﷽
ـــــــــ
سكر.. لقيتها.
مراد بصلها بلهفة.. إيه هي؟
سكر.. هات رقمها وكلمها من عندي أكيد رقمي غريب وهترد عليك وهتعرف إذا هي قافلة سوشيال ولا لا.
مراد طلع فونه وكانت إيده بتترعش.. وقال الرقم ليها وسكر سجلت الرقم وفتحت واتس وعملت سيرش بالرقم وظهر ليها.. هي حاطة دي.
كان قصدها على الصورة.
مراد شاف الفون.. أيون.
سكر.. طيب خد كلمها.
مراد أخد منها الفون وكان مش عارف يبعت ليها إيه وقلبه بيدق جامد.
سكر باستغراب.. سرحان في إيه يلا كلمها.
مراد بحزن.. مش عارف أقولها إيه وهل هترد عليا ولا لا؟
سكر بغيظ.. واد أنت متجننيش مش هتعرف إجاباتك دي غير لما تبعت.
كايا كان بيشرب عصير وجاي عليهم.. مش هترد.
بصوله باستغراب..
سكر.. وأنت عرفت إزاي؟
كايا راح قعد ببرود.. مايا غيرت رقمها وقفلت واتس القديم وعملته بالجديد.
مراد بصدمة.. أنت معاك الرقم الجديد.
كايا بحزن.. للأسف لا.
مراد حط إيده على دماغه بحزن.. طيب أعمل إيه دلوقتي ساعدوني.
كايا كان بيبص عليه بحزن.. أنا السبب في اللي أنت فيه دلوقتي يا خوي حقك عليا أنا اللي كنت بعمل المستحيل عشان أفرقكم عن بعض وأكسرك ما كنتش أعرف إن الحرباية هند هي السبب في كل ده.
مراد خده تحت دراعه في حضنه.. ما تتأسفش أنا وهي مش مكتوب لينا إننا نكون سوا.
كانت الدموع هتنزل من عينه بس هو كتمها وسكر كانت مقهورة بجد عليه.
سكر حطت إيدها على رجليه.. بدعم.. هترجعلك وهتكونوا لبعض إن شاء الله وبكرة تقول سكر قالت.
مراد برجاء.. يا رب.
كايا بسؤال.. أنت ناوي تعمل إيه في هند؟
مراد كور إيده بغضب.. هند دي حسابها بقا كبير معايا ولازم تتأدب صح.
كايا.. أنا معاك في أي حاجة.
مراد ابتسم ليه.. طبعاً يا شق.
كايا بحب.. أحلى شق في الدنيا.
سكر بحب.. ربنا يخليكم لبعض ويهدي العاصيييييي.
كايا حاول يلطف الجو.. سكرتي إيه رأيك أجوزك لأبويا.
مراد بضحك.. عشان كدا أمك تولع في الدار كلها.
كايا بغيظ.. ما هي كانت مستحملة الحرباية وساكتة أما سكرتي العسل لا كدا ظلم.
سكر بضحك.. ما بتجوزش بعد أبو كمال أبداً ده يا ابني كان العشق بتاعي.. ده أنا وهو كنا بنحب بعض من أيام الثانوي.
مراد بصلها بصدمة.. ده كله.
سكر بحب.. أه تصور حبينا بعض بس هو كان عنده كبرياء وأنا عندي غرور فاهم أنت الحاجات دي وكنا بنتخانق أوي زي ما بيقولوا ما بنستويش في حلة واحدة وكنت مع كل خناقة عشقي ليه بيزيد أكتر وأكتر بس طبعاً أنا سكر كان غروري مانعني أروح أقوله وهو كان الدنجوان بتاع الثانوي وكل البنات بتحبه وأنا كنت بغير عليه منهم ومش عاوزة أقوله غير لما هو يعترف تعرفوا في مرة كانت بنت بتحاول تقرب منه وتبوسه وأنا كنت واقفة هطق من كتر الغيرة تعرفوا عملت إيه؟
مراد بفضول وضحك.. عملتي إيه؟
سكر بضحك.. نطرت شعري لورا قدامه وقدام المدرسة كلها بغرور وبصتله بقرف ومشيت وفي حصة الألعاب كان في سور ورا المدرسة كان لازم تعدي عليه عشان تروح الحمامات شوفت البت دي جاية من بعيد وعملت نفسي ماشية وزقتها.
كايا بصدمة.. عورتي البت يا قادرة.
سكر بضحك.. لا قامت ليا وبتزعق ليا قومت جبتها من شعرها على أساس إنها غلطانة وكدا ونزلت فيها عض لحد ما ورمت البت والمدرسة كلها اتلمت علينا ولحد ما جه هو وأنا شوفت وكنت بعض البنت طلعت العضة بدم بصراحة طلعت غيرتي كلها فيها ما تقربش على حبيبي.
مراد وكايا كانوا هيموتوا من كتر الضحك.
مراد.. وهو عمل إيه؟
كان واقف وبيضحك على شكلي وشكلها ولما حاشونا عن بعض وهو جه يحوشني عنها البنات والشباب اتدخلوا يحوشونا وعشان أنا بنت عمه هو قرب ومسكني ومخلاش حد من الشباب قرب عليا وهو كان ماسكني من وسطي ومتبت عارف إنه لو سابني هجيب البنت تاني من شعرها ومش هنخلص انهاردة فض الحكاية وخلى البنت اعتذرتلي كمان.
كايا بصدمة.. كمان.
سكر.. أيون ولما روحنا البيت أنا وهو زيكم هنا كدا ولاد عم في بيت واحد بس بيت كبير كل لما كان يشوف وشي يضحك على شكلي وفي يوم في الجنينة وكان بيحب يقف تحت الشجرة ويقعد يصفر بليل وكنت جاية من بره وداخلة جوه اتخضيت منه.. لما لقيته بيكلمني وبيغني.. بطلي تحلوي أكتر وأوعي وشك في يوم يكشر واضحكي دايماً يا سكر.
كايا بضحك.. أوبا كان بيغنيلك.
سكر بحب.. أه كان بيغنيلي.
كايا بفضول.. كملي.
سكر بحب.. وعيونها اتجمعت فيها الدموع.. حطيت إيدي على قلبي وقولتله خضتني راح قالي بغرور.. أنا بغني هو أنا كلمتك أنا اتعصبت منه وبصتله بعصبية وكنت همشي لقيت اللي بيشدني من وسطي ليه اتصدمت وهمس جنب وداني.. بطلي تغيري عليا مفيش واحدة تقدر تقرب مني قدام أنا مش عايز هو وقتها أنا كان قلبي بيرقص من كلامه ومن قربه مني ما كانش في بينا فاصل أصلاً ولقيته بيلفني ليه وبيبص في عيني كنا تحت الشجرة احنا الاتنين وكنا بليل ونور القمر علينا وكان في نسمات من البرد كدا وقرب مني وأخد أول بوسة.
كايا بصدمة.. ضيعتي شرف العيلة يا سكر 🙆🏻♀️.
مراد ضحك على شكلهم وصدمة كايا... وافتكر مايا وإن قصتهم زي قصة سكر وجوزها وإن إزاي هي كانت بتغير عليه وقد إيه نفسه يرجع بالزمن وما يعملش اللي عمله من زمان ولا جوازه من أنجي وكان سمعها بس الزمن ما بيرجعش تاني.
اتنهد بحزن.. الغيرة وحشة أوي بتاكل في قلبك من غير ما تحس حصلت على فكرة قبل كدا معايا أنا ومايا ومايا قالت كلام وقتها لو كانت قدامي كنت دفنتها بس لحظها إنها كانت بتتكلم شات.
كايا وسكر بصوا له بانتباه.. بمعنى احكي.
مراد بصلهم باستغراب.. خير.
جات ورد وشوق عليهم.. قاعدين بتحكوا من غيرنا دي خيانة.
سكر.. بضحك.. تعالوا اقعدوا.
كايا بغيظ.. وأخوكِ المصون عارف إنك هتقعدي معانا.
ورد ضحكت وشوق ما كانتش فاهمة حاجة.. إيه دخله عمر هو هيمنعها ليه؟
كايا بغيظ.. عمر ده عاوز الحرق.
شوق بصدمة.. يالهوي عمل إيه؟
ورد بضحك.. أخد كايا امبارح من قفاه وراح حبسه في أوضته عشان ما يرجعش يقف معايا تاني 😂.
مراد برفع حاجب.. عمر ومش هيتغير وبعدين بص لكايا.. ولا أنت بتقف معاها ليه أخدت إذن أخواتها الكبار.
كان بيستفزه.
كايا بغيظ.. هو لازم أخد إذنكم ولا إيه مش فاهم.
مراد بغرور.. أيون دي الأصول يا ابن الأصول لازم تاخد إذن الكل أبويا وأنا ومازن وعمر أخواتها الكبار وأبوها ومتقلقش محدش هيوافق فينا.
كايا بغيظ.. والله لأتجوزها غصب عنكم كلكم وأبقى أشوف حد بيفتح بقه.
ورد اتكسفت.
مراد باستفزاز.. وهي مش هتوافق إلا لما تاخد رأي أخواتها الشباب ولا إيه يا وردتي.
ورد.. طبعاً يا أبيه.
كايا بغيرة.. محدش يقولها وردتي غيري هي روزي وبس.
شوق بصدمة.. وربنا أنتم عيلة مجانين.. عرفت دلوقتي عمر جايب الجنان ده كله منين أتاريه وراثة.
الكل ضحك.
ــــــ
*عند حسناء* بصدمة.. أحيه أنتم اللي ناويين عليه ده مش سهل وبكدا هخسر أخويا.
مازن بغيظ.. تخسري أخوكِ ليه احنا هنعمل كدا عشان نربي مراد.
حسناء بغيظ.. أنت ناسي مين مراد ده بيقتل القتيل وبيمشي في جنازته عادي ده ممكن يخلص على جاك من غير ما يرمش ليه رمش.
مايا بخوف.. حسناء معاها حق بلاش أحسن أنت كدا هتقوم نار احنا مش قدها.
مازن بغضب.. أنتم خايفين من إيه فهموني أنتِ مش عاوزة مراد يعرف قيمتك.. دي الحاجة الوحيدة اللي مراد هيتربى بيها وهو كدا كدا ما يعرفش مكانك وأنتِ غيرتي رقمك وقفلتي سوشيال مراد هيعرف مكانك أنتِ وهو منين.. وبعدين ده مجرد بوست هينزل وإشعار صغنن لمراد مش هتروحي فعلاً تتجوزي جاك.
مايا برعب.. مراد هيعرف مكاني أكيد ووقتها مش هيرحمني لا أنا ولا جاك مراد شخصيته التانية لما بتطلع ما بيشوفش قدامه.
مازن.. عارف إنه حلوف وبيتصرف قبل ما يفهم ومتسرع وبيهد الدنيا وبيرجع يندم بس أنا واقف في ضهرك وبعدين يعني اسمالله عليه جاك يعني مقطع السجادة صلى ما هو أسود من مراد.
كان بيكلم بسخرية وحسناء ضربته في كتفه بغيظ.. اتلم هو أخويا برضو.
مايا.. أنا قلبي مش مطمن من اللي أنت ناوي تعمله ده وبعدين هتقدميني كبش فداء لمراد ما كانش العشم خالص.
مازن بنفاذ صبر.. بت ما تجننيش هكتبلك البوست وينزل زي ما هو أنتِ فاهمة من غير إنك تمسحي حاجة ولا هنفخك.
حسناء بسخرية.. أنتم أصلاً ناسيين حاجة صغيرة إن مراد مش هيخيل عليه البوست أصلاً والهبل ده.. وهيكشف الموضوع.
مازن بغيظ.. لا مش هيكشفه وهو عارف إن الست كان في إعجاب لجاك من ناحيتها قبل الباشا ده هيتجنن من الغيرة اسمعوا مني بس أنا عارف هربي مراد إزاي.
حسناء.. بلاش بوست مايا أنتِ لسه معاكِ الواتس القديم صح رجعيه تاني وحطيه استوري ومراد بس اللي يشوفه وبعدين اقفلي واتس ولو رن عليكِ ما ترديش.
مازن.. أوك.. حلو ده.
مايا بخوف.. ربنا يسترها.
مازن.. كتبت ليكِ الاستوري روحي اعملي كدا وعرفينا حصل إيه.
مايا.. أوك. وقفلت معاهم واتصدمت من الاستوري.. يالهوي أحط ده ممكن يطلعلي من الفون ويكسر دماغي.
مايا.. لا اجمدي كدا هو الوجع اللي حسيتي بيه كان شوية لا مراد ما بيسميش عليكِ لما بيقرر يوجعك.
وعملت كوبي وأخدته وفتحت الواتس القديم وحطته استوري وعملت ما فيش غيره يشوفها.
مايا في سرها.. ربنا يسترها ويعدي اليوم ده على خير.
ــــــــــــــ
*عند عمر في المستشفى.*
كان قاعد في مكتبه وفجأة الباب اتفتح بهمجية ودخل واحد باين عليه إنه متعصب أوي.
وحط إيده على المكتب.. بغضب.. فين شوق يا عمر؟
عمر رفع عينه ببرود.. اسمها الدكتورة شوق حرم الدكتور عمر العزايزي.
الصدمة وقعت على الشاب.. مراتك إزاي دي خطيبتي.
عمر كان بيبصله بغضب.. لا هو أنت ما تعرفش إنها بقت مراتي ويلا من هنا بدل ما تخرج على نقالة.
نادر بغضب شد عمر من هدومه.. مش خارج ووريني هتعمل إيه مش همشي من هنا من غير شوق.
عمر بجنون ونزل إيده من على هدومه ومسكه هو.. مفيش شوق شوق بقت مراتي وقدام الدنيا كلها وأحسنلك تمشي من هنا بدل ما همشيك من الدنيا كلها.
نادر بغضب.. هتعملها إزاي دي وريني لو كنت دكر اعملها.
عمر ضربه بوكس 👊 في وشه بجنون وفضل يضرب فيه والصوت بقا عالي والناس اتلمت ووائل جه وحاشوهم عن بعض..
عمر بجنون.. هوريك هعمل إيه فيك يا كلب.
نادر بجنون.. ويا ترى بقا عارف إنها مش بنت.
عمر اتجنن خالص وزق نادر بعيد ونزل ضرب في نادر ما كانش حد عارف يحوشه عنه ونادر كان بيضحك وبيقوله.. خدت استعمالي يا ابن العزايزي.. وفجأة.
ـــــــــــــــــــــ
*عند مايا* كانت متوترة أوي والفون بيرن في إيديها اتخضت فكرته مراد.
بتفتح الفون لقيته جاك خدت نفسها شوية.
مايا.. مرحبا جاك.
جاك.. Welcome ما بكِ يا فتاة ماذا تخبئين عني؟
مايا بصدمة بتشوف الواتس جالها إشعار برسالة وجاك لسه معاها على الفون.. الرسالة "هخليه يوم أسود على دماغك أنتِ وهو😡"
رمت الفون من إيديها وفضلت قاعدة في الأرض بتترعش.
جاك بقلق.. مايا أين أنتِ ماايا.
ما كانش بيجي ليه رد قلق عليها أكتر وقفل وراح نزل جري من بيتهم وركب عربيته ومشي بسرعة وكان بيحاول يرن عليها كتير ما ردتش زود السرعة لحد ما.
ــــــــــــــــــ
*عند مراد.*
كان قاعد بيحكي ليهم عن الموقف بعد ما سكر سكتتهم عشان تعرف..
كنت أنا اللي بصحح التصميم للبنات وكدا وكانت في بنت اسمها مرام معجبة بيا البنت دي هي ومايا ما كانوش بيقبلوا بعض حرفياً مايا كانت تصميمها حلو بس كانت ضعيفة في 3D وأنا كنت بصحح معاها برايفت وكدا وده لو كان حد عرفه كان هيبقى اسمه غش لأن من القوانين ممنوع تصحيح برايفت فجأة مرام كنت بقولها سلمي عادي لأن التصميم بتاعها خلص قامت باعتة استيكر I love you "بحبك" وبوسة مايا اتجننت ما استنتنيش أصلاً أرد قامت رامية كلام عصبني وقتها..
شوق.. بفضول.. قالت إيه؟
مراد بضحك.. إيه ده هو احنا فتحناها دعارة هنا ما تتلمي يا أختي أنتِ وهو وعندكم برايفت روحوا فيه رمت الكلام وقفلت نت وأنا كنت هتجنن وأمسكها أفتح دماغها قعدت أسبوع ما كلمهاش وهي برضو وكنا بنصحح عادي بس برايفت لا لحد ما أنا اللي بعت ليها وقولتلها.. التصحيح آخره بكرة ولو ما تسلمش هطين عيشتك.
أنا كنت باعت عشان أخليها تتكلم معايا أو تتخانق لقيتها شافتها وما ردتش عصبتني أكتر ومرام عملت واحد تاني وأنا عشان أستفز مايا قولتلها يا خراشي على القمر قمر زي اللي عاملاه وقتها اتفتحت فيا برايفت يا كداب يا غشاش يا خاين يا بتاع البنات واتفتحت فيا.. أنا كنت هموتها لو قدامي بس كنت بضحك فشوفت الرسالة وما ردتش لقيتها بترن عليا وسمعتني ما أكره كله وقالتلي مش عاوزة أعرفك تاني وقفلت في وشي وعملتلي بلوك.
تاني يوم كانت رايحة الجامعة عادي اتفاجأت بيا واقف قدام الجامعة ومستنيها قامت واخدة أوبر ومشيت وأنا اتعصبت وروحت نزلتها منه وأخدتها معايا بالقوة وركبتها معايا وروحنا على النيل قعدنا و قولتلها أسمع صوتك كأني كنت بقولها اتفتحي واتفتحت فيا بحمد ربنا إنه ما كانش حد واقف وقتها عشان كنت رميتها في النيل.. وبقت تقولي يا بتاع مرام وكداب وخاين مش عاوزاك وكنت هقول لبابا إنك هتيجي تتقدم بس لا مش هقوله روح لمرام يا بتاع مرام.
كانت تعبيرات وشها تفطس ضحك وأنا بضحك وهي هتولع فيا وبعد ما هديت خلاص سابتني ومشيت.
قومت أنا كلمت باباها وقولتله أنا مين وكدا وقالي تشرفونا يوم الجمعة وما عرفتهاش أصلاً إني جاي هي عارفة إن في عريس جاي بس مين ما تعرفش وأحنا ما بنتكلمش خالص فهتقولي إزاي المهم يوم الجمعة روحت أنا وأخدت أهلي وأمي طبعاً ما كانتش موافقة عشان كدا ما جتش معانا وقعدنا مع أهلها وأمها طلعت جابتها وكانت بنت اللذينة جامدة يوميها وطبعاً كانت عيونها في الأرض قال مكسوفة ولما سابونا مع بعض ضحكت وقولتلها الكسوف هيخر من أمك.
لقيتها بصتلي.. بصدمة.. وبتقولي أنت.
رديت عليها.. أه أنا مفكرني هسيبك لغيري يروح أمك.. ولو فتحتي بقك ده هقوم أبوسك قدام الكل.. وبعدين إيه الفستان ده ما لقيتيش أقصر منه عشان تلبسيه ده أنا هربي أمك ما تخافيش.
مايا وويتبع.
رايكمممممممم
عاوزة تفاعل حلو بقا.
رايكم مراد هيعمل إيه وإيه اللي في الاستوري ومازن فعلاً هيقف لمراد ولا هيخلع وعمر هيعمل إيه في نادر.