رواية احببت متلازمه داون الفصل الواحد والعشرون 21 بقلم نوسه حمد
علي ساق حسام وانا قلبي انقطع وبقيت اسال ف نفسي حسام مالو والحاصل شنو وليه بعاملني كانو م شايفني امي جات قالت لي سجمي حسام مالو قلت ليها م عارفه يمه اديني بندول انا راسي ح ينفجر
اخوي بقا يجوط قال ليهم ياهو الراجل الدلاهه دا العرستو ليها خشمي م فتحتو م ح ابرر لزول انو حسام متغير دي مصيبه وحلت علي دماغي وامتحانات الدنيا لسه شغاله فيني بقيت افكر اعمل شنو اختي قالت لي كان تدي محمد وتديهو ولدك مدام هو م عاوزك قلت ليها قال ليك م عاوزني ولا بتتكلمي ساي اخوي قال لي الحاجه الما عارفاها حسام جاب ليك قسيمتك قلت ليهو شنو قال لي خلي ابوي اجي اجيبا ليك انا من غير م اشعر قلت ليهو ومالك مبسوط كده انو انا جابو لي قسيمتي قال لي عشان تشوفي اعمالك وصلتك لي وين قلت ليهو ودا حل يعني مفتكر انو انا لمن انكسر تاني وتالت دا عقاب وح استسلم انت م عارفني م تتكلم انا الحمدلله بقيت ملتزمه والماضي كلو جدعتو وراي وربنا يغفر لي ودي الحاجه الوحيده البتمناها انو ربنا يغفر لي ذنب اولادي الجدعتهم ويحفظهم وربنا عالم الجواي وهو البحاسبني انت م بتغترب بالسنين وتجي تحاسبني وقت خايف علي عرضك ما كان تجدعني كان تخليني قريبه ليك كان تسأل مني وانت بعيد ممكن تنصحني وتوعيني حتي لو بالتلفون وانا لو جيت اقع ف الغلط م بقع فيهو عشان بعاين ليك وبقول قلبك علي بس انا من وعيت لقيت حياتي عباره عن امي وابوي وعايشين بمفهوم ناس زمان والنفوس الطيبه والحاجه الما عارفنها كلكم وح تتفاجؤ بيها انو حسام ابو بتي الاولي واتزوجني عشان اصلح غلطو وانا اتزوجتو عشان تعبت من المجتمع الما برحم وحياتي كانت عباره عن تمثيل لغايه م ربنا حنن قلبو علي وعشت حياه زوجيه حلوه والدنيا ابتسمت لي وفجاه حياتي اتغيرت من حال لحال وم زعلانه دي قسمتي وح اعيش باقي عمري اربي ولدي دا وان شاء الله اكبر انفعني اشيلني واشيل نفسو وكنت حزينه لابعد الحدود بس اتيقنت بي قسمتي ابوي قال لي م تزعلي ي اريج اولادك ديل انا ابوهم قلت ليهو م بتقصر ي ابوي ودخلت غرفتي لقيت علي متصل علي ورديت عليهو قلت ليهو اول مره ارد عليك واكون فعلا عاوزه اتكلم معاك قال لي اريج قبل تتكلمي انا حاسي بيك وحاسي بالجواك وم تزعلي علي القسمه قلت ليهو م زعلانه بس حسام معقوله اتغير كده وبقيت ابكي لاني فعلا كنت بحبو وشديد كمان علي قال لي اريج بتحبي حسام قلت ليهو شديد ي علي بس الحمد لله وحبيتو عشان كان قسمتي ورغم اني عارفاهو اتزوجني بالغصب بس برضو حبيتو وعشت معاهو ايام حلوه علي قال لي رغم اني حسيت بي غيره بس برضو كبرتي في نظري وانا بمد ليك يدي للمره التالته وح اتزوجك وح اعيش معاك كل عمري الباقي مبسوط قلت ليهو علي انت ذنبك شنو تتزوجني قال لي ذنبي انو انتي حبي الاول الما قادر اتجاوزو قعدت اضحك قلت ليهو ياااه ي علي انت لمن كنت بتحبني حبيت اريج البت السمحه هسي انا اتغيرت شديد علي قال لي منو القال انك اتغيرتي قلت ليهو شايفه نفسي في المرايه قال لي المرايه كذابه انتي لسه حلوه وعارفه ي اريج انا من بقيت ملتزم غضيت بصري من كل بت وم بطيل النظر في عين بت وحتي انتي في الأول كنت بتجاوزك بس حسيت انو انا بحبك شديد وبالذات لمن شفت حياتك مع حسام وانك اتغيرتي واتمنيتك زوجتي من جوه قلبي ختي يدك في يدي قلت ليهو م اظن وانا زاتي م بتزوجك لانك زوج حماتي عمه ولدي قال لي خليك من دا كلو انتي بتحلي لي وم عندك شغله فيهم وانا عاوزك عشان نعيش برا السودان لاني لقيت لي شغل وح اسوقك انتي وثويبه بس م ح اقعدكم مع بعض قلت ليهو انا م اظن اوافق قال لي خليها مع الايام وعاوز اقول ليك انتي مطلقه الان تسمحي لي اتصل كل مره وافقدك انتي واولادك لانو حسام م ح يفقدك قلت ليهو طيب
قفلت التلفون من علي وكلام علي حسسني بالامل تاني بس كل م اتزكز ولدي والمستقبل ونظره عمتو ليهو لو انا اتزوجت راجلها وقلت لازم اصل لي حسام ومرت الايام والعيد قرب علي جا وجاب لينا ملابس العيد انا واولادي وجاب لينا خروف العيد قلت ليهو انت ذنبك شنو قال لي انتي مسؤوليتي لغايه م رينا يعوضك وقال لي ح اشيل محمد اودي لي اهلو انتي م ملزمه انك تمسكيهو قلت ليهو لا لا انا م بقدر قال لي لا ح تقدري وانا م ح اشيلو ح اوديك ليهم انتي بنفسك ترجعي وتشوفي براك الوضع وم تقولي ليهم جابني علي مشيت كلمت امي قالت لي خلاص رغم انو ح نفقدو وجيت لبستو ولبست لي عبايه وطلعت مع علي ووصلني البيت والبيت عباره عن فلله لمن انخلعت قلت ليهو حسام جاب القروش من وين قال لي م عارف والله انزلي ودي الولد وبكون منتظرك في بدايه الشارع مشيت ضربت الجرس وفتحتو لي مرت حسام لمن شفتها م صدقت عيوني بقت زي المزيعات زارعه شعر وشي رموش وسمحه شديد بقت سلمت علي من غير نفس دخلت جوه لقيت ام حسام لمن شافتني لمن دموعا جرن قلت ليها م تبكي كلو بيد ربنا وانا م زعلانه وجيت عشان اجيب محمد لي امو وعاوزه حسام مرتو نطت لي في حلقي قالت لي دايره بيهو شنو قلت ليها خليك من الدايراهو امسكي ولدك دا وضمي عليك وخلي القساوة انا م دايمه ليهو ومحمد التقول بحس حلف ابا انفكا مني لمن شالتو مني بالقوه وشالت قلبي معاهو حسام جا من الشغل لمن شافني انخلع سلمت عليهو وقلت ليهو حسام انا جايني عريس مرتو قالت لي مبروك عليك عرسيهو اها دا الغلطتي معاهو المره الفاتت ولا دا جديد قلت ليها الله يسامحك.حسام م ردا علي حسيت نفسي انا بايخه طلعت منهم ولا حتي سالوني من ولدي الجديد ومن خلال تلميح مرتو حسيتا ماليه راس حسام لانها قالت لي م تنسبي ولدك لي حسام بس م ركزت معاها علي قال لي اها مالك قلت ليهو علي انا ماشه لي ثويبه قال لي لا لا احسن تبعدي منها لانها الفتره الاخيره دي كل م اجيبو سيرتك تنبزك قلت ليهو مالي انا سويت ليها شنو قال لي خليها ياخ وردي علي بعد شفتي براك الظلم الانتي فيهو ح تقبلي بي ولا لا قلت ليهو موافقه بس ع شرط ثويبه م تعرف قال لي خلاص ح نعقد واسوقك معاي السعوديه.
يتبع..