بقلم نور الشمس
نور ...
ايام صعبة ينقبض گلبي من اذكرها
امي خربت بيتها واستقرارنا بيدها
حمزة من سالفتها وي هاجر وصخر وگطع كل تواصل وياها بالبدايه اتصلت تتوسل تريدنا نأثر على ابونا
ومن گمنا نحجي ونعتب ونبجي ع السوته بنفسها وبينا كامت تتهجم وتدعي وتكول ظلو بيد النسوان على اساس عيشتنا قبل تفرق يعني
اخواني الكبار الحمدلله من كبرنا كلنا وعينا وكل مشكلة تصير بينهن او بين امهاتنا وابونا ماندخل محبتنا تبقى وتواصلنا هم لأن الصار بأبوي وصخر انطاهم عبرة.. صخر لو ماجدي وعمي چان بقى بعيد عليهم للأخير بس هم جبروهم على مواصلته وخاص من خلو هوايه امور بيده بالشغل ظلو يتعاملون وياه وكعدات وعمل ساعات سوه حبوه ..احنا بآخر فتره تآلفنا وياه عكسهم
بس بطة بوقت الصار زعلت على احمد لأن قسى وياها من حقق بموضوع الرسالة ورضاها بعدين
وظل خوفنا وخجلنا احنا البنات بس من صخر
لأن حمزة من اتخربط راحله وجان خجلان وصخر وعمتي شهلة ابد مامحسسيه بشي اجه منهم خجلان اكثر
اما رزق مالها علاقة وجانت متفرجة اكثر من ماالها تأثير لاكالت غلط طلاكها ولا كالت رجعوها بس جانت مصدومة من الصار ابد مامتوقعة ابوي يطلك وحتى احنا شكد صارت مشاكل ابد مايفكر بطلاگ بس السوته مو قليل ولا ينقبل.. ظليت خايفه لاتطلع حوبة هاجر بينا وادعي ربي يبعدني مالي علاقة بكل اذية
هاجر من اجتنا وصارت اخت النا مااعرف امي ليش هيج سوت البنيه مالها اذية على احد بس امي من زمان سماعة كلام للأسف و عدها جرأه تسوي الي براسها بدون ماتحسب حساب وحاقده على صخر وامه رغم هي اجت عليها لو مثل رزق هي الاولى مااعرف شتسوي
مرت ابوي ام وسام بعد الشافته من رد فعل ابوي صارت كلش تخاف اذية هاجر واعتبرتها من خطوط ابوي المايقبل بيها نقاش ابد
ورغم هاجر انعزلت عنا مانعرف زعل منا لو متضايقه مثلنا
ظلت واستقرت اغلب وقتها يم حلا فوگ و رزق مستمره ادزلها كلشي الفوك اكل وحتى خلت سراب تواصلها وتشوف شتحتاج
حسيت تريد تكسب ابوي من خلالها ولو اجراء متأخر بس شافته مناسب
اما حلا وهاجر كلش متفاهمات وجان ودي اصعدلهن واخلص وكتي وياهن بس مالي عين اوصلهن احنا البينا مو قليل ميتين قهر وحتى ابويه مانخليه يشوفنا خلصناها تختل اني واخواني سوده عليه حتى محمد شال ذنب واتحمل رزايل وكلام مو العمره كله من امي مافكرت بي
جنت اتمنى ارجع البيتنا ابوي منعنا وخله حمزة واحمد بالبيت واروح على كد حاجتي الحد مامرت فترة ورجعنا اله
ابوي كعدنا احنا وهاجر وطلب منا نكون اقرب البعضنا وماتفرقنا مواقف مثل هاي الطرفين احنا مالنا ذنب ورجعنا شويه شويه رغم اكو بعد حواجز اغلبها مبنية من خجل موقف مو كره
بس هاجر بقت يم حلا اغلب وقتها تروحلها
بهالفتره اسمع صخر رايد هاجر وخاص من دزت علينا شهلة المزيونة عزمتنا هم تريد تبين احنا مادخلنا بعمايل امي ومن رحنالهم شكد ماخجلانين ماحسسونا صاير شي اصلا
خاص صخر كلش اهتم ابطة اكثر منا كلنا لأن جانت حيل مكسورة
وفهمت من امه تعرف بصخر رايد زواج بس چانت شبه المامصدكه او مستبعده هالموضوع يكمل مااعرف حسيت فرحتها مو كاملة ونفس الشعور اجاني وخفت هاجر تنجرح لأن عرفت من امه هالايام هو حتى النوم تاركه كد مايضغط على نفسه بموضوع الزواج
اكله كلش قلان هم
خليت ابالي احتمال يأجل المشروع كله
وبيوم گاعدين وهاجر جانت عطلة عدها يوم جمعة واني هم وجاي اشرحلها مخاوفي من عملية تجميل الانف اريده طبيعي مااريده من ذني العمليات الي تصغر فتحة المنخار حيل او متساويهن يبين واحد اصغر من الخ
اكو عمليات حلوه مجرد ترميم للعظم وتصغير ورفع بسيط
وهي شجعتني ع العطلة اسويه
شويه ودزو علينا ابيت ابوي كالو البنات خل يجن
كمت اني متعاجزة مالي خلك كوه رحت وهاجر وراي
نزلت لگيت حلا تحضر ضيافة وبطنها الخشمها واصله على وجه ولادة
وكوه تمشي من رجلها مشكله كتلها ارتاحي واني احضر
سألتها منو هنا
..اهل هاجر عمامها وزوجاتهم جايين يشوفوها
..شعجب طلعت منهم بعد وكت ..بعدين ذني زوجات عمامها شكد منافقات قبل ايام معاتبات ريمه وحاجيات يمها شكد على هاجر لأن ماحضرت عزا جدها ولا وصلتهم وسلمت
وريمه خوش مجاوبتهن جواب
..اوو يا نوره اشايفه من نفاق البشر باوعي وعبري حتى بالج يرتاح من نوكف ع الكلمة نموت قهر مشن شكد ماتكدرن لاتنغثن ولاتحسبن البشر حساب بس من تشوفن وصلتن مرحلة تنداسن لا هنا كلشي يختلف شوفنهم الله حق
..والله ياحلا مبين انتِ اشكال مار عليج ..عوفينا منهم اخويه الصغير شلونه
.. بخير الحمدلله انتظر يوم يوم اجيبه هم افرح بي بحضني وهم اخلص من هالثگل
..الله يسهلج يارب ..كملت الضيافة منو ياخذهن
..صيحي احمد ياخذها للولد وانتِ فوتي وياي الهن
..يا بثوبي هذا افوت
..يخبل والله قابل تنتظرين يخطبنج امشي كدامي
ضحكت وفتت گاعدات هاجر ومرت ابويه وسوالفهن بعيده عن اطراف العشيرة الحد ماصار صوت الزلم عالي
ابوي فقد اعصابه الظاهر
شويه شويه فهمنا عمامها جايين ياخذوها وابويه رفض وكال وصية عاصم مااتنازل عنها
كلمة منه وكلمة منهم ابويه طردهم وبالحوش صار مضارب احس حيلي راح من الخوف اباوع من باب المطبخ انوب ذني الچلبات جرن هاجر جر وهي تسحب نفسها منهن ويرجعن وعمامها يتحلفون بيها هي سبب مشاكلهم وي ابوي وعمامهم هوايه كلام صار
كلام جارح مااحب اذكره
وكبرت المشكلة انتبهت ابويه ضرب عمها علي وصخر ادخل و رادها وجدد طلب الخطوبة وگلهم تعرفون بي ومأجله احترام الكم بس هسه خلص من اليوم تصير على ذمتي وننهي هذا الجدل
زادت المشكلة
بكل هاي الهوسه والخوف دمعت من الفرح
جنت خايفه عليها حيل خايفه ينكسر گلبها
چان عدنا من المستحيلات زواجه وبهيج ظروف نعرفه عنودي ومايحب ينفرض شي عليه
ومع الأسف كلامه خبلهم اكثر حتى اخواني صارو وياه من اتعمدو يهينوه برفضهم اله
حلا طلعت هاجر من بين هالهوسة البره من الباب الثاني انتبهت عمه شهلة اباب الحوش اخذتها البيتها وراحت ومحد منتبه الها كل ظنهم هي جوه
وطلعت هي هاجر متصلة بيها
نسوانهم طلعن من شافنها كبرت قبل لايفوتوهم للخطار مره ثانية وقبل لا هاجر تطلع
ماهدأو الا بجية جدي ابو سليمان وعمي وعمهم الجبير هم
وگلو العمامهم مالكم اي حق البنية وصية من ابوها العمها ابراهيم وابنه ولد معدل ماينعاب انتو مامسوين حل الها تدخلكم مو من باب حرص ومحبة عناد مو اكثر وهذا مو من مصلحتها وحرام نحكم عليها بمزاجياتكم
لكيت حلا تتصل بهاجر تكلها فضت وراح يعقدولكم خليج بمكانچ لاتجين خلي يعقدولج هناك احنا نجيج
اباوع الحلا صافنة
..شو واثقة انتِ منو گلج يقبلون هي هناك
..لا يقبلون تبقى بعيده عنهم افضل وبس ابوج واجدادها يحضرون العقد
..اروح ادور هناك يمهم
..اصبري نفهم من ابوچ
شويه واجه ابوي
..گال هاجر وين ؟
رديت اني
..بالهوسة مساع أم اشهل اخذتها
ملامحه ارتاحت يمكن لأن حس هي هم رايدتهم مو مجبورة رضت گال
..اخذلها شي مرتب من ملابسها مانلحگ منا الساعتين نعقد ودورن يمهم هناك
دار على حلا يحاجيها
..روحي وي البنات وحاولن تفرحنهم لاتحسسنهم صار بسرعة واجبار عقدهم
ردت حلا بفرح
..يدللون نروح ليش لا ..تعاي نور نتحضر لو ناخذ التحتاجه وتتحضر هي واحنا وياها
اتصلت بهاجر مخبوصة اسألها ماتعرف شتجاوب
..ولج هجيره ركزي وياي شجيبلج فستان تلبسين
..يافستان
..فستان شيب اهلي ..ولچ غير انتِ عروس نجهزج ساعتين وتعقدون شبيج ماتكليلي ركزي
..ماادري والله يافستان تجيبين ..ماجاي اجمع نوره جيبي الي تشوفيه حلوو وياج مكياجي ..هو اني ابقى هنا لو اجي شلون يصير اعقد هنا خاف عيب
..يكيف صخر هسه مناك ويكلج بعد لااطلعين ويخلي ابوي يشوفج بالحلم مثل شهلة
ضحكنا وحلا تضحك على سوالفنا وهاجر بخبصة ردت
..شنو لااطلعين هو عقد لو زواج لاتخرعيني انتِ هم
..احلف عليج تتمنين زواج واليوم باحضان اشهل
..انجبي نوره طاح حظج ولي خل اجهز روحي ..هو هسه وين؟
..يمنا هنا هم خلصها تليفونات
صاحتني حلا
..كافي تلغن ولجن بساع كملي حتى نمشي هسه صخر دز حمزة على ملابسه الظاهر راح يبقون هنا الولد واحنا ندور هناك
رجعت عليه تضحك
..واخيرا راح اشوف شهلة متمنيه اشوفها من زمان
فاتت مرت ابوي رزق تهز بيدها
..حلا عود ليش هيج مثلجه انتِ
..ام وسوم الورده لو مامثلجه اني مااتزوج رجال متزوج تلاثة قبلي
ضحكت ع سوالفهن ورزق ابد مااقتنعت ادور ويانا وحتى بره ماطلعت الهم راحت الغرفتها
اتصلت بيه سراب
جاوبتها واني ادور البيتنا اجمع اغراضنا
..هلا روبه واخيرا طل الحلوو واتذكر اهله ..ولج فراس نساج اهلج كلش
..وأگدر انساكم اني شلونكم
..الحمدلله بخير انتِ شخبارج
..نويره احجيلي بساع صدك السمعته
..وشسمعتي يابعدي
..شگد چلبه نويره عود تسوي نفسها شخصية وعدها اسرار هسه فارس گلي الولد مخابريه ممصدكين صخر ناوي على زواج وعقد صدك لو اكو مقلب بالموضوع
توتي ارد اتفلسف عليها گالت سدي سدي دك عليه صخر
وره شويه كالت
..طلع صح ولج وعزمني على عقده اني ومآرب وعهود متصل بيها اول وحده وعلى جيه هسه راح اجي اني اشوفج هناك
نهت الاتصال وبگلبي گلت زين وعزم وظال براسه عقل ويفكر بس اعتقد علمودها ميريدها الوحدها بهيج يوم هي وشهلة يريدهن يفرحن
.درنا عليهم شهلة مخبوصة تضحك والدموع بعيونها وحلا ماشاءالله علاقتها معدومه وي الرهاب الاجتماعي
اول ماطبتلهم وبأول شوفه الشهلة انطتهاة
هلهولة تطرش الاذن خلت شهله تحضنها بفرح وتهلي وترحب ركضت الهاجر انطيها اغراضها شو من شافتني شيبعت بچي
..يمعوده عليمن تبچين اخذتي گلب الصخر فتفتيه خليتي يطلع من كل حدود راسمها..كافي بجي احجيلي شعورج
رجعت تبجي
..شعورج دموع هو هذا الكدرتي عليه كومي لج سبحي راح يجن البنات عزمهن صخر يلا
باوعتلي مامصدكه عازم كامت تسبح وطلعت شسورت شعرها ورجعتني على فستانها
الوردي الغامق الجبته ماعجبها
بطلعتي صارت بوجهي مآرب وياها عمار وعزام من بعيد هو وريمه اجو
سلمت عليهم وفتت مستعجله
رحت جبت الفستان من لبسته حلوو عليها ومتأكده بمكايجها يطلع يجنن
واني افتر واحضر وياهن صخر اتصل بأمه گلها رشا ماجاي احصلها وغزالة ماترد واني مستعجل اتصلي عليهن انتِ لأن عمي يمنا ومايدرن هنه
ظلت عمتي اكثر من مره تتصل يلا حصلتها وكالتلها تعالي انتِ ورشا بدون ماتشرح الصار
شويه وانخبصت من عرفت بجيتهم هنا
و بطبة ابوي وي صخر وحمزة واحمد جهزو الحديقة بكراسي ورادو مدات طلعت اني وشهلة نطلعهن الهم عفت كلشي وعيني على ابوي ماشال عينه منها وهي عيونها ماتشوف غير صخر راحتله متلهفه تبوس بي وتباركله تحاجيه وهو باس ايدها وراسها ويشرحلها الصار
احس حسرات الدنيا كلها بعيون ابوي وصدره اليصعد وينزل بكل نفس يبين ثقل الموقف عليه
سلم عليها وباركلها انتبهلهم صخر راد من امه تفوت جوه واحنا نتكفل باقي التفاصيل
اني وبطه جبنا المخاد المدات لاكتنا غزالة فايته لزمتني من ايدي واني اباوسها
..شكو شصاير شنو رجعو عمو وعمتي البعضهم ..عليج الله شافها توني شفتهم بره سوه وين راحت عمه ..هذا التجمع بهالمناسبة لو اكو شي بعد
..ولج سكتي لاتسويلنا كارثه هو بس شافها ومن سلم وباركلها وردت صخر انتبه واشرلها تفوت جوه
اخونا يريد يتزوج يعيني
واحنا نحجي ابوي فات وياه جهال مآرب وبنات ريمه ومآرب ظلت تحجي وياه وتستفسر
وهو اخذه الواهس اباب المطبخ ع اساس يريد منهن يحضرن كهوه وجاي وهنه رادن عصاير وجكليت يسولف وعينه الشهلة الي اطلع الهن درازن الاستكانات وقواري كبار بس رادت دلة جبيره ومآرب اتصلت يجبولها منهم
مآرب وحلا وابوي كلهم ماخذين ميانه مدري على شنو صار شكد نفوت ونطلع عليهم براحتنا ماسوينا سوايتهم اليوم
صخر طلع اخذوه خواني يرتبوه هناك براحتهم بعد مارتبو الحوش للكعده وابوي اخذ راحته الظاهر واكف الفرحه الي بوجهه من زمان ماشايفتها احسه منتعش ..منا زواج صخر وعزيزة گلبه هاجر ومنا شهلة المزيونه شافها بعد سنين
شويه شويه بدت نظراته اطوول عليها وتعابير الفرحه اتحولت حزن
چانت لافه شالها و الگصيبة طالعه من جوه الشال مبينه مامنتبهه الها
لابسه ثوب بني فاتح يجنن عليها
وهو يحجي وي مآرب وعينه عليها وهي ابد مامهتمه
حاجه مآرب يگلها
..بس لاتمطر
..مطر خير ان شاءالله هي مچلچلة بس مو مال هسه يجوز لليل تمطر
..اهم شي يكمل العقد والگعده بالحديقة وحاولن تستعجلن نص ساعة ويجون
..ماعدنا شي يابه الله يتمم على خير ان شاءالله الفرحه هاي فرحتك هم بصخر وهم بهاجر
احس مآرب جذابه ضمت اهم عنصر للفرحة من غمزتله بالأخير
ابوي يضحك فرحان وگال
.. الفرحه الجبيرة الأم اشهل
ورجع باركلها وردت عليه بكل احترام بس ابد ماخلت عينها بعينه
و هم يحجون و اجانا صوت اشهل كاشخ يجنن طالع بالقاط صاح من الباب
..ها ابو البراهم خلالك الجو اشوف؟
مو اذا نحجي هسه نطلع مو زينين ونزعلك
دار عليه ابوي مبتسم
..بس السانك خلي بلهاتك مالنا خلگه هسه وطلعنا ولا يهمك عريسنا اهم شي انت هسه
عبد بضحك گال الابوي
..شوكت صخر يلتهي عنك
..شيلهيه هذا براسه جني يصيح بأسمي ويذكره
طلعو يضحكون بره بالحوش گعدو والي افتهمناه ماكو غريب عمامي وابوي وولد عمي وعمامها كوه عليهم حاضرين عمهم جابرهم ومايجون هسه بوكت العقد يجون
التمينا بالهول هاجر مكمله مكياج وتسريحة شعرها البسيطة
طالعه تمووت والتمن رشا وريمه ومآرب وعهود واخيرا وصلت
واني وبطة وغزالة وسراب
هلاهل وضحك وسوالف وسكتت هذه الهوسة ورتبتها بفرحه احلى مآرب من غنت وهي ادگ على الباب وتغني
ياعين مو ليتين ياعين موليه
وجسر الحديد انگطع من دوس رجليه
رحنا نتصيد گطا ونسمع نغيط الوز
ياللابسات الهباري والثوب فوگ الجز
ريت الحرمني وليفي يصير نومو فز
ويموت جنب وجنب والچفن عاريه
گمنا نتمايل ونرد وحلا وعهود يهلهلن
ياعين مو ليتين ياعين موليه
يااهلا وسهلا مرحبا ياعين باليجن
لأگعد وارش الدرب للسمر لمن جن
نوبه يگولون انصدم نوبه يگولون انجن
نوبه يكولون صابته بالراس جنية
وياعين موليتين ياعين مو لية
صارت احلى حفلة گعدة بسيطة تخبل
اتصل بيه احمد طلعتله للمطبخ مناك جايب كوم جكليت ولحكه حمزة بالعصاير والثلج
اباوع اخواني فرحتهم ماسايعتهم مثلنا الكل فرحان حتى خواتي الكبار قبل شكد يتحسسن منهم اليوم فرحتهن مو ضاماتها السبب الاول مواقفه والثاني مأيسين كلنا من زواجه گد مانعرف شلون چان لاغي هالفكره
احمد گال
..هاي مآرب فاضحتنا بكل مناسبة عمار يگول ماخذ حمديه صالح اني
ضحكت
..غير تخبل ونستنا وخلت الفرحه صدك تسوه
..اخذن راحتجن ماكو غريب بس من يجون اتصل بيج تسكتن بعد
..صار
طلعو ورجعت يمهن رشا تتوسل
..عمه عليج الله انتِ غني فدوه والله من صغري سامعتج تغنين النا احنا وصخر عليج الله اكو اقوى من هالفرحه تسمعينه بيها اني الهسه مامصدگه اليوم صخر عريس
وكلنا اتجمعنا عليها
..يلا فدوه سمعينا ونصي صوتج عود لاتعليه
واتغيرت الدگه الأقوة من لزمت الباب رشا
وعمتي غنت
..اجلبنك يليل اثنعش تجليبه
اجلبنك يليلي والدموع دموع
وخو تدري الخليل اعله الخليل يلوع
وماتدري بجفاك انحنت مني ضلوع
اجلبنك يليلي اثنعش تجليبه
اجلبنك يليل وحيل مابياش
ناشف دمع عيني وباقي بس اگياش
من حمل ضعنهم بيه ماوصاش
ولاخلالي ذكرى ولاترك طيبة
اجلبنك يليلي اثنعش تجليبه
ورغم مابينت ردة فعل الها بشوفة ابوي مثله بس حسيت هوايه اثر بيها اللقاء واذاها بس مستحيل بلهفته ..جانت مبينه مو طايقه وجوده
اتصل بيه احمد گال اجو اجدادي والشيخ وعمامها
بلغتهن واتجهزنا
بس انتبهت بجيتهم الولد اتوترو وخاص صخر دزو الضيافة وكلشي مشى حسب الاصول ابوي خلالها مهر عالي وصخر ماعارض ابد
الخطوبة صارت من ابوي الصخر عمامها بس حضور حضرو حتى الشيخ اخذ من وره الباب منها وكالة وصار ابوي هو وكيلها
وهذا ماخلاهم يمشوها للأخير من كمل العقد وهلهلنا وفرحنا
سلم صخر ع الكل بعد العقد وهاي عاداتنا
من واصل العمها علي باستفزاز گايله
..مبارك عليك رس العبيد
الولد مصورين سلام صخر وشفنا كلنا شلون اتحولت المصافحة بكلة من صخر وبعدها اتوالت البوكسيات
بهاللحظة اخواني التمو درع الصخر من الموجودين الهبو عليهم
بس عمامها ماقبلو على علي گالوله تبقى بت اخوك وعيب هالكلام وكلنا عبيد الله هالكلام مامقبول
احنا فرحتنا راحت امه خطيه اتخبلت خفنا حيل الحد مااستقرت الاوضاع
وهو يحلف متحلفله والفرصه اجته وطلعها مو مال يعديها
ابوي حاجاه من طلعو ..گله تسلم عليها وبس
واخذها وبعد ماتشوفنا وجهك للزفة
ضحك صخر يگله
..جنك ادور ثارات وياي
..گلبي مو اسود لو اسود اسويها
..سلام الله عليك ابراهيم ملاك انت
ضحكنا على رده
وهو بعده واگف يريد يفوت حاجه امه
..يمه عمار راح يجيب المسواك جهزن عشه منو من البنات تساعدج خالاتي وعلي جايين كتلهم عقدت
..مايقصرن يمه ..بس انت شلون
..معليج بيه يمه العسل مااشتهيه اني
فات يسلم على هاجر الفضول كتلنا شلون يكون اللقاء
وبره علگوها اخواني وولد عمي بالحوش يغنون ع الميمر
بصوت واحد وصفگه ودبكه الاجواء تخبل چانت انتبهت بطه ميته على شوفة حارث
عرفت الولد خلص مو بس كلمة وانگالت مبينه ربطت مصيرها بحبه وهاويته حيل
بدت عمتي والبنات يجهزن العشه احنا لمينا البيت واحنا انظف نسولف وعرفت رشا زعلانه باقيه يم اهلها
ومن كل عقلها تحاجي ام اشهل على اختها وام اشهل تگلها ذكري الله عمه
.. ذاكرته عمه فدوه الاسمه.. الي ثواب اجمع راسين بالحلال وسوده عليه راس ابوي بالضيم جمعه ابوه ابلوه سوده
ضحكت على سوالفها
انوب عرفنا اساس العركة بينهم وعرفنا مو اول مره هي تدخل بحياتهم وطلعت هي وعمي ماتحجي من عقد غزالة
اباوع غزالة راح ترتب نفسها رحت وراها
..ها ولچ خطيبج جاي مو
..اي فدوه العينه
..منو وياه
..خالته وامه
رجعت الرشا كتلها مرت ابوج الجديدة جايه ضحكت
ومن فاتن وشفناهن لأول مره تجمعنا صدفة وموقف وي خوال صخر ابيته
رشا مبين صدك مقتنعه ماشالت عينها منها ومبينه عجبتها صدك
....
بطة ..
اليوم من الأيام الحلوه السجلتها بدفتر ذكرياتي
يوم زواج صخر بظروف مو عادية لكن وقع العقد وحقيقته الي چنا مستبعديها مسحت كل شعور وخلتلنا شعور الفرحه وبس
بالاضافة الفرحته شفت حبيب القلب حارث ولمحني من بعيد اشرلي بعينه غمزلي بأبتسامه تسحر العين وتذوب القلب اتحاشيت نظرة اخواني او خوف يكشفوني هربت وظليت اسرق نظر من خلف شباك المطبخ
الاجواء تجنن واني افكر بالحبيب ومشاعري ..اتذكرت نظرات ابوي الامنا شهلة من شافها ماچانت نظرات عاديه عيونه تشرح هوايه كلام
لزمت قلمي ودونت بكل عاطفة بعد ماعرفت اسرار هذا الابتعاد صرت افهم معنى الوجع الي يحملوه وكتبت الخاطرة عن بابا هالمره
"
وقف للحظة وكأن السنوات كلها انطوت بين رمشة عين وأخرى.
رآها بعد غيابٍ طويل.
بعد أعوامٍ من الندم حملها على كتفيه أينما ذهب. لم تكن مجرد امرأةٍ مرّت في حياته.بل كانت البيت الذي أضاع طريق العودة إليه بيديه
أخطاؤه القديمة فرّقت بينهما
وكلماته التي نطق بها في لحظات طيش بقيت تطارده كل ليلة كأنها تُعاد أمامه بلا رحمة.
حين وقعت عيناه عليها، شعر أن قلبه عاد شاباً .
كانت ملامحها أكثر نضجاً، وأكثر هدوءاً، لكن الابتسامة التي أحبها يوماً ما زالت تسكن وجهها كما هي.
أما هو فكان يحمل في عينيه حكاية رجلٍ هزمته أخطاؤه قبل أن يهزمه الزمن.
أراد أن يقترب، أن يقول لها كم اشتاق، وكم دفع من عمره ثمناً لقراراته، لكنه وجد الكلمات عاجزة.
اكتفى بالنظر إليها وكأن عينيه تتحدثان نيابة عنه
كان يرى فيها كل ما خسره
دفء الأيام القديمة ..وضحكات البيت.. والأحلام التي كانت تجمعهما.. شعر بغصةٍ حادة وهو يدرك أن الحب لم يمت رغم السنين، بل بقي حياً ينمو بصمت داخل قلبه، بينما هو محروم حتى من حق الاقتراب منها.
وفي تلك اللحظة فهم معنى أن يعشق الإنسان شخصاً لا يزال حاضراً أمامه، لكنه أبعد من كل المسافات.
ليس الفراق دائماً أن يغيب الأحبة، أحياناً يكون الفراق أن تراهم بعينيك، وتعرف أن أخطاء الماضي صنعت بينك وبينهم جداراً لا تهدمه كل دموع الندم.
ظل يراقبها من بعيد وهو يدرك تمامًا هو الميت الحي بالنسبة اليها
غلقت الدفتر وودي اكتب عني وعن حبيبي بس شنو اكتب
عيونه تخطابني بمحبه عجزت اترجمها بالواقع
بالليل ابيتنا گعدنا محاوطين هاجر نستجوبها
..احجيلنا هاجر صخر شگال من شافچ
...
هاجر
من لحظة الي دافع عني وحماني بكل وسيلة الى لحظة عقد القران چانت انتقالة بمحطات حياتي غيرت منها هواي
ماچنت اشعر أن توقيعي على ورقة العقد هو دخولي المرحلة جديدة وبس .
شعرت وكأن گلبي لگه أخيراً مكان يستريح بيه بعد سنوات من القلق والترقب.
ماجان الموضوع حب خاطف انولد من أول نظرة، لا چان شي أعمق وأكثر هدوء
چنت اشوفه بمواقفه بأحترامه واهتمامه بتفاصيلي الدقيقة وحرصه على أن اشعر بالأمان بقربه.
شويه شوبه بديت أكتشف أن گلبي يتجه نحوه دون أستأذان
يومية كلما أحچي وياه اشعر براحة غريبة
وكأن ضجيج العالم يخفت قليلاً.
وكلما واجهت مخاوفي .لگيته هو السند الحقيقي الي مايستهين بقلقي ولا يسخر من ضعفي
بلحظتها أدركت أن الأمان مو مكان..الأمان هو إنسان.
صرت انتظر رسائله.
وأبتسم من يذكرولي اسمه.
وولگيت نفسي ادعيله بصلاتي بزيارتي بعبادتي بدون تفكير.
چنت اراقب هذا الشعور يكبر داخلي يوم بعد يوم، حتى تحول من طمأنينة إلى تعلق ومن تعلق إلى عشق صادق.
وبليلة العقد بعد ماكحلت عيني بشوفته وهو حلالي وگدرت اشوفه مفاتني بدون خوف وريبة وگدرت اخذ راحتي يمه اكثر من الأول
گعدت بليلتها وحدي أسترجع الأيام الماضية.
أكتشفت اني ماجاي انظرله كزوج انكتب اسمه إلى جانب اسمي وبس ..
اشوفه رجل أصبح جزء من دعواتي وأحلامي ومستقبلي .. ابتسمت بخجل واني اعترف لنفسي قبل اعترافي للبنات سؤالهن بالحقيقة الي حاولت تجاهلها .
"أنا ما حبيته لأنه وسيم ولا لأن مفروض عليه... أنا حبيته لأنه شفته الأمان اللي ظلّيت أدور عليه سنين
وچان أجمل مافي هذه الرحلة هو الحب الي اتكلل بشعور الانتماء واحساس الأمان الطاغي على كل مشاعر جارفة
الحلو هو ماحسسني بالخوف أو الحيرة .ولا بيوم شفت استغراب منه حتى بأول لقاء ماحسسني بأني مختلفه عنهم
من اول يوم منحني سكينة تشبه سكينة المسافر
حين يصل أخيراً إلى بيته بعد رحلةٍ طويلة.
فهناك أنواع من الحب تبدأ بالإعجاب أو الشغف، أما حبي له فقد بدأ بالأمان... ثم صار عشقاً لا أعرف كيف جاء، جل مااعرفه إني لا اريد له نهاية "
بعد ماعقدنا الرجفة ألچانت من خوف اتحولت الرجفة حب وفرح عارمة اتملكتني
وچان اول لقاء بيني وبينه
رسمته بخيالي بفرشاة فنانة قبل الحقيقة الچانت اجمل
طليتله بفستان وردي غامق
ضيق من الأعلى بأكمام تول وستراس بسيط بلمسات ناعمه تزين صدره
فصال يبين خصري وتبدي بي نفشه بسيطة من الورك التول الناعم المبطن نازل الأسفل كعب رجلي
لبست كعب وماگدرت اوصل بطول مقارب الطولة وبين فرق واضح عند اللقاء
بشعر مسدول مبروم الأطراف ملموم من الجانب على اكسسوار تاج ناعم بريق كرستاله يخطف الأنظار بأنعكاس الضوء
چنت انتظر شوفته فات ولمعة عيونه تبين حجم الصراع الي بداخله فرحه طاغية
بنظرة خوف وقلق مكتوم
صرت اقرا انفعالاته بوضوح وتركيز بودي افكك شيفرات افكاره واقدمله الأمان الي يدوره بعيوني مثل ماقدملي الأمان بنظره وافعاله
اتقدم شال ايدي باسها واتراجع بدون ميقبلني بجبيني او خدي او راسي حتى !
حسيت اكتافه تحمل ثقل اكبر من كلشي افكر بي
ماحسيت بخيبة لأن ماگدر يحضني او يقدملي قبل مليانه لهفة
بس حسيت بخيبة لأن لهسه مو شايفني امان اله
لهسه ضايع رغم حبه
اكتفيت بنظرات عيونه الي اتحولت بين عيوني وشفافي وهو يباركلي واباركله واني ابلع غصاتي وحده اثر وحده منا الصار قبل العقد منا احساسي بي وبتعبه
ايده انمدت لشفافي بلمسة ابهام خفيفه انتقل من شفتي الشفته باسه
نصيت راسي بخجل وخصلات شعري غارن نزلن على جانب وجهي وكتفي مد ايده ميلهن ورفع راسي بيده موجهه اله
..باوعيلي وعوديني اشوف هالنظرات منچ لاتخفيهن
مبروك عليه انتِ حلم مستحيل واتحقق بقدرة الله وحده ..اني اليوم بديت وياچ بداية جديدة مستعين بيدچ توصليني
وقبل كلشي تأكدي ايدي منچ ماافلتها للموت واصير امانچ وحصنچ واليعتدي عليچ من اليوم يحسب امه ماجايبته
وهسه اريدج ترتاحين وباچر نزور وانتِ وياي عندي نذر ارد اوفيه طلبته للمرة الأولى
بأبتسامة گلت
..يمكن نفس النذر اني وانتَ
.....
رشا...
بعد العشا الجمعنا ابيت صخر
يوم من العمر چان بي مشاكل وهوسه ومغثه انتهى بفرحه وعقد والله فشلهم عمامها ومرت ابويه ومرت عمي وكل الرادن الخلاص منها دفاع البعضهن او غيره منها ومن صخر وامه وحتى رجلي النسه كلشي واندفع بكلام وكأنه مايعرفني
صح صخر احبه وحاسبته اخ بس ماتوصل ادمر ابنية الغاية ارضيه وهو مارايدها رايد لعب حشاه يرحوله فدوه والغيرته حلفت عثمان اندمه وخالتي هم
ابويه وجدي بعد العشه اجو العمتي شهلة يسلمون عليها ويباركولها وشگد مدحوها ودعتلهم هي على وگفاتهم وي صخر
قبل لايطلع ابوي خليته يسلم على ام نسيبنا علي وخالته
المنفصله چانت كلش حلوه واول ماطلع قبل لاينساها گتله
..يابه خالة صخر منفصله وصغيره بعدهي ماتتزوجها؟
باوعلي مستغرب
..زواجيش بابا شبيج
..والله بعد بيها اطفال تگدر تخلف ترى اني اريد اخ بعد عدنا مجال مرت عمو ابراهيم هاليومين تجيب
ضحك على عقلي وهو يتمشى
..يااخ يابه شلچ بي وابنچ الله يحفظه بأبنج انتو تعوضوني وصخر مامقصر والله لو عندي ولد مايفگدني مثله شو علاجي گبل لاينتهي بيوم الگاه جايبه مرات
سكت ماحجه شي واني مالحيت ابويه ميحب الملحه اعرف طبعه
بس هو عبالك انذار ودك براسه سألني
..شعجب صارلج يومين وزوجج مارجع شنو
..موجود يابه بالبيت قابل وين هو ويجي
..وليش ماحضر عقد بنت اخوه
..خجلان يمكن شمدريني
..شصاير بينج وبينه
وصلت للبيت وكلت بعد مادام اجت منه وسأل خل احجي اني جنت ساكته مااريد اغثه اكثر وهم مايتحاجون اصلا
حجيتله
..خالتي مخابره عثمان تگله معليك برشا تغطي على سوالف ابن عمها ومايهمها سمعة بت اخوك ومستقبلها ومن هالكلام وهو اندفع اتصل بيه يحجي معلك ومن رديت اتجاوز وغلط وقررت ابقى هنا اتوبه مو اني الانسب وبلعها واسكت ومابادر مني غلط
جان يمشي كدامي مچتف اديه الظهره ويمشي كدامي بهيبه خلاني اشوف نفسي اكثر واتحلف بعثمان اذا مااجوزه مااطلع بنت ابوي
..خالتچ العندي لو غيرها؟
..لا منو غيرها هي طبعا
..وتغطين الابن عمج شنو يعني تدارين العلاقة مو زينه وماتهتمين السمعتها ..ليش هو صخر عنده هالقذارة بفكره هي حلاله وندعي الله يتخلص من همومه ويراعي الله ونفسه ويراعيها
ع العموم ارتاحي بابا هنا وعثمان خليه عليه
رحت نومت ابني وخابرت ريمه اكدلها تبقى وي غزاله وتجي وياها مو تتركها وتروح طايره وي عزام ابويه مايقبل يجيبها خطيبها متأخر حتى لو ابيت صخر جانو
هي ماقبلت تجي ويانا رادت تبقى وي ريمه وعطلتها وياها
وفعلا جابوها ريمه وعزام وراحو
نمنا تعبانين يوم مليان احداث
ثاني يوم گعدت الصبح هدوء بس جدي گاعد عاكف الحاجب وضايج ولأول مره يطلب مني ريوك كل مره خالتي تسويله
رحت اسوي بدون مااناقش واتوقعت ابويه مرزلها وزعلانه بس الوقت الغده كملته وغزالة كملت تنظيف اتصلت بيه ريمه تكلي خالاتي وبيبي مخابرتها تعاتبها ليش رشا تخرب بيت خالتها وطلع ابوي من الصبح موصلها البيت اهلها
من فرحتي سديته منها واتصلت بعمه شهله بس گالت الوو كتلها
..صارن اثنين من جناين الحجي مطلگات فيحاء ومرت ابوي ع الابواب
بفزع ردت
..يا اسم الله شجاهم اتسودنو بلا ذاك مسودن من زمان وسويدته الاخيرة بمحلها ابوج شعنده ؟
يتبع...