رواية أرهقني الفجور الفصل الثالث 3 بقلم نوسه حمد
بعد الحصه انتهت مشيت للاستاذ وكنت خايفه شديد وقلبي اباهو نهاي بقا يتكلم معاي كلام ما مفهوم وبقا يتنمر علي وقال لي حتي لو ما عندكم قروش اشحدي ملابس الشحده ما عيب ولا عاجبك منظرك المقرف دا انا ماقدرت انطق حرف وكان جواي كلام نفسي اقولو ليهو بس ما كانت عندي الجراءه استاذه منال جات داخله وسلمت عليهو قالت ليهو استاذ علاء كيفك ان شاءالله بخير وكانت بتعاين لي نظره خوف وانا سرحتا بعد سمعت اسمو بقيت اتزكر في مكالمه صاحبات علا بكل جراءه قالن ليهو احذف الفيديو اكيد دا هو استاذه منال تتكلم معاي وانا سرحانه حست بي متغيره قالت لي نسيبه بصوت عالي انخلعت وقلت ليها نعم يا استاذه قالت لي علي فصلك طلعت وكنت بعاين لملامح الاستاذ حسيت انو شرير دخلت الفصل وصفيه قالت لي مالو الاستاذ م رديت عليها قالت لي معليش ما تزعلي
رجعت البيت وكنت مضايقه من ضحك البنات علي انا ما اخترت الفقر دا نصيبنا من الحياه ونحنا ما زعلانين وعندنا يقين بس ليه الناس بتحب تضايقنا بالكلام وانا متاكده زي ما انا بتعرض لتنمر اخواني برضو ح يكونوا بتنمرو عليهم
امي قالت لي مالك فشنو قلت ليها يمه ماف شي انا عاوز اركز في قرايتي جاتني عزيمه اكل الكتاب اكل ولازم انا اتفوق وانفع ابوي وانشلهم من الفقر دا بقيت اقرا الادونا ليهو والما ادونا ليهو ونفسي السنين تجري عشان اخلص قرايه
بقيت امشي المدرسه بي عبايه بس كل يوم المديره بتجلدني بسبب عبايتي بتقول لي انتي في المدرسه زي الكلمه الشاذه ما راعت لي طعنتني في قلبي اتجرئتا وقلت ليها الحشمه بقت شذوذ انا بعدين لابسه عبايه ما لابسه ضيق ولا شاذ قالت لي ما تردي علي وجلدتني جلده عمري ما انساها لغايه ما استاذه منال جات اترجتا تخليني مشيت الفصل ويدي ما قادره امسك بيها القلم بس اشكيهو لي منو الالم كنت ببكي ودموعي مغرقه الكراسات وانا بحاول الخص الادونا ليهو صفيه قالت لي النكتب ليك قلت ليها لا ما مشكله بجازف ومن شده الالم حسيت اصابعي انكسرت مشيت البيت وما قلت ليهم حاجه ولحسن حظي لقيت ابوي جايب لي ملابس مدرسه جديده انا من شده الفرحه انا ابكي وهو يبكي قالت لي معليش للتقصير وان شاءالله شهر كمان واجيب ليك شنطه قلت ليهو لا لا ما تكلف نفسك ما بحتاج قال لي لا انا اخدت عهد مع نفسي ما احوجكم لحاجه قلت ليهو ابوي والله عمري ما حسيت انك محوجنا حتي لو ما عندنا كنت بقول انو لو عندك ما بتقصر قال لي اقصر منكم كيف وانتو مسؤوليتي امام ربنا
مرت الايام وانا مبسوطه ومجتهده في دراستي واستاذه منال مشجعاني شديد واي معلومه تفوت علي في اي ماده هي بتراجعها لي بس لاحظت لي في ماده الأحياء ما متفوقه سالتني قلت ليها ما بحب الاستاذ قالت لي انا كمان ما بحبو بس ما بنقدر نتكلم دا ولد المديره انا انخلعتا قلت ليها دا ولد المديره قالت لي اي عشان كده ما تمشي ليهو المكتب كتير قلت ليها حاضر طلعت منها وقلبي ادق قلت طيب طالما هو ولد المديره معناتا عندو كلمه لو هو فعلا بعرف ناس علا كان رجعهم بس ماقادره افهم ولا ح افهم
مرت الايام والشهر خلص وعلا وشلتها نزلو المدرسه كنت خايفه منهم شديد بس حصل الما متوقع علا جات سلمت علي وقالت لي مشتاقين انا ما صدقتا لاني حبيتا من قلبي قلت ليها انا كمان والله قلت خلاص علا اتغيرت وبقينا نمشي ونجي مع بعض صفيه قالت لي ما مطمنه ليها البت دي بحسها غتيته قلت ليها دي صديقه الطفوله قالت لي دي اكتر واحده تخافي منها النوعيه دي ما عندهم عشره كنت بدافع ليها وبقول ليها صفيه عليك الله ظني فيها خير احتمال الفصل الشهر دا اتعلمت منو درس لانها انحرمت من القرايه كنت بحس صفيه بتغير من علا بس صفيه مكانتها براها وعلا مكانتا براها
وعلا بقت ما بتمشي الحمامات المهجورة كتيره لاحظت ليها والشي الحيرني صفيه بقت تتكلم عن استاذ الأحياء كتير وفي حصتو بحسها متغيره وبتحاول تكون ظاهره قلت ليها صفيه مالك بتتلبشي لمن تشوفي الاستاذ دا قالت لي لا لا وحاولت تتهرب مني بس الفصل كلو حاسي بي صفيه ونظراتها للاستاذ وما كده وبس اول ما اطلع تشيل كراسا وتمشي وراهو بحجه انها واقفه عليها حاجات وبتمشي ليهو كتير المكتب انا اتكلمت معاها ونصحتها قلت ليها نحنا ماقدر الناس ديل جينا نتعلم قالت لي نوسه ما تركزي معاي انا هسي قاعده ادخل فيك قلت ليها طيب يا صفيه بس انا خايفه عليك علا اتقربت مني شديد ومرات بتطلب مني اشرح ليها بس حسيتا لسه بتسجر لانو مره عاوزه تديني قلم الولاعه وقعت منها واجهتهتا قالت لي ربنا يهديني حسيت انها بقت مدمنه شديد قلت ليها بكل براءه في كل صلاه ح ادعي ليك يا علا حسيت دموعا جرت وحضنتني قالت لي انا بحبك وانا والله تعبت من نفسي انا مرات بكره نفسي حسيتا شايله في قلبها كتير وما تابعت لي كلاما صاحباتا جو ساقوها كان نفسي اقول ليها لا ما تمشي وتسمع كلامي ودموعا ما هانت علي حسيت انها داخله في ضغط نفسي بس ماقادره افهم العليها نهايه اليوم فتشت ليها ما لقيتا ومشيت براي وصفيه ما شفتها برضو بس في نص الشارع شايفه في شكله والناس متلمين فيها لمن وصلت لقيت البنات ومعاهم علا يجلدو في صفيه انا قلبي بقا ادق وباالقوه طلعت صفيه من نصهم وبقيت اسالها صفيه مالك فشنو عملتي شنو كوركت فيني وقالت لي خليني في حالي ما تعملي فيها قلبك علي وخايفه علي قلت ليها فعلا انا قلبي عليك صفيه انتي مالك ابت تتكلم معاي شالت شنطتها وفاتت علا جات بوراي قلت ليها علا فشنو قالت لي مافي شي جاني احساس انو الشكله دي في استاذ الاحياء لانو في واحده فيهن بتعرفو وصفيه عامله فيها بتحبو من غير ما اسالها مباشر قلت ليها علا عندي سؤال ممكن تردي بصراحه قالت لي شنو يا نوسه قلت ليها علاء الاتصلت ليهو صاحبتك وقالت ليهو احذف الفيديو ياهو علاء استاذ الاحياء علا اضايقت مني وكوركت فيني قالت لي نوسه خلي بالك من قرايتك وبس وخشمها تاني ما فتحتو معاي
مرت الايام وصفيه بقت غامضه وانا ما ركزت معاها كنت مجتهده شديد نفسي اقفل كل المواد وابوي كان بساعدني كتير واستاذه منال ما قصرت ناس دفعتي كانو مسميني حفاره الدفعه كنت اي معلومه تمر علي ما بحفظها وبس بفتش لي معلومات اكتر عنها عشان افهما قلت لي ابوي ما عايزه اي شي غير لابتوب قال لي ان شاءالله
مرت الايام ونزلنا امتحانات نهايه السنه وكنت ما بلاقي ناس علا كتير وصفيه المعاي ما مركزه معاها وحسيت انو مستواها بقا كعب شديد طلبت منها نزاكر مع بعض رفضت ما ركزت معاها اجتهدت شديد وكل الامتحانات حسيت اني اشتغلت فيها بزياده اجزنا اسبوع وكانت النتيجه ببرنامج وطلبو مني اجيب امي وابوي وكانت اول نتيجه بتاعت سنه اولي ثانوي واول طالبه اتزاعت انا ناقصه من تقيفل المجموع نص درجه الحمد لله كنت مبسوطه وشايفه فرحه امي وابوي وخلصت النتايج وصفيه اتزاعت ضمن التلاتين كانت زعلانه قلت ليها ما مشكله ان شاءالله اجتهدي السنه الجايه قالت لي ان شالله ودعتها ومشيت وودعت علا لانو دي كانت نهايه سنه
وفي الاجازه طلبت من ابوي اعمل مشروع صغير اساعدهم كانت الدنيا صيف كنت بعمل الاسكريم في البيت والناس بجونا في البيت وساعدتهم كتير ابوي كل يوم ادعي لي قال لي ربنا ابارك فيك انا كنت زعلان اني ولدت بت في البدايه كان نفسي البكر يكون ولد عشان يساعدني بس انتي بي الف ولد احمد الله عليك
مرت الايام وبساعدهم في البيت والبوتيك الجنبنا اشتريت منو شنط واسبورتات مدرسه بالقصد المريح كانت مرحبه بي شديد وكنت ملتزمه في السداد ومشروعي ماشي كويس كنت بدي اخواني يقعدو بالاسكريم في الشارع لغايه ما المدرسه فتحت ونزلت اول يوم بلبس جديد وشنطه جديده واسبورت جديد الناس كلها علقت علي في منهم الاستهترو بي في منهم الفرحو لي شديد
خلال اول يوم دراسي حصلت حاجه غريبه جدا المدرسه انقلبت وانعدلت والناس كلها مندهشه الغفير لقا طفل حديث الولاده مجدوع في الحمامات المهجوره وما كده وبس شكلها واحده من المدرسه لانو في اثار دم الطالبات كلهم يرجفو في منهم لمن شافو المنظر داخو ووقعو واتصلو للشرطه وطلعونا وبقا السؤال هنا دي منو العملت كده وفي نظر الشرطه كلنا متهمين ………يتبع
البتوقع صاح ليهو جايزه دي منو العملت الجريمه دي.