رواية أرهقني الفجور الفصل الواحد والعشرون 21 بقلم نوسه حمد
صفيه قالت لي خطيبها انهم لازم ينفصلو وما وضحت ليهو اي شي قالت لي طالما ربنا سترني ما بفضح روحي ومهما كان كلامي لي لكن يا نوسه ما معروف الظروف احتمال بعدين يمسكا لي قلت ليها حرام عليك خطيبك متمسك بيك وقال لو جاتك حاجه بحرق الحله بالفيها وعلا وشلتها قالت لي ح يتهور وح ابقا سيره في خشم الناس وانا الله عالم بي ما واعيه لاي شي.
مرت الامتحانات علي خير ف يوم طالعين من المدرسه صفيه لمحت ليها راجل من غير استئذان من المدير دخلت مسكتو من قمصيو وقالت ليهو انت عملت فيني شنو وبقن تكورك والمدير عاوز يسكتها بس كانت مندفعه شديد حاولت امسكها رمتني بعيد بقدره قادر فكوها منو وطلعونا بره المدرسه والمدير قفل عليهو الباب والناس في راسها الف سؤال دا منو ومالو مع صفيه وصفيه كان نفسها قايم قلت ليها صفيه قولي بسم الله دا منو قالت لي دا الدمرنا كلنا وانا ما بخليهو قالت لي دا الراجل المع ناس علا وبقينا منتظرين لغايه المدرسه ما قفلوها وشكلو طلع بالبوابه التانيه والناس اتهمو صفيه بالجنون وعادت السمعه السيئه لطالبات المدرسه والكل بتكلم عن الولدن والجنن بس مافيهم زول سأل نفسو سؤال واحد منو ورا الكلام دا وليه الحله لسه صامته ومتكتمه علي الحاجه دي هل دا خوفا علي سمعه الحله ولا انهم ما فاضيين عشان يعرفو الحاصل شنو شخصيا بطني طمت رجعنا البيت انا وصفيه وكل واحده فينا جواها الف كلام بس من غير اجابات اول ما دخلت امي قالت لي المدرسه فيها شنو قلت ليها ماعارفه كنت في الامتحان حست بي م عاوزه اتكلم كررت لي السؤال الف مره بزهج قلت ليها ياخ ماعارفه ارحمونا زهير سمعني اتكلم مع امي بصوت عالي جا طاير فيني اداني كف قلت ليهو الكف دا تستاهلو انت ورديتو ليهو وامي بقت تكورك لغايه ما نحنا خوفنا عليها وانا دخلت غرفتي حسيت انو ما عندي رحمه حتي لي امي كنت مكتئبه وزعلانه من كل زول في الحله وساكت علي البحصل دا ح يسكتو متين لغايه ما اولادهم كلهم يكونو بتاعين شراب ولا بناتهم كلهم يحملو بالحرام فايده التعليم شنو لو المدرسه زاتها فيها فساد المدير علاقتو شنو مع الراجل دا وبقيت علي اخري طلعت قلت لي امي ما عايزه اكمل تعليمي عاوزه اتزوج قالت لي سجمي يابت انتي ما واعيه قلت ليها لا واعيه وعشان ما تبقو في فضايح تانيه عرسو لي قالت لي فضايح شنو في زول لمسك قلت ليها ما بنتظر لمن يلمسوني يمه انا قررت وما عاوزه قرايه امي اكتر واحده عارفه اني بحب القرايه قدر شنو وحلمي ابقا دكتوره بسهوله اتخلا عن المدرسه اكيد في حاجه غلط قلت ليها يمه انتو ما عارفين حاجه ساي المدرسه فيها بنات مستهدفات البنات الشاطرات والمتفوقات بوصلوهم لطريق كعب ومن غير رضاهم عشان ما تقولي لي انتي بتمشي معاهم ليه
ابوي جا لقاني اتكلم امي قالت ليهو بتك جنت يا موسي تعال اسمعها وكل منك شبكتها في الخطوبه ابوي قال لي الغاليه مالا زعلانه قلت ليهو بنبره حاده مازعلانه ياخ خلوني في حالي لو عاوزين تعرسو لي خلاص لو ما عاوزين لا مدرسه لا طلعه ما عاوزه ابوي حسا انو الموضوع كبير وقدر ما سالوني خشمي ما فتحتو اقول شنو واحكي شنو الكلام دا ما بتصدق دخلت قفلت الغرفه علي يوم كامل ما طلعتا وحسيت نفسي قاسيه عليهم بس قساوه الدنيا العلي مافي زول حاسي بيها شهاب اتصل علي قال لي نوسه كلام ابوك دا صاح خلاص نتم العرس قلت ليهو اي قال لي والقرايه قلت ليهو ما تجيب لي سيرتها لانو بطني طمت منها وكرهانه الدنيا بسببها وكنت ببكي كاني دخلت في حاله هستريه شهاب حسا بي ما طبيعيه قفل الخط ودقايق لقيتو قدامي واول مره احس امي رحبت بيهو واظنها قالت ليهو شوفا مالا شهاب قال لي البتعملي فيهو دا غلط كبير ناس امك ذنبهم شنو عشان تعامليهم كده قلت ليهو شكو ليك قال لي خليك من شكو لي وانا والله لو ما واثق منك ما اقيف الوقفه دي جنبك قلت ليهو شهاب الخلاصه عاوز تتزوجني ولا اديك تلفونك دا وكل واحد يروح لحال سبيلو قال لي نوسه عارفه انو انا منتظرك تمتحني واتم العرس قلت ليهو ياخ ما دايره اقرا خلوني في حالي ابوي سمع صوتي عالي جا دمعتو في عينو وقعد لي في الارض قال لي ما تخزليني قلت ليهو بقت علي انا هدا ولدك خزلك ومباري البنات الما كويسات حسيت ابوي انحرج قدام شهاب قال ليهو بتي دي ما شديده قلت ليهو لا شديده يا ابوي عشان ما ندسدس شهاب عارف اي شي وهو الكلمني بفساد اخوي ولو خليتو ح يعمل مصيبه اكبر انا وريتك وانا لو ما عرستو لي ما تلومني اذا جيتك في يوم حامل ابوي بقا ما شايف لمن وقع وامي جات تكورك فيني قالت لي انتي منو انتي مابتي الربيتا انتي دايره تقتلي ابوك شهاب قال ليها دا ما وقت عتاب وكتب لي زهير حاجات قال ليهو سريع تجيبهم من الصيدلية واسعف ابوي لمن وعا ابوي دموعو في عينو جيت جنبو قلت ليهو انا اسفه يا ابوي بس انتو ما عارفين العلي انا عايشه في مدرسه بصارع الفساد صراع صاحباتي واحده فيهم ولدت في الشارع وجنت ولسه الناس ساكته صفيه الكانت بتفتش عشان تنقذ غيرها ما رحموها ابوي انا جاتني فوبيا انا خايفه علي شرفي ربنا عالم بي بحب التعليم قدر شنو بس ما عندنا قدره عشان امشي مدرسه تانيه ابوي وامي وزهير مخلوعين قلت ليهم الدمرت البنات ديل وصلت لي ولدكم الليله شرب سجاره ياعالم بكره يعمل شنو وكنت بتكلم بي انهيار لدرجه بقيت اتكلم بره من راسي وكلمه علا من خشمي ما طلعت وكلامي بقا كتير وكتير شديد وامي تقول لي اسكتي كفايه وتكورك فيني وانا شغاله اتكلم شهاب بقا محتاار قال ليهم خلوها تتكلم نوسه دي كاتمه كلام سنين والبحصل دا كلام خطير ما برضي ربنا وانا حاولت ادخل في الموضوع بس للان ما لاقي طرف خيط عشان اعرف البنات ديل الوراهم منو وقصتهم مع المدرسع دي شنو امي وابوي بقو يتحسرو علي شهاب قال ليهم خلوها ترتاح شويه وما تتناقشو في الموضوع دا ولو علي انا جاهز بكره بتزوج بس اتزوجها كيف ونفسيتها تعبانه نوسه حقانيه وعامله لي الف حساب لو ما انا كانت قدرت تصل لي الناس ديل بس محترماني انا وعشان كده انا لازم اعرف الحقيقه قلت ليهو عاوز تعرف الحقيقه الراجل المع ناس علا الليله كان مع المدير شهاب حسا رده فعلي اني انخزلتا لاني كنت شايفه المدير الح ينقذ المدرسه من الحصل فيها. ًًً. ً قال لي تمام وطلع انا حالتي النفسيه كانت سيئة بالذات شفت صاحبتي نهت حياتا بي يدها ومافي زول راضي يسمع ليها المدير بدل يعرف الحاصل طردها حسيت بخزلان ما بعدو خزلان استغفرتا وصليت ومشيت اعتزرت لي ابوي وامي رغم اعتزاري ليهم بس حسيتهم شايلين الهم بالذات لمن قلت ليهم زهير ماشي في الطريق مشيت منهم لقيت زهير سرحان ودموعو في طرف عينو قلت ليهو زهير انا اسفه بس انت ما عاوز تفهم الحاصل قال لي نوسه انا تعبان اكتر منك ولو مفتكره حالي عاجبني تكوني ظلمتيني انا بموت في اليوم الف مره وانا بغلط قلت ليهو طيب ليه يا زهير عاين لي ابوي دا منتظرنا نريحو قال لي انا غلطت وح اصلح غلطي بس بقيت خايف عليك وعلي بنات الحله عموما انا مافاهم الحاصل قلت ليهو الحاصل من سنين بس انا ما اتكلمتا قال لي نوسه احكي لي محتاج افهم وح احكي ليك اي شي قلت ليهو احكي لي انت اول قال لي انا قصتي بدت من المدرسه لمن اتلمين علي شله بشربو سجاير وشويه شويه حسيتهم عاوزين يدخلو عالم الحب والقصص ما عارف بس علا دي بتعرف واحد في اصحابي وهو العرفنا عليها ولمن عرفت اني اخوك بقت مهتمه بي ما حبا فيني عاوزاني ادمن اكتر انا لمن شفت شهاب وصاحبو دقانا هنا انا وعيت انو نحنا في خطر ولازم نلحق نفسنا الولد في اثناء ما بجلد فينا كان بقول لينا شوفي ابواتكم تعبانين فيكم قدر شنو وحسيتو موجهه الكلام علي والشي الحسسني انهم اليوم داك ما قاعدين بمزاجهم وانو وراهم حاجه بالغلط سمعت علا بتتكلم مع واحده قالت ليها لازم نمسك علي شهاب حاجه عشان ما يمسكنا انا في اللحظه ديك فهمت انو شهاب بفتش لحقيقه فكرت اني اساعدو بس انا مابعرف عنهم شي غير البحر البقعدو فيهو دا وانا والله من يوم امي اتكلمت معاي وعدتها وعد رجال اني تاني ما ادخل سجاره في خشمي ومن اليوم داك حارس البيت وكل ما اصحابي ينادوني بقول ليهم ما ماشي قلت ليهو شفت يا زهير كان ح تضرر اكتر لو واصلتا بس الحمد لله انك رجعت لصوابك قال لي وانتي قلت ليهو انا قررت عرس بس قال لي اقول ليك حاجه انا معاك اصلا كده كده مدرستكم دي سمعتا اتشوهت وكل يوم جديد بت منكم تباري ناس علا وانا والله مرات بسرح بقول لو نوسه اختي قدرو جابوها هنا انا بكون شعوري شنو قلت ليها انا لو ما قدرت عليهم كان اكون هسي فضيحتي بجلاجل قال لي الحمدلله كلام زهير طمني كنت خايفه عليهو بس الحمد لله رجع لي صوابو
عديت كم يوم وقالو النتيجه بي احتفال قلت ليهم لو جوني هنا ما بطلع استلمها صفيه جات تشوفني مالي حكيت ليها انو انا نفسيا تعبتا ووصلت لمرحله صعبه بسبب انو شفت الراجل في المدرسه حسيت انو بتاجر فينا وخوفت علي نفسي قالت لي ليك حق بس شهاب ما وصل لحاجه قلت ليها ما عارفه قالت لي اسمعيني انا كده كده حياتي ادمرت وقررت اعرف القصه دي براي وعاوزه ارجع لي علا قلت ليها صفيه ما تتهوري المره الاولي ربنا سترك والحمل نزل المره الجايه فضيحتك ح تبقا بجلاجل قالت لي ما تخافي انا فهمت ليهم ما بشرب اي شي اتناقشتا معاها رفضت وفاتت مني رجعت تاني للاكتئاب بس استغفرتا شهاب قال لي نوسه انا اتكلمت مع المدير وقال انو الزول دا متبرع اتبرع ليهم بي كولر وكراسي وكنب قلت ليهو وتقول لي تمي قرايتك الزول دا الليله اتبرع ببقا تاني اجينا كل مره بمزاجو قال لي نوسه انا خلاص قررت وكلمت اهلي ح نجيكم بكره نشوف ح نعمل شنو وقبل شهر ح نتم العرس قلت ليهو تمام تاني يوم اهل شهاب جو واتكلمو مع ناس امي وحددو العرس بعد شهر وقالو ح يجيبو حاجات الحبسه بكره وفعلا جابوهن وبديت اتجهز للعرس وبنات جيرانا حبسوني بس كنت فاقده صفيه وليها زمن ما جاتني قلقت عليها بس ما بقدر اطلع وشهاب اتقرب مني اكتر وحبيتو اكتر وهو كمان كانت بينا علاقه جميله وشهاب حنين شديد عوضني عن اي شي وماقصر مني جاب لي شيله وشنطه ودهب مافي بت جابوهن ليها قبل كده وكنت مبسوطه واهلي رغم انهم نفسهم اني اتعلم بس فرحو لي شديد لاحظت لزهير اخوي بقا مراغب اخواني وخايف عليهم فهمت انو فهم الحاصل في الحله مرت الايام وانا بجهز في اجمل ايام عمري وشهاب جهز بيتو وح يسوقني معاهو طوالي وكنت مبسوطه قال لي اول شي ح اعملو انزلك مدرسه خاصه تمتحني ثالث ثانوي فرحت شديد وقال لي ح اساعدك في قرايتك كنت مبسوطه شديد وما زعلانه اني خليت التعليم عشان اعرس حسيت الزواج رحمه من الحاصل في المدرسه ومرت الايام والاسابيع وصفيه مافي منها خبر وقلبي مقطوع عليها شديد في لخمه التجهيزات الحله حصلت فيها حادث هزاها شديد وكان خبر شين علي لقو سعاد مشنوقه والشرطه جات وبدت التساؤلات سعاد انتحرت ولا بفعل فاعل وورا القصه بتاعتها شنو وصفيه مختفيه وين ……..يتبع.