بقلم نور الشمس
رشا...
بيوم الچنت فاقده مااعرف وين جابوني بس بداخلي چنت مطمئنة الوجوده يمي وجوابه چان دوا لجروحي من سألت اني وين وجاوبني بگلبي ماحسيتها كلمة عابره چانت مليانه دفو ولاقت قبول بداخلي الدرجة خربطت نبضي هالكلمة وانطتني دافع اتمسك بالحياة
ساعدني اگعد انطاني مي اشرب احس بلاعيمي مجرحه ومريئي كله ملتهب اي شي ابلعه اغص بي
اشرتله اشرحله وضعي حتى المي صعب ابلعه
مسح راسي وباسه
..ميخالف فتره وتتحسنين المهم خلصتي ..جوعانه حبيبتي تاكلين شوربه لو سوب دافي تشربين.. مااكدر انطيج اكثر اعرف وضعچ شنو
..كلشي مااريد ..شبيهم بابا وعمو صدگ جايين
..راح يوصلون قريب للناصرية جابهم صخر ..اساعدچ تغسلين وتغيرين ملابسچ
نزلت راسي خجلانه
..لا صيحلي رنا
صاحها وهو يجر مصلايه من ميز البلازمه بمجرها مخليها واخذ تربه وراح يصلي
اجتني رنا تعرج صار فتره رجلها تتشنج من الحمل وكوه تگوم واني تعبتها وفضلها ماانساه
..ها رشاوي شلون صرتي
..اني زينه الحمدلله.. بس ماگلتولي اني وين
..انتِ ابيتچ ..هذا بيت رجلج جاهز وكامل ماقبل ترحين يم اهله بهذا وضعچ وخلص بعد مااطلعين منه الا وانتِ بأحسن حال وطلعة ونسة ان شاءالله
..يعني مانروح البيتنا وياهم
..ياا ولچ رشا يابيت هو انتِ ابيتج وحاجاج وحاجه ابوچ بعد مترجعين ارتاحي وهو يفهمچ
سكتت ودايخه مااگدر اركز
اتمددت تعبانه عيني عليه وجذبني صوته حلوو من يقرا الفاتحه والتوحيد ويتشهد
رفع ايده للدعاء نزلت دمعتي وكأني متيقنة الي نصيب من دعاءه
بس كمل سفط مصلاه شاله المكانه ورجع عليه
..ها يالحبيبية شلونچ هسه
..الحمدلله ..الله يتقبل
..منا ومنكم اساعدج تتوضين وتصلين ؟ ولو من جلوس عادي المهم لتركيها
..ارتاح واصلي بس خل يكمل المغذي
..خو ماضايجه مني؟
..لا ليش اضوج بالعكس
..خاف لأن جبتچ وخليتج امام الأمر الواقع بس مابقالي خيار اما اخسرچ او اجيبچ واعوضج بعدين اطلبيني هواي رشاوي
ابتسمت على ابتسامته شگد حلوه عيونه من يضحك
اريد اجاوب واتصل بي صخر وصلو ويريده ينطيه العنوان المضبوط
طلعلهم وفاتو
عيني الأبويه بس شافني نزلت دموعه
وعمي مثل عادته بشقاوة يحاجيني
..شلونها عزيزة عمها الوكحة
ابتسمت ونهضت نفسي الهم على گعدتي ماگدرت اگوم والم بشالي واعدله من صخر باوسوني وعيوني الصخر وجهه مغيم عليه ..سوده عليه شالعين گلبه بمشاكلنا وهمومنا
..ابو الروش الحمدلله على السلامة
..الله يسلمك اشهلنا
ابتسم عبالك يگلي متجوزين من هالأسم
گال الأسعد
..لا يابه صاحيه والله مابيها الا الخير
ابويه گعد يم راسي وكل شويه يبوسني ويسأل
چنا ماخذين راحتنا وحدنا ماانحرجت منهم محد من اهله عدا رنا ..وجعفر شكلي مغذي وراح
شويه وظلو يحجون وفهمني ابويه موضوع ظلتي هنا ..ماعقبت لأن اشوف نفسي مرتاحه اكثر بس اسعد وصاهم ميجيبون كلشي من غرفتي يخصني لاملابس ولا شي عدا شغلات الأبني حبيبي محتفظه بيهن بعدها وكم حاجه وصيت ريمة تجمعهم الي
ثاني يوم اهلي راحو وبس رنا بقت يمي واجني امه وخواته چان سلامهم واهتمامهم ودعائهم الي رسالة اطمئنان بوقت اني الخوف تارك بيه اثر عميق
امه من شافتني شلون متغيره وتعبانه بخوف شهگت ودعت من كل گلبها
..الله يضره اليضركم يابعد روحي ..يمه عزيزة وليدي يحفظج الله ويطرح بيچ البركة والسعادة الگلبه ويسعدج ..ابو السعود معلعل ويگول هي دواي يحفظچ اله وتشوفين دلاله ان شاءالله
اتشكرتهن وماطولن وراحن وبقينا بس اني وياه ورنا
خطيه رنا تجهز الاكل وتتعب وهو من يشوفني مااكل هم بسرعه يگوم
لأن كل هالايام اني مااگدر اكل لكمه صلبه لاخبز لاقطعة لحم ولا اي شي يحتاجله بلع قوي يادوب السوب والشوربة ومليت منهن
اخذني للطبيبة كتبتلي علاج للمعدة والمريئ
جنت اخذه قبل الاكل بنص ساعة يلا اكدر واسيطر على معدتي
والحمدلله مرت هالأيام وكدرت ارجع طبيعية شويه شويه بهالفتره خليت رنا تروح للطبيب اخذها هو
واخته الجبيره وياهم ومن رجعو فرحانين خاص رنا طايره وهو يضحك
گال
..اجاني خال الولدي بلكي يلحگون عليه ويشبعوه تكفخ مثلها هي عمتنا وشبعت منا طگات
ضحكت فرحانه وابارك الها وادعي الأبويه سألني هو
..صدگ سعيتي بزواج ابوچ منها علمود الولد ؟ هاي سالفتج حبوبتي ام نجم ماسوتها شلون قنعتي الوالد وهو عسكري ومبين مايتناقش الساني يبس حد ماقنعته اجيبج شلون دبرتيها انتِ
ضحكت
..هو مكيف واتحجج بيه لو مارايد زواج مايقتنع
ضحك واني رجعت احاجي رنا واسألها شگالتلها الطبيبة وكتلها بشري الوالد اتصلي بي
اتصلت تبلغه وفرح هوايه وهم اخذت التليفون اباركله سؤاله چان كله عني قنعت رنا ترجع البيتها
صح ريمه يمهم بس ابويه اعرفه ميحب يكلفها هالگد وميريد عزام يبقى وحده لو ماجدو ميخليها تبقى يمهم اصلا
يومين وراحت رنا بعد ماحملوها اهلها اصواغ زوجات اخوانها واخوانها وولدهم والبنات واخر يومين ولدها خلصوهن يمنا علمودها وجانو مؤدبين حيل
من شفتهم اتذكرت جان اكثر شي مخوفني شعور ابني لو كبر واكتشف اني عايشه مو يم ابوه شلون راح يتقبل تالي هو وينه مابقالي وبقيت مجروحه ابعده واحس الوصلة الي انشالت من گلبي بروحته تبقى تلچمني كل مامر طيف ذكراه ومااطيب العمر كله
كل هالفتره احنا صح سوه بس مقدر وضعي وابد ماطالب اكثر من اكون مرتاحه وبس
راحت رنا ومن شافني صرت احسن صار يطلعني بحجة نجهز للبيت بس اكتشفت التجهيز كله الي والبيت جاهز من كلشي ومن گد ماگدر يوصل الروحي وصار اقرب ماگمت انحرج منه واتعامل وياه بكل اريحية جهزت مثل ميحب واكثر
اسبوع رتبت نفسي بي وخواته وياي ماتركني بلغ عمي يسوي عزيمة وعشى وچان ماباقي ايام قليلة ويجي محرم وهذا الخلاهم يستعجلون اكثر
معروف يمهم بمحرم حتى اعلان للزواج ميعلنون ولا خطوبة ولا اي شي
ماقبلت اروح صالون مثل مارادن بس چنت متحسنه وبادي وجهي يرجع رتبت نفسي بفستان اوف وايت مشغول بشغل حلوو وفصال بسيط ورتبت شعري بمكياج خفيف
حتى الذهب مالبسته لأن كله يم اهلي بعد مجايه اغراضي ومحد يصدگ بزواجي شلون صار ولاحجو الأقاربهم هم
ومن وصيت عليهن اغراضي من جديد رجع وصاني ملابسي وصاني ماالبس قطعة منهن خليت البنات يتلفوهن لأن حسب ماشرحلي مو زين ينعطن يضرن اليلبسهن ماعاندت سويت الراده رغم مو كلشي انحچه اؤمن بي بس شفت بعيني الصارلي وعشته بكل تفاصيله وشي مو سهل ابد
من كملت ترتيب نفسي و شافتني امه صلت على محمد وسألت عن ذهبي وفهمتها اهلي يجيبوه
طلعتلي من كنتورها باون چبير من ذهبها قبل ثگيل وحلوو كالت هذا هدية مني الچ
والباقي لبسي گد العزيمة واضمه
بتوت وتراچي طوال ومحابس
مخلت شي مالبستنياه رغم ماعجبني البس هالگد بس ماحبيت افشلها
ولما اجتمعوا الأقارب ظل بالي يم بيت خاله اخاف يجون وهي تجي اقصد زوجته السابقه ..وفعلا اجو كلهم بس الفهمته هي مااجت واهلها كلهم جايين وخواتها واخوانها وعدهم عادي ولا كأن صاير بينهم خلاف قبل
الكل لاحظ فرحته والكل يمدح جمالي بحيث اول مره احس بنفسي حلوه هالگد
يوم چان حلوو ومميز بيومها مو بس علنا الزواج لا تم شرط العقد فعلا وصرنا زوج وزوجة جمعتنا الأيام الصعبة قبل الحلوه وشفت وگفته قبل لا اتردد لحظة واخاف من ان يملك روحي وجسمي ونفسي
اتقاربت ارواحنا وچنا روحين بجسد بداها بدعاء وختمنا هالليلة بدعاء وركعتين صلاة شكر لله وي صلاة الفجر
حسيت السكينة دخلت روحي وماتركني من هاليوم احتار بينا شلون يقرب سجاد منا لأن قرر ميتركه بعد وهذا چان اكبر تحدي الي
تحدي النفسي قبل غيري خليت كل غصة حسيت بيها بطفولتي ويتمي بعين وعيني الثانية ابني وشنو چان ابالي اسويله وشلون لو هو مكانه وشنو چنت اتمنى يسويله اسعد اسوي اني الأبنه واكون صادقه وي نفسي قبل لا اصدق وياه
بديتها بخطة كسب حاولت اكسبه بطريقة متمرده ولأن حالته خاصة تعبت بالتكرار حتى الكلمة اكررها هوايه واركز بعيونه واحاول يباوع لعيوني وبتعب اسبوعين متواصلات بيهن وماكو يوم يخلي من صعوبة مره عاند الا يروح الاجداده
ويوم عاند الا التليفون يريد وجنت بأسلوب وكلام هوايه احاول اقنعه مرات اشوف اسعد متعاون وياي مرات يمل ويگلي جهزي اخذه وارفض لو نروح كلنا لو ميروح وحده وچنت اشوفه مرتاح الهذا الرفض ويفرحله اكثر
صرت اركز شنو الي يخليه يحب يروح هناك رغم ابوه هوايه مهتم بيه ومدللة ومطول خلگ وياه اكتشفت بيبيته من تنقهر عليه تنطيه تليفون بدون علم ابوه لو تشتريله نوتيلا وهذه النوتيلا يفقد عليها ينتهي وهي دمار الصحته وضياع التعبي وتعب ابوه وياه
قررت احاجيها بيني وبينها رغم چنت كلش متخوفه اخسر محبتها وخفت تعتبره تدخل وتحكم زايد مني
يوم كامل اريد بيتهم ماشاء الله يفرغ بي مكان اگدر احاجيها براحتي بي ماكو الى ان راحن البنات والولد لبيوتهم القريبة
فتت للغرفة اباوع نضدتها مخربطة
..خالة عادي اعدل النضده الچ
..يايمه تشلع افادچ غراضها هواي الولد يسوونها لاتنشلع سرتچ لو خاف شايله فريخ وتتأذين خليها
قربت عليها بستها
..خاله تشوفيني گد الأمانة اگدر اراعي سجاد واكون اله عون مااريد اگول ام لأن كلش صعبة بس احاول
صفنت عليه واداركت الموقف ومتأكده ابالها تسأل شنو مناسبة هالكلام بقيت متبسمه واباوعلها بنظرة مريحه جاوبتني
..يايمه والله توني چنت احجي للبنات وبظهر الغيب ادعيلچ اگول يجينا ينگط ورد نظافة ورتابه وانه ادري بي صعب عرك وياه ندخله للحمام وعرك للتبديل ومو بسهولة يرضا يرادله خلگ مو هينه حالته
..لا والله بعيني مااقصر ان شاءالله وهاي ابسط الأمور بس اني اريده يتعلم اريده يدرس يعرف يحاور الي بعمره هو عنده طيف توحد وحسب تقرير حالته عنده بطئ بالنمو التطوري وهذا يرادله جهود صح اتعب بس مو مستحيلة حالته الأريده منچ اني وياچ نتعاون عليه
..ابيش اعينچ انه الأكدرله مااقصر عليه ماتدرين شكثر شايلين همه انه وجده والله انطاج الأبوه من دعواتنا لا زرنا ولا عمرنا ولا صلينا فرض ومادعينالهم هو وابوه بالمره الطيبة تعينهم
..فدوه العمرچ خاله ان شاءالله مايحرمنا من دعواتكم بس الشراية خاله الحلويات مو زينه عليه خاص النوتيلا بيها طاقة تخلي عبارة عن حركة ونشاط وهو ميعرف وين يصرفها وهنا ماراح يركز وياي لايتعلم ولا يحب يبقى يمي من الاساس لأن يشوف اني حارمته ومايتقبلني بعد مادام اكو شخص يوفرله الي يطلبه
..خاله غير گلبي يفرفح عليه من اشوفه يبچي يلزم رجليني ومايطلع من المحل الا معبي كل اليريده
..ميخالف خاله قوي گلبج مره مرتين تلاثة يأيس كلها علموده وعلمود مستقبله واني اعوضه والله اسويله كلشي يحبه بالبيت وازينهن اله بس خل يعرف ماكو بديل عني وعن ابوه ينفذله طلباته وادري هالموضوع صعب عليچ بس گتلج نتعاون كلنا
..هاي بسيطة ولو يعز عليه ارفضله طلب بس على گولتچ يايمه ونذر عليه لو صدگ واتعلم ايدچ العلمته اترسها ذهب
ضحكت وبستها
..مااريد شي والله فرحتي بي هو كافية
بيومها راد يبات ابوه بصعوبه قنعه يروح ويانا
راح ضايج يريد يبچي
..بسته بخدوده وبديت العبه بخفه من رجعنا خف
اسعد متعلق بي حيل مينام الليل جره وحده الا يروح يشوفه مرتين وتلاثه
حسيت من خوفه عليه يشوفه طفل حديث ولاده مو جبير وحقه لأن هوايه مخاطر مايدركها
وبديت وياه وصيتله من بيج العاب تعليمية واحرف وكل كم يوم حرف وادخله بعدها حركه ومقطع اعتمدت ع الحفظ والتكرار وگدرت انجح بس بتعب وتحدي واصرار
ومن بدا الدوام سجلته وياي بعد مااتثبت نقلي بالمدرسة القريبة منهم .. ماگدرو يرفضون حالته ابد حاججتهم وكلت للمديرة مستعده اجيبله كتاب من التربية وهي قبلته بدون كتاب بعد ماعرفت وتأكدت اني وياه وهو يخصني
چان حرك ووكح وهوايه يشكون منه طلاب ومعلمات واعتذر عنه هوايه واعلمه مره يعتذر مره بالبيت افهمه الى ان اتعود والله يجزيهن الخير اتعاونن ويايه المعلمات والطلاب چنت اهتم بيهم واكلب منهم يلعبوه ويشركوه وياهم بلعبهم
وأول تسعة اخذها بالدفتر عبالك انجاز وشهادة الي
ومن رجعت الأسعد وشوفته بعدني واني اشرح حضني وباسني حيل وهو شاله ليفوگ بفرح شبعه بوس الحلوو بي يموت ع الاحضان والبوس عكس اقرانه الي يعانون مثل حالته مرات ينفروها هذه المشاعر هو لا كلش يحب الاحضان مرات بدون اي سبب يجيني يحضني ويريد احضنه وابوسه يفرح ويرجع يكمل قرايته لو لعبه
بلحظة الي انطيت درجته الأسعد انتبهت الدمعة بطرف عينه مو لأن اخذ درجة بس حجالي شنو احساسه ووضحلي حجم خوفه ومعاناته وزادت فرحتي بروحي واعتبرته فعلا انجاز
گال
..ما چنت اشيل هم بهالدنيا مثل همه چنت كل مااصفن اگول شلون بي لو غمضت عيني بهالدنيا شلون لو كبر واكتشف نفسه اعمى لايقرا لايكتب شلون يتواصل وي اقرانه بعد اليوم وبفضل الله وفضلچ ماكو خوف
بيومها كافأناه بطلعه واشتريناله لعبه ووعدنا بالعطلة ياخذنا جولة بالريف يم جدته ام نجم كل ميروح تشوفها تگله جيب مرتك وتعالي
بهالفتره كلها مارحت الأهلي وبعد مايأسن من روحتي اجني بنات عمي وعمتي شهلة وماقصرو بالهدايا وبعد روحتهم بيوم اكتشفت نفسي حامل وهذه جانت فرحه اله مصحوبه بخوف مني بتعامله واسلوبه گدر يمتصه ويحل محله الأمان
ومرت الأيام اجتنا رنا تجهز الولادتها يمنا لأن هناك ماعدهم احد اهلي ريمه يمهم ومتسيطر على كلشي وحدها وغزالة دراستها صعبه وابنها يم بيبيته بفترة الدوام
چانت فرحتي مو طبيعية حلم عمري قرب يصير حقيقة وشرفنا ونورنا اسحاق ابويه اختار يسميه هالأسم يمكن لأن اجاه بعد سنين طويله يأس ان يكون اله ولد
والف الحمدلله اجه للدنيا بصحة وعافية بعد ماهوايه مخوفين امه ان اكو خطوره عليه ابوه جبير وامه ومن هالكلام
بليلتها من صار الليل مانمناه اني وخواتي ادزلهن صور وفرحتهن مو طبيعية مثلي واكثر
ويحجلي يكولون جدي باچي من شاف صورته ومخليهم يذبحون فدا الوجه الله
ثاني يوم خابرني صخر يبارك وهم دزيتله صور سأل ع الأسم منو مختاره گتله الوالد
وبلغني يجونا هم وابويه وعمتي شهلة وثاني يوم اجو جابو خيرات الله من الگاع ومسواگ ودلعوه وراحو ماطولو لأن البنات عدهن دوام
اكتشفت هنا الكل يعرف ان علاقة عمتي شهلة بأبراهيم عادية بس مثل المتنازلة عنه بعد زواجه من حلا يعني كل ظنهم ان عمرها مانعها منه او ماعادت تهتم وبس واني هم مشيتها على هذا الراي لأن صخر فهمني من اول ماانحجه بيه
ومن اجو يباركولي مرتين هم الاخويه وهم الي فرحانين بحملي وهنا تذكرت وعدي الصخر
جنت واعدته من يصير عندي ولد اسميه اشهل وبوكتها النذل ماقبل وماحبيت اسوي مشكلة گلت الثاني لو الثالث اسمي يعني اسمي هيچ چان ابالي بس ياسبحان الله ماصارت
اجه ابالي احاچي اسعد
بالليل وهو متمدد واني ارتب بشعري واتعطر اشرلي اجي ابتسمت رفعلي حاجبه مبينه عندي شي اشرلي شكو
..عندي وياك سالفة
ابتسم
..احب اسوالفچ سولفي طربيني ياحليوه
..اذا البيه ولد عادي اني اسمي؟
..واذا بنت الي؟
ضحكت واني اشيل شعري كله واديره الجهه وحده اضيع ارتباكي من نظراته
نصيت صوتي خفت اهلي بره يسمعون گتله
..اي البنت وامها الك
ضحك وهو يگرص خدي بيده وباسها
..والولد وابوه الچ سمي بويه احلى من يسمي بس شنو الأسم الي ابالج
..اتمنى ماتزعل وتگلب عليه
ضحك
..شناويه تسمين من اسماء وهيچ خايفه
..اشهل جنت ناويه من يصير عندي ولد اسمي اشهل
ابتسم
..والنعم منه سمي اخو ونعم الأخو الچ والي
بسته من خده حيل
لزم فكي بيده وعيونه بعيوني واني اموت بنظراته تأسرني وتأسر عقلي
..انتِ گدها هالبوسة
..يعني مو كلش
سحبني عليه يضحك
..ضابط اني ماترهم وياي اليعني لو اي لو لا ماعندي رمادي لو اسود لو ابيض
..لا والله مادام بيها تحدي اي واي
ضحك كل قوته واخذني الحضنه واجانا سجاد طاير
بيده كتابه يريد الا يقرا هسه ولو قفل الله يستر
..بابا شطارتك اجلها الباجر حبيبي وكت النوم هذا
اني اضحك وهو مصر يقرا رددتله مره ومرتين
واخذه ابوه وراح يمه بسريره ينام
نومه واجه اهلي كلهم نايمين من التعب ..اغلب وكتنا هيج ضحك وتحدي وعناد ينتهي ابوسه وضحكه
ومرت فتره وعرفت من البنات بنين مزوجيها الحسام ويردون يعلنون الزواج مثل مانعرف كلنا مشروط بالأشهار
سوو عزيمة وعزمو اسعد واترجيته اروح وصاني مااكل من اي واحد هناك
ووصى صخر هم واتعهدله صخر ماعونها بيدي اجهزه واكلها يمي ويم اهلها محد غريب يوصل
وفعلا رحنا فهمت سالفة جلطة عمتي رزق واتعجبت يعني ابنها شاب مثل الورد ماتأثرت وتأثرت من عرفت ابنها الثاني حافظ على امانة اخوه
بعدين عرفنا الموضوع اكبر شغلة بيت وطمع وتأكدت من كلام عمي صح قبل يگول كلها تلومني وتگلي ظلمتها وانتم لو مكاني ساعة ماتتحملوها بس مخليها الخاطر ابوي الرهن رضاه برضا عمامي
بيومها جدي مرزل اخوانها واهلها ولاعب بوسام لعب
الي عرفت عنه مصايب
من دزو على عمي جدي وابويه ورادو يفهمون عمي بكل برود مثل عادته گلهم
..هو زوج وفلوس ماتعبان بيهن موظفة بسيطة بأصبعها خلته يبيع اهله وابوه ومافكر لابنفسه ولا بقيمته ولا بجهاله وامهم الي مسوي روحه يحبها
شافته طول بعرض وعبالها هو الكل بالكل بدت تسحب منه وتاكل بي وياريت لو محصل منها شي
دزو عليه خل يشرحلكم شلون قشمرته رادت منه بيت يلا يخطب وبكل غباء مد ايده على حلالي وبوقت چان اخوه توه مدفون صار ايام لالزمه فقده ولا حزن عليه مستغل فرصة حزنه وسحب مني ذاك الحساب واخذ ربا هم والأغبر سلمها بدون اي كمبياله وصك
صيحوه خل يشرح الكم السبع شلون اتقشمر
ومن جدي وابوي گلوله شلون تركتوها وخليتوها ومالاحقتوها قانون او عرف
عمي عرفته مو بس قافل شمتان بي هم رغم الخسارة هو الخاسرها گلهم
..لا والله بعد ايدي وعاشت ايدها تسوه شاربه الف عافية عليها هو ادبسز ومهان وهذا مستواه تعبت بس ردته ينصلح ماينصلح اشهر بيها ليش بايكته مخدرته متفقين بيت مقابيل زواج
دزت عليه يم مكتب عقار اشترت وگالتله الله وياك لاتعرفني ولا اعرفك
ضحكت عمي مبسط الموضوع حيل رغم مو بسيط وجدي دز عليه رزلة وگله تلم زوجتك واطفالك وتعتني ابيتك وتصرف عليهم وكلمة منك وحده تعترض بيها تطلع منا ماتبقى بگيعانا بعد
لا بيت ابوك ولا غيره
بيومها چنا مخبوصين نسولف بقضية وسام واجتنا المشكلة الأصعب صدمتنا صدمة بحارث والسواه بحكم جدي عدنا وكل الحل والربط يمه المواضيع كلها چانت تشتد وتنحل من بيتنا انقهرت على بطة ماتستاهل
واني اسمع صخر بعالي صوته يصيح
..شحچيت اني شگلت ..مو گلت حارث مو امان عاندتو لا ابن عمها هذا ابن عمها حلوها هسه حلكم شنو؟ الي يگول منكم ويطلعلي براي خل يتزوج هذه وبت عمه اله وسوالف السويتوهن قبل تنعاد اخذ اختي واطلع منا ومتشوفونا ابد وصلت حدها كافي
نزلت دموعي على قهره وحرگة گلبه والبنات يراسلن يسألن واجاوبهن باختصار
...
بطة ..
فزيت على صوت الرسايل والأتصالات اباوع المتصل رقم غريب والاشعارات ظاهره ع الشاشة حارث يتوسل
شنو مناسبة هالكلام
شنو سمعي مني شنو لتركيني حسيت اكو شي جاوبت الأتصال اجاني صوت بنيه ارد انيزة الصوت مبحوح بحه قوية مو من عدنا مسامعته
گالت
..مرحبا عيني انتِ خطيبة حارث موو؟
گلبي انتفض ودگاته صرت احسهن بره مو بداخل احشائي احسه طلع بداخلي شك وبديت اتقرب من الحقيقة بس ياحقيقة جاوبتها واني اجلي صوتي من النوم
..اي منو انتِ
..شوفي حبيبتي هو صح انتِ بت عمه وخطيبته بس اني مرته شنو ذنبي حامل ومايقبل يصدق العقد خاف يخسرچ ..هو لو مهتملچ چان ماگدرت اجذبه الي ولا گدرت اخليه يعقد عليه اني ماجريتله سيف وخليته على رگبته حاولت بس ..صح حصلته بصعوبة بس بالأخير صار الي وگدرت افوز بي واجذبه اتمنى انتِ اطلعين من حياتنا
سكتت واحس كتلة نار انشمرت بگلبي خنگتني خنگ العبرة لزمتني بلعومي انشل حتى حچي مااگدر احچي بس صوت انفاسي عله
گالت
..اني اعرف الموضوع صعب عليچ هو حب طفولتچ بس والله ياحبيبتي حب طفولتچ هذا شهرين ماطول وياي وبشهرين وگع وسلم عهوده كلها وطلبني من امي بعد ماقنعناه منريد غير الحلال والستر
ضحكت بصوت عالي
..وماكو احلى من الحلال شگلتي هسه
..الترديه شنو ؟ومنو يگول كلامچ صح
..دزيتلج العقد والصور وسفراتنا سوه وحاولت اكثر من مره اوصلج واختصرها على نفسي وعليه بس هو چان حذر وبحملي وصلت حدها بعد
..هذا هو الله وياچ بس سؤال واحد اتمنى تجاوبيني عليه بصراحة ..جنتي تدرين بي خاطب
..والله الصراحة غير اي اعرف هو حچالي كلشي
..مدام تعرفين وماضاحك عليچ واني المضحوك عليه بهالموضوع كله وكلت عني الله سبحانه هو قبيلكم وحسيبكم
بعدهي تحجي نهيت الاتصال ووگعت الموضوع اني مامستوعبته اكو الم غريب بداخلي الم بعمري ماضايگته ولا حاسه بي مرات اگول گلبي موجوع طلعت الكلمة سهلة بس الألم ماينحمل هذا الوجع يموت ويذبح الأنسان وهو بقيد الحياة
اتصل بيه هو رفضته وقبل لا اقرا واتعب انطيته حظر وتليفوني قفلته وبديت استوعب شويه شويه وبدا الهدوء بداخلي يتحول اعصار
بداخلي قهره بدت تتحول الثورة بس مابيه حيل الها رجليه بادن والله بيدي تليفوني فتحت الرسايل شفت الصور
مره بمطعم مره بفندق مره بالمطار سوه
واخرها بالفندق وهو غافي قريب الها مطلعه بس جسمها وشعرها
صورة ظهره وهو معلم
صوره الأماكن متلونه منها
انقرفت ولعبت نفسي
وبديت ابچي والبچي اتحول الهستريا غرفتي فوگ وصعدولي ركض مااتذكر شلون فاتو ولا شحجيت اني بس چنت اشهگ واحجي شحجتلي وشنو شفت اتذكر ابويه خلاني بحضنه وخله ايده على حلگي مانعني اشرح الشفته نبهني صوت حمزة بره الغرفه مااعرف شكسر وصوته وهو يقسم ويتحلف نوره وحلا وبجيهن
شويه ونزل ابوي بعد ماوعدني يسوي الأريده
حلا گالت اجو بيت عمچ
چانو چايين يحاجوني ويرضوني مجرد عقد وبعدها ينفصل ويطلگها ماتبقى ولازم اني اتقبل هالموضوع ابساطة رفضت اطلع الهم واهلي اصلا رفضو
چنت افكر بصخر بس ياما نصحني شگد كرهني بالخطوبة ومارادها بس اني انعميت بحبه متت عليه
چنت من اشوفه احس الدنيا تضحكلي بيومها احس الله سبحانه خالقه الي وخالقني اله ولا لحظة اتخيلت ممكن اكون الغيره
حبيته بجنون وكسرني بجنون
اهله طلعو وهم ماحصلو اي امل لا مني ولا من ابوي واخواني
وبعد ساعات من البچي المتواصل
عيوني گمت مااگدر اغمضهن ومن افتحهن عبالك راشه ملح ورمل بيهن حسيت راسي راح ينفجر
فات عليه صخر اكثر واحد جنت اتحاشه شوفته
وبس شافني فتحلي ايده مأشرلي يريد يحضني انهاريت ماگدرت اوگف نصى عليه هو حاضني
..ليش تبچين مايستاهل دموعچ هالنذل
اريد احچي مااگدر الشهگات خنگتني
مسح راسي باسني
چنت خايفه يلومني وبچيت اكثر لأن ماحچه ولام
..بطه حبيبة ابوها واخوانها تبچين واحنا وراچ ليش البچي وحيده ومهضومه اله خيولي يروحلچ فدوه وعد ووعد الحر دين على هذا بچيج وحمار عيونچ وداعة شهلة لأبچيه
حضنته حيل
..لاتخلوني وحدي ابقو يمي فدوه
..ياروح اخوچ انتِ منو يخليچ گاعدلچ گعده هنا
شويه وصاح البنات وحمزة يدخن وجهه مطعون وماحچه شي بس چان يراقبني بخوف واني ودي احضنه ودي اگله حسيت بوجع گلبك حسيت بكسرتك اتمنى اكرهه مثل كرهك الها
طول الگعده يتحاشى نظراتي وابوي جبرني انزل يمهم
متمدده راسي بحضنه وكلهم داير ميدوري يحجون بمواضيع بعيده ودموعي تنزل وحده وره وحده
اشرلي حسام اگوم
..بطوط بدلي نطلع
اشرتله لا
..بدلي لتعاندين ناخذلنا فره ونرجع
طلعت ويانا نوره وهاجر وبنين
احس حتى الهوا ونسماته تجرحني وتأذي عيوني
سكتت والشهگه كل شويه تشگ صدري وتطلع
عبالك طفله يلهوها
البنات يواسني بنظراتهن قبل كلامهن
من خلال مكالمات حسام حسيت طلعوني لأن عمامي وجدي دازين على ابويه والولد يحجون بهالموضوع
حسام بحضنه فطومه واحمد يحاجيها ويهومش بدينه الها وهو بحضن امه
مدري شيحجون لغتهم مامفهومه
اني بالصدر گاعده ونوره تگل البنين
..بربچ مو تنزلين بينا منشور وتحضرياتا كليشة الحياية تقبلنها يگعد اخته الصغيرة بالصدر واني يگعدني وره
ابتسمت وبنين ردت
..على گولت امي كسر گلبچ كون شايفتني النهار كله انشر وهي سالفه هاي
اباوع حسام مبتسم عليهم ومن شافني مبتسمه على سوالفهن ضحك وگال
..بطوط ماتگليلي شنو سر ذني الحياية ليش هيج يسموهم
ابتسمت وجاوبت
..والله ماادري بس هنه وحمزة يعرفن
حجيتها وخجلت لأن وي كل كلمه احجيها اشهگ رغم ماكاعده ابچي سكتت ماحجيت بعد وهو ظل يحجي وي فطومه يگلها
..مااوصيچ هم نامي اليوم وخليني ساكن الحوش
هاجر حاجت بنين وبنين تگلها
..ولچ هويجر ترى افتح الباب واذبچ هنا بس شيخلصني من صخر
واجاهن صوت حسام خنسن ماحچن بعد نسمع بس ضحكهم من گال
..اني راح افتح البيبان واخلص واخلص اخوي وياي
وگفنا يم اشهر مرطبات ابغداد چنت اموت عليهن واتوسل بأبوي واخواني ياخذوني الهن
من جابلي حسيت بطعمهن مر مينجرع ماكدرت اكل غير خاشوگه وعبرتها للبنات وراي
بطريق الرجعة ظل يحجي وياي
..الله يحبچ وانكشف وانتِ ابينا وبدل ماترتبطين بيه وممكن الله سبحانه يخليج باختبار اكثر صعوبة اذا صارلج منه طفل ..ليش اتعبين نفسچ وتهلكين نفسج بدموع وملامه ابجي ضوجي حقج بس لاتنطيه اكثر من حجمه مايستاهل
مسحت دموعي واني اوعده خلص حارث ورقة واحترگت السواه ويايه مو قليل
كبرت وبداخلي يكبر حلمي ..انتظر اليوم اليجمعنا ويكلل هذا الأنتظار بفرح
وبعد ماكان اسمه يجيبلي الفرحه ويغير نبضات گلبي
صار الي اكبر جرح ودرس اثقل كتفي غدره ومال بهمومٍ اخفيتها وبانت رغم من هاللحظة حاولت اكابر وماابجي بعد ميستاهل ووعدت نفسي اتقوى واواجه ابويه واخواني واني رايده الخلاص منهم اريد يشوفوني اقوى
بس بقيت فتره طويلة اعاني
بالليل حچولي عمي يگلهم هو غلط من ساسه الراسه ومهيب حتى ضرب ضاربه بس ماعنده حل غير يعقد عليها محكمه وينتظر ابنه ينولد وينفصل عنها ويرجع يرضيني ونتزوج
وقبل لايحجولي رد فعل اخواني وردهم الهم كتلهم اذا الي يمكم معزة ولو شويه تخلصوني من حارث باسرع وقت
وبدو مرحلة الضغط على حارث بالطلاق
وهنا هو اختفى اتعمد يضيع نفسه وحركته نرفزت الولد اكثر وصارو حتى تهديد يهددون عمي ومهيب وامه تتوسل وخواته يتصلن بالبنات
واني بعدت نفسي نهائيا حتى تليفون رفضت اخذ مااريد اي شي يذكرني بي
وبيوم اني مداومه استلم شهادة الأعفاء چنت مكسورة حيل ومداومه بدون اي واهس والفرحه الجنت منتظره افرحها وياه حل محلها شعور الخذلان
بطلعتي لگيتها هوسه وردت اتخربط من شفته مدمه وصخر لازم راسه بقوه يضربه ابنيد السيارة
والناس تريد تمنعه ماتكدر
بخوف صرخت واتوسلت بصخر يعوفه ونطلع
تركه صاير نار وصلني واني ارجف شعطل صخر عن دوامه والشركة شلون عرف راح يجي شلون حس
ماحجيت من خوفي لا الابويه ولا للبنات بس بيومها بطني مغصتني واتمرضت خفت حيل خفت يصير الأكبر
وبالليل اتخربطت على ركضت اخواني وفزعتهم الصخر متعارك وي مهيب ومتضاربين شگد علاقتهم چانت حلوه خربت
عمي وابويه ماخلو المشاكل تكبر حلوها بسرعة وقروو ثاني يوم يجي يطلگ
وصارت الگعده والطلاگ ابيت جدي
گاعده اديني بحضني ودموعي شگد ماارد امنعها توكع
مقابيلي رشا متضايقه من بطنها كل شويه تعدل گعدتها الجهه اخر شي گامت واجت گعدت يمي
..بطوطه الجميلة يروح فدوه لدموعچ لاتبچين
شهگت
..والله شايفه هالحسرة والدموع يجي يوم والله يعوضج بدلها فرحه وامان ..الله سبحانه يحبج وكشفلچياه قبل الزواج لو بعد الزواج الموضوع اصعب بهوايه
مسحت دموعي واني افكر بكلامها وادعي ربي يكون صح يارب اتوكلت عليك امسح على گلبي وبرد ناره مااريد شي بس النار الي بگلبي تطفى
وصار لازم نتواجه ويرمي عليه الطلاق
حمزة بالدوام بس حسام وصخر وياي واخواني الصغار يم ابوي واگفين
جاهدت حتى دموعي لاتنزل مااريد اكسرهم ومن خليت عيني بعينه وشفت دموعه واثار الضرب البوجهه نزلت دموعي واني اسمه النهاية
وابالي صوته ووعوده مو هذه النهاية الچنت انتظرها بس اولا واخرا الخير بما اختاره الله سبحانه بداخلي اردد يارب عليك العوض ومنك العوض
مسحت دموعي وطلعت واخواني طلعو وياي وهم بقو ابيت جدي رجعنا للبيت خفت مايتركوني وحدي بس الحمدلله من صعدت والبنات صاحني اثنينهم حسام وصخر كلولهن خلنها ترتاح وكل شويه شوفنها من تتقبل الكلام روحلها
وبيومها نوره ماتركتني ابد الليل كله دموعها مانشفت ويايه وثاني يوم سراب ومآرب اجني وعهود كل شويه تتصل
وامي من عرفت اتصلت واستني وبجت وياي وبالأخير جرحتني من گالت خل ابوچ يحس بلوعة بنات العالم من شافچ ملوعه كل الصارلچ من وراه
چنت احاجيها من تليفون نوره لأن تليفوني غالقته ومااعرف بنوره تليفونها يسجل مكالمات صحيت الصبح على عركتها وي امي وهي تهدد وتتوعد
اشرتلها تسكت الحجي ميفيد وهذه قسمتنا بنات ابراهيم والف الحمدلله والشكر على كل مايكتبه النا اذا چان بسبب ابوي صح الله يغفرله واذا هنه شافنه وسيلة التفريغ القهر الله يهديهن ويصلحهن
بيومها توني ارد ارتاح وافكر بجدية عندي اب واخوان وخوات حنيتهم تسوه الدنيا
فزيت على صوت عركه متت خوف عبالي هم وي بيت عمي
نزلت اركض البنات يتصارخن
لگيت حسام مدمي وسام وينفض بيده وابوي گاعد يتفرج على صفحه گلهم
..كملتو يلا كل واحد البيته مااريد احد منكم هنا
نوره اتصلت بصخر اكثر واحد مبتلي بينا
اول ماوصل لگه وسام ماخذ جهاله وطالع ترك حسام واخذ ابويه وطلع
وهذه جانت صدمتنا مدري نفرح مدري ننقهر بس بالأخير دموعنا نزلت ولگناه
يتبع ...