بقلم نور الشمس
....
هاجر..
گعدني من نومي رسائل سراب تليفوني يطنطن
ولگيت نوره تسولف وياها انتبهت مدخلاتني وياهن بمجموعة خلصة
تركت التليفون وگمت غسلت وصحصحت ورجعت اقرا من البداية
سراب تسأل كاتبة
..وينجن امهات الذوق ..الحووب جايني ريوگه يمي جاي اجهز بي شتنصحن البس اكشخ اتمكيج لو ابين على طبيعتي
ونوره كاتبتلها لبسي فستان مريح وحلوو واتمكيجي طبعا غير مخطوبة
كتبت
.. صباح الخير بنات
ردن السلام .. وقبل لاتسأل كتبت
..سراب مادام جايج الصبح وريوك لتكشخين كشخة طلعه ومناسبات .. لبسي شي بسيط مال صباحيات يعني تراك حلوو
لو ثوب لطيف ..مكياج طوخ لتخلين ..اكتفي بكحل ومسكاره وحمره افتح لون عندج قليل منها خلي ودمجيه وي مرطب يعني كون يبين كلشي طبيعي
لأن الصبح وگعده هادئة تختلف عن السهرة او الطلعة بره البيت هو من رادج هالوقت يريدج على طبيعتج وشعرج فتحيه ولمي اطرافه بس اطلعين تموتين
..ياحبيبتي الله يخلصج من كل سوء هو اني مااعرف غير ذني الگلتيهن لو گايله اتمكيجي وسوي هيج خطوه وهيج احظرج واخلص
ضحكت
..اني اعلمچ ميرادله شي خطوات تحفظيها وملامحج تجنن
ونوره كتبت
..سراب صورو مو تنسين وبس يطلع دزي لايك تانحجي هنا .. حاليا اني بودي اراقبكم بس خاف تكولون عني فضولية وعيب
..كل هاي ومو فضوليين شبقينا اني وياج حتى الرسالة اجتنا بسكرين
ضحكن واني اكتب واطلع ملابس.. محتارة البس جبة رسمية لو عباية كتف وجواها بنطلون لو فستان طلعه مستور وشال وقررت البس الأخير بلون مناسب وترتيب بسيط خاص اني زايره مو مكان ثاني
قريت رسالة سراب ضحكت
..لچ اني هنا يمجن اتفيك الصراحة مااعرف شلون راح اطلع يم ابوي واخواني لو تاخذون حمزة واحمد ع الأقل راح يمزقوني بالتحشيش
..نور كتبت حمزة هنا اجه منكم البارحة متأخر ..واحمد مااعتقد يفوتها الكم
كتبت
..بنات من نرجع نكمل حديثنا ورايي وي نوره صوري نشوف ..اني رايحه وي عمه شهلة ازور
سراب ردت
روحي اتونسي بالعافية.. البارحه بالليل باركتلي من صخر وكتلها اني اجيج.. من ترجعون بالليل اروحلهم ان شاءالله
اريد اكمل شغلي واشوف نور تكتب واخيرا كتبت
..بخت بس اني مگابله فيحاء ترزل بيه حتى فرحة النجاح ماحسيت بيها ..امي ماعدها احتفال وفرحه مادام حمزة ماناجح نجاح تام ومأجل
وابوي واعدني بسفرة التركيا قبل القبولات
..بعد شتردين الحچي يم عموو الباقي هيج
تركتهن وكملت تبديل اجتني رسالة من صخر كاتب
..اخذنا اذن السلطان من يتصل بيج سوي نفسج مصدومة زيارة من الصبح
كتبت
..ياريت لو يتصل خاف يجي واني مبدلة ومكمله ارحع الملابس البيت ومن يگلي يلا ابدل ؟
اتصل جاوبته شو يضحك
..يا تضحك عليه
..لا... ابقي لاتغيرين .. منين خايفه گولي اتصل بيه وگال الي اتحضري
وهذا صوته طلع داير عليكم مبين.. راح انتظرج
..والله وترتني صخر مو حاله هاي
..من انتِ مرتاحه تسميني اشهل من متوترة صخر والثاني يعجبني اكثر راح اوترج على طول
..ميخالف تمووون
صوت عموو من جوه يسأل عليه ونور تكله تتحضر تريد تروح وي صخر وامه
ضربت خدي بخفه
احااا انفضحت... بس عمو المذوق من نزلت لاحاجاني ولا حرجني.. طلع وياي عادي ولاكتنا عمتي طالعه من بيتها مبوشه ماطالع منها شي ..سوه نفسه مامنتبه الها
صعدت وراها وسلمت ..وهو يسولف وي صخر بعدهم واگفين واجه فارس خطيب سراب وبيده جنطة متوسط حجمها
اتسالمو بينهم صخر اجه وعمو راح وي فارس
واني وعمتي منتظريه اجانا حركت السيارة و بس عبرنا مناطقهم عمتي رفعت البوشي وخلت بس النقاب الجواه..وبس عيونها طالعه
واشهل حاجاها..
.. يمها لو تشيليهن اثنينهن لو تخليهن اثنيهن عيونج اليشوفهن يگول شابه ويجذبن النظر اكثر واني مابيه حيل ارفض عرسان المسودن كوه مسوي روحه متغير والله هاديه مدري يمثل مالنا خلگ يشيش علينا من جديد .
ابتسمت هو غيران على امه بس ذبها بأبوه وسواها بضحكة هي هم فهمته وشالته كله
الظاهر تلبسه هناك منهم مو لأن حرام او شي لأن هي مو متبرجه اصلا
ظلينا نسولف اني وياها وتسأل عن سراب طلعتلها صور بتليفوني الهم.. وهو مركز بطريقه
عمتي تباوع مبتسمة حسيت بعيونها لمعة حزن رغم ابتسامتها تعيش بينهم غريبة كل اجوائهم مناسباتهم ماتحضرها ..هم ليش خلوو الزعل هالگد يطول
اجواء ثاني يوم العيد حلوه ولأن من الصبح رحنا ماكو ازدحام
وصلنا الكاظمية نزل السيارة بگراج وطلعنا نتمشى اجاه اتصال من علي خالاته اثنينهن بالإمام وصلن قبلنا وعلي منتظرة بره اباب القبلة
شفنا القباب تلالي من بعيد بريقها ومنظرهن يجلي الهم
لگيت نفسي ادعيله يريح باله ويمحي ماضيه المتعبه والمشاكل الي معقدته ويرتاح حتى لو مو الي المهم يرتاح ..نفضت الفكرة هذه محركة راسي وگلبي يسولف وعيوني تتأمل قبول الدعاء بدموع
الهي بجاه اهل بيت نبيك ..تخليه الي ومن نصيبي وقسمتي حبيته ..هو الحب حرام؟ مو حرام مادام مخلين حدود لهذا اطلب منك وكلي ثقة بالقبول
يارب خفف همه وريح باله وشافي جروحه واجعلني طبيب اله وهو امان الي .
نزلت عيوني لگيته يتأملني يمشي بقربي اني وعمه وعينه عليه من انتبهت شاح بنظره عني
واحنا نمشي اجو جهال بيدهم كتيبات ادعيه صغيرة انطوهن اله
..عمو اشتريهن الله يحفظلك زوجتك وامك
اخذهن منهم بدون مايحجي شي ..حاسبهم وانطاني واحد وواحد خلاهه بمحفظته
قريته
مكتوب "دعاء التاج"
مشينا مسافة انتبهتله هو هم يدعي ورافع اديه
اخذتني التفاصيل وسرقتني من كل مايحيطني
بنطلون بيجي وقميص زيتوني .. عطره الرجالي الطاغي بالمكان منطيه لمسة محتلفة ومدري ليش هيج صرت اركز وي الدعاء شغلت فكري واتعوذت من الشيطان ورجعت ادعي بنية صادقة
انتبهت عمتي نازلات دموعها وهي تدعي بصوت
..يا ابو طلبه بجاهك ياابن الرسول وحفيد البتول ماخاب من طلب الله بجاهكم ..اكرام وجاهكم عند الكريم چبير اريد طلبتي تتحقق
كلشي من هالدنيا مااريد بس هو وراحته وسعادته
شاف علي من بعيد سلم و اتقدم راحله واحنا لحكناه
سلم من بعيد وخالتي راحتله باسته
درت وجهي ادور الامانات اخلي تليفوني وجنطتي بيها مكياج مامسموح يدخل اكيد ونسيت افرغها حتى الهتفون ممنوع لازم كلها اودعها بالامانات
اتقرب عليه عيونه تتنقل العدد من الزوار وترجع الي واني عيوني عليه
..جمعي اغراضج كلهن وسلميهن ينطوج قرص بي رقم احتفظي بي وحفظي المكان اطلعين هنا خاف تضيعي من امي وخالاتي ..لتدوريهن هناك وادوخين زوري على راحتچ واطلعي هنا
حفظي هذه المكتبة وعنوانها ..هذاك المحل وعنوانه ورقم الامانات تلكيني منتظرج هنا وهنه هم
واذا سباعية صدك مراح تضيعين
باوعلي مبتسم ابتسامة خفيفة
التقت عيونا اباوع اللونهن المميز وهو هم عبالك ركز بعيوني ابتسمت وهو هم دنگ راسه ينفض بنطلونه
وگال
..يلا يمه اتوكلن
وهم طلعو من طريق الرجال
دخلنا نزور ماشاءالله عبالنا ماكو احد جاي من وكت كلها العالم عبالك جايه على نفس الفكرة ولگتها ازدحام
دخلنا الأمام زرنا ودعينا وطلعنا نريد نصلي ركعتين الوجه الله ..وخالتي مركزه بالوجوه بلكي تشوف خواتها
الحد ما اجانا الصوت من ورانا تصيح
..شهلة خيه هنا تعاي هنااا
درنا خالاته وياهم بتها بنيه شابه وخالته الصغيرة حلوه بيها هوايه شبه الخالتي مواليدها مبينه نهاية السبعينات لو ثمانين لسانهن حلوو بالسلام لاسألن عليه ولا استغربني ولا گالن شعجب وياكم ومن هالكلام
اجواء الزيارة الحلوه روحية هالمكان تشعرنا بالسكينة لو الف روج من الهم يضرب الروح هنا كلشي ينسي
اباوع الجهال تلعب براحتها حتى الاطفال منطلقة
وجوه الكبار وهم يصلون بمكانهم الخاص تشع نور ومحبه مدري ليش هنا كلشي مريح
اجت ابالي امي جنا نزور وياها ونتعنى من مكان بعيد نوصل منتهين تعب ونصحصح بحضرتهم
ماخذتني الذكريات الحلوه واجاني صوت
وحده بفرح اطش جكليت ع الكاعدين توزع وتكول
.. هاي بشارة فرحتي الله يفرحكم بمرادكم
اخذت بيدي جكليتين وگلت وحده الي ووحده اله واذا صار واجتمعنا اطش جكليتنا هنا
وارجع اكول شنو هالجرأه بطلبج هذا بهيج مكان طاهر ..واذكر نفسي هو مو حرام ..اني اتمنى وامانينا بيد ربنا ويختار النا الصح
رجعن هنه يزورن من جديد الكبار ميشبعن زيارة گمت وياهن من جديد قريب الاذان الظهر كلش قفلت واخذتني روجه عنهن دفعتني مدري وين
ظليت ادور لمحت رسل اخت علي حاجيتها اني هنا انتظرجن لو لكيتيهن تعالو واذا مالكيتي هم گليلي
انتظرتها ماكو طولت رحت ادور اني قفل الازدحام اكثر
رجعت النفس المكان ..صليت صلاة الظهر دعيت على راحتي واتأملت الكاهن بس هوايه تأخرن ..خفت محتاره شلون ارجع وين الكاهن بهالهوسة اتذكرت كلامه ووصيته
طلعت من باب الخروج مسافة طويلة الفرة ادور وين العنوان وين العنوان الگالي عليه
اباوع القرص وين بدونه مااگدر اخذ حذاءي بس رقم امانات الجنط عندي ظليت ادور احتاريت جان بيدي وين راح انشده بالي حتى تركيز ماگمت اركز
هسه اني شبيه ماطالعه قبل .. ليش هيج مرتبكه
الدنيا الظهر وحاره الكاع تجوي.. ولابسه جواريب سود خفيفة .. ماتحمي رجليه من حرارة المرمر بره اخذت الجنطة وحاولت اخذ حذاءي بدون الرقم اعتذر الولد ماقبل لأن كلشي بنظام هنا والغلط مني شلون ضيعتها وراحت من ايدي رغم حرصت حتى بصلاتي خليهتن قريب الي
لو جنطتي وياي جان ماصار بيه هيج
احس اتبهذلت وگفت اعدل نفسي واراقب العناوين
اخر شي حسيت نفسي قربت مشيت سريع شفت المكتبة طلعت تليفوني من الجنطة الحمدلله ماضاع رقمها هي هم .. توني اتصلت شفته اجاني وابن خالته واكف بفي مسافة قطعت الأتصال واتقدمت اله
جنت ابالي انتظر عمتي واكلها اريد اشتريلي حذاء نمشي اني وياها مشتري
اول ماوصلني گال
..مقبولة الزيارة ..شو بس انتِ البقية وين لاكيتوهن لا
..لكيناهن اي وكعدنا بس هنه رجعن زارن ضيعتهن ازدحام كلش جوه وكلت خاف طلعن وبس اني بقيت
جنت احرك برجليه منا ومنا
.. ليش حافية
انحرجت وضميت رجليه وحده بوحده
..ضيعت الرقم مالهن ورفض يسلمها الي
ابتسم
..لا ضيعتيها ؟...بالج وين
ودي اكله بالي يمك بس عيب ..اتفاجأت نزع الحذاء انطانياه
..البسي حاره عليج
..لا هسه اشتري والله
..لبسي وتعاي نشتري بين ميطلعون هنه هم خاف يدورن عليچ
لبست وعيني على رجلينه راح ينلسعن من وراي
يمشي على كيف واني اريد اسبقه من احراجي وخوفي عليه
..احتركن رجليك
..ماعليهن شي
حاجه علي گله خلي عينك ع الطريق خاف يطلعن
هسه نجي
حذاءه جبيره گمت اجرخ بيها
وهو يمشي گدامي اخذت فوني اصور رجلية
اول ماطلعت صورت نفسي بنفس هالصورة كاشخه والنهاية هاي
انتبهتله يباوعلي يضحك
اخذتله صورة حافي يمشي گدامي ومايدري صورته
دخلنا محل احذية اختاريت وحده گال اختاري شي يعجبج بعد المحل بي انواع الجنط والأحذية ..كتله هذا هو مااريد غير شي
اجيت ادفع خزرني واشرلي ارجع وهو وحده يحاسب
هاي التصرفات الرجولية الأحبها مو الغاية طمع بس احس بصاحبها عنده مواقف تبين غيرته ومعدنه الاصيل .. المواقف هذه تفتحله گلبي اكثر
لبستها وانطيته مالته لبسها وطلعنا نمشي لگيناهن راجعات وعمتي مرعوبة عليه وخطيه متأخرات يدورن لأن رسل كايلتلهن ماتطلع كالت انتظرجن هنا
من شافتني ارتاحت وظليت احجيلهن وين دورتهن وليش طلعت اتذكرت وصية صخر .
اخذنا المحل مرطبات طلب عصاير ع عددنا وهو وعلي گعدو ع جهه علي هم يشرب عصير ..وهو بس مي اخذ مندمجين يسولفون
وامه هم حاجت عمتي
بموضوع هم بادين بيه والظاهر خطوبة غزل
عمتي تكلها ترى سليمان تعبان بتربيتهن وشايف بيهن لوعات واتحمل اشكال حجي لعيونهن الياخذهن كون يحسب هيج حساب ..وعلي معدل ماينخاف عليها وياه بس انتِ تعرفين وضع عينها ومن ناحية الشكل بنية مامبين عليها جنها العافية قليل كلش مبينه
وامه تگلها
..هو رايدها ويعرف كل وضعها وماصدگنا الله هداه
اذا مقتنع هو اني شريد.. اريد سعادتهم بس .
هو بيته وحده مايريد هوستنا تعرفينا عايلة وهي طالبة ويكول معدلها عالي ياكلون يشربون ينامون يكعدون بكيفهم واني فوك منهم لو رادو واحتاجو شي..لو اكله يحبها اوديلهم و بعيني هو ومريته
..انتِ طيبة ام علاوي وادري بيچ ماتقصرين وهي بنيتي واخت صخر من اگول اخته صدگ اخته
هم شافونا خلصنا طلعو ..ام علي كالت العمتي تعالو ويانا غداكم جاهز وينتظرونج الولد والبنات هناك وعلي هم كل الصخر متعودين بالعيد تمرونا
وبالنسبة الشروطك الذاك الموضوع اني اعرف الي تريده وهم حاضر
ماقبل صخر اتشكر منهم وافترقنا
حسيت لأن اني وياهم رفض صعدنا بالسيارة
باوعلي
..نروح المطعم.. جعتي ؟
اعرفه مايحب يوكف ابابهن مو بس مياكل رفضت
..لا والله ابد مااريد مااشتهي
..صار الظهر ماتشتهين شنو ؟..اكيد متي من الجوع تاكلين ويانا من لفاتي المتواضعة؟
..لفاتك انت متواضعه! اطيب اكل اكلته من ايدك
حجيته منطلقة بعدين استوعبت وخففت هذا الحماس وبلعت الساني من شفت عمتي مبتسمة وهي تباوع علينا ..وطلعت من جوه الكشن بالصدر علاگة مثل الفلين بداخلها حافظات اكل وجواهم بطاله ثلج
فتحتهن لفات شاورمة دجاج .ولفات كباب عروگ وببسي وميرندا
وهو اخذ بطل شربت نومي اسود مجرش طلعه وصبلي منه والعمتي هم
چان منعش الدرجة وي اللفات رغم باردات بس كلش طيب
اكلنا براحتنا والسيارة براحته يسوقها
عندي بجنطتي كلينس مرطب طلعت الهم هم
واحس هاللحظات البينهم تسوالها الف گعدة بمطعم وهو بعيد لو متنرفز من وجوده بي لأن سمعت ابد ميحب يدخلهن اصلا
جوو السيارة عكس الأجواء البرة باردة حيل ومنعشة بحيث روحي انتعشت مو بس جسمي .. كملنا وسيارته انملت ريحة اكل فتح الجام الهوا حار بس غير هواها نزل الجام وخله معطر ورجع شغل التبريد
حاجاني موجهلي الكلام .. ملامحه جدية وعاقد حواجبه مركز بالطريق
..همزين گعدتي يمنا فتره وعرفتيني تدرين ماشي عليه سمعة بالدوام اني بخيل ..يحجوها بشقى بس اعرف قاصديها ..لأن مااشاركهم بأكل ولا اكل منهم يظنون خوف من العزايم اعزل روحي
..انت وبخيل؟ ..ميعرفوك اكيد
..اي ميعرفون شمدريهم ..وانتِ عرفتيني لو لا
..ابتسمت وعيوني احس فضحني مااريد اباوعله ولا العمتي خليتها ع الجام وگلت
..اي اعرفك ..نفسك طيبة مبين وكريم هواي هم
..عشاچ يجيج اليوم.. غداج هذا مامحسوب ومدام طلعتي وياي تجيج وجبه غير
..لا والله هذه كافي
سكت
ووصلنا تعبانين من الطريق والحر
نزلت اباب عمي ابراهيم
صوت عمتي فيحاء عالي ادردم على نور ليش تريد تقدم تقنية طبية هي رايده قسم تخدير
عمتي انقهرت لأن معدل حمزة هسه يمكنه من دخول الكلية عسكرية وبهذا الدرس خاف ينزل
وعمي اصلا رافض وهو يحاول يقنع عمي عليه وتريد نور تروح تربية يعني متوتره والاجواء ولا عبالك فرحه ونجاح
وي دخلتي سمعتها تگب النور ماكو احسن من التربية للبنية ..وابن خالج يكول معلمة مدرسة احسن
ونور بصياح ردت
..وقندرة شعليه
انصدمت گامت امها ضربتها بقوة ايدها ونور اخذت تليفونها وركضت تخابر عمي
مااعرف شسوي اعرف اذا حجيت حجاية وي امها تگب عليه ومالي خلگ نجرحني بكلامها
ونور قفلت بابها صعدت
بين مابدلت ملابسي راسلت نور احاجيها تهدأ وتخلي امها تهدأ وكلشي يمر مثل متريد احاول اهون عليها
واسمع صوت عمي هز البيت
نزلت اركض وهو انجن شلون تضرب نور
احتار شنو يحجي خفت من عصبيته
..ابن خالها منو انتِ ليش مصرة اهينچ واهين اهلچ بهذه التصرفات ..شو متستحين اشايفتني وهيج تحاجين بتي ابيتي وغيري يتحكم بيها
سديت اذاني من الفشار وظليت ع الدرج لا اكدر انسحب شافوني ولا اگدر انزل خفت ونور نزلت تبچي
..خلصني من موضوع ابن خالي وگوه لازكته الي بكل موضوع تهدد بيه لا والله اعوف البيت واروح الصخر وهالمره ماارجع ابقى يمهم هي تريد تهججني يلا ترتاح عبالك اني مو بتها
.. هيج مرتاحه من بنتج نفرتچ ..لچ انتِ شناقصچ وتنكدين حياة اولادچ ارد افهم ..اني مااخذ الأمور بجدية كلها ومخليچ براحتچ تهوسين اكول حركة بگلبها اطلعها وتخلص ..بس البنات لا اكسر رجلج والله واسگطج واشمرج على اهلچ ..كل مااتوب واكول لاتمد ايدك على مره لا تغلط ولدك يكرهوك بس انتِ تجبريني
ردت بقهر وصياح اكثر من الاول
..ابن خالها يريدها ..ليش من حمزة راد بت خاله الثاني اني مارضيت وانت تشجعه ..ليش ابن اخوي هذا ماتريده لأن هو وامه زينين وياي
..انتِ عاقلة ذاك ابنج رايدها ابنج ..وهذا مابينه وبين بنتج شي ويتحكم بيها من خلالج وبنتچ رافضته كارهته استوعبي ..بعدين بنت اخوج مو هسه فرحانة بيها وتمشي وتصيحين جنتي وابني رايدها شفتيني خاطبله بدون رضاج فرحت شفتج مقتنعة بالجديد
..طبعا افرح لأن خفت تكربس براسه بنت عاصم هاي اهون عليه
فهيت مصدومة وعمي صاح
..فيحاء الچ دقيقتين تلمين بيها هدومچ وگدامي البيت اهلج دقيقتين اطلعين برجلج وراها يحملونچ على سدية
تريد تفوت الغرفتها وتقفل الباب خله ايده وطلعها لازمها بيده
..بدون ملابس ماتحتاجين مناك اشتري
لاكاه حمزة مافاهم شي خطيه فكها من ايده يتوسل
..الخاطري يابه فدوه اروحلك لاطلعها والله عيب بهالعمر ..بالتفاهم احجو
عمي عصبي گله اخذها الذاك البيت مااريد اشوفها هنا
اخذها وراح وهي تحجي وكل شويه مخلي ايده على حلكها
تكله ابوك مايريد نور تتزوج انسان رايدها
يريدها توكع بواحد مثله يتحسر ع ذيال غيرها ويضحك عليها بسوالفه وفلوسه
ابراهيم مخلي الزواجات الزينة البنات رزق فيحاء شنو
كل شويه يسكتها توصل للباب وترجع تكمل
صاح
..امشي ولي لچ مو نور مثلچ السانچ يوصل اذانچ وماتنحب ..انتِ ماتنجرعين لو ماگلبي ميت اجرعچ انوب اخوانچ تردين انطيهم بنية؟
حسيت نور ارتاحت رغم المشكلة الصارت
واني كلمتها تحفر بگلبي حفر صعدت شبعت بچي
فتحت الحظر عن امي ورسلتلها جريدة من العتب
وچان ردها بارد حيل
كاتبتلي شبيچ ماما مو زين من رحتي وضمنتي حقچ
المسافات ماتبعدنا گلبي يمچ
رجعت حظرتها
گلبچ يمي شنو تدرين شجاي يصير بيه
بقيت مكتأبه وميته بجي رادني عمو انزل مرتين اتظاهرت بالنوم حتى رسائل سراب ونور ماقريتها ولا شفت الصور الاخذناها والونسة طلعت من عيني
الحد المغرب مانزلت
رن تليفوني اتصال من صخر
الغصة ابلعومي وكوه فتحت خط
..نايمة ؟ لو مريضة شبيچ
..لا لا نايمه چنت
.. نزلي اذا بغرفتچ دزيتلج بيد ياسر عشاچ
..هاي صدگ سويتها ليش هالتعب
..ماكو تعب ادللي
نزلت لگيت عمو ونور بالمطبخ يگلي هو وياها بيض بعروگ
من شافني گال
..ياهلا بهجورة زعلانه عليه عموو ..اذا نور هانت عليه انتِ تهونين اني لا عم ولا بمقام عم اني اب الچ واي شخص يطاول عليچ ماله مكان بهالبيت البيت بيتج وكلنا خطار
ابتسمت نوره
..ترى اني حالي حالج وحتى مبسوطه تزعلين عليه ليش ولو حقج من وراي اجتج مشكلة ومغثة مامحسبتلها
..لا والله ابد مازعلانه لا عليج ولا على عمو بس ضايجه ع روحي وعليكم هم احس المشاكل اني سبب بيها
حجيت اخر كلمة ودمعت عيوني
حضنتني وعمي رجع يحجي شكد هو مستعد يسوي كلشي الراحتي وابد لتفكرين مادامني عايش
بعدنا نحجي وفات ياسر بيده صينية مشكل مشاوي وسفطة خبز حار گال
..هذا العشه صخر دزه يگول النور وهاجر
ابتسم عمي مامقتنع واخذ تليفونه واتصل بيه اشر النور اطفي الطباخ وفتح حاكيه يسولف وياه وهو يطرگ بالبيض ويدمجه وي الكباب عروگ
..صاير كريم ماعرفتك
وبسرعة رد صخر
..گلت ياولد عيب اتعلم الكرم من ابوك صار يومين اقنع نفسي اتعلم منك خصلة غير الهجع والردح ..اگول اتذكر مامعقولة سنين وي ابوك ماشفت منه بس رفگة الطرب والچوبي والخشاب
..طاح حظك كل مااريد انسى ذيج الاجواء تذكرني
..بعد بنفسك ابو البراهم موو
..اي والله ليش الجذب بعد ..اگلك ماگلت
..اكلك محلف عليه بس الهن لو ينكال منه
..لا ليش ينكال بس حضرلك حبوب بوسكوبان لو كولونا اي حبوب تخفف تشنجات والم البطن
..ناقص مو بيدك
..مصلصل اني
..مصلصل الابوك من اشتعل ابوك شگد تلاهد
ضحك واحنا نضحك على ضحكهم
سلم عليه جد عبالك مكالمتهم غزل جانت
مدينا سفرة صبينا الأكل
الأكل كلش طيب بس مالي نفس بي قليل اكلت
لليل اجت بطة وتحلف تكول
.. امي متندمه حجت هيج وسمعتج تگول البنية شعليها بقهرتي من ابراهيم وبنته
..هي ضايجه لأن سمعتني ..بس خايفه صدك وحقها اني زعزعت استقراركم بس والله حلفيلها نيابه عني زواج من حمزة مااتزوج والله لو موتي بي خل تأمن من هالجانب
مرت الايام وعدت عشر ايام وعمي يمنا وبعد من ذاك اليوم حتى رسالة مارسلت الصخر وهو مايدري عن الصار متأكده لو يعرف يتحجج بالاتصال و يسأل
بيوم بالليل رتبت البيت وي نوره
واجت بالليل فيحاء وحمزة وياها واحمد يقنعون عمي برجعتها وتعتذر منه عن الكالته بحقي وقسمت بعد ماتضغط على نوره باي شي يخص ابن اخوها والارتباط بي
لأن الظاهر اخوانها ذولاك هم ماقابلين بحجيها هم
اني صعدت مااعرف شنو الدار بينهم بعدين بس فضلت ماانزل بعد ومااختلط بينهم ابد
وظليت ع التليفون اكثر وقتي بين صديقاتي ورشا وعمه شهلة
وبيوم گعدت الصبح افتح تليفوني اشوف الوقت
لگيت صورة الأبن رشا دازته الي جايبه الفجر
اتصلت بيها اباركلها وكالت بالليل حاسه بألم واخذوني عثمان وريمة وعزام ومخليه جهالها يم غزالة
وحجتلي عن خطوبة غزالة سويت نفسي ماادري وفهمت بس اطيب رشا يسوون عقد القران
اخذني الوقت احجي وياها
لگيت عمه شهلة متصلة جاوبتها رادتني اروح يمها وعزمتني ع العشا
اتصلت بعمي بلغته وخليت ياسر يوصلني الهم بس بس باب بيتهم الجبير بينا وبينهم مع هذا ماحبيت اطلع وحدي
لكيت فيحاء بالمطبخ بدون مااحاجيها طلعت
وصاحت عليه
..تعاي لچ وين طالعه بدون ماتحجين
فتحت الباب صخر بوجهي
عاگد حاجبه يسمعها رجعت صاحت بصوت اعلى من وره الباب صاح عليها
..صوووووتچ وفوتي البيتچ يلا شنو هالصوت
خفت تعلك من وراي
رجعتلها حاجيتها
..بلغت عمو ماطالعه وحدي
ماانتظرت ردها وطلعت بس جانن عيونها نار تريد تحجي ولو حجت ماتسكت بعد اشرتلي بيدها بمعنى بسيطة
طلعت وياه بس اعصابي ترجف
گال وين تردين انتِ طبگت فچي بقوة مااريد ابچي كل فشل الدنيا بيه ياسر گله الكم
بس دخلنا بابهم وياسر رجع
گال
..شبيها وياچ
اتنفست بقوة اهدأ نفسي وجاوبت واتي اتحاشا نظرة عينه
..مابلغتها اريد اطلع اكتفيت ابلاغي العمي وهذا غلط مني عبالها وحدي طالعه
..وين اطلعين انتِ يرادلها صياح ؟
عمتي استقبلتني بضحكته وترحيبها ابتسمت الها بتعب ودي احضنها واشكيلها بس صعبة والله
گعدنا وسكتت وهو ظل يفتر
حاجته عمتي
..روح اسبح يمه ملابسك جاهزة
اشرلها وظل يفتر انتبهتله مترب چان بالبستان الظاهر
شعره مخربط وصاير املح وحتى رموشه بيهن تراب ملابسه شكله يجذب اكثر
نزلت عيني ودي اغم روحي اني بياحال صدگ جذب هاجر
رجع حاجاني
..ابقي هنا اليوم يجي ابراهيم من السفر ونتفاهم
..لا اروح احسن
اتصل بنور وگلها
..تعاي يمنا اليوم انتِ وسراب ارد اشوفجن
مااعرف شكالت
گلها اني اخلي حمزة يجيبج معليج
راح يسبح وعمتي تسأل شنو اخباري احوالي بجيت
ماادري منين ابدأ ماكدرت احجي كتلها بعدين ومسحت دموعي وكمت اغسل گبل طلعته
اجت نوره وشويه واجت سراب وبطة
اتعشينا وبعد العشا گال اتحضرن اخذجن الرشا
رحنا الرشا وعمتي شهلة ويانا لكيناها وحدها
عمي يم جدي مريض
تليفوني ماانتبهت عليه لكيت عمي هوايه متصل ومن حاجيته طلعت امي مخابرته معاركته بنفس الحجج انتو غيرتوها عليه وماتعرفني الا تسممني ماتدري شكد اشتاقلها وتغثني من تنكر تعبي وتضحيتي
حجالي كلشي واني اسمع بعدين گال
..بابا اني ادري جاي تضايقين ومن باجر كلشي يتغير لاتهتمين
ماكدرت احجي اكثر واسأل كاعدات يمي مااخذ راحتي بالكلام
سلم ونهى الاتصال
عيني على اشهل ياخذ صور
لعبدالله ابن رشا وكل صورة يتاملها بفرح
وهي حيل فرحانه حسيت غيرت جوو يمهم اني والبنات
رجعنا بعد ساعة نويت ارجع للبيت وصخر صاح لا يمنا البنات كلجن ودار ع سراب كلها
..علمودج حاجيت اثنين ابوج وفارس
اجتمعنا خلصناها ضحك وسوالف
رجعت للبيت ثاني يوم عمي اتصل بيه اتفاجأت فيحاء ماكو دازها الاهلها مااعرف ليش بس نوره تعرف وماحجتلي
وصار عرس سراب وعمي منع اي واحد من ولده يجيبها وحتى رزق كلها رجلج احشها اذا صرتي حنينة ورحتي جبتيها
وهنا كثرت الأسئلة عليها ولكيت ابيت عمهم الحجي اشكال عني
خاص بعد مااتمرض جدي وگمت اروحلهم يوم بعد يوم احس نفسي على اهلي اغرب اذا عمامي وزوجاتهم عدا رشا واذا امي وخوالي
وشگد ماتلف بيه الدنيا ترجع تلفني الشهلة وابنها خاص من عرفت هو مخابر عمي عليها شلون تصيح عليه بطلعتي وشايفها تأشرلي بأيدها وداير بينهم حديث طويل وكلام قوي
عمي ماقبل هالمره اطلع من بيته ابد كال الكل يطلع وانتِ مااطلعين بس ظل بين يوم ويوم ندور ع بيته نتعشه لو نتغده سوه
ورجع الدوام ورجعت طرقنا تلاگت يومية اكعد گبل رنة المنبه من شوگي اله
وصرت اسمع اغنية يكيف اشرح لك احساسي بصوت المهندس بدون مااطلبها
وبالرجعة يشغل اغنية وشلون مغليك وانت الذي علمني حبك
احس ارد ابجي واني اسمعها واوصل مرحلة ابذل كل جهدي حتى اخفي تعابير وجهي بسماعها ويختم الطريق بليل البنفسج
حجينا قل ومشاعرنا زادت ومااعرف الطريق وين يودينا ووين يوگف بيه مرسى العمر
يتبع ..