رواية أرهقني الفجور الفصل السادس 6 بقلم نوسه حمد
كلام علا حيرني بالذات لمن قالت لي افتحي خشمك عشان تلحقي صحبك معناتا علا هي عارفه مكان صفيه وفي موضوع طويل انا بقا عندي فضول اني الاقي صفيه واعرف منها القصه وما مشيت البيت مشيت بيت ناس صفيه بقيت اسال لمن وصلت ليهم ناس بسيطين شديد وعندها اخوان صغار سلمت عليهم قلت ليهم امكم في قالو لي اي دخلت ومن بره سامعه صوت مشاكلهم ابو صفيه شكلو صعب شديد دايره ارجع هو شافني قال لي انتي منو وعاوزه شنو بقيت اتمتم قلت ليهو انا زميله صفيه جيت عشان اشوف صفيه جات قال لي ما جات ولو جات بشرح بطنها تشريح انا بقيت اتمتم ودايره اهرب بي اي طريقه بس ام صفيه جات قالت لي نسيبه تعالي يابتي وحسيتا ما قادره تمشي دخلت ليها وكانت المكان مقلب شديد قالت لي معليش بيتنا ما قدر المقام شفت في وشها اثار ضرب قلت ليها مالك يمه قالت لي لا لا مافي شي يابتي اها طمنيني ان شاءالله عرفتي مكان صفيه قلت ليها انا جيت اسالكم هسي وبقت تبكي قالت لي ياحليلا الحنينه علي وعلي اخوانها انا ضهري انقصا انا خلاص غلبني ولي مراد اموت وانتحر وارتاح قلت ليها بعد الشر عليك يمه كدي براحه براحه نتفاهم احتمال نقدر نصل لصفيه قالت لي اها قلت ليها انتو من وين اصلا قالت لي انا من الصعيد واهلي زاتهم ما عارفين عن صفيه حاجه واخواني صعبين لو عرفو انها هربت بقتلوها وبقتلوني قلت ليها طيب اعماما قالت لي هو في عم سمح مع اولاد اخوهو يابتي بكرهونا وهم سبب البهدله دي وجننو راجلي قلت ليها كيف قالت لي زوجي دا كان ماسك مع ابوهو الشغل وابوهو اتزوج واحده وولد منها وهي كانت قادره كتبتو اي شي قبل ما يموت ولمن مات طردو زوجي من الشغل ومن الزمن داك راجلي بقا ما طبيعي واقل كلمه بدقنا نحنا ولا بصرف علي البيت وبقيت اعوس للنسوان بالقروش وهو كل ما اتكلمنا معاهو عشان يشتغل كان بقول لينا زمني دا كلو شغال استفدتا شنو في النهايه طلعت ساي وبلم في البيت اكسرو وحالف ما يمش لطبيب نفسي وفي النهايه قبل علي صفيه الشايله البيت قلت ليها ربنا اكون في العون يمه وربنا يشفيهو ليكم وصفيه ترجع وتستقرو قالت لي امين قلت ليها صفيه لمن جاتا الملاريا وديتوها الدكتور قالت لي اي وديناها وعلق ليها فراشه وادانا الادويه قلت ليها ممكن التحاليل قالت لي فشنو يابتي في حاجه قلت ليها لا لا احتمال صفيه ملاريتا عاليه وحصل ليها شي قالت لي سجمي قلت ليها ما تخافي يمه ان شاءالله ما يحصل الا الخير وانا م برتاح الا القا صفيه قالت لي كتر خيرك يابتي انا لو عندي ولد قدركم ولا بت كانو عرفو مكانا بس الحمد لله وقامت فتشت لي الفحوصات وجابتن لي قلت ليها ممكن اشيلن قالت لي ليه قلت ليها الكلام كتر وسيره صفيه بقت علي كل لسان انا عاوزه اودي الفحوصات دي للمديره وانفي اختفاء صفيه واقول ليهم عندها ملاريا ومحتاجه راحه قالت لي طيب كان جوها هنا قلت ليها بسيطه قولي ليهم انها مع اهلك في الصعيد قالت لي كلامك صاح يابتي الله يبارك فيك قلت ليها العفو بس ما بحب اسمع عن صفيه حاجه كعبه وشيلت الفحوصات ورجعت لقيت امي منتظراني في الشارع ومن شافتني ادتني محاضره وشاكلتني وريتا عديل اني مشيت ناس صفيه بقت تكورك فيني قالت لي مالك ومالا قلت ليها يمه ختي مكانك مكان امها وفاقده بتك وماف زول جا عبرك شعورك بكون شنو قعدت تكورك قالت لي موش بلغو انت مالك ومالها بعدين الصقو فيك التهمه انتي وتجيبي لينا الكلام قلت ليها يمه والله حاجه ما ح تجيني طول ما انا ما عملت حاجه غلط ابوي جا لقاها تشاكل فيني قال ليها يا وليه مالك صوتك في بدايه الشارع قالت ليهو بتك المتفوقه الشاطره عاوزه تدمر نفسها ابوي حنين قال لي في شنو يا الغاليه وطبعا انا اي شي بقولو ليهم ما بدس منهم قلت ليهو ابوي في يوم من الايام صفيه كانت زميلتي امي زعلت عشان مشيت سالت منها وخايفه قال ليها معليش البت ما غلطت قالت ليهو غلطت واسمع كلامي يا موسي بتك دي بتجيبا كبيره ابوي قال ليها ما بتجيها عوجه وبعدين مافيها شي لو سالت من صاحبتها قلت ليهو ابوي انا عاوزه اختكم في الصوره واتكلم بالحقيقه قالو لي شنو قلت ليهو ابوي الناس اتهمو صفيه بي انها هي الولدت في المدرسه امي قالت لي سجمي الليله اوب علي الليله سجمنا ودي صاحبتك قلت ليها يمه عليك الله ما تتسرعي افهمي تتزكري يوم جاتني علا داك قالت لي اي قلت ليها جات عشان تفهمني انو الولدت صفيه وحكت لي قصه وانا صدقتها بس فجاه حسيت انو علا كذابه وعاوزه تشوه سمعت صفيه وفعلا دا القدرت حدي الان اصل ليهو امي ادتني كف لمن ابوي مسكني منها قال ليها اوعك تمدي يدك عليها خليها تكمل كلامها وتاني دقيها ابوي بقا ضاميني عليهو قلت ليها يمه انا ختيت نفسي مكان صفيه وانا بريئه والناس كلها فهمو غلط يمه انا اتوجعت قالت لي الغبيانه لو دي انتي صفيه بتقعد تدافع ليك دا لو ما زادت الفت قصص فيك قلت ليها دا برجع ليها هي بس انا مستحيل اعمل كده بالعكس نفسي اثبت انو صفيه ما ولدت وما عندها علاقه بموضوع الطفل الفي الحمامات والليله قدرت اجيب الفحوصات صفيه كانت عيانه عندها ملاريا. اكيد الدكتور القابلتو لو كانت تامه للولاده بشك فيها بس باقي لي امش المركز واشوف الدكتور واثبت الحاجه دي امي زادت في الكواريك زياده ابوي سكتها وقال لي بس يابتي انتي لا ضابط لا محامي قلت ليهو عارفه بس عاوزه ابرئ المسكينه الانظلمت دي ابوي قال لي طيب يابتي وقرايتك قلت ليهو ما تخاف علي انت عارف اني قدرها قال لي وينن الفحوصات قلت ليهو هديل واديتن ليهو قال لي امي اعملي لينا الغداء وجهزي لي جلابيه وانتي ادخلي صلي وتعالي نمشي سوا امي قالت ليهو اي جنيت ما نصيح عاوز تباريها في الغلط قال ليها ياتو غلط يامره انتي مطرطشه بتك دي اعقل منك بتدافع عن الحق وانا معاها تاني عندك كلام من غير ما اشعر حضنتا ابوي شديد قلت ليها يمه ما تخافي والله ما بتجيني عوجه انا ما غلطت انا عاوزه اقيف مع صاحبتي قالت لي طيب لو لقيتي انو فعلا كانت حامل قلت ليها اقسم بالله القاها فعلا كانت حامل انا تاني ماعندي دخل في اي موضوع في الدنيا دي وبعاين بعيوني بس قالت لي سمح مشيت صليت وبقيت ادعي في ربنا انو الحقيقه تظهر وصفيه ترجع لي اهلا اتغدينا وطلعنا مشينا المركز وسالنا من الدكتور الكان شغال يوم صفيه جاتو قالو لينا اسمو احمد ولحسن حظنا لقيناهو شغال ابوي قطع تزكره ودخلنا ليهو شكلو دكتور طيب شديد وطبعا انا ضربات قلبي زايده ومتوتره قال لي حاسه بشنو قلت ليهو لا انا كويسه ما جيت اقابل جيت بخصوص زميلتي جاتك اليوم الفلاني فتح الدفتر وقال لي معاها والدتها معاقه صاح قلت ليهو اي قال لي خير ان شاءالله البت ما تكون جاتا حاجه لانو ملاريتا كانت كتيره قلت ليهو لا الحمد لله بس جيتك في موضوع حساس وبما انك طبيب اكيد بتكون كشفت ليها بالسماعه قال لي اكيد طبعا فشنو قلت ليهو هل المريضه دي كانت حامل في التاسع قعد اضحك قال لي انتو جيتو تهظرو معاي ولا شنو حامل كيف وهي ما متزوجه دا كلام شنو حرام تتهمو بنات الناس قلت ليهو بس دا العاوزاك تثبتو لي لانو فعلا حرام صفيه اتهموها في شرفها قال لي كيف حكيت ليهو بالقصه كلها من الاول للاخر قال لي لا حول ولا قوه الا بالله العلي العظيم دا كلام شنو دي قصص خياليه عديل قلت ليهو لا دي حقيقه يا دكتور وانا صفيه زميلتي ونفسي اثبت انها كانت شريفه الدكتور قال لي لانها فعلا كده وهي بت مسكينه حتي العلاج ما كانت عاوزه تاخدو لمن صرفتو ليهم انا قلت ليهو طلع لي فحوصات انها ما كانت حامل قال لي جدا اتصل علي المعمل وطلب منهم اجهزو لي النتيجه وقال لي لو احتجتي لي اي شيء تعالو لي ابوي شكرو شديد وطلعنا ابوي قال لي كنت واثق انك علي صدق عشان كده جيت معاك بس يابتي الوضع حساس قلت ليهو ما تخاف ما بتجيني حاجه ان شاءالله رجعنا البيت كلمنا امي وخافت زياده قالت لي ابوي المدرسه البلفقو التهم للبنات دي قلبي اباها والزمن دا الناس بتصدق اي شي قال ليها قلت ليك ما تخافي
اليوم داك ما نومتا فرحانه شديد واول ما دخلت المدرسه لقيت سعاد في وشي وريتا القصه لمن انخلعت وقلت ليها لازم اكسر عين البنات الاتهمن صفيه وطلعن فيها كلام قالت لي ديل قليلات ادب الفيهن دايرات ابقنو فينا نحنا والله انا زاتي بقيت ما مرتاحه مشينا لقينا علا ومعاها البنات قالن لي هلا بي اوله الدفعه قلت ليهم الاوائل انتو ما انا حسو بي بتكلم بي جراءه قالن لي العشر قام ليهو شوك قلت ليهن لازم اها ما وريتونا الولدت فيكن منو علا ولا واحده فيكن واحده طويله وقادره مسكتني من لبستي وقالت لي تقصدي شنو قلت ليها براحه عشان ح تندمي شكلك دي انتي قالت لي ليه ما تكوني انتي ولا صفيه صحبتك قلت ليهن انتن واثقات انو دي ما انا ودي ما صفيه بقن اتحلفن انو دي صفيه قلت ليهن حرام عليكن جرايمكن تلبسنهن لينا ولي حسن حظ صفيه قبل المدرسه بي اسبوع كانت عيانه ودا تقرير من الدكتور ومن مرض صفيه وانا الليله جيت اثبت انو دي ما صفيه وما اثبت ليكم انتو بس ح اثبت لي كل المدرسه قالن لي انتي قصتك شنو ودايره شنو صفيه كانت اختك ولا امك قلت ليهن صفيه كانت اختي اي عشان عارفات انها مسكينه وما بتعرف تجيب حقها لبستنها التهمه بس لو هي مسكينه نحنا ما مساكين وح نقيف قصادكن ومشيت منهن واي دفعه بنات الاقيها اقول ليهن الولدت ما صفيه وبي اثباتي وما شاء الله خمسه دقايق الخبر ملا المدرسه وحسيت براحه ما عاديه بالذات اني انتصرت علي علا وصاحباتها سعاد قالت لي نوسه لازم نعرف الحقيقه كامله قلت ليها كيف قالت لي شوفي انا معاك واول خطوه نعملها انو نسال الغفير من اليوم داك بالذات وانا بوريك نسالو كيف قلت ليها حلو نهايه اليوم قعدنا في الشارع انتظرنا المدرسه كلها طلعت الغفير جا يقفل الباب لقانا في وشو قال لينا فشنو قلنا ليهو عاوزين نسالك وترد بصراحه قال لي تسالن من شنو اجرن علي اهلكن قلت ليهو نجري ليه قال لينا دايرات شنو قلت ليهو تورينا الولدت منو قال لينا الولدت صفيه والمدرسه كلها عرفت قلت ليهو يلا انت كذاب وانت معناتا متورط في القصه دي لانو دي فحوصات بتاكد انو صفيه ما كانت حامل معناتا انت عارف الولدت منو وما عاوز تتكلم يا تورينا الولدت منو يا نمشي نبلغ فيك ونقول انك بتشيل قروش من البنات وتخليهن يدخلن اشربن سجاير والولدت دي ادتك قروش عشان تستر عليها وتلبس التهمه لي صفيه اها ح تتكلم ولا نمشي الشرطه بنتكلم معاهو كده وهو برجف فجاه حسينا في زول ورانا اتلفتنا لقيناهو استاذ علاء انا هبطتا وسعاد جنت عديل والله يستر ………تتوقعو البحصل شنو.
يتبع..