بقلم نور الشمس
....
سراب
جنا فرحانين بأبوية رجع ياكل ويانا وشاركنا الغدا وسأل عن اخواني والبنات چان كل هالفترة معتزل واكله قليل كلش
ابويه سأل عن صخر والفهمناه بعد اتصاله من اشهر مامتصل بي ولا شايفه وظال بخاطره منه
اجتنا مآرب وعمار ومن اخواني لامو صخر يمها على طرده الابوي وماخلاه يشوف امه ويحجي وياها بخصوص براءة الذمة او مجرد مكسور ورايد يشوفها الاي سبب كان گالو هو بهالوضع المفروض يلين گلبه عليه
مآرب دافعتله وسبحان اليغير ومايتغير مآرب جانت تموت منه بس بسبب عمار والمواقف التعرفها منه واكثر شي مواقفه وي بنات عمي گامت تحبه عن بعد بحيث اخواني كلولها ترى ماتحبينه اكثر منا انتِ
احنا مامبتعدين ولا تركناه بيوم بس حجينا من باب العتب
من طلعو الولد اني هم حجيتلها على موقفه ونحاسته وياي گالت كلشي يسوي حقه شافو الويل منا امي واحنا بدون فهم جنا نهد ونعد وهو وحيد لا ابوي ماقربه النا ولا احنا كسبناه
وتاليها هسه ابوي يتمنى يقربه بس بهالعمر مايفيد بعد
ذاك اليوم كايل العمي مروان گايله سليمان ربح وانه خسرته اله وگفات اني اتمناها واتمنى اخوانه مثله صح بيهم بركه بس مو مثله مسؤولين
ومن خاله موكع الفصل الجماعة ابوي علموده .. جماعته سائليه وعازمينه وگايليله نريد اشهل نكرمه مثل ماكرمونا الأجله ابوي رايد يعطلة علمود العزيمة ويتباها بي يمهم ورافض يبقى ولا سائل ليش ابوي يريده اصلا
شوفي سبحان الله شكد عند ابوي ولد خير من الله الله يحفظهم من كل شر بس خله احسنهم وصاحب المواقف الشخص الوحيد المامهتمله هاي دروس وحكم ربج الانسان شيزرع يحصد
..ليش ماتتقربيله وانتِ هيج كاتله نفسج عليه
..مالي عين والله بيجن خير انتن خلنه سند الجن مثل ماوصيت اني الي ايد بأذيتهم اول شبابي انتن لا
..والله بعد الطرده الشفتها ولا اوصل السند الله الله يحفظهم مااريد شي لامنه ولا من البقية.
..خل احجيلج موقف سولفلياه عمار وهذا ماصارله سنين طويلة مو بعيد يعني تتذكرين المكينة من احتركت بسبب اهمال الولد وسام وولد عمي قادر
..اي اتذكر من اتعاقبو وكلشي انسحب منهم اسبوعين وجان المقرر شهر وهو اتوسطلهم
..اي عمار سولفلي الموقف واحچيلج بلسانه مثل ماهو
يگول چنا مجتمعين كلنا يم جدي واگفين بخوف المكينة مال الماي احترگت وشراح يخلصنا منه
عمامي موجودين وابائنا يلينون گلب جدنا علينا الا عمي ذب اللوم كله بصخر
لأن هو عزيز جدي بس شگد صعبه من ابوه يگل الجدي صوجكم انطيتوه عين وخليتوه وياهم هو هذا الحرام بدمه يمشي هسه يطلع هو حارگها.. چان يغثه بكل وسيلة رغم يدري الي يگوله مو صح
..استغفر الله يوم عن يوم انصدم والله
..اي مو اگلج مو هين الشافه ..يگول عمي يسولف وصخر صافن عليه صاح بي بصوت
..عيونك لاافگسهن لاتباوعلي بيهن هيچ الف مره گايلك مااحب اشوف عيونك لاتخليهن بعيني فهمت لو لا
نزل الشفقة على عيونه وچتف اديه الظهره عدل وگفته الي يشوفه يگول مستعد ياكلهم اكل وكل القوة بي بس بالحقيقة يتأذه شگد مايخفي
جدي خازرنا متجاهل كلام عمي واشرله من بينا
..تعال جدو هنا يمي وحاسبهم انت
بوكتها ابوج حاجه جدي بقهر
..يابه تريد تقهرني انت لو بعنادي تمشي
جدي اتجاهل عمي وگله
..قسم عليهم الشغل واسحب منهم السيارات وسيارتك بدلها
صخر گايله
..من تكمل سلفتي ابدل
..مني انه ازودك لو من عمك بس اختار
..من غير فلوسي وشغلي مااخذ
حجاها واندار علينا مأشر وصاح
تعالو وراي وسلموني المفاتيح يلا
ابوچ ظل يحجي وجدي يگله
..تربية سليمان هذا يختلف لو تربيتك ماانطيه هالمسؤولية
يگول عمي انقهر اكثر لحگنا والشر بعيونا
وظل يرزل بصخر وكله انت سويتها حتى تسحب سياراتهم لأن سيارتك ماتسوى ويوميه مفشلتك وعاطله
وره فتره صخر باع سيارته لأن تعبانه ولليوم مايشتري لأن اتعير بيها منتظر يشتري جديدة وراقية ومايقبل ياخذ منهم حتى هو بعدين عارض عليه يشتريله رافض
هو عنده عزة نفس وابوي باليه وكل هذا علمود شنو
كل هذا لأن وگف وي امه ورفض ابوي يوصلها چان يطلع قهره بهالسوالف توه وعى ابوي وعرف صخر مايمشي بهذا الاسلوب والعناد من طبعه هم
..ترى ابوي مو صغير ومايدري بروحه غلط وهيج يتصرف والله اني هم يوميه اسمع شي واكول حقه واكثر وارجع اعتب بس الصدك هو حقه
..يعرف وكلنا نعرف بس جنا نكابر على الغلط والمكابره ماتفيد ابوي لو شايفه عاطل ومابي خير مايهتمله بس شافه سبع والبعيد يتمناه اله مو انوب ابوه ويباوعله من بعيد اني من الناس لو الي عين هوايه يفرقلي بوگفاته بس ماالي عين
..انتِ شبيچ مامرتاحه وي عمار؟
..لا عمار زين لا عنده مكسرات الحمدلله ولا من النوع المايعجبه العجب يحبني ومدللني بس اني لشوكت يعني العمر يمشي وظاله تحت رحمة امه وخواته ومغثتهن اشكي الابوي يكلي عمامج اذا انتِ تعوفين عمامج الغريبة ماينعتب عليها ..زين عمامي كبار ومالاكيلهم احد واتعذرتهم ؟ بعدهم بحيلهم اني اتمرض وهم بصحة ليش انربط بيهم واخوانج محد منهم اله خلك نفسه مو انوب الي يطالبون
..حقج والله ..الله يفرجها ان شاءالله
..امين
كمت اخدر چاي ومآرب راحت يم امي توصيها بابوي تخفف من المشاكل مبين تعبان
بودي اگلها لاتحجين وياها لأن تزيد وتعتبرنا صرنا حزب ضدها وشراح يخلصنا بعد
ومثل مااتوقعت صوتهن وصلني وهنه يتناقشن وامي تحجي ومآرب تبرر
اندكت بابنا بقوة ومن فتحوه وفاتت عهود وجهه املخ ومن طبت وشافت امي ملخت روحها اكثر طلعنالها كلنا ورجلها وياها يصيح عقلوها اتخبلت
مذهولين نريد نعرف شكو مابرر الصار وهي تكول ماارجع طلكوني وجهاله اللازم ايدي بيهم عنده ومااريدهم بس خل يطلك
التمو الولد وكلنا نريد نفهم حتى صخر فات على صوتها جن رايحلها عزيز مفرفحه ابجي على بجيها ومااعرف شصاير
الحد ماهو گال
..اني اتزوجت ماسويت جريمة وهي ترتاح وتعقل يمكم كم يوم وارجع اخذها
وطلع
الولد كلولها املخه روحج علمود اتزوج شبيج ماتكليلي شيروح منه اذا اتزوج هاي قهره وتطلع وتعيشين وتتعايشين كدامج امي ومرت ابوي لاتكبريها وارتاحي ورجعي الجهالج
هم كالولها هيج وهي اتخبلت بالزايد ملخت نفسها ماتريد ترجع
مآرب تريد تسكتها كالتلها خيولي لاترجعين
وتغمز لاخواني يسكتون بس شيسكتهم رجعو على امي كلولها كله منج هالتعلوم وياريت لو يفيدجن هذا الدك
قحط رجال ولو تزوج بس تعوف جهالها وتطلك هذا خبال واستهتار
وصخر بعد ماجان عاگد حواجبه متفرج كل ظني ماتعجبه تصرفاتها گالهم
..من كل عقلكم گاعدين تلومون بيها انعل ابو لابو عرسه تلومونها على حرگة گلبها ليش يعني شناقصها ويتزوج؟ فوك ماصبرت على خسارته وضيق حالته يروح يتزوج
عبد كله
..نروح نعاتبه يعني نكله ليش تتزوج على اختنا واحنا ابونا اربعة ماخذ
..وليش انعاتبه ونسويله قيمة هو ونعالها.. وشعليها من ابوك ونزواته تدفع ثمن زواجات ابوها تسكت وتنجبر على عيشته اذا اتزوج وجابها فوكها شنو من حكم هذا
ابوك اتزوج وجان مقتدر وماگدر يعدل ابوك نموذج صالح يعني ؟ تعرف نهايته شنو ينحشر كتفه مايل لأن ماعدل ولا يعدل ليش هي تدفع الثمن ..شكوها كلولها البيت بيتج ويضربه الم هو وعرسه بس شكوها لاتلوموها شنو هالوضع هذا شبيكم
..البيت بيتها شنو تهجم بيتها وتگعد هنا وجهالها اتيه شبيك صخر لاتربط موضوع بموضوع
طلع صخر متضايق ركع الباب بقوة
وامي تدعي على زوجها وتكلها لاتشمتين الناس بيج كومي غسلي وارتاحي وبيتج ورجلج لاتعوفيه زهكيه وزهكيها من المشاكل الحد ماتهج ويرجعلچ
باوعتلها بنظرة مأيسه جنها تكلها مانفعت وياج هالخطة تنفع وياي
الولد عافوها ضايجين صح بس ماشجعوها ابد ع الطلاگ ولا حتى وافقو تزعل هواي كلولها ارتاحي يومين ويجي ياخذج
ظلت امي تسألها شلون وحجت مقهورة
تگول حسرة علينا كلشي وادبرها منا ومنا بعد الصارله بخسارته طلع هو متعرف عليها بتليفون وگروبات ويدز مصرف الها حوالات الدولتها وقبل اسبوع راح هو وابن عمه على اساس سفرة شغل والبارحه اني مجهزة نفسي والبيت والجهال فرحانين بيه وغدة مسويه الاكل اليحبه
اجه بس مو طبيعي اكله اغسل ارتاح يكلي مرتاح
اباوع لاجنطه لا شي للجهال
اخر شي اجاني يگلي
..اني اتزوجت من فلان دولة ورحت كملت الاجراءات وجبتها هي يم اهلي اجرلها وانتِ هنا ابيتج
بالبداية انصدمت بس بعد ماطلع وجن ماصاير شي ماخليت شي بالبيت صاحي طحنت البيت طحن حتى الگلوبات فلشتها كلشي بالبيت اتفلش من اجهزة من جام من بوب اجه الصبح اتخبل انجن اني الليل مانمته فلشت البيت طحنته طحن
جايني فرحان بلغني وراح بات ليله يمها عباله يلكاني ابجي ويرضيني واقبل والله شنو ابوي يعدد
لكه البيت مهجوم كام وبسطني ملخته وملخت نفسي هم ومابرد گلبي
..ضاربج هو لو انتِ هيج مسويه
..اثنينا والله اتخبلت لاتلوموني
لليل واجه ابوي عمها وزوجها مخابره وهم شاكيلها منها گلها ارتاحي وباجر يجيج وبيتج اني اجهزة الج فدوه الج بس لاتسوين هيج وبيتج لاتعوفيه
واذا اتزوج شنو محتكرته انتِ شيروح منه لو منچ
رجعت انجنت ومنا هو زمخ بيها وهي بدت تعلي صوتها وتلومه ع زواجاته اخواني صاحو بيها لأن فلت السانها وي اعصابها
طلعت تصيح الا احرك روحي احمد جرها يريد يفوتها وطبلنا صخر طاير
اخذها وسوه الماسواه ابوي واخواني الها
وعهود الچانت تشوف الموت وماتشوفهم ظلت اشهر يمهم زوجها يريد اي طريقة يرجعها بيها ماخلاله سكة الا طريق واحد يرضيها اما انفصالها هي او يطلك الجابها وترجع منين مااجت
وهذا الخله ابوي يكلفه بمسؤوليات اكبر بدون مايحسسه هو مكلف منه لأن حفظه وعرف شگد هو عنودي وياه بالذات
.......
صخر...
بعد ماطلعت منهم رحت للبيت اعصابي فايره
كفختني ريحة البخور تفوح مبينه توها مكمله تنظيف
امي ومطلعه محاضره تسمعها هدأت نفسيتي شويه
..گواج الله شهلة
..هلا يابعد طولي
..فدوه الطولچ اني
..شبي وجهك ملبوگ
..ماكو شي ..جوعانه يمه لو ماكله شي
..لا اكلت علمود علاج الضغط راسي اذاني اليوم
..الف عافية ..اني مااشتهي هسه
طلعت بالحوش الهوسه بعدها امي لحكتني
..شعدهم اهلك شو ماجنهن نسوان ابوك مثل ماظنيت مساع
حجيتلها مختصر عن عهود والصارلها
..الله يساعد گلبها من دريت بأبوك متزوج واني ماادري هيچ صار بحالي فرفحت چنه ماخذ عليه نفس الاحساس وازيد ..بس ماچان عندي اخوه گعدت وسكتت
..ولو عندج شتردين منهم يسوولچ
..المره من تنهضم وين تروح اول مايجي الأخو ابالها
صدك جنت بعدني احبه ابوك ومو حب عادي جنت مدللة وفتحت عيوني عليه من اول ايام متت بيه بس لو عندي احد مااسكت ع السواه بيه ابد
..ولو عندچ واعتذرولج گالولچ حگه مايروح منج شي ..وماكو داعي الزعلتچ
..ساعتها اغسل ايدي منهم واعتبر روحي يتيمة واگعد مثل گعدتي بالسنين الراحت
سكتت افرك بديه وبالي يمهم شراح يسوون الها
اختهم هاي بنت امهم وابوهم ..شنو سكتي ابيتج شنو غلطانة ظليت قلق ومحتار .
هم اقربلها بس اني ليش مقهور هيچ وحاس بكسرتها شعجب ماحسو هم واني ماشايف منها غير الطلايب بصغرنا
امي ماسكتت ومثل عادتها من تعرفني افكر بموضوع گالت
..المره والرجال تصير بينهم مشاكل ويمكن يتصالحون وتنسي هالسوالف كلها لو تقتنع بأخذته وترضا ..بس الأخوه يراد منهم موقف والا وجودهم والعدم واحد
منزل راسي مااريد اباوعلها واتأثر اكثر بس جنت مركز وياها ومانطقت بحرف
..هاي گبل امي عمت عيني تسولف قصة مره زعلانه يم اخوها
وعدها وليد بيوم شاف الجهال تشتري ورادله ربع
بذاك الوكت الارباعه حديد چانن
سكتته رادت ماسكت جاهل شيسكته ..اجه اخوها من السوگ وجيبة يخرخش ارباعه طلبته الأبنها
الأخو بدال مايكرمها نهرها وگالها كونج ادورين ارباعه انتِ وابنچ المن تزعلين ظلي يم زلمتج يصرف عليكم كافي عليه ملفيج واوكلج
الأخت سكتت ابنها وسكتت واول ماوصلها زلمتها ردت وبعد ماعادتها وزعلت يمه طول عمرها
وبيوم وبعد سنين الجاهل صار زلمه مات اخوها
أبنها شاف خالاته مگطعات ارواحهن على اخوهن وامه متكتره
سألها متعجب گالها يمه شو ماهامچ اخوچ مثلهن ليش هيج مامهتمه اخوچ هذا والأخو غالي
گالتله
گلبي مثل جلد الضبع
اطابعه وماينطبع
ابچي ويعرضلي الربع
يعني يايمه مانست السواه بيها للموت ..رجلها نست طلابته ورجعتله وماانهضمت الا من اخوها ليش لأن متأمله بي خير وخيب ظنها سندها ..وهاي اخوها واحد لو تسعة شتسوي تكره الخوه وطاريها
باوعتلها دارت وجهه عني شغلت نفسها
بس من حددت تسعة يعني قاصدتنا واني منهم
بدون مااحجي وياها
طلعت اسمع صوتهم صار بالحوش اعلى يصيحون عليها وبدون اي تفكير درتلهم دفعت الباب بقوة وجريتها من ايد احمد
..تعاي امشي وياي ..لاتصفنين تعاي وياي وانعلّچ اصلهم ..
سحبتها من بينهم صاحو عليه يحاجوني وامها صاحت تريدها ترجع
..لاتخرب بيتها انت تكيف بطلاكها وتتشمت
صوت ابوي صاح
..خلوها يمه عوفوهم خل ترتاح هسه هو يهديها
دارت تبچي انتبهت بيدها جداحه
..صدگ جنتي ناويه تحرگين روحچ شمريها من ايدج
نحرگهم هم ..والترديه يجرالچ وابد لاتفكرين
اني حاسبچ اخت ودموعچ وقهرچ جاسن گلبي
انتِ شتشوفيني بعد ظلت يمچ
بچت حيل بدون ماتحجي شي
عبرت ايدي الچتفها فوتتها
وشهلة مثل عادتها
الهلا تگولها من گلبها تطلع بنغمة تدخل سمع وگلب الضيف تخلي يرتاح وشگد ماجانن مستحيات منها يندمجن مثل ماسوت من لگت نوره عندي وشلون جانت نوره خجلانه ومن ترحيبها واستقبالها صارت تموت بيها وماترتاح الا العكلة تخلصها يمها وبينا
من غير خواتي بنات عمي حيل يرتاحن النصايحها
..هلا يمه هلا بيچ البيت بيت اخوچ وصار بيتچ واحنا خطارچ ..الله يبرد گلبچ باليرضيچ ان شاءالله لاتهتمين ارتاحي وربچ يحلها
چانت متقيده بالبداية گمت عنهن وهنه ظلن يسولفن امي باسلوبها تشمرلها حجاية تجر بيها السوالف وتسمع منها الي بگلبها واطيب خاطرها بدعوات حلوه تريح المقابل
اجت وراي
..اختك ماماكله شي من امس وغدانا وحده مو كافي هاي اول طبتها النا شنسوي عليه زيادة
..سهلة هسه اطلع اتسوگ واسوي ..بس اشوفج ارتاحيتي هسه هذا الردتيه من قصصج وسوالف المرحومة امچ موو ..دفعتيني النصهم وطلعتها ..شهلة ماتگعد الا تگبعني بكل سالفة
ابتسمت بفخر گالت
..وحدتنا ماترتاح ولاتحسب روحها مره اصيلة وجابت وربت وفرحت بولد الا وهالولد اخته وبت عمه تزامط بيه..
وشلون تصير زماط الهن وانت تصيح ماعليه ووين تروح مكسورة الجنح ..وانت ابني ومربيتك ع الاصول ومايوم رضعتك حليب الا وانه طاهرة ومحسبه حساب هالأيام من انت بگماطك مو هسه
..هاي كلچن هيچ الأمهات لو بس الشروگيات
..هو صح احنا مانحسب الدخلة وليانا بالطلايب ولا نحب نگول معليهم لا نتنومس ونفتخر بطباتهم
بس هي صفة الكل النسوان بكل اصنافها واطباعها تحب الرجال الشافي
والخير والشر بكل مكان الشروگيات بيهن المثلي وبيهن الي يغذن ولدهن بكراهية مثل ماصار وي جدك
انه اريدك بذرة خير تفيي على احبابك وتكبر بدعواتهم وظلك يوسع الكل يابعد روحي روحك
..تعرفين اني محظوظ بيچ ..ترى گلبي حجر والله بس مدري شلازمة عليه بسوالفج وتلينيه
..الحجر يولي يبعد امك مانريده وهسه روح وخلينا اسمع منها اكثر
خليتهن وطلعت لاگاني ابوي ابابه
..شلون صارت اختك
..زينه احسن.. ترى ماجبتها الا ايست منكم واحد يعرف يداري كسرتها يستوعبها ..تشوف الموضوع عادي بنتك وصلت تنهي حياتها وانت مصر زواج القندره رجلها عادي
..مو عادي عليه قهرها والدليل هنا واگف بس اريد اسمعلها صوت واريح بالي ..بس اذا اتزوج شسويله الزمله سيف واوذره ماسوه عيب ولاحرام
..ماتگدر تسوي لأن انت مسوي الاكثر منه معدد لمن قبطت السفينة.. خليها يمي الحد ماترتاح وهو لو اجه شتقرر هي اني وياها ..بس خل ترتاح وجهالها تجيبهم ماتخليهم يمه
..انت مستوعب الكل وبديت تتقرب للكل ليش ماتخليني اعرف اكسبك من جديد ..اني ابوك رايدك تتقرب الي واعرف بغلطي ماانكر بس خو مانبقى هيچ
..انت ابوي تبقى ابوي بعيد او قريب مايفرق ..وسوالف القرب فاتت من جنت ادور امان بعيونك وانت تكرهني بعيوني ونظرتهن وشكلهن ..جنت اتمنى تحضني يوم اني مااعرف حضنتك شلون تصير تدري لو لا؟
اتضايق حيل بدون كلام فات البيته
ومن رجعت عرفت من حمزة ضغطه معلگ
مرت الأيام وقنعتها جهالها ماتخليهم محد يفيدها غيرهم وكسرتهم بنبذ امهم الهم بغلطات ابوهم راح ينبذوها هي هم جبتهم يمها وظلت هي بينا وبين بيت ابوي تروح هنا ومن يضغطون عليها تجي يمنا ويسكتون عنها
...
هاجر ..
بعد مافقدت الأمان صرت أمشي داخل البيت بخطوات خفيفة..
اخاف حتى من صوت اقدامي .
كل شيء يمي يگول هو بيت ومو اي بيت ..بيت ابوي وجدي إلا گلبي مايوم شعر بأمان البنت ابيت ابوها.
من يوم الأجيت يمكن جان عندي شويه امل بس بعد موت ابويه واستلام زوجته الزمام الأمور ، تغيّر كلشي حتى الهوا الأتنفسه احسه ثگيل ومحسوب عليه .
مر عليه شتا وخلص ماحسيت بدفو .
واجاني صيف وعبر وماشعرت بعذوبة برد
كلشي صار فاهمي حتى الألوان الچنت احبها
فقدت بريقها وي الأيام .
، الكلام صرت اسمعه ثگيل تطغى عليه نبرة حادة حتى لو چان عادي.
وصرت اشوف النظرات محمله بمعنى الطرد أكثر من الاحتواء.
وگمت اگعد قبل الكل ..مو لأني نشيطة .. لأن ماأرتاح بالنوم أصلًا.
أذني اتعودت تترقب اكثر من ماتسمع بصورة طبيعية
ولأني قبل جنت اخاف أسمع اسمي بطريقة جارحة.
هسه اسمي نسيته والتنابز بالألقاب صار الصفة الي ينادوني بيها
العبدة ..السودة ..الزرگة
ارد مرات ومرات اكتفي بعدم رد الجواب الا واسمي ينفرض عليهم فرض وهذا الأمر وطول الخلك متعب الي والهم .
واصبحت عادي اتقبل اتهامي بشي ماسويته بدون ماابرر واشرح
سنة مرت على جيتي الهم ومازلت عنيدة بداخلي ارفض الأستسلام
شي واحد صرت اتقنه وهو شلون اخفي دمعتي بسرعة.. حتى لا يتم وصفي بالحساسة أو كثيرة الشكوى.. يصير ممل الأنسان بشكاويه
أصعب ما چنت اواجهه بشكل مؤذي مو القسوة الي اتعودتها ..
شعوري بأني زائدة وطارئة على هذا المكان هو المؤلم .
وأمي بكل محاولة الها للتواصل وياي ارفضها وگلبي يتگطع من الداخل
اليوم يمنا رشا وچانت مركزة بكل حركة مني انتبهت على خوفي وحرصي على مفتاحي وشلون ووين ضامته واني اخفيه بصدري
..اكو احد مضايقچ هاجر
بعدت عيوني عنها
..لا ليش مامتضايقه
..مااعرف بس مااحسچ طبيعيه صار فتره هوايه متغيره انتِ ..عمي ابراهيم دزني عليج يريد السنة اداومين ماكو عذر بعد خلص وخلي ابالج تجين يمي
قبل شهرين گلتي توكم عرسان ومااتهنيتو وبيتكم توكم استقريتو بيه واخجل ..هسه عتگنا وحاليا اني النساة لاعبه بيه خلقه ومالي خلگ العسل وشهوره عليج الله تعالي
مرت ابوي گاعده گبالي تراقب بحده
وگالت
..البنت ماتطلع من بيت ابوها لو ترجع الامها لو تروح البيت رجلها الخواره هاي بالبيوت ماتجيب الا قلة القيمة
ورشا ردت
..بيت عمها بمقام ابوها يابيوت الخارت بيها قابل رايحه يم خالات وخوات ايام وليالي
حسيتها تبسمرها على روحة بناتها الخالاتهن
رغم اني سمعت من رشا خالاتهن خواتها المرت ابويه كلش ادميات وعيالهن يموتون بيهن بس مدري ليش اتعسهن وكع بيها ابويه مدري حظة مدري حظي
مرت ابويه هم ماسكتت وردت
..لو عدها خالات يصيرن مثل الامهات بحرصهن عادي تروحلهن بس الغريبة ومرت العم ماتحن هاي سوالف جذب ..ولو مو كل خالة خالة خواتي ماكو مثلهن اكو خالات يمشن ويشكن ومايسترن البنات اختهن ولطلاطهن يمها الحمدلله ماعدنا هيج
..لو ماهنه ذني اليشكن ملطلطات ماصارن هيج بنات الاخت وماشكت منهن وعيوني انتِ سماح سمعيني زين يمكن عرفتيني قبل لا اصير منكم هذا شغل التبسمر والمشامر بالكلام مااحبه
احب هيج طگ بطگ نسولف
انتِ هاجر ماتحبيها وماترديها مخليتها يمج المن
مخليتها تخدمج مو؟
ترى بعد كعده ماالها كليتها راح اداومها السنة
والشغل الفرحانة بي وتسولفين وين ماجان خلصت منه بجيتها مايظل عليها دوم وسوالف عن خدمتها لو وصلت العمي ابراهيم مراح يسكت وتعرفين كلش زين لايستحي من عم ولا من ابن عم ولا يستحي يطلعج منا بليلة ظلمة كل الواكف بعينه ولد المرحوم ..بس ...لاتنسين وصيته بالذات هاجر يعني اني من اخذها ارفع حرج عنج هوايه لأن الظاهر نفسج ماتردع عن اذيتها ليش تورطين روحج اكثر
..ادمااسمحلج تحجين وياي بهالطريقة مأذيتها بشنو واذا خدمت بيت ابوها واخوانها وجدها ومو صغيره هي ..اي واذا ريحتني جبت عمر اركض واخدم وتالي المرحوم يركض الرجعتها هي وامها واني نايمه ع وجهي ..يحقلي ارتاح هسه وبعد لاتدخلين بينا بيت واحد احنا تجين الجدج وي رجلج يشوف ابوه وحدج باب الغرفة الكاعد بيها كلام زايد مااريد
وهاجر قطعي علاقتج بيها
حاجيتهن وگلبي يتفسر
..ذكرن الله شبيجن ..شنو اطرديها وتحددين دخلتها الغرفة جدي على اي اساس البيت بيته ومالج حق بهاي ابد ..وهم مالج حق تقررين احدد علاقتي وي منو وبمنو وكلسة راح ارجع صح لأن عمي صار ايام يتصل ويلح عليه واكد طموح بابا هذا وطموحي اني اكثر وماراح اتوقف ابد
حبيبتي رشا خليني هنا افضل لو صار شي اجيج اكيد
طلعت رشا وهي توصيني ادير بالي منها واذا تحسين بشي وعليج شي كولي
واني مااكدر اكول النوم نسيته من عرفتها تخوف بيه متعمده تفتح الباب لو توگع اباب غرفتي شي يفززني
الظاهر تريد تهججني وارجع الامي ماابقى قريبة منها يم عمامي متحصل من رجعتي الا تخسرني كخادمة عدها
ورجعه ماارجع وانتهت امي استقرت وي زوجها واذا رجعت ارجع وي خوالي وذلتهم اتعس يمكن هنا الي حقوق هناك ارجع بمنة اكبر
من طلعت رشا ظلت تحجي وتصيح وتهدد
الحد ماجدي تعب واخذه عمي الجبير بعد ابوي ورفض يرجعه گمت استاحش عليه وبيتها صار مسرح الاهلها خوان وخوات وولدهم
واني تعبت من الخدمة صح من يجن هنه يساعدن ويكللها بالج عليها وتكعد تمدح بنفسها يمهن بس من يرحن تحير شتسوي وبيوم سوتلها فلم واتصلت باخوانها بالليل على اساس احد طفر علينا
اجانا ابن اخوها المكروه وخلوه يمنا
كل ظني يوم يومين ويخلص هالشي بس هو طول
بيومها جان عمي ابراهيم ماخذني مكملين اجراءات المباشرة الأول يوم دوام الي جان يوم باهت ثگيل بشكل اشوف الكل فرحان الا اني احاول افرح ماجاي اكدر چن غيمة سودة محتلة گلبي
رجعت تعبانه ونمت كعدت بالليل كلش جوعانه
نزلت لگيت المطبخ مگلوب جنت اخير نفسي اسوي لو خاف تتعود
اخلي شعليه بي ..بس والله مااتحمل گلبي شيصبره
رحت اسويلي لفة جبن اني ع الثلاجة واكفة وارد اخلي جبن ومربى
حسيت شخص طبك جسمه عليه فزيت مرعوبة شلون ماحسيت عليه فكري بالمواعين نساني روحي
نساني حرصي على نفسي
دفعته بقوة وهو يگلي
..الله الله نعمة الله شلون توگعيها دنگي شيليها اشوف
..وخر منا اطلع
..بس ندگي شيليها اشوف نعمة الله هاي
يحجي ويضحك
دفعته حيل وشردت هي شردة هي صعده رجلي انضربت بالباية الاخيرة الفوك كد مامستعجلة احس اظفري انشال
قفلت الباب اتصلت بعمي ابراهيم ابجي
واتنفس بصوت عالي الخوفه والفحطه بيه ومزودها البجي اتخبل يريدني احجي مااكدر بس اكله عمي تعال
وبداخلي اشجع نفسي
..لاتصيرين جبانه كافي انتِ مو ضعيفة احجي فضحيهم
عمي ظل على اتصال وياي يكلي بس كولي شبيج احد ضاربج مأذيج
..تعال عمو مااكدر اسكت بعد
منتظره هي تصعد لو يبلغها لو فد صوت يطلع يبدد خوفي ابد ماكو اي صوت الحد صوت الباب اندك وعمي رج اتصل
..طلعي فتحيلي الباب
نزلت وهو بالهول الظاهر يتابع صوت التلفزيون عالي النذل ولا جنه مسوي شي
بس فتحت باب المطبخ الخارجي اجه وراي هو يصيح
..وين طالعه تعاي لو حبيتي لعبة البزون والفار وتردين مكان اوسع اطاردج بي
..نذل حيوان
حجيتها بصوت عالي وركضت للباب
اتفاجأت بعمي ابراهيم ماجاي وحده وياه زوجته الصغيره
فاتو عينهم عليه وعليه وهو انصدم من شافهم
بس شفته بجيت اخذني الحضنه يسكتني
بچيت بصوت وعبرات طلعت بي خوف الأيام كلها نزلت مرت ابوي على صراخي
..تصيح شكو شصاير
..عمي يتحرش بيه ويهددني مو اول مره هاي بس صار يتماده
بعدني مامكمله هجم عليه موته موت رغم هو اصغر بس صار عبالك كتكوت بأيده يروح ويرجع حتى مادافع على نفسه ولارفع ايده بعدين فهمت هو يخاف من عمي بالذات لأن وولده وولد اخوانه هوايه ومحد يسكتله
كلشي بهالدنيا يشوفنا ان الانسان حول الدنيا غابة بيها القوي يفرض نفسه بس القوة بدون ذكاء متفيد والدليل عمي مااجه وحده من حس بيه بخطر جاب زوجته حتى ماتكدر تتهمه مرت ابوي وتكول هو الاجه معتدي
صياح سماح وضرب وجهه وتوسلها ماخلصت ابن اخوها من ايد عمي ابراهيم الا بعد ما دماه ووگعه وهو اتصل بأخوانها
موقفي موقف مخزي كرهت نفسي بهالوضع
هي بدون اي كلام اتهمتني اني اغريه
اشرلها تسكت واتصل باخوتها وخابر اخوه ابو ريم وخابر عمامي كلهم
الوقت متأخر والدنيا ليل
حلا قبل جيتهم اشرتلي البس حجاب
طلعت خواتي يباوعن من بعيد خايفات بس ماادخلن ابد ولا جانن مستعدات يشهدن على مضايقات وهنه شايفاته وحاسات
جنت ارجف بخوف لبست بشت وشال ونزلت حلا واكفتلي ع الدرج
رجعت لگيتهم گاعدين بس اخوانها ويردون يفهمون ويحجون وجان بحجيهم اتهام مبطن الي
شويه ووصلو عمامي وهنا عمي انگلب اول مره اشوفه هيج رزلهم وسبهم لعب بيهم لعب شلون عايفين بنت اخوكم وواحد مايحللها كاعد بي
حلفو مايدرون بي ساكن وياها وكالو هي كالت اني ابات وحدي وماعلينا شي وفعلا امان هنا كلهم اقارب
مافاد عذرهم
بس عمي عثمان حلف هو يتوسل اروحلهم ورشا يوميه تلح عليه وعليها وهي ترفض واني كتلهم صح
بس جنت اريد اظل ابيت ابويه مااريد اثقل على احد
عمي ابراهيم قرر وبدون اي اعتراض منهم اول قرار البيت هذا ماتبقى بي مثل ماطلعت الكل تطلع ومن حصتها تسويلها بيت
والقرار الثاني اروح واكعد ابيت زوجته الثالثة
بيت ام حمزة وحمزة يسكن وي اخوانه واني اظل وي البنات
ومنا بدت رحلتي الجديدة رحت بثقل مهمومه مكسورة كلي امل بربي يصلح حياتي بعد هذا الدمار
دخلت البيت اباوع بالوجوه اريد افسر دوخلهم من خوفي من المجهول مااعرف شسوي
ام البيت طويلة ضخمه ونبرة صوتها عالية ونظراتها حادة جنت على لحظة اتخيلتها تطردني
بس رحبت بيه وصاحت ع البنات تگعدهن ماادري ليش ماخلتهن نايمات احسن اني اخاف من الكلمة والي يگعدوه من نومه بدون شي ينتر
گالت گعدن بت عمجن هاي ومن اليوم اختجن گومي نوره فرشيلها
البنت الجبيرة رشيقة حلوه كل ملامحها ناعمه بس خشمها چبير ماادري جي جانت نايمه
بوجهه براءة خلتني ارتاح شويه بأبتسامة استقبلتني رغم النعاس وگامت بوستني
والأصغر صاحت الامها
..ماأكعد عوفيني شبيج يمه
امهن تركتنا وراحت تفهم من عمي ابراهيم السالفة
واحنا سوالفنا بدون ربط اثنينا نجامل ومانعرف نلم المواضيع وشلون نرهمها
مانمت ذيج الليلة وعيوني ماغمضت للصبح
ساعتين يوم كعدت على صوت امهن تصيح
..گومن الدوامچن يلا عبد بالباب يريد يوصلچن
نوره بيدها جنطتها
گالت
..نامي حبيبتي شبعي نوم على مانرجع راح اوصي امي ماتگعدج مانمتي البارحه كل ماافز الگاع كاعده
وراها بنيه دبدوبه تخبل حمار خدودها يمووت
سألتها
..منو هاي ..يعني البارحه ماجنت احلم
..لا ولچ متحلمين ..يلا طلعي
..خلوني اغيب ابقى يمها
..امشي هسه اصيح عبد يسحلچ
راحت تأفأف ماكدرت انام واستحي اطلع اجت امهن
صاحتني
..ها خاله گعدتي كومي اتريگي لاتستحين
گمت بس حيل تصعب عليه نفسي فكرت اروح يم عمي عثمان احسن راسلت رشا
اتصلت بيه
..ها هجوره حبيبتي ..العصر اجيج هسه بالدوام اني بالي يمج واتصل وتليفونج مغلق جان
..اي جان مخلص شحن هسه شحنته وانتظرج اني
ماطولت وياها بالاتصال
اجن البنات الظهر
هم ماسولفن بموضوعي بس بطه كل شويه وتسأل
..شگد تبقين يمنا
نوره غمزتلها
..تبقى يمنا دائما ان شاءالله لتسألين هالسؤال مو حلوو الف مره گلنا
عمي بيومها بالليل اجه وبات عدهم اتونست لأن هو الوحيد الاعرفه من زمان واكثر شخص ارتاحيتله وحسيت بالامان وياه
فرحت وكدرت اندمج وياهم
گلي حضري نفسج اداومين باجر وبدون اعتراض وبلغني اروح وي لد عمي مو غربه
الصبح ورغم كلشي كشخت كشخه بسيطه بس حتى ابين بشكل ينطلع بيه
جانو اثنين بالسيارة وهو يوصيهم
الأول چان يسوق وطبيعته مبين مسولفجي اكلني بالسلام الثاني خلصها يتعاند وي ابراهيم وبأسمه يسمي
التهيت عنهم حركو السيارة واني اگول ياترى هالطريق وين راح يوديني وشنو حياتي هنا
وووين راح ينتهي بيه الطريق
يتبع..