رواية العرجاء الجميلة الفصل الثالث 3 بقلم جمانه السعيدي
رزق...طلع ابوي من المدرسه
والمديره كالت روحي للصف واذا قربت عليج بس تعالي
وشوفي شلون راح اعاقبها عقوبه
من طلعت من الاداره اريد اصعد للصف فوك
مااشوف غير تغريد واكفه بنهاية الدرج
تغريد...هاا اشتكيتي عليه
رزق...ماحجيت وياها ردت اكمل طريقي
جان تدفعني من الدرج نزلت درجتين واكو بنات صاعدات
لزمني على الدرج بس ملابسي توصخن
ورجلي التوت جواي
نزلت الدرج نكتت ملابسي ورجعت على المديره
كوه امشي هم خوف وهم وكعت
بس شافتني وشافت ملابسي كلهن تراب
المديره.. هااا خير شبيها ملابسج
رزق...تغريد دفعتني من الدرج لوما ستر رب العالمين
جان اتكسرت
بس البنات الي صاعدات على الدرج لزمني
المديره...روحي غسلي طلعت من الاداره للمغاسل
والمديره راحت ادور تغربد
غسلت وكملت رجعت اريد اصعد الدرج
شفت المديره لازمتها من صدريتها من ياخي الصدريه
وجنطتها بحضنها
وتحجي وياها
المديره...اخذي جنطتج طلعي من المدرسه مااريد اشوف وجهج اني قدمت ببج تقرير بلكت اخلص منج
بس شافتني تغريد اشرتلي بسيطه
على اساس تنتظرني خارج المدرسه وتكتلني
بس اني مااطلع وحدي يجي واحد من خواني ياخذني للبيت
كمل الدوام وبقيت واكفه باب المدرسه
لمن اجا مسلم اخذني شفتها هيه وصديقاتها واكفات بلجهه الثانيه جانت تنتظر اطلع وحدي حتى تضربني
بس خطتها فشلت
من هذا اليوم بعد تغريد مااجت للمدرسه
ولا شفت وجها اجا قرار فصلها من المدرسه
كل البنات جانن يخافن منها
اهم شي خلصنا منها ومن شرها
جمانه السعيدي
كملت المتوسطه وانتقلت للاعداديه
احلى مرحله مرحلة الاعداديه لان عندي صديقات
كلش حبابات وبنات اوادم
وهنا عقيل تخرج وتعين وقرر ابوي يخطبله ويزوج
وكع الاختيار على وحده من اقاربنا من بعيد
ابوها يصير ابن خال ابوي
اسمها سمر
بلبدايه راح عقيل شافها هو وأمي مجرد ماشافها
اقتنع بيها
بعدين رحنا كلنا بلمهر
لبست بدله حمره وفتحت شعري
شكد جنت فرحانه بهاي المناسبه هاي اول مناسبه تصير بيتنا من سنيبن مافرحانيين
شكد جنت فرحانه بلعروس اني ماعندي خوات
بكلبي اكول هاي مو زوجت اخوي هاي اختي الجبيره
بس حسيتها ما حبتني ابد
مااعرف ليش
من اول لقاء بينا حسيتها تكرهني ليش مااعرف
بعدين كلت بعدها ما متعوده عليه لمن نتعود وحده على الثانيه راح تحبني اكثر
المهم اجا يوم العرس اني ماكدرت اروح بلزفه
بقيت بلبيت
من دخلو العرسان للبيت طشيت عليهم جكليت وهلهلت
اجت جكليته بكصت العروس
جان تزمخ عليه بصوت عالي وعصبيه وثول ما تشوفين عميه خوما عميه
رزق...تفشلت حيل من كلامها الناس كلها حاضره الأقارب والناس الغريبه
وهيه تغلط عليه قابل اني متعمده اضربها
سكتت مارديت عليها امها كالت ميخالف ماصار شي
بس اني حيل ضجت وبعد مارجعت يمها بقيت بلمطبخ
خلص هذا اليوم على خير
ثاني يوم ماحاولت تستلطفني
او تبين انها ماكانت تقصد بلعكس شافتني ودارت وجها عني عبالك كتلت ابوها
رزق...مبروك
ردت عليه من ورا خشمها شكرا
رزق...ماكان قصدي البارحه اني ردت اطش جكليت
سمر...اكو واحد يطش جكليت هيج
رزق...اسفه
حسيت نفسي محرجه حيل
وبعد ما فتحت اي موضوع وياها نهائيا
وهيه عبالك تتجاهل وجودي
كلما تنزل وتشوفني أدير وجها عني
وما تحاول تفتح اي موضوع وياي
جمانه السعيدي
رابع يوم كلنا كاعدين نتعشى
واهلي بس يحجون عني طالعه حلوه ابوي كل شويه يسئلني شتريدين
وليد جابلي حلويات
امي تبوس بيه مسلم كال اليوم شفت شغله تحبها رزق
وباجر اجيبلها منها مأكول شنو خليها مفاجئه
جان هيه زهكت من يمها اووو شنو هاي
مخبوصين بيها خبص
ابوي بقى يباوع عليها
رزق.. اني متعوده على هاي التصرفات من اهلي
وهذا الموضوع عادي جدا عدنا بلبيت
اني بلبيت محور الحديث ومحور الاهتمام
هيج متعوده من اني زغيره
سمر....اووو شنو هاي خبصوتنا خبص شكالت رزق وشحجت رزق
بلبيت ماكو غير رزق
ابوي...وانتي ليش ضايجه منو يمج احد قرب عليج
احد غثج
رزق...كامت سمر من الاكل وصعدت الغرفتها
عقيل...معليكم بيها كملو اكل شوية غيره
رزق.....ابوي من هذا التصرف صار عنده موقف منها
لان اني بلنسبه الابوي خط أحمر ممنوع احد يقرب عليه
بعدين اني مامئذيتها ابد
ليش انزعجت مني مااعرف
كملنا اكل وشلت المواعين غسلتهن
صعد عقيل فوك كملت الجاي وصعدت اجيب شكر من البيتونه فوك
جان اسمعها تعيط بصوت عالي
سمر...شنو رزق خابصينه بيها شنو الي خلقها ما خلق غيرها
متعجبين عيونها زرك
لوما عرجه لو تمشي عدل شسويتو
عقيل...اس ولا كلمه مادام محد مقرب عليج
معليج برزق احنا متعودين نعاملها بهاي الطريقه من جانت زغيره
اذا تردين تعيشين بهذا البيت بسلام
معليج برزق خلصي شغلج وصعدي بغرفتج
سمر.... لا ولله متعجبين عدهم اخت عرجه
عقيل...زودتيها حيل انتي منو يمج اذا سمعتج تحجين عليها مره ثانيه تشوفين مني شي ما متوفعته
جمانه السعيدي
رزق...نزلت واني متعجبه منها اني ما مئذيتها
بلعكس فرحت بيها اعتبرتها اختي اني ماعندي اخت
وهيه اختي
ليش تكرهني هيج بدون سبب
من بعدها مشت الايام واني مالي علاقه بيها
وهيه بس تخلص شغلها تصعد غرفتها
لاتكعد ويانا ولا تحجي ولا الها علاقه بينا ابد
من وصلت صف سادس واني كل أسبوع يجيني عريس
واحد احسن من الثاني
بس مع الاسف بس يعرفون اعرج
يبطلون مني
بلبدايه يجون على صيت الجمال جمالي الي تحجي بي الناس
بس يشوفوني اعرج يرحون وبعد ما يرجعون ابد
وهذا الشي خله سمر تتشمت بيه
كلما يجي واحد يتقدملي ويشوفني يروح مايرجع
تتشمت بيه
طبعا كلامها من جوه ليجوه
مثل الحيه تشمر سمها بدون ما يحس بيها احد
تفوت من يمي تسوي نفسها تحجي وحدها
تكول شرد شرد ولله شرد ههههه
لو تحجي بالفصحى عود تغثني ااووو يااالاهي لاذ بلفرار
لو تكول خرج ولم يعد ولله بوري معدل
مره اجا واحد شافني وكال اني ارجعلكم خبر
هيه جانت كاعده بلمطبخ
بس فتت من يمها جان تكول
سمر...حسبتيهم
رزق....شنو
سمر...العرسان الي شردووو
رزق...مارديت عليها لان ما تستاهل احجي وياها
عفتها ومشيت جان تصيح وراي
سمر...راح تبقين عانس ومراح تزوجين ابد
مادام اني موجوده تحلمين تزوجين
اثاري هاي العرسان تشرد بسبب عمل مسويته اليه
عقد يمنعني من الزواج
سحر عقد حتى ماازوج ابد تريد تحرك كلبي
ولله مااعرف ليش
اني واهلي ابد ماجنا شاكين بيها
ولا متوقعين ممكن تسوي هيج شغله شيطانيه خبيثه
بس لمجرد الغيره
اي سمر جانت تغار من طريقة معاملة اهلي اليه
وتغار لان اني احلى منها
بس توصل بيها الدرجة تسويلي سحر
هاي الي جنت ما متوقعتها ابد
جمانه السعيدي
خلال مرحلة السادس اعدادي اكثر من عشر عرسان تقدمولي
بس يشوفوني يرحون وبعد مايرجعون عليه
امتحنت السادس بس بوقتها جانت نفسيتي حيل تعبانه
ليش مااعرف
بلكوه اروح للامتحان ومن اطلع مااعرف اذا جاوبت اولا
علما خلصت الامتحانات طلعت روحي من صدري
والنتيجه طلعت راسبه باربعه
ردت امتحن دور ثاني بس مااكدر تعبانه حيل
ومالي خلك ابد
كل هذا وهيه مصممه تتشمت بيه
لان رسبت مع انو هيه الي كانت السبب بهذا الرسوب
بسبب سحورتها الي تخليهن اليه
ابوي تخبل عليه لان يشوفني تعبانه
شكد اخذني دكاتره بس بدون فايده
صح اني وضعي زين بس حاسه اكو حسره بكلبي
ومالي خلك الاي شي
كل الدكاتره اكدو مابيه شي
اخذني ابوي للزياره شفته يدعي وهو يبجي
ويتوسل ارجع مثل وضعي قبل
بجيت من شفت ابوي يبجي عليه
رجعت للبيت وما تغير شي من وضعي على طول كاعده وحدي وساكته
الحد ماا انعزمنا على عرس واحد من اقاربنا
ابوي راح جابلي فستان يخبل
وصمم امي تاخذني للصالون
يريد يغير نفسيتي شويه خطيه حاير بيه
يريد يعرف شنو الشي الي صار وياي وغيرني هيج مايعرف
انتظرونا......
الفصل الرابع من هنا