رواية العرجاء الجميلة الفصل الثامن 8 بقلم جمانه السعيدي
@الجميع
رزق....سكتت سمر بعد ما حجت بهذا الموضوع ابد
رجع وضعنا طبيعي
بس ما تحجي وياي اله شغله ضروريه
على اساس زعلانه عليه بلكت احس بلذنب وانطي حصتي العقيل
اني مو ميته على الفلوس وعقيل يستاهل
لان ما اتخلى عني ابد
بس هو مايقبل ياخذهن
بليل سئلني عقيل
عقيل...هااا شقررتي تشترين ذهب لو قطعة ارض
رزق....بكيفك اني مااعرف
عقيل....شنو رائيج
اشوفلج قطعة ارض قريبه هنا عليه حتلو ٥٠ متر ٧٥
واحاول بين فتره وفتره اشتري مواد بناء
حتلو ابني ببها غرفه ومطبخ يصير عندج بيت
خاف يوم اضوجين من عدنا
لو اني اموت عاد عندج سكن تعيشين بي
(( عقيل يعرف سمر ما تحبني ومن طالبت سمر بحصتي من الورث افتهم هيه ليش لحت حتى اجي اكعد وياهم بلبيت ومتاكد سمر بس تخلص مصلحتها وياي راح تحاربني حتى اطلع من بيتها لذالك فكر يشترلي قطعة ارض
رزق...اسم الله عليك عمرك طويل لاتكول هيج
عقيل....حبيبتي الموت حق واني اريد أأمن مستقبلج
رزق...الي تشوفه
سمعت سمر هذا الحديث وانتظرتني صعدت فوك
حتى اطلع سمها
بس اني رجعت نزلت اخذ مي اشرب
واني نازله على الدرج سمعتها تحجي ويا عقيل
سمر....تشتريلها كاع وتبنيها هو انت ميلك حتى تبنيلها
تريد تبنيلها بحصتك مووو
ورجعنا النفس وضعنا بعد عليمن البيت انباع
شلون اني مااخلص من رزق
قبل بيت عيالي الكل مخبوص بيها
عبالك رب العالمين ماخلق غيرها
وهسه انت عايفني اني وجهالك وتريد تبنيلها بيت
لا حصلنا اني وجهالي
يارجال انت ليش هيج بارد
بمكان ما تقنعها تنطيك الفلوس تكبر شغلك
وتسد الديون تريد تبنيلها بيت
هيه شسوي بلبيت
بنيه لامزوجه ولا عدها عائله المن البيت المن فهمني
انت راح تجلطني
راح اذب فلوسك عليها وباجر اذا ماتت اخوانك يقاسمونك
بيتها ترجع تنطي تعبك من جديد
انت ناوي تجلطني ليش هلكد بارد الخاطر الله
جمانه السعيدي
عقيل....خلصتي لغوتج بخيتي سمج
فلوسي لو فلوسج جبتيهن من بيت ابوج
فلوسي واني حر بيهن ابنيلها بيت ابنيلها قصر
انتي شكووو
انتي ماناقصج شي تاكلين وتشربين وساكنه بيت ملك
إلى متى راح تبقين حاقده عليها
يمتى تعوفينها بحالها وتنتبهين النفسج
كافي تحجين بورث رزق هذا حقها بشرع رب العالمين
ليش تردين تاخذينه منها بااي حق
انتبهي للخير الي عندج حتى رب العالمين يبارك بي
رزق....رجعت صعدت حتى ماي مااخذت
شلون مشكله هاي خطيه عقيل عايش حرب بسببي
من بعدها سمر كطعت الكلام وياي نهائيا
بعد اسبوع عقيل كال لكيت قطعة ارض ٧٥ متر
وباجر اشوف صاحب الكاع واتفق ويااا
سمعتنا سمر بس ما حجت اي شي
ثاني يوم اخذت ملابسي اريد اسبح
مالكيت ماي بلحمام الفوك
نزلت جوه هيه جانت كاعده بلمطبخ شافتني نزلت اسبح جوه
اني طبعي من ادخل للحمام اطول ابقى من ٢٠ دقيقه إلى نص ساعه يله اطلع حتى ملابسي اغسلهن وياي
واطلعهن من الحمام
طلعت من الحمام شريت ملابسي اريد اصعد
جان سمر صاحت عليه اني طالعه ديري بالج على الجهال
شويه وارجع
رزق....صعدت جبت المشط وكعدت امشط بشعري
والجهال يلعبون بلي والزغير نايم
بقت تقريبا ساعه كامله ورجعت للبيت
رجعت كبل بدلت ملابسها وبدت تحضر بلعشى
اجا عقيل كعدنا ناكل
عقيل....اتفقت ويااا الرجال يكول باجر جيب فلوسك واسجلها باسمك القطعه مو بعيده بداية الشارع الي ورانا القطعه ١٥٠ والرجال قاسمها بلنص
نص ماخذته وحده معلمه والنص الثاني راح يكون من نصيبج
رزق....انشاء الله خير
بقت سمر ساكته ماحجت اي شي
ثاني يوم عقيل من رجع من الدوام كال راح انام ساعه
واكعد اخذج تشوفين الكاع
حتى نتكاتب ويا صاحبها
رزق.....تمام
رزق....اني هم سبحت وبدلت وحضرت نفسي
كعد عقيل من النوم سمر بقت نايمه
خدرت جاي شربنا اني وعقيل
عقيل ...يله اصعدي جيبي الفلوس علما ابدل حتى نطلع
بس نسلمه الفلوس نتكاتب على الكاع
رزق...انشاء الله
صعدت الغرفتي فتحت الكنتور اطلع الفلوس كلشي مالكيت
نزلت الملابس كلشي ماكووو
فتحت الخانه الثانيه مالكيت شي
نزلت كلشي بلكتتور مالكيت الفلوس
صاح عليه عقيل من جوه يله رزق اتاخرنا
وكفت على الدرج من فوك وكتله بخوف
رزق... عقيل الفلوس ماكووو
راسا عقيل صعد الدرج شنو ماكووو
انتي وين خليتيهن
رزق.. بلكنتور
دخل عقيل للغرفه شاف الغراض كلها مكرمه بلكاع
بدا يدور وياي كلشي ماكوو
خله الكرسي وصعد يباوع فوك الكنتور كلشي ماكووو
سحب الكنتور من مكانه
رجع دور الجربايه نزل المندر شمره بلكاع
شمر الجرجف
عقيل...انتي متاكده خليتيهن بلكنتور
رزق...اي متاكده اني خليتهن هنا
عقيل....هم طلعتي من البيت
رزق...وين اروح ابد ما طالعه
عقيل.. هم اجانا احد صعد فوك بغرفتج
رزق...ابد محد يصعد بغرفتي
جمانه
عقيل...استغفر الله وين راحن
عافني عقيل ونزل بسرعه عرفته شك بسمر
دخل للغرفه
عقيل...سمر اكعدي وين الفلوس
سمر... فتحت عيونها وتحجي وياا على كيف اي فلوس فلوسك بلكنتور
عقيل...لا تغشمين نفسج وين فلوس رزق
سمر....شنو فلوس رزق غير عدها
عقيل.. انتي اخذتي فلوس رزق
كعدت على حيلها وفركت عيونها فلوس رزق
شنو قصدك ضمتهن عندي لا ماضمتهن عندي اسئلها
عقيل...لا تسوين نفسج غبيه فلوس رزق وين
سمر...واني شمعرفني بسلا قصدك تتهمني قصدك اني اخذتهن
شنو اني كدامك حراميه عيب هذا الحجي
صح اني كتلك اخذ الفلوس منها وافتح بيهن مشروع
بس ما توصل ان تتهمني بكتهن
عقيل....شوفي هاي سوالفج مو عليه
التفت عقيل للكنتور فتحه وطشر كلشي بلكنتور يدور على الفلوس
ورجع طشر كلشي بلغرفه
ماخله مجر ولا خانه ماطشر غراضها يدور على الفلوس
صعد فوك الكنتور وشمر البطاطين
وحده وحده
فتح البطانيات واللحف نكتهن كلشي ماكووو
سحب سمر من الجربايه
سمر...عقيل شبيك تخبلت صدك تحجي اني اخذ فلوس
رزق شلون تفكر هيج
ترا مااسمحلك اني مو حراميه
هاي هيه كالتلك سمر اخذتهن
ااي قابل شتوقع منها كاعده بيتي وخادمتها
تالي تتهمني هيج اتهام
عقيل.. انجبي مااسمع صوتج رزق ماكاعده بيتج كاعده بيت اخوها فهمتي لو لا
رزق...نزل الدوشك نزل يباوع جوه الجربايه
كلشي ماكوووو
طلع بعصبيه يدور بلمطبخ
فتح الخانات وحده وحده حتى جيس التمن والشكر دور بي
سمر...بصوت عالي الله لايوفقج رزق من يوم دخلتي ببتنا
والمشاكل ما تخلص
النوب طلعتوني حراميه
هاي مجازاته اني حراميه شنو شفتوني
بكت فلوسكم صدك خير لا تسوي شر ما تلكه
كافي عقيل كلبت البيت منو راح ينظفه اختك المحروسه
رزق....كعدت على الدرج وخليت اديه على راسي
ضاع كلشي حتى الفلوس الي ردت أأمن مستقبلي بيهن ضاعن
شنو هلحظ النحس
ليش ما مكتوبلي الخير اني شسويت
عايشه بحالي وابد ما ااذي اي بشر
ليش اسوي خير ويرجع عليه شر
جمانه السعيدي
عقيل....سمر اذا انتي الي اخذتي الفلوس رجعيهن
ترا حوبت هاي اليتيمه تعثرج
حرام عليج هيه ما مسويتلج شي
رزق فقيره وكلبها ابيض رجعيهن واحنا مسامحينج
رزق....ردت علي بصوت عالي رج البيت رج
سمر...شنو ماخذتهن انت صدك ما تستحي
ماغزرت العشره وياك
عايشه ومتحمله كل ضروفك وهسه تتهمني هيج اتهام
هسه اخابر ابوي يجي هنا
اشوفه يقبل بهذا الحجي
شفتوني ساكته وصابره ومتحمله
ركبتوني وطيحتو حضي
ليش كل هذا لان كتلها اتنازلي عن حصتج الاخوج
شكو بيها هواي بنات تتنازل حتى اخوها يعدل وضعه
وهيه لامزوجه ولاوعدها حمل ثكيل
عايشه ويانا مدلله
عمي بطلت لو ادري ما حاجيه ياكلمه ردي المكانج
..راحت جابت تليفونها واتصلت على ابوها
سمر...بابا تعال بسرعه
بسرعه تعال شوف عقيل واخته شسوو بيه
بسرعه تعال لا اسوي بنفسي شي
هذا الحجي وعقيل بعده يدور على الفلوس
تخبل ما بقى مكان بلبيت ما دور بي على الفلوس
كونية الخبز جوه الغساله
داخل الطباخ فوك الكاونتر بلمخزن حتى البردات
بلبيت وكعهن خاف ضامه الفلوس وراهن
اتهستر هو بداخله متاكد سمر اخذت الفلوس
بس ماعنده دليل عليها
جاي يدور بلكت يحصلهن حتى يواجه سمر بيهن
انتظرونا...... ربما الظروف تتغير للاحسن
ان بعد العسر يسرا...