رواية بلسم الفصل السادس والثلاثون 36 بقلم هند الهيباني

رواية بلسم الفصل السادس والثلاثون 36 بقلم هند الهيباني

قال ليها.. 

يا أمي أنا حركة امس العملتيها

دي م عجبتني  وبتمنى الليلة ما تتكرر. 

قالت ليه في شنو يامازن انا عاوزة اخليكم مع بعض تفهمو بعض وشويه شويه تتعود عليك وتتعود عليها شنو الشي الغلط العملتو.؟! متأكده حا تكون شويه بدت تتعود عليك. من يوم أمس..  وارتاحت 

قال ليها عمرا ما حا ترتاح وهي معاي.. 

وبدت تتكلم خالتو سناء. 

بقى لي الصوت بعيد  بعيد شديد.. 

اتحركت من المطبخ باتجاه المغسله وانا حاسه بي نفسي كل حته فيني بتوجعني... 

كيف يمكن للقلب أن يتمسك بكراهيته كل هذا الوقت، ثم يرتجف من كلمة قالها، أو من نظرة رآها، أو من ألم ربما تسبب فيه؟ وكيف يمكن للإنسان أن يقضي عمره وهو يهرب من حقيقة ما، ثم يفزع لمجرد أنه شعر، ولو للحظة واحدة، بأنها قد لا تكون الحقيقة كاملة..

ولأول مرة، لم أكن خائفة من مازن، ولا من الماضي، ولا من الحقيقة التي أهرب منها منذ زمن. كنت خائفة من ذلك الوجع الذي سكن قلبي حين آذيته، ومن السؤال الذي لم أملك الشجاعة لأجيب عنه:إذا كنت أكرهه حقًا... فلماذا يؤلمني أن أكون قد ظلمته؟

نفسي اتسدت من الاكل.. ومن كل شي رجعت الغرفه. 

ورقدت لحد ما جات نهى قالت لي اكلتي.. 

قلت ليها اي.. 

معليش لأني مضايقاك

قالت لي لا ماف اي ضيق.. 

دقايق وجات خالتو سناء وهي بتقول لي بلسم يابتي لقيت المفتاح.. 

اتذكرت محادثتهم في المطبخ ومشيت وراها فتحت لي الباب ومشت وهي بتحاول تبتسم لي بالغصب.. 

دخلت الغرفه ورقدت وقفلت راسي بالمخده في محاوله اني ارجع انوم عشان انسى كل دا وانسى العالم كلو وراي... 

#اسعد

دا الحصل يعني؟! 

والعمل كده منو من الأساس 

اسماعيل:حايكون منو يا اسعد في رأيك

لو ما البت الاسما بلسم دي اتراجعت عن قرارا في آخر لحظة هسي كل شي كان اتغير لكن بس لازم تحصل عوارض. لازم... 

اماني!:بلسم شنو يا اسماعيل!!! 

اسماعيل :وانتي من متين هنا.. 

اماني :جاوبني يا اسماعيل البت العقر**بة دي ماتقول لي بتتكلمو عن عرسا مع ولدي.. 

كان ما اتراجعت..! 

اسعد :يا امي عرس شنو القصه دي... 

لحد ما أشر ليه اسماعيل بمعنى اسكت.. 

اسماعيل :اظن وريتك كم مرة ما تتصنطي لي كلامي مع زول.. 

اماني :زول منو؟! راجلي وولدي في بينا أسرار كمان!! 

اسماعيل :اسعد امش نوم.. 

اماني :ينوم تمام بس احكي لي انت الحاصل شنو!.. 

اسماعيل :اي يا اماني زي مافكرتي كنا بنتكلم عن العرس 

اماني :انتو جنيتو!!  انا قبل تتزوج كان عندي فيها راي والان كمان بعد عرست ما سكتو ونسيتوها خلاص.. 

دي الا كان مشت كتبتكم اصلهم الناس المقطعين ديل ما يجي من وراهم الا الاسحا**ر والشعو**ذة لكن بعرف اتصرف كيف.. 

اسماعيل :اماني عليك الله انسي الموضوع دا وامشي نومي ارتاحي.... 

برانا الفينا مكفينا

اماني :بنوم يا اسماعيل بنوم لكن لمتين حا تنومني! الا ما يجي يوم اطلعا من راس ولدي دا.. وقريب.. قريب شديد.  

......... 

#خالد

الحال كل يوم ماشي لي أسوأ.. 

يادوب بقيت اقدر اجيب حق الوجبه... 

رجعت اليوم دا بدري لاني ما لقيت الشغل كويس اليوم.. 

حكيت لي كلتوم عملت لي الاكل ومدت لي قروش في يدي.. 

قلت ليها ديل جبتيهم من وين..

قالت لي ادتهم ليها بلسم.. 

حسيت بحزن شديد... 

بلسم أقرب أولادي لي... 

زوله قلبا ابيض، بشوشه، ورزينه وكان عندها مستقبل.. 

كان همها معاي. تساعدني كأنها راجل البيت.. 

وما بتستحمل فيني مثقال ذرة بس

انا رميتا بي يدي الاتنين ديل 

بدون ما افكر شنو عواقب الحاجه دي.. 

بس كلو عشان انانيتي وحبي لي نفسي.. 

اعفي لي يابلسم.. اعفي لي.... 

#بلسم 

صباح يوم جديد. 

كان يوم جمعه.. 

قمت وبقيت ارتب في الغرفه بعدا نزلت تحت اشرب شاي.. 

دخلت المطبخ وعملتو وطالعه على الغرفه... 

لقيتهم قاعدين في الصاله... 

مهيلم ونهى خالتو سناء وعم جلال.  

كانو بضحكو وبتونسو أسرة واحده مترابطه... 

شلت الشاي وطلعت فوق اتصادمت مع مازن في  بدايه السلم.. 

ورجع لي نفس احساس الضيق... نزلت راسي تحت وعاوزة اعدي قال لي وهو بعاين تحت.. 

جيبي لي شاي... 

سكتا ونزلت راجعه عملت ليه كباية وشلت كيكه في صحن ختيتهم في صينيه وطلعت ليه لقيت باب غرفتو فاتح.. 

دخلت ليه ختيتهم في الطربيزة.. 

وشلت كبايتي وعاينت باتجاهو..جاتني نغزة في قلبي.. 

كانت ملامحه جامده.. 

لا ارادياً قارنت.. 

هم قاعدين بره بتونسو ويضحكو وهو قاعد هنا براه

ما اول مرة ولا تاني مرة انا من ماجيت البيت دا ماشفت مازن كفرد من العيلة دي بل كأنو غريب. 

بياكل براه.. بيشرب براه.. ويقعد براه ولا مرة شفتو مبسوط ويضحك ولا مرة شفتو بتونس ولا شفت أي ترابط بينو وبين أفراد الأسرة التانين باستثناء خالتو سناء.. 

غصباً عني شفقت عليه... 

حسيت بي حزن على حالته.. 

وبقيت اسأل نفسي سؤال هل مازن.. الحاجات البعمل فيها دي والتناقضات الفيه هل هي نتاج مر*ض نفسي..؟! 

هل قعادو في السج**ن لفترة طويله والأحداث المرت بيه.. 

دي  أثرت في عقلو وصحتو عشان كده بتصرف كده... 

ماعارفه ليه بقيت كل ما عيوني تشوفو بلقاها بتتملي دموع بدون اراده.. 

ماعارفه نوع الاحساس الجواي تجاه انسان بالسو**ء العرفتو عنو دا شنو ....

بس احساس جواي بعدم الراحه... 

لازمني لي بقية اليوم.. 

طلعت من غرفتو بس هو ماطلع من عقلي.. 

كويت اسدال الصلاة وعطرتو وختيت جمبو المصحف... 

اتوضيت وقعدت اقرا في سورة الكهف... 

لحد ما سمعت الاذان.... 

الاول.. التاني كنت خلصت الكهف.. وبديت ادعي.. 

بعدا قمت وصليت...

خلصت طلعت اللاسدال واخدت لي رقده ارتاح شويه.. 

بالمسا.. ماكان هو في البيت... 

دخلت اشوف الاكل بشنو لقيتا كسرة وأم رقيقه اتذكرت انو مابياكل الكسرة.. 

فتحت التلاجه ولقيت بطاطس.. وبقيت افكر انو بحب دي.. 

بقيت شغاله في المطبخ... 

عملت قيمة. بطاطس خلصتها وكلمت خالتو سناء اذا جى سألا من الاكل.. قالت لي راقبي انتي عشان تاكلي معاه.. 

قلت ليها لا ماعندي نفس والله.. 

رجعت الغرفه.. 

وبقيت راقده. لحد ما شالتني نومه.. 

صحيت بضربات على كتفي.. فتحت عيوني ولقيتا خالتو سناء. 

قالت لي مازن جى.. قومي اكلي معاه.. 

جرتني جر... 

دخلت الغرفه لقيتو بياكل كنت عاوزة اقول ليها لا ماعاوزة بس نفس الضيق الاتملكني  قبيل هو نفسو الدفرني دفر باتجاهو

قعدت في الكرسي ومديت يدي اكل بعدا خالتو سناء طلعت وقفلت وراها الباب.. 

كنت بعاين ليه بين الحين والآخر.. وانا شايفاه هادي منعزل 

بفكر ليه ما بتعاملو معاه الباقين بصورة كويسه.. 

انا عندي مبرر اني مابعرفو ولا بحبو ولا اي شي بس هم اسرتو

د*م ولحم... 

وانا بشوف ملامحو قدامي وطريقه اكلو.. اتذكرت كلام خالتو سناء واتكون في اللحظة دي شعور عمري ما اتخيلت انو يجيني قصاد مازن... 

للأسف اني ورغم كل العارفاه عني حاسه بي حزن عليه ماعارفه ليه... 

ماعارفه ليه ماقادرة اتقبل وضعو...... بالطريقه دي وليه يحصل لي كل دا... 

#مازن 

جيت من بره وانا حاسي بي تعب... 

دخلت المطبخ اشوف في شنو لقيت عاملين كسره وملاح وانا طالع قالت لي امي اكب ليك تاكل.. 

قلت ليها لا ما داير اديني سلطة بس 

قالت لي شايفه بلسم عملت ليك قيمة بطاطس.. 

طلعتا وكبتا لي وهي بتردد والله بلسم دي بت طيبانه خلاص 

جات عملتا مخصوص ليك وما اكلت زاتو  ومشت تاخد ليها غمضه.. 

سكتا مسافة وانا بتناول الصينيه من امي   

التفتا  عليها وقلت ليها ناديها تاكل معاي... 

وكل يوم كانت الأسئلة تجاه الانسانة دي بتكتر ماعارف ليها اي اجابه... 

#بلسم. 

شلت الصينيه رجعتها المطبخ وجبت المكنسه.. عشان انضف مكان اكلنا بس الباب كان مفتوح فتحه بسيطة.. 

سمعتو وهو بقول في التلفون.. 

ما تشيل هم انا بكره الساعه ١٠ حا امش المكان داك. 

وحا انهي كل دا... 

وقفت مسافه بعد قفل وانا قلبي بضرب. 

دقيت ليه الباب ودخلت نضفت 

وانا مافي في راسي غير الكلمات دي... 

رجعت غرفتي وانا ماقادرة اطلع القصه من راسي.. لحد ما نمت عليها... 

#طلال

طلعت الورشه اشتغل.. خصوصا اني الايام السابقه كلها كنت قاعد في البيت...

اشتغلت بنشاط.. قريب العصر اتحركت باتجاه البيت..

لقيت فاطمة رايقة ومروقه البيت جبنة وفنكوش وحركات

اتبسطت مدت لي ملابس وقالت لي استحما وتعال نتونس...

وقد كان..

خلصت بعدا طلعت بنشرب في جبنتنا ونتونس انا وهي والأولاد قاعدين حوالي وبضحكو...

قامت على حيلا تقفل النار وتجي.. 

بس الباب دقه.. وسمعت فاطمه بتقول ايوه منو.. 

قمت على حيلي عشان لو راجل ... 

بس كانت مفاجأة ما كنت متوقعا...

#فاطمه

كان يوم جميل قررت أدي فيه علاقتنا فرصه..

وابدا من جديد مع طلال ونتبسط لانو عبسنا وزعلنا بما فيه الكفاية...

ظبطت البيت وظبطت نفسي وكنت مبسوطة على الآخر.

لحد ما قمت اطفي النار وسمعت الباب بدق..

قلت منو ردت عليي واحده من الجارات في الحي..

فتحت الباب لقيتا جاية بي شنطه..

قلت ليها اهلين اتفضلي..

مدت لي يدها ومديت ليها يدي لحد ما سمعت صوت طلال وهز بقول لي منو.

وقطع كلامو وسكت.. كانت بتعاين وراي.. تحديدا في طلال..

عاينت باتجاهو وهو كمان بعاين ليها..

قلت ليها ايوه اهلين اتفضلي جوه اضيفك...

قالت لي في زول بضيفوه في بيتو؟!....

#عوده_بالزمن

#بلسم..

صباح اليوم التاني كان عندي جامعه.. 

لحد الساعه ٩  ما طلعت.. بعدا جى دقا لي الباب وقال لي ماماشه 

قلت ليه لا اليوم ماعندي.. يس ماشه لي صحبتي بعد مسافه وبمش براي ماف مشكله.. 

سكت مني وجاتو مكالمه بعدها طلع.. 

طلعت بالباب الورا ولابسه عبايتي وانا جاريه  عشان زول يشوفني ماف.. 

لحد ما نزلت شارع الظلط واتفقت مع بتاع ركشه.. 

من شفت عربيتو في الظلط قلت ليه تابع لي العربية دي بس.. 

ماعارفه نفسي ماشه وين...

ولا نتيجة القرار دا حا تكون شنو 

بس 

كنت متابعاه..

محل ما كان بمش عشان اقدر اجاوب ولو على سؤال واحد من البسألو لي عقلي. 

مشية استمرت طوييل..

لحد ما أخيراً  وقف العربيه ونزل منها باتجاه مكان اول مرة اشوفو...

عاين لي بتاع الركشة وهو بقول لي والله يا اخت انا لحد هنا كفاي.. صراحه المكان دا ماعاجبني مابقدر انتظر اكتر من كده.. الحته دي زاتا سمعتا كعبه شديد..

ارجعك معاي!

قلت ليه لا عليك الله انتظر شويه بس حا امشي واجيك نزلت من الركشه بس ما ان نزلت.. بتاع الركشه دورا وبسرعه اتحرك من جمبي وانا بنادي عليه.

ماعارفه اعمل شنو..

اتلفتا ولقيت واحد في وشي اتهجمت ورجعت لي ورا...

قال لي انتي منو والجابك المكان دا شنو؟!...

#يتبع.....

             الفصل السابع والثلاثون من هنا 

            لقراءة جميع فصول الرواية من هنا

تعديل المقال