بقلم نور الشمس
صخر...
طلعت من المستشفى للمنصور مكان شركة الوالد هناك
ارد اعيد الحسابات وارتب اجتماع للموظفين بكل الأفرع عندي قرارات جديدة وراسم خطة جديدة ابالي نگدر نوسع شغلنا من خلالها
وبالطريق اتذكرت
اول يوم داومت چنت مامعروف الكل الموظفين الكل مستغرب جيتي واصلا جانو متأثرين على فقد احمد الله يرحمه مثلنا عبالك اهله ومعارفه
واني بوضع ابد مو مال مجاملة استلمت المسؤولية مكره وهم ضايج لأن صرت مكانه كل مكان هنا يذكرني هو چان من بعد ابوه الكل بالكل .
واول ساعة الدوامي
عممت كتاب طرد وسام وبلغت الحراس ممنوع يدخل للشركة
وللأفرع كلها وكل من نتعامل معاهم لازم يعرفون حتى يصير علم عند الكل ان هو مو بالشركة ولا محاسب بيها ولا اله اي صفة رسمية عدا ان هو ابن المالك فقط
بيومها ودي اخلص عليه مغثوث منه حيل
مالازمني عنه بس صحة ابراهيم ولأن شفته مخذول ومقهور گال اذا كلها عرفت شنو يرجعن الفلوس لو اخوك يتوب ماكو غير نشهر بنفسنا ونحصل ملامه وماكو داعي الهذا
شفت تفكيره صح واحترمت رغبته باعتباره صاحب المال وهو حر بماله
بس بما ان اليوم اني بموضع مسؤولية بديت بتغيير هوايه امور
وبديت فعلا اراجع ملفاتهم وكل تعامل بينهم شلون كان رغم ابراهيم انطاني فكره وگلي خليك على اتصال وياي اي شي يواجهك بلغني افهمك وحده وحده
اجاني اتصال من الحرس يبلغني وسام جاي ورافض ينفذ اوامرهم
..بلغه ممنوع تدخل والمنع هذا صادر من مدير الشركة الأستاذ صخر
اني ع الخط وياه
چان الحارس متردد ينفذ هو واليمه يردون يتأكدون من ابوي لأن يعرفوه ابنه واني هم ابنه بس ميعرفوني ابد وكل ظنهم بينا خلافات ومتمشكلين ويخافون توگع بيهم اتردد وههو يگلي اتصل بالوالد اتأكد
.. امر يتنفذ بدون نقاش واي اتصال منكم للوالد تتأكدون بعد كلامي اطلعون وراه وماالكم مكان بهالشركة وهذا اخر كلام
صارت هوسه بره ماطلعت اباوع من الشباك الي يطل عليهم وسام مخبوص ويتهدد الفارغ اخر شي اتصل بتليفونه وراح
رجعت للمكتب فتحت الحاسبة ادور بالملفات
اجت السكرتيرة
..استاذ احضرلك چاي لو قهوة لو تحب تشرب مشروبات باردة
..شكرًا مااريد اي شي اني اذا اريد احضر النفسي اخذي راحتچ
اتصل ابوي يسأل
..ابراهيم هواي معين بنات شنو السالفة
ضحك صار هوايه ماضاحك هيچ ابتسمت على صوت ضحكته مدري ليش اجتاحتني مشاعر غريبة
..ها عجبتك ابو البراهم تضحك هاي الملاحظة مو ..مااحب اقطع ارزاق السكرتيرة..بس خو ما انت تنغث اذا استغنيت عنها ونجيب مكانها واحد ابو شنب
..صخر راح تلعب لعب بيه وبالشركة بابا شعليك انت لو تخاف من هاجر ولك
..بس انت ماتخاف كلها تخاف ترى اربع نسوان ماخوفتك وحده منهن ولزمتك
..الا وحده لو يهمها خوفي اخاف..عوفك من هالسوالف مااريد اغثك ولا اريد انغث مالي خلگ شنو مشكلتك وياها البنية محترمه واخلاقها عالية
..ماگايل شي بس خطيه كل شويه تسأل حتى توجه اوامر لأم خالد تحضر شي اشربه واني مااريد وعندي المواد اذا مااسوي مكتبك مطبخ لتگول هذا صخر
..هسه شسولف وياك مطبخ شنو بابا ..لا اني مجهزلك جهاز گهوة وغلاية للچاي بالمطبخ جوه وانتهى الموضوع ..واذا تريد اكل هم انزل للمطبخ يم ام خالد احمي اكلك
..يلا لاتهتم ماتحب اخرب اني مقدر ارثك العظيم هذا
..والله شغلتك تخوف بس شسوي
ضحكت
..لا تخاف موصى بيك اني
اتحمحم وهو يگول
..منين؟ منو الوصاك
قلصت عيوني واني اسمع نبرة صوته
مبين عباله امي
..مو شهلة والله لاتفرح
..طاح حظك يول مو كافي من سوالفك جوووز
..ميخالف ماتنعاد احجيلي باچر اريد اجتماع الجميع موظفين الشركة بكل افرعها واريدك موجود
احتاج شويه كم خطوة نوسع بيها الشغل اهم شي طرق الترويج المختلفه
.. يا الله ..اجيك يابه بس گد الاجتماع واطلع والباقي عليك
..اني اعرفك وحافظك من تجيب البلاوي وتحطهن بحضني
..هم زين تعرف.. امك الله يحفظها عدها مثل تگول بزر بطني يعرف رطني وانت ابني وتعرفني اكيد
نهى الاتصال وماخلاني اكمل كملت كم ملف جعت صدك
چنت مستصعبها قويت گلبي ونزلت للمطبخ من البداية خليت الأكل بالبراد وصيت ممنوع احد يدخل المكتب ورايه وكامرات موجوده
ام خالد گاعده وجكارتها بيدها ادخن ابراهيم حتى موظفاته مثله ضاربات الدنيا چلاق
اباوعلها مريه جبيرة من امهات قبل لابسه ثوب نيلي واسع وفوطه بيضة الأعرفه من احمد قبل هي من معارف ابوي من اول مافتح هالشركة هي وياه وجانت مسؤوليتها تنظف وتحضر ضيافة
بس من كبرت خلاها بس ع الگهوه والچاي وعمال الخدمة موجودين ينظفون قبل الدوام وبعده
سلمت وفتت ردت السلام بكل اهتمام
..هلا بيك عيوني انت الله يحفظكم الأبوكم ويرحم اخوكم ويكتبله اجر مضاعف شگد چان انسان طيب وابن اصول
..الله يسلمچ حجيه ويرحم امواتكم متشوفون سوء ان شاءالله
..گول يوم محتاج شي اسويلك ليش تنزل يعيوني لو داز عليه
..لايمه مامحتاج الا سلامتچ
عيوني ادور جهاز الميكرويف طلعت الحافظات واتجهت اله شغلته وخليت الأكل حددت نوع الطعام والحرارة والوقت ووكفت انتظر
چانت صافنة عليه تريد توصل يمي اتمد ايدها للجهاز وبقت متردده
..يوم انت الوحيد من ولده؟
باوعتلها باستغراب مافاهم السؤال وهي انحرجت يمكن ظنت نظراتي عدم رضا التدخلها وكلامها وياي
اني الأمهات الكبار مااتحمل اشوفهن بهيچ موقف ابد
احس بحنية اتجاهن رغم ماشفت حنية الجدة ولا عاشرتها
رخيت ملامح وجهي المشتده من توتر اول يوم دوام وجية وسام وغياب احمد ومقارنتهم الي وياه وهوايه امور مخليتني اتوتر
..مافهمت سؤالچ يمه وضحيلي
..قصدت انت الوحيد الأمك من بينهم
..ها الظاهر الوالد حاچيلچ عنا اي اني الوحيد الأمي صح
..الله يحفظك يايوم يافرحة ابو وسام .. اخذ راحتك
عيوني
ابتعدت عني انطتني مجال وظليت مستغرب سؤالها وهذه الحفاوة
طلعت الأكل طلعت الها بصحن قدمته الها رفضت بخجل واصريت تاخذ مني واني اكلت وسويت الي چاي وطلعت اشربه فوگ مريت من يم السكرتيرة وكوبي بيدي
واني اريد ادخل ماصبرت وصوتها اسمعه تحاچي الموظفة البصفها
..هذا ليش ماقبل اجيبله ونزل هو بنفسه!؟
فتت للمكتب اتصلت بهاجر اسأل عنها وعن امي هالأيام ميلحگون يشوفوني وكملت شغلي لليل طلعت
والاجتماع اتأجل اكثر من مره وبالأخير اتقرر اليوم اجتماع شامل
وصلت وام خالد وجهه يضحك
..يا هلا بيك كل الطلبته جاهز
..ام خالد الله ينطيج الصحة والقوة اذا تعبتي نص ساعة وتگدرين اطلعين
..لا يايوم شعندي وطالعه شكو غير هالغرفة والحياطين اني هنا ارتاح اكثر
..تمام على راحتچ
صعدت واجت السكرتيرة قدمتلي كم ملف واسماء الحضور وعناوين الافرع وسألت شوكت نعقد الأجتماع
..يجي الوالد ويصير خير
بعدنا نحجي وفات ابوي عرفته من صوت سلام الموظفين اله فتح الباب وفات
اشرتلها تطلع وگلت
..اني المفروض اتعلم منك شلون ادگ الباب
..وادگ الباب الحضرتك يعني ؟
..وليش لا
..مااسويها وي ابوي وياك تريد اسويها
ابتسمت
..انت تدري مالك وحلالك كله بيدي
..فدوه الك كله
سكتت ماعرفت شرد محضر غير رد
..ابو البراهم صاير ماتونس بسرعة تستسلم
..تعبت يابه مو حقي
..خو ماتعبان؟ تحس بشي صداع خدر؟
..لا بابا الحمدلله زين واني اشوفك هنا وكلشي بيدك ماشي مثل مااريد واحسن كلش زين وبعد مااهتم للدنيا والبيها اذا اگلك حلم عمري هذا تصدگ؟
اتنهدت وغيرت الموضوع واني افهمه على طرق الترويج الجديدة وبلغته اتعاقدت وي مصور يعرف يمنتج مقاطع وبارع بالاعلانات وافكارها ورجعت اسأل بجدية
..شرايك استغني عن السكرتيرة واخلي مكانها احد من معارفنا
..يابه والله خبلتني بيها شماخذه منك
..مامرتاح اكره النسوان مو بيدي
..تكره النسوان گتلي وامك وهاجر شنو ذني
..امي امي ماكو بشر يكره امه الضحت بكلشي الأجله وهاجر مختلفه عن الكل مثل نجمة بوسطهن لتقيس عليها ابد
..هنيال هاجر تستاهل بنت اخوي ..الموضوع جدي تسولف بي لو حتى تداهرني
..لا والله جدي البنية مامرتاح الها
..هذا هو سوي الي تريده
..تستاهل جلسة اطگطگ بيها ضلوعك
..اشتعل ابوك ..تعالجني لو متحلف بيه
.. لا علاج اوديك لأم عباس عشرة على عشرة
..انت طالعه عينك هاي لأن صرت اب لو شنو فلمك
..ماخليتني اخذ وقت وي ابني واشبع منه ربطتني بشغلك وانت وراي مسوي الدرب سكة دروبك مايمشن علي ابراهيم متفيدك هالسوالف احمد صار علاگه الروحاتك مو
..ابنك غير عن الكل امنية ودعوه متأخرة بيوم اتمنيت بيها ترجع بيه الدنيا الوكت جيتك للدنيا واني بهالعقل هوايه امور تختلف خليني اعوض ولا يروح بالك بعيد ذاك الدرب لو اعرفه بي امل احفى واحصله بس مابي واذا ع الشوف تحسبه مو من حقي اتصدق عليه العمر مابي اكثر من الراح خليني ارتاح بآخر سنيني وذاك العمر يولي مااحسبه
..ترتاح گتلي ..هم بينا واحد مرتاح مثلك وين اكو اذكرك بحفلاتك ابراهيم بدبچك هوايه هنه مااريد اسولف بيهن بس ابو المرتاح انت
..العلة بالروح والجسم يستشعر نداء العقل بتغطيته للخيبات اني عنيد حتى روحي عاندتها انت مثلي بس تربيتك اصلح وواعي اكثر
..هسه صار وقت الاجتماع نكمل سوالف بعدين
...
هاجر...
مر اكثر من ثلاث اشهر على ولادتي وامي مااجت لأن حملها مهدد عذرتها بس ظلت تلح عليه وتعتب انتِ وابنج تعالي نشوفكم مثل ذيج الجية
حچيت بصراحه وكتلها صخر رافض واني هم الطريق طويل ومو زين على احمد واني هم مااگدر غير مره
زعلت وظلت تحجي
..انتِ متغيره من اخذتيه حقدتي عليه اتعلمتي الحقد منه طلع صدگ حاقد ومأثر عليچ والا متتغيرين هيج يعني اني الهسه ماانسى جايبه اسبوعين يلا تگليلي ليش
..صخر معليه يمه ماحبيت اخبصج لأن جنتي مشغولة اسبوعين واني بشهري واخر ايامي مافرغتي وسألتي فراغ للسؤال ماعندج اشغلج ازيد ليش لاتنسين ظروفنا شنو چانت
..هااا هايه قوانه جديدة انوب اني الغلط مو تدرين چنت مهدده وتعبانه
..حبيبتي ماما صحة وعافية ان شاءالله لاتهتمين لو صار عندي مجال اجيج ونتشاوف
..لتجين مااريد جيه وبالتواسيل اشتريت هدايا الحمودي راح ادزهن بيد خالچ عنده روحه البغداد يراجع للطبيب مناك خل زوجج يمره ويشوفه شمحتاج هم يسويلچ قيمة عد خوالچ وهم ياخذ الهدية
صفنت اكو شي غلط لو اني من اجيت هنا يلا وعيت
اكو امور ماجنت اشوفهن غلط بس هنه مينبلعن
..يوم حبيبتي لدزين اي شي ..وصخر مامتفرغ مثل قبل اعتذر الج والخالي نيابة عنه
..يمه النحاسة ولچ ماما شجاچ
..والله ياماما موقصة نحاسة ..بس والله مشغول من استلم ادارة الشركة لليوم يداوم الصبح الدوامه ومناك يطلع للشركة ويجينا بالليل بس ايام ولادتي چان يرجع علمودي حاليًا شغله الراسه
..ماشاءالله يا امي غير تفرحيني واخيرا استلم شغل ابوه الف الحمدلله وليش متحجيلي هيج اخبار تفرح خلصتيها عليه ظروف وظروف گولي مشغول وحقه
..ماصارت فرصة احجي ماتفرق بالعكس اتمنى لو مامستلم بس الخاطر عمي متحمله قبل وقته النا هسه يجي ميت تعب يادوب نشوفه كم ساعة قبل النوم
..خليه لتنگين عليه ويتركها خلي يلزم شغل والده بشنو احسن منه البقيه الحمدلله والله جنت شايلتلج هم
ظلت تسأل وتستفسر اجاوب باختصار احمد بچه استاذنت ونهيت الاتصال وطلعتله يم عمتي
العلاقة بين الاهل او الزوج او اي شخص مقرب من توصل مرحلة نستغل بيها كل فرصة القطع الحديث وانهاءه لازم نعرف الخلل او الفجوة الصارت بينا مو عاديه وهذا الصار بيني وبين امي اتمنى ترجع علاقتنا مثل قبل اتمنى بس!
هي اتغيرت بزواجها جنت محط اهتمامها الوحيد وهسه كومه اهتمامات عدها غيري واني تغيرت من شفت هنا الي عشته سوالي خبره وخلاني اميز هوايه امور وماانكر صرت مياله النفسي وللشخص الاقرب الها اكثر من قبل وعمي وصخر وشهلة زيدو دلالي يمكن وخلوني اطلب الأكثر
اباوع الحمدوي بيد عمه تهوسله .. بادي يسمن وتبين ملامحه اكثر حمودي اسمر سمار فاتح مو مثلي طووخ بس عيونه سبحان الله نسخة من عيون ابوه ملونه وعنده رموش كثيفة من صغره مبينه
بس هم الي يشوفه يگلي بي ملامح مني مثل خشمه وشفايفه مرسومه وواضحه وهايه احنا هيج نشبه لأن كل يوم متغير وحليان اكثر حبيبي
فترة ولادتي عمة ماقصرت وياي ابد ولا البنات وصخر اتفرغ ايام لأن شاف نفسيتي تعبت من امي مااجتني وحاول بكل طريقه يعوضني وماقصر غذاني عاطفيًا ومعنويًا والف الحمدلله على وجوده
بس انشغلنا بوضع رشا وبنين وروحتها هناك ومااستقرينا الا صارت بينا بنين وبدينا نرتب امورها ويانا ونتعاون كلنا
اخذت احمد من ايد عمتي قفل بطلن يعجبنه الهوسات ويصرخ مو يبچي گالت
..عليمن تطلع يجده جدك مسودن توك تضحك بيدي اليسمعك يگول گرصتك
ضحكت
..انتِ تدرين عمي طاير فرح لأن سميتي المسودن الصغير يگول هاي من المحبه
..اي حگه ابو السوادين چا شحچي بعد
واحنا نسولف سمعنا صوته طب علينا وهو يتحمحم ويصيح هاجر بابا
طلعتله فتحت الباب الداخلي جاي وبيده سيارة مال عمر سنة ونص يلا يگدر يصعدها
ضحكت وفات وهي بيده اشرتلي
..هاچ شوفي وتلوموني لو گلتها
عرفها تحچي عليه ابتسم
..بعد انتِ الله باليچ بمسودنين من زمان شتحجين احجي هو المسودن يعقل يجوز
ردت وهي تباوع للسيارة
..هسه ذيج شحصل منها انوب هاي.. تكسرت وهاي بمچانها لو شجاريلها الولد وكفه ماواگف تنگل عليه بهالدعدع وين دربك
..ماعليهن كلهن يصعدهن ويكسرهن واجيبله اكثر بعد مادامه سالم والله حافظه وبس يكبر شويه اخلي بيده سويچ مو بس ذني
..خوش خوش على هاي الصحوة كون الله ينطيك عمر وتسويهن خافنها صحوة موت
ضحك واني عيوني تتنقل بينهم يمه النگره مو طبيعيين ابد
رد بشقاوة مبين مرتاح اليوم
..لا مااموت مادام اشوفه يوميه واشبع شوف من عيونه الله ينطيني عمر وعافية وواهس الهالدنيا رغم كلشي
يسولف وعيونه عليها حرجها وانسحبت الغرفتها وخلتنا وهو يضحك
..شلونها المزيونة ..صخر يگول اخر تحاليل زينه تگدرين تصوريهن الي وادزيهن لحسابي؟
..اي والله عمو كلش زينه الحمدلله بس التليف ملتزميله بحمية هو مزمن بعد واني المشرفة على اكلها هسه ..اسويلها مثل ماوصى الطبيب وعمتي هم زينه تلتزم بوصاياه ومن عيوني ادزهن الك ..ليش انت ماتصدگ بصخر
..لا بس خاف يضم عني هالأيام يداريني صاير.. وچنه يخاف عليه
ابتسمت
..ترى والله صخر يعزك هوايه بس يكابر او هايه طريقته اتعود عليها وياك
..حقه واقل من حقه واني بس وياه هو وامه عتابهم مغثتهم الي بقصد بدونه عندي احلى من العسل
ضحكت
..اذا هيج العتاب والمغثه الريگ الحلو والمداراه شتعتبره
..لا ساعتها مااتحمل واموت من الفرح خلينا هيج احسن
..الله يحفظك عمو وينطيك الصحة والعافية ...البارحه دازلي بيد صخر ارباح ومافهمت الزيادة ليش ..وموضوع اخواني شصار عنه
..خلي هو يفهمچ .. واخوانج عوفيهم هسه بعدهم مايستوعبون ..انطيني احمد اشم ريحته واروح اشوف فطومه وامها ..هم حاولي تقنعيها اداوم مابقى شي ع الدوام
..بعد شوي اروحلها واطول وياها بالگعده
واحنا نسولف ورن تليفونه عمو انخبص وعرفت منه رشا تعبانه وعمي سليمان يشكيله محتار يريده يروح وياه ومافهمت شوداها للناصرية .. عمي اتصل بصخر وقررو يرحون
اتصلت بريمه تبچي قلقتني حيل ومافهمت منها كلشي وغزالة لاحگتهم هي ورجلها وامه
عمتي شهلة من عرفت اتصلت بأسعد تسأل عنهم وين
ومن نهت الاتصال گالت ماخذها البيته
..يعني تتعالج وترجع لو شنو وشلونها هسه
..مافهمت بس گال احسن شويه وبس تتحسن اسوي وليمه واعزمكم كلكم واعلن الزواج
انقهرت عليها ماتستاهل رشا بس الحمدلله المهم متحسنه لگيت البنات يحجن عنها بالكروب وحلا تگول رنا گالتلي مصدومه وحالتها النفسية تعبانه وماخذها هو يغير الها مكانها ويداريها وهم خطبتهم طولت
كلنا دعينالها ربي يشافيها ويعافيها ويسعدها
رحت البنين لگيت نوره يمها
..نواره مشتاقين رجع الدوام ورجع التعب
..الله يساعدجن مامايات اني هيج وصايره سطل
ضحكنا وهي تباوع البنين
..اگول بنونه وياي انتِ ؟ حسام حاچاني محولچ فلوس تجهيز الدوام وملابس فطومه هم وگال مااقبل تجهز من غيري وگال روحن سوه شگلتي
بنين باوعتلها بصدمه واني مثلها هم
وردت وهي مبوزة
..اني اصلا مااداوم مااريد اي شي لاتستلمين
نوره اعترضت وظلت تقنعها
..بنين ديري بالج خاطري بكلشي الا مستقبلج كملي ودوسي على الظروف هايه احنا مثلچ اخونا وحبيبنا وشالع گلوبنا بس ماتوكف الدنيا عندج بنيه بعد يومين من تلزميها وتحجيلها المريتي بي اتخيلي شگد راح تكون فخورة والله ام جبارة تصيرين عوفي الكسل والتردد فوتي بطريقچ ياحبيبتي كلنا وياج مو وحدچ انتِ
بچت بنين
..خاف مااگدر ماادبرها اني نوم مثل البشر ماجاي انام ومنا بنتي منو الها كلجن دوام عدجن
..مالچ علاقة نتعاون والله استغلينا دامنا وياچ
حلا گالت اخليها بعيني ليظل بالچ وباچر نطلع كلنا نجهز
..وليش منه؟
..ترى اعرف اني حمزة وهو بلغوني وليش اني اگلج انتِ سباعية لأن حاسه بيچ .. وليش مو منه على شنو بأسمه صايره ترى بس الأبوي مابلغه يشيل ايده عن مصاريفكم بلغ حمزة وصخر كلشي يخصكم حتى العلاج عليه
دنگت بنين تبچي
هونه عليها وغيرنا الموضوع وماتركناها لمن اقتنعت بالدوام اتصلت بيها امها تركناها وطلعنا گعدنا بالحديقة
اتصلت على صخر توهم واصلين وطلعت رشا مو مثل مابلغونا وضعها تعبان حيل على كلام صخر واصله الموت وراجعه للحياة وگال نبات يمهم ونطمن على وضعها ونرجع ورنا تبقى يمها
بس بلغني مااحجي اي شي حسيت اكو شي مو زين مايردون يحجوه وانتظرته يجي وافهم
لگيت نوره عايفتني ومنسحبه تموت ع الخصوصية على گولتها لحگتها لگيتها تدز بصمه
..فرسان جوز مني حباب بداعتها الخالة اللطيفة
واجت بصمة منه يضحك
..شوف الحية من تمدح ماتگدر الا تذم
اشرتلها اروح هزتلي راسها لا وردت
..صاير تظن بظن السوء وين الذم ابن اللطيفة
..حية وبانفاسج يبان السم مو بيدچ
..ديلا اتوكل الشغلك شلك بسمي ترى والله اني الهسه مامبلغه حمزة عليك خايفه عليك منه
..وشيسويلي اخوچ
..يجرب النجمة الأستلمها بالجديد بيك
وهم ضحك من گلبه
..احب نجمته القديمة اني الجديدة ماتهمني
تركته وگالت
..هذا اللطيف ابن اللطيفة ماناوي يعوفني ..بطة اجت؟
..ماادري المفروض هسه جايه
اتصلت بيها وظلت ترزلها
..شحجيت اني بطة شگلت لتخليه يستغل ظرفنا يوصلج وبس لا مرطبات ولا شرايه ولا شي ابويه شتفق وياه
غلقته وگالت الأدبسز كيفو اخوتي منشغلين وابويه قبل هو يوصلها الدرسها الخصوصي راح يخلصوها فره احنا بياحال
..ترى بطة عاقلة صح عاطفية بس متنطي مجال للغلط امني وهو شاب وخطيبته فرحان بيها يريد يتكشخ اكيد يعرض خدماته عليها يحب يدللها
..حمزة موصيني وصخر مااغفل عنها وهي هم طفله الهسه مااقتنع مخطوبة صار سنة ونص وعاقدة انسى والله واشوفها طفلة واخاف عليها حارث طاير عقله بيها ومتلهف مااحسه يصبر هالگد خاص بعد مااقتربت منه لو ماظروفنا اقنع ابويه تتزوج وتكمل عنده
..گعدي وياها وصيها بدون عصبيه سوالف اخت للاختها
..وانتِ هجوره فدوه العينج وصيها اني يمكن ماتسمع مني مثلچ تحترمچ هوايه
..ادللي والله احاجيها
طلعت بنين النا ورجعت توصي نوره متريد احد يعرف ونوره تكلها لو ينخاف مني وافلت كلام ميحجولي اخواني الحية متخوف من هالناحية ضحكنا عليها فرحانه بروحها حية
رجعت يم عمتي شهلة وسوالفنا كلها برشا وفهمت منها طلعت مشربة سحر حسب كلام السيد وكايل الهم ممنوع تكولون خلصت منه خاف الي يريد يضرها يجدده وحاليا هي منضره متقاوم تتعب بساع
وعلى هالكلام نهائيا ماجبنا سيره بس متأكدين من خالتها لو من طرف عثمان الله ليوفقه
ثاني يوم الظهر اجونا عمامي وصخر وارتاحينا على وضع رشا وعمتي شكد فرحت لأن مدحو بأسعد وهوايه مثمنين موقفه
بعد ماطلعو
فتت للغرفة اطلع ملابس الصخر يسبح
فات ورايه واني اختار ملابس جرهن من ايدي وباسني حيل وشالني بيد وحده ورجع باسني من رگبتي
..مشتاقلچ ولچ ..منين طلع الشغل انعل ابو الشركة لابو صخر لابو فلوس ابوه
ضحكت
..هسه ارتاحيت من سبيت عمي
..عمچ سواني نصين والله بنص الشركة وشغلي ويجي ابالي طولچ وهذا السمار النوتيلا انعل ابو فلوسه لابو وسام ومرته
..ذوله شعليهم بعدين شدعوه هالگد حليان
..هو منو عم عليه غيرهم ..ومو بحلا النوتيلا اني
العسل يمچ وبس
..خليني ابوس السانك بلا ترى مالحگ اتعلم
..شتتعلمين بعد؟ عيونچ كافي عليه هو غير من فتت واني اشوف اللهفة بيهن اريدهم بس يطلعون واحضنچ انتِ وهنه
..بس خل اشوف حمودي وين
..خليته يم امي نايم ..اسبح واجيچ نحلي و عندي حچي وياج هم
..ما جوعان احضرلك اكل من ايدي سوي نفسك ماتدري وعمتي ممركزه ترى
..جوعان شلون مو جوعان بس الچ مو الأكلچ والعصر اكل على راحتي هسه مااشتهي اكل واخذچ للبستان اشوفچ التين قبل اخر وجبة حصاد اله
راح يسبح واني جنت رتبت نفسي
العصر ساعدته سوينه الأكل سوه وعمتي تتصل بخواتها وموضوع اسعد ورشا صاير ترند العائلة عدهم
اهله متفاجئين بقراره خاص ماخذها گبل البيته بس مامعترضين وهو شايل هم ابنه خاف مايقبل يروح وياه متعود على اجداده وميريد يتركه ابد
بدلت الحمودي ناخذه ويانا وعمتي ماقبلت شحتتني وره صخر طلعت اضحك على حجيها وهي ترزل بيه وابنها ماحاجته ابد رجعت عليه
..وين ماخذه الولد نحل وزرازير وحشرات ودود تونسو وحدكم طالب ونسه منكم هم ابتلى بخبالكم هو
اتمشينا الخضار يخبل والهوا حار رغم العصر بس بعد الجو بي حروره
ودخلنا بين الاشجار يلا اجتنا نسمات البروده من فيهن وهبات الهوا بينهن كل شويه جايب تين ومخلي بالسلة العندي وظل يذكرني بأول لقاء طولنا بي الحالنا بين الاشجار واشرلي عليها
..نروح هناك نعيدها بصورة احلى
..اني مااگول لا
ضحك على جوابي وصوت مهيب اجانا يسلم
وصخر صاحله
..ها مهيب احد وداك عليه
..عمار گال توني شفته خطيه الحاله وضايج روح يمه والله لو ادري خيتي وياك ولا اجيك واباوع بوجهك انوب صاير متستحي حتى سلام مارديت شگد سافل انت
ابتسمت وابتعدت عنهم بعد مارديت السلام عليه ورحت اسوي نفسي احوي التين
..ياسلام ارده البارحه الصبح شفتك لاحگني المن مو گوه سدينا سالفتك باتصال وشهادة زور مني الأم مهيمن
ضحك مهيب
..اووف ام مهيمن تاليها تموتني يلا ترتاح
..ليش تجذب عليها انت مو وياي چنت ويامن چنت احجي محد يمك هاجر امان
..انت الله ناعم عليك بهاجر متحس بيه ..يول لو كتلها وي سلوان صديقي تكف مني عبالك لا ابد لازم اتصل واثبتلها جنت وياه ومو حلوه بحقي تنهز صورتي اتصلت بيك عدها انت دستور وصادق
..هم نعمه هذه بنت العم مصدگتني .. لو ماشالع گلبها بمكسراتك ماتفقد الأمان وياك
..هنه اربع مرات اول زواجنا وسوالف تافهه متابعة مراسله مدري شنو بعد اكلت راسي لاهم بيت عمك ابو فارس شاخطين يحبون تقديس العلاقات
..لا عاد لهنا وحدك وصدگ انت ابو عيون طايره شجابك الهم
..طالع العمي شفت الشركة شبيها من اشكال
درت وجهي مصدومه وصخر بساع التفتلي عبالك حس راح انتبه
..اسبك واسب اهلك هسه؟
..انت ومروتك بعد
..جايين نتونس صار اشهر هامل الوضع كله توني بديت اقتنع واستوعب اكو اولويات واجبي ارتبها راح تخربها وتمشي اذا ماجريت منا اجيك باچر اخليك تلوب شهر والله
ضحك وصاح
..ها اها رايح اني رايح واشاقه ترى
درت عليه ايدي على خصري
..اي استاذ المدير اشو محاچيلي
..شو عيديها بلا خل اصور انتقلتلي عدوة التصوير منچ
ضحكت
..لتغير الموضوع
..يابه والله مااشوف بهالدنيا غيرچ شبيچ لتغثين نفسچ وتعاي نصور سوه
تليفونه بيدي ناخذ سيلفي من يمي ارتب يطلع واجه اشعار مكتوب حسام اخوي
كاتبله
..حجيت وي هاجر تحاچيها ؟
سكتت سويت نفسي ماانتبهت اكيد هو يحجيلي
جاوبه صخر وحاجاني
..فهمي بنين حسام يريد يواصلها بالتليفون يسأل عنها وعن بتها مو اكثر
..وهاي يرادلها سؤال وتقنيع
..بعد اعتقد هو هم يتحجج وشايف النفسه عذر الله يساعدهم صعبه بس لازم يواصلها
غابت الشمس رجعنا مريت بيها فهمتها وهي رافضه بستها وكتلها سمعي كلام امچ وطبقي اقتنعي بحياتج ياحبيبتي وهو بعيد مجرد يريد يحس هو گد الأمانة مو بس شكل من بعيد
الصبح مراسلتني بصورة شاشة المراسلتهم وهو كاتب
..وصيت حمزة يعلمچ تسوقين وي نوره حاولي تتعلمين السياقة وسيارتچ عليه
كتبتلها
..دخول قوي والله ..شجاوبتي
گالت
.. من الصدمة مارديت صدك يحجي سياقة شنو كون امي تدري واخواني ايباه
ضحكت
..گليله اهلي ميقبلون وشوفي رده
رحت اكمل شغلي واني ارضع حمودي اجاني منها اشعار راد عليها وكاتب
..واهلچ شنو علاقتهم؟ انتِ تخصيني الي وطلعتي من مسؤوليتهم المسؤوليتي واني اريدچ تتصرفين ومتحسبين الأحد حساب مادام ماكو خطأ لاتهتمين
كتبتلها
..زين والله مبين حسام ابدع من اخوانه
...
بطة
.....
هذه الفترة المرت علينا ابد ماچانت هينه شگد ردنا نهونها بس صعبة كلشي اختلف عدنا وگلوبنا انكسرت وامي بعد ما راحت البيت وسام تعزي رزق وتركتنا احنا قطعنا تواصلنا وياها وزعلنا لأن تعرف اخوانا شكد يعنولنا على منو زعلانه علينا احنا اني وخواتي شنو علاقتنا بالصار
چنت اظن تحاول تصلح علاقتها بحمزة بس صار العكس وهو هم سوده عليه مامهتم
قرب الدوام واني مقرره ادخل رياضيات وانكليزي دروس خصوصية للخامس حتى بالسادس من ادخل اول العطلة اكون مسيطرة
اخواني قبل متفرغيلي يوصلوني هسه ابد محد منهم موجود احتاجيت خط بس من عرف حارث حاجه ابويه وقنعه هو يوصلني وماقصر
چان بلسم جروحي بهالفتره جبر كسري وخلاني احس بالحياة شگد حلوه وياه
طول الطريق يتغزل بيه ويدعي الأيام تعدي وتتمر بسرعة واصير يمه
ومره من المرات اخرني اكلنا مرطبات واشترالي كومه شغلات اكلتلي رزالة من نوره ومحاضره حلوه من هاجر ماضجت گلت حقهم لو ميحبني ميحرصن عليه
ومرت الأيام حتى سفرته اجلها الى سافر قبل الدوام باسبوع واني هم ختمت الدروس وجهزت نفسي الدوامي الرسمي والبنات كلنا اتجهزنا احتارو بينا حمزة وصخر
وبيوم اني تعبانه ميته تعب نايمه نمت من وكت والظاهر متصل هوايه ماراده
فزيت قريب للفجر ع صوت رسائل اول مافتحتهن اتهيئلي شفت صورة مو حلوه الحارث وي وحده فتحت عيوني اريد اركز تلصورة ماكو اختفت انحذفت
كتبتله
..ارجع دزها اتأكد
مارد
رجعت اتصلت
دزيت كومه رسائل
..كتبلي شتحجين انتِ مشتبهه دزيتلج رسالة عتب وگلت ماتسوه عذرتج وحذفتها
..جاوبني حارث اريد اتصل
..نعسان والله مااكدر باجر نسولف
خلاني ميته قهر واريد اتأكد هو دزها لو لا خاف اني صدك مشتبهه اتصل بيه بكلامه الحلوو وخلاني اصدگ اني فعلا چان يتهيألي
بس ظليت بخوف ومامرتاحه
رجع من السفر ممخلي شي مجايبه وباهتمام يفوق اهتمامه قبل طيرني وياه ونساني كلشي
وحاجه ابويه وقنعه السادس عنده اكمله ومن حاجاني ابويه وافقت
...
يتبع