بقلم نور الشمس
هاجر..
نزلت على راسي صاعقة مو سؤالها على بيت وعنوان عمامي وبقهر وعصبية رديت
..شعليج ابيت صخمان تباركيله على شنو وشنو سر العلاقات هاي مو نفسهم عمامي الي من انولدت وشافو لوني اعتبرو نسبج مايرتقي النسبهم ؟
مو نفسهم الشردتي بسبب هجران ابويه وبعده عنج خاف يخلف طفل ثاني منج مثلي بعد ماعرف اخوج وحالته وليش انتحـ ...ر
مو نفسهم الاصريتي ترفضين الرجعه الابوي بسبب تفكيرهم وخوف عليه منهم
عمر كامل مفتخره بيج امي قوية وضحت بسعادتها حتى تنقذني من بيئتهم ورجعتي بعد ماكبرت ابيئة مختلفه عنهم هم رجعتيني الهم وكلت ميخالف رجعت متعلمه ودارسه وواعية
رغم شفت الويل عدهم
شذكرج بيهم هسه اذا زينين مارجعتي الابويه من حاول يرجعج؟
تباوعلي مصدومه ونظراتها تحجي هوايه
اعتراض.. وغرابة ..وتعجب
وردت عليه بقهر
..تعلين صوتج عليه ولچ ..شنو اتزوجتي عود كبرتي عليه هاجر شنو هالاسلوب اني ماربيتج هيج ولج شبيج تخبلتي لميهم عليه عيالج وشرشحيني كدامهم بلكي يرتاحون ويبرد گلبچ
استغفرت ربي اريد اهدأ
..يمه انتِ ادوسين ابطني وتعترضين من اصيح اخخخ
شنو معنى كلامج هذا تعرفين كلش زين عثمان منو متزوج جان. وكلتيلي خربانه علاقته بزوجته من وره ابراهيم وكتلج جذب جذاب ياناس جذاب واحد خاين ناكر للعشرة يمشي وره النسوان وحجيهن
عثمان اول مااجيت اهتم بيه صح بعدين انشغل ولا عبالك شايفني ولايعرفني واغلب مشاكلهم جانت تلومه شلون شامر لحمه ودمه الي هي اني ..وقبلها يعرفون مرت اخوهم شنو وخلوني جوه رحمتها جابت ابن اخوها عليه لو مارحمت ربي جان اتصخم وجهي بس عمي ابراهيم الوكفلي واخذني منهم بعد ما وكفو متفرجين وهو الطلعلي حقي
عود من شافو الناس اكلت وجهم يلا راحو ع اساس هدو عليهم وسوو كعده ومنعوه يدخل هنا ولو ماعمي ابراهيم ميسووها ومحد محترمهم
هسه صارو هم الزينين تتباركيلهم على شنو على عمري الضايع واني بحسرة اهتمام واعتراف منهم
من جنت يمج ومن اجيت هنا اني غريبة وعشت ايام بس الله يعلم بيها
..اكلتيني حاصل فاصل شبيج ..عثمان بذاك الوكت ماجان جبير واله راي بس من اجيتي هنا ماقصر انتِ حاظرتني وصورج واخبارج منه توصلني وبس هو الريحني عليج ماانسى وگفته الي
اما ابوج صح الحد اخر عمره رادني ارجع بس كرامتي ماتسمحلي نبذني وفضحني وسواني مقشمره عليهم بأصلي وهواي حجي فشلني بي يم اهلي ونفسي مستحيل اتقبله بعد..بس غلطت غلطة جبيرة من مافرضتج عليهم فرض رحت انهزمت وهذا خله اهلي يميلون عليه ويستغلون وضعي وياچ
..وهسه شنو عثمان صح واني خطأ ..اني كتلج اختاري لو اني لو هم
..انتِ غبية البنت بدون عمام واهل محد يحترمها ولا يشتريها بفلس ..وترى لتسوين زوجج وابراهيم الماكو منهم ترى اجيتهم وابراهيم منبوذ من الكل يكعدون كلهم ومحد يكعده ولايحترمه لأن يظنوه جابلهم وحده بلا اصل وكسر بيهم وزوجج ابوه جنسية ماجان يسويله
كلهم نفرو ابراهيم ومحد من اهله يحترمه
وابوج جان الوحيد الماينطي بي ويلومه على اختياره هسه صار ابراهيم الكل بالكل لو الفلوس تلعب دور
..زين تعرفين يعني دمرو حياته بنبذهم اله وملامته وصنعو منه شخص ثاني .. بس فاتج من القصة الجزء المهم بعد مارحتي الاهلج بسبب نسبج المو مشرف الهم
باوعتلي مصدومه شلون احاجيها هيج ...فاتحه عيونها بكل وسعهن
كملت اريد ابينلها نظرتهم عنهن الاثنين ليش تصدك هاي وتعتبرها تقليل وتستنكرها على نفسها وتبتعد شنو الفرق يعني
..ليش ماقبلتي قابل مجذبه ..نبذوج ونبذوني اني بنتج واول من نبذني ابويه لو بيده وماعاقد يمكن هم ميسوي جنسية مو صح ؟
لو شتكولين
و ام صخر جانت تجهل اهلها بسبب خوف جدتها المبالغ بي يمكن من اثر صدمتها بقتل بتها وعائلتها ظنتهم يستهدفوها هي وحفيدتها وخفت اهلها عنها يعني عمتي جانت تجهلهم بينما نسبهم يشرف اكبر واحد
كبار سوگ الشيوخ اهلها وعشيرتها من اكبر عشاير الناصرية
بينما انتِ تعرفين عندج جدة من نسل العبيد مثل ميسموها هم وضميتي عليهم متعمده واعترضتي على اعتراضهم
..انتِ تتعمدين تهينيني بسبيل الدفاع عن زوجج وابراهيم لو شنو ماجذبت جانو اهله مايحترموه ابوه حرمه من كلشي حتى من الكعده بين اخوانه
..هذا قبل وهسه الكلمة كلمته وابوه واخوه يحبوه ويقدروه وزوجي اغلى واحد بيهم لأن عرفو الغلط منهم والله سبحانه نصرها وطلعلها اهل يشرفون اكبر واحد
..اني ماحجيت شي ليش هيج ثرتي وكلامي مو عن عمتج حشاها المرية شعندي وياها ..حجيي عن ابراهيم واهله وابنه
..انتِ جاي تقللين من الناس الرفعوني واحترموني وراكضه وره عالم واحدهم عنده سبع وجوه
ياعثمان هذا الي تباركيله
..يعني اني شنو اغير من ابارك غير لأن جان مواصلني وكاسره خاطره اكثر منج ولأن هو انطانا العنوان ودلانا هم ..ويعرف بينا جايين شلون يصير اغلس عنه من الاصول نمر نسلم وبس
..روحي سلمي وبعد لتوصليني ابد
..ماما هاجر شبيج انتِ منو مخبلج عليه
..الدنيا خبلتني انتو خبلتوني ..وبعدين ليش مجايبه ابنج وياج ناكله شنو لو ماتدرين اني ملهوفه اشوفه والصور الكتلج دزيها هم غلستي عليها
نصت راسها تلعب بحلقة ايدها
..خفت تشوفيه وتكرهيني لأن اخوج بشرته بيضه حيل ماورثته جيناتج
صفنت عليها شرد احجي باوعت واحس بطني بدت تمغصني من القهر نار اشتعلت بصدري
..انتِ خالقتني لو خالقته واكرهج ..معقوله متغيره انتِ لو اني جنت مخدوعة بفكرج والقوة الجنتي تزرعيها بيه ؟
..كل الي يشوفه يكلي شمعنى الجينات طلعت يمها وبس وهسه جبيره وتفهم لو صغيره متميز بس راح تحقد واني اصلا هم انقهرت زيادة خاص بعد المر عليج هنا بسبب لونج .
..شنو المر بلا انطيني شواصلج ..اساسا من اجيت اكتشفت لوني شي ثانوي كدام المشاكل الشفتها وتعرفين كلش زين اني احب نفسي ومامتأثره بهذا القدر الواصلج
..لو مالونج مااتزوجتي ابن ابراهيم المنبوذ المعقد جان انطاج البقية ولده اللازمين شغله وفلوسه .. ولج يكولون اكل من ايدج مياكل من طاح حظ امج على هالقسمة
..ترى ابن ابراهيم اتزوجته واني ميته بي وهو كاره الزواج كله وبسب حبه الي اتغير كلشي واليوم اني وياه احلى عيشه عايشين عثمان النسيواني ابو الگالات وانتِ تباركيله كليله بنت اخوك تگول حظي اسود مو لوني لأن ماكو بعمامي رجال
..السانج فالت فد مره وصايره بيئة ومو مؤدبة وواضح تأثير المكان عليج
..تمام اني هيج ومدام حابه تروحيله اني راح ادليج بمكانه بالضبط وروحي باركيله هسه لاتتعطلين اكثر
..هايه طرده لو شنو ؟
سميها مثل متحبين
كامت مني وهي تتأسف على تربيتها الي ووين وصلت اني ..واني بداخلي لوم النفسي جبير لأن فعلا جاي اطلع من اخلاقي بس مو بيدي احجي واتندم ومستمره بهذا الشعور
وهم هي سبب ماادري شلون واحد يطلع اسوأ مابيك ويكعد يلومك
راسي صدع وجسمي جمر وظهري نار اشتعلت بي ماادري شصار بيه
اتصلت هي بخالي تكله هسه نطلع وهو يسألها شكو واصرت ع الروحه و تحجي بانفعال
..دقيقة ماابقى هنا بعد يلا استعجل
شويه واجه صخر صوته صار قريب للغرفه
يصيحني
..وين هاجر ..حبيبتي شو تعاي احجي وياچ
فتحت الباب هي تضم تليفونها بجنطتها وترجف اعصابها واني مو اقل منها وضعنا كلش مريب قلص عيونه وهو مركز بيه وبيها حاجاها
..ام هاجر ماكو طلعه منا قبل الغدا ..ماباقي شي بدينا نصب وبنتج صارلها سنين مشايفتها ابقي يمها اليوم
ردت بدون متباوعله
..لا طريقنا طويل وابني عفته يم ابوه ومااكدر اتأخر اكثر مشكورين عيوني متقصرون
..بدون غدا مطلعون اتغدو وطريق السلامة ان شاءالله
حجاها بحزم ناهي كل نقاش وانسحب واجت رشا بعده
..تفضلي خالة هنا نتغدا خل نشوفج احنا هم نتعرف عليچ ..متشوقين المعرفتچ وهنيالچ بهاجر درة والله .. تعالو نتغدا سوه وبعدها نخليكم براحتكم انتِ وياها
امي اتشكرتها على كلامها احسها تريد تمشي الامور شلون ماجان
راحت وياها يم عمتي شهلة ونسوان اخوها وخواتها
واني لأول مره احس احتاج اتقيأ وبدت عندي اعراض الوحام مدري القهره بمعدتي صارت
فتت للحمام اتقيأت الحد ماخويت احس امعائي اتگطعت اريد ابرد نار صدري نكعت روحي تنگع بالمي اغرف من البوري بيدي واشمره على وجهي وصدري
طلعت ينقلون بالأكل وصخر واگف قريب للحمام وحلا يمه يسألها عني وتكله
..لازم تراجع طبيبه جنت مشغول بالوالده حقك بس ميصير تتعطل بعد واذا تحب اني بنفسي اخذها
دار وجهه عليه اقترب وهي هم سألتني طمنتها وراحت تكمل شغلها مديت ايدي اله مو عجز بس احتياج ... لزمها وصلني للغرفة دفع الباب وفات
..شصاير وياچ
..ماكو شي بس تعبت يمكن لأن مانايمه وكعدت من وكت
..بالج على نفسج ..صحتج وصحة الطفل اهم من كلشي
عرفته حاس اكو شي مو طبيعي
طلعلي ملابس غيرتها ورتبت نفسي وطلعت يمهم توهم بادين ياكلون
گعدت قريب الامي وقربت الخبز عليها
مااريد احد ينتبه للصار بينا لو يشك بشي
باوعتلها مركزة بسوالف خالتي شهلة وي خواتها ونسوان اخوها والموضوع جان يخص طلابه عد اهلهن وذكرن بيها اسم العشيرة يحجن بأخوهن ودوره وشلون انحلت
اني مااكلت وكتلهم مااشتهي شي وظلن يحجن عن الحمل والنساة وتعبها ويدعلي بالتمام
سوالفهن بسيطة حلوه مريحة يحسسن المقابل هو من اهلهن ومايتكلفن ولا يكلفنه وياهن حتى اني نسيت الصار وظليت اضحك على سوالفهن وهنه يتنقلن بمواضيعهن من الطلايب المشاكل الجهال والجناين عليهم لمواقف الضحك الصايره وياهن
وامي سألنها عن البصرة وسألن على المنطقة وذكرن ناس عرف الهم يسكنون هناك
شويه وكملن الاكل والبنات جابن الجاي وكعدن يمنا امي انطلقت وياهن تسولف وبعدها سلمت وراحت
وقبل لاتطلع وهي تسلم باذني همست
..هذا تعاملج ويايه تتندمين عليه بيوم محد يحبچ مثل امج وحقي اخاف وماامن من الشفته والمر عليه
واريد عمامج سند الج الغلطة الي ارتكبتها من البداية بانسحابي بيج بدون ماافرضج عليهم ماتتكرر
..ان شاءالله ماكو ندم لامنج ولامني وراح نبقى على تواصل وكل وحده منا تقتنع بحياة الثانية ومتدخل والفات مات المات مايعدل يمه وعذريني اتواقحت وياج اني
..هذا هو تمام ولتزعلين من ابقى مواصله اهلج حتى يوكفولج بالوكت المناسب ..لأجل عين الف عين تكرم
واني عاذرتچ ومحسبه حساب حملج وصحتج
..براحتج بس تأكدي لو مشموره بشارع ماراح احتاج منهم وكفه ولا التجأ الهم
..راسچ يابس مثل ابوچ وعمچ المتابهيه بي ..الدنيا ماتمشي بيباس الراس الدنيا اتعب وكدامج اني تعبت الدرجة صرت اريدلي شجره استظل بيها
اشرتلها بيدي ع الجنطة
..جنطتج ماما
سحبتها ومشت والجنطة هذه جانت بيها هداية من خوالي
ياخوال الطلعوني من بيتهم بليلة ظلمة محد منهم اعترض وكلها لا هايه مو بس بنتج بتنا وربت عدنا
كلهم ضاجو على جنتهم واعتبرو كرامتها من كرامتهم اما اني غريبة ومنبوذة هم مااسوى
لو خالي الجابته واجت ونست شكاويه الجدي وشلون اتخبل عليه
طلعو واني بالي وظهري ماهدأ ابد
عقلي يگلي انتِ غلط وتصرفاتج وي امج مامعقولة ولا مقبولة وگلبي قسى حيل وماجاي ينسى الصارلي لامن عمام ولا من خوال ومامتقبله العلاقات التحجي بيها وتصورها ومن صالحي
لزمت ظهري متوجعه وحاجيت رشا خايفه
..رشا ظهري موتني
..ليش اسم الله شايله ثگل ؟
..لا والله كلشي مشايله
من فات صخر حاجته
..لازم ناخذها للطبيب مو زين تشكي من ظهرها
عمتي انخبصت وهو هم
گل الرشا
جهزيها نطلع بتلاثة ونص مسافة الطريق وحجز نص ساعة اقل شي هم يلا للخمسة ونص لو نحصل سرة لو لا
..نص ساعة شنو انت والليل ..اني ابقى يم عمتي وخل حلا تروح وياكم
صاحت حلا تفهم يم اي طبيبه راجعت قبل
حلا كالت طبيبتي تتأخر اذا تحبون اتصل بيها احجز وكالت الصخر البنيه التسجل اكرمها وتفوتك بسرعه ابوك هيج يسوي
ابتسم صخر
..اكرمها لو ارشيها ؟
..بعد انت شتسميها سميها ابوك يكول كرم
وصدك اتصلت حجزت وهي راحت البيتها جهزت نفسها تروح ويانا
عمتي شهلة قلقت واخترعت عليه رحت طمنتها وكعدت يمها
..عمه يمكن من كلياتي اني رمل عندي من الاساس ويمكن من عالجته اخر مره مراح نهائيا وهسه كلياتي اذاتني مو غير شي لتخافين
..طيبة ان شاءالله ..هو الرمل هم مو زين للحامل بس ان شاءالله سهلة گلبي بارد عليچ
استحيت من نفسي خطار يمنا مو وكتها بس اخاف اسكت واتندم وبعد متفيد الملامة
طلعنا وهو يوصي برشا على عمتي وخالاته گلها عشاهم اجيبه ويايه لتعبين انتِ وبالج على ابنچ لاتنطيه لمحمد وياسر ترى ماينتبهوله ينسوه
واتصل بأحمد يجي هنا يم ابن خاله
واحنا بالباب احمد طلع من بيتهم اجانا
صخر كله
..شو مبووز بس لاتكلي ماخليتني اخابر هم
..يابه والله مااتهنيت بخطوبة الدنيا گامت وياي منو يخابر ويعيش رومانسيات بنصكم ..بس مو هاي سالفتي هاي مكدورلها
..تكدر تضمها من ارجع ونسولف
..لا خليك ع الرسايل ويايه ..مو ع اساس ابني بيت بين مايكمل احنا هنا نتزوج
..هسه ابوك يكلي البيت يبقالك انت مايحتاج تبني بس غير بي وجهزه للعروس وغير اثاث اذا تريد لأن عبد راح يشيل واني احس عبد ماهاين عليه ينقل اغراضه هسه ومحتار
..سهله ابو شهاب لايظل بالك نكعد سوه ونسولف وكلشي يترتب عبد سهل اذا سالفتك يمه اعتبرها خالصه
..اني مااريده يحس اني فرحان بطلعته ومستغل فرصة
..مايحس هيج ليش يحس من الاساس هو ناوي هناك يكعد بس جان اباله يصلح بين ابوك وامك يلا يتحرك والبارحه كلي زواج احمد بدون رضا امي غلط وامي ماترضا الا ابوي يروح وابوك رافض وحلها يمهم كلهم عداك لهذا عيش يومك وافرح والله يسهلك ويحل الامور انت مابيدك شي
اتوادعو ووصاه يبقى هنا ونحاول مانتأخر
طلعنا وعيني ع الطريق الزرع والكيعان الخضار وريحة الزرع اصوات الحيوانات كلشي هنا يختلف
اتذكرت جيتي هنا واول مره افوت المدينة جان المنظر فوك الخيال
شكد ماجنت خايفه ومهمومه بس انشرح گلبي بهالمنظر وهسه هم نفس الاحساس
انتبهتله عينه عليه ابتسمت اله اطمنه
وحلا تحجي وياه وتسأل
..شوكت تزرعون للموسم الجاي
.ماباقي اقل الشهر لازم نزرع
..وشوكت كل هذا تلحكوله عرس احمد كون يتم كبل هذا الوكت
..والله ياام عباس ماادري بس نلحگ ان شاءالله مو وحده كلنا وياه
..الله يحفظكم متقصرون اكيد ..بس اذا ابيت اهله صدك يحتاج ترتيبات هوايه
..الظاهر ابو البراهم ماناويها على خير وقرر البيت يصفى الاحمد
ضحكت هي
..ابوك محد يلحگه من يخطط بس الله يستر من تخطيطه
..انتِ بأمان لاتهتمين
ابتسمت وماعقبت
وصلنا للطبيبة بعد فتره وصدك مافوتتنا الا من كرموها ع كولت عمي
صعدت ع السدية تاخذلي سونار بعد ماحجيتلها كلشي وكتبت ملاحظاتها
گلبي يدگ سرييع وخايفه حيل
..وضعج تمام بس تحتاجين نص حبايه للتقلصات الصبح والليل وفيتامينات وحاولي هالشهر ترتاحين وراح اكتبلج كل اسبوع حباية مثبت هم
اسبوع وتكملين شهرج الثاني
ماجان شي قوي الحمدلله وكتبتلي علاج للتقيأ عند الحاجة
طلعت مرتاحه
ومن خوفي وراحتي وهو ابطني متت خوف عليه اتندمت على موقف امي
راسلتها واحنا بالسيارة
..ماما رغم كلشي اني احبچ هوااي ..وهواي اعتذر عن كل موقف اذيتج بي بقصد وبدون قصد
شويه واجتني منها رسالة
..ياروح امچ ..اني هم رجعت منج ابجي ماجاي اعرف احتويج مثل قبل ولا اعرف اتصرف ماادري شجرالي والله ماادري المهم ..لعيونج مارحت ولا راح اروح وكل تواصل وياهم من الآن انقطع
وهايه مااحسبها زيارة اجيج بعدين بس لتحجين الزوجج وعمتج الصار بينا عيب
..احبج هواي
رسلتها دموعي نزلت مسحتها مااريد احد ينتبه
مدلي بيده علبة الكلينس
يارب شلون شافني وانتبه
..فرحانه الطفل بخير
..لتقلقين اذا مقسوم النا يصير وخليها على الله حبيبتي
بالطريق مر على الگصاب اليتعامل وياه واخذ كمية لحم خاص للتكة والكباب يشوون بالحديقة شلت هم للريحة بس لا اكرهه
واول ماوصلو وشوو متت عليه اباوع من الشباك منتظره اول شي متت عليه وهو بيده ويمه ابن خاله يگلبون بيهن لااكدر اروح اكله انطيني ولااكدر انتظر
حاجيت حلا
..عليج الله صيحيه اريد البيده هذا مو غيره
حلا ضحك وصاحتله
اجه من بعيد مستغربها متصيحه هيج بالعادة كالتله مرتك ماتت على هالشيش البيدك مساع
اشرلي وين
..اول واحد من اليمين
ضحك وهو يباوعله وراح جابه اكلته وهو حار يشوي ومستغربة شبيه هيج اليشوفني يكول بحياتها مماكله شي
اكلت وشبعت ورحت يمهن وخطيه من جابو العشه ميعرف بيه ماكله ليكدام كل شويه مقدمات الي
اتصلت بيه بنين استأذنت وكمت
حاجيتها فرحانه وعرفت كل الاخبار يمها
..يكول احمد مملحك اتصل
..يمعوده ينقذوني الف شغله عندي اكملها ويريد التليفون على طول بأيدي
..يحبچ غير عذري حبيبتي
..اني والله هم هوايه احبه بلغي من يمج ..اريد اكمل جهازي ارتب نفسي ادلعها
لو تشوفين اتصل بيه الصبح كفشتي بحاله يرثى لها لأن جاي اعزل بجنطي وناويه اكمل واسبح وانظف بشرتي ومن هالسوالف نمانم العروسه
سألني وين جنتي
قابل اكله جنت اعزل بجهازي فوگ بالغرفة البس بنكه بيها شاردة من هوسة جهال اخواني طبعا لا كتله جنت اسبح حبيبي
سأل يالون لابسه هسه
گتله احمر ناري واني الله وكيلج لابسه اعتك ثوب عندي لأن فانيله زبدة وربع ردن مريح بس حتى اشرحلج الحال مفتوك من جتفي
وهو كلي فتحي كام كمت مااندك اللمس منين
صخام بوجهي مخليه اصبعي ع الكامره واكله النت ضعيف مينقل الصورة تمام
متت ضحك على سوالفها وهي منطلقة
..لج والله تخبلين بكل حالاتج
..لا والله الا حالتي هاي تخبله هو
هسه اني راح اصدمه اكشخ بالليل وارتب حالي وافتحله كام ويدلل عليه الغالي
سولفنا هوايه وسألت
..الهسه امه مزاعلته صح
..اي والله الهسه شنو گلج هو
..يکلي ميخصچ من زمان امي هيج تزعل فترة وترضا الحالها
..والله مااعرف بنين بس هو الزعل مو بس وياه وي عمي لهذا ماخذه موقف
..مااعرف شكلج بس الوضع بدا يقلقني بالبداية مافهمني هيج
..ميخصج حبيبتي هم بينهم العليج نفسج وزوجج البقيه راح تحبيهم ويحبوج
..كافي انت تحبني ياحلوو
..اني شنو من تشوفين احمد شلون طاير وفرحان بيج بعد متعرفيني وين صرت
..لا ماانسى صداقتنا ابد
سولفنا هوايه نهيت الاتصال وطلعت رشا رايحه موصلها صخر وراجع
جانت ناويه تبقى بس يمكن استحت من اهل عمتي
...
رشا ...
أحببته بصدقٍ نادر، ورأيت فيه واهمة انه البيت الآمن لي قبل أن يكون الزوج، والأمان قبل أن يكون الرجل.
منحتْه سنوات من عمري وصبرت على الأيام الصعبة، وظننت أن الوفاء يكفي ليحفظ القلوب.
لكن النهاية جاءت باردة... بكلمة طلاق،
كأن كل الذكريات لم تكن سوى صفحاتٍ يسهل تمزيقها.
ولم يكد يمضي وقتٌ طويل حتى سمعتُ بخبر ارتباطه وزواجه من أخرى،
بينما انا انتظر اتمام عدتي ، وأجمع بقايا قلب حطمته الصدمة.
لم تكن الغيرة سبب حرقة قلبي ، بل شعورها أن حبي، وتعبي، ووفائي، لم يتركوا في قلبه أثرًا يمنعه من المضي بهذه السرعة.
اتبتسمت أمام الناس حتى لا يقال تلك القوية انهارت،
لكني بكيت بصمت وحين أختلي بنفسي تتصاعد اهاتي مصخوبة بشهقات ودموع
، لا على رجلٍ رحل، بل على امرأة كانت تظن أن حبها سيُقابَل بالرحمة، فإذا به يُقابَل بالخذلان.
ومع ذلك، بقي في قلبي يقينٌ واحد: أن من كسرني اليوم لن يحدد قيمتي غدًا، وأن الله يجبر القلوب التي انكسرت ظلمًا، ويعوّض الصابرين بما هو خيرٌ مما فقدوا.
ايام صعب اشرحها اداري خيبتي ع الكل واشوف القهر بعيون الكل عليه ابويه صخر امه خواتي وخالته الي هي مرت ابوي بنات عمي الكل
ورغم هالمواقف ثگيلة وتألم لكن تكشفلنا شكد هم الي يحبونا
وشفت بنات عمي شگد متألمات عليه ومقهورات ومهتمات الي
حتى اولاد عمي ماقصرو وي صخر وطلعو براي واحد وكلمه وحدوه وجبروه ينفصل بأدب بدون مماطلة والأهم ابني الي وحضانته الي حتى لو صار زواج وهذا اعظم انتصار طلعت بي من زواجي كله هو ابني وحبيبي
وبيوم الحنة رجعت من بيت صخر فرحانه الحد ماعرفت الليلة حنته من الهوسة الي مسويها والماعزيم من الاقارب وستوريات الحبايب خاص الاغلب امهات طلاب عندي يتواصلن ويايه مناك من اهلهم شفت النشر
ماجنت مصدومة بس مقهورة ومخنوگة حيل
اجاني اتصال من رقم غريب ماجاوبته ظنيته هو يريد يمسلت ويتشاطر ويايه
شويه ووصلتني رسالة
..مرحبا خوية اني اني من طرف اخوج صخر ابو الطفل سجاد وبلغتني الوالده عن التسجيل وشلون اكدر استثنيه اريد اعرف الطلب يتقدم بالدوام لو قبله اثناء تسجيل الوجبات الجديدة من الطلاب
اذا تسمحين اتصل افهم منج
واني مترخص من صخر مجرد استفسار مو اكثر
صفنت اتذكر هذا الشاب نفسه النقذلي ابني بوكتها لو ماعيب وحرام بست ايده ع السواه ابني اتخشب وعيونه ابيضت وهو حياه
رديت
..وعليكم السلام ..اهلا اخوية اتفضل تمام اتصل
بوكتها گلبي يصرخ من القهر والألم عجيب وماادري شلون حاملته
ومالي خلك ابد بس صخر وموقفه ويايه شفعله
رن التليفون وايدي على گلبي اهديه وبداخلي اكول عيب اعكس قهري عليه ارد طبيعي
اجاني صوته
وتلقائيًا منظر الجگارة بحلگه وهو يحجي صار بعيوني عبالك دماغي انطى شاشة عرض ماجنت منتبهه للموقف لو ماهاجر حاجيته الي ومنبهتني عليه
..السلام عليكم
ماانطيت مجال ارد اخلص من الاتصال اخاف يبين عليه قهري رديت ارد اختصر
..وعليكم السلام اهلا بيك ..بخصوص الموضوع
تكدر تقدم طلب استثناء وترفق اسم المدرسة الاقرب عليك ..قبلها تجهز المستمسكات وتقارير حالته اذا عندك ..الولد نطقه تمام حسب ماشفته وحجيت وياه قبوله مضمون اخذها مني
..بهداي.. بهداي علي
ابتسمت فشلانه
وهو حجه
..المدرسة محددها والتقارير كلها عندي الاستثناء اقدمه بهالفتره لو أثناء الدوام ..وهم ردت اسأل لو رفضو مثل كل مره اكو اجراء يتخذ بحقهم ؟
..والله شگلك بخصوص الاجراء مااعرف بعد انت وحظك ومعارفك بس من تاخذ استثناء مو من حقهم يرفضوه بعد وانت هم اتعب عليه وظل مراقبه ودرسه زين يحتاجله تكرار وتركيز وانت تعلمه
..ان شاءالله خير
رجع استفسر شنو يحتاجون بعد
كلشي اعرفه انطيته اله لأن عندي صديقتي اني وياها قبل فتره قدمنا ورتبنا الموضوع الأبنها
اتشكرني ونهى الاتصال بكل ادب
قفلت الفون ونمت والحقيقة مانمت للصبح مقهورة واتذكر فرحتي بحنتي والخيبة الحصلتها
حضنت ابني ونمت قريب للفجر واني ادعي ربي يحفظلياه طلعت بي وبس كلشي غيره ماهمني حتى البيت
اتحلمت
بنفسي ضايعة وتايهه وادور طريق يعرفني بأهلي
اريد بس اتذكر اني منو وين اهلي الطلعت منهم اريد اعصر دماغي اتذكر وجه ابويه خواتي كل صورهم اختفت من خيالي
جنت اعيش بصراع خايفه ومرعوبة وبديت اعطش حيل وادور بالحلم كل الوجوه غربة
فجأه لگيت نفسي گدام قبر جديد بعده ترابه مبلل ورطب
وقبر محفور وجاي يتجهز
وبداخلي اسأل
اني ليش هنا خاف هذا الي !
كل الموجودين غربه وجودي بينهم غلط بديت اخاف
وبداخلي اگول لازم هسه اركض بعيد عنهم بديت احس بوحشه عجيبة
وشي بداخلي يگلي لتركضين تجذبين نظرهم الچ
بخوف بديت انسحب وشعور الخوف يزيد ماجاي اندل اي اتجاه اروح بيه
وشفته هو من بعيد وجگارته بأيده جمرتها تلهب
كأن عيوني جحضت و مامصدگه هو اجاني نفسه
عبالك واحد من اهلي احسه يخصني .. ركضتله بكل قوتي وخليت ايدي بأيده واگله طلعني منا جر ايدي حيل وركض اخذني بعيد واني اسأل
..انت تعرف اهلي موو اخذني الهم
فزيت مرعوبة شربتلي بطل مي شربه وحده واحس عطشانه الهسه والركض جني صدك راكضته
..بسمك اللهم .يارب دخيلك شنو هالحلم
اكيد اضغاث احلام لأن نمت مغثوثة
ورجعت افكر بي شكله طبع بعقلي
اسمر طويل بس بعيونه نظرة غريبة چان خايف عليه بشكل حسيته متعني الي وكأني وحده من اهله
مرت ايام وقهرة عثمان بلعتها وهالحلم ماجاي ينبلع
وكلما اخاف منه اتذكر نظرة الامان بعيونه وفرحتي من خليت ايدي بأيده
اتوالت الصدف الجمعتنا وصار جزء من تفكيري فعلا بس ماانطيت النفسي مجال ابد
كل مابداخلي شي يتحرك انهر نفسي واجبرها تنسى
ومرت ايام واجو البيت صخر واني عدهم
احمد دك باب المطبخ وراد اجهزلهم چاي
خليت يمي محمد توه بادي يمشي بس ع الحايط لو على اثاث البيت واني اغسل قوري الچاي واجهزة صار جوه رجليني شلته وعلگت النار
وخليت كمية تناسبه وهيل ورحت اشوفهن عمتي والحبايب نامن ومرت ابويه راحت الأبوي مابقت وعزمتهم على غدا باچر
خدر الچاي وصحت احمد انطيته الچاي
وگعدت وطول مااسمع صوته نظراته بالحلم مافارگتني
..يارب دخيلك ليش هيج يصير وياي
اسمعه يسولف عن دوامه والفهمته هو ضابط بالداخلية
حسيت والله شكله ضابط من حالق اللحية ومخلي شارب
صار عندي فضول اعرف عنه
هو شنو اسمه يربي شنو
اسمه اسعد ..اي يمكن مسجل فيسه ابو سجاد
لا مااعتقد خل ابحث باصدقاء صخر
وفعلا بديت ادور بمتابعيه
شكد اسماء شالقصة
واخيرا لكيته
..اسعد الخيگاني
اباوع صورته بمكتبه ونشاطاتهم ناشريها هم بس مو هو ناشر مجرد اشارة اله
وتبريكات الترقيته قديمه
ماكو شي يجذب
جذبني معرف حساب الانستا دخلته
وهنا مختلف ولا عبالك حسابه هو ناشر مقاطع گعدات الهم بالبر ويتساجلون بالشعر نوبه ونوبه يجروه بونين مثل مكاتبين
والتعليقات كلها تكتب
اهل السوگ حتى طفلكم شاعر
نزلت بمقاطع اعراس الهم ناشرهن و هوسات
ومقاطعه الشهر محرم مواكب وخدمه اتونست وغيرت جوو
جفلت من اندگت الباب الداخلي وصوته يصيح
..ام اسعد يمه ..عينج على سجاد راح نطلع وخاف يگعد وراي
امه نايمه وهو يسولف جنها يمه جليت صوتي وبارتباك مامعتاده عليه حجيت
..نايمه الوالده وليظل بالك اني يمه
..رحم الله والديچ ..وممنون
مدري ليش ارتبكت يمكن لأن جنت فاصله بعالم وياه بنشره وخفت يحس ويستشعر هذا الاهتمام
شويه واجه احمد يسأل
..اسعد وين
..بلغ امه طالع ليش مو انت وياه
..لا اجاني الصباغ وابو الديكور يشوف البيت شيحتاج بس وصيت عمار وعزام بالباب احتمال هم طلعوه
اتصل بعمار كله اخذته للكيعان شيسوي بالبيت نتونس هنا
بدل ماارتاح متت من القلق شكد اني فاصله بحيث منتبهت من يحجي هو وي منو يحجي وصوت منو غير صوته
قررت ماابقى بعد خلص يمكن انجنيت اني والا المثلي مستحيل تفكر برجال كون اطلع گلبي وادوسه بس عقلي الخاين شلون
والحمدلله اجه اليشغلني عرس احمد شغلنا طلعنا نجهز للعرس وحضرنا فساتين واخذت بنات ريمه اشتريلهن لأن امهن ماتگدر بعدهي والده جديد
وثاني يوم غزاله اجتنا وهم التهيت وياها وصرت الهي نفسي بكل وسيلة
بس شلون باتصالاته هو ورنا عبالك اخوه مو عمه وابن اخوها
سوالفهم كلها الغاز وضحك وارجع اذكر نفسي بغلطي والموقف اعديه
وبيوم اجاها وجايب ولدها
فرحتها ماسايعتها حارت شتشتري قبل بيوم وشتحضر
والدمعة بطرف عينها ومن اجوها بچت وهمه هم يبجون بقهر
يمكن لأن متزوجه وماهاين عليهم
تركناهم براحتهم وابويه سلم عليهم وكلهم شوكت متحبون تشوفون امكم وتشتاقون تعالو واذا محد يجيبكم اتصلو بيها وآني وامكم نجيكم
مدري ليش الموقف خلاني يوم كامل ابجي
شفت ابني بيهم وقررت خلاص زواج ماكو
وبجيتهم العرس احمد معزومين من عمو اتفاجأت بخطوبتي
ومثل مااخذت عهد على نفسي زواج ماكو وانتهى الموضوع
رفضت وابني هو العذر المقنع والصحيح
....
صخر ...
كالعادة بدوامي ادخل واني شامر من ظهري كل همومورغم الحمدلله الهموم خفت وظهري بدا يستقيم بعد ماوضعي استقر وكدرت اتخطى كل العقبات وي الأنسانة الي اختاريتها واني موفق بين قلبي وعقلي
وحتى حالة امي حسبته اختبار عابر بفضل ربي
انكتب بي نجاتي قبل نجاتها
وتمم الفرحه بيض وافر من رحمته واغناني بغناه بخبر حيالي عروقي المتيبسة
وصار المستحيل حقيقة وگدرت احس بلهفة شعور الأب
اتمشى بممرات المشتشفى واكتب رسالة الهاجر مءكرها بعلاجها وعلاج امي ولينتظروني ع الغدا اتأخر عليهم اكيد
جاوبتني بشقاوة
..الغدا اذا مو وياك كل طعم مابيه
..نوتيلا اتغدي زين وغداي بيج.. يلا حبيبي باشرت بعدين اراسلج
عبرت الصالة الينتظروني بيها المرضى اسأل عن صديق
ماقصر بسؤاله عن امي وغطى مكاني أيام ويوم امس انتبهتله تعبان ونصحته ياخذ اجازة ويراجع
وحبيت اتأكد لكيته مجاز
رجعت للقاعة
المريض شاب يعاني من شلل ناتج عن سقوطه من بناية اثناء العمل للأسف هوايه من الخلفات والعمال يشتغلون اماكن عالية وحساسة بدون ميتخذون اجراءات السلامه ويأمنوها ويأمنون نفسهم
استلمت الملف اقرا وصايا الطبيب وشنو نوع العلاج
عيوني عليه يائس الدرجة ماحرك نظره اتجاهي ابد وكأني عدم
..شلونك يابطل ؟
..انتو الدكاتره ليش تحبون تجذبون
..معترض على تسميتك بالبطل ؟
..وين البطولة واني شخص عاجز متحطم
..البطولة مقاومتك الوضعك مجرد حضورك يمي من فكرت تتعني من بيتك لهنا بدافع امل ممكن يخليك ترجع الصحتك انت بطل ..
مديتله ايدي يستند عليها وسحبته بأهتمام مراعي وضعه واني احجي
..العجز الحقيقي وقوفك بمرحلة تطلب منك تقدم وانت تتراجع ..مو انت العاجز بيوم من الايام اني جنت عاجز رغم هوايه مثلك طلعو من يمي يمشون واني الأعجز من الاستمرار والتقدم
الى ان صرتولي دافع ..وصرت اقارن نفسي بالمثلكم
وجبرت نفسي اتقدم ..فكرت ارجع الموقفي الأول وفكرت الغي كلشي وفكرت اعيش ايامي اليجن مثل الراحن صرت اباوع لليمي.. لعيون امي ..للأنسانة الحبيتها ..واخيرًا اتخطيت وشفت الصعوبة بالتردد
الصعوبة بفكرة المااگدر ..بالتالي گدرت وموضوعي اصعب من يمك ليش اصعب لأنه الم ماملموس ياكل بالروح ..مااله مسكن الا ذاتك
..ماكو الم اصعب من الم روحك من تشوف نفسك عاجز تعين حتى اهلك وانت مصدر رزقهم الوحيد
..وهذا الألم من توظفه دافع الك يدفعك للأمام بمسيرتك راح يكون نقطة تحول ..عكس ماتخليه دافع للرضوخ تتأذه وتأذيهم اكثر
خليتله الحزام وبديت وياه التمارين
قطرات العرق غزت جبينه ولون وجهه انصبغ بحمره وملامح تبين حجم التعب والألم
..كم مره عدينا
بتعب گال وهو يجر نفس بصعوبة
..يمك الحساب
..اريده يمك هم ..بي فرق عن عداتنا السابقة بالك يمهن لو لا
ابتسم بتعب مرتاح
..مااتذكر الفاتت كم عده بس حسيت اليوم طولت اكثر وهذا بفضل تحفيزك وصبرك عليه
..هذا واجبي ..فضل بلا منة
..الله يوفقك
..منو رفيقك اليوم ابلغه يطلعك ؟
..امي
..النا نصيب من دعواتها اليوم المرتين الراحت افتقدتها
ضحك وهو يگول ابوي هم يدعيلك والله
..الله يحفظلك الوالد بس دعاء الامهات غير ..خاص المثل امي وامك
كملت يومي ورجعت للبيت
وصلت للبيت احمد يشتغل ابيتهم وعمال وياه وعوسه رفعت ايدي سلمت عليهم وعبرت اريد اركن السيارة
واجه وسام من بعيد يهف
بقيت اباوع واصفها قفلتها ونزلت
وهو صاح الاحمد ولا محسب حساب الأحد
..خواتك وين اليوم الا اربيهن
احمد اتقدمله يريد يسكته ويفهم ولحگته اني
..وسام خيرك شعدك
..اليوم اربيهن خواتك ..اني مرتي مثلي مخمخمة ترضاها هذا حجيهن نورة منو مربيها بسيطة والله توني دريت ..مسويه عنلية القندرة الا افلس خشمها
..وسام عاقل انت سوالف نسوان بينهن معليك بيها وعيب هالكلام ابيت اخوك عمال ليسمعوك
احمد اشرله
..امشي منا ارجع لا اجنزك اتجنز ربي مرتك اول وبعدين فكر تمد ايدك على خواتك يانذل
جريت احمد عنه
وبعدته مرجعه مااريدهم يتضاربون احمد شايل بگلبه عليه لأن حاجي الكل گرايبهم احمد ماراح يتوفق بعرسه لأن امي تدعي عليه ليل ونهار
..كافي عيب عليكم هالحجي ..وسام نوره بالذات الي يمد ايده عليها اكسرها اله ..لاتخليني اتصادم وياك مخليلك احترام العمرك
..ليش هي بالذات عدها حصانة بت فيحاء لو شنو
..روح اتوكل كافي لغوة ..سالفتك ماتسوه لمها ترى ابوك واصله الخشمه منك استر على نفسك لاتخسر حتى البيت اللامك انت وجهالك
..لازم مخلي عينك عليه
..روح وسام امشي البيتك وهذا اني فايت يمهم مااطلع منا الجية ابوك بيك خير تعال بجيته وربي
تركته وفتت للبيت ومتأكد راح ينسحب الظاهر اليوم اكو شي جديد
حلا واكفه تسمع بخوف وبطة تبجي
..بطة شگدج تصيرين بعد وتبطلين تبجين
..والله ولا وابطل ..همزين اجيت والله گلبي وكف
وينها ام الطلايب
صحت
..نوره
..نزلت تتمضحك ولا يمها
..ها شو تضحكين مابجيتي مثل اختج
..والله كل خوفي على خشمي مرته الجلبه بس شافت نتيجة العملية شلون حلوه دزته عليه وحجتله سوالف قديمة
..وليش تنشرين انتِ حتى يشوفن هي وامي
..حظريها نوره
..لا والله تموت لو حظرتها ماتتحمل خل تشوف وتنفس عن غضبها
..والله لو متأخر دقايق الا يگطع نفسج من يرگعچ كله بخشمج هذا المبستر ..عيب عوفي المشاكل لاتزعليني عليج
..لا والله كلشي ولا زعلك ختولي معليه بيها بعد
..حمزة هم اتصل بيج هاليومين
..لا والله باجر ينزل ان شاءالله
..ان شاءالله ..يلا اني اترخص
طلعت وقفلت بابهم بيدي ووصيت احمد ينتبه للباب هم ومتأكد مايعيدها ويرجع يخاف
ومرت ايام وصار وقت حنة احمد واحلى حنة صارت
عيني على حمزة يتصرف وكأنه طبيعي بس هاي النار الي بداخله بس اني اعرفها
ثاني يوم زفينا العروسه وخلص العرس بخير وسلام رغم چنت متخوف يخربون عليه
يتبع...