بقلم نور الشمس
سراب...
نومت خطاب بفراشه ورحت الفارس گاعد من وكت يريد يطلع الأهله يسلم عليهم اجه من السفر بالليل متأخر
چانو بايتين يمي حمودي وياسر ابويه يدزهم يمي من فارس يسافر
خليتهم على نومتهم واستقبلته .. هو نام الفجر واني گعدلي خطاب وهسه ارد اسوي ريوك اله واريكهم والف راسي وانام صرت مااشوف دربي من النعاس
جهزت الريوگ وگعدت محمد وياسر
..گوم محمد حمزة منتظركم يريد يجهزلكم ملابس للدوام يلا لا تتأخرون تريكو وروحو
گعد وگوه فاتح عيونه
..شوكت اجه حمزة شراح يخلصنا هي بس حلا كافي علينا
..فوگ مامبتليه حلا بمسؤوليتكم ماراضين وحمزة بس هو دواكم گالتلي عليكم زين تسوي ولك كبرت وصاير شطولك وحلوو وعين الله عليك شنو عداوتك وي الحمام وماتفوته الا بعركه
..مرت ابوچ سلحفاة لو بشه مال سبح تريد كل ماالعب طوبه ارجع اسبح شنو يومية السبح
ضحكت وفارس يضحك صاحه مناك
..يول المي بلاش تنلام بيك والله زين ومنها تريد تلعب طوبة وتفتر الگيعان كلها وماتسبح يومية ليش ريحتك مسك وعنبر مثلا لو شنو رايك بنفسك
اشرلي بيده ياسر متحلف
..رجلج هنا نعله على ليش تفشليني وتخليه يسمع اسراري
..گوم غسل و اتريگ اسراريش هو هذا هم سر
..ريوگج مااريده وبعد ماابات حلا احسن منچ يم ابوي وماتحجي وتفشلني مو مثلج يم زوجج تصيحين ..وبعد خل هو يكعد يمچ مو يفتر بالدول وتعالو احتارو بسراب
ضحكت وفارس هم متونس على سوالفهم
كوه خليتهم يتريكون ووصيتهم يسمعون كلام حلا مو زين مداريتهم هم زينين بس هي علمودهم توهم بادين يكبرون واكثر شي ياسر يعاند
حاجيت فارس وهو طالع الأهله
..ابو الفوارس
..ها حبيبي گولي
..سلم على عمي وعمه وياك واذا مابقيت عدهم للغدا جيبلنا غدا وياك لأن راح انام طفيت
..من عيوني سهلة نامي وشبعي نوم ارد اشبع منكم بالليل
قفلت البوب ورحت لفراشي
وعيوني مااخذت نوم ظل بالي يودي ويجيب لمن ذكرت كل لحظة وسالفة جمعتنا الحد ماطفت عيوني من البچي على اخوي وحبيب روحي ونمت
بس چانت نومه مو حلوه ثگيله نمت مهمومه گعدت راسي يريد ينفجر لگيت فارس جاي وجايب وياه اكل الي واني مااشتهي بس مسكن اخذت
عرفني لأن كل كم يوم يصير بيه هيج من يوم المات لليوم ظل يحجي ويلوم مره ..ومره يصبر وگال لو رايحه ويايه وطالعه مغيره جو مايصير بيچ هيچ الگعده بالبيت كل هالفتره تمرض وتخلي افكارج تاخذج للبعيد وهم سأل على مرته وصدمني من گال
.. امچ گايله الأمي اهلها يردوها الحمزة سألتني وگتلها ماسمعت هالحچي
صحيح اكو هيج شي لو حجي نسوان اذا حجي نسوان حاجن امجن البنيه غريبة بينا ومكسورة وأم البنت من عدنا والكلمة مسؤولية هذا التشهير مو حلوو اني حتى على امي مارضيت وحاجيتها لاتسمع ولاتحجي اي شي بخصوصها واذا صح هم شكو بيها عم البنت احسن من غيره
متت قهر وزاد وجع راسي ماقل
..حمزة هو بشر متأثر اكثر من اخواني البقية حمزة واحمد نومتهم كعدتهم سوه اكلتهم شقاهم من الطفولة الحد اخر يوم هم مامتفاركين مستحيل يسويها مايقبل ولو يقبل ياريت عن نفسي اتمنى لأن اهل بنين رجعوها علمود دراستها والحد مابنتها تكبر شويه بينا مستحيل يخلوها اكثر وابد البنيه بحال زواج والله لو تشوفها تكسر خاطرك والصدگ غير هي شابه اشافت من حياتها ماتبقى عمرها كله وبنته شالعه گلوبنا خاف يجي يوم نحلم بشوفتها لو تتربى تعلعل بدون اهلها
..لا ان شاءالله ميصير كل هذا بس مثل ماوصيتچ حاچوها عمتي لايسمع عمي وتكبر المشكلة ..وهم وسام اول مارحت لگيته جاي الأبوي يشكي من صخر طارده وجدي رافض استقباله اصلا يكول كله من صخر واريد اشوي امرله اشوف شنو السبب
..لاتسأل صخر ولا تتعب السبب يسود الوجه ماردت احجيه يفشل بس منك ماانحرج وسام بايگ ابوي 30 مليون وابوي خله صخر مدير للشركة وهو من اول دوامه طرده
صفن عليه محتار شيحجي بس وجهه دخن
..لا والله؟
..اي والله وتگلي طلعي وغيري جو المن اطلع اشبع قهر وارجع ..ابوي ماحجه ماراد يكسر بي بس هو النذل مايرتاح الا يفضح نفسه
..وسام شبي عقله وين جبير ابوه هو المفروض هسه مكانته غير يروح فدوه الصخر هاي عقوبة العمي وجدي من اتخبلو من زواج عمي بأم صخر على ابو تأثر على النسل نسلها وين وهذا وين وحتى اخوانه البقيه كلهم ونعم منهم شبي هو
سكتت مدنگه راسي والله صعب اسمع عنه هالكلام بس الحقيقة هذه
فرك وجهه وگال
..الله يساعد عمي منين يلگاها ..تعاي اكلي خيولون وخل اروح احاجي صخر بغير طريقه هو شو يهدد يكول اتعمد يخفي اوراق ومدري شنو واثباتات عندي وعندي عيون بداخل الشركة وعلى اساس مكره الموظفين بالشركة وجاي يعاملهم بفوقية وهوايه امور
..مااعرف بعد هاي بينكم ..بس اروح وياك اشوفهم هم
انتظرني البعد العشا بدلت الخطاب والي وطلعنا البيت ابوي لگيت بنين يمهم شحالها السواد مغطيها من فوگ الجوه وعيونها شايلات حزن وهموم تعبانه حيل احنا السواد منلبسه اقوى شي اربعين يوم او وللزوجه حد العدة بعوائلنا وشگد ردناها تذبه هي رافضه وخليناها على راحتها
فارس استأذن يروح الصخر اني اشرت النوره تجي ورانا ورحت وياه
ارد احاجيها اني وهاجر فرسان اكل گلبي ميت عليها ذيج الفتره ترك الموضوع عبالي نساها وصار اسبوع رجع يلح
فتنا سلمنا
چان صخر توه جاي وبالمطبخ جاي يحضر اكلهم هو وهاجر
وامي شهله بيدها حمودي وتهوسله
..اسمر وچنه هلاله وياذيب للخياله
وفارس يگلي حفظيهن الخطاب
جابو العشه ومااقتنعو من گلنا متعشين شاركناهم قليل
گمت وي هاجر من اعزل المطبخ وياها ونحضر چاي وخطاب وحمودي يم شهله عفناهم تلعب بيهم خطاب اكبر وكل شويه يريد يگلب على حمودي وصخر يگل الفارس كلشي ولا ابني بالك ترى نتخارب
نسولف واذنا يمهم فهمت هاجر على شنو جاي فارس وصدمتني من گالت
..ترى صخر يعرف وفعلا وسام عنده عيون شاك بالسكرتيره تخص وسام وحتى الفلوس يمكن صارفهن عليها
شلون عدهم ومرته مخابره عبد البارحه اجه جابلهم مصرف للمدارس وگايلها خل ينطيكم من الفلوس الأخذها من ابوه ومتخبله مرته تحلف ماماخذ وكلشي ماعدنا حتى مسواگ ماعنده يتسوگ ومصرف عمتي ميلحك علينا
..عزة يعني شنو ؟وليش ميلحك عليهم مصرف امي ابويه هوايه يدزلها واحنا ولد وبنات كلنا ننطي الأمي شعده هو وسام مو كلنا عدنا بيوت شبي هو ومرته مفجوعين
..ماادري بس صخر مخلي باله وي هايه الموظفة هو حذر تعرفيه ومتأكد سامعها متصله بوسام اول مره وباقي وراها الى ان متأكد منها مواصلته واكو كم خطوة مختبرها بيهن ومتأكد هي تنطيه اخبار البارحه عبد من بلغ صخر بموضوع زوجته واطفاله صخر گله يجوز يطلع متزوج لو يصرف عليها مو بعيده
لطمت خدها
..عزه يايمه شلون بوسام شلون ..شلون يتأكدون
..صخر مامهتم گله انتو اخواني ورگبتي الكم بس وسام مامستعد اضيع ساعة من وكتي عليه تردون راقبوه انتو وافتهمو
..السكرتيره وين لسه وياهم
..مطلعها صخر ومشتكيه العمي وعمي ناقلها موظفه الغير فرع يمكن قريبه العبد لأن عبد گال خليت بالي يمها خلص
..عبد شرد منا وطلع والمشاكل وراه ..اني ارد اموت من قهري هوايه سوالف هاجر مااريد ادوخج بيهن انتِ هم مو ناقصه ..بس خل نحاجي نوره على فرسان ترى رايدها صدگ وماعليها بأمه عمتي يقنعوها لو قفلو تستسلم
..ترى مبينه نوره بدت تميل اله حاجيها بدون ضغط ام خشم يابس متحب شي ينفرض عليها كليلها ميت عليج يحجي بيج هيج امور بدون شروط للموافقه
من تگليلها وافقي ماكو احسن منه رأسا تگلج لا
..اي والله انتِ فاهمتها هو هيج راح اسوي
رجعنا يمهم گعدنا فعلا صخر حجه كومه اشياء من اول يوم شاك بالسكرتيرة تتواصل وي وسام الى ان متأكد وماقبل يحجي بيهن
وهيج مرت فتره عرفنا عبد محذره وجابرها تترك الدوام بأرادتها وهم ماحجه وعبالك سر بينهم ضموه مافهمونا شكو بس اني مامطمنه ابد
ورجع الدوام البنات داومن وبنين هم الاساتذه متعاونين وياها وهي هم سباعية العرفته حمزة ماتركهم ابد وجاي يعلمها وي نور على السياقة خليت گلبي بيدي من امي لاتروح اطلع سالفه عليهم مو بس هي لو لگو مجال الگرايب كلها تدخل بس ابوي واخواني محد ناطي مجال ابد وخوفي من امي ووسام
بهالفتره اتواصلت وي رشا وشكد فرحتلها من عرفت بيها مستقره وفرحانه وحيل شمتانه بعثمان وقابله بهالذنب
من عرف بيها متزوجة وصارت بذمة رجلها متخبل ومكسر غرفته وزوجته قررت تنفصل خلاص وبفتره قليلة خسر مو بس بيت بيت وطفل وزوجه مايلگه مثلها ولا بجمالها واخلاقها
واهله والمعارف بدل ميلوموه ظلو يحجون شلون الها نفس تتزوج وابنها توه مدفون الناس متعرف بالظروف المرت عليها الها الظاهر وعمي ابد مامهتم گال يحجون ميحجون يرحون فدوه الشعراية من راسها بنتي ماتت والله حياها على ايده
وبعد مايأسنا من جيتها بهالفتره خاص زوجها بواسطة قوية دبرلها نقل قررنا احنا نروح نوجبها البيتها وقررنا بيوم ننجمع ونروح وتستاهل رشا وخوال صخر بأغلب مناسبات النا ماتركونا ابد واهل واجب
رحنالها ويانا مآرب ..وعهود دزت هدية بيدنا
وامنا ام صخر وصخر وعائلته وبطة اخذناها ويانا لأن على كولتها على وشك تتخبل من الدراسة وتريد يوم تغير بي جو وچان احلى يوم بنظرها تونسنا حيل هناك
بطة مشغولة تدرس وحارث جهز اموره كلها وناوي اول ايام للعطلة يتزوجون
اني كل هالفتره ابد ماجبت سيره الكلام امي الحد مااتصلت بيه مآرب تصيح صياح
..سراب ترحن انتِ وعهود تحاجن امجن تكف حجيها عن بنين لا اخابر حسام واحاجي ابوي واكلب الدنيا ترى بس عمار لازمني واليوم انطاني رخصة لأن السكوت اكبر غلط
هسه سديت التليفون من عبد مل من مشاكلهم هم حقه
..شبيچ غير افهم وحده وحده شصاير
..امچ تمصله بعهود تگلها بنين النهار كله حاطها حمزة ويفتر بيها وحاسبه طلعاتهم من ايام تجهيز الدوام الأيام التوصيل مرات هو يوصلهن الدوامهن لو ياخذهم مراجعه الفطومه
صار اسبوع گالتلي اذنها ملتهبه وامها وعمها ماخذيها وياهم نوره هم
لو وحدهم شتحجي من كلام امج شو بالدوام هي وهاجر بطلعاتها حارس وياهم من البنات امجن شنو الي تريده
انوب طالعه بسالفه جديدة تگول بيت وسام تعبان وصغير ماعاد يوسعنا خل نگعد بالبيت وهي ويانا احسن ماتگعد بي الحالها ويظلون رايحين جايين
اني لعبت بيهن لعب بس اريدجن وياي مو دومجن طالعات من السالفة وواگعه براسي
اني اسمع وعاضه اصبعي من قهري ومآرب انهدت بيه
..لا والله اني هم ماكله تبن وين اطلع منها مره مرتين حاجيتها امچ ماترتاح اذا ماتغثنا كلنا يولي وسام مايگعد يفتر هو وبلاويه عليها البنت هذه ماعدها حظ هي گوه
اتفقت وي عهود تجي ونروحلها نشوفها شتحجي
ثاني يوم اجتنا عهود ورحنالها لگينا مرته عند اهلها وبس هو وامي وكل حجايه نحجيها وي امي ينط هو اخر شي گال
..حاجن ابوي اني اتزوجها هم نبقى ابيت واحد واخذها استر عليها والا اني مامحتاج زوجه
ودي احجي حجايه بس خفت يدميني ومحد يفزعلي ومالي خلگ انضرب تعبانه الحالي چان كتله استر على نفسك وعايلتك يلا تسترها بنيه مستوره ابيتها وابوي واخواني مامقصرين
عهود گالتله
..البنيه توها عشرينات وانت جبير عليها لايمها ولا بگربها اقل شي بينكم 17سنة حلال حرام اترملت لو انتقام عليها فوگ قهرها هذا عوفو البنية والبيت حتى لو عافته الكم هي ابوي مايخليكم
وسألته عن سالفة الفلوس القديمة المشكلة راجعه ومطوره الزعل بينه وبين اخواني خاص اكتشفو بالجديد ماخذ ربا ويومية جاي شخص يطلبه الأبوي وصخر
نكر وظل يسب ويغلط يگول هاي كلها مكايد صخر هو دز وحده تتهمني
وامي ادخلت تحجي و تدعي وطلعت مرته زعلانه الهذا السبب ويكول خل تزعل اعقد على بنين واحرك كلبها لأن عافتني بوكت غلط كلها متعاونه ضدي
بس من ترجع تشوف محد بعيني غيرها والعقد مصلحه الها والنا كلنا
حاجيته اني
..وسام خيي عوف هالسالفة ابد ابوي مايقبل والله..وياعقد البي مصلحة وهاي سالفتك السولفتها هسه هي عاقد عليها لو صداقة لو احتالت عليك خل نفهم
..منو المايقبل اخذها..ابوج مايحميها من اخوانج يوميه فايتيلها بالليل يطب صخر يطلع حمزة اجازته كلها يكضيها يمها وغير سوالف اكبر منج معليج بيها ولتسألين
..عيب عليك هالحجي وحق الله ياوسام مو صادق بحجيك لأن حمزة مايروح اذا مو نوره وياه وصخر مايروح يمرهم اذا مو وياه هاجر وامه
يخافون عليها مايسووها شبيكم بليتوها هم حظها هذا لو حظ اخوانك
رد وجهه متجهم وده يملخني
..طبعا ذوله اولياء صالحين ميسوون غلط بس وسام
غلط
حاجيت امي
..ترى مرت ابنچ هاي راح الرحمة ربه زعلان وبراج الذمه خليلج موقف يشفعلچ يمه ووكفي وسام عد حده وخطيه البنيه وترى ماتايهه اهلها لو يعرفون بهالحچي يگلبون الدنيا علينا والله
..خل تروح الاهلها وتكفينا شر المشاكل اخذت بيتي وكيفت..و ابني راح مني مو منها ابني شالع گلبي هي شجاريلها صارولها خدم ابراهيم وولده الله ياخذ مني وينطيها وينطي شهله وابنها راح احمد وهو صار الكل بالكل رغم عبد موجود ومو قاصر وبدل ماالله يجبر خاطري اني انطى الولد الشهلة وابنها ومسمينه بأسمه شهلة مرمرتني هي وخلفتها والچنة الجابتها اليه فگرتني ..انتِ ماراضيه على وسام اني افرح لو خذت وسام لا والله بس چي متضايق وابوج تارك بزره وراكض للغرب راح يوگفله الخاطرها والا شنو ذنب وسام ذنبه يعزني مو مثلكم ناكرين المعروف
صفنت عليها
..دخيلك يارب الله يحفظهم بحفظه ...والمشاكل منكم يمه مو منها ..وشبيدنا عليكم احنا شو حسام هج من مشاكلكم
عبد شرد من الديره كلها
مآرب خليتيها مااطب بيتكم اني شقصرت شو خدمتج من اول ماوعيت الحد زواجي دراسه وراحت مني ومتندمتها شنو السويناه وياج احجيلي
..ومحمليني منيه انتم وابوكم حسام شرد من مشاكلنا ليش ماوگف وياي ماگال لأبوه خاف الله بأمي مايصير مثل ذاك الواگف الأمه وگفه
اشرت العهود نطلع الحجي مايفيد وبس وصلنا بيتي اتصلت بمآرب ابجي واحجيلها الصار
وشنو غايتهم ردت عليه بقهر
..خل يخلص نفسه من مصايبه الجابها واجه ولچن مرته وجهاله يم ابوي وحاچيتله مصايب يابو مصايب
...
بنين ...
اباوع النفسي معقولة هذه اني ..معقولة هذه بدايات الشباب وهي هذه زهرة عمري وشبابه الحزن خلّاني أكبر من عمري بسنين.
مرت الأيام وعدت ايام فراگه اكثر من الأيام العشتها وياه وحتى بخيالي وياه ماخلوني اعيش
مرّت سنة كاملة..
سنة والناس كلهم اتغيّروا ..المواسم تعاقبت، النخل اخضرّ ورجع اصفرّ، والبرد إجا وراح، أما أني ، بعدني احس أن الزمن وگف عند اليوم اللي فقدته بيه .
اغلب وكتي ساكنة وحدي ببيت جبير ، بيت جميل وواسع وسط الريف، بين أهل زوجي وبنتي محليه ايامي بس ماكسرت ذاك الحزن كل مااشوفها احزن اكثر عليها .. صح اهلها يعزوها ويعزوني ويحترموني وما قصّروا وياي بيوم، وكلما احتاجت شي الگاهم قبل لا أطلب. صخر وهاجر اقرب من اهلي صارو
عبد رغم بعيد بس دوم يذكرها عماتها هم وجدها الله يحفظه ويطول عمره مغطي ع الكل ..
اما حمزة صارلي نعم الأخ ..اكتشفت بهالفتره شگد چنت ظالمته ..
واطيب انسان هو.. خلوق الى درجة مايوم حسسني بأحراج رغم كل موقف چنت انحرج وياه اكثر
بس نساني كل موقف چان يعتبرني امانة الأخوانه الأثنين ومرات احسه يتعمد يذكر حسام يمي وبشنو موصيه
بقيت معزلة عن كل اقاربهم وماعندي اي تواصل لا من قريب ولا من بعيد بيت عمي ابراهيم وعائلته بس
والحمدلله كل هالفتره ماسمعت شي مو زين من احد من اقاربهم
اهلي مارحتلهم بس امي اجتني تلث مرات مره وي اخويه ومرتين وي الوالد الله يحفظهم وكل جيه الهم يشكرون عمي ويدعوله بالخير
بس امي مثل كل ام ظلت تنصح بيه اتقرب الحسام ومااكتفي باتصاله اليومي الي يطول بي دقيقتين او مراسله سريعة يسأل بيها عني وعن فطومه وشنو نحتاج
واني استصعب هالموضوع كلش مو بس استصعبه احسه جبل على متوني ومرتاحه ابعده رغم هالبعد مخوف امي هوايه
بعد اول مراسله الي وطلبه الغريب بعد السلام والسؤال اجلت موضوع تعليم السياقة وهاليومين رجع وصى حمزة وگلي حمزة مو دائمًا فارغ رجال عنده مسؤولية ودوام يأخره وابويه الهم العليه كافي وصخر انتِ اعرف بوضعه يادوب ملحگ عائلته واني مااريد ابقى هنا ومتكتف وبالي يمكم اريد احس بروحي سند الچ ابعدي قبل قربي
وهذا الكلام دوخني وسطرني خلاني ماانام الليل
هو اني فعلا رغم وگفتهم كلهم لكن، چانت الوحدة إلها شكل ثاني بروحي .
ماانسى اول ايام الدوام شلون استصعبتها وصارت الكل تأشر وتحجي عني همسهم وصل قبل عزاهم
وهذه التساؤلات الي تثير الأنتباه البعض يطرحوها بدون ميفكرون بنفسيتي
..شلون اهلج خلوچ وعدهم شباب؟
لو هاي التگلج عفيه بنتچ اذا تزوجتي لتعوفيها ترى مسكينة تضيع
عبالك هم احن مني عليها
لو البنات الي حاچنه ونبرة الحسد واضحه عليهن صرت اكرهن كره ماصاير ومااطيق شوفتهن
وظلن يتعمدن يذكرن هاجر بخطورتي عليها وخاف زوجها يفكر بيه
بس هاجر ذكية وابد متنطي مجال وتعرف وضعي شنو واني هم مرتين كتلهم اتكفن شري ولتشوفني وجهجن افضل
وهذا مجتمع جامعي المفروض الأنسان واصل مرحلة يكتفي بذاته او ميكوت اداة هدم الغيره اعتب على مجتمعاتنا المامتعلمة ليش بعد
بيومها رجعت مختنگه وهاجر تصبر عليه وصخر هم بكلامه انطاني جرعة قوة
واستقبال فطومه الي ولهفتها من الباب نسني كل تعب وهم وقهر مر عليه
بس الي صار بيومها العصر اطورت حركاتها ونموها من الزحف گامت تلزم الحايط لو القنفات وتسند نفسها عليها وتمشي وبعد ضحكة وفرح خلصتها ابچي واتذكر شلون مرت بكل هالمراحل وراح تمر بالأقوى وراح تفهم هي ماعدها اب تحتلف عنهم
واجت امي زيدت همي بكلامها ماخلتني انام
وبهذا الصباح، گعدت يم الشباك الي يطل على الحوش.
بنتي نايمه بسريرها .واني سكوت الدنيا محتلني واباوع للباب المقابيلي ..هذا الباب شگد ينفتح بس مافتحته بلهفه من يوم الغاب الكل يجونا مكلفين كل جميل منهم يقيد روحي اكثر
اما جيته هو چانت مختلفة چنت اطير بهذه المسافة مو مشي امشيله
استغفرت ربي كافي افكر هيچ ..فتحت تليفوني اشغل نفسي ونشرت دعاء الصباح
رن تليفوني اتفاجأت رسالة من حسام مامتعود يراسلني هالوكت
..صباح الخير ..شلونكم زينين؟
..الحمدلله بخير
..ليش گاعده من وكت خو مافطومه مريضة
..لا فطومه زينه نايمه
..وام فطومه شنو مگعدها من الصباح بيوم الجمعة
بللت شفافي احس اريد احجي ومااريد اني اريد احجي بس مو اله كتبت
..ماكو شي بس ماگدرت انام
..سهرانة؟
..اي والله
..اكو شي مضايقچ احد مسمعچ كلام؟
..لا والله محد مقصر بشي الحمدلله وشكرًا على سؤالك اروح انام اني
..من تگعدين بلغيني اتصل بيچ
مانمت الا بعد ساعة وگعدت وي گعدة فطومه جوعانه ريگتها واتريكت ومابلغته اتهربت احس اهتمامه زايد مدري اني يتهيألي هو اني شريد مااعرف
الظهر مرو علينا حمزة ونوره وياسر اخذ فطومه من ايدي يلاعبها
وحمزة اشرلي
..يلا يالحيايه استعجلن مدام عندي وكت ساعة افرفرجن نشوف تالي التعليم وين يوصل
نوره جاي تتعلم بنين بس السان وذاك خبصني خاف يريد يسابق بيچ هناك يمه بتركيا
ابتسمت
..حمزة لاتخليني ابطل خاف الي نيه اتعلم راح الغيها
..تلغيها هي شو امشي بسرعة استعجلي يلا دخليني اعلمج سياقة وتجي ام صادق ايابه شوفي شلون راح افضحج يمها
..امي تتبرا مني لو عرفت اسوق يجوز هنا يمكم ماتحجي بس امنيتي اجلطهم اهلي من اروحلهم وانزل وماكو احد وياي
..لا انتِ هيج تجلطينا كلنا رحتي زايد بعد اخوچ منو يخليچ ترحين وحدچ اشو مدري شلونچ انتِ
ضحكنا اني ونوره
ونوره تكله
..بلا شنو الفايدة من تعلومنا اذا مانفرفر وحدنا
..امشي لاافر راسچ فر امشي
صاح ياسر اخذ منه فطومه وفتح كامره وي حسام واول مره يسويها ويفتح وياه كامره يمي كل مره صور هوايه يصور
شو هذه اتخبلت عليه يحاجيها وهي تضحك من گلبها تريد تفوت للتليفون منظرها ابد مو طبيعي باوعت النوره اسأل الشك اكلني
..شلون عرفته ومتلهفه هيچ
نوره غيرت الموضوع وگالت
..ارد افوت الغرفتج اعدل چهرتي لايشوفني فرسان
..مو ع اساس ميهمچ
..مو كل على اساس يطلع صح بنونه لاتوگفيلي ع الكلمة كافي هاجر وسراب عليه اني من وراهن راح اكرهه
..والله زين وصابر عليچ
..وليش مايصبر يمه وين اكو مني خل ابوس وجهي بلا
ضحكت وفطومه وحمزة بعدهم يحجون شويه واجتني رسالة
..بالي يمچ ليش مابلغتيني
وداز بعدها علامة استفهام
رديت
..نسيت مااجه ابالي العفو منك مو قصدي
..ركزي وي حمزة وحاولي تتعلمين زين بابا
حسيتها اوامر ماحبيتها منه عيبت عليه واني انطي لايك بدون رد
بدلت ورتبت عباتي وحجابي وطلعت وياه
حمزة انطه فطومه الياسر ياخذها يم حلا
حاجيته
..لا خليها ويانا ليش دزيتها كافي عليها ايام الدوام ابتلت حلا بيها
..لا خاف تگلبنا انتِ ونوره ع الأقل بنت اخوي بأمان
ورجع وجهلي نقده
..باتمان من تمشين وعبايتچ طايره لمي اطرافها لا اطيرين اليوم الهوا عالي
ضحكت وبوجهنا صار وسام
اتفاجأت حمزة ماسلم عليه اول مره يسويها الظاهر بينهم مشكلة اكثر من مشكلة الفلوس القديمة
عيونه ماشالها منه ويباوع النا بحقد
وسام مثل اخوانه الي يشوف وسامته ميصدگ قباحته وزوجته من الله ماطيقها سبحان الله لاشكل ولا اخلاق اشوفها تحشر نفسها بكلشي
رجعت استغفر ربي شعليه بيهم اني الناس مماذيني هم واهلهم
وبدينا اول جولة وي نوره
نوره مسيطرة وتركيزها كله يم السياقة وحمزة بتعليقاته يخليها ترتبك وتخرب ضحك
احس هالطلعه شالت غيمه جبيره من گلبي چنت مهمومه حيل تونست ونسيت كل تفكير سلبي
وبدا دوري يابويه چنت ارجف رغم الشوارع فارغه
فتنا من شارع ثاني وصحت
..شيل الحاويه ..حمزة الحاويه ..الحاويه حمزة
..وجعة ام حمزة ..شخبلتيني الحاوية حمزة وحمزة الحاوية تردين تسبيني بحجة السياقة لو شنو
هنا ماگدرت اسوق بعد متت ضحك واترتبكت
..والعباس ابو فاضل مو قصدي صخام بعين العدو مو هذا قصدي والله
جر السكان من ايدي وگلي نزلي رجلج وين معلگتها
وخلاني اخفف واسيطر ع وابعد عن الحاويه
جريت نفس توني وتطلع مره جبيره
وصحت
..خاااله وين طالعه شمطلعچ صدگ جذب
اني حجيت بصوت عالي وهو انفجر من الضحك ونوره انتهت
..ضحكي نوره شعليج مسيطرة
گال
.. لاتغرچ هذه ترى متعلمه من زمان وابويه اجل السيارة خايف عليها بس هسه حكمت يعني انتِ ماتتقارنين بيها احسن والله اجازتين اطلعچ اسطى
ارتاحيت واستعاديت الثقة بنفسي واني اقهرها بأيدب اشرلها
شويه وتونه عبرنا راجعين المنطقتنا وعبرو اطفال وامهم وابوهم
بعدني بعيده عليهم مو يمهم وصحت
..يمه ياحبيبة شبيكم خايبين الشارع اول طيحته گعدو ببيوتكم هجعوو
..نصدرلج حظر تجوال بنين اگطعلج الشارع صوبين على حچيج هذا
نزل للاسواق يشتري احتياجات اله والنا نوره طلبت نمنميات الها والبطة واخوانها واشترى حصة عباس وامه وحد والأبن صخر هم حاجاني اترددت شفته هوايه اخذ گتله مامحتاجه
..احچي شتردين معليچ هو بس انتِ ماتخسرين حسابهن واصل لاتهتمين
خلاني اتقيد اكثر انوب اخذ بدون مايسأل رجعنا هو يسوق واحنا بمكانا ونوره كل شويه ورجعت تذكرني بچفصاتي
..اول طيحته الشارع موو
خلصناها ضحك
رجعت ملهوفه على فطومه لگيتها بحضن جدها وفاتح كامره ظنيت وي حسام طلع وي حمودي ويكل الهاجر جيبيها وتعاي وصخر هم خل يجي هنا هز ومه مسوين ثواب اليوم
بس سمعت صوتي فزت من حضنه ورفعت اديها اليه
وعمي نهى الأتصال وسأل حمزة
..ها شلونهن وياك
حمزة صنفنا تصنيف شلتها اريد اطلع ماقبل عمو گال ابقو ع العشه بقينا ونضحك على سوالف حمزة شراح ينسيه بعد
هاجر تگلي تعلمي شبيچ لو مكانج افرح بس صخر قافل
ونوره تشوفها الصور والمقاطع كلشي مصورة فضحتني فضيحة
بعد العشا واحنا گاعدين راسلني حسام
سأل وسلم ومن كد مافرحانه ونفسيتي متغيره نسيت روحي وصرت اتجاوب وياه ولگيت صار هوايه نسولف وبالي مو يمهم اصلا
انتبهت وهم يحجون بزوجة وسام جايه العمو تشكيله والصدمة رايده تبقى هي وجهالها هنا يمه مااعرف يمي بس عمي مخيرها بين ترجعله وتتحمله او اتركه الى ان يتأدب ومصرفها ومصرف جهالها عليه وتگعد ابيت اهلها وهي رافضه تبقى عد اهلها ومتريد تروحله هم بس بالأخير جابرها تروح
نوره تكلهم هايه لعبه منه دازها تبقى يمنا تنقله التحركات ويحصل بيها فلوس من ابوي خاص هسه مطلوب وكلها اطالبه ويمكن ابويه واخواني راح يسددون عنه
صفنت
..شصاير
حلا گالت
..بنين بالج وين شچنا نحچي
وهاجر غمزتلي تضحك درت وجهي عنها
..والله ماادري دايخه شبيكم وياي فهموني شنو الموضوع
وهنه يحجي اجتني رسالة منه
..وين رحتي يابه؟
..وياك
..وين وياي شوفيني
..هذا هو فهمت والله راح اهدأ واركز واتعلم بسرعة وهذا الرهن قبلته
..هههههه اي عفيه هيچ صيري
صاحت حلا
..بنين ان شاءالله تردين نشرحلج بعد
..هههههه مااريد عمي بطلت شعليه بيهم خل اروح تعبت اليوم
رحت البيتي ويايه بطه ومحمد
بطه راحت تتصل بحارث ومحمد شغل التلفزيون يتابع فلم اجنبي
واني اخذت فطومه سبحتها وغيرتلها نامت
اتمددت ع السرير وبديت اراجع الرسايل رحت الاول رسالة
كاتب
..شلونه يومچ الأول بمشوارچ الجديد
جاوبته
..الحمدلله زين ولو خوف وارتباك بس زينه
..لا لاتخافين ابد ..وهم لاترتبكين الموضوع اسهل من ماتتصورين بس مرات احنا نرسم ابالنا عواقب بالواقع ماالها وجود وخوفچ هذا مو واقعي ..
..هو غير گلبي راد يوگف شنو مو واقعي عمي موت والله صدگ تحجي
دزلي ضحكه طويلة
..والله ياعمي احچي صدگ اي ..وراح تشوفين بعد شهرين او اقل تضحكين على نفسج ليش هالگد خفتي
..شهرين اتعلم مااعتقد مستحيل واحد يتعلم بشهرين صعبة السياقة
..لا مو صعبة.. تتراهنين تتعلمين قبلها
..لا مستحيل انه اعرف روحي
..نتراهن ؟
..على شنو
..لون السيارة اذا انتِ صح تختاريه انتِ واذا اني عليه
..انت صدگ عود تريد تشتريلي ؟على شنو كل هذا ماجاي افهم
..بعدين افهمچ
سكتت
..فطومه هم متعود تتصل بيها يومية؟
..ليش هالسؤال ؟
..جاوبني
..شلونها هي نامت لو بعد
..لا نامت
..زينه صارت اذنها
..الحمدلله هوايه احسن اي
..حاولي لتسهرين وحدچ واذا شفتي نفسج محتاجه تفضفضين يمچ البنات شفتي الموضوع متگدرين تحچيه الهم احجيلي وتلگيني وياج بكل وقت
..ماعندي شي تسلم
..الصبح من تگعد فطومه اتصلي بيه وراح اشوفها متعوده عليه صدگ لو مبالغة منچ
..صدگ انت ماجاوبتني ؟
..على شنو عيناي
..تتصل بيها يومية واني بالدوام تحجون كامره
..باجر اتصلي ونشوف
..مو عندك دوام الصبح ومشغول
..فدوه الها الشغل وصاحبه
مارديت بعد
مسحت وجهي هو نشط واني مطالعه من المحادثة
اكو شي غلط مااريد احس بي اصلا
طلعت واتحلفت مااتصل ابد
واول ماگعدنا وع الريوك اتصل ماجاوبت راسلني حمزة يريد يمرلنا
غيرت ملابسي ولبست حجاب وانتظرته وبطه توها گعدت
فاتلنا وهو يتصل
..هذوله گاعدين شخبصتنا بمرتك وبنتك انت
هي حجايه مااعرف مقصودة او لا بس حسيتها سهم بقدر ماوجعتني وعصرت گلبي عصر خلت مشاعري تتخربط كلها
وجه عليه الكامره انتبهتله
..شعره مصففه للخلف وطويل
گلت بگلبي الله لو ابوي يشوف طول شعرك هسه يگلي رجلج مسوي ذيل فنان؟ موسيقي راگوص
لأن عنده بس ذوله الهم حق يخلون شعرهم يطول وينزل شويه
لابس بنطلون ابيض وقميص هاف كحلي
ماگدرت اسلم عليه بأكثر من رفعة ايد لأن حسيته مزعوچ وحواجبه معقودة ياستار مدري ليش هيج خفت من النظره
وفطومه بس سمعت صوته وشافته اتخبلت عليه
تأكدت فترة دوامي يخلصوها اتصال
توهم طلعو وبطة راحت تدرس بدت امتحانات اخر شهر الها قبل اخر السنة ومخبوصة تريد نتيجة وتحضيرات الزواج هم ومنا حارث مطير عقلها بسوالفه مبين يموت عليها
بعدني توني ارد اطلع اسد الباب وراهم اجاني اتصال منه
..ليش ماتردين تضوجين من اتصل؟
..لا بالعكس ليش اضوج بس ردت افرغ ونحجي
اتعذر واحرك بشفايفي منا ومنا
على اساس شغلي الراسي شعندي اني افرغ وحده بهالدنيا لو ماالدراسة اتخبل من الفراغ
گال
..فطومه بجت من نهيت الاتصال وياها وصيت حمزة يجيبلها مشايه احسن الها من الحجلة شفتها تحاول تمشي هالفتره
..بعدهي صغيره بس هي مستعجله
سمعها جلبت بيه تشكي وتطالب تلغي لغاوي مامفهومه گال گعديها بكرسيها وخلي التليفون يمها احاجيها وصدك خليتها
واتحججت بالجدر ع النار بس اني عيني عليها شلون تضحكله وبطرف عيني دمعه وگلبي معصور عصر
لو ملحگه على ابوچ لو شايفه شويه من دلاله
مسحت دموعي على صوت الباب اندفع اتذكرت نسيت اقفله
طلعت عبالي عمي اجه ورجعت للمطبخ من شفتها مريه من ركزت يلا عرفتها امهم
استغربت جيتها ماذكرتنا هالفتره كلها مع هذا ابتسمت ورحبت بيها وهي انهدت بيه عبالك قنبلة انفجرت
..ما عندج اهل انتِ مسيبينچ مخلصتها فراره ماتكولين اني ارملة شابه الزم بيتي وانچب عجبج حمزة ها ...حمزة ترديه ضابط ونجماته وخالي مختلي تدورين صيدات اهلچ نايمين ما يدرون بفرارتچ
انطيني امچ احاجيها اني اعلمها اذا ماتعرف الصح من الغلط
..انتِ على اي اساس تحاجيني هالحجي
طلعي بره البيت مالي حچي وياچ اخابر عمي وهي يتصرف
هذا الطلع مني وبويه الحجي والفشار الفشرته على عمي مينحجي
گمت ابچي ماارد بأي كلام وهي قسمت يمين لو اني لو هي وتگلي وهذا البيت ماتظلين بي روحي لأهلج يلموچ
وكلها التمت على صوتها عمي اجاها متعني يريد يضربها ولاحها براشدي لو واكع بيه والله ماأكوم وهي ولا يمها كوه لازميه حمزة ومحمد وحلا ماخلوه يتحرك وبقت تحجي وتهدد وكل شويه تصيح شنو ظلتها
اني اشهگ وادور تليفوني نسيته وين اريد اتصل بأهلي حمزة اشرلي لا
..بالچ تتصلين احنا ناخذلچ حقچ
فطومه من الصياح اتخبلت بچت بخبال
حلا شالتها
واني محتاره بروحي احس النار البگلبي ماتطفى ابد وعمي طردها گالتله لو تموت مااطلع
حمزة بصوت عالي گلها
..مو عيب تحاجين جنتج بهالكلام انتن بطلتن تستحن لو تحبن تنهانن العمر كله مو ملينا واحنا صغار نلوم بأبوي چنا بس والله مقصر وياچن المفروض يجرم بيجن اجرام مو بس ضرب يضربجن
..يول انت لاتحاجيني لو بيك خير ماشامر امك وماسائل عنها ..وهي مرت ابني وراح الرحمة ربه ماخليتوله احترام هي طايره وانت مكيف رايح راد ماعندك احترام الاخوك
..لاتحچين هالحچي مخلي احترام لاخواني ولازم نفسي عنچ ..واحمد الله يرحمه بس بنين هسه مرت حسام واني هم راح ابلغه يجي وهو يتصرف وياج ووي ذاك النذل وهسه طلعي يلا
هي سمعت حسام عاقد عليه وهي وگعت من طولها
وكل ظنا تمثل بس ماگعدت ابد شالوها للمستشفى وبعد ساعة گالو انجلطت
اني متت من الخوف احس گلبي طار من بين ضلوعه شراح يخلصني الملامه توگع بيه يارب ليش مدوملي راحه تعبت من المشاكل والقلق
...
بطة ...
صدمة بعد صدمة منا كلام مرت ابويه المينعقل عن بنين وحمزة وسوالف البنات عن امهن ووسام شنو رايد وطالب زواجه منها ابويه من عرف علك ضغطه بيومها بس فرحه وسام من بلفه حجز طيران وجاي
مبلغ ابويه يحضر وليمة جبيره للأهل والأقارب يعلن بيها زواجه من بنين
اما المسكينة بنين انتهت وتلوم نفسها مااعرف عليمن احسها خايفه من ردة فعل الكل ومن ردة فعله بالذات
رغم احنا اتفاجأنا بخبر عقدهم المسبق بس من فكرنا وشفنا كلامهم صح وهذا طلب حسام احترمناه
حسام الوحيد عنا يختلف كلش كتوم ودائمًا معزول الحاله يعني ماچنا مستغربين يكون الطلب منه
ام وسام انجلطت والسانها ثگل وحتى مشيتها وايدها بصعوبة تحركها رغم هذا ابويه مااهتم بغير اتكفل مصاريف العلاج واخواني احتارو بيها عدا حمزة
ابويه مجروح منها وظل يذكر مصايب سنين عايشها بقهر من كلامها وفعلها كل ماواحد من اخواني يلومه يگعد يعدد شنو سوت
وبيوم جية حسام منتظريه كلنا اجه مثل عادته محمل بالأصواغ رغم جيته سريعة وممحضر الها
ومن فات سلم ع الكل واحنا عيونا عليه و على بنين راسها بالگاع وواكفه بعيد اتقدملها بعد ماسلمنا عليه باسها براسها وهالحركة خطفت گلبي ومدري ليش حسيته رفع قدرها ومحى خوفها وقلقها كله
بيوم العزيمة على حظي چان عندي امتحان رحت على گد الامتحان امتحنه وارجع
فرحانه حيل حارث صار هوايه هو وياي اول بأول
ابتسمت من طلعت وشفته صافن منتظرني اباب المدرسة
اشرتله راح اعبر غمزلي بطارف عينه
ابتسمت وصعدت واول ماصعدت خطف من خدي بوسه
..شلون بخدودج اني
..ترى بالشارع احنا
..مرتي وحلالي
..بعدني خطيبتك ترى
..احلى خطيبة بهالكون.. اووف لو بس ترجعين ريانه اكثر منو دلاج درب الدايت
ضحكت
..اني اندليته وهيج احلى والله
..بكل حالاتج حلوه ولاعبه بأحوالي لعب
رن تليفونه رفضه ورجع رن
..صاير هوايه ترفض مكالمات شعندك ترى گلبي لاعب منك
ضحك ودارلي تليفونه
..شوفي مهيب وابوي والله بس انتِ ظالمتني صايره هوايه تشكين
..مو شك بس احس اكو شي
باوعلي واتنهد وماحجه شي
..وداعة امي يابطة ماحبيت بهالدنيا گدچ
..ليش ناوي تجرب لو مجرب وتأكدت هيچ
حچيتها مقلصة عيوني ارد انكد عليه
ضحك
..صايره لو تيه
..لوتيه شمو صح مرات اتغابى بس مو غبية ..واني هم احبك والله بس خلي جوه البس خطين لو روحي بيدك واتأكد من السوالف السألتك عنهن ونكرتهن روحي اتنازل عنها ومااريدها
هو سكت والتليفون ماسكت ابد لحو هوايه
..جاوبهم
ماقبل وصلني نزلت اجهز نفسي ع السريع والتهيت بهوسة المعازيم لليل الولد سألو
..ليش بيت عمي ابو مهيب ولا واحد منهم
سراب كالت
..حتى مرت عمي والبنات طلعن گبل العشه وكوه حلا خلتهن ياخذن عشاهن وياهن
وصخر رد
..اني هم وديت عشاهم الهم ياسر ومحمد وصلوه ومهيب راسلته واتصلت مارد
اني هم ظل بالي اتصلت على حارث راسلته ماكو خبر
ثاني يوم داومت هو وصلني بس وجهه ابد مو هو الليل كله چنه مانايم ومن سألته گال ابويه ومهيب اتعاركو ورجعنالهم
بيومها چان اخر امتحان شهري الي ومنتظره بقوة الله انعفي
جنت فرحانه حيل وطلعت من الدوام اريد اهوس واضحك وياه مثل كل مره بس اتفاجأت بالجايني صخر ووياه حمودي هم
..اووي فديت الجاي العمته يوصلها ..يابعد عمري حماده
ضحكلي واسنانه بانت ودي اكرطه وصخر استعجلني اسد الباب
..شلونها بطتنا
..بخير الحمدلله واخيرًا خلصت
سكت وابتسم
..ان شاءالله خير الچ
..يارب
ظليت الطريق كله العب وي حمودي وماركزت وياه
ومن وصلت الاهلي
خفت صاير شي على بنين اهلها لو من اهلنا وجوهن متبشر بخير
سألت حلا گالت ماكو شي رحت نمت
گعدت على صوت تليفوني اتصال ورسايل تجيني سوه
...
هاجر ...
رجعنا من العزيمة هلكانين تعب هم اني وهم صخر
عمتي فاتت الغرفتها تنام
وصخر فات يسبح واني نيمت حمودي وحضرت ملابسي افوت بعده
طلع ينشف بشعره ويتعطر ورن تليفونه جاوبه من كلامه عرفته مهيب
وصخر ظل يسأل
..شصار وياكم ليش ولا واحد منكم ظل بالنا يمعود
مهيب مااعرف شيگله بس صخر ساكت يسمع
بعدين جاوب
..شنو المناسبة الهالكلام اعرف انت اخويه وتعتبرني اقرب ولد عمك الك واني هم والله تعرف مكانتك عندي بس شصاير غير تفهمني شكو
هسه ميخالف اسمع منك گلي
لحظات اتحولت الدقيقة واكثر صخر ولا حرف نطق
اخر شي گله
..كمل وياك اني كمل
وهم سكت دقايق طويله واخر شي بصوت صاح
..يعني شتريد اگلك ابنه يعترف بيه وزوجته يصدق عقدها وهذا هو بس خلي لايشوفني وجهه مهيب وداعة امي مااخلي بي عظم صاحي
..اتفهم شنو انت تعرف بنفسك شجاي تحجي اتفهم شنو خل يعلن زواجه ويصدقه وابنه جايه وبطه ينساها
لا تقتنع بشنو تقتنع انت كل عقلك اخلي طلقة براسها وراسه وانعل ابو الينطيها اله
شمر تليفونه وعمتي اجت مخروعه
..يمه اسم الله شصاير
هو انفجر ونزل نزله على حارث وعمه وابوه وعليها هم شگد غلط عليها رغم خطيه مالها ذنب بس انهار والله ومن عرفت اني وياه مانمنا للصبح رحت للدوام مطفيه ولو ما الامتحان منروح اني وبنين وجوهنا تلطم
كل شويه ارد احاجيها واخاف من حمزة هو هم واصل حده
ظل بالي يمها ماركزنا بشي كوه امتحنا وحجيتلها واحنا نشرب گهوه نطرد النعاس اتخبلت من كتلها حارث طلع عنده علاقة وي وحده ومستدرجته على اساس وورطته بحمل وجايه الأهله هي وامها
تريد تثبت حقوقها بالمحكمة وهو رافض وخلته امام الامر الواقع
بنين لطمت صدرها وشهكتلها شهگه وصاحت
..يا ام صادق يايمه ماتستاهل بطه عمت عينه اي والله
..اي والله عمت عينه النذل صخر للصبح مانام من القهر ..احجيلي انتِ
..شحچيلچ انه شمدريني منچ دريت
..لا ولچ حسام شسوه
..وشمدريني طلعت الناس منا وصلت البيتي منا لفيت راسي ونمت
..عفيه عاشت ايدج والله
..بعد عمري التشجعني
ضحكت هازه ايدي واتصل بينا صخر جاي ياخذنا
الاعرفه اليوم ماداوم سألته
..شصار
..العصر نحاجيها ومااوصيچن عليها
اول ماوصلنا لگينا هوسه اباب بيت عمي
عمي ابو مهيب ومهيب وامهم طالعين صخر نزل يريد بس يلمح حارث والف الحمدلله طلعو جايين بدونه
يتبع ...