بقلم نور الشمس
هاجر ..
ثاني يوم صباحية العرسان گعدنا وصخر حاجاني اتصل بحلا اسألها العرسان اتريكو لو بعد
خابرتها يمها هوسه واصوات الظاهر گاعدين امهات العروس وبناتنا يمهم
حاجيتها استفسر وردت باريحيه مثل عادتها
..هلا هجورة والله الهسه احمد مابين كلها اتريگت الا هم
رجع هو حاجاني يسأل هم مكملين الريوك حتى يجهز غدا وهي سمعته .. واني تركيزي مره يمه مره يمها تهت
اخذ التليفون مني وفتح مايك خلاه بينه
..ام عبوسي شلونج يابه ..كواج الله ع التعب
..الله يسلمك وگوه حيلك .. شنو شرايد من العرسان ..نهججهم اليوم لأن ابراهيم هم كل شويه جايني يسأل
ضحك صخر
..ابراهيم يحب يقلق هاي طبيعته.. اني مو مثله اريد اسأل ريوگهم جاهز لو احضره اني.. حتى اذا جاهز غداهم عليه
..لا ريوكهم جاهز والغدا هم امهاتها يمنا نطبخ فد مره خلي عشاهم عليك واحسب حسابي اني وابوك هم
..انتِ اي تدللين بس ابراهيم لا مو من صالحج خاف يحن للأعراس انوب... وعنده مجال خاف ناسيه يعني حبيت اذكر
.. ميسويها بعد القفل والمفتاح يمي
ضحك على ثقتها.. علاقتهم قوت من مرض عمتي شهلة ماتركتنا ابد وبحملي هم يوميه تتصل تسأل محتاجه شي مشتهيه شي والاكثر من شاف عمتي حبتها وهي شلون دارتها
گلها
..دزيلنا ابو خدود نتونس عليه
..عز الطلب صدك جذب بس يكعد ادزه
نهى الاتصال
وگال
..اذا تحبين رجعي نامي ماعدنا شي
ومدري ليش بلحظة مزاجي انگلب وبدون مقدمات حسيت اكو شي غلط رغم ماكو
واني متفهمه الموضوع زين بس طلع مني الكلام وبقهر ماله داعي جاوبته
..انت بس تريدني انام حتى مااشاركك بتحضيراتك
واحرمك الأكل
باوعلي عاگد حاجبه
..شنو هالنبرة شبيچ ؟
..ماكو شي لاتهتم
حجيتها ورحت انام رغم النوم طاير اتمددت شويه
ولحگني للغرفة غمضت حسيت بعصبيته من استخدامه الاغراضه فتح الكنتور اخذ ملابس وسده بقوة بدل ومشط شعره واتعطر
قرب عليه شال السويچ والمحفظة من مجر السرير
وگال
..بغض النظر عن النبرة الحاجيتيني بيها اني ماغاشچ هذا وضعي من البداية ...مع هذا خل اعترفلچ انتِ صرتي حالة استثنائية وعبرت وياج الأصعب ومنج متكش نفسي نهائيًا وانتِ تعرفين ومو غشيمة!
واكلت من ايدج هم بمرض امي اذا تذكرين بفترتها اني مالزمت بأيدي اكل ولا اكلت من غيرچ ..بس الطبخ عندي هوايه وشغف والاهم مااريد امي تحس بفرق
يمكن اعظم امانيها هاي ارجع اكل من ايدها بس ماصارت سبحان الله شكد ردت ماكدرت لهذا مستحيل اهيج جروحها من جديد ولهنا الموضوع هذا ننهيه وهذا تحذير لأستمرار المحبة هالنبرة لتعيديها وياي ابد ماانصحچ
طلع بدون ماينطيني مجال احجي وابرر وبداخلي مااعرف شلون ابرر جفصتي وياه الموضوع عنده حساس بس والله امنيتي اوكف على طباخ احضر بي اكلات يحبها او تعجبه فد اكله من ايدي
الموضوع مو عادي مثل ماجنت اتصور ان هالشي من صالحي ..اكو امور بسيطة تخلق روح حلوه بالعلاقة ومنها هالأمور ان شلون وحده تبدع الزوجها ع الأقل
انتظرته يجي مااجه طلعت العمتي ومحمد اخوهم جايب عباس اخذته
..صاحبك الجديد ماكو طالع وزعلان
اخذتله صور ودزيتها اله
وعمتي گالت
..صخر راح يشوف عمه ورشا هذا صخمان هم شايف روحه هله على اليتيمة الحمدلله والشكر ربي
انوب انتبهتلي ورجعت سألت
..ولو مدري ماترضين عليه عمج بس دگته برشا ماتسولف
..لا عمه احجي براحتج ..كلامج صح رشا ماتستاهل ابد هو الخسرها
..والله لو ترضا بأسعد يدللها بعد عمته هو نشمي وسبع وماينخاف عليها وياه وطلاگه الأول مو تقصير لا منه ولا منها
خواله اتخاربو وي امه على ورثها لو ناكل ورثچ لو ناخذ بتنا وصار عناد خابرو بتهم هسه تجين طلعت وهو بدوامه خفاره وهي حامل نزل لكاها طالعه گال الطلعت بغيابي بمشكلة اني مو طرف بيها ماترجع بعد وهم من سمعو عاندو
اخوي جان ناوي من تجيب يرجعونها جابت بدون مايخبرونهم وجابوله الولد واجو كالوله ربي ابنك بتنا مانربطها بيك خاف جان بي شويه لزمه من شاف ابنه بكماطه وساخيه بي قفل وهذا يوم وذاك يوم واهلها اتراضو وي امه ولاجن صاير بينهم زعل والولد وهم دفعو الثمن
..خطيه شوف الاهل والله مرات يصيرون لعنه على اولادهم هي شعليها ورادوها المفروض ماتسمع منهم
..ماانطت باهلها وصار الي صار
هي تحجي وبالي يم صخر راسلته
..اعتذر منك حبيبي والله مو قصدي اعلي صوتي وانتر ابد والكلام هم انساه وهذا قهري نابع من حبي اريد ادللك اهتم بيك مثل ماانت مهتم بيه
انطاني قلب للرسالة ومارد
انقهرت مبين الهسه ضايج ظليت افكر بشنو يفكر هسه شيگول عني
رن تليفوني جاوبته وصوت عمي سليمان وياه
..ها حبيبتي ..مشتهيه شي اجيبه وياي من اجي
من نبرة صوته ارتاحيت واتذكرت مشتهاتي الحرمتني النوم ساعة ليلة البارحه
..اي والله متت ع المعلاگ
..ادللي احلى معلاگ لعيون الغالي وامه
..يعني مو اني الغالية هو الغالي ؟
الله عليك كول مقلب اغثج بي وانتِ هم غالية
ضحك ونهى الاتصال ودزلي رسالة
..انتِ الغلا كله ..نص الگلب حصتچ والفايض نوزعه ع البقيه ومنهم ابنا
..حبيبي فدوه العينك شكد احبك ماتعقد الامور
..شو ماكلتي النص الثاني المن
..الشهلة اعرف
..ههههه شاطرة وعلى طاري شهلة بس وياجن انتن الاثنين مااعقدها لأن حياتي بدونجن تعقيد بتعقيد
غدي امي واجي العصر وهذا ابو خدود دزيه الامه حتى بالليل اجيبه لأن هسه اريد اعالج فقرات جدي تعبان
خليته ع راحته شگد ارتاحيت لأن ماخلاني اطول بهذا الشعور المزعج من انت غلطان وي اعز انسان على قلبك ومتعرف شلون تمحي هالغلط
المغرب من وكت جهز المشاوي للعرسان رتبلهم صينية تجنن
ايقنت فعلا عنده الطبخ هوايه وشغف وفن
سوالهم منسف مشاوي مشكل وي الخضروات المشويه هم
انطى العمتي اكلها وانطاني لفتي وراح يسبح من ريحة الزفر والفحم
بيدي لفتي مسويها جبيره كلش ومتعجبه على نفسي شلون هيج مخروعة مثل الجاهل الطماع اكل منها واباوعلها خاف هوايه نقصت كل مااشوف بعد هوايه ارتاح ونفسيا استقر
طلع من الحمام مر من يمي شاف عمتي بغرفتها اتابع مسلسل حاجاها عن رشا و رجع ينشف بشعره وخر الخاولي علگه ورجعلي
ولزم اللفة وهي بيدي بعضه وحده طير نصها
باوعتله مصدومه
وهو يمكن عباله يفرحني وشاف صدمتي من عيوني تتنقل بينه وبين الباقي من اللفة
ضحك على منظري وبرر
..حتى اتوبين بعد
استوعبت الحالة شبيه اني وضحكت على روحي وعلى ضحكه
..الف عافية ..اشهل ترى والله العظيم اني مو هيچ ابنك مدري بنتك مدري شسوو بيه اكووشي بيه مو طبيعي
..شي طبيعي لأن حامل ..شنو يجي ابالج وبأي وقت يأمر ويدلل الأسمر ..شكم نوتيلا اني عندي
..لا ترى هيج اعوف اللفة واعضك انت
ابتسم ورفع حاجبه مستغرب ردي واني هم ضحكت من گال
..هاجر الحمل شلاعب بحالچ .
..اي مخربط السستم كله ..صدگ حاجيت رشا
..حاجيتها رشا بعدهي تعبانه وحقها طالعه من تجربه مو سهله ..ماالومها وكتلها براحتج بس نصحتها بي اسعد رجال ونعم منه
ثاني يوم زرنا العرسان ويانا طبق حلا وكيك باركنالهم بنين تجنن ماشاءالله عليها وهي صاحبة مفر مثل ميكولون وعدها لباقة صخر فرح بيها وشافها تستاهل احمد
رغم لكيناها باجيه وره امها من راجعات وعيونها مبينه حمر بس حلوه ومرتاحه دعينا الله يهنيهم
مرت فتره تقريبا شهر
بطلعة صخر للدوام رن تليفوني بنين تتصل جاوبتها جانت تبجي بجي مو عادي وگالت هسه تجين حيل محتاجتج
بلغت عمتي اروحلها وطلعتلها مستغربه بجيها وطلبها والف فكره براسي معقولة حامل وسقطت بهالسرعة
لو اهلها خابروها صارلهم شي لأن عدهم مشكلة هالأيام
راسي افتر
واول مافتت گالت
..حرام عليچ هاجر ليش هيج تقشمريني ياحب هذا الگلتي عنه وينه الحب فهميني
..اسم الله الرحمن بشنو قشمرتج شبيج ..شبي احمد شسوه
بجت حيل وشعرها الطويل متناثر باهمال وصوت نحيبها يگطع الگلب منظرها مال وحده داگه ولاطمة ولا عبالك نفسها اليومية اشوفها بأحلى وانزك منظر
..ولج احجي شكو
..من اول اسبوع للعرس بالليل تأخر حيل واحنا عرسان وتعرفين مو وقت سهر بره وهالامور
زعلت وجنت ناويه اعاتبه
رجع متأخر والصدمه وياه اخوه حمزة صاير طينة فوته للحمام غسله وماخلاه يدور البيتهم هناك صعده يم اخوانه الصغار عرفته شارب سكتت بس ضجت حيل وحقي
اول شي التأخير من احمد ماله داعي واخوه ماشايفته ولا أعرفه كد المباركه وبس واول ماجابه بهالمنظر
تركته والصبح العتاب اتحول جدل وشويه ويصير عركه وياه وهددته وكتله اخوك ممنوع يدخل هنا بعد
والله اهلي لو يعرفون يتخبلون شنو سكران جاي هنا يمي.. وهو بدل ميكلي حقج لعب لعب وسواني من البداية افرق الاخوه ونحسه وگلي حجايه وحده بهالخصوص متحجين اخويه مااطلعه لو مو تزعلين لو الدنيا تنگلب
ومو هنا المشكلة المشكلة اخوه طلع سامع كلامي وياه من ذيج اللحظة يجي يفوت ويكعد بالبيت وره هالحادثة اجه تلث مرات احسه يفوت عناد صدك يجي طبيعي بس ماطايقني وكل نظرة يخزرني بيها يطلع روحي من الخوف
..بس اهدي وخل افهم منو المخوفج حمزة ..ترى حمزة ماكو الطف واحن منه اكيد مشتبهه ..وشوكت جاي شارب شعجب وشلون صار سنين وياهم ابد ماشفته بهالطريق ..بس هو صارله ظرف يمكن بسببه
اذا صدك حرامات ومااعتقد اخوانه يخلوه بعد يمكن احمد يريد يحتويه هيج فكري
..لچ والله يخووف ابد ماطايقني ابد ..واني مااحب المشاكل ارد ارتاح ..هذا الموضوع انتهينا منه تركته وانجبيت بس المشكلة البارحه اجه واني اتعودت من يفوت اقفل الباب ومااطلع بس البارحه الله سلطني عليهم يريدني اكشفه
اخوه قافل بموضوع وهو يكله واذا حبيت الدنيا ماتوگف عليها اني گبلك حبيت والهسه من يمر طاريها روحي تلووج
ويرجع يكله
وعادي اتعايشت دافن حبها وعايش حياتي انت رجال يكسرك حب صدك تحجي
وحمزة يردله
..انت لأن اخذت حبك تحجي هيج ولأن ماغدرتك وسوتك قشمر مثل ماصار وياي اني بگلبي جمرة ماتطفى
شهگت بصوت عالي ونحبت مغطيه وجهه بأيدها
تدرين شجاوبه
..يگله منو گلك حبيتها مرتي اني انعجبت بيها وباخلاقها ولأن ماخذ عهد اخذ مو على رادة امي ولا على رضاها وماكو وحده تخليها تندم على رفضها البت عمي غير هالطريقة
وعايش ومتونس وناوي ادللها هي هاي الدنيا مو كلشي تريده يصير
..اني شنو ذنبي اسمع كل هذا احجيلي
..لا مستحيل والنبي مات عليچ والله يابنين الكل متعجب شلون هيج متخبل عليج حتى على اتصالاته يحجون خاف يريد يقنعه وحجه هيج
هزت راسها ومسحت وجهه ورجعت بجت احس گلبها شويه ويوگف نزلت دموعي وياها واحساس الذنب غزاني ..اني شدخلني وخليت روحي بقسمة مو مكيوله هي الانسان يمشي بجنازة ولا بزواج
..لا مو اني صارحته وفرفحت ابجي وادعي ومكسور خاطري ..يكلي شنو البي اهانه الچ كلامي واضح مو اني كلت بنت اوادم مستوره تلفت الانتباه بحضورها
وتنحب وعجبتني اعجاب قابل عشت وياج قصة حب اني وين عرفتج قبل بس اكيد راح نعيش احلى قصة بالحلال
..ولج بروده موتني ولا عبالك جان يسولف بحب مخلي جرح بگلبه الدرجة متحدي امه
وتالي بعد زواجه مرتين يدز يريد يرضيها ونروح الها وترفض ..جرحني اني ماجرحهه مامهتمه هي وموصيه تكول مااشوفه ويكول امي واريدها الا يطلگ
شلون امن بي اني احجيلي انتِ راح اموت ووضع اهلي مايسمح اروحلهم واشكيلهم ابد وره المشكلة الاجتهم مستحيل اشغلهم اني هم
..والله يابنين عمت عيني وبصحتي وعافيتي لو اعرف بيوم احمد رايدله وحده ..والله ماادري انتِ اختي ولج اقرب صديقاتي شلون تتخيلين اسويها بيج واخدعچ
وام گلب الطيب بس شافتني هيج حضنتني تسكت بيه ودموعها ماوكفت
..عليج الله انتِ حامل لاتنغثين شعليج اني امسلت وهذا هو صدكتج همزين ماتدرين لو تدرين ازعل وحقي بس هسه لا
..واحمد هسه وين
..طلع عدهم شغل مهم ..والليل كله ماخلاني اتحرك عنه وابتعد غثني حيل دمرني ومسوي نفسه حنين ويمسح دموعي وبكل برود يكلي
..يعني انتِ شجابج تتسمعين علينا ترى ماضي راح واني صدك ماعشت وياج قصة حب مجرد اعجاب وموده ورابط الزواج البينا اقوى والايام الجاية كفيلة تخلق بينا احلى قصة
عليج الله كلامه مو مال واحد ملعب معتبر مشاعري لاشيئ
..مو انحياز مني بس والله احمد ابد ماعنده سوالف منا منا ويمكن هي هايه قناعته ..انتِ لو ما الكلام السمعتيه تحسين اكو شي غريب تحسين منه برود وجفا
..لا والله بالعكس مطيرني للسما بتعامله ومااختلفنا الا على جية اخوه بس مااتخطى الصدمة وكسرة گلبي ابد
..حمزة طيب والله بس متعرفيه ..واحمد انطيه فرصة وانطي نفسج هم
..لچ يموت مني والله ..والبارحه شافني من اسمعهم وهو كله روح المرتك هسه اكيد شمتان بيه
..لا ميسويها شبيج ..كومي ويايه تعاي لاتبقين هنا تضوجين وحدج وتجيج افكار مدري شلونها
..لا مااطلع بغيابه وحلفت مااتصل بيه
..حبيبتي فدوه للعاقله بنونه والله متأكده راح يموت عليچ ومثل مگال رابط الزواج وحبه هو الاقوى اذا عرفتو تتعاملون وي بعضكم صح
..ابن اختچ شصار العينه
..سوده عليه عمليته الاسبوع الجاي واهله محملين اهلي المسؤولية ولاعبالك كبروه وراعوه واتفقو بس تكمل عمليته ياخذونه عمامه يمهم مايبقى بعد
..الله يعين گلب اختچ فوك قهرها شنو هالظلم انتِ تكولين مربيته وهي ام واب وابوج مراعيها من عمره سنة ابوه استشهد ليش هيج يحكمون ظلم هذا
..الها الله حرمت نفسها من زواج وعاشت بأمل تكبره الله كريم اني هم على اساس اروح زيارة واشوفهم بس الي صار ماخلاني احجي
..انتِ عاقلة بنين واعرفج سباعية وتعرفين شلون تتصرفين ماارد اتفلسف بنصحچ الموضوع صعب وحقج بس دائما هوني على نفسج ومن تشوفين نفسج بين خيارين اختاري الخيار الانسب الي يريحج
مدام ماعندج خيار ثالث اما قناعتج او اذية نفسج
مثلا انتِ باقيه بين ان هو قشمر عليج فعلا او كلامه صحيح اختار الانسب النفسه وناوي يكون علاقة صالحه اختاري الثاني وريحي گلبچ الهم يذبحج وميسوي شي ولايرجع الزمن
استأذنت منها بعد ماشكرتني على جيتي الها ارتاحت وهي تفضفضلي
واني گلبي ظل يمها ومحتاره احجي الصخر لو لا البنيه ماتريد احد يعرف ومو من حقي بس هو قريب الاحمد ومتفاهمين حيل هو واخوانه يكدر ياثر عليهم ويلزم حمزة الي مااعرف شجاي يصيرله هالفتره
بعدين اتراجعت مااحجي الا لو هي طلبت مني هالشي
مرت الايام احاجيها ومن مر على زواجها شهر ونص وعرفت بحملها اتخبلت اكثر
بعدها بدت تستسلم واقتنعت تمشي حياتها بس تكلي گلبي انكسر وذيج الفرحه بي راحت
صح هسه افرح احجي وياه اضحك بس مانسيت كلامه وواهس البداية انتهى لأن جان طموحي شي وحياتي شي ثاني
رغم كلشي هو مدللها ابد ممقصر وياها وبنفس الوقت ماماخذ قهرها وشكوتها بأهمية وان هو غلطان يعتبر كلشي طبيعي وهي مبالغة وهذا الغلط هي تشوفه قلة تقدير المشاعرها
وبدينا الدوام وصرنا اقرب بعد وقتنا كله سوه نراجع وندرس اجتهدنا الحمدلله
هي ماعدها شي واحمد متساعد واني هم صخر ممقصر بس الحمل متعبنا اني متقدمه عليها دخلت الثالث وهي توها شهر ونص
وصارت خطوبة رشا وكلنا فرحنا بيها
وسوولها حفله هم بسيطة وحلوه وجذبت الانظار بيها بنين لأن الاغلب اول مره يشوفوها بعد العرس
والكل يتسائل عن الجنه الغريبة الغضب امه علمودها
وجان قنبلة الحفلة صوتها صدمة الي وللباقين ابد مامتوقعيه بهالقوة والجمال بي بحة حزن رهيبة
من غنت هلا يرباي ويرباي ليش انكرتني بطور تراثي ينعرفون بي اهل الناصرية وخاص عشائر البدور خوالها حسب ماذكرت
وي كل مقطع جنت مركزة واحس عيونها تلالي بالدمعة والجرح البيها يتجدد
شكد سمعانه ناس تكول هذا يتراقص على جرحي هيج جان الوضع وبس اني فاهمته وبالي كله يمها
هلا يرباي ويرباي ليش انكرتني
هلا يرباي ويرباي ليش انكرتني
هلا يرباي ويرباي هذا الگلب شيريد
هلا يرباي ويرباي كل مرضي منه
هلا يرباي ويرباي ليش انكرتني
هلا يرباي ويرباي كل مايمر اهواي
هلا يرباي ويرباي واجذب الونه
هلا يرباي ويرباي الزعل من يطول
هلا يرباي ويرباي ماصخ تراه يصير
هلا يرباي ويرباي وانه ترى وياك
هلا يرباي ويرباي ماعندي تقصير
هلا يرباي ويرباي خيعونك بدنياك
هلا يرباي ويرباي يالچنت يمه
هلا يرباي ويرباي هذا الهوا من اهواي
هلا يرباي ويرباي حيل ارد اشمه
كملت اخر شي الاغنية طويلة حيل وشكت بيها همها كله مقطع اقوى من مقطع
كلها تمدح بصوتها وحضورها وبس اني اعرف قصتها وغصتها
اما رشا الكل فرحان بعوضها التستاهله
مشيتها چانت مهيبة وكل الديرة والعمام اتعجبو بيها
بيومها متخبل عثمان وواكع وكعه قوية
شكد حاول يخربها محد اهتمله واخر شي صخر والولد دزوله تهديد بس يفتح حلكه يتصرفون
وسمعنا من نسوان عمامهم البينهم تواصل
زوجته هذه هي وياه مشاكل على طول ويومية زعلانه واهلها يرجعوها
العريس عيونه ماشالها منها وهي هم بينت اعجابها بي من نظراتها الكل انتبه
وكلشي ماشي حلوو الى ان بيوم جنا راجعين من الدوام للنوم بدون اكل وتونا جاي نحضر وجبه النا هي غدا هي عشا اجه الصخر اتصال
شفت بلحظة وجهه بهت والصدمة احتلت تفاصيل وجهه ترك من ايده وطلع بره
ورجع محتار وحاجه عمتي
..يمه امشينا ابن رشا مات
عمتي صرخت وضربت وجهه وسألت تتأكد
..يايمه يارشا ياظليمتچ ..شموته ولك
ماحجه وع السريع استعجلنا عمتي تلوم وتواسي رشا وجنها يمها واني دموعي ماوكفت اشوف ايده وهو يقفل الباب ترجف
بعدنا ماواصلين بابهم وصارن اسرع منه ام عمار وريمة ملخت روحها فرفحت
ورشا اتخبلت خبال ابوها وصخر التمو عليها مالزموها فرفحت
تكسر الكلبه صخر كل صرخه منها مصحوبة بونه والم غريبة الم مايطلع الا من الفاقدة يملخ الروح
احس گلبي انملخ
كلنا نكلها صبري والحقيقة الصبر صعب كلش صعب
ومن انتبهت على صخر وابوها وكعت بينهم للكاع
وبصوت صرخت
.. ليش يابه ليش ..گلبي يابه گلبي يوجعني كتلك مااوديه كتلك ساعة وحده كافي ماينتبهون محد مثلي يدير باله عليه
ليش صرتو عليه ليش ماقدرتو خوفي ليش كلتو حقه منو يطلعلي حقي هسه منو منكم يجيبلي ابني اريد ابني
اريد ابني صخر جيبه اليه مايوم نخيتك على شي واتعذرتني جيبه هسه اخوي انت مالي غيرك جيبه
صخر لازم ايدها ويبچي
محد بيده شي كلشي مانگدر نسوي وهذا المكتوب
الدنيا انگلبت الگرايب كلها حضرت
النسوان تواسي وتبجي وتمل وهي ماملت ولا وكفت كل اثنين يسولفن بينهن
..ابوه متخبل مصيبة مصيبته
الولد مررود مرد راجع عليه قوي مامنتبهله وعمه كبل سلم نفسه
وحده كالت يكولون عمه هو توه حاجي عليه
..كايله الولد شبع بجي على امه وديه شنو ذنبه
كلشي سويته حتى تلهيه مايفيد ابنك يريد ينام ومتعود على ريحتها حرام عليك وديه
ومن ساحگه فاقد منتهي
مصيبة ووكعت عليهم
چلجل الليل والجو بارد ثلج ليلة من ابرد ليالي الشتا
وصوت الهوا وي حفيف الاشجار ونعي عمتي شهله
يمه يالولد يالب اللفاد
مثل الهوا على الرية رايح وراد
گعدت قريب الها لازمة ايدها اني منا ومنا نوره وبس صوتها البدا يخفت شويه شويه احبالها الصوتية تعبت
ومقابسلي ريمة وغزالة مثلها وازيد هي مهدود حيلها كلش
كل ماتسكت عمتي وتصبرها تكلها طير بالجنة
يشفعلج
تبوس ايد عمتي تكلها كل هذا اعرفه مامعترضه بس انعيلي گلبي راح يطگ
اخخ يافرگة الولد تصعب عليه
يحيلي البرجليه احا يالولد يحيلي البرجلية
صاحت بصوت وطفرت
.. شلون بهالبرد وهو بارد
يوميه بحضني البس وادفي واشغل صوبه وليلي مانامه الا بحضني واشمه شلون انام شلون
صارت هوسه بره اصوات الزلم علت
والنسوان كالو اجو الله يعين گلبها دفنوه واجو
هي سمعت دافنيه وماشايفته فرفحت نريد نلزمها ماتنلزم
طلعت بره للحوش وبكل صوتها تعاتب عمي وصخر
بگلبي لمتهم شلون ماجابوه لمن حضنوها يكلولها تموتين لو شفتيه مالنا كلب نجيبه
الظاهر متأذي حيل
گعدت بره بالحوش مابقى واحد ماتوسل بيها تفوت نسندها نفوتها تجر روحها منا جر وتگعد ع الكاشي من برودته يجوي
حاجيت خواتها يحاجنها هنه اكثر منها
..وعنتي تكلها يمه حرام لاتجزعين جزع هذا هو برحمة ربه وطفل طير بالجنة لاتضيعين اجرج
تعذبين روحج بالبرد ليش
ماتسمع ابد الله يعينها وبهالاثناء النسوان خفت وبيهن راحن لبيوتهن لو راحن جوه نامن البرد ماينحمل
واحنا يمها كلنا ترسنا الحوش بنات عني ابراهيم وبنات ابو مهيب وبنات ابو عمار واحنا ورنا وخواتها
فرشت رنا فراش كوه نقلناها عليه وخليناها بينا لاتكوم وبنعي عمتي وونهن صاحونا رادو چاي للزلم البره انتبهت كل عمامها وولدهم بالباب ويسمعوها ورشا عزيزة عليهم كلهم محبوبة من الصغر
كاسرتهم كلهم
نوره اجت ورايه
..صخر ضارب عثمان علي بالمستشفى وعثمان كوه مخلصيه منه
..شصاير
..يكول حمزة بعده الولد والاهمال منهم علي كايل هسه براحتها تتزوج وهي خفيفه باسطه اموته موت وكاسر خشمه وهسه هوسه صايره
..الله لايوفقه على هالحجايه حرام عليهم شخلو بيها
..هسه يكولون بنت اخونا مانخليها يمهم
..بنت اخوهم منو اني؟
..اي شبيج قابل منو
..شحدهم يوصلوني ذوله مالاكيلهم احد يوكفهم عد حدهم ويردولهم كسر خشم كلهم الظاهر
بدينا نجهز الجاي واني ابجي من اتذكر شكله
الله يساعد كلب امك الله يجبر كلبج رشا
اجن البنات فاتن كلهن جوه حتى خواتهن
..شعجب عفتنها
بطه كالت
..خطيبها توه طب من الناصرية وفاتلها
وهي تحجي وصوت بجيها وصراخها على تبجي بهضم
باوعنا حاضنها وهو هم يبجي وياها
وهالليلة مرت صعبة حيل وطويلة
وثاني يوم كملو العزا
وامه بدت تذبل شويه شويه الكل استوعب الا هي
الكل اتيقن هو انتهى من الوجود الا هي بكل صرخه الجاهل تفز
كل ماسمعت صوت واحد منهم يصيح امه تفز
خلصناها بتعب وقهر
العم هو سلم نفسه ومنتظر الاجراء عثمان اتنازل عنه
وباقي بس الحق العام ورشا رفضت تشتكي اصلا تكول المذنب عثمان مو هو
المفروض عثمان الينسجن
وماخلصت المشاكل بدو صدك وكل عقلهم يطلبون ارجع الهم والا تبقى مشاكل بينا
ومن سمعو الولد علي كايل
..محد ماخذه كوه هي مخليته يمه تريد تخلص مشغولة بخطيبها اتخبلو
ابوي بلغهم ممنوع يوصل كلام الاسعد عنهم الولد دمه حار وهم يردون يجروه المشاكلهم ويكسروه على ابو هو رجل قانون واتصرف بمنطق عشائر عقوبته تكون مشددة
البي غيره منكم يعلمه اصول الكلام شلون واذا مافاد كسر خشمه نگعده فد نوب
وهذا الكلام بالحرف الواحد واصل الهم والمشاكل زادت ماهدت
بعد العشا نريد نروح الرشا نشوفها عمتي شهلة ماعافتها ابد
بس اني والبنات كلنا نروح يوميه بالليل الدوام ماخذ وكتنا
تونا نريد نطلع وطلعو الولد ابواريهم سلاحهم
بطني مغصتني من الخوف وبنين لحكت احمد راكضه تريد تجر السلاح منه
..فدوه مو بسلاح احمد ايدكم الكم كسروهم بس مو بسلاح ولد عم انتو ودمكم واحد والدم مايجيب غير الدم جر ايده جر منها وطلع وعيوني ادور صخر
صخر ماكو
رجفت رجليني من عرفت هي هاي فزعتهم اله
يتبع ...