رواية أرهقني الفجور الفصل الثلاثون 30 والأخير بقلم نوسه حمد

رواية أرهقني الفجور الفصل الثلاثون 30 والأخير بقلم نوسه حمد

صفيه كانت منبهره بالدكتور وحسيتا بتحبو شديد بس كنت خايفه عليها من انو يخزلها اتناقشت مع شهاب قعد اضحك قال لي نوسه ما تبقي تفكيرك سلبي دايما وعشان اوريك دكتور احمد سالني منها وقلت ليهو بت محترمه وهي من اسره بسيطه وهو زاتو متزوج بس زوجتو عندها مشاكل ومريضه رغم انها بت صغيره وما هاين عليهو يطلقا لانها مرضت بعد الزواج وهي الطرحت ليهو فكره انو يتزوج رغم انو كان رافض بس القسمه جمعتو بي صفيه وكان قال لي ما تكلم زوجتك عشان انا لسه م طرحت الموضوع علي زوجتي واهلي وما عايز اعشمها واقطع عشمها وهسي لاقيتو جا لي اهلو طبعا هو من اولاد الخرطوم بس الامتياز اتوزع في المستشفي حقنا وقال لي كلمت اهلي وما اعترضو وزوجتي شجعتني شديد وكنت جاي افرحك ماقايل انك عارفه وخايفه عليها  ابشرك يا نوسه احمد دا ولد هادي وطيب وما عندو حركات وصفيه ربنا بريدها عوضها بي احمد وقال ماعندو مانع انو يسكنها هنا ويشتغل في الحله وكان بفتش لبيت للايجار وانا اقترحت عليهو بيتي اصلا كده كده مفكر ااجرو قلت ليهو ياتو بيت قال لي نسيت احكي ليك انا ايام ولادتك عمي كان مزنوق في قروش وعندو بيت مشتريهو عشان يمسك ليهو قروشو عرضو علي واشتريتو منو ومع اللخمه نسيت احكي ليك قلت ليهو ما شاء الله مبروك تستاهل يا شهاب قال لي دا كلو عشانك انتي واولادي مانفسي احوجكم قلت ليهو انا رضيانه حوجنا بس تكون جنبنا  الحياه لو كانت قاسيه ومحتاجين فيها بتهون بي الحنيه والاستقرار انت نسيت انا اتربيت في وسط كنا محتاجين فيهو شديد  بس ما كنا بنحس بي الحاجه دي عشان ابوي وامي متفاهمين مع بعض وعايشنها بالبركه يوم في ويوم مافي يعني انو كونو انت تكون محتاج وماعندك مابفرق معاي بس البفرق معاي انو تكون ما جنبي  قال لي ان شاءالله ما اجي اليوم والبفرقنا من بعض وع فكره انا مشتاق لي بيتنا وحياتنا كفايه ارح قلت ليهو وين ماف طريقه امي قالت لي شينه تمشي من هسي انتظري الاربعين وتكون نتيجتي طلعت قال لي م مشكله ح اجي كل اسبوع 

وكان مبسوط بي ولدو شديد   امي كل مره تقول لي والله انا اتندمتا اني في الاول ما وافقت عليهو بس سبحان الله قسمتك علي قدر نيتك يا بتي الله قسم ليك راجل شاريك ونسابا محترمين  وشايلنك في راسهم قلت ليها الحمد لله يمه  شهاب محترم وبحب الخير للناس قالت لي اي والله بنتونس كده جات صفيه فرحانه وتتبسم اصلا هي لمن تخلص دوام بتجي تشرب معانا القهوه ومرات بتساعد امي في شغله البيت  قلت ليها الله ما شاء الله ما اسحرك  فشنو قالت لي نوسه ما تستهبلي شهاب ما كلمك قعدت اضحك قلت ليها شهاب اي شي بكلمني بيهو وهسي طلع مننا قال بجي للقهوه قالت لي طبعا احمد طلع جادي وقال لي الجمعه اهلي جايين بس يا نوسه خايفه من حته مرتو دي قلت ليها صفيه تخافي ليه ومرتو زاتا قالو البتقول ليهو اتزوج يعني يا صفيه ما تشيلي هم لو ما حابه الفكره ما كان قالت ليهو اتزوج انتي اتفائلي خير وانا متاكده انو امورك ح تظبط وان شاءالله فيما بعد ترحلو الخرطوم قالت لي انا م نفسي ارحل امي شايفاها براك حركتا صعبه وتعبت فينا نفسي اقعد جنبها امشي واجي فيها  قلت ليها اخواتك ما شاء الله بكره بكبرن وبخدمن امك وانتي مصيرك ترحلي معاهو زايد انتي نسيتي الجامعه قالت لي بالمناسبة يا نوسه النتيجه قالو الاحد قلت ليها خليك جاده قالت لي والله جاده معاك قالو الاحد قلبي بقا ادق قلت ليها مالك علي هسي قالت لي مالك يابت استهدي بالله وانا واثقه منك ح يزيعوك قلت ليها لو زاعوني انا بزيعوك انتي قالت لي ان شاءالله يا نوسه نفسي افرح وافرح اهلي واثبت للدنيا انو مهما ادتني علي راسي ربنا كريم علي قلت ليها اكيد يا صفيه وربنا جاب ليك ولد حلال   قالت لي نوسه والله فرحانه شديد بتمناهو اكتر مما ازيعوني اضوق فرحه الزواج الحقيقي مش تجربتي السابقه قلت ليها ان شاء الله تضوقيهم الفرحتين بنتونس كده امي جات جابت القهوه وقالت لي شهاب جا قعد بره لمن لقا معاك صفيه حنستو يدخل المظله حاره واخوانك العبو في راسو قومي عليهو لبست توبي وطلعت قلت ليهو تعال جوه قال لي لا لا يا نوسه معاك صاحبتك اخدو راحتكم  انا جيت جبتا ليك احتياجاتك وبمشي علي ابوي وابوك في الورشه بقعد اتونس معاهم واشتهيت قهوه السوق انتي اتونسي واخدي راحتك المساء بجيك اتونس معاك لي بليل بطلع تمام قلت ليهو طيب ادخل سلم عليها وامشي شهاب دخل سلم ع صفيه وقال ليها ربنا اتم علي خير ويسعدك واطمني احمد ولد ممتاز اساليني منو ومرتو زاتا ممتازه دفعتنا كانت ما تخافي منها واحمد زول فاهم قالت ليهو الله يبارك فيك تسلم كتير يا دكتور  

مرت الايام وصفيه اهل دكتور احمد جو وخطبوها وقالو ليهم العرس بعد شهر فرحتا ليها من قلبي صفيه تستاهل الفرحه 

يوم الاحد جا وانا من الصباح ادخل واطلع ارجف ومتوتره وامي مبسوطه

وتنظف في البيت ومشت جابت الحلاوه والبارد جاتني صفيه تبكي وانا ابكي لمن بدا المؤتمر الاساتذه كلهم جو بيتنا والمدير اقول لي ان شاءالله ح ترفعي راسنا وكنت بعاين في عيونهم بحس جواها ثقه فيها ماليها حدود بقيت ادعي ربنا انو ما اكسر ثقتهم واكون قدرها  وبدت الاذاعه وكلنا يدنا في قلبنا لمن ذاعوني انا لمن قربتا اقع والناس فرحانه اكتر مني بس انا شغاله ابكي وابوي يكبر ويهلل   وبعديني بي عشره ذاعو صفيه ودي كانت اكتر لحظه مؤثره صفيه كانت بتبكي وانا ببكي معاها لاني عارفه الجواها شنو الحمد لله ربنا جبر بخاطرنا وخاطر المدير التعب عشان يشوف المدرسه في احسن حال ويرجع ليها سمعتها والفرحه ملت المكان وفي لحظه فرح مدرستنا من مدرسه العاهرات بقت مدرسه المتفوقات ودقايق ما عديناها مدير المحليه جا ومعاهو كل الاساتذه الكبار ضقنا طعم الانتصار بعد معاناه وفجور كان سايد في المدرسه وقدرنا حققنا حلمنا ورفعنا اسم المدرسه من جديد كرمونا وادونا جوايز ابوي كان طاير من الفرحه كان فخور وهو بقدم فيني لمدير المحليه وبعد ما السوشيل ميديا كانت ضاجه بي الكوارث في المدرسه المره دي ضجت بي نجاحنا بصور بسيطه وسط اهل قريتي ووسط اهلي بحضور مدير المحليه ومدير المدرسه والاساتذه الكبار شهاب كان بتصل علي  وانا من الجوطه ما جايبه خبر وما استحمل جا راجع الحله وكان مبسوط لنجاحي قال لي تستاهلي الفرحه بتشبهك وان شاءالله ربنا يوفقك اكتر واكتر وابوي وشهاب ضبحو ووزعو الكرامه والكل كان حاضر في وسط الناس لمحت ام سعاد وهي بتبكي لا قادره تبارك لينا لاقادره تفوت قربتا منها ودموعي خزلني وبقيت ابكي باعلي صوت وهي تقول لي سعاد ماتت سعاد دمروها وكل حرف بطلع منها بشق الحله النص النص وبقت تتكلم عن بتها وانها كانت شاطره بس للاسف صحبه السوء دمرتها والناس بقو يطبطبو فيها وكل تلميذات فصلنا وقفو جنبها وقالو ليها نحنا بناتك وسعاد جوه قلبنا ما بتتنسي في اللحظه دي اتزكرت علا قلت معقوله بتكون مرتاحه بعد موت سعاد ومرض امها  لحظات كانت قاسيه علينا كلنا حزن ام سعاد كسر فرحتنا فعلا نفرح كيف وسعاد ماف لا اعتراض في حكم ربنا بس الطريقه الماتت بيها هي المؤثره علينا وتاعبه امها 

مرت الايام ورجعت بيتي وما جيت الحله الا لزواج صفيه وربنا كرمها بي احمد جبر خاطرها وطبطب عليها كنت مبسوطه شديد ليها والبسطني اكتر انو شالونا الجامعه سوا وزوجها قال ح يتحول الخرطوم ما ح يحرمها من القرايه 

مرن الايام والشهور وصفيه اجرت بيت جنبي كنا بنمشي الجامعه سوا بتي الشغاله بتمسك لي ولدي وفي الجامعه كل الطلاب تلقاهم اتنين اتنين الا انا وصفيه نقرا ونطلع ماعملنا شله ولا كنا فاضين للحركات دي بنجي زمن المحاضره يوم برجعنا شهاب ويوم احمد 

زهير اخوي ابوي سفرو السعوديه وامي اقترحت ليهو البت الشغاله معاي قالت لي بت يتيمه ومسكينه وعجبت امي مشينا اتقدمنا لي اهلا طبعا وافقو وما صدقو وكانت قاعده معاي جهزت ليها كل شي شنطه وشبكه وعملنا عرسها في صاله عزمنا كل الاهل وسفرناها ليهو  رغم انها كانت مساعداني بس انبسطت شديد ليها وزهير فرح شديد بي زواجو منها وكان كل ما يتصل علي بشكرني 

مر يا زمن وولدت تاني بت سميتا نور وكانت فعلا نور نورت حياتنا وزهير مرتو ولدت تؤام سما الولد موسي والبت مني وامي وابوي مشو ليهو ساقهم عمره واخواني كانو قاعدين معاي واختي الاصغر مني جبتها تقعد معاي ساعدتني شديد وكانت اشطر مني بس جاها عريس اتزوجت من غير ما تكمل دراستها 

 مر يا زمن وصفيه ما ولدت سريع وكانت زعلانه شديد بس الحمد لله ربنا رزقها بي اجمل طفل سمتو سند  في نهايه اخر سمستر ولدت واتخرجنا ونزلت امتياز في مستشفى الخرطوم والدنيا تجمعني بي علا معاها راجل كبير وكانت شايله ليها طفله شكلها بتها وكانت عيانه لمن شافتني لمن انخلعت  افتكرتني ح اتجاهلها قلت ليها علا ما شاء الله الف مبروك الزواج بجد فرحتيني  ربنا يسعدكم ودي منو الحلوه دي قالت لي دي سعاد بتي انا اتجمدتا واتزكرت سعاد قلبي وقف قالت لي ياها علي سعاد زميلتنا وكانت بتبكي وانا بقيت ابكي معاها زوجها مافهم حاجه وقال ليها بنتظرك بره قالت لي نوسه اتمنيت الدنيا تجمعني بيكم عشان اقول ليكم انا الدنيا ادتني علي راسي ونلتا جزاتي اتزوجت راجل اكبر مني عشان استر نفسي من عمايلي وحكيت ليهو بالماضي اتقبلني وسامحني بس انا عمري ما ح اسامح نفسي وحملتا اتمنيت الدها بت عشان اسميها علي سعاد عشان كل ما اشوفها اتزكرها وادعي ليها وادعي ربنا يغفر لي وما ح انسا انو انتي كنتي صاح وحاولتي تصلحيني بس انا كنت فاجره وقاهره  وما وعيت لنفسي الا لمن ارهقني الفجور  والسجن ادبني  والتزمتا ومرت خالي جابت لي الراجل دا واتزوجتو رغم انو كبير في السن بس محترمني  قلت ليها العمر ما مشكله اهم شي تكوني مبسوطه قالت لي الحمد لله بس يومي الاتزكر الماضي وسعاد الدمرتها بنفسي لمن بدخل في حاله ما بهدا الا ابلع حبوب نفسيات قلت ليها خلاص البقا بقا ودا ماضي وربنا كريم قادر يغفر ليك اهم شي تكوني رجعتي لصوابك قالت لي الحمد لله والتزمتا وبقيت اصوم اتنين وخميس الحمد لله عليك الله اعفي لي وصفيه منها خبر قلت ليها صفيه هسي والده قالت لي نوسه ممكن توديني ليها   قلت ليها انتي ساكنه وين قالت لي ساكنه في بري قلت ليها تمام دا رقمي اتصلي علي وح اوديك ليها قالت لي خايفه تحرجني قلت ليها لا صفيه مستحيل تحرجك  ودعتني وفاتتت

 بعد رجعت البيت حكيت لشهاب قال لي الحمد لله انها انسترت واتزوجت وتابت قلت ليهو لو شفتها ما بتعرفها بقت ملتزمه  

مرت الايام ويوم اتصلت علي علا وقالت لي انا جايه عليك راجلي قال بوصلني وبرجع قلت ليها تمام 

بعد وصلتني اكرمتها ورحبت بيها واتصلت علي صفيه قلت ليها عندي ليك مفاجاه قالت لي الا تحكيها بالتلفون قلت ليها لا الزول دا قال عاوز اقابلك شخصيا  قالت لي طيب مشيت دخلتا وهي كانت راقده قلت لي علا اتفضلي صفيه لمن شافتها لمن انخلعت وفي راسها الف سؤال علا مسكتها حضنتها وبقت تبكي وتقول ليها اعفي لي أنا ظلمتك اعفي لي انا دمرتك صفيه مشاعرها بقت متلخبطه   علا بقت تتكلم وتبكي شيلتا منها بتها لانها كانت بتبكي معاها وحاولت اسكتها بس كانت موجوعه وصفيه كانت ماقادره تسامحها اترجيتا تسامحها وفي النهايه صالحتهم مع بعض ودي كانت نهايه  روايتنا ارهقني الفجور 

اهداف الروايه 

اتكلمت فيها عن  سن المراهقه واصدقاء السوء   سن المراهقه سن   حساس جدا صعب التعامل معاهو  في بنات بكون طبعهم انهم راسهم خفيف وبمشو ورا الفاسد وولمن يخسرو نفسهم اول حاجه بفكرو فيها انهم يفسدو الصالح ودي اصعب ذنب ممكن يرتكبوهو في حياتهم ربنا بغفر ذنوبك المتعلقه بيك بس حق الناس صعب يتغفر بالذات انك تدمر واحده وتخسرها شرفها   زي ما حصل لسعاد وصفيه الروايه كانت خياليه وكل البدور  فيها خيال الحقيقه الكانت فيها اصحاب السوء 

وتاني حاجه اصعب حاجه في الدنيا انو البيئه المدرسيه تتحول لي بيئه قذره والغلط اكون فيها عادي بالذات لمن مدير او مدرس يسكت علي الظلم او يكون سبب في ظلم ويستهدف فئه ضعيفه حتي عقليتهم لسه ما متفتحه   

 وتكون اهدافهم شخصيه  ترجع لتدمير مدرسه عريقه وسمعتها كانت حلوه ابقا دا ظلم وربنا ما برضا الظلم ومصير الحق يظهر رغم الفساد الحصل ربنا ظهر الحق وكشف نواياهم المريضه وسمعه المدرسه رجعت احسن من اول  بتفوق طالبات كانو واعيين وهمهم القرايه والمواضيع التانيه بعيدين منها كل البعد 

تالت حاجه اتكلمت عنها  اسره نوسه رغم الفقر الشديد الهم فيهو بس ربنا سترهم في معيشتهم وفي حياتهم اولادهم ما اتأثرو بتنمر زملائهم  وكانو ع يقين انو الفقر  ارحم وانعم من عز سايب   واهل ما مراغبين اولادهم زي ما حصل لعلا رغم حياتها الساهله فرطت في نفسها سريع وكانت سبب في تدمير كميه من البنات   

م قدرت اكتب كل  الاهداف لاني مشغوله شديد والحلقه دي بكتب فيها من الساعه ٣ ما خلصتها الا الساعه عشره ونص واسفه جدا للاطاله واسفه جدا لكل تاخير سعيده بيكم جدا نتلاقي في روايه جديده ليكم كل الحب والاحترام مع تحياتي نسيبه حمد عبدالصادق.

                        تمت بحمد الله 

           لقراءة جميع فصول الرواية من هنا 

وأيضا زرونا على صفحة الفيس بوك 

روايات سما القاهره لكل جديد

وايضا زورو صفحتنا سما للروايات 

 من هنا علي التلجرام لتشارك معنا لك

 كل جديد من لينك التلجرام الظاهر امامك

تعديل المقال