بقلم نور الشمس
....
سراب...
گعدت الصبح حسيت نفسي زينه اليوم وبديت اتحسن والدوخة خفت تدريجيا
اباوع فارس نايم بتعب بعد جيته من رحلة طويلة
البيت نظيف يلمع ماعندي احد ومرتين صارت عجه وتراب اجتني بطة فدوه العينها ماخلتني اغسل شي غسلت البيت كله والكراج وبقت يمي لليل
واجاني احمد اخذها وصلها الأهلي ورجع يبات يمي من يسافر فارس لو هو لو اخوتي الأصغر
لأن مو دوم الي خلگ اني اروحلهم مرات اتعب وانقهر خاص بهذه اوضاعهم
بس الفرحه الوحيدة تجهيزات عرسه فدوه العينه وامي منغصتها هم
گمت اخذتلي ملابس واتنشطت بدوش سريع رتبت نفسي وخطيت كحل وخليت مكياج خفيف اغطي الشحوب والتعب الباين بوجهي
وبحذر كلش اتحرك مااريد اگعده
طلعت اسويله ريوگ
لبست كمامه من ريحة الزيت .. وخليت الچاي وطلعت الاجبان ومربى الجزر اليحبه وشويه وعسل وطلعت باسطرمة يموت عليها هو
وجهزتها وي بيض هدرت الچاي وناويه اسويله ريوك ملكي
واني مشغولة اطرگ بالبيض وجفلت من انحنى
و باس رگبتي رغم ادري ماكو احد غيره بس فزيت
..بسم الله فززتني
..جربي تفزين ويايه شكو بيها ..انتِ مفززة گلبي على طول
التفيت عليه نزلت الكمامة و بسته بخده
..اسم الله على گلبك ياروحي انت
..اليوم الحبيب نشيط ومرتاح
ابتسمت
..اعرف والله مقصره بحقك هوايه
..ماكو كل تقصير حبيبتي تعبانه وعاذرج
احتاج دووش سريع وناكل سوه
..حمامك جاهز ابو الفوارس اتوكل انتظرك
..ورده غاليتي
كملت الأكل ورتبت السفرة اجه ياكل فرحان بيه لأن متحسنه وماگدرت اكل اني غير الخاثر والخبز
شويه وطلع الأهله يشوفهم
واني اتصلت بخواتي الكبار مكالمة جماعيه وبديت اجهز للغدا واغسل مواعين الريوك واحاجيهن
حاجتني مآرب
..هم شفتي بيت اهلي
..احمد شوفني الصور ماشاءالله البيت مسويه تحفه
..مهنه ان شاءالله ..اني جهزت فساتين وملابس الي وللجهال ..عهود كملتي احتياجاتج حتى قبل ايام نروحلهم هناك ..اتمنيت بعدني قريبة عليهم وصبح ومسا اروح
وردت عهود
..لا والله الهسه بعدني البارحه ناويه اطلع اجهز ونغثيت من مكالمة امچ ولغيت الروحه كلها سمتني سم وگلت الله يساعد اليمهم حمدت ربي بعيده
رديت مقهورة
..هم حظها هذا ..شالعة گلبها بأيدها ومدمرتتا والا المكانها تفرح ابنها متزوج رادته
شعليها منين تكون اشو قبل كم سنة من راد بنت عمي ابو مهيب گلبت الدنيا وسوتلها سالفه للبنية وخلته مفرفح ولغه الموضوع كله وماعاند عبالها مثل كل مره يسمع منها وهسه متخبله شلون مامهتم
ردت عهود
..مو گتلها جان بعده صغير هسه كلشي اختلف ماراح يسكتلج ولا يسمع اصلا من ذاك الوكت هو بدا يعاند واختلف عن وضعه السابق ..غير تقتنع ابد ماسمعت مني امي حالفة تعيش بقهر وتعيشنا وياها بمرار
مآرب شاركتنا رايها وهي الله يسلمها من النوع التنطي اوامر مو فكره تطرحها
..اني اگول تعوفن سالفة امچن احسن لأن الحجي مايفيد الأنسان من يكبر المفروض يوعى ومنه نتعلم مو احنا نعلمها ..امي بالعكس وعايفه خيرة ولدها وگاعده يم وسام عبالها يتحملها هو فرح بروحتها حتى توصله فلوس اكثر تاليها ابويه المصرف ماخلاه من سوالفه وتفاهته
وسوده عليه عبد صاير بينها وبين ابوي والقهر كاتله
هي تضغط عليه وابوي قافل وماخلاله خاطر
..على گولتچ عوفنها ..وعبد هي راضيه عليه هسه هم من شال لاكالت اباركله اروح وياه افرحله تكول هاي تاليها مرت عبد صارلها بيت واني مهجولة
..منو مهجولها لو تاركه السوالف المالها داعي ومحترمه مكانتها جان هي ام البيت وكلهم جوه ايدها
..والله يامآرب على كولتج الحجي ميفيد بعد
سألتهن
..شوكت تجن البيت اهلي ..تردن الصدك حلا وخواتي الصغار مامقصرات كل مايطلعون العمال هنه وياهم والبيت مامحتاج شي
..الشهادة لله حلا ادمية وتستاهل دلال ابوي.
..اي والله تستاهل ..جنت كلش مابالعتها بس من اروح البيت اهلي وتجمعنا وي ابويه وتجهز نمنات الگعده بحب خلتنا نعيش شعور عمرنا ماعشناه يمهم صرت احب واحب كعداتها ويانا
..متشوفين ابويه طلع الكل و بقى عليها يريد يريح راسه
واني اسمعهن واسمع رايهن اتصل على الماسنجر فارس
استأذنت منهن وغلقته ورجعت اتصلت بيه
..گول حبيبي
..طابخه غداچ غزالتي لو اجيب ويايه
..اي حبيبي حضرت برياني دجاج وروبه وزلاطة مثل متحب وعندي طرشي هم
..امي وفرسان عدنا غداهم وهسه اجوج بالطريق استقبليهم بين مااجيب سمچ واجي
..كل الهلا بيهم
نهيت الاتصال وباستعجال لملمت الباقي وغيرت لبسي ولبست شالي اول مندكت الباب طلعت رحبت بيهم
عمتي اجتنا مره وحده من عزلنا الهسه
وفرسان اكيد جاي النفس السبب
قبل فتره حاجاني على نوره وحجينا بينا احنا البنات مستبعدين قبولها لأن رافضه الزواج تماما واستحيت اگله
وبعدها فاتحناها وفعلاً رفضت ورفضها ماچان الشخصه فارس محترم وخريج بشهادة محترمه وراتبه خير من الله وحلوو هم يلوگلها بس هي معانده
ضيفتهم مي وعصير وكيك وبدينا نحجي وعيونه عليه گال
..ها سراب شسويتي ماسويتي
ابتسمت ومحرجه رديت
..مو گتلك معانده ورافضه الموضوع كله الرفض مو الك
دارت عليه عمتي خازرته
..على شنو تحجون
..كلفتها تحاجيلي نوره بت عمي ابراهيم اريدها زواج مو بلغتكم قبل فتره
بانفعال ردت
..واني اخذلك نوره بت فيحاء المطلگه ..امها بهالعمر ومارهمت ابيتها هي عليمن تطلع
..يمه المواضيع هايه عوفيها ..نوره مو غريبة واظل ادورلها ام وخالة بت عمي والاقرب الي وحياتي اعرف شلون اديرها ..الوحيده هي ابالي رضيتوو مارضيتو الزواج شي خاص بيه ورأيكم على عيني وراسي بس خلوه قابل للنقاش ومو فرض اني مينفرض عليه شي
ومثل مازوجتو القبلي برادتهم ويايه متعترضون ومااسمح الأي اعتراض
انحرجت حيل وهي دارت عليه مستنكره
..هاي كلها من راسج التخطيط مو
فتحت عيوني بوسعهن وبتعجب رديت
..اني ؟..اني شعليه واخطط شلون يعني اكله تعال اخطب اختي لو اعرض عليه شنو هالحجي عمه البنيه اصلا من فضل الله مامقتنعه ولا قابله والموضوع انتهى
سكتت ماردت لأن فرسان ظل يحجي عليها وماقبل ابد
وحتى عليه حجه
..بكيفچ انتِ تنهيه ذكري الله سراب
واحنا بهالهوسة دخل فارس بيده السمچ ومسواك هوايه كمت اتلكيته وهو حاجه فرسان
..شنو شبيكم ليش صوتك طالع
..امي معترضه اخطب نوره والله شنو امها مطلگه
..ولو امها اطلگت شنو يعني
ردت عليه هي بقهر
..البنت سر امها
..يرحم اهلج عوفي هالسوالف بنات عمي لتجيبين سيرتهن ابد وامهن فيحاء امهن جنية ..يبقن بنات ابراهيم ويخصنا بالدرجة الاولى وامهن شمتكون مو مهم
..ها متفقين ومرهميها واكيد ابوكم يدري وبس اني الغريبة
..البنيه ماقابله الهسه وان شاءالله ترهم يستاهل فرسان وتستاهله بنيه حلوه مرتبة تعبانه على نفسها وتدرس ودراستها مو شويه شنو المانع
وفيحاء منو فلانه منو شوكت اهتمينا الهن احنا العلينا بعمامنا وبس وكلهن بنات عمي ابراهيم مرتبات مثلهن مثل باقي بنات عمامنا كلهن خير وبركة وكل واحد ونصيبة
گمت عنهم مزعوجه مبين عليه
يلوووك والله ماعاجبتها نوره ..اصلا من حسن حظه تصيرله بس هي الأنفه منو يقنعها ام خشم يابس
كمت احضر زلاطه ومن داخلي قفلت بس كوه ابين اني طبيعيه
اجاني يستسفر واحسه يريد يجس نبضي
..شصار حبيبتي
بداخلي كلت سراب عيب هم ابيتي مهما كان غلط ابووز بوجههم وفارس هم ماله ذنب اتعقد من گرگة النسوان وتكبير المشاكل من المواقف الصايره وي اهلي متعقدة
ابتسمت وجاوبته
..ماصار الا الخير لاتهتم ..اخذ السفرة لو تتصل بعمي يجي يتغدا هنا
..اني اروحله اجيبه من رحت مالگيته رايح يم جدي وعمي سليمان
اقترب عليه باسني
..اسمچ سراب يعني وهم بس كلشي بهالدنيا وهم الا حبچ وشعوري بكل مره اعزز بي هالحب بداخلي واحسد نفسي على اختياري من الصغر ..غزالتي العاقلة احبچ ..والخاطري عبري مو كلشي تسمعي ينوخذ بي المواقف تتغير
..سهله حبيبي لاتهتم .وحبي الك اضعاف حبك
طلع واحساسي بلحظة اختلف عبالك مو بوسه وكلمة طيب بيها خاطري حسيت كلامه وحركته هذه ممحاة محت كل قهر حسيت بي قبل شويه
اجه عمي وفرحته بيه غير كل شويه يمدح اكلي وترتيبي للسفرة
وحتى عمتي ولا عبالك جانت مزعوجه وتوزع نظرات شكيت بالأكل بي شي خلاها تختلف ..ظلت تسأل عن صحتي وفارس شلونه ويايه ووصته بيه
ماادري شنو من تركيبة
عمتي زينه ومو زينه وقاسية وحنينة حتى وياهم هيج تكسر وتجبر
شويه وسألتني عن امي رضت بزواج احمد
كتلها لا
ماقبلت على احمد وحجت عليه شلون يصبر ويتحمل
يتمم فرحته بدون امه وهم گالت امج ماعرفت تكسبه كلنا نعترض ونزعل ومن نشوف بيهم لزمه نميل على نفسنا ونكسبهم هي هيج الدنيا اخذ وعطى والولد ماصار وكبر واتربى بالهين حتى نخسرهم بالهين
صح كلامها اكتفيت بيه وسكتت ومر اليوم بخير الحد ماطلعو
اجاني فارس فرحان برد فعل اهله من الأكل وبقو ساعات مرتاحين رغم بالبداية اكو توتر بس گدرت اتخطاه ومااحسس ..نصى عليه باسني وكلفني احاول من جديد وي نوره
...
بطة ..
اتصل بيه حارث
صعدت الغرفتي جاوبته
..بطوطة مشتاااق هواي يابه ليش متحسين ..شلونج
..بخير حبيبي جاي ومشغوله وياهم وهم اجهز ترتيباتي العرس احمد
..هاملتني حلقومتي وهذه عطلة عود ومجاي احصلچ مو كافي انمنعنا من اللقاء انوب الاتصال هم گطعتيه
والرسائل تقطير
..والله ياحبيبي مو قصة منع بس مشغولة ومجاي الحك ابد
..يستاهل ابو شهاب ويوم الي نهجز بي عرسنا..لو بس ابوچ يقتنع نتزوج قبل الجامعة والله اخليج بعيني وبنفسي ادرسچ
..ترى السنين تركض بقالنا تلاثة مو هوايه
...تلاثه مو هوايه اشيب بيهن والله ..دزيلي صورة اسكن بيها عيوني وروحي الولهانه
..افتح كام تشوفني بيها اي بس صور لا
اتصل عدلت شعري بيدي
اباوعله بغرفته گاعد بسريره ولابس تراك نيلي يجنن عليه ومزين جديد طالع تحفه
عيونه اكلتني واني مبتسمه بفرح
وبداخلي اكول اتمنى السنين تنطوي واركض الحضنه ركض
..ام خدود ريانه ليش هيچ مذبلتهن
ضحكت وخدودي بانت اني فعلا صاحبة وجنات وضعفي ماغير بيهن
..وين ذبلانات اصلا من اضحك حيل يحجبن عني الرؤية
ضحك حيل
..كافي لتضعفين بعد وتجين يمي الا ارجعج مثل اول واكثر اسويچ تفاحه والله
..انت شلون صيدلاني وتنصح بالسمنة
..هي كل سمنة سمنة ..معليج اني انصح
.ظلينا نسولف الحد ما صار المغرب وسمعت صوت حمزة جوه شكيت بي جاي سلمت ونهيت الاتصال ونزلت
رغم اول مالزمني بالولينة السووها الام صخر .. تلث اجازات مضيعه نفسي منه الحد ماهو صعد وجفتني وسلم ومابينلي شي خطيه اتحلفلي هوايه بس ماهنت عليه واخذت عهد مااسوي شي يزعله بعد حتى الصور هو وصاني ماادز ويعرف بالاتصالات عادي عنده بس غيرهن لا
نزلت اركض صار شكد مشايفته
لكيته يعاند نوره لازم ايده ويكلها
..انطينياه ابوسه
وهي مبعده وجهه عرفته يريد يبوس خشمها وتخاف بعده مطايب زين
..خليني بس ابوسه
..لاعليك الله من بعيد من بعيد
وهو بخفه باس ارنبة خشمها وابتعد
..يابه هذا الخشم اليابس شلون انگص ومشه بي المنشار
باوسته واني اضحك على مداهرهم تكله
..منشار شنو قطعة خشب لو خشم هو
ورجع حاجاها
..شلونج هسه هم وزنتي؟
..شعليه الوزن
..اكيد نقص منچ كيلووو
ضحكت حيل وخشمها وجعها
حضنها و باسها براسها وصعد
ارتاحينا لأن ضحك وسولف ايام الغيبة هايه ماعرفنا راح وين بس شكيت من رزايل احمد اله رايح مكان مو مكانه وبيومها اجه متأخر شكينا بي شارب من تلميحاتهم وحجيهم
اتصلت امي بنوره مدري شرادت
نوره جاوبتها
..شو تأخر عريس الغفلة مارحتيله لو ناويه تطولين الخطوبة للدلال
امي مدري شجاوبتها ونوره بنرفزة ردت
..وحمزة شعليه لو گوه تحشريه بالموضوع ..بعدين اني مناسيتلج سالفة بنت اخوج وقشمرتجن عليه وقسم بالله سالي اطلعها منها اطلعها يجي يوم وتوكع بيدي
انتهى الاتصال ونوره تتوعد
..شكو شصاير
شو عافتني وصاحت حمزة وركضت تصعد واني وراها دخلنا بدون مندك الباب لگيناه يبدل تيشيرته
وبس بالبنطلون وسوده عليه ظهره مشطب اخترعت من شفته
..عززه بعيني هايه شنو
نوره مااهتمت وكالت
..كسر بيده هو هيج كالوها
من كلامهم فهمت هذا من ضمن التدريبات اختبار قوة التحمل مااعرف عقوبة والله ماادري بس الضابط المعلم بالكلية مالته هو الجالد ظهره
عگد حواجبه وگال
..شكو شعدجن احجن من الاخير
..انت مخرب زواج امي ؟
..واظل اخرب ومااخليهن يرتاحن ..يازواج امج المثلها تلزملها سبحة وتعمر الاخرتها
اني اباوع واسمع وهي سألت
..رحت حاجيته شنو
..اني اروح احاجيه بيا وجه اكله اني ابن خطيبتك؟
لا طبعًا بس وصلت جزء من سلوك امج القيّم وي اولادها عن طريق ناس وشلون تعاملهم وخليته بمقارنة وي رعايتها الايتام بعمر ومرحلة مهمه ومدام وصلج خبر الظاهر ابوهم اب صالح واتعظ يعني اخذ بالنصيحة الله يوفقه
..اي عرفت واتصلت و بيه تهدد وتحجي تكول محد غيره خرب لأن هو موصيلي لا اني ولا هي راح نرتاح واشاسا اني ماميته ع الزواج بس عناد بي وبأبوه عايشين حياتهم وحطموني ابوج فرحان ابنه مشجعه هو وذاك الشيطان تقصد صخر
..بيمن تهدد شبقى عدها بعد من لزمه عليه كل العدها سوته وماسويت الا بعشر العندي ..وشتحجي خل تحجي الشيطان يتعلم منهن ويدللن الجايات اكثر
باوعتله بخوف ونوره بجرأه حاجته عكسي مااكدر اصارحه بكلشي اتحرج منه
..النذلة بت خالك لتقربلها خليها عليه يجي يوم وتوگع بيدي ..بس اول وتالي الستر زين الك والنا قبل ميكون الها ..و الاخذها مستواها مو انت التستاهلك زين حبيبي
..فدوه القندرتج هي وياه ولاتفكرين بيهم ورقة وحرگتها
..جوعان حبيبي
عافها ووجه كلامه الي
..بطة گليلي شي اكله نواشف اريد ..نوره ابقي يمي
انسحبت منهم ..خرب حظج بطة بس بالسخرة حصتچ
رحت اجهز عشه وفات ابويه
من سمع بي جاي حمزة نزل واول مشافه ابويه باسه وحاجاه
..حمزة انت عزيز عليه ومقدر جرحك بس الدرب الي اندليته جديد تركه بابا .. مو ثوبك يتعبك ويهلكك ويكرهك بنفسك وماتطلع منه الا بخسارة روحك ..والخسارة هذه ماتتعوض الا يشيب راسك وتضيع احلى سنينك
اني ابوك وانصحك وكدامك مستقبلك ..مادام احاجيك برضا اسمع مني
سكت حمزة ماحجه واكل هم مااكل وطلع الاحمد وصخر مارجع الا بوكت النوم
وهنا بدو مرحلة الزرع هو صعد الدوامه
والولد ياخذهم ليل ويجيبهم ليل الحد ماكملو وبدون استراحه بدت تحضيرات العرس
بيوم الحنة جابو فرقة الچوبي والولد اتفقو كلهم على لبس دشاديش بيض وشماغ احمر يلفوه بدون عگل
وبس ابويه وجدي وعمامي اتعگلو
وصارت احلى حفلة
جهزو الساحة المقابيلنا
وكل الاقارب حضرو عدا امي رزق وبيت وسام
متت قهر على جهالهم من دون الجهال وحدهم وبسبب امهم وابوهم محد يريدهم صحت عليهم غديتهم قبل لاتبدي الحفلة ومآرب انطتهم فلوس يشترون وي الجهال
بدلنا كلنا واجو عوائل عمامنا والبنات وفاتت هاجر
بفستانها الطويل بفصال مميز باين قوامها ومستور بلون ولوك جريئ اصفر ليموني طالع عليها يجنن
رغم اني لو وياها ابد ماانصحها تشتري هاللون لأن مستحيل اتخيله عليها بهالجمال
الشي الحلوو بيها تتفنن شلون تبرز لون بشرتها البرونز وبالمواد الي تلائم بشرتها تطلع ملفته بشكل
بحيث بين الكل ورغم احنا والبنات وحدة احلى من وحده بس جانت اكثر وحده تلفت الانظار هي
مكياج ناعم وبارز كل ملامحها سحبة العيون جريئة وتجذب
صفنا عليها ورحنالها نسأل سر تميزها وانتبهنا الشهلة وراها تركناها ها ورحنا الشهلة الاول مره بعد سنين طويلة تعتب رجلها بيت من بيوتنا وبصوت عالي طشت جكليت وهلهلت وكالت جيتي هاي الأحمد وحلا
باوستها حلا وحضنتها والكل متعجب شلون رهمت هاي المحبة الغريبة
نسوان عني رحبن بيها ومآرب كعدت يمها وسألوها على صحتها وهي تجاوبهم رجعنا الهاجر
ونوره تكلها
..شنو هالجمال هنيال اخويه ..هو يلام من يسميج نوتيلا
ضحكت هاجر ونوره بصوت عالي صاحت
..للتاريخ سجليها ..الحية مدحتچ ..نادرا ماامدح بجمال غيري
ضحكنا على سوالفها واني حاجيتها
..ام خشم المغرورة مصدگه نفسها
التفتت صاحت مرت عمي ابو مهيب
..عمه متسكتون جنتكم لو اكول ليش متاخذوها من هسه مو احسن
وعمتي طارت من الفرح
..شفايتلنا منبقيها والله ..بس منو يقبل اهلج ويانا عقدوها الأمور ..واني هم اكول لساها طفله تكبر وناخذها وتصير بتنا بعد متشوفوها
ضحك وونسة وسوالف وخطيه خواتي الكبار ابتلن شكد سألوهن على امهن بس عهود خلصت لأن العروسه جابوها من الفجر يمها
وسوت حنتها هناك يم اهلها
وباجر بالزفة نجيبها من بيت عهود هيج صار راي ابويه واحمد والعروسه واهلها
عفنا النسوان الكبار وكلنا صعدنا نشوف الچوبي الي انطلق واصواتهم علت وهم بصوت واحد يغنون
دزيته ساعي ..دزيته ساعي
حتى الضوه البالعين احا دزيته ساعي
ونايم لو واعي ..نايم لو واعي
اني اتنا اشوف هواي احا نايم لو واعي
وباعلى صوت وهم يدبجون
كملو
..اسمر چتلني ..اسمر چتلني
عيونه كلنا صارت بين هاجر اليمنا والصخر الچان بنصهم يلعب لعب وحمزه مگابله وهي تباوع بفرح چنها مالكه الكون
الفرحه ماسايعتنا بيهم وحولوها بعدين من المطبك للهچع هنا ابوي مااعرف شحاجاهم واتفرقو
مابقى بالنص بس عمار وصخر
لعبو لعب على اغنية من علمك رگص الهچع
اول مره نشوف صخر منطلق هيچ
وي كل دبجه ينزل للكاع ويطگ اصبع هو وعمار شعلوها شعل
حلا گالت
.. يحتاج احنا نسأل من علمهم لعب الهچع
ولو الجواب يمي محد معلمهم غيره
اكيد ابراهيم
سراب اجتها لحظة ادراك وسألت
اول بداية عرسكم من جان ابويه يتعارك جوه يصعد فوك بس صوت الهچع يوصلنا عليج الله جنتي تركصين ؟
غطت وجهه بأيدها تضحك
..اي والله اركص
مآرب من يمها صاحت
..سوده عليه عمار من باجر تفوتون العروس منا اخذه اركصله منا
خربنا ضحك
ولمحت حارث وياهم دخل وبگلبي اكول والله لتعلملك احلى رگص وادللك احلى دلال
بيدي تليفوني واتصل بيه حمزة مطشر احلامي فزيت من خيالي من قريت اسمه
جاوبته جان يريد اسويله طريق يفوت ينزل السلاح مدام ابويه غافل عنهم هسه
نزلته اني اله ..وشبعت رزايل من نسوان عمامي والبنات
سألته
..ليش اتفرقتو دبجكم سوه يخبل
..ابوج يمكن توه انتبه خلفته هوايه حاجانا نتفرق وحتى الصغار ماخلاهم وطلعهم
ضحكت
..والله حقه ابويه يخاف عليكم من العين الله يحرسكم
طلع وي كل بيت حزين من الأغنية حمزة يرميله صليه واني انكفخ منهن
احلى حفله حييناها ضحكنا واتونسنا بحفلة الشباب اكثر من حفلتنا البدت بعد ماخلصت حفلت الشباب وجانت بسيطة مجرد صفكات وهوسات مآرب وهالمره شاركتها مرت عمي سليمان شگد حافظه من التراث اغاني اعراس تخبل بلهجتهم
خلصت الحنة وهاجر متحذره وماركصت ابد
ثاني يوم العرس جان ابويه مسوي غدا وعازم الكل خلص الغدا وبعد الغدا من وكت طلعنا للزفة ازدحامات وطريق طويل بس هي متأخره بالصالون واضطرينا ننتظرها وكل هذا الشباب عالكيها لاملو من الغنا والركص ولا وكفو
الى ان كملت واخذ عروسته بيده
كلنا نريد نشوفها وشنو المميز بيها الخلاه يستقتل عليها
چانت تجنن كلشي بيها حلوو عروسه من صدگ
وياها بس امها واختها ومرت اخوها
امهات العروس وي صخر وهاجر اجو
والبقية احنا بسيارات الولد اتوزعنا
اني واخيرا سمحولي اكون وي حارث وعمتي واخته
والطريق كله عيونه عليه واني احلم باللحظة التجمعنا
وسراب ونورا وي فارس وفرسان
وعمار ومآرب وجهالها وجهال وسام
وعزام ورشا وريمه واطفالهم
والحمدلله تم كلشي بخير وسلامة
واتفاجأنا بالليل بخبر خطوبة رشا ورغم هي رفضت بس وصلت اخبار خطوبتها العثمان وثاني يوم بكل وقاحة دز خبر ان هو ينهى زواجها من خوال صخر
خل تتزوج غير احد بس مو منهم
ابوي بلغ اخواني كلهم اذا حاجاكم صدك لو دز احد على صخر طيحو حظه
وظلو يحجون هو شنو ويحكم ويتحكم وين صايره هذه طليق يقرر تتزوج منو وتصير المنو
...
هاجر..
كشخت للحنة وهو هم طلع يجنن عمتي تقرا وتسمعنا
.. حصنتك انت ومرتك باسم الله وكتابه ورسله
تركتنا وراحت الغرفتها هالأيام لاحظنا هوايه فرق عليها متحسنه
واخر لمسات النا بقى العطر عطرته وخليت عطر النفسي
وگف يمي عيونه تبحر بكل تفاصيلي واني هايمه بي عيوني تباوعله وماتسخى ترمش
الدشداشة البيضة بارزة طوله وقوامه وملامحه الحادة برزت اكثر
السبحة الكهرب تخبل وي عيونه وازرار الدشداشة بلونها بأطار فضي
غمز بعيونه وبنبره لعوبة گال
..شيصير لو نسويلنا حفلات بينا مثل هالحفلة وتجيني بهالشكل تنشطين دگات الگلب
مررت چفوفي على صدره ارد اشوف نبضه مثل نبض گلبي هسه لو تختلف استشعرتهن
و دگات گلبي اتسارعن ..وبنفس النبرة رديت
..شرط تلبسلي دشداشة وتلفلي الغتره هيج واطير بشوفتك السابع سما
حركلي شعري بيده
..اسمر اسمر ..والحاجب سيف وخنجر
مو بس ورد بخدودك مسك وعنبر
..اموت عليك واذا بقيت شويه بعد تسمعني اكثر الغي الروحه لهناك ومااخليك تطلع وشيصير خلي يصير
..اطلع وارجع ونتفاهم
طلعنا عمتي متحضره صخر اتفاجأ بس ماحجه شي
عمتي حجتله موضحه موقفها
..احمد اعزه ويستاهل اتعنى العرسه ..بس روحتي الحلا انه اليقدرني اقدره اضعاف
..منچ نتعلم يمه ..بس خاف يصير شي يسمعوكم شي منا منا خواتي حشاهن بس خاف من غيرهن اتصلن عليه ولاتبقن ابد
رحنا وايدي على گلبي مااحب عمتي تتفشل لو تتعرض الموقف والي صار بالعكس الترحيب بيها مختلف والف الحمدلله عدت على خير
بيومها سراب حجتلي عن طلب فرسان من جديد ورادت بعد العرس نحاجيها ونشوف ردها
ثاني يوم بالليل بعد العرس والتعب نريد انام جنت اخلي مرطب الوجهي وجسمي اشرلي اجيه الحضنه
ميته تعب وهو هم هلكان
..نامي ارتاحي مااتعبچ مبين عليچ التعب اريدچ هيج بحضني لاترحين بعيد عني
..اكلت حبيبي
..اكلت اي شويتلي معلاگ اني وجدي من الذبايح
..عوافي حبيبي
گلتها وضربت ريحة المعلاك بخشمي
وبگلبي اكول بلا لگافه ولطلطة انچبي تورط حجه شنو هاي جوعية صايره فد مره
غلست على روحي كوه ردته ينام ورن تليفونه
عمي كله اجيتك للباب خفت صاير شي صخر طلع واني وره الباب وكفت مدري ليش بالي راح يم العرسان وطلع صخر نفس التفكير مفكر
..ابو البراهم شوراك..صاير شي وياك وياهم
..ماكو الا الخير ..بس ردت ابلغك هذا النذل عثمان مودي النا خبر ناهي خطوبة رشا من ابن خالك خاف يحاجيك اكسر رگبته والخساير عليه
..من عثمان وحجيه تضوج هذا بس فوره على گولت امي مثل فوح التمن ..جبان وكلشي ميسوي خل توافق هي ونشوف شلون يمنع
..حمزة حاجيته مثل ماطلبت منك
..حاجيته ووعدني واذا خلف بوعده اني اتصرف
..هذا هو واعذرني قلقتك
..دومك قالقني ابراهيم
..طاح حظك ماكو مجاملة عدك
..لا مااحبها
ضحكت الا يداهرون وثاني يوم فعلا اجه من عمامهم واحد حاجه صخر وعمي سليمان
عمي سليمان مرزله وصخر كايله بلغه عني صارن وياه اثنين الثالثة ادوس راسه ومااحسب حساب الكل صلة وگرابة ولا نسبة وخواطر
...
رشا
بالعرس مابالغت بالمكياج والكشخه لأن عندي قناعة اي اثبات.. الامر ما بمبالغة يكشف العكس
يعني من اريد ابين نفسي مامهتمه ابد واركص واهوس وكلشي ابالغ بي راح ابين كسرتي وهذا ماردته جنت طبيعية كلش وخلصناها ضحك وسوالف واني وحلا والبنات و نركض وره محمد وعباس وكل وحده منه وجهالها
فدوه العينه حمودي كل مااشوف ضحكته يروح كل همي واموت بشكله وعيونه الحلوات
منتظره يوم بعد يوم يخطي الحاله ويبطل خوف واعتماد ع الحايط لو الاثاث
بالعرس مخنزر وكوه اضحكه
وحلا ابنها ياحلوه شافها لطش عليها واكل خدها وشبكها
ومن يلعبنه يغمض ويختل وجهه برگبتها
شويه وشمر نفسه عليه
ضحكت
..ابن الوز عوام ابشري حلا بأربع جناين من هسه
..يمه يوم عيد ويكبر وازوجه اليأشر عليها يأمر ويدلل
ضحكنا وشويه شويه الحبايب خالات صخر وعنتي شهلة عافن مكانهن واجن يمي رغم اني مسلمه عليهن وياهن رنا هم
وبدن يحاجني ويقنعني واني قافلة واكلهم ابني مااكدر
من خلص العرس رجعت
بالليل اجتني رسالة
..مو تطفل بس سؤال ..الرفض سببه مخليه ابالج ترجعين الأبو الولد ؟ اذا الهذا السبب اعتبري الموضوع الحاچوچ بي منتهي
صخنت من سؤاله هم احراج وهم قهر
لو ما العيب اكتبله انعل ابو الولد لابو الترجعله
رديت باصرار
..مستحيل ارجع ابد
..هسه تمام الله يريح بالچ ..نروح للمفيد؟
دزيت علامة استفهام وتعجب
شو چنه ماخذ ميانه وعلى هالعلامتين دز سطرين واكثر
..حقچ تسألين اجاوب ..اني اريدچ وشاريچ بروحي وابنچ ابني الله شاهد ..هسه لاتستعجلين خلي قرارج بعدين فكري واخذي راحتچ شهر وردي خبر
..وليش افكر والقرار محسوم
..ستنا الغالية هيج قرارات ماتنحسم بدقايق وانه مامستعجل ..انتِ ليش عجولة
..لا شنو عجولة طبيعي جاوبت لأن حاسمه امري
..لاتحسمين شي بعد وكت فكري
مارديت بگلبي اگول منين طلعلي
ورجع كتب
..اني مقدر انتِ طالعه من تجربه تحتاجين وكت بس بنفس الوكت الفرص بالنسبة الي تجيني مره لو ضاعت مايفيد الندم
اتنفست بعمق شبي هيج يسولف مسيطر
..تصبحين على خير
رديت اريد انهي الحديث كله
..وانت من اهله
غلقت الاتصال وفضولي وتفكيري خلاني انسى تعبي وارجع ابحث بصفحته وهالمره غصت بيها اكثر
موالات.. ونين.. شعر ..خدمة ومواكب والقاء سفرات للهور ابلم هو وشباب منطلقين
نسيت نفسي اگلب
اخر شي غفيت واني اسمع موال مااعرف ونين هم شنو يسموه ماادري
فزيت التليفون وگع من ايدي
عدلته وكملت نومتي وثاني يوم شطت من عرفت شروط عثمان ووصيته الدازها
حلفت لو شفته وحاجاني الا ارگع گصته بشحاطتي والعن اخلاق النهائيات
ومر اسبوعين وآني اراقب اتصالاتهم بينه وبين عمته
واراقب حسابه هم
وعثمان الجان ناسي ابنه هالفتره كلها مااعرف مسافر رجع دز عليه وكوه عليه دزيته بابا گام يحجي علينا اثنينا
وبيومها متنرفزة الابعد حد وهو دزلي رسالة استغربتها ومن استوعبتها لطمت وجهي بخوف
..شعجب هالمقطع بين المقاطع كلها انعجبتي بي؟
..شنو يامقطع
كتب
..انسي بعدين نحچي بي
وظل هيج يوميه لو بين يوم ويوم يبدي ويايه موضوع وماينهيه زيخليني بفضول مستمر بدون مااحس ولا انتبه وامل
وكل مااكو هذا اخر جواب الكي نفسي مجاوبه الى ان الشهر صار شهرين وتلاثة واربعة
بديت احس نفسي اتعلق بي من صدك والطلب اتجدد وتهديدات عثمان زادت خاص هو وزوجته الجديدة بينهم مشاكل وراحت الاهلها قرر هو يرجعني
وصرت بينا وبين عثمان
ابويه حاجاني بجدية وصخر هم
وقنعوني ان لازم اقرر وارتب حياتي بصغر محمد افضل من مايكبر ويتبهذل ويايه بتغيير مفاجئ المجرى حياته كلها
الصراحة بديت اقتنع ورنا خلتني اتعلق بي اكثر واخيرًا قررت اوافق عليه وانهي سيرة عثمان من حياتي للأبد ويبقى ابو ابني وبس
وبالمشية جابها كلها شيوخ وعسكر وضباط اخوته علگوها ومنا صخر فرحته بيه وبي واضحه
واول لقاء النا چان مختلف احساس عشته وياه بحياتي ماجربته ..هيبة حضوره الها طعم مختلف
ونظرات عيونه اسرتني العالمه بحيث الخجل النزل عليه بحياتي كلها ممار عليه
عمته رنا طايره من الفرحه اكثر حتى من فرحة امه
رتبت شعري ووخرت شالي اللبسته بالعقد وهو فات
خيم غليه بطوله باسني بجبيني وعطره مله المكان
لبسني الحلقه واني لبسته وبداخلي شي غريب چني ماعاقده قبل التوتر يقرا مليون
..تنوعيلي اشوف
رفعت عيوني اباوع
..رموشه وعيونه ماشاءالله تبارك الخالق
صاحب خشم طويل بنهاية حادة الشوارب محدده بليه ذقن
وبديت اوسع نظراتي واباوع القاطه وترتيبه
..عيونچ زرازير البراري
بكل فرحها بكل نشاط
نزلت عيوني بخجل
خله ايدي بيده
واخيرا بديت استوعب اصوات البقية وهوساتهم ووجودهم ونظراتهم النا فرحة خواتي بيه
غزالة ودموعها الماوگفت وهي تشوف العوض
عثمان ماحاول يسوي اي شي بعد عدا خباثته بتأخير حمودي من ياخذه
وبيوم اني منتظرته ورجع اتصل بيه هو بعد الدوام
جنت متوتره حس عليه
..شبيها الحبيبة شمزعلچ يبويه انتِ... بس گولي واشري عليه وشوفي لو ما طلعت ضوچتچ من بين عيونه
..لا والله بالي يم حمودي تأخر ..رحمتني من اتصلت بيه القلق اكلني اكل
..انتِ بطبيعتچ مو قلقة هيج جربتچ بس وليدچ هذا قطعة من روحچ حگچ بخوفچ عليه من شوكت هو يمهم
..من الصبح اخذوه
واني احاجيه واجاني صوت ابويه استأذنت ونزلت بخرعة من نبرة صوته خفت وگلبي اشتعل نار ماادري شلون نزلت وصدق احساسي من گال
..غيري ملابسچ بابا نلحگ ابنچ للمستشفى واگع
لاتخافين
گمت مااندل طريقي اريد اندل شلبس وقبل لااطلع اجاني صوت الصراخ من فاتن نسوان عمي وعرفت ابني مات
تعبي واحلامي وامانيي بلحظة كلشي راح
انجنيت وعقلي غاب خاص من عرفت عمه ساحگه بدون مامنتبه وراح ابني بلحظة فر من ايدي مثل الطير بلا وداع
يتبع..