رواية ورقة نجاة الفصل العاشر 10 بقلم حميده عبدالحميد
فتح باب العربية ونزل. وفي نفس الوقت كان بيحاول يستوعب ويستعيد. انفاسوا. نزلت ب وراهو وقلت ليو م كان لازم اوريك بس حسيت انو لازم تعرف وحتى انا انصدمت لمن سمعت الكلام دا
مسح وشو بتوتر. وسند نفسوا في جدار العربية. غمض عيونو ل ثواني وبعدها فتحهم. ودموعو نزلوا لاول مرة اشوفو مكسور كدا حسيت بتأنيب الضمير. عشان كلمتوا.حصلت لحظة صمت لمدة دقائق وبعدها قال لي فاطمه قلت ليو نعم. قال لي حاليا ح نركز في موضوع الطلاق وبعدين ح اسمع منك كل شي سمعتي بخصوص اخوي قلت ليو تمام رجعنا. وركبنا العربية تاني واتحركنا وطول الطريق كان. مثبت نظرو في الشارع وصلنا المحكمه واتوجهنا للقاضي طوالي وبعد ٥ دقائق استئنف الجلسه . حكيت للقاضي ب اي شي وتميم اثبت ليهو. اي حرف قلتوا.ليهو قال لي بعد اسبوع ان شاء الله ح تكوني حُرة وح تتطلقي منو فرحت شديد. وحسيت ب انفاسي استقرت واخيرآ
وأخيرا ح ارتاح من محمود واسرة محمود طلعنا من المحكمه. وكنت ح اطير من السعادة تميم إبتسم وقال لي مبروك مقدما وبعدها ضحك وقال سبحان الله الطلاق بقو يباركو ليهو٠٠
قلت ليو حال الدنيا ولله الحمد وشكرا ليك ي تميم بجد م قصرت معاي وربنا يجزيك كل خير ياريت لو كل الرجال كانو زيك م كان في مرة عاشت حزينة. اكتفي ب انو يقول لي ولو دا الواجب وواصل كلامو وقال المهم لازم تحكي لي بالقصه السمعتيها عن اخوي قلت ليو تمام. قال لي نمشي البحر وهو قريب من هنا قلت ليو طيب اتحركنا تجاه البحر بعد ٧ دقيقه ه وصلنا البحر . كان هادئ شديد والامواج بتمشي وتجي. والشمس كانت شبه ح تغرب خلاص.
تميم قعد في صخرة كبيرة وقال لي اها احكي٠٠٠
شلت نفس عميق وقلت ليو بعد م طلعت من المستشفى مشيت بيت محمود ويلي هو بيتي عشان عندي قروش كان لازم اشيلها من هناك . اها بعد م شلتها. مشيت العريشه وكنت عايزة اشيل كم عباية وفي اللحظه دي جا ابو محمود ومعاهو نفرين. النفر التاني كان اخو والتالت دا م عرفتوا بس ظاهر عليهو انو عندو منصب في الحكومه
كان مركز مع كل حرف كنت بقولو ليهو.
قال لي سكتي مالك اها واصلي
وجهت نظري اتجاه البحر وواصلت كلامي وقلت ليو
في واحد منهم اتكلم وقال انو انت عايز تبقى ليهم مشكلة زي اخوك ولمن اخوك. بقي يتفرعن ويشوف نفسو عليهم اتخلصوا منو. بس كيف م عارفه والكان سبب في موتو واحد اسمو موسى ٠٠٠ ودا كلو السمعتوا٠٠
نزل راسو تحت ويمكن كان بيكبي٠٠٠ بعدها قام علي حيلوا. وقال لي تيم اخوي التؤوم.وكان صادق ومخلص في شغلوا. وم بيرضي بالظلم وبيحترم المرأة اكتر مني ٠٠٠ وقبل سنتين بالضبط. جاهم خبر مروجين وتجار البشر. على الحدود فشال جيشوا واتحركو عشان يدقو قاعدتهم هناك. بعد يومين بالضبط. سمعنا. انو.تم اغتيالهم وزرعوا ليهم الغام في الطريق
وفي النهايه طلع دا موسى. ااااااخ ي موسي اخ ي موسى اااااااااخ ي موسى . ح اعمل فيك عمايل انت وكل زول وراك وكل زول كان سبب في انو اخسر اخوي
. قلت ليه ربنا يرحموا ويغفرله
قال امين وبعدها عاين لي وقال تقريبا. اهل محمود ليهم علاقه ب حاجه كبيرة بتحصل هنا بس انا م قادر احددها هي شنو.
سرحت مسافه وقلت ليو . هم عندهم القروش والعربات بس نهائي م شفت ليهم شغل ثابت وبعدها طق اتذكرت. قلت ليو في وحدة اسمها ياسمين جابها محمود وقال مرتو وكانت ساكنه معاي في البيت وقعد تتعاطى وم عارفه احتمال عندها علاقه بيهم
قال لي مرتو؟ قلت ليو اي. ضحك ضحكه غريبه شديد وقال لي بجد انتي بريئه ومسكينه ي فاطمه. غشاك وقال ليك مرتو. دي وحدة جابها ساي وقاعدة معاهو بالحرام. للأسف الشديد. المهم انا لازم ألم في ياسمين دي. وشكلوا جيتي للمنطقه دي ما ح تكون ساي والحاجات دي كلها حصلت لي حاجه وحده عشان اعرف كل حاجه. عنها.
عاين بجميع الاتجاهات وقال لي الولايه دي عندها سر كبير ي فاطمه٠٠٠٠ صدقيني انا متأكد بسبب أسرة محمود حيكون في الف شاب وشابة ضاعوا وانا متأكد وواثق انو بتحصل هنا حاجات مقرفة شديد وعمايل كعبة ٠٠٠٠ اخ ي موسى. م يبقى اسمي تميم لو م خليتك. تشرب من دمك وتتمني الموت وم ح تلقى
ولحظيا سحب تلفونو من جيبوا. وم عارفه اتصل ل منو مشي مني مسافة وبعدها جا راجع وقال لي
اتصلت لي عز الدين وقلت ليو يتحرك ويجي هنا واتصلت لي كم نفر في الجيش برضو وح يجو خلال اسبوعين وح اقلب المنطقه دي فوق وتحت ي فاطمه فوق وتحت ح اعمل فيها عمايل عشان م اعرف قعد يحصل هنا شنو ٠٠
أول مرة اشوفو كدا. كان غضبان شديد بعد م سمع قصة اخوهو تيم. قلت ليو انا بقدر اساعدك عاين لي ب استفهام وقال تساعديني؟ قلت ليو اي ح ارجع لي أسرة محمود وح اقعد معاهم وح اكون زي الجاسوسه وح اعرف هم بيعملوا في شنو
ضحك وقال مستحيل اخليك ترجعي ليهم تاني ٠٠ عايزة اتكلم قال لي بجدية وحزم. فاطمه طلعي الفكرة دي من راسك. انا كل همي انو. تتطلقي من العولايق دا وتعيشي حياتك وعايز اسالك سؤال قلت ليو اتفضل قال لي قريتي المدرسة لحدي كم؟
قلت ليو امتحنت تالته ثانوي وبعدها ابوي طلعني منها قال لي حلو شديد. طيب انا ح اقدم ليك منحه في تركيا تمشي هناك وتقري وربنا ح يفتحها عليك ان شاء الله
عيوني رقرقو واتملوا دموع. كنت م مصدقة الكلام السمعتوا
قلت ليو ح امشي واقرا في تركيا.؟ قال لي ايوا قلت ليو بس كيف انا م عندي قروش ضحك وقال م عليك بالقروش المهم انتي جهزي نفسك وبس ولمن تطلقي من الشي داك امورك ح توضح ان شاء الله.
عايزة اشكرو قال لي عارفك عايزة تقولي شنو ماف داعي ي فاطمه المهم. حاليا ح تمشي وين لانو الليل ح ينزل بعد شويه عندك اهل اقارب صحبات وكدا؟؟
سرحت مسافة وحاولت اتذكر اذا انا بعرف زول بس للاسف طلعت م بعرف زول قلت ليو م عندي معارف ناس امي وطفشوا مني. اتأثر شديد قال لي انتي عارفه انو أهلك بعدين ح يندموا أشد الندم عشان م وقفوا معاك والدنيا دي دواره ابتسمت بقهر وقلت ليو م ظنيت قال لي ع العموم في داخليه. بتاعت بنات انا بعرفها وبعرف المشرفين الماسكنها ف ح تمشي وتقعدي هناك لحدي م تتطلقي وتسافري وح وانا شايف انو هي احسن وأمن ليك قلت ليو تمام. اتحركنا. من قدام البحر واتوجهنا على العربية وقبل افتح الباب شفت تميم واقف ومتحير قلت ليو خي مالك؟ قال فقدت شارة الوحدة حقتي قلت ليو ودي شنو قال لي حاجه بتتعلق في الكتف بتوضح الوحدة أو القوة البينتمي ليها العسكري ٠٠٠ واحتمال اكون رميتها هناك. في القسم ٠٠المهم م مشكلة. اركبي
ركبت واتحركنا وصلني الداخليه واتكلم مع البواب. وتاني شكلوا اداهو رقم الزول الماسك الداخليه اتكلم معاهو مسافه وقال لي اتفضلي. دخلت جوا وهو فات. ٠٠٠ ودوني غرفة فيها تلاته طالبه وانا رابعتهم سلمت عليهم وقعدت في سريري منظرهم كان م عاجبني. وشميت ريحه غريبه جوا الغرفه ريحة سجاير ولا شنو م عارفه المهم حاجه كدا م مفهومه بس م اشتغلت بالموضوع٠٠ قلت ليهم عايزة اصلي عاينوا لي وضحكوا قلت ليهم مالكم في شي يضحك ردت لي وحدة وقالت لا حبيبه ماف شي يصحك المهم اطلعي برا وهناك في وضايه امشي اتوضي منها وشوفي ليك صلاية من باقي الغرف لانو نحنا م عندنا صلايه قلت ليها تمام
طلعت ووقفت في الحوش وقلت في سري معقولة م عندهم مصلابع ماقاعدات يصلوا ولا شنو هزيت راسي ومشيت ع الوضايه وقعدت فتحت الماسورة واتذكرت كلام تميم وانو ح اطلع برا واقرا ابتسمت وبديت اتوضا ٠٠ بس كنت م مرتاحه مع القعاد مع البنات ديل. وماف سرير فاضي غير غرفتهم ٠٠٠ اتوكلت على الله خلصت وضو ومشيت غرفة تانيه ضربت ليهم الباب جاتني وحدة طالعة سلمت عليها وقلت ليها. بلقى عندكم مصلاية قالت لي ايوا بتلقى دخلت جوا وجات طالعة بيها قالت لي انتي جديدة هنا ولاشو قلت ليها اي جيت قبل شويه قالت لي قاعدة في ياتو غرفه قلت ليها رقم ٨ تفاصيل وشها كلها اتغيرت لمن سمعت ب اسم الغرفه قالت لي اعملي حسابك البنات القاعدة معاهم ديل بيتعاطوا مخدر الآيس وكمان بيعملوا حاجات كعبة شديد قلت ليها طيب م تكلموا المشرفه قالت بدري ماف زول بيقدر. ولسه ف أكعب منهم. المهم م ءأخرك يلا امشي وصلي. قلت ليها تمام هي اتحركت من قدامها وانا مترددة ومتوترة شديد لحدي م وصلت. لقيتهم قاعدات يتونسو اول م شافوني سكتوا وبقو يعاينوا لي بنظرات مبهمه مثلت نفسي زي الما شايفاهم فرشت مصلايتي وكبرت. صليت العصر والمغرب وقعدت اسبح ومكان فرشت المصلاية كان في مشترك في الأرض قاعد جنب المصلايه وفيهو اتنين تلفون موصلين في الشاحن. طبعا البنات رجعوا لونستهَم عادي فقلت اشوف الساعة كم. عشان لو زمن العشا قرب اكون قاعدة لحدي م يأذن واصلي فتحت اول تلفون كان جنبي واتصدمت لمن شفت صورة الخلفية حقت التلفون كانت عبارة عن وحدة من البنات القاعدة معاهم ومعاها ياسمين ومتصورين جنب البحر قفلت التلفون سريع وقلبي بقي يضرب ٠٠٠٠
في جانب آخر ٠٠٠٠
وقف العربية جنب الباب ونزل بكل قهر لز الباب بقوة ودخل بخطوات متسارعه. لحدي م دخل جوه الصالة قعد في الكرسي وبقي يحرك رجولو بتوتر والغضب عامي بصيرتو
ردت مرتو بكل لهفة وقالت ٠٠
اها ي عباس بشر. المشردة الماعندها وليان دي سحبت الشكوي صح ومروان وين؟
عاين ليها بطرف عينو ومن الغضب قام فوق وشات الطربيزة برجلوا وقال ٠٠٠
تميم. اااااااخ منك . ح تشوف ي كلب. وم يبقى اسمي عباس لو م ندمتك علي تحشرك دا انا. تخلي ولدي يتحكم بالإعدام
ختت يدها في خشمها وب اخر حِسسس
وووبعلييي ي عباس. دا كلام شنو وااااي واااي وااااي انا. الليله سجمك ي سعاد. ولدك حكمو. بالإعدام
بناتها مسكوها ووقلبوا البيت بيت بكا ٠٠٠٠
اتنهد وقال بس م تخافوا. اتفقت مع كم نفر. وح نطلعوا يعني ح نهربوا من السجن وح نخلي يسافر اي دولة المهم م ينعدم
شهقت وقالت ليو وين الواسطات العندنا. ي عباس معقوله م قادرين تتطلعوا؟ قال ليها للأسف حاليا الواسطات فشلت فشل ذريع عشان تميم واقف في القصه دي واموووت واعرف البت الساقطه دي عرفت تميم من وين. الله لا جاب باقيها ياخ. دخلتنا في مشكلة كبيرة
واثناء م هو بيتكلم تلفونو رّن
طلعوا من جيب الجلابيه فتح الخط وقال
.
الوووووووو
ي هلا
اها الحاصل؟؟
البضاعة. وصلت ي عباس. شوف لينا موضوع التفتيش دا.
م عليك ح تلقى متوكل هناك وح يمررك . واهم شي تديهو حاجه. وقول ليو جاي من طرف عباس
تمام يلا سلام
قفل الخط بتو قالت ليو لسه مواصلين في الشغلة دي ابوي. قال ليها ودايرة تاكلي وتشربي من وين طيب الشغلة دي انتي عايشه أميرة بسببها ؟
إدخلت امها وقالت خلوني من دا كلو وشوفي لي موضوعي حشاي وولدي ي الله ي محمود. الجاتك تختاك
قال ليها م تخافي ي مرا و زي م قلت ليك ح نطلعوا بالدس. وبنسبة ل الاسمو تميم انا بعرف اتصرف معاهو كيف و
طلع شارة الوحدة من جيبوا عاين ليها وضحك بخباثه وقال.شايفه دي ي سعاد قالت ليو اها دي شارة قال ليها طيب بتعرفي ناس جنت فجأة صح؟ قالت ليو يعني٠٠٠
قال ليها ايوا انتي فهمتيني ويلا امشي وجيبي لي قطعة من ملابس فاطمه برضو اصلا هي كدا كدا. تاني م ح ترجع لي محمود ولا ح نستفيد منها في شي بس مستحيل تعيش حياتها طبيعيه. بتو إدخلت وقالت يعني ح تعمل ليهم عمل ي ابوي قال ليها بالضبط
سعاد اتنفخت وقالت احسن شي. وجري على العريشه وجات راجعة وهي شايلة طرحه فاطمه في يدها. قالت ليو هاك دي حقتها شالها منها وقال ليها ارح معاي وجودك مهم لبست توبها وطلعوا من البيت ركبوا العربية واتحركوا٠٠
يتبع.....
الفصل الحادي عشر من هنا