رواية بدون كلام الفصل الرابع 4 بقلم جمانه السعيدي
عطور... بعدها بكم شهر انخطبت بت عمي منى
طبعا احنا نسمع أخبارهم من النسوان بلشارع
سوون حفله شكبرها وعزمنا الناس كلها اله احنا طبعا
لان احنا فقره ونفشلهم
النسوان بلشارع بس يحجن بلحفله وشلون مكلفين بلفلوس وصارفين على الحفله
خطبها وواحد ابو صديق عمي يشتغلون بنفس المجال
ثنيينهم
الطيور على أشكالها تقع
بيوم حفلة الخطوبه تحديد شارعنا متروس سيارات
لان خطبة وكطع مهر سووو
اندكت بابنا
طلعت ابو الايجار
.ابو محسن...شلونج عمووو
عطور...اهلا وسهلا
.ابو محسن ...عمو من رخصتكم الايجار الي جاي ادفعوا قليل
بلنسبه للغلا هسه شنو قيمة ١٠٠ الف ايجار
عطور....بس البيت زغير وقديم مايسوه ايجار اكثر
اصلا هذا البيت ما ينسكن
الحيطان تنكت والرطوبة صاعده بلشتا اذا مطرت نفيض
.ابو محسن ....ولو مو مال ١٠٠ لو تدفعون ١٥٠ لو اطلعون
سنيين صار صابر عليكم ااكول خطيه بس كافي
اني اريد الايجار ١٥٠ واذا ما يعجبكم اطلعوو
عطور...فدوه اروحلك عمووو
هنا ٢٩٥ راتبنا اذا اخذت منهن ١٥٠ شلون نعيش بلباقيات
هل تشوف وضعنا شلونه
ماعدنا معيل باقين على الله و هذا الراتب وعلى الناس الطيبه
.ابو محسن......اي اخذي من عمج شنو عايز بيوت وسيارات
يلبعون بلفلوس لعب
اخذي من عمج وانطيني معقوله عمج كلشي ما ينطيكم
عنده خير من الله معقوله ما يذكركم
عطور...ضحكتني ولله ياعمو شفتك ماشايفه عمي
عمي لا يذكرنا ولا يجينا ولا يعرف احنا وين صايرين
جمانه السعيدي
امي سمعتني احجي واجت وراي
امي...هااا يمه منو
عطور....ابو محسن جاي يريد يزود الاجار
امي....هله خويه شلونك
.ابو محسن ....هله هله ام مصطفى انتم شلونكم
امي...الحمد لله هااا خويه
.....الايجار كلش قليل لو تنطوني ١٥٠ لو اطلعون من البيت
امي...منيين ترا راتبنا مايكفي
.ابو محسن........اني مالي دخل بس هذا الشهر الشهر الجاي
ادفعون ١٥٠
امي...الله كريم
راح ابو محسن
عطور...شنو الله كريم
امي....اي ربج كريم وماكو ااكرم منه
عطور...يعني انتي موافقه تزودين الاجار
امي....يمه اتعارك ويا الرجال خوما اتعارك ويااا
حلاله سنيين صار عايشين بهذا البيت
مايوم اجا دك الباب علينا
حلاله بكيفه
عطور...منيين انجيبله اذا ننطي ١٥٠ من الراتب
شراح يبقى النا
امي....ما تشوفينه شلون مايقبل
عطور...اي كوليله مااصعد الايجار شتريد تسوي سوي
امي....يااا اتعارك ويااا
عطور...هو مالكه قوته غير علينا
يشوفنا نسوان ثنيين لاحول ولا قوه جاي يصعد الايجار
علينا
امي...الله يدبرها منا للشهر الجاي
عطور...ما ضيعتنا غير طيبة كلبج هاي
لو مخليه عمي ينطينا حصتنا قبل لا توقعين
جان على القليل هسا عدنا شي ننسند علي للزمن
زين هسه شلون راح ادبرين نفسج ١٤٥ الشهر كامل
امي....ارجع واكول الله كريم رب العالمين مراح ينسانا
عطور...نرفزني امي ما معقوله كمية الطيبه الي شايلتها
بليل كعدنا نتعشى
عطور....يمه شنو رائيج اروح العمي اطلب منا حصتنا
امي...لا يمه عيب عمج رجال جبير
هو ينطينا ااكيد ضام حصتنا
عطور....شسوي بيها ضامها اذا ما تفيدني هسه
شسوي بيها بعدين
امي...اني اروح احجي ويااا انت عصبيه كلمه والثانيه تطفرين علي
عطور...ااكيد تحجين وياا
امي...اي بس موهسه خلي بت عمج تزوج
وتخلص الهوسه بينهم
عطور...بلعكس هذا الوقت المناسب
راح يخافون اهل العريس يعرفون حقيقتهم
ويعرفون هما اكلو مال اليتيم
بلكت يدفعولنا
امي...سدي هذا الموضوع احنا شنو داخلين حرب وياهم
مهمه يكون بيت عمج
وين تروح الفلوس ااكيد راح نحصلهن
عطور...يمتى نحصلهن بلاخره احنا هسه محتاجيهن
امي....انتي مالج علاقه اني راح احل شغلة الايجار
انتي انتبهي الدراستج وبس
عطور....امي انسانه طيبه زياده عن اللزوم
وبيت عمي ماتفيد وياهم الطيبه الطيب بهذا الوكت التاس تأكله
جمانه السعيدي
سكتت ومر هذا الشهر مثل الهوا بسرعه فضيعه
وامي مجرد ما استلمت الراتب راح للمؤجر
امي...الله يساعدك ابو محسن
ابو محسن...هله هله ام مصطفى شلونج
امي....الحمد لله على كل حال
امي...هذا الايجار جبته بس عينك علينا لان ماعدنا غير الراتب ماعدنا معيل يشتغل ويساعدنا
ابو محسن....صدك اريد اسئلج سؤال
ابو يوسف مايذكركم
امي....الرجال مشغول
ابو محسن....انتي شايفه شكد بيوت وعقارات اشترا
امي...الله يرزقه
ابو محسن....صدك تحجين تدعيله الله يرزقه فوك هذا الرزق رزق هذا بطر مو رزق
ليش ما يسكنكم بيت من بيوته بمكان هذا البيت التعبان
امي...مااعرف ومااريد احجي علي كل إنسان وظروفه
ابو محسن.....اني راح ارجعلج عشره من الايجار
ومنا وهيج الايجار ١٤٠ تمام
امي...الله يكثر خيرك انشاء الله
رجعت امي للبيت
عطور...هااا يمه شكد اخذ منج ابو محسن
امي...اخذ ١٤٠ الف
عطور...هواي مرة الأخ من يجي خل يدخل يشوف البيت شلونه
حتى البزارين ماتقبل تعيش بي
امي...الحمد لله والشكر بيتنا متعودين علي
عطور...الحمد لله
من بعد ما صعد الايجار علينا وضعنا حيل ادهور
قبل ندفع ١٠٠ وكوه نكمل الشهر
اغلب الايام ناكل خبز واي نوع خضار لو خبز وجبن
بس الحق ينكال الناس الطيبه والجوارين ابد ما ناسينا
الي يجبلنا مخضر والي يدزلنا اكل ثواب
يله الاكل مو مهم اهم شي رب العالمين ساترنا بستره
ازوجت بت عمي وبيوم العرس الشارع انخبص خبص
سيارات وهورنات وموسيقى وتصوير
الله يهني سعيد بسعيده
هيج زواج مبني على المصالح مااضن ينجح
وهيج بنيه متعوده اتصادق بدال الواحد ثنيين وتلاثه
مااضن تنجح بلحياة الزوجيه
ومراح تكدر تصون زوجها
من بعدها عمي زوج ولده الكبار ثنيبنهم بعرس واحد
سووو عرس الناس كلها تحجي بي
صرفو صرف بخبال كدام الناس عود شوفونا
احنا ناس عدنا فلوس
صرف بذخ مو طبيعي على العرس
بيت عمي كلش يهتمون بالمظاهر اهم شي الناس تكعد تحجي شلون يصرفون وشنو وضعهم
كعدت بليل افكر منو هذا الدايخ بزمانه الي يناسب بيت عمي
وولدهم تاركين الدراسه اخلاقهم مو حلوه
يشربون ويدورون نسوان
معقوله هذا الي انطاهم مره ما سئل عنهم
لو الناس عمت عينها الفلوس
اني هيج بشر تحيرني عايشه بلدنيا بدون مخافة الله
اني لحد الان ماشايفه واحد من ولد عمي ولا اعرف
شكلهم شلون
لان لا نروح عليهم ولا يجونا
ولا اني من نوع اطلع هوواي
طبعا عمي اشتر الكل واحد بيهم بيت وحده
واثثه الهم كل واحد بيوم عرسه من الزفه البيته
كبل
فلوسهم هواي وحايرين وين يخلونها
بقا بيت عمي ولد ثنيبن ميثم ازغر مني بسنه وحده
وسجاد ازغر مني بسنتين تقريبا اواكثر
وصلت للسادس وحبست نفسي حبسه مو معقوله
هنا راح يتحدد مصيري
اذا شديت حيلي راح اكدر اطلع اهلي
من الفقر والضيم والعوز
الحمد لله كملت امتحانات وطلعت معدل يدخلني
معهد تحليلات الحمد لله الي جبر خاطري
وخاطر امي المسكينه
جوارينا كلهن اجن باركلي ونطني فلوس هدية النجاح
الي انطتني خمسه والي عشره
والي ٢٥ الف
فرحت حيل بلكت اكدر اشتري ملابس حلوه للدوام
لان هذا معهد مستحيل اكدر البس الملابس الي كنت البسهم قبل
اشتريت لبستين وجنطه وحذاء وحجاب
اما الخط الي راح يوصلني للمعهد جيرانه الي حجيتلكم عنه قبل
الي طلع راتب اخوي
هو الي تكفل يدفع فلوس الخط منا لمن اتخرج
وبنات من جوارينا يدرسن كليات دزلي كم قطعة ملابس
للدوام
الحمد لله الي حنن كلوب الناس علينا
بعد مااقرب الناس النا نكرنا وعافنا بهذا الدنيا الصعبه وحدنا
جمانه السعيدي
تعرفون ليش عمي مايذكرنا ولا حتى بمسواك
كل هذا البعد تخطيط زوجته
تخاف نطمع بيهم وبمكان المسواك مصرف
وبعدين بيت وبعدين اثاث
ماتريدنا نقرب عليهم خاف نطلب منهم اكثر واكثر
وخاف نحسدهم
لان هيه حيل تؤمن بلحسد
ماتعرف هذا الخير كله الي عايشه بي
بداية فلوسنا على العموم يمكن رب العالمين
يحبنا مايريدنا ناكل فلوس حرام
رحت قدمت بلمعد مراح اكدر اوصف شعوري بهذا اليوم
شعور حلو ما ينوصف ابد
واخيرا راح أحقق حلمي
كلشي مختلف مايشبه الاشياء الي شفتها قبل
شي مختلف هوواي
بالدوام جنت عازله نفسي عن البنات والولد
رغم الكل يمشي وياا صديق أو صديقه
اله اني مااعرف اخالط ومااعرف اصادق
حتلو اطلع اروح اكعد بلحديقه وحدي ليش خايفه من مخالطة الناس مااعرف
يمكن شعور قديم لان جنت اعاني كل عمري من التنمر بلمدرسه بسبب ملابسي وشكلي البسيط
بلنصف الثاني للدوام شويه قوة علاقتي ويا بنيه
حبابه تقريبا نفس اخلاقي
هادئه وحبابه ومؤدبه حيل
صارت بينا صداقه من اول ماقربت مني وبدت تحجي ويااي
عرفت حالتي الماديه ضعيفه
لان لا اروح كافي ولا اخلي عطور ماركه
ولا حتى مكياج مبينه من ملابسي وشكلي بسيطه
بدت تساعدني بس بطريقه لطيفه بدون ما تجرح مشاعري
يعني تشتري عطر وواحد الها وواحد الي
وتكول هذا هديه
لو تشتري جنطه وجيبلي وحده وياها
طبعا اني مااقبل بس هيه تبقى تلح عليه اله تاخذيها
لو تروح تشري شي من الكافتيريا وجيبلي وياها
اني من صادقتها بلبدايه والآخر لحظه ماعندي اي طمع وياها
بس حسيت شخصيتها تشبه شخصيتي
وواقعيه أخلاقها حلوه نفسيتها حلوه
بعد تعارفنا بشهر تقريبا هيه عرفت وضعي المادي
بدون مااشكي اني مو من طبعي اشكي
متعوده على هذا الوضع وراضيه بي
من بعدها بدت تساعدني بشغلات بسيطه
وتكول هديه حتى لا تحرجني
الحمد لله على كل حال
انتظرونا........