بقلم نور الشمس
هاجر...
چنت منتظرته على نار لأن اشتاقيتله مامعودني مااشوفه كل هالساعات اليوم ابد ماگعدنا من الدوام للنوم للبستان الولد عمه وعمه گلت انتظره واشوفه
وهم ردت احجيله عن اعراض عمتي الماتحجيهن اله بسؤاله المتكرر الها
ومن شفته اعصابه توقعت عثمان مسوي شي لو رافض يطلگ بس الي صار غير لأول مره اترزل منه
بعد مافات للبيت صاحني بالغرفة ملامحه زايدة حدة وفكة يريد يطگ گد ماضاغط عليه عاقد حواجبه ونظرات عيونه تخوف اول مره اشوفه هيج عصبي ووجهه ينطيني الف انذار
ظليت واگفه مااعرف شلون اتصرف اسأل لو اصبر اراجع بذاكرتي شنو سويت اني
هو متعصب مني لو عصبي وجاي يشكيلي ويريد اواسيه اريد احجي توني ارد اگله شصاير وياك حبيبي
بنتره صاح
..مامسموحلچ تتصرفين من راسچ هاااجر!
اخر مره تسويها.. من انطيتي رقمي الأمج المفروض تفهميها وتبلغيني قبل كلشي .
المفروض تگليلها هو ماچان راضي على هذه القطيعة بينا والبعد.. ولا چان قابل يصير زواج بدون حضورها
بس ماحبيت اجبرچ
مو اني المااعرف بالأصول ولا وحده مثل امچ تجي هسه تريد تعلمني وتطاول على امي وتربيتها
ماعاااش ولايعيش الي يجيب سيرة امي بعاطل
والناس الماشيه وراهم امچ وتسولفلي حجيهم عني فهميها بنعال مااشتريهم
والاظفر من امي مايوصلون
وخل تعرف اوادمها وتبطل تتصرف بغباء عيب بهالعمر ماعدها منطق
هز ايده باستهزاء وكمل كلامه
..بس هي الماتعرف بتها الربتها وتصدك الكلام اليوصلها اعتب عليها اني
الدمعة لمعت بعيني وبراسي الف فكرة واكثر فكرة سيطرت عليه مالازم ابچي ..مااريد اكسر خاطره بس الكلام جرحني.. هو يجرح لو اني متحسسه لو شنو
زين امي شگايله
فكي صار يرجف لميت شفايفي الداخل فمي ارد اسيطر ونصيت راسي وعيوني تراقبه
بدا يمسح وجهه ويستغفر اباوعله ماچان يباوعلي نهائيا حسيته كارهني بهالساعة كلي مو بس الموقف كارهه
بالگوه گدرت ابلع الغصة وبصوت مخنوگ حجيت
..اني اسفة ماادري يصير كلام زايد ماجان هذا ظني من انطيتها الرقم ..والكلام العلى عمتي احسبه عليه اعتذر منك ومنها
حجيت اخر كلمة وشهگت بقوة دموعي مطرن
طلعت ركض اريد اي مكان بعيد عنه عيني صارت ع الحمام فتت وقفلت الباب عليه
واراجع كلامي وياها اني شحجيت عنه حتى تعاتبه وتحجي عليه وعلى عمتي والله ماحجيت الا الخير مو المفروض تفرحلي وتتصرف بصالحي
فتحت المي وصرت ابچي وكل المواقف الكتمت بيهن دموعي وغصيت بعبراتي ومااخذن مساحتهن طلعن
امي ليش هيج اتصرفت ... يمكن حقها تزعل عليه لأن مابلغتها بس چنت زعلانه منها تنشر طبيعي هي وزوجها وحفلة ختان المولودها بأول اسبوع الولادتها واني چنت يومية اتنقل من بيت البيت ضغط نفسي عليه مو طبيعي لو ماصخر واهله امه وابوه والبنات چان انجنيت وسويت بنفسي شي
الي صارلي مو شويه من بنيه مدللة عند امها وواكفة الها وحاميتها من الكل
اتحولت حياتي بين ليلة ويوم ..وماحست بغلطها ولا عالجته وكل تواصل وياها تزيد بقهري وتسمعني كلام يغث وكأني اني الهجرتها بأرادتي
وصح عاندت من نصحني ابلغها بالزواج گتله راح تسمع من الي يوصلولها اخباري
بچيت والله ماهان عليه يحجي هيج عليها احس سچين بگلبي كلامه عنها قهرني حيل امي مو هينه عليه هايه امي سنين وگفتلي كل كلمة مو حلوه يحجوها بحقي تردها وتعلمني شلون اخذ حقي واتصرف بتصرف يريحني واخذ بي حقي ومااضيعه بانفعال مو صحيح ليش هي منفعله وانطت عليه وعليها لزمه مو جانت تگول من الذكاء نتصرف بترتيب
ليش تخليني بموقف انربط بي الساني مااگدر ارده كرهت الوضع كله
شوكت ارتاح ياربي تعبت والله من هذا التشتت ومن علاقتي بأمي الي انخربت فجأه واحس اذا بقت هيج غلط واكبر غلط
صوت الباب اندگت وصوته اجاني
..هاجر ..وينچ ؟ حابسه نفسچ بالحمام ليش؟
شو طلعيلي
مو احجي وياچ
من صوته بعده عصبي ويمكن زايد
فتحت الباب ناگعه بملابسي وشعري ملفوف ويقطر
..مابيه شي ردت اسبح
..ابقي مكانچ اني اجيج
رجع للغرفه جايب منشف وملابس
دفعني بيده مفوتني وفايت وياي قلد عليه واحسه الهسه مقهور ويريد يسوي نفسه يضحك
..مابيه شي اريد اسبح ..تسبح بهدومها وشعرها ملفوف ..انتِ مو قبل لا اطلع سبحتي؟
..ليش السبح هم صار حرام اذا عدناه
ذب ملابسي المبلله ونشف شعري ولفيت المنشفه ع جسمي واني اجرجر المنشف من ايده وهو مو مهتم عبالك ولا شايف رد فعل مني
..طلعي گدامي يلا خل نسولف
..ماعندي سوالف والله اعتذرت منك واعتذر من جديد وخلص احسبها عليه
مسحت دموعي ووگعن من جديد مسحهن بيده وباسني
..اني ضايج من الموقف مو منچ ليش اتحسستي
اريد احجي ومخنوگه عبراتي اشرتله وسكتت
اخذني من ايدي الغرفتي
..خلص لاتحجين شي ختولي السالفة ..اني لو حاجيه عليه وبس مااهتم بس عندي قائمة سودة مخليها الكل واحد يندگ بأمي مااتقبله لو حياتي تصير بيده وامچ دخلت القائمة بدخولية قوية هم
سكتت ومدنگه راسي مااعرف شحجي افكار هوايه اداخلت بعقلي
رجع سأل
..اني مانعچ منها ؟..مو على طول احاچيچ وافهمچ قطيعتچ وياها غلط وحقها عليج اكثر من ابوچ وكتلج مااريد يجي يوم وتتندمين على هذا البعد
..صح ..اني ماحجيت شي كل الي گلته صح
..شخبلها عليه امچ ؟ شحجت وياج هي
اتحمحمت وماردت ازيدها عليه واتفشل اكثر اني مانسيت كلمتها من تگلي منتظره تتورطين وتحبلين وتكولين تعالي ستريني
..ماحجت بس انصدمت من عرفت بزواجي وعادي اتقبلت وباركتلي بعدها وكل ظني تريد تتعرف وتوصيك عليه
..اصلا مااستوعبت منها ارد افهم صوتها قلقني والحجي هسه اسمعجياه
طلع تلفونه وسمعني المكالمه تليفونه مسجلها امي بدون سلام سائلته
..انت صخر ابن ابراهيم ؟
گايلها
..نعم منو وياي اتفضلي
راده بعصبيه
..زاد فضلك والله طلعت مؤدب الله يسلمك ..امك ماعلمتك الأصول ماگالتلك شلون الك عين تاخذ بنيه بدون متبلغ امها ...صدك لو گالو تربية مره ومختلف عنهم
وهو نازل عليها دوسة ونص وصوت اليمه يهدونه
الكلام الي مسمعياها قوي كلش بحيث صارت تتلكأ بالكلام تريده بس يسمعها واني نار بگلبي اشتعلت ليش تعرضني وتعرض نفسها الهيج موقف ليش مافهمت منه
ليش ماسمعت مني من كتلها اني تهت بدونهم وهم العوضوني شيصير لو معاتبته وبنفس الوقت متشكره منه على وگفته الي وعلى اهتمامه وموصيته عليه هم
متت واني اسمع شلون يذكرها بيه وشلوون اتخلت هي فجأه وكايلها منين اجاج هالحنان هسه واتذكرتي عندچ بنيه عندج احساس ام انتِ وتطاولين ع الامهات ترحين فدوه الأظفر أمي
وقفل التليفون بوجهه
اريد احاجي افهمه مااگدر قفلت العبره خنگتني
گتله
..والله من خذت الرقم ماجانت هيج عصبية
ارد اشرحله بعد ماگدرت اختنگت موقف بحياتي كلها مصاير وياي الخنگة الحسيت بيها كتمت انفاسي الدرجة احس گلبي انعصر عصر واتملخ
حضني الصدره
..يا يابه انهضمت غاليتي
طلعت كل عبره بصدري وشكو شي كاتمته
..اني الخلل بيه مو بيكم كلكم
..كلكم؟ اني هم مخليتني وياها زعلتي عليه شنو ترى اني اتخلى عن الدنيا كلها وعنچ مااتخلى خاف عبالج هالموقف يأثر عليچ ابد والله
گمت اشهگ اگطع الكلام وارجع اكمله
..انت هم لو ماالله سبحانه وگفلي چان اتخليت ورجعتني ..تتذكر العتب الي يومية تذكرني بي وتگلي احجيه اسمعه ولتأجلين اكثر راح احجيه
انتو كلكم عدكم اسهل طريق الكم تتخلون عني اني شي زايد بحياة الكل بس هيج فارضه نفسي عليكم وع الدنيا ومصدگه نفسي وامشيتها
انت بداية زواجنا اني سمعتك تحجي العمة شهلة وتگلها مخليلي وقت وفتره معينه وبعدها اذا مارهمت ننفصل
هم خليت خيار الانفصال مطروح يمك هم نويت تتخلى هم مافكرت بيه واني يوميه اتنقل من بيت البيت كلكم تتخلون كلكم
حضني الصدره اكثر ويمسح ع راسي رفع وجهي من صدره مسح دموعي بأبهامه وشهگاتي زادت ماقلت مدري شجاني انفجرت
..ياحبيبتي كل هذا بگلبچ ..اني هم طگه ونص ترى منو گلج اني عاقل واسولف سوالف عاقلين ..والله ماادري سامعتني چان مانمت ليلة وهالكلمات يحفرن بگلبچ ..بس حچيتها بوقت چانت كل الابواب مقفولة بوجهي عدا باب رحمته والحمدلله الفضل لله والچ من بعده كل ازمة انتهت وانتِ هنا مزروعة بگلبي وعقلي حتى هنه مامختلفات بحبچ
..والله بيومها شبعت بچي وادعي الليل كله ماگدرت اهضم فكرة نفترق اني روحي اتعلگت بيك وصرت انت اهلي كلهم...و امي والله ماجانت هيج هي واصللها شي خطأ متأكده
..اي مفهميها اني منبوذ وتربية امي وطمعان بيج وابوي هم انطاج الي حتى يستحوذ على املاكج
هي تعرف ابويه شنو عنده من خير تعرف تجارته شنو
تعرف بس بتركيا هسه عنده اكثر من فرع لازمهن حسام واحمد لازم فرع هنا وهو فرع تعرف يتمنى مني كلمة اطلب اشاركه بشغله لو اخذ منه املاك مراح يعارض ابد
اني من ابوي الهو ابوي مااخذ اخذ منچ ومن فلوسج
عندي راتبي وكاعي من جدي وخيرات الزرع والمحاصيل كلهن الي منهن نسبة
وفلوسج اصلا ابويه من قبل ايام حاجاني يريد يخليج شريكة وياه براس مال الج ارباح ونسبة وگتله منك الها اتفقو بينكم ماادخل تقبل ترضا انت عمها وهي حره بمالها
اني شايف اشكال ومار عليه اشكال واقسى شعور عايشه ومتخطيه والفلوس الماتعبان بيهن لا احسبهن ولا اشوفهن بعيني
..اني هم والله مااريد فلوس اريد ارتاح وبس
ابتعدت عنه مسحت دموعي وعدلت شعري
قربني عليه اكثر وباسني بخشمي
..ليش مامرتاحه وياي
..شلون مامرتاحه بس الصار اليوم موتني والله ماعندي طاقة للمشاكل..وعليك الله انت مو ماتقبل شخص يحجي ع عمتي كدامك وهي فعلا تستاهل بس والله امي هم مااتحمل اسمعك هيج تحجي عنها
بچيت وگعدت مهضومه حيل وبگلبي نار ماجاي تطفى ليش وصلنا لهنا اني وياها ليش
هدوء وبس صوت شهگتي مسموع
اقترب مني وصار مقابيلي گعد ورفع راسي بيده
..زعلانه مني والله بهايه حقچ ..هذا هو وعد مااقلل منها گدامج ابد ولا وراج هم احترام الچ ..بس فهميها واصليها وخل تعرف الحقيقة منچ ولازم تقتنع وتترك مستنقع عمامچ ترى طفحت بيه اخاف اوصل مرحلة اطلع بيهم القضى والمضى والله
لزمت اديه بخوف لأن ماعنده مانع يسويها وياهم هوايه جمع الهم كلش كافي قهرة رشا بگلبه ميت عليها ومقهور اكثر منها يمكن
..هذا هو والله خيولون كلهم خيولون اهدأ انت ..امي افهمها وظلت بكيفها عاد تفهم ماتفهم براحتها
..تعاي بحضني ..شرايج اعالج رگبتچ
ضحكت
..مابيها شي
..زين چتفچ ؟
..شبي كلشي مابي
..ظهرچ
غمزلي وضحكت بصوت عالي من شالني من الگاع للسرير اخذني الحضنه
...وزعلان الاسمر مايكلي مرحبا
..الف مرحبا اگدر ماكولها اني
ضحك وقربني اله
..يامراحب شلون نويتلا انتِ انعل ابوهم كلهم وحتى ابوي وياهم وعلى گولتچ خيوولون
الصبح گعد من الفجر موعد مراجعة عمتي اليوم موعدها بالعشره الصبح بس گعدت وياه اعرفه يريد يحضر اليومه
حاجيته
..ترى اعراض عمتي البارحه حجتهن الي ماحاجيتهن لا الك ولا للطبيب بديت احجيله عگد حاجبه
..وليش ماتحجيلي
..ماتريد تقلقك اكيد والطبيب مااعرف تگول انسى يمه
شوفيها گعدت بين مااسبح واجيج
رحتلها عمتي نايمه حاولت اكعدها تتوضى وتصلي مثل عادتها ماقبلت تكعد تعبانه
سبح واتوضر وصلى وكل ظنه گعدت من كمل
اجه شافها بعدهي قرب عليها وهو يرتب بشعره
..يمه ...شهلة گعدي حبيبتي صلي واتريكي ورجعي ناميلج ساعة ساعاين ورانا مراجعه الصبح لازم من وكت نحجز سره
فتحت عيونها بصعوبه ورجعت غمضت
..ابراهيم شتريد خليني هيج مرتاحه
باوعلي يريد يتأكد سمعها هيچ حجت لو مشتبه واني بنفس النظره باوعتله
ورجع ينبهه
..شهلة المزيونه .. ياابراهيم شجابه على بالج زاير طيوفچ اليوم ..خلي يطير شنو جايبته على السانچ ..ابنچ انه ابراهيم شنو
چان يضحك مستبعد اي خطر
لح عليها تگعد ورجعت حجت
..خليني انام كافي امي عليه الا تگعدني من وكت مايوم نمت براحتي
مد ايده عليها طفر من مكانه احتار
..امي مصخنه نار وجاي تهذي ..گعديها هاجر بين ماابدل مااخليها هسه اطلع بيها للمستشفى ومناك طبيبها يداوم هناك موعدها وياه بالعشرة بس ماراح ابقى هالگد
لزمتها تچوي
..عمه گعدي فدوه اروحلج شجاج ..هزيتها كوه كعدت وحتى من گعدت تهذي
وكل شويه تصيح بأسم عمي ابراهيم لو تسولف وكأنما وي امها
اتخبل صخر واخذها والجو بعده توه كاشف
داخل بيها مشتشفى كال منطيها علاج خافض حراره وطالبين الها تحاليل جدد وطبيبها على جيه والموجودين هنا ممقصرين صخر معتمد على مهيب هم يداوم هنا ومعارفه ممقصرين
گال راح يجيج احمد انطيه كل علاجها وفحوصاتها من الخبصة عفتهن
حضرتهن وشويه واجاني احمد اخذهن وراح
ظليت على نار وماردت اقلق الكل
واني قلقه الضحى اتصلت عليه امي
حاجيتها بس مالي خلك كلشي وعاتبتها
..يمه عليج الله انتِ ليش هيج تتصرفين وياي شواصلج عني احجيلي مو تربيتج اني متعرفيني
زين عمي ابراهيم عمر كامل يجينا والوحيد المنهم مواصلج ماعرفتي طبعه ليش اتهمتيه ياخذ فلوسي ومقاطعته
..اني مقاطعته لو حجيتله الكلام الوصلني وهو حظرني بدون اي كلام وتبرير
..هو هذا عمي ماله خلك يكعد يبرر خاص من يشوفج مقتنعه اسهل ماعنده يسد الباب ويخلص
كلامج وي صخر سمعته ليش هيج تحجين على امه اطيب انسانه شفتها والله لو تشوفيها تموتين عليها كافي الدنيا ظالمتها انوب انتِ هم لحكتي مرت عاصم وبنات عمها على عداوتها لو شنو
..مرت عاصم كلتي اني لاحكتها ..هي مو نفسها العمج ابراهيم ماصدك يموت صاحبه ويتمعشگ وياها تگول حافي على رضاي واني مبتعده مااريد اصير ضحية مثل بنتج
ضحكت بقهر
..لا والله منو الحافيلها انتِ تواصلين مرت عاصم هم
..ختولي وين مواصلتها هي شاكيه العمامج وعثمان وعلي كلشي حجولي حتى علاقته بمرته خربانه بسبب طمعهم بيج ..ليش مابقيتي وي عمامج مو احسلج من ابنه المنبوذ من العشيرة
..اني تعبت مابيه احجي بس اگلج شي ..تردين تشوفيني وتفهمين اني هنا ابيت رجلي تجينا تطمنين افرح والله تكولين لا مااريد افهم وانتِ جنتي بنتي وهسه يطبج مرض ماتهميني وهالباب اسده وجني لاحملت ولاجبت ولا ربيت اكلج براحتج بس ابريني الذمة ومسامحتج وللموت مااتشوفيني بعد وبكيفج يمه
..شهالحجي هذا اني مااكدر اعوفج والله ولايوم نمت ليله اذا ماباجيه عليج ولج انتِ بنتي وفرحتي الاولى شلون هيج تحجين
..اي ليش هيج تعامليني فهميني ..صار ظرف دزيتيني اتلطشت انهنت خلص الله سبحانه نجاني اتركي السامعته كله وسمعي مني اليحجولج يجذبون محد طيح حظي غيرهم والله سبحانه خلاني بأدين اطيب رجال بهالدنيا من ايد عمي ابراهيم الايد ابنه صانو الامانة واكثر
..يعني الكلام اليحجوه جذب؟
..بدون مااسمعه ومن الفهمته منج اكلج جذب
..يارب ياامي شريد اني غير سعادتج
..حبيبتي ماما انتِ هم مبارك على مولودج ولو مااعرف اسمه بس يارب يكون الج احلى عوض
صوت امي اختنك بالعبره وجاوبت مقهورة
..اخوج هذا سميته رضا
..دزيلي صوره اشوفه بالنشر تخفين وجهه انتِ
..تشوفين النشر يعني
..اشوف اي
سكتت واني هم ماكدرت احجي شي بعد شويه وسلمت وراحت
احس الفراغ الصار بينا ماراح يرجع ينملي اكو مساحة بعلاقتنا انفقدت من يوم الطلعت بيها من بيتهم وزتتني بيدها وبعد ماسألت وعرفت الصارلي منهم شنو
وظليت انتظر اخبار عمتي ماكو اي خبر اتصل ماكو جواب
الحد وره الظهر حتى اكل نسيت اكل
قريب للعصر اندكت الباب واجني حلا ونوره وبطة بس وجوهن مخطوفة قلقني اكثر
..هلا بيجن فوتن
حلا گالت
..من شوكت ام صخر مريضة ليش ماتحجين تكولين بصفكم احنا وماندري والله عيب واحد شنو عذره
ونوره هم حاجتها
..والله قبل يومين اني هنا وسألتها كتلها يمه شو متغيره كالت تعب
وبطة بجت خرعتني
..شنو شبيها عمتي
ردت حلا بقهر
..يااا انوب انتِ متدرين ..عمتج تعبانه كلش الطبيب كايل الصخر انشغلنا بكبدها والتليف والمسبب طلع اخطر ..مرضها تعفن بالدم
لطمت صدري بخوف
..يمه اسم الله تعفن شنو هذا ابد ماسامعه بي
نوره انطلقت تشرح
..هذا المرض قليل يصير وهو بسبب خلل بوظائف الجسم من تجي عدوه بكتيرية يبالغ بمحاربتها وتتوسع قنوات الدم وتنقل العدوه عن طريقه وتهاجم الاعضاء شلون تهاجمهن تنتقل الهن وي الدم
..اسم الله الرحمن ماادري اتصل على صخر ماجاوبني ابد
نوره ردت
..شيجاوب سوده عليه صخر من مدخليها للعناية طاگ خشمه دم ضغطه مرتفع وابد ماقابل يرتاح متخبل ماخذ عينات الدمها وطالع للمختبرات يريد يتأكد وطالع صحيح والحالة متأخره كايليله ماطول بدت تهذي ويتشوش فكرها اكو خطورة ولازم علاج فوري والا يدخل الجسم بصدمة قوية
..يايمه سوده عليه شصار بي هسه منو وياه
..احمد من الصبح وياه ولحگوه عمي سليمان ومرته وابويه قبلهم راح
القلق ذبحني اتصلت بي هم مايرد اتصلت بعمي ابراهيم جاوبني بس گوه يحجي وهم ظل يلوم عليه
..ياعمي مو يوميه اسألج عنها ليش ماتحجين
..والله ياعمو مابيها شي صح تتعب خامله بس تكول من العلاج وابد ماتشكي هي كوه البارحه حجتلي وكلت الصخر والصبح كعدناها اخذها ..هو ماتاركها صار فتره يراجع بيها بس عرفها مو زينه من صارت تصيحه باسمك وتذكر امها ابد ماوعت الا من كعدها كلش وساعدتها تبدل كالتله هايمه نروح بس گبلها مو واعيه وشگد ردت اروح وياها ماقبل هو متفق وي خالته ام علي تنتظرهم تروح وياها
سكت ماحجه شي يسمع
ورجع كال شحجت هي
..ماادري بس هي جانت تظنك انت تحاجيها مو صخر من هاي عرفها تهذي ومصخنه جانت نار
وبضجر رد
.
..هو لو اكو عداله يصير المرض بيه مو بيها
حجاها ونهى الاتصال
حلا گالت
..هسه يتخبل ابراهيم وعلي يتمرض مايبقى على طوله يطيح والله
بالي كله يم صخر للمغرب اجه حمزة المفروض من الصبح ينزل بس صار فتره قريب لليل يلا يجي ومن عرف بالصار غير ملابسه وسبح ولحكهم
والحد اخر الليل ولا واحد منهم اجه اخر شي اجو حمزة واحمد وعمي سليمان
ومرته باقيه وياها اخذت رقمها منه
ثاني يوم من الصبح اتصلت بيها حاجتني تبجي
..مو زينه اختي.. عمتچ ابد مو زينه ..كل شويه وتشت حتى من جايتها اختي وعلي ماعرفتهم ولا وعت الهم
وهسه حولوها للعناية ومنعو الزيارة عنها شكلولها اوكسجين ومضادات حيويه ومغذيات وباقيه برحمة الله بس الاطباء مهتمين بيها يكولون تعدي ان شاءالله
بجيت على كلامها واني افكر والله ينجن صخر مااريد افكره فكره مو زينه اسم الله عليها وعليه
..سوده عليه عدها العافية ان شاءالله ..صخر وين
..عمت عيني صخر انتهى هسه كوه قنعته يشربله مي ع الاقل مو زين عليه
حلا والبنات ماعافني باتن يمي الليلة الراحت
حلا گالت مو انتِ تجينا احنا يمچ بيتها ماينسد مايصلح ان شاءالله نظل الحد مايرجعون ينورونه هي وصخر
حمزة راجع بايت ابيتهم واحمد باقي وياه وكوه مودين عمي ابراهيم
وحمزة يكول كعدت الصبح مالكيته هم لحكهم هو
اجنا بنات عمي ابراهيم وبنات عمي سليمان وحتى مرت مهيب وامها وياها وكلها تسأل وتدعي العمتي
عمتي طيبة وتفرض محبتها ع البشر لو مره شافها يحبها
ظلينا ندعي وبيومها العصر اجه صخر جايبه مهيب وياه گوه كايله اكلك شي واسبح وابدل وارجع اخذك بيدي
اول مافات وشاف حلا والبنات نوره وبطة البقية رايحات چانن
من شافهن سلم عليهن وهنه سألن عنها ودعن فتت وراه للغرفه گعد ع الچرباية حيله مهدود وقبل لااسأل بچه
من شفت اكتافه تهتز وشهگه مكتومه سمعتها
مااعرف شسوي شلون اواسي بجيت وياه وحضنته
..حبيبي اذكر الله ان شاءالله يمها العافية ..الله يفرحنا بسلامتها يارب
زاد بحضنتي وفرغ كل عبرته جنت ابجي وياه وكل شويه اعيد نفس الكلام ان شاءالله تعدي ويفرحنا بسلامتها شد حيلك والله يباوعلنا
بغضه گال
..امي دخلت للعناية ماتعرفني واخر اسم گالته مو اسمي امي دخلت تهذي وعقلها متشوش نهائي وهذا اقوى تأثير الهذا المرض شلون هيچ غافلنا ماادري
..مهيب يگول طبيبها يگول يومين الثالث يبدي جسمها يستجيب للعلاج اصبر ياحبيبي ان شاءالله تعدي
..اني مستغرب من روحي شلون الي عين ورجليني تشيلني وامشي وهي بهالحال
بجيت على كلامه
..بس هي بحاجتك هسه لاتضعف وادعيلها كل ماتحس نفسك بضيق ادعي
..مو هي بحاجتي اني بحاجتها والله .. گلبي گلب طفل مضيع امه بين ناس غربه اريد الزم ايدها وتحجي وياي وكلشي مااريد
حضرتله ملابس واترجيته
..اسويلك اكل الله عليك اكلك شي صار يومين انت ماماكل ومتخربط مرتين شمنتظر ياعيني
..مااشتهي شي والله نفسي ماتتقبل اكل
ماسمعت منه وبين مايسبح ويبدل سويتله اكل ع السريع طلعت كبه مسويها هو بس گليتها وقدمتها اله واني ابرر
..اكلك هذا انت مسويه بس گليته وعلمود تاكله بخاشوگه شلته مالزمته والله
باوعلي بنظرة خلتني مااعرف شحجي
اخذ نص وحده لفها وگام شرب مي وطلع
وهيج استمرت ايام يجي بس يبدل ويسبح وياكله لكمه ويروح
رابع يوم كايليله بدوامك يشددون عليك اذا مااجيت ماكو اجازة داوم متأخر بين مااجنا وبدل وطلع
يعني يوصل بعد ثمانية وظل بالي يمه لاتصيرله مشاكل من وصل طمئني
وعمتي حمزة واحمد وعمي يمها ورشا رايحه مكان خالتها اليوم
والعرفته خواله جاييين وياهم زوجاتهم هم
اتصلت بي نهاية الدوام اريد ابلغه اروحلها وياه ليش يوميه يأجل
جاوبني ومبين اريح من كل يوم گال اليوم انتبهت وزينه بس بعد عدها ضيق تنفس وماتكدر تكوم تتعب
وارجع افكر شلون هيج بليلة ويوم تعبت وانتكست ماادري
واني انتظره بنين اتصلت بيه هي وامها يدعن العمتي ويسلمن ويسألن
نهيت الاتصال
واجاني كلام مثل السم خلاني اشيط اتصلت بيه خالتع رنا وتشكي وتبجي هم
.. شو حبايبكم هنا شامتات هسه ريمه تشكي الجدها ام وسام كايله هاي حوبتي من اخذت ابني وراحت وصارت ع الحاضر امه
كالت جدج مارضا وگال اني امرلها بس لحد يوصل لابراهيم كلامها ماله خلك مشاكل
جاوبتها بغيض
..لا والله خلي يسمع عمي بلكي يطلكها وتلحك فيحاء
..خلي يولن اليحبنها اكثر والله هوايه اجن يسلمن ويدعلها خو عمي حتى بجي عليها بجه
..وعمو ابراهيم هم شفتي بهالايام
..متخبل هو وصخر يكولون عمرها ماشكت شلون توكع هيج وكعه ..هي اخر مراجعاتها سوده عليه صخر كوه ياخذها حتى احنا من حاجيناها تكول هو مسودن سويدات ابوه كلشي مابيه
..والله يتوسل بيها شتحسين ماتحجي بس اخر ليلة حسيتها تعبت وهي رادت تشكي وسمعتني وحجيتله الفجر ماخلاها طلع بيها بوكتها
..هسه اني وره العصر اروح وكالي جيبي هاجر وياج منتبهه تكدرين تشوفيها
..الف الحمدلله ..خوش اروح وياج اني عبالي هنا يرجع واروح وياه
..لا مناك طلع خواله هناك يجوز هسه رجعو
وصدك حضرت روحي ورحت وحلا عافت ابنها يم بطة ونوره وراحت ويانا هم
لكينا عمتي مطلعيها من العناية وكايلهم الطبيب تبقى هنا بالمستشفى لمن نشوف الدم نظف وحالتها تتحسن تطلع بس يبقى الكبد يحتاج علاج وحمية لأن التليف مزمن
فتنا عليها اني ورنا
فرحت بينا وبعد ماباوستني صاحتني
..عينج على صخر واخذي وياج خايبه نوم ماجاي ينام
..ياعمه وين اخذه هو هسه بحالي بحال احد خلي وياج ويجيني وانتِ وياه وافرح بيكم اثنينكم
غمضت بتعب وكوه تجر النفس
..مااطلع هسه الطبيب كال يجوز اسبوعين وهو وجهه انبلع سوده بوجهي لا اكل لاشرب مايتحمل على الاقل بالليل خل يروح ليش يظل بره نايم لو بالممر
..لاتشيلين همه ميخالف احاجيه المهم انتِ
ياعمه ...فدوه شگد غاليه علينا مو بس علينا لو شايفه شگد يدعولج
..ينطيه العافية كلمن ذكرني
رجعت صاحتني
..احاجيج
قربتلها تريد تشاورني
..وهذا المسودن هم لايظل يخيط فوگ مني
ذني عمت عينهن جذابات يكولن الصخر خليها ترتاح ممنوع تبقى يمها يخلنه يطلع.. وهذا يورقلهن وبس انام يخلنه يجي من البارحه حسيت بي بس ماحجيت مابيه حيله
ضحكت
..ينطيهن فلوس على كولتج جا ماينطي فلوس ابنج ويظل
..لو يدري بيهم يهججهم منا بليلة سودة
ضحكت ومن شفت صخر قرب ومنتبه النا بطلت ارد
قرب عليها
..ها يمه
..هايروح امك ..فدوه اروحلك انه خليني احاجيك
..اني الاروحلج فدوه لاهيج تحجين امري انتِ كولي ويتنفذ
..مايامر عليك ظالم يابعد روحي ..اذا تعزني لاتبات هنا ولك يمه اتبهذلت واني ماارتاح والله ماارتاح وانت بايت هنا ادري بروحك عزيزة لانوم لا اكل لا شرب بيمن ربحي لو طحت ..اذا تريدني انام مرتاحه نام عند مريتك يابعد امك وتعالي وره الدوام لليل وبس خالتك خليها يمي ومااريد رنا تروح وي رجلها خالتك ام علي وبس
..واني اكدر افوت للبيت وانتِ مو بي
دمعت عيونها
..يمه ياصخر ياروحي انت ..اني لو وحدك ابيتك تلگاني ميته من التفكير فوگ المرض بس هسه لا ارتاح من تروح لأن مرتك يمك عندك ونيس
..اني وياها ونيسنا انتِ بس اتعافي وكله سهل
وبعد اصرار منها صار يجي بالليل بالعشره هيج ويرجع يغبش الفجر يشوفها ويطلع للدوام ويرجع الها حتى ملابس بسيارته كام يخلي
وبعد زيارتنا الها بيومين هم بلغونا ضغطها نازل حيل ورافعيه الها بعلاج وكوه مسيطرين عليه
اجه بالليل حيله مهدود وللفجر مااخذت عيونه نوم
بس جان فرحان بوكفة اخوانه احمد.. وحمزة من الدوام وكوه يحصل تليفون يخلصه اتصال وياه وعبد هم ماعايفه
والاكثر حسام اخوهم راجع من تركيا حتى يشوف صخر وعمتي رغم حسام مو كلش قريب هو اصلا عملي ومنعزل عن الكل وهذا الاصغر من وسام وعبد واكبر من احمد من ولد رزق ومن سامعه بسبب جيته امه هم متخبله
كايلتله المفروض تقاطع ابوك على طردتي
مجاوبها بعدج عايشه بخيره بيته ومصرفه مامطروده زعلان منج صححي الغلط واعتذري
ومن شايف وسام وعيشته مرزله ومبلغه ابويه يكول من هالشهر بس مصرف امه يوصله وهو يدبر عيشته لو يطلع يشتغل من باجر حاله حال العمال يريد بالمحلات يريد بالشركة
وسام كايله مااشتغل عامل وانتو كلشي بيدكم اني تاليها اشتغل عامل عند احمد
راد عليه
..كلنا بدينا عمال واطورنا
ماقابل اخر شي كايله الزم شغل بالكيعان يومية وهم رافض عباله مثل كل مره عمي يهدد وبس
وعمي الظاهر قفل عليه من شافه ماوصل اخو ولا سأل وسواها صدك بس مصرف رزق راحلهم
بيومها صخر اخذني البيت عمي ابو ريمه نتباركلهم بولادة ريمة جابت اركان وگلي ابقي يمهن
وهنه شافن ستوريات مرت وسام كلها حجي على عمي والولد
منزله صورة ابنها وكاتبه
اعتذر لابني عن سوء اختياري لأب عنده اخوان ظلام وعمات حيايه
ضحكت مدري ليش الموقف ضحكني
..كون اشوف مآرب هسه من تقرا هالكلام
رشا گالت
..عمار توه نازل ياوسام يامرته مآرب تقفل بنزلته
ضحكت واني اسأل روحي وغزاله نفس السؤال الي بداخلي سألته
..شلون الوحده تكدر توصل هالمرحلة وتصفر الخجل نهائيا تطفيه مثل مرت وسام
ريمة بتعب گالت وهي تعدل نومتها متألمه
..من تصير سفيهه اسم الله عليجن كلشي يطلع منها
سألت اريد افهم
..هو رجلها يقرأ هالكلام
..عادي تلكيها معاركته ونزلته وشويه يتراضون وتنزل طلعتهم تغور بيها المضغوطين منها
..يارب استرنا
وظلينا نسولف هوايه مواضيع
شويه ورشا كامت تلوب
..تأخر موو..والله تأخر ترى الساعتين عبرت هسه
غزالة حاجتها
..هسه يجيبه لاتخافين شبيج غير ابوه
حاجيتها اني
..والله اجه ابالي اسألج عنه بس عبالي نايم اذا عند ابوه ..لاتقلقين حبيبتي هسه يجي قابل وين يروح
اتصلت بابوها
..يابه اتصل بي ترى عبرت الساعتين اخاف والله جهالهم هناك هوايه ومرت عاصم يمهم ماامنلها تخبث عليه كلشي تسوي
عمي يحاجيها ماراضي بتفكيرها هدأها وكلها هسه اتصل بي
وصدك شويه واجه
خطيه تبوسه وتشمه كل شويه
..مرت ابوي راجعه؟
..طلعت من بيت اخوها لأن ابنه انحكم وخالتي طلعت منها شعره من العجين بالقانون مااعترف خاف من خوالي هو وابوه..وهي من كعدت عدهم وطلع حكمه ام الولد مطلعتها بالشارع بدون حجاب وعباه من الجيران منطيها كايلتلها مااشوف وجهج بعد
لأن سنتين محكوم الزمال ابنها وشابع بسط هم بتوصية من عمار
..وعمامي استقبلوها عادي ؟
..اي طبعا مألفه قصة على عمي ابراهيم على اساس رايدها ورافضته بس عمي البارحه حجيتله گال مالي خلگها هسه خل افرغلها وتدلل
..وشعجب مارجعت البيتها
قربت عليه
..ماتريد ترجع خاليه مخليه واحد منهم ابالها لازم يعقد حتى تسلم من اهلها ومن عمي ابراهيم هم ..هسه هي تفكر كل ماتتأخر مو بصالحها تريد تورط واحد منهم بحجة حماية الولد اخوكم وبس ورق وتالي تخبلهن الثولات اليمها
..احسج بس انتِ فاهمتها
..اي والله وماانطيتها هالگد مجال اعرفها شنو من طينه
عضت اصبعها
..اخخخ بس گلبي عماني وماشفت النذل زين وماعرفته
..ولاتفكرين بي الله يعوضج ان شاءالله
بقيت يمهن لليل
ورجعنا البيتنا
برجعتنا لاگانا ابابه عمي ابراهيم سلمت عليه وهو وصخر عبالي بطلو من سوالفهم بس ابد
صخر اتحرش بي وگله
..ابو البراهم باجر ابقى هنا ارتاح ماكو داعي تجي
..ماسألتك اني اكو لو مااكو
..مايحتاج تسأل اني اسأل :عود شمعنى من تفوت للردهة تلتم عليك الطيور
ابتسم عمي
..اسألهن للطيور اني شكو
بالعادة الشكل مو عامل الوحده خفف حركة جيبك ترى اول ايام مالي خلگ واعبر هسه صحيتلك ولاتخليني سبب بقطع ارزاقهن هم
..والله كلشي تسوي ..عوفهن حرام عليك والي تريده يصير
فتنا للبيت
وهم اجه ابالي ارجع اشتم ريحة تراب
رشيت التراب بيدي كاسة مي واشتميت بقوة
اجاني صوته فززني
..شجاي تسوين خبلتيني ترى
..ريحة التراب تمووووت بس اشتمها
دار عليه وحك طرف انفه
..باجر اخذج تحلليين هاجر
..احلل شنو
..يمكن نقص فيتامين
حجاها مبتسم
..صدك اله علاقه؟
..طبعا اله
نمت بحضنه وهو كل شويه بيده يمسح بطني
..شنو شبيها مكرشه؟
..رشيق وحلو نوتيلا وين اكو كرش
وهو يحاجيني اخذ تليفونه اتصل بخالته
جاوبته بتعب نعسانه الظاهر نايمه ومكعدها
حلفتله عمتي بخير وانطتها التليفون حاجته عمتي وسألته عني كلها بخير وتسلم ..وسكت شويه يسمع بعدين گلها
..اندعيلي يمه
عمتي انطلقت بالدعاء ونهى الاتصال ونام كعد وكعدني وياه
..ارجع من الدوام اخذج ونروح الأمي سوه حضري نفسج
الظهر طلعنا ومر بطريقه على رشا
خلت ابنها يم رنا وراحت ويانا
وهناك من دخلنا فرحت بينا عمتي شويه وطب ابن اخوها وياه امه وابنه هم
عمتي فرحت بيهم وطلعو جايين مراجعه الابنه ومارين يشوفوها لأن قبل اسبوع هم يمها
صخر اصر يبقون يمنا الليلة وميرجعون
خلاهم گاعدين وحاجه رشا اجتني
اخذتني تحللي بالمختبر الجوه
كملنا ورجعنا كعدنا يمهم
نص ساعة وراح هو واجه طبيعي
من طلعنا راجعين للبيت وسلمنا بقى يمها هو اخر شي شاورها من شهكتها التفتنا شكد باركت عمتي ودعت اباوع بسرعة بجت
كلت اكيد شغله تخص صحتها وراح تطلع جان المقرر الها ست ايام بعد بس يمكن راح يطلعوها قبل
طلعنا ورشا فرحانه ومنطلقة وياه ناسيه كل الحواليها حتى اني مستغربه فرحتها ومرتين صخر يرجع ينبهه تنصي صوتها من ابن خاله اليمشي بكل ثگل كدامنا وي ابنه
واول ماوصلنا اتصل بخالته رنا تجي هنا يمنا وعزم جده وعمه وبدا يشرف على تحضير الاكل والبنات وياه واني وياهن هم كلشي ادليهن واجهز وهو يوجه بس مو هو الطبخ راح هناك كعد يمهم هالمره
فرحت راح ياكل وياهم بالاخير طارت الفرحه من طلب اكليله كبه وكعد بماعونه يمهم
وبوكت النوم تعبت هلكانه تأخر الحد مانامو
واجه اخذني الحضنه باسني
..مبروك الحمل ياحلوه
ابتعدت مامستوعبه
..شنو ياحمل
..حملچ انتِ غير اكو غيرچ يفرحني بهالدنيا بس انتِ وشهلة تفرحني يارب يتمم هالفرحة بطلعتها گولي امين
..امين يارب ..الله عليك مو ناصب عليه
حضني بتعب مطفي هو هم
..حامل والله شكيت من ريحة التراب الرطب الأدمنتيه
ثاني يوم گعدت الكل يباركلي حتى زوجة خاله
وبيوم طلعة عمتي حمزة جان نازل واحمد وعمار وعزام الكل مخبوصين وذبحولها ذبايح من صخر وعمي
واحلى وليمة عشه سوينا
بطة يمنا وكل شويه عيونها طايره الحارث اخر شي طلعت من بيتنا مستعجلة راحت البيت اهلها
وره فتره اجت وجهه صاير اصفر
وحمزة فات مستعجل وراها وبس نوره گدرت تهديه
يتبع...