رواية ورقة نجاة الفصل الثاني عشر 12 بقلم حميده عبدالحميد
صباح اليوم الثاني ٠٠
في الداخليه ٠٠٠
صحيت مع الأذان التاني عاينت اتجاه البنات لقيتهم نايمات الله اعلم رجعوا متين. عاينت ليهم مسافه واتأملت ملامحهم بس للاسف بقت باهته شديد ومافيها روح لانو دمروها بالمخدرات. بجد ربنا يهديهم وينور بصيرتهم بس قبل أي شي لازم أصحابهم واتقرب منهم اكتر عشان اقدر اصل لي ياسمين واعرف هي وين. ولازم اساعد تميم ومنها ارجع حقي والظلم الظلمتني ليهو ياسمين ومستحيل اخليها ليها تعدي كدا ساي ٠٠ طلعت برا الحوش. والجو كان بارد والبنات كلهم متلمين في الوضايه وعايزات يتوضوا سلمت عليهم ولقيت وحدة ظريفه كدا اسمها نعمات سالتني من اسمي قلت ليها انا فاطمه قالت لي بتقري شنو قلت ليها انا م طالبه بس جيت اقعد اسبوع واحد قالت لي ايوا ونستني لحدي م الوضايه فضت وكل وحدة مننا قعدت في مكانها قالت لي بعدين وقت الفطور بجيك. نفطر سوا قلت ليها تمام انا في الغرفه رقم ٨ ابتسمت وقالت لي طيب ومشت وانا خلصت وضو نزلت أكمام العباية وفتشت لي مُصلاية من باقي الغرف شلتها ومشيت بيها الغرفه حقتنا صليت والواطه كانت لسه بياح ٠٠ طبعا البنات عندهم. سخان وحب شاي. وقرنفل وحاجات كتيرة. قلت في سري دا وقتك ي فاطمه عشان تكسبيهم. طوالي قمت طبقت المصلايه ورجعتها لي اسيادها وجيت على السخان مليتوا مويه. وظبط شاي ب قرنفل يقول ي ليل جهزت الكبابي واي شي وبقيت حارساهم بعد ساعة ونص حتى بدو يصحوا تدريجيا وعلى حظي اول وحدة صحت البت الكانت متصورة مع ياسمين رفعت حاجبها ب استنكار وهي بتعاين لي. اتشجعت وقلت ليها صباح الخير قالت لي صباح النور بنبرة مسيخه كدا وبعدو نزلت من السرير شالت فرشتها والمعجون وطلعت برا بعد ٨دقيقه جات راجعة قالت لي انتي عملتي الشاي؟ قلت ليها اي. وعلفكرة عايزة اقول ليك حاجه قالت لي اها قلت ليها اول اقعدي قالت لي تمام اها قعدت قولي يلا؟ قلت ليها انا اسمي فاطمه وحبيتكم شديد وحبيت طريقة حياتكم وحتى انا بتعاطي زيكم وبعرف واحد اسمو مروان وقعد يجيب لي الحاجات دي بكمية كبيرة كل لوحات الدهشة اترسمت في وشها قالت لي جادة انتي؟؟ قلت ليها اي جادة. معقوله اكذب عليك قالت لي ثواني وجري على صحباتها صحتهم. الاتنين اول شتموها عشان صحتهم بس تاني قالت ليهم في شمار خطير لازم تعرفوا . كلهم قعدو. قالت ليهم البت ساي خفنا منها طلعت زينا. وكمان بتعرف مروان اتخيلوا بس. اتفاجئو طبعا وحسيت بيهم فرحوا شديد. جات نفس البت وقالت لي انا اسمي سلمي ودي ريان وديك رباب قلت ليهم اتشرفت بيكم قالو لي ونحنا اكتر قلت ليهم المهم هسي اتجهزو عشان نشرب الشاي ونتعرف ببعض اكتر. سلمي قالت لي انا جاهزة خلي ريان ورباب يجهزو قلت ليها ظابط سخنت الشاي شاني وصلحت الكبابي سلمي طلعت لينا بسكويت من الدولاب حقهم. وقسمتهم في الصحانه٠٠ بعد دقائق جو الباقين ٠٠عملنا حلقة وقعدنا بديت اكب ليهم في الشاي ريان قالت لي من متين بتعرفي مروان؟ قلت ليها طول انا بت خالتوا علفكرة. ونحن أصحاب شديد واسرارنا كلها مع بعض. حتى. حاجاتو مرات يمسكني ليها
التلاته قالوا بصوت واحد واااااااو اها يلا واصلي ٠٠٠ قلت ليهم تاني م عليكم انا بجازف ليكم. اي حاجه ت ريان من الفرحه لمن حضنتني كنت مضايقه بس حاولت اكون ذكية. قلت ليهم. اها. احكوا لي الحاصل. بيكم شنو رباب شالت نفس عميق ورفعت كبايتها وقالت طبعا يبت مروان دا مبالغة. أكبر مروج. وانا بعرف اي شي عنو وهو برضو قعد يصارحني ب حاجات كتيرة رديت ليها وانا بمد ليها في صحن البسكويت وقلت ليها اها يعني دي انتي الكان حكي لي عنها وبالمناسبه هو مبسوط منك شديد ٠٠٠ راسها كبر واصلت كلامها وقالت والعجب اسماعيل مبالغة عديل. قلت ليها اسماعيل دا منو م عرفتو قالت اي دا مع ناس القسم وبمرر الحاجات دي ب رشاوي وكدا وضحكت قلت ليها ايوا ومروان اكيد قعد يحكي ليك بنفس الشي القعد يحكي لي قالت لي ٠٠هي ي بت بالنيه بس وهنا بدت تحكي لي وانو هم عندهم . كم مكان وكيف قعد يروجو في الحاجات دي. وكيف بياكلوا راس الشباب دا غير البنات المعاهم والقعد يبيعوا برضو . ورتني كل تحركاتهم وكيف قعد يجيبوا الحاجات دي عن طريق الحدود. سجلت اي شي في راسي وقبل تتم كلامها تلفون سلمي رّن فتحت الخط وقالت
هلا ايسووو ٠٠٠٠
اها انتي ف الباب والبواب رفض يدخلك!! خلاص جايه عليك ثواني بس.
قفلت الخط وقالت ماشه اجيب ياسمين وح تحبيها شديد
قلبي عمل شح . لمن سمعتها قالت ياسمين جات واذا هي شافتني ح تفضحني وح يعرفوني كذابه. قلت ليها تمام لحدي م تجي ماشه الحمام قالت لي ظابط
هي طلعت وانا طلعت ب وراها وتاني اتذكرت تلفوني تحت المخدة رجعت تاني رفعت المخدة شلتوا وجيت طالعه سريع سريع. مشيت اتجاه شجرة كدا وقعدت تحت ضلها في الكرسي. فتحت التلفون لقيت كم مكالمة من تميم متصلهم امس باليل استغربت شديد وقلت في سري هو ليه متصل لي زي الزمن دا ٠٠
رجعت ليهو ٠٠طوالي فتحت الخط
_سلام عليكم
=وعليكم السلام وين انتي ي بت من امس؟
_ نمت كان
=اها طيب اسمعيني ي فاطمه محمود طلع من السجن. وطلع بالشردة فعايز اقول ليك اعملي حسابك وممنوع تطلعي من الداخليه لأي سبب من الأسباب وبعدين ح اجيك وح اجيب ليك كل شي. بتحتاجي
طبعا بعد م سمعت محمود شرد من السجن خفت بس. تاني اتشجعت وقلت هو مستحيل يقدر يعرف مكاني وين وانا م ح اطلع من هنا نهائي
قلت ليو. عايزة اقول ليك حاجه بخصوص. مروان. وياسمين. قال لي اها
حكيت ليهو اي شي سكت مسافه وقال دا كلام خطير شديد ي فاطمه اعملي حسابك ي بت الناس انتي حاليا مسؤوليتي سكت لحظه وم عرفت ارد ليهو بشنو واصل كلامو وقال. طبعا اسماعيل دا عرفتو هو منو٠٠٠. وانتي حاليا سهلتي علينا حاجات كتيرة. المهم زي م قلت ليك اعملي حسابك وخلي بالك ع نفسك لحدي م اجيك المسا بعدين واعرف باقي التفاصيل منك شخصيا وللمرة الرابعة الاسمها ياسمين دي م لازم تشوفك. واذا حصلت ليك اي حاجه تتصلي لي طوالي
حسيتو خايف على شديد. قلت ليو طيب قفلت الخط ودخلت التلفون في جيب العباية. جاتني نعمات قالت لي قعد تتكلمي مع منو قلت ليها مع صحبتي قالت لي اها. جرت كرسي وقعدت جنبي طبعا ظريفه واي شي بس كلامها كتير قعدت معاي قريب نص ساعة واثناء قعدتنا دي جو ناس سلمي وريان ورباب وكانو لابسين وكأنهم طالعين سلمي قالت لي تمشي معانا قلت ليها صحبتكم وين المشيتي تجيبها؟ عاينوا لبعض بنظرات غريبه وبعدها قالت لي رفضت تدخل فأنا اتكلمت معاها في الباب ورجعت. قلت ليها ايوا قالت لي ارح معانا قلت ليها ماشين وين؟ قالت لي ماشين. اكتر مكان بيتجمعوا فيهو التجار الكبار والمروجين عايزة اقول ليها لأ
بس قلت ف سري دي فرصتك ي فاطمه وكدا ح تسهليها على ناس تميم. فلازم امشي هناك واصور المكان وا اصورو ليهو ٠٠٠
ويمكن دي أكبر غلطه انا عملتها قلت ليها طيب ارح اصلا انا جاهزة. اتلفت على نعمات وقلت ليها طالعه معاهم ماف طريقه نفطر مع بعض قالت لي تمام حصل خير. طلعنا وكان في عربية برا صغيرة حارسانا سلمي فتحت الباب الأمامي وركبت وريان فتحت الباب الخلفي وقالت لي اركبي قلبي اكلني وخفت شديد قلت ليهم دا منو ي ريان قالت واحد م بتعرفي هسي اركبي عشان م نتأخر ركبت وانا مترددة شديد قعدت وهم ركبوا وراي وفعلا كانت شخصيه غريبه اول مرة اشوفها ٠٠٠ الشاب اتحرك ومسك الشارع طويل. لحدي م ركبنا الظلط .طلعت تلفوني ومثلت نفسي قعد اشوف في الفيس بس كنت قعد اصور في الطرق. وتميم عندو واتس في رقمو والحمدلله الشريحه المعاي فيها خدمة كنت بصور وبرسل ليهو لحدي م العربية نزلت من الظلط ودخلت ب شارع كدا اول مرة اشوفو في حياتي ٠٠٠ قلت لي ريان ماشين وين؟ قالت لي موش كلمتك حبيبه قلت ليها اها ٠٠ واصلنا شارعنا وبقينا ماشين ٠٠٠
في المعسكر ٠٠٠
استقبلت ناس عز الدين واتفقت معاهم على اي شي وحكيت ليهم بالخطة والتحركات ال ح تحصل وكلمت باقي الشباب برضو.وكنت حارس يامن يوصل. ومقداد برضو. واتصلت ليهم من امس وهم اصحابي شديد قرينا الثانوي والكلية الحربية مع بعض. وكلمة رجال قليله عليهم. الاتنين ديل بجد قلوبهم حارة ويموتو عشان الحق والوطن. وعشان كدا انا طلبت مساندتهم بالذات ٠٠٠
بعد م خلصت كلامي مع عز الدين ووريتوا اي شي سالتو من محمود اذا منو اي خبر. قال لي سمعنا فات على طريق الحدود بس انا كلمت أصحابنا هناك اذا شافوا يمسكوا قلت ليو تمام
كنت مصدع شديد ولي زمن من القهوة فمشيت لي ود إدريس. طلبت منو قهوة جنزبيلها تقيل ولبين م يجيبها لي طلعت تلفوني وعايز اتصل لي فاطمه بس هي اتصلت لي طوالي فتحت الخط وحكت لي ب حاجات كتيرة. خلتني اغير اي شي وهي سهلت على حاجات كتيرة٠٠٠ بجد البت دي شجاعة شديد وانا كنت عارف انو هي شجاعة بس هي عشان كانت براها وماف زول وراها فعشان كدا محمود واهلوا استغلوها ٠٠ و البت دي عاصفة قويه ٠٠٠ وذكية. شديد. وفي حاجه قويه شدتني اتجاها
وم عارف كنت مستعجل شديد على موضوع طلاقها ٠٠ استغفرت ربي. وجابو لي القهوة. كيفت راسي وطلعت طوالي عشان عندي موضوع لازم احسموا. مسافة الطريق. يامن اتصل لي. فتحت الخط وختيت التلفون في المقعد التاني
=بووووووص
_يامن. ي جن اها ي زول نحنا وصلنا اديني موقعك جاي عليك والباقين ح ينزلوا المعسكر ٠٠
حبابكم نورتو ياخ
ووالله كنت طالع مكان كدا لكن بقابلك وبعدين بشوف موضوعي
وتعالي على البحر ف قهوة جنبوا. ح تلقاني فيها
_تمام يلا سلام
قفلت الخط وغيرت طريقي على البحر وصلت بعد ربع ساعة. وقفت العربية ونزلت. على القهوة راس. المكان مهيئ كان وفي كل مكان بتلقى اتنين بنبر وفي نصهم طربيزة صغيرة. طبعا. طولت من يامن شديد يمكن لي عشرة سنة م شفتوا فعشان كدا متلهف لي شوفتو عديل ياخ دا صديق الدراسه طلعت تلفوني عشان اكسر بيهو الزمن لحدي م يجي واشوف الحاصل شنو. فتحت الشبكة بس اتفاجات بي خدمتي انتهت رجعت التلفون في جيبي وبعد ساعه كاملة حتى شفت عربية يامن وهي بتقيف قدامي
نزل وجا على٠٠٠
وقفت على حيلي وضحكت٠٠٠
=اوووووو ود الجبل
_اخبارك ي وحش
واتسالمنا سلام حار٠٠٠
اتفضل اتفضل.
قعدنا في البنابر وحرفيا كنت فرحان شديد ب شوفتوا
_شنو ي يزول عجزت كدا
=ههههه موش ي تميم عجزت وم أنجزت. صحبك دخل التلاتين خلاص ولسه م شاف قرة عينه
=هه انت لسه في موضوع قرة عينك ي فردة
_كيف ي زول دي أهم حاجه في الحياة كمان . واها قلت لي الخبر شنو تميم
=والله الحمدلله ي يامن ماشي الحال جرى بس لكن ع قولك بعدا الواحد يشوف موضوع قرة عينه ب وين
ههههه والله امرك يحير ب مان. . وتتذكر زمن كنا طلبة في الكلية قديتنا ب موضوع العرس٠٠
=والله ي صحبي كل شي ب زمنو واخوك كان لسه م لقي. نصو التاني
_اوووووو لسه وافهم انو يعني هسي خلاص لقيت نصك التاني!!
=ضحكت : م تركز
-خلاص م ح اركز اها الاخبار شنو تاني بالله
=والله الحمدلله
فجأة تلفون يامن اتصل...
_ثواني ي تميم
=على راحتك
طلعوا من جيبوا وقال لي دا اخوي مصعب . فتح الخط وقال اخ تلفوني دا كعب إلا افتح مكبر الصوت فتحوا وقال _ي هلا مصعب
=اهلين يامن اخبارك
_تمام الحمدلله
= اسمعني هسي كنت بتكلم مع الوالدة وقالت لي انو انت
طلعت
_اي والله طلعت ٠٠ اتصل لي تميم وعندنا موضوع عايزين نحلوا٠٠
=أو تميم ماشاء الله اخبارو شنو
_طيب الحمدلله. قاعد جنبي.
سلم لي عليهو عليك الله يوصل ان شاء الله
ابتسمت وقلت ليو الله يسلموا وبلغوا سلامي
قال ليو
_سلم علىك تميم . ٠٠
=الله يسلموا ي رب
=المهم اسمعني ي يامن
الليله لقيت عمك الوسخ دا في اثيوبيا
كل تفاصيل وش يامن اتغيرت
قال ليو...
=اها والحاصل؟؟
ياخ الله لاكسبوا خير ي يامن.
اتخيل بس عمل شنو
عرس لي اختنا فاطمه. وا أداها لي واحد مريض نفسي عديل انت عارف ي يامن لو م خالك انا كان قتلت الاسمو حسن دا. المهم حسب كلامو
فاطمه حاليا في نفس المنطقه الانت فيها وانتي هسي فتشها لحدي م اركب واجي وكلمت مدثر برضو جاي عليك.
يامن كان ساكت ومصدوم ٠٠٠
قال ليو اختي كويسه صح؟
= والله م عارف هي حاليا كيف بس ان شاء الله تكون كويسه وحسب الكلام السمعتوا من مرت عمي كلام قاسي شديد
قال ليو طيب وصف ليك البيت وين بالضبط؟
قال ليو اي وصف لي
=البيت في المنطقه الفلانيه جنب محطة النيل للبترول
طبعا انا كنت شبه مستوعب أو مصدم القعد يتكلموا عنها تفاصيلها نفس تفاصيل فاطمه
يامن بعد م قفل الخط مسح وشو بعصبيه وقال لي
انت عارف ي تميم عندي اختي وامي وابوي ادوها لي عمي واسمو حسن وعمي دا مجنون رسمي وبيخاف من المجتمع اكتر من ربنا. واختي شالها وعمرها يوم يعني هي حاليا شايفاهم ديل أهلها وم بتعرفنا ولا حصل شافتنا ٠٠
قلبي بقي يضرب ٠٠
واصل كلامو وقال اختي اسمها فاطمه وحاليا اخوي ح يرسل لي صورتها وشال الصورة من مرت عمي ٠٠
طبعا كنت لسه م مصدق وقعد احاول استوعب هل هي فاطمه زاتها؟
فجأة نزلت ليهو رسالة في الواتس فتحها وطوالي دموعو نزلو وفي نفس اللحظه بقي يضحك. وهو بيعاين في الصورة. اتلفت على وقال عاين ب تشبهني كيف ي تميم وقلب التلفون على عاينت للصورة وفعلا كانت دي فاطمه زاتها
طوالي وقفت على حيلي وقلت ليو فاطمه طلعت اختك ي يامن؟ ٠٠٠
عاين لي ب استغراب وقال لي بتعرفها؟؟ قلت ليو اي
واقعد عشان احكي ليك حتى انا مصدوم زيك
قعد وهو مخلوع.
قلت ليو اسمع ي يامن الكلام الح تسمعوا ح يكون صعب عليك فانا عايزك تكون حكيم وواعي
قال لي تمام
بديت احكي ليو من الألف للياء وكيف عرفت فاطمه وقصة المكالمة الغلط وقصة محمود وانو هو حاول يضبـ.ـحها حكيت ليهو كل حاجه بالتفصيل ٠٠
ضغط على راسو ووجه نظرو في الأرض. وكنت شايف البركان القام فيهو.حاول يهدأ بس م قدر. هزا راسو بقوة بس برضو م قدر. عاين لي وعيونو حمر زي الدم وقال لي ممكن توديني لي اختي ي تميم ومحمود دا عليك الله ماف زول يهبشوا لحدي م ألم فيهو انا قلت ليو تمام وارح
قمنا واتحركنا وكل زول ركب عربيتوا عشان نمشي الداخليه ويشوف فاطمه ٠٠٠
يتبع..
الفصل الثالث عشر من هنا