ..الموضوع مو سهل اعرف لا عليه ولا عليچ بس بحكم الرجال اكثر تحكم بعاطفته ..وخاص اني رجل عملي احسب للواقع اكثر من الخيال والأماني لهذا تشوفيني طرف ساعي لأن مقدر عاطفتچ
..اني مااعرف شحچي اتمنى تعفيني
..مااريد تحچين شي ولا رايد منج شي غير ان ماتتقيدين اني مامستعجل على شي كل الاريده راحتچ انتِ وفطومه راحتكم كافي لأن تعنيلي هوايه
..بس انت مامقيدنا يعني لتفكر الموضوع منك اني هيچ اتعودت
..زين اذا هيچ ..دوامچ شلونه
..الحمدلله كلش زينه ودرجاتي ممتازة هم
..شاطره توصلني اخبارچ باوع للساعة
بتلاثة ونص بالليل
گال
..بالأربعة نطلع جهزي نفسچ
..ترى مناطقكم بيها خطورة هالوقت
..لا امان قبل صح هسه ماكو شي الحمدلله الأمور تحت السيطرة بفضل الأبطال قواتنا الامنية وجيشنا والحشد كلها امان هالمناطق
گمت وابالي سؤال يتردد رجعت عليه
..وين نروح حتى اعرف شلبس
ابتسم
..شتلبسين البسي هو انتِ العباية متذبيها كل طلعاتج شنو الفرق
ضحكت ومشيت ميلام بيه وابالي افكر وين ياخذني
بس لا الاهلي ..لا قابل يخليني اعوف فطومه
الفضول ذبحني بدلت ع السريع
لبست بنطلون وقميص اسود وحجاب رتبته بشكل حلوو وعباتي بيدي وجنطتي
باوعلي وضحك عينه ع الساعة
..والله زين وقت قياسي 15دقيقة هاي هم نقطة حلوه عجبتني
ابتسمت
..ماعندي شي يمكن بعد وكت مو
..لا هم يلا بس خل اتصل بمحمد يجي
اتصل بي محمد اجه ووصاه بس تگعد ياخذها العماتها لو حلا وگله منتأخر
شويه برد گلبي طلعت سيارة حمزة اخذها سلمني السويچ
..صعدي يلا شوفيني شتعلمتي
..لا عليك الله وين لحگت اتعلم المصايب اجتنا تهف
ضحك
..خليني اعلمچ يلا
..مو منا بغير مناطق حباب
..صعدي بابا
اباوعله وارجع اباوع للسيارة
..لو ادري هي هاي الطلعه چا نمت چفي
ضحك بصوت عالي
..هسه تغيرين رايچ والله
..انت مارايد عمرك بعدك شاب ترى ؟
.. لا رايده شلون مارايده بس واثق بيچ تتعلمين وتنتبهين عليه وتركزين بكل كلمة اگولها
..اتمنى هالثقة تستمر وماتنصدم صدمة عمرك
باوعلي مبتسم
..شبيچ؟ اشو من هسه خايفة
رديت بسرعة
.. إي والعبلس كلش خايفة هسه إذا دعمت أحد شتسوي؟
ابرود گال
..دعمي أنزل وياچ وأعتذرله.
..وإذا صارت حادثة وموتت ناس
..ما راح تصير، لأن آني يمچ.
سكتت شوي وبعدين گلت
..زين علمني، بس لا تعصب عليّ إذا غلطت.
التفتلي يباوعلي بجدية
.. إذا عصبت منو راح يعلمچ؟ لا طبعًا العصبية وقت التعليم ممنوع اني اليوم مدرب مو اكثر
وهسه يلا دوسي
..يمه يايمه
..عوفي امچ وركزي وياي شيلي رجلج واتعلمي على وحده ادوسي بيها اسهلچ وما تتخربطين رجلج الثانية شيليها هسه
..يصير نشمرها نگصها مؤقت لأن مااگدر الا اشركهن اثنينهن
..هههههه شتگصين ارد افهم
..رجلي المااحتاجها
..تعليمج خساير هيج
يلا دوسي شوي بعد ولا تكولين أخاف
دست قوي ، وفجأة تحركت أسرع من ما اتوقعت
..يا ام صادق يايمه
مد إيده بسرعة وسيطر على الموقف
..هدئي.. هدئي.. لا تتركين الستيرن. والله يساعد ام صادق عليچ
واني مرتبكه حجيت
..مو گتلك أخاف
..وأني گتلچ آني يمچ لا تخافين من السيارة، تعلمي تسيطرين عليها.
أخذت نفس عميق ، ورجعت احاول
وهذه المرة حركتها ببطء، ومشت مسافة واني مسيطره
باوعلي عيونه تضحك
..ها شگتلچ
..عمي والله بنين ورد بس بعدكم متعرفوها
ضحك لأن شافني امدح بنفسي واني چنت ارجف توني طلعت للشارع العام وخفف اللايتات چان مشغل دبل
..هاي ليش طفيته خل نشوف
..هنا اكو اضويه شغلناه هناك لأن شوارع فارغة وظلمه وهم السيارة التجي ويضرب عليها يأثر على سايقها ميشوف زين ..خلي هيج وهسه حاولي تلوفين براحتج
او تنتقلين من يمين السايد اليساره او العكس
..انت لاتشوفني هسه اتملعب ترى الشارع فارغ شايف من يطلعون يتمزركون مدري منين جايين يطير دماغي من راسي
ضحك
..اي شفتج.. الحاوية حمزة وحمزة الحاوية وصلني التصوير
وگفت نسيت الستيرن درت عليه
..منو دزلك
..هااا هااا
لزم الستيرن وسيطر السيارة سرحت ولحك عليها بالاخير
..وصلني بعد يعني منو لو حمزة لو نوره واثنينهم دزوهن
..خرب بليسهم فاضحيني طلعو
..على عنادهم اخليج ترحين وي حمزة ضابطة السياقة وتخبليه تخلي محتار بيج شلون اتعلمتي
..والله انت كفوو سووني مضحكه قبل ايام
خلصها الطريق كله يضحك واني اتصرف بعفويتي بعد كلامه شبه الي ارتاحيت وعرفت غايته مو شهوة او استغلال الظرفي احس بكلامه نار بگلبي طفاها لأن عمري كله محد خاطبني بهالطريقة
مااعرف هو يستاهل الموقف هيج احساس لو انه مبالغه بس هذا الصار بعدت كلشي واتقبلته رفيق
مسافة وگلي
..يلا يابطلة نحول هسه واستعدي الرحلتنا
حولت واني اتنفس بقوة عبالك امتحان وعدا
وبدا يسوق سريع صار تركيزي كله وياه شلون يسوق وشيسوي وعينه وين وشوكت يباوع للمراية الجانبية شوكت يباوع للخلف وهوايه امور تركيزي صار عشرة على عشرة بس ماكان اكو سيارات هوايه وصلنا البغداد وشويه وعبرنا المنطقة شعبيه مقتضة بالناس حسيت محد نايم بهالدنيا طبگ السيارة يم گراچ ومدلي ايده وگال
..يلا نتمشى
..غير اعرف وين احنا بعد الضوه ماطالع شدعوه كلها طالعه
..بالصدرية احنا ..تعالي انطيني ايدچ
بالگوه انطيت اطراف اصابعي مامتقبله هالقرب لسه
سحبها واحتضن كف ايدي بالكامل
ومشى واني بقربه
ومن نصير بمكان مزدحم يحاوكني او نعبره
اشرلي على مكان
..منا اشتريت اول دراجة وچنت اجمع فلوسها بدون مايدري الوالد لأن مايقبل يخاف علينا وچنت توني شاب واعاند توني مكتشف نفسي وعلى اساس محد اله كلمة عليه .. قفلت عليها اخذتها منا الفجر وبالطريق واتي راجع الله ستر انگلبت ونجيت بأعجوبة لأن چنت لابس الخوذة حمت راسي بس ايدي انكسرت بوكتها
..ياساتر وشخلصك من عمي بوكتها
..حالتي شفعتلي وهم ماجزت بس فتحت ايدي صلحتها وگمت اطلع بيها
ابتسمت
..هاي دوم هيج ازدحام
..الصدرية من احلى المناطق الشعبية ودوم ازدحام وهسه زين مو كلش هاي بشهر رمضان تقفل وقبل 12بالليل متلگين مجال ابد
تحبين گيمر وكاهي اريگچ لو باچه شنو تردين ؟
..باچه ريوگ؟ لا مااتقبلها ريوگ خلينا ع الگيمر والكاهي افضل
مشينا مسافة اباوع الگهاوي كلها مفتوحه المحلات
مدينة حية بوقت السبات هذه بالنهار شلون
اصوات الناس طلباتهم ..صوت قرآن اتقدمنا شويه مقاهي واصوات اغاني قديمة كلشي اكو هنا
وهو يشرح
..مره زعلت من ابوي لأن ضربني وقررت مااخذ مصرف منه واجيت اشتغل هنا اسبوع شفت بيهن العجب وقررت اسمع من ابوي وانضرب منه ولا اسطى يسب ويأمر بدون حق ..بس تجربة حلوه علمتني هواي
..انت تحب تغامر الظاهر
..مو اغامر بالمعنى بس مااحب اوگف بمكان
تعالي يلا وگفنا محل چبير مليان گيمر واجبان بانواعه وكاهي حار يجنن
جابلي كوب حليب حار محله بعسل گدامي يسويه حبيته حيل هو يشرب وياي واني لازمته بيدي مامتعوده هيج اشرب
..شربي لاتتقيدين العالم هنا محد يباوع للثاني كل واحد مشغول بنفسه وهالطبقة بالذات تعيش حياتها بدون تطفل
..مامتعوده
..اتعودي باقي هنا فترة اشوفچ بغداد كلها من مناطقها الشعبية الأرقى مناطق بيها
تعالي نشوفلنا ميز
گعدنا وشربت الحليب وبعدها طلب گيمر وكاهي حاسب وطلعنا
انواع الكعك والمعجنات اشرلي اختار المشكلة اني اتعودت مااعرف اختار واطلع كلشي يجيبوه هم حسيت بصعوبة
اتقرب يمي
..اختاري انتِ شتحبين للبنات هم اخذي
اختاريت كعك بسمسم وكعك بدهن وهو اخذ بيتفور وموالح
وهم مشينا مسافة جاب گرصة لحم بعجين گسمها بيني وبينه واشترا كمية چبيرة من السمچ الحي ضربوهن على راسهن گدامي شاغت روحي وفتحوهن نظفوهن بين ميكملوهن جاب استكان چاي الي واله شربنا واكفين على جهه اخر شي رجعنا للسيارة گال اخلي صخر يبتلي بيهن للغدا نجتمع كلنا ابيت ابوي
بطريق الرجعه حجه وياي عن بطة گتله
..بطه هو خسرها واذا ماعدها حظ وياه محظوظة عدها اب واخوه مثلكم وهذا اعظم نعمة للبنت
حجيتها ولمعت بعيني الدمعة سكتت لا ابچي وانفضح
هو يمكن استوعب البيه گال
..الله سبحانه عادل ياخذ شي وينطي شي وماكو شخص محروم من كلشي ولا شخص بنعمة مطلقة والرجل مهمته بحياة الأناث اذا چانن امهات او خوات او زوجات لازم يكون ضامن الكرامتهن بالأول واني گدامچ علاقتي بأمي صفر بس تبقى امي واحبها ومرات اتصرف بامور اشوف بيها صالح الها هي تعتبره قلة قيمة ..وخواتي مو مؤثر بحياتهن ابد بس مايهونن عليه وانتِ مراح تهونين وان شاءالله الله سبحانه يقدرني اكون عون الچ
سكتت اخاف احجي وينفهم الموضوع مو صحيح ورجع هو كمل
..احنا مرات نشوف بنظرة قصيرة ..مثلا صخر چان متقوقع رافض الاي فكرة ومشورة اطلعه من البيه ومن اتزوج هاجر اني بالخارج وتوصلن اخبار واعتراضات العمام وعوائلهم على ابويه ان هو احلى واجمل وهي سمره ومنبوذه من اهلها ومن هالكلام الي بكل شجاعة داسه وعبر عليه
لأن هو هم مو خلصان وهم وضعه مو اي انسانه تتقبله وچان تأثيرها كلش ايجابي بي اليوم صخر انسان ثاني السلبيه البي اختفت وعزز ايحابياته وهذا بفضلها مو لأن هي تأمره او يسمع منها لا لأن روحها ضافت جمالية الروحه واستقر نفسيا وهذا الأهم عوضها عن اهلها
يعني من نباوع للحاولينا مانلگه انسان الله ناطيه كلشي اهتمام وحب الاهل والزوج والاخوة والظروف
..صح كلامك
واجت ابالي هاجر بيوم الجابت وامها مااجتها اتعجبت وماردت اسأل واحرجها بس عدنا عجيبه هذه
ومن اجيت من اهلي مكسورة وزعلانه ولحگتني امي وبچت
هاجر جانت دموعها اكثر من دموعي صح هي مقهورة عليه بس احسها من شافت حنية امي كلش تأثرت وظلت دوم توصيني عليها
سكتنا وصلنا الصبح
توهم گاعدين يتريگون عمي فرح حيل بشوفتنا سوه عبالك شو شعنده وحلا تغمزلي ابتسمت
ضحك هو على فطومه تفتر تزحف وره عمي تصيحه اباه متعوده وي عباس
دنگ عليها شالها
..تعاي بابا تعاي يمي جدچ عنده اشباع منها ما يتأثر بيها
رد عمي بنتر
..اذكر الله وصلي على نبيك مااشبع منها اكو احلى منهم ومن صوتهم بالبيت ..ماشلتها ايدي زفره اغسل واجيها
هي هم من شافته راحتله بلهفه واني فوتت العلاليك وسألته عن السمچ وين اخلي هنا لو يم صخر
گال لا هو وعائلته يجون
خليت كعك بالصحون وجبت الهم
وعمي يسأله
..وين اليوم
..مو بعيد افترينا شويه ورجعنا
لاحظت مايحب يذكر تفاصيل ويحجي كلشي وهذا اليوم چان كلش حلوو حبيته قبل الغدا اجونا صخر وهاجر وحماده بيد ابوه شابع بوس فات وهو يبوس بي
وعمي اخذه منه متلهف عليه اليشوفه يگول مشايفه صار ايام وهو بالليل چان يمه
هاجر اجت يمي تسأل وتحجي عليه ليش ماصورت كتلها هو صور
غمتني تضحك وراحت وي صخر يحضر عدة الشوي
سألتها على عمتها گالت راحت يم رنا ابنها ماله خلگ وراحت تشوفه خاف ممتون
..عمره اتعدا الاربع اشهر مااعتقد ينمتن هالعمر امي هم چانت تمتن بس خاف اذنه لو صدره
..هي هم گالت هيج راح تشوفه ويمكن يرحن ياخذنه للطبيب ويرجعن يم غزاله
بيومها ماعدنا شي صخر حتى التمن الأحمر هو طبخه وهاجر سوت الزلاطة لأن كلنا لاحظنا هو ياكل منها عادي ولو وحده غيرها مسويته منا ينحرم منه خطيه ولأن يوم جمعة وكلنا مجتمعين مرت عليه لحظة الذكره ومكانه الي مينسد بينا رغم كلشي
من كملنا حسام گلهم اقرو الفاتحه وكلنا قرينا وبعد الغدا طلع صخر يجيب الچاي مخدره ع الجمر
شربو جايهم وراحو احنا بقينا وياريت ماباقين
حلا سوت جاي العصريات وياه كعك خلت وتونا بادين نطب وفاتو جهال وسام يركضون
خطيه هم يحبون يجون هنا بس محرومين من وره دگايگ امهم وابوهم اجو طايرين العمي وحلا والبنات وجتى اني باوسوني وابوهم فات وراهم عمي عادي سلم عليه بس حسام بقى على گعدته والبقية هم سلمو
سأله عمي
..الفلوس العليك سديتهن كلهن وسام من اليوم اي واحد يدگ الباب أذب ورقة براءة بيك وبينك وبينهم المحاكم لأن مليت وجزعت بس اللازمني عنك ولدك وبس خلي هالشي ابالك
وسام ماسكت گله
..هالسالفه راحت مو يوميه تعيدها
..راحت شنو اني البارحه مسدد عشره مليون الك
..اي بس هي من زمان يوميه تحجون بيها ليش تعيدون لو لأن اني بمكاني ابتليت من اخذت امي يمي تريدني اطردها يلا تعطف عليه ..لو صاير لوگي ونفسي تدنى حتى على حلال اخوي چان صرت عزيز عندك ولو غريب هم ومتبرين اهلي مني وتايه بلا اهل چان جبتني واعتبرت نفسك انت اهلي وتصرف عليه بدون وجع گلب
..من تحچي احچي عدل وكلام مناسب العمرك ابني الجبير انت عاجبني هذا وضعك منو مثلك واخليه وبشنو قصرت وياك زواج وزوجتك جهالك ومرتك واتكفلت مصرفكم متقتنعون شكد ماانطي تردون اكثر ..انت شنو المانعك متشتغل وتكون نفسك تفكر بجهالك اني بعمرك وعندي هموم سالبه نومي مو مثلك فارغ وافكر اني حياتي شنو من اجيب للدنيا واشمر بدون مستقبل ابوي هددني مره وسحب شغله من ايدي اخذت عهد على نفسي مااعيش بظل احد بابا انت شنو نفسيتك ليش تخليني اعيد بالحچي يومية كافي اصحى الشغل الگلك عليه جدك استمر عليه والله يرزقك ومن تحتاج هم مااعوفك اني
هو ماسكت رجع على حسام حچه وحجايه منه من حسام احر شي كله فرحان متزوج وهو بالخارج مايعرف منو يطب ومنو يطلع اني القهر خنگني نار وانصب عليها مي بارد من گام عليه حسام فلشه تفلش يريد يگوم مايكدر كله على بوكس وسحله من الياخه فرغ كل قهره بيه
گله ساكتلك صار هوايه الخاطر ابويه مو الخاطر احد بس توصل لهنا السانك اگصه واعلگه بركبتك
عمي بگعدته ظل گاعد بس قهره ماينضم واحسه راضي عن حسام وكتلة وسام اخر شي گالهم يلا كل واحد يروح البيته اني مرتبكه وخايفه وجزء بيه فرحان وراضي اخذلي حقي جابني بالطاري بدون ذنب وجزء بيه مقهور ومهموم واحسب هالمشاكل مراح تگضي
بعدني الم بجنطتي واريد اشيل فاطمة ووسام يغسل ايده من دم وسام وفات صخر البنات متصلات بيه ماحچه شي ولا سأل بس گل الحسام
..انتو ناوين تموتونه يلا ترتاحون مو كافي يعني ماكو عاقل بيكم
حسام رد عليه
..لو انت مكاني تسوي الأكثر اكو مواضيع اتغاضى عنها بس هالكلام لا وانت ادرى بي
سكت ماحچه شي بس گل العمي
..ماعليهم يابه خليهم وگوم وياي
اخذه من ايده وعمي هم كيف وراح
البنات شو شبعن بجي ووحده تگل للثانية صخر اخذه وراح ماطولن لحگنهم حلا گاعده ايدها على خدها ومن شافتني حجت على وسام
..يربي هالولد يبقى هيچ ارعن ..بنين لاتضوجين حسام سبع والله اخذلج حقچ
..عمي عود شعجب راح زعل شنو
..لا خليه يم صخر بلكي يرتاح اكثر هو هاي لقطة متمنيها اجته بفضل حسام وكتلة وسام هههه
..شو البنات انخبصن ليش
..حقهن مامتوقعات من صخر يسويها چانت علاقتهم مو شي وتوها بدت تترمم
..عندي معلومات قليل لهذا مااستوعبت الصاير المهم عمي يستاهل وصخر مؤدب الله يصلح بينهم يارب
..آمين
صاحني حسام نطلع وهو يعتذر من حلا
..صدگ جذب اخوان انتم عادي تصير بس تعرف ابوك هالأيام عليه ضغط وصخر خاف عليه مو اكثر شويه وانت الحگهم هناك تلگاهم ناسين
طلعنا للبيت وصدگ شويه ولحگهم حسام
واني راسلت هاجر افهم
والحمدلله مثل مگالت حلا كلشي تمام
مرت الأيام خلصناها يومية طلعه الفجر لو بالليل وهالأوقات الطلعت بيهن وياه شفت دنيا ثانية مشايفتها قبل
...
هاجر ..
اتفاجأت بجية عمي وي صخر هو صح يجينا بس دائما يجي بغيابه وشويه ويروح بس مال يتعنى يجيبه ويجي اول مره تصير
فرحت بيه وهليت ورحبت
واحمد ذبح نفسه عليه خليته يگعد وانطيته لأن خف يكون تعبان وماله خلگ بس هو اشرلي اخليه
وظل صخر يحجي عليهم
عمي كله
..وسام مشتهيها من زمان بس هم يبقى اخ وجبير غلط حسام يتماده وظلو يحجون عرفت الصاير
صخر گام يجيب العمي جهاز الضغط
سألني عمي
..عمتچ مااجت
..لا اليوم تبات ابيت علي طبيبهم يتأخر لثمانية بالليل الحجز والجماعة استغلوها وعزموهم
..خليها تتونس
ظل يلاعب باحمد واحمد يدردم گله
..خل امك تجيبلك اخ لو اخت
ضحكت مصدومه اني گوه اقنع عمتي تترك هالموضوع هسه انوب عمي طلعلي صفح
..لا عمو بعدني ادرس وتعب وهم مااريد اتعب عمتي بعد كافي عليها احمد تبتلي بي بدوامي
..خلي عليه عود اني وعمتچ حلا منگول لا
سكت من اجه صخر بيده الجهاز قاسله ضغطه وحاجاني اخدر چاي نومي اله
كمت خليته ع النار اجن البنات يبجن وصخر يضحك عليهن
گعدن يم عمي منا ومنا باسهن حيل
وعينه على صخر گال
..الله يحفظكم يابه ويزيد محنتكم
شويه واجه حسام اعتذر من ابوه وباسه ورجعو يحجون على وسام
وهم يحجون اتصلت عهود بحسام تسأل شصاير بينك وبين اخوك گالت هو حاجاني يشكي وامي انقهرت حيل وعتبت عليك وكتلها لازم اكو شي مايسويها حسام
شويه وانتهى الحديث
عمي ع العشه سأل صخر عن مهيب ووصاه انتو اخوه وولد عم وعلاقتكم تختلف من اول شبابكم لتخلون احد يأثر عليكم
صخر گله ميخالف اني ابن عمه وذاك ابن امه وابوه حقه يدخل المهم هو حاول ودز عليه فارس وفرسان وخالد وماقبلت بالصلح مايحتاج بعد بعدين تحلها الايام والله كريم
بعد العشا عمي صلى صلاة العشاء
واتفاجأنا عمتي اجت فاتت من الباب صاحت
..يمه ياحميد طگ گلبي عليك
وصخر گلها
..هلا بشهله الف هلا والفين مرحب ..وين عايفتنا اليوم منو جابج مااتصلتي بيه اجيج
..لا اجيت وي عمك ماظليت ظل بالي خاف باجر اداوم هاجر وانت وين يروح حمودي
باوسناها وفاتت لگت عمي يصلي گالت بصوت عالي
..شني فاتحين جامع اليوم
عمي بصلاته وماصبر گوه لزم ضحكته وكمل
..الله يتقبل حجي ..صاير مومن من تالي چا هيج يسويها الحظ ويطيحن ذنوبك وانه اظل متلتلة
..ياهلا بأم اشهل شلونچ البيت بدونچ اظلم
..ليش اسم الله على راعيه منو الدنيا كلها مو بس بيته هلا بيك ابيت ابنك كل الهلا
..وبيچ اكثر ونعم منچ ومنه
گعدو شويه وسوالف انطلقو بيها وعمي راح
بس بطة ونوره صخر عطلهن يمنا ماتركهن الحد مانامن
واني هم من نعسن كلش عفتهن وگمت اسبح وارتب نفسي بيه ريحة دخان من الشوي استغليت نوم حمودي بحضن ابوه
واني اتمكيج مكياج بسيط فات وخله حمودي بسريره
من انتبهلي وگف وراي يباوعلي مبتسم
..تشغلني وتنعل سلفه سلفاي الدنيا وتجين اطفيها انتِ بكل سهولة
زاح تعلاگة ثوبي باسني رفعت راسي اله وهو مخيم عليه بسته بجبينه
..هي الدنيا لو مابيها انت هم تنطاق الله لايحرمني منك ولايعيشني بدونك لحظة وحده
انطاني ايده ورحنا اتمددنا ع السرير
..اگول عندي موضوع واليوم صار زخم احداث ماگدرت احچيه
..گولي محتاجه شي عندچ شي
..امي عگبه تجيني
..هلا بيها بيها بكل وكت
..حبيت الترحيب بعد بيبية حمودي اتحمل
..لا ياحمودي هذا لو عليه اصلبها صلب ..لعيونچ اجرع الماينجرع والله
..هسه اني اطير من الفرح لو اضوج لو ياوضعية افعل
..افرحي يهمني اشوفچ فرحانه
..احسك ماتحبها كلش
..اي والله الصدگ غير اكثر من ماتتخيلين
..الصراحة اليكرهه گلبي
ضحك
..ليش ادققين
..اتصورت تفرحلي لأن دوم تحجي عليه وتكلي صلحي هالعلاقة ..هسه اني من اشوفك وي عمي اموركم تمام افرح
..انتِ عمچ تحبيه مشاعرج تختلف اني من انصحچ اشوف الصح لازم تسويه بس بمعزل عن مشاعري لأن مامعني بيها
..اي والله عمو اموت عليه
..گلبچ يوسع الكل اني گلبي صغير على گدج
ضحكت وبسته يفر راسي فر بسوالفه
يومين وفعلا اجت امي
ماخله شي ماجابه وعمتي هم محضره اصواغ
هي ماما هم اجت وجايبه وياها هدايا الي والحمودي ومن شافته طارت بيه
ابتسمت
..بعدج تخافين على جهالچ مني ؟
شهگت وضربت ايدها على صدرها
..اني هذا تفكيرج بيه اخاف شنو بس ابوهم يخاف عليهم ومانع اجيبهم
..براحتكم
شافتني متأثره طلعت صورهم سبحان الله الجبير اشگر وشعره تمري والصغير اسمر طوخ
گالت
..جاي احاول مااخليهم يحسون بتفرقة بس مجتمع مريض شكو قهر نسيته ونستنياه تلايام رجعلي وياه نفس التنمر والكلام
..ليش تخليهم يتنمرون ترى هذا عرقهم امانة الله لتتهاونين بأي شخص يصير ضده حتى لو ابوه
شگد شفت هنا مصاعب ومر عليه اشكال اول جيتي بس ماشفت حقارة ونظرة دونية مثل الشفته يم اهلچ لتخلين اخويه يعيش هالشعور ابد
..ان شاءالله مااقصر وياه ..اني اتخيلت راح تفرحين وتكولين مو بس اني
..اني ماكارهه نفسي حتى اشوف المثلي عقوبة ..بالعكس حابه نفسي حيل وحببني بيها اكثر صخر
..امانة ماعيرچ بيوم بشكلچ
..لا والله يعتبرني جوهرة واحلى مايميزني سماري وملامحي هذه النادرة حسب تعبيره ..بس ليش تسألين
..لعد ياامي بالچ عليه
..بعيوني هو
سألتني هم سافرتي اخذج دولة مكان ونسج
..لا والله ماعنده وقت وبصعوبة الموضوع بالنسبة اله مو سهل الاسباب تخصه واني مقظره هالشي
ماعجبها سكتت بعدين گالت لتعودينه هيج خلي يحاول يهتم بيج اكثر
ماانطيت مجال ندخل بتفاصيل واسبابي واسبابه واتشعبت مواضيعنا للعصر راحت وگالت اني وخالج نطلع هسه للبصرة
وهم بطريق الصدفة عرفت هي اصلا بفندق بايته وزوجها وياها ماحجي
ومرت الأيام وسمعنا حارث علن زواجه وجابها البيت اهله
وبعد عرسه العلنوه بيوم اندگت الباب صخر توه جاي من الشركة تعبان گتله ارتاح واني اسويلك عشا ماقبل گال مادام امي بعدهي مامتعشية اسوي النا كلنا بس اغسل وارتاح
وصدگ غسل وبدل وشال حمودي ولعبه انطانياه بعد ماحمودي اكل وجهه اكل وبدا يشعل حطب واني حضرت شياش عنتي تكة دجاج تاكل مو زين الها الدهون واحنا جهزت شياشةتكة دجاج بلية وهم شيشت لحم حسبت حساب العمي صار فتره شيسوي اكل صخي وفاهي يدزله
اندكت الباب وصوت شباب هوايه عرفتهم ولد عمه
طلعلهم گالب وجهه واول مافتح الباب گال
..خير شعدكم فارشين يم بابي
وگفت يم الباب اسمع صوت عزام يگله
..اشتمينا ريحة اكلك واجيناك
..وياهو الگالكم انه اعلف عليكم عدكم نسوان امهات خوات يسولكم
من الصوت عرفته مهيب گال
..مو بطيبة اكلك جيبه وتعال نشاركك لو خاف تلعب روحك منا المتزوجين اعزل الروحك وجيبلنا الباقي
رد وهو متعصب
..يلا خوش بلا لغوة تلعب روحي منكم كلكم المتزوجين والبعدكم
عمار گله
..اذكر الله يخوي والله متعشين انت متأخر وماجاييم نجربك ابن عمك غلط بحقك ويريد يعتذر
..الوصلنا منهم كافي انعم الله عليه
رد مهيب
..اني جاي اعترف بذنبي وحقك عليه انت اخوي صخر والله محد بغلاك عندي
..ابن عمك اني مو اخوك والشدة تبين منو الأخ ومنو ابن العم ومالومك حقك
..مو هيچ الحچي صخر على كيفك وياي بيومها انت زهگان واني متعصب اجيت اعاتب انت ما شكيتني هجمت عليه وصار الي صار
..انت زهگت على شنو على ضربي الأخوگ وحق الله يامهيب عيون عمي بس الوگفتني عنه علامات بوجهك خلنك تجيني فاير كسرة گلبها شيجبرها احچيلي انت اسألهم منو يرضاها على اخته جاهله خله عقله بيها وهمها بحب وكسرها كسرة ماتنجبر اني مامتحسفة وعندي يقين مايستاهلها
بس هي تستوعب هالشي لا وبعد مااحب احجي بهالموضوع ينسد احسن المهم انتو لتضوجون عليه ماصار شي كم يوم وطاب وعريس وعين الله عليه
..انت تظن هو مرتاح هو خسرها وصح كلامك مايستاهلها ..لا اني ولا ابوي ولا امي تحجي وياه بس الفاس وگع بالراس شنسوي
..هذا هو لتسوون شي هم فتره وترضون لتكبرها عاد
صوت مهيب حاجه الولد
..احجولكم كلمة اني مااتحمل نظل بزعل
..مايحتاج يحجون واني مامحملك غلط اخوك انت شالتك الغيرة واجيت وهم طايحه العمار والولد وفدوه الك تبقى ابن عمي لاتهتم
..انطيني حضنه اذا هيج
..دمشي منا لاافشخك احضنك عليمن هاك ايدي وبوسه من بعيد ويلا اتوكل
ضحكو كلهم وهم اتباوسو
شويه وكال فرشيلنا هنا وگعدو
صوت حمزة اجاهم هم توه نازل
راسلت البنات ابلغهن بس بطة الهسه ماكو ماتفتح جهازها رغم كلولها تركيه كله نجيبلچ غيره رفضت ومخلصه وكتها وفراغها لو مسلسلات او نايمه لو تتعلم طبخات وي حلا
واول ماعطلنا عمي اخذها واخذ بنين وفطومه التركيا
بقيت اني وحلا ونوره مستاحشين وبيوم فرسان دز اهله يخطبون نورة والصدمة عمي رفض وگلهم بنات العمامهن ماانطي بعد ومانريد نتخارب اتمنى تقدرون موقفي وماتزعلون
يتبع ...
الفصل الثالث والاربعون من هنا