رواية ورقة نجاة الفصل السادس 6 بقلم حميده عبدالحميد
أمن سلاحوا٠٠٠ ووجهو قُصاد محمود... وظاهر عليهو كان عايز يقتلوا بالجد محمود طبعا خلاص ساح من الخوف وضغطه وحدة بس والرصاصه ح تفجر راس محمود لكن في اخر الدقائق أصحاب تميم مسكوا ورفضوا انو يضربوا بالسلاح. شال نفس عميق ووجه كلامو للاسمو عزو وقال ليو ، عز الدين ي بشر انت موش قلت ليك اختاني مسكوا من يدو تاني وقال ليو تميم امسك أعصابك ي فردة وخلينا نشيل الحيوان دا ونودي السجن وياخد ليو عشرة سنة عشرين سنة كدا لحدي م يتأدب ويتعلم كيف يحترم المرأة مسح وشو بعصبيه وقال ليو تمام ارفعوا في العربية اتحركوا التلاتة ورفعوا محمود. وطلعوا بيهو الشارع
اما انا كنت لسه مرمية في الأرض جو الباقين المشو الحوش التاني ودخلوا العريشه واحد منهم قال شكلوا كان في زول بهناك وطلع في اخر لحظة ولقينا الحاجات دي. وشكلها أدوات بيتعاطوا بيها مخدر الآيس تميم شالهم منو وقال ليو محمود دا وراهو قصة طويله الظاهر كنت عايزة اقول ليهم لا دي حقت بت اسمها ياسمين. بس بجد كنت م قادرة . اتكلم
الشباب الجدد انتبهوا لي وواحد تاني قال دي هي البت صح حسبي الله ونعم الوكيل ياخ دا حيوان م انسان معقولة يعمل فيها كدا المفروض دا ثانيه م يعيش تميم قال ليو المفروض بس عزو قعد يتجلع لينا المهم م علينا. ح نشوف قصتوا بعدين. اتنين اتقدموا اتجاهي تميم قال ليهم ماشين وين؟
اتلفتوا عليهوو وقالو ليو عايزين نرفعها عشان نوديها معانا المستشفى انت م شايف حالتها كيف؟
قال ليهم لأ . مستحيل اخليكم تلمسوها. المهم انتو اطلعوا برا وانا بشوف لو عندها صحبات قراب. منها يجووها
إتوجه على ونزل قدامي وقال
حمدلله على السلامه وان شاء الله يلقي جزاهو. وح يتحاسب على كل شي عملوا فيك
غمض عيوني ب رضا ورجعت فتحتهم
قال لي عندك صحبات أو جارة قريبه منك ؟ عشان يمسكوك ويمشو معانا المستشفى
سبحان الله الإنسان دا طلع محترم شديد فعشان كدا منع الشباب يلمسوني وفكر في قرار تاني انور يجو بنات زيي
في اللحظة دي اتذكرت بس شذي. عصرت على قلبي ورفعت اصبعي على الاتجاة اليمين لي بيتنا وقلت ليو بكل طاقتي في جارتي اسمها شذي وساكنة هنا قال لي تمام. طوالي قام من قدامي وبخطوات سريعة طلع بعد ٥ دقائق جا راجع وشفت شذي ب وراهو
أول م شافتني ختت يدها في خشمها وقالت الليله ي فاطمه. حصل ليك دا كلو وبقت تبكي. تميم قال ليها اسنديها وارح اطلعوا برا
جات على ولسه بتبكي. مسكتني وانا برضو شديت حيلي شويه واستدنت عليها وخطوة خطوة لحدي م طلعنا برا
هنا شفت العربات كانو خمسة تاتشر وكلهم ملانين عساكر ومحمود مجدوع في التالت. ومعاهو مجموعة من العساكر محاوطنو شذي قالت عجبني ليهو. ان شاء الله يموت ي رب
تميم فتح باب العربية الاولي وقال ليها ركبيها هنا. مشينا عليها وركبت بعد تعب لانو رجولي كانو م فيهم حيل ٠٠
قال لي شذي اركبي معاها. مدت رجلها عشان تركب بس في شي سحبها بكل قوة لمن اتخلعت وطلع دا زوجها لفتها عليهوا من كتفها بشدة وقال ليها دا شنو وماشه وين انتي حيوانه ولا شنو؟
واحد من الجياشه الورا. ضرب العربية ونزل. وقال ليو شنو.؟؟
انتو هنا كلكم فاقدين تربية شكلكم. ولا قلة الأدب دي درسوها ليكم.؟
طبعا راجل شذي جبان زي محمود وغير لسانهم سليط تاني م بيعرفو شي
تميم بكل هدؤ قال ليو تقريبا شايف الفي العربية داك صح؟ وحسب علمي انتو جيران ف اكيد بتعرفو بعض ويمكن تكونو أصحاب برضو ويمكننن تكون عارف انو قعد يعذب مرتو برضو. صح!!
هزا راسو بنفي وقال ليو ايوا جيران بس علاقتنا م قويه. قال ليو تمام مرتك ح تمشي معانا المستشفى. عشان لازم تكون معاها. فلو في شوية انسانيه في قلبك ممكن تسمح ليها وانا حاليا بتكلم معاك ك اخوي واخوك٠٠٠٠!!
تميم من رغم انو يتشاف هادئ في اللحظة دي بس عيونو كانت بثبت العكس وظاهر عليه غضبان شديد من حركة راجل شذي.
قال ليو تمام م عندي مشكلة تمشي معاها وزح شويه من طريق العربات. تميم قال لي شذي اتفضلي. ركبت جنبي وهو قفل الباب ومشي ركب ورا
طبعا الشارع كان ملان ناس وكلهم واقفين يتفرجوا فينا وكل زول ينضم ب جهة.
محمود مالو!
حصل شنو!
مرتو مالها!
العساكر الجابهم هنا شنو!
الخ٠٠٠٠٠٠
العربات اتحركت ورا برا. وركبنا الظلط. مشينا نص ساعة والتاتشر الفيهو محمود ومعاهم اتنين تاني كسرو يمين. شكلهم ماشين بيهو القسم. ونحنا واصلنا طريقنا عديل لحدي م وقفنا قدام بوابة المستشفى
شذي نزلت اول وحدة وبعدو سندتني عشان انزل
تميم. كان معانا خطوة خطوة والباقين م نزلو من العربات دخلنا المستشفى. والممرضات استلموني على طول٠٠٠
عملنا الفحوصات كلها وقررو يعملوا لي عملية في رجلي الشمال وم بتاخد زمن كتير
تميم. كان متابع معانا كل شي لحدي م دخلوني غرفة العمليات لانو وقت محمود كان بيضربني بالعصايه في سرايح منها دخلت جوا رجلي وكان لازم تطلع والا ح تعمل لي مشاكل كتيرة.
بعد ساعة ونص طلعت. عملوها لي بدون بنج بعدها قالو لازم ارقد لي مدة يومين لانو جسمي فاقد ولازم اخد دربات. كل ٨ ساعة ٠٠
جاتني شذي وعيونها حُمر زي الدم قلت ليها مالك حضنتني وقالت لي سامحيني ي فاطمه. م قدرت اعمل ليك شي لمن انتي وصلتي للمرحلة دي بجد نحن جيران مافينا فايدة حسبي الله ونعم الوكيل دا وحش م انسان. قلبوا كيف سمح ليهو يعمل فيكي كدا. ابتسمت وقلت ليها الحمدلله ي شذي وانا بجد م ح انسي ليك وقفتك معاي وهي براها بالدنيا قالت لي طيب احكي لي كيف جوك الناس ديل. بديت اسرد ليها القصه كلها. لحدي م عرفو مكاني وجوني رفعت يدينها فوق وقالت الحمدلله ي فاطمه دا الفرج محمود الجبار الشايف نفسو. راجل عليك
بس عرف حاجه الليله. قلت ليها. الحمدلله قالت لي طيب انا ح امشي بعدا ي فاطمه م شفتي عثمان من قبيل قعد يتصل لي وسمعني جنس فارغ لازم امشي عشان بيتي م يتخرب قلت ليها سمح ي شذي م قصرتي والله يجزيك كل خير قالت لي خلي بالك ع نفسك وان شاء الله بكرة من الصباح كان عثمان طلع الشغل بشرد وبجيك قلت ليها لا ي شذي تاني م تجي. ح يعرف وح يعمل ليك مشكلة طويله رفضت تسمع كلامي بس الحمدلله قدرت اقنعها ودعتني ومشت ٠٠
سندت راسي في حافة السرير واستحضرت المشهد الحصل قبيل كلو وكيف محمود كان مذلول من دون م أشعر لقيت نفسي بضحك ايوا ضحكت وشمتانة شديد في محمود.
سمعت صوت كركبة في الباب صلحت نفسي فإذا بها الممرضه دخلت جوا وقالت لي الف سلامه عليك ان شاء الله قلت ليها الله يسلمك بدت تركب لي الفراشه عشان اخد الدربات وفي حقن برضو صرفوها لي اثناء م هي بتركب لي فيها قالت لي. معليش بس المستشفى كلها جياشه والناس الفضول كاتلهم عشان يعرفوا وهمم الجابوك طبعا فممكن اعرف الحصل شنو قلت ليها الحصل انو الحق انتصر والواقفين برا ديل البيقولو عليهم رجال جد جد طبعا م فهمت شي من كلامي. لولوت لي خشمها وقالت لي خلصت ليك. وطلعت ٠٠
عاينت لي يدي والفراشة مركبة فيها. والدرب ماشي نقطه نقطه غمضه عيوني وقلبي ضرب بقوة لمن اتذكرت اهل محمود ح يقلبوا الواطه فوق وتحت لمن يعرفوا حصل ليهو شنو واكيد ح يجوني هنا ف المستشفى في اللحظة دي م قدرت اسيطر على دموعي. نزلو من دون صوت اول م يعرفوا بالقصه ح يخلوني زي المجنونة من بدل محمود واحد ح يكون في الف محمود. ودا غير اخواتو وامو شهقت بقوة لانو مجرد التفكير في الموضوع ساي خفته. اثناء م انا تايهة سمعت صوت طرقات في الباب صلحت نفسي للمرة التانيه واتاكدت من طرحتي قاعدة في راسي سمح وكل شي فيني ساتر حتى قلت اتفضل٠٠٠
الباب فتح براحه وكان دا تميم
وقف جنب الباب وقال ممكن ادخل هزيت راسي بمعنى اي
دخل بخطوات هادئة وجرا الكرسي وختاهو على مسافة مني قعد وتكل سلاحو في طرف الكرسي شبك يدينو مع بعض. ووجه نظرو في الأرض وقال
حمدلله على السلامه
قلت ليو الله يسلمك وشكرا ليك بجد م عارفه اشكرك كيف لو م انت كان هسي محمود قتلني زي الوقت دا
قال لي وقت ماسك السكين كان ناوي يضـبـ.ـحك بيها صح هزيت راسي ودموعي بدو ينزلو
شدّ على سلاحوا بقوة. وسكت من قوة الكلام السمعوا مني م قدر يعبر عن احساسوا.
قلت ليو. هسي الحمدلله كدا ح ارتاح منو قال لي ان شاء الله
طيب انتي اسمك فاطمه صح
قلت ليو ايوا قال لي
انا تميم وخت يدو في صدور وقال شايفه الكاكي دا ي فاطمه نحنا لمن لبسناهو لبسناهو عشان نحمي الوطن والوطن دا فيهو منو امهاتنا واخوانا واخواتنا يعني فيهو انتي برضو واي مراة عايشه في أرض الوطن هي تحت حمايتنا ونحنا خضنا معارك. ودخلنا الجبال. وعشنا في الحدود والصحاري عشانكم انتو وعشان انتو تعيشوا في أمن وأمان. فكيف. واحد حيوان ومنعدم الرجولة يعذبك كدا.؟ المفروض انتي م تسكتي ليهو تمشي أقرب وحدة وتبلغي عنو. فاطمه اوع تكوني بت ضعيفه. وا اوع تخلي حقك.صدقيني.انا حاليا. مغلوب على شديد. وقلبي حاليا بيغلي غلي. جواي. نار. م ح تهدأ الا اشوف زفت الاسمو محمود دا نال جزاهو. قلت ليو انا م ضعيفه قال لي لا ضعيفه. بقيت ابكي طوالي وقلت ليو انا م معاي زول اهلي م وقفوا معاي انا براي م بقدر عليهو براي
. سكت ورفع سلاحوا وقام وقبل يمشي قال. حاليا ح نتحرك. وح نقعد هنا يومين. ان شاء الله ومحمود الشباب متابعين قصتوا بهناك وحاليا هو في السجن حتى علاج م ح يتعالج وح يتعذب كدا بس
واداني ضهرو وقبل يطلع قال لي معافاة ان شاء الله وطلع فات ٠٠٠
عاينت ليهو لحدي م طلع وقفل الباب وقلت في سري ٠٠٠تميم
سبحان الله. ياريت لو كل زول يحترم المرأة زيو كان كل النساء ح يكونو سعيدات٠٠٠
غمض عيوني وقررت انوم شويه
في جانب آخر ٠٠٠٠
جاري الإتصال......
ترن ترن ترن ترن ٠٠٠
دا منو كمان القعد يتصل لي زي الوقت دا
_الوووووو٠٠٠٠
=اهلين امي كيف حالك
_مروان.؟
=اي ي. امي المهم اسمعيني وماعايزك تخافي تمام
_بسم الله في شنو ي ولد
=ي امي محمود حاليا في السجن وحالتوا كعبة شديد. راسو مشقووق عديل والسجن كلو دم. وحالفين م يطلعوا لينا عشان م نمشي ونعالجو
_وبعلي كرررر على الليله سلمي اجري ي سلمي كر عليك الليله ي سعاد. واي انا ي محمود ي ولدي الليله الجاك شنو
=امي قولي بسم الله م تخليني اندم عشان وريتك
جات بتها جاريه ومسكتها
في شنو ي امي مالك.
بس كانت م بتتفاهم خطفت منها التلفون وقالت
_الو
ايوا سلمي حمدلله رديتي لي انتي سوقي امي وتعالو القسم سريع في شنو ي مروان. =محمود في السجن ي سلمي . والسبب مرتو.
_لا حول ولا قوة الا بالله
مروان القسم دا موش انت شغال فيهو المفروض بي واسطة منك انت وود خالتي يطلع. ودا غير نص اعمامي شغالين هناك ؟
ضحك ب قهر وقال ليها
محمود جايبنوا الجيش بذات نفسهم ي سلمي والمرة دي وقع وما سمي مليون مرة انا قلت ليو مرتك دي م تضربها كدا بس هو م بيسمع الكلام. وديل ياهم قاعدين كلهم في القسم وموقفين القسم فوق وتحت وحاليا ابوي واعمامي كلهم واقفين. معاهم عشان يتفاهموا بس هم مُصرين في قرارهم
قالت ليو معقولة ي مروان. القسم حقكم انتو المفروض هم م يسيطرو عليكم كدا
قال ليها سلمي الناس ديل . تابعين لي كتيبة تميم. وما بخافو من زول غير الله وعندهم المرأة خط أحمر عديل. غايتو محمود الله يكون في عونو بس
قالت ليو وفاطمه وين قال ليها
في المستشفى المهم انتي تشيلي امي واخواتي وتجو. وحاليا عماتي متحركين على المستشفى. عشان يتكلموا مع فاطمه لازم تسحب القضيه والا محمود ح ينتهي قالت ليو تمام قفلت الخط سريع وجرت على امها حكت ليها كل شي
كل لوحات الغضب اترسمت في وشها وقالت
فاطمه البت الكريهه الملقطه دي شوفي بس ح اعمل فيها شنو. ي سلمي محمود م لقي خير من ووراها غير الفقر وبعد دا كلو جايبه ليهو جيش ويعذبو كدا
قالت ليها
امي اسمعيني ح نسافر الليله كلها ٨ ساعة ونوصل. واسمعي كلامي دا سمح ي امي اي كلمة غلط في حق فاطمه حاليا م ح تكون من صالح محمود لانو م ح تسحب القضيه نحنا ح نأدبها. وبطريقه كعبة خلاص بس هسى لازم نتعامل معاها كويس وانتي ي امي ح تعملي فيها امها عديل ح نسايسها وناكل راسها لمن تسحب الشكوة ومحمود يرجع وهي ترجع لي محمود برضو. بعدين ح نوريها. نحنا شنو. والبيغلط في حقنا ح نندموا اكيد وهي م استخارات لمن عملت في اخونا الكبير كدا
قامت من الأرض وقالت ليها كدا يعني ح تسحبها صح قالت ليها اي. ٠٠
دخلوا جوا جهزو شنطهم وكلمت باقي أخواتها وهم ح يلحقوهم في موقف الباصات هناك
يتبع...
الفصل السابع من هنا