رواية بلسم الفصل التاسع والثلاثون 39 بقلم هند الهيباني

رواية بلسم الفصل التاسع والثلاثون 39 بقلم هند الهيباني

قال لي ياسر تمام أسمعي...

بدا كل دا قبل تلاته شهور أو أكتر بشويه... 

وزي ماعارفه قبل السبب الدخلني شنو انو تلفوني اتسر*ق وما طلعت الشرايح واتنص*ب بيه على ناس ونشرو صور وعملو بالتلفون مصايب وانفتح بلا*غ فيني وبسبب اني ما بل*غت 

الشر*طة من زمن فقداني للتلفون اترميت هناك. 

المهم تم نقلي من القسم الفيه فجأة.. لقسم تاني واللي بدت فيه القصه دي لما لاقيت مازن هناك... 

بلسم:وانا جواي وللأسف اتأكدت اول تهمه تجاه مازن وانو بجد كان هناك ما من زول غريب بل  من اقربائي المرة دي!.. 

تابع وهو بوصف لي في مازن كان كيف.... 

ما مفاجئة كانت بالنسبه لي لأن كل الأوصاف القالا هي ما زالت فيه للان،تابع وقال لي بس من دون كل الناس ديل ماعارف شنو الخلاني انجذب ليه وقربت منوو وبقيت اقعد جمبو وانوم قريب ليه واحاول اتكلم معاه بأي صورة من الصور وما كليت ولا مليت لحد ما في يوم فتحت قلبي وحكيت ليه كل شي عني وعن الحصل معاي.. قال لي سؤال واحد نفسك تطلع من هنا؟!.. جاوبت ليه بالموافقه وانو انا نفسي اطلع.. 

ردد كلمة واحده وقال لي حا تطلع..... صحيت. بالليل ولقيت مازن واقف مع شخص هو جوه والزول بره وبعدا نمت.. 

ومن أصبحت.. لقيت العساك*ر بندهو بي اسمي وطلعت معاهم واكتشف انو انا حر!...على قدر ما كنت مبسوط على قدر ما حسيت الاستياء اني ما قابلت مازن... 

لحد ما يوم التقيت بيه صدفه في المواصلات وعزمتو للكرامة

وباقي القصه انتي عارفاها.  

الان حسيت نفسي تهت اكتر... 

مازن عبارة عن بحر كل ما تحاول تغوص جواه وتستكشفو حاتغرق... 

دي الجمله الوحيده الكانت بتتردد في راسي.. 

كيف، وليه، وهل هو كان ليه يد في طلوع ياسر.  

جيت عشان ابحث عن إجابات بس للاسف مالقيت بل زادت الأسئلة... 

قاطع لحظة تفكيري دي صوت ياسر وهو بقول لي والان دورك وين لاقيتي؟! وكيف اتزوجتو؟! وشنو السبب الخلاك توافقي تتزوجي من مازن.... ماكنت عارفه اقول ليه شنو... 

وابدا من وين كل الكلمات اتبخرت مني وحاسه نفسي ماقادرة.. 

دقايق مرت وانا بتلعثم ماعارفه اعمل شنو لحد ما جى واحد بقى يتكلم مع ياسر تلفوني  رن في الوقت دا سحبت المكالمه طلعت منها وعملت نفسي بتكلم مع بت وبقول ليها كيف يعني انا رجعت البيت ما قايله في محاضرة تانيه احجزي لي دقايق وبجي.. قلت ليه سلام مستعجله انا كان بحاول يوقفني بس تابعت طريقي بدون ما اتلفت وانا الحيرة متملكاني اكتر.....

#فاطمة...

فتحت بيتي الما اتخيلت اني حا ارجع ليه بالسرعه دي... 

امس كنت بضحك وبتونس وقلت خلاص دا العوض. 

بس الضر**بة المرة دي كانت موجعه بصورة كبيره حتى أكبر من خيالي.. واكبر من تصوري ليها... 

دخلت الاولاد وفتحت البيت دخلت الشنط تحت السراير فتحت ليهم التلفزيون والمكيف وطلعت بره المظلة.. 

بكيييت قدرتي.. بكيت عن كل حدث حصل اليوم وعن كل حدث حصل قبل سنين وكأنو حصل الان.... 

ماكنت قادرة أوقف على رجلي ماكترة التعب.... 

#بلسم. 

رجعت لي امي هي الكانت متصله سلمت عليها وشاكلتني مسافه وقالت لي لازم تجيني اليوم واقعد معاك وافهم كل شي.. 

قفلت منها اتحركت من دربي دا باتجاه بيتنا... 

نص ساعه حتى وصلت. نزلت ومشيت باتجاه البيت... 

فتحت لي امي واستلمتني أسئلة وكلام وحكاوي بس ما ركزت الا لي كلاما عن فاطمة... 

قلت ليها كيف! قالت لي والله الحصل انو من يوم راجلا ساقا داك واتصالا اول مرة الاقيها كان قبيل وجات منتهيه عديل يا بلسم... 

قلبي اكلني... 

قلت ليها يمه دقايق واجي.. قالت لي تمام... 

دقيت الباب مسافة طويله.  حتى اخيرا فتح لي ولدا الصغير. 

سالتو من امو بس جرى باتجاه الغرفه اظن بحضر في التلفزيون لحقتو وعاينت جوه الغرفه كانت ماف.. 

بقيت افتش البيت حته حته بس.. 

سمعت صوت بك**ى جريت جري باتجاه الصوت 

انصدمت وانا بشوفا قاعده في الأرض وبتبكي بحرقه... 

حسيت بي طع*نة في قلبي جريت عليها وانا بقول ليها فطوم.. 

اتلفتت عليي ومن شافتني زادت اكتر واترمت في حضني.. 

خليتا زمن طويل ماعارفه كم. خليتا تفضي جزو ولو قليل من الجواها علها ترتاح وتهدأ عشان اقدر افهم منها شي.....

#طلال

حسيت الدنيا مسخت لي... 

عرست زينب في لحظة غضب... عشان احر*ق قلب فاطمة على العملة العملتا لي دي وانا قي قلبي ماف اي شي تجاها

عرستها ظناً مني اني كده بعمل صواب وماكنت عارف انو بالفعله دي انا فتحت جروح ما حا تلتئم بالساهل... 

زواج انقلب عليي حياتي جحي**م.. 

وبعد من اعز انسانة على قلبي.. 

خسرت كتير بسبب المشكله دي.. 

وماعارف لسه خا اخسر شنو... 

طلعت من البيت ماعارف ماشي وين.. 

بس القعده بين جدران البيت دا بقت تخنقني 

قررت اطلع عشان اتنفس.. 

#اسماعيل 

ايوه يا اسعد... تحاول ترميها بالكلام... 

وتخليها تتكلم وتحكي ليك كل التفاصيل دي 

وانت سجل كلاما ماعندنا أي حل غير الحل دا 

اسعد : بس يا ابوي بالطريقه دي نحن حانرميها في مشكله وعارف انو هو بعدين ما حايرحما

اسماعيل :هو في وقت حا يكون عندو عشان يعمل ليها شي 

نحن كده حا نشيل ضدو دليل بالطريقه دي فقط نحن حا نقدر نرميه في السج*ن وهي ما تشيل همها انا ممكن اسجل الكلام دا في القسم انو حا يتعرض ليها واكيد حايوفرو ليها الحمايه وغير كده اذا زدنا الأمر كده اكيد حايقبضوه بما انها زوجتو هي الحاتكون اعترفت ضدو واكيد حا نقدر نتصرف.. 

ما تخاف يا اسعد انا وراك.. ماتخاف ولا تخاف عليها كلو حا يكون مقضي... 

اسعد:تمام يا ابوي... 

#خالد

يوم جديد مالاقي فيه شغل.. 

وكأنو الناس بقت ماشايفاني.. بقيت حق الاكل ما قادر اني اجمعو حتى.

. يارب يارب رحماك يارب.. 

اعمل شنو انا أأكل الاولاد ديل من وين مدارسهم القربت تفتح دي انا حا اعمل فيها شنو!... 

#مازن

مشيت باتجاه جامعتا اتصلت وسالت بس ماكانت فيي. 

كنت عاوز اتصل عليها بس في نفس الوقت دخلت عليي مكالمه.  

الووو.. 

ايوه يا قيصر الطلبتو جاهز.. ممكن تجي الان تتفقو قبل المهمه

عاينت للساعه كانت ٢ ونص... 

غيرت طريقي ومشيت باتجاه المكان الوصفو لي.. 

من وصلت كانو واقفين اكتر من خمسه رجال.. 

لفيت بي نظري عليهم كلهم.. 

بعدا اتلفتا عليه ورددت انتو مستهينين بالمهمه دي للدرجه دي! 

قال لي في شنو يا... 

قلت ليه وانا برتكز على الحيطة انا عارف عندك الاخط*ر  والأفضل وبتبخل عليي... 

ضحك بي صوت عالي وقال لي صحي القيصر..   

رفع تلفونو وقال ابو حميد مطلوب حضورك... 

#بلسم

انتظرت لحد ما هدت وقلت ليها فاطمة في شنو مالك... 

بقت تحكي لي وهي بتتنهد ومع كل كلمتين دموعا كانت بتنزل بي كترة... 

وانا بمسح ليها فيهم لحد ما وصلت انا يا بلسم استحملت كل شي وصبرت على خبر زواجو وعلى بعدو عن الاولاد وعدم السؤال عننا وعلى أي شي وقررت افتح معاه صفحه جديده 

يشوفني من هنا عشان في زول ساي بس قال انا عاجباه... 

وهو يسوقني بيت ضر**تي اللي مشاركاني فيه في اي شي. 

ماقادرة استحمل فكرة انانيتو.. هو كلام ماقدر يستحمل كيف انا استحمل اشوفا في وشِ يعيشني معاها يا بلسم. 

على قدر ما كلاما محزن كان حقيقي وحاسه بي ألمو انا اللي ماحصل معاي... 

طبطبت عليها وقلت ليها اهدي.. 

انا حاسه بي وجعك والله... وليك حق... 

ودا ابتلاء من ربنا قالت لي ابتلاء كيف.. 

منو الحا يقول ابتلاء ودا زواج محلل ليه شرعا

قلت ليها عادي الابتلاء في أمر شر أو خير 

ما شفتي الايه اللي ربنا سبحانه وتعالى قال فيها 

(ونبلوكم بالشر والخير فتنه...)

حتى الزواج فيك بلاء عظيم لأنو احنا النساء عندنا شعور الغيرة بصورة كبيرة.. 

ربنا يبتليك عشان يشوف صبرك في المحنه دي قدر كيف وعلى قدر الصبر بجيك العوض من الله أجر أضعاف وربنا ما بكلف نفس الا وسعها وزي ماهو ابتلاء ليك هو ابتلاء ليه ربنا قال وان خفتم ألا تعدلو فواحدة. دا ما ابتلاء واختبار من ربنا . عشان ربنا يشوفو ويختبرو هل حا يعدل هل حا يظلم اولاد.و الحايحصل ليهم شنو... صبرتي الكتير يا فاطمة هوني على قلبك واحتسبي لله وما تتسرعي في قرار.. استخيري الله مرة واتنين وعشرة  . قالت لي ماقادرة استحمل اكتر يا بلسم ما افضل لي اتطل*ق وارتاح.. 

قلت ليها معاذ الله اديك رأي في أمر زي دا.. 

اكعب انواع الناس.. قال ليك امراه فرقت بين رجل وامرأته استخيري الله مرة واتنين وعشرة والقلبك بميل ليه امشي عليه 

قعدنا مسافة في الحته دي هدت قومتها رقدت في السرير وجيت عملت عصير.. 

وناديت على امي ترفع ليهم صحن من طبخ اليوم... 

لقيتا رسلت الولد يجيب العيش... 

اديتا العصير وبعد جى ولدا ختيت ليهم الاكل وغصبتهاا تاكل مع اولادا.. وبعدا لميت المحل... 

وقلت ليها حا امش بعدا انفقعت بكى راجعه وقالت لي صدقيني بت بلسم انا اليوم كنت حاسة روحي حا امو*ت 

والله وجودك دا خفف عليي الكتير الله يديك لمن يرضيك ويسهلا عليك زي ما جيتي وهونتيها عليي مسحت دموعا وقلت ليها في اي وقت تحتاجي لي فيه التلفون ترفعي واتصلي عليي ودعتها وطلعت الشارع العبرة خانقاني دخلت البيت وانفجرت... منظرا وقصتا وشعورا قط*عوا قلبي... 

عرفت انو ورا كل حيطان بيت عايشه أسرة بقصة مختلفه يعلم بيها ربنا.. اللي اتزوجو يادوب وبضحكو ويتونس واللي على أعتاب الطلاق.. وورا الحيطان في الأرملة.. المطلقه... واللي خايفه على أنها ما تتزوج وانو العمر ماشي. ورا الحيطان في المريض وفي النقص منو نفر وعايش احساس الفقد في السعيد وفي الحزين وفي المذن*ب وفي  الطلع مجبور. 

في الحبت واتخذلت  وفي سكت مسافه ورددت وفي اللقت نفسا في حياة ماعاوزاها... 

سمعت صوت الباب بدق... 

عرفت حا يكون ابوي.. ماقادرة استوعب اقابلو كيف قررت افتح الباب اسلم وشويه اقول لي امي راجعه البيت.. 

وقد كان.. من فتحت الباب سلم عليي وسالني جيت متين جاوبت عادي ودخلنا جابت ليه امي المويه وانا على وشك اتكلم واقول ليها خلاص طالعه لقيتو بقلب في علبه 

نفس الاداها لي بتاع الهدايا اليومتا قال لي دي شنو.. 

شايف الدور الفات واحد برضو شايلا والان اتصل عليي واحد اداني نفس العلبه الشايلا الزول يومتا بس فاضيه.. 

دا شنو اللعب دا.. 

جيت قريب ليه وقلت ليه راجل منو؟! 

قال لي يوم كنتي بايته معانا الدور الفات جى راجل وقف جمبي ومد لي علبة نفس دي وهو بقول لي زي دي القاها وين. 

شلتها في يدي وحاولت اعرف دي شنو بس ماعرفت اعتذرت ليه وبعدا قال لي خير ومشى... 

قلبي بقى يضرب بقوة جيت عليه أقرب وقلت ليه ابوي الزول كان لابس شنو؟! قال لي تقريبا اسود وزول اسمر كده بكون خمسيني....  وعندو علامة جرح في جبهتو

هنا حسيت كل الدنيا لفت بي..... 

كيف شفت المشهد انو الراجل سلم ابوي مخد*رات ومشيت بدون افهم اي شي ما سألتو حتى ولا انتظرت تبرير بل بنيت كل شي بناء على ظنوني وظل*مت ابوي ظل*م كبير. 

كيف قدرت أصدق حاجه زي دي... 

للمرة الرابعه اندم على حاجه عملتها... ماكنت قادرة اقعد اكتر اعاين في وشو.. كيف مرهق من الشغل ولبسو وسخان تجاعيد وشوو زادت من كترة الهموم العليه وانا!.. 

انا عملت شنو...... 

#مازن

سمعت صوت أقدام  اتلفتا باتجاهو كان مديني ضهرو ردد ليه المعلم وقال ليه ايوه عندنا ليك مهمه اليوم.. 

اعرفك على شريكك في المهمه.. 

القيصر.. 

اتلفت عليي وعيونا استقرت في بعض... 

ابتسمت و اتحركت تجاهو ومديت يدي وقلت ليه اتشرفنا.

عاين لي لفترة من الزمن بتمعن بعدا رفع يدو باتجاه يدي وقال لي.. لي الشرف.... 

#طلال

سمعت صوت الاذان دخلت الجامع.. اتوضيت وصليت وانا بدعي ربنا يجبر خاطري... 

وانا عاوز اقوم طلع واحد من بين المصلين وقعد بدا يوعظ.. 

قررت اقعد... 

بس عرفت حاجه واحده بعد الحصل دا انو اي حاجه بتحصل لينا وكل الطرق البنمشيها لي حكمة وكل خطوة بنخطيها في طريق بتقودنا لقدر وأمر مهيئ لينا من عند الله بالثانية الدقيقه.. 

اجي ماري بالشارع بلا هدف واختار الجامع دا بالذات واخش ويقعد الزول دا يوعظ ويختار الزواج كموضوع... 

مع كل كلمة حاسي شعر جسمي بقوم... 

دب فيني الر*عب  دفعه واحده... 

ومع كلمتو.. الله الله في الظلم.. ماجاني غير صورة فاطمة العاشت سته سنين في عذا*ب بتربي في الاولاد وانا قاعد بعيد عمل فيها بعاقبا.. اتكلم عن العدل وعن حقوق الزوجه واداب التعدد والعذاب البلحق صاحبو لو واحده من الزوجات نامت يوما باكيه لو جبت حاجه لي دي وديك ما جبت ليها لو المبيت ايام زياده عند واحده دون اذن التانيه.. 

حسيت نفسي ارتكبت حاجه كبيرة... 

وطلعت من هناك وانا هموم الدنيا كلها في راسي ما قادر اسمع المزيد حاسي نفسي ماقادر... 

اول ركشه قدامي وقفتها ووصفت ليه العنوان.. 

#بلسم 

طلعت من البيت وانا حاسه بي راسي حا يطق. 

شنو الحاصل دا وكيف انو الأحداث اتلخبطت عليي بالطريقه دي وشنو الجاب الزول داك هنا الحي دا وليه ابوي تحديدا هل دا مصادفه ولا كل دا كان مخطط ليه..... 

سمعت صوت تلفوني برن.. رديت..... 

#اسعد 

اتصلت مرة واتنين وتلاته في الاخر ردت... 

سلمت عليها وقلت ليها انتي وين قالت لي عاوزة اركب راجعه البيت قلت ليها لا خليك مكانك انا قريب لمستشفى.. 

قالت لي تمام جيتا لي عندها فتحت مسجل الصوت ختيتو في جيبي ونزلت  وقلت ليها بلسم  اركبي. رفضت.. 

وقالت لي اتكلم هنا انا سامعاك....  عشان التسجيل ما اتكلمت وحنستها كتير قلت ليها اسمعيني.. انتي ليه عملتي كده يومتا وما اعترفتي بي الشفتيه وانو مازن والراجل المعاه اتكلمو عن المخد**رات... رفعت راسا باتجاهي وقالت لي....... 

يتبع......

                الفصل الاربعون من هنا 

          لقراءة جميع فصول الرواية من هنا

تعديل المقال