رواية ظل القدر الفصل الواحد والثلاثون 31 والأخير بقلم رواء هادي

رواية ظل القدر الفصل الواحد والثلاثون 31 والأخير بقلم رواء هادي

بهاللحظة أمي رشا دخلت، سمعت الهوسة، من كلنالها، وكعت على الكرسي تبجي..

رشا: يمة ولاية.. سامحيني.. أنا خوفتج، أنا

كسرت واهسج.. سامحيني يمة..

رحت حضنتها، لأول مرة أحضنها وأنا أحس أنا أقوى منها..

ولاية: مسامحتج ماما..

من ذاك اليوم، حسن صار واحد ثاني.. صار ما يخليني أكوم من الفراش..

حسن: لا تكومين، أنا أسوي الريوك، أنتِ ارتاحي..

ولاية: حسن أنا حامل مو مريضة..

حسن: أنتِ حامل بولي العهد مال حسن، تنامين وتكومين على كيفي..

يجي من الدوام يجيبلي رمان يجيبلي لبن، يجيبلي كلشي بالسوك ويكعد يحجي وية بطني..

حسن: هلا بابنيتي.. هلا بحبيبه أبوها.. لاتتعبين

أمج تره أمج بعدها صغيرة..

وأنا أضحك وأبجي بنفس الوكت..

ولاية: شلون عرفت بنية؟

حسن: أنا أدري بنية. مثل امها 

كل يوم اسم جديد..

فطيم ويقين يومية يمي، يعلموني شلون أنام، شلون آكل، يقين تجيب محمد يبوس

بطني ويكول "بيبي"..

وحسين من يطب للبيت يصيح..

حسين: وينها مرت أخوي الحامل؟ وينها أم ريمي؟ جيبوها ابوسها لبطنها..

كمت أستحي منهم كلهم..

بس بالليل.. من نبقى وحدنا أنا وحسن بالغرفة.. يخلي راسه على بطني ويسمع..

حسن: ولاية.. تتذكرين من كلتيلي 

تزوج وشوف حياتك؟

ولاية: لا تذكرني فدوة..

حسن: هسه شفتي حياتي؟ حياتي أنتِ وهذا الجنين أنتِ جنتي تكولين أنا ما أخلف، شوفي الله شلون عوضنا سنوات انتظار، بس عوضه جبير..

أمسح على شعره..

ولاية: حسن أنا خايفة..

حسن: من شنو بعد؟

ولاية: خايفة أخسره..

حضني بقوة..

حسن: ما تخسريه، أنا وياج، وامي نهاد وياج، ورب العالمين وياج، نامي هسه، أنتِ وريمي ناموا..

أنام على صدره، وإيده على بطني، ولأول مرة من سنين، أنام وأنا ما خايفة أنا ولاية اللي جانوا يكولون ما تخلف اللي سنين إيدي فارغة..

هسه بطني بيه روح روح من حسن حبيبي وزوجي وابن خالي وكل دنيتي وظل القدر اللي جان يركض ورانا ويفرقنا هسه هو نفسه جاب 

النا هدية.. هدية من السما....

، ماما نهاد ما خلتني بعد أنام بغرفتي الفوك

، نزلتني يمها بالقاط الثاني، كالت ..

نهاد: تنزلين يمي، أنا أداريج، أنا أطبخلج، أنا أغسللج، أنتِ بعدج بنية صغيرة وما تعرفين، وأنا أخاف عليج وعلى بطنج

حسن ما عارض، بالعكس، كال ...

حسن: خوش، يم أمي أمن، أنا مرات بالدوام أسبوع، أبقى بالي مرتاح..

عبدالله وحسن نزلوا اغراضي يم بيبي أنام صبح تكعد قبلي، تسويلي حليب حار وبيض،

وتكلي كلي، البيبي يريد أكل..

صرت بنيتها المدللة أكثر من قبل..

دخلت بالشهر السادس بطني شوية بينت، رحت أنا وماما نهاد وحسن للسونار، الدكتورة خلت الجهاز على بطني، وأنا لازمة إيد ماما نهاد وأرجف..

الدكتورة: مبروك.. بنية..

ما صدكت.. شهكت وحطيت إيدي على حلگي..

ولاية: بنية؟ والله بنية؟

الدكتورة: إي بنية حلوة، تشبه أمها..

طفرت من الفرحة، دموعي نزلت وحدها، باوعت لماما نهاد عيونها تلمع، لزمت راسي باستني

من كصتي كدام الدكتورة...

وراها كتبت إلي علاج طلعنا كلت الحسن بي بنية طار من الفرحة وحضني خارج العيادة 

بالشارع شكد عيب مناك العالم ...

حسن: بنية؟ بنية ولاية؟ الله.. بنية تشبهج؟

أنا أموت على البنات..

ولاية : هههه 

بعد عني فرحان دخلنا للصيدلية اخذنه العلاج ونزلنه لسوك أخذ إلي اغراض وحلويات وجنة طايرين، طول الطريق حسن يحجي وية بطني..

حسن: هلا ببنية أبوها.. هلا بعيون أبوها..

من طبينا للبيت، حسين واكف 

بالباب، شافنه نضحك....

حسين: بشروا ولد بنية؟

ولاية: بنية..

حسين طفر..

حسين: بنييية؟ الله هاي جنتي هاي مرت محمد اجتي محمد وينه؟ لك يقين جيبي 

محمد اجت عروسته

عبدالله جان واكف يضحك، دفعه..

عبدالله: ولك أنجب، مانطيها لابنك، هاي أنا آخذها لابني، أنا أولى، أنا عمها الصغيرون

حسين: يا ابنك؟ أنتَ بعدك ما متزوج،

أنا عندي ولد جاهز، هاي إله..

وتعاركوا صدك! واحد يجر الثاني من تراكه بالحوش..

عبدالله: والله إلا لابني

حسين: والله إلا لمحمد

إجه خالو علي من الحقل، شافهم 

متعاركين، صاح بيهم.

علي: ولكم انجبووا هي بعدها ببطن أمها ومتعاركين عليها؟ استحوا! بنية حسن وولاية بعدها ما شافت الدنيا وتحجون بالزلم؟ ولكم عيب عليكم عيبب

سكتوا اثنينهم مثل الجهال، وأنا أضحك و بطني يوجعني من الضحك مرت الأيام، وأنا كل يوم بطني تكبر، وحسن كل يوم يحبني أكثر..

إجه يوم الولادة.. بالليل، وجع خفيف، بعدين قوي، حسن ما نام، شالني ركض للمستشفى، ماما نهاد، ماما رشا هم إجت تركض..

ساعتين.. وطلع صوت.. صوت صغير.. صرخة..

الممرضة: بنية.. مثل الوردة..

جابوها حطوها على صدري، صغيرة، شعرها أسود، خشمها مثل خشم صغيرون أحمر بجيت

.. بجيت بصوت عالي..

ولاية: بنيتي.. هاي بنيتي 

وراها اخذوها مني من طلعت من صالة الولادة وشفت الكل وشفت الخوف عليّ بعيون حسن وبعيون الكل وبنيتي ماما نهاد

شايلتها كمت أبجي بعد كل هذاك التعب الله سبحانه وتعالى رزقني بابنية مثل القمر مرت

الأيام والكل حبها حب مو طبيعي..

حسين يموت عليها، يجي من الدوام ما يروح لجهاله، يجي يم ريمي، يشيلها ويفتر بيها بالحوش ويغني إلها عبدالله نهار كله شايلها بحضنه، 

يكول "هاي بنتي أنا"..

خالو علي وبيبي وماما نهاد وحسن حسن ما يفاركها ثانية وحدة من يجي من الدوام،

ينام وهي على صدره..

كبرت ريمي تمشي شوية وتوكع، وتضحك، ومتعلقة بحسن مو شلون ما جان، إذا حسن طلع للباب تبجي، إلا يرجع يشيلها..وأنا..

أنا بنفس الدوخة رجعت.. نفس لعبان النفس مال الصبح، الريحة العطر ما أتحملها ضحكت 

بيني وبين روحي أكيد حامل ...

رحت ليقين أخذت منها اختبار مال حمل وسويته وطلعت حامل فرحت كلش أول شخص

كلت إله هو ماما نهاد ...

نهاد: يمة ولاية الله عوضج الله عوض صبرج

بعدين رحت لحسن، جان كاعد وريمي يمه

كاعدة تلعب بالملاعيب 

ولاية: حسن..

حسن: ها حبيبتي؟

ولاية: تتذكر من جنت تكول ما أريد خلفة؟

ضحك..

حسن: إي أتذكر..

ولاية: أنا حامل مرة ثانية..

بسرعة كام وكف كدامي مصدوم ...

حسن: ولاية صدك تحجين ؟

ولاية: إي والله..

طار من الفرحة، شالني بحضنه....

حسن: ولاية أحبج 

ولاية: امممم مو تكول ماريد جهال ههههه

حسن: أموت عليج أم جهالي هههههههه

حضني ويضحك بصوت عالي، وريمي كاعدة بالكاع تباوع علينه شلون حاضنين بعض، وتضحك على واهسنه خطية ما تعرف راح يجيها

أخو لو أخت يشاركها بـ بابا..

بهالفترة حسين عزل بيته، بنى بيته وحده، كلش فرحنا إله، لأن كون نفسه، وعبدالله هم.. بنية تحبه، وما مخلية أحد لما مراسلته، تريده، هو تخبل من عرف هيج مسوية..

عبدالله: ولكم هي كوه؟ ما أريدها ما أريد أزوج.. عمي ما أزوج إلا يصير عمري ٣٤ سنة..

وإحنا خربانين ضحك عليه..

خالو علي سوى عزيمة جبيرة، عزم الكل.. حتى جنات ومريم وماما رشا وزوجها عمو سامر

وبيت خالو عبدالله، كلهم انجمعوا..

ورا العشة ضحكنه، حسين وحسن يتعاركون كل شوي، على ريمي ومحمد ماما نهاد طلعت بره للحوش، أنا لحكتها، لكيتها كاعدة وحدها 

على الكرسي وتبجي 

ولاية: ماما شبيج تبجين؟

مسحت دموعها وضحكت..

نهاد: أبجي على النعمة اللي الله انطاني إياها يمة ولاية من أتذكر حياتي شلون جانت جنت أكول مستحيل أطلع من هذيج المنطقة وراح أندفن بيها وهسه حياتي وين صارت تزوجت إنسان يحبني وأمه تموت عليّ وخلفت وخلفتي خلفت وعايشة حياة كل إنسان يحلم بيها..

ولاية: إي ماما الله عوضج وعوضني

نهاد : الحمدلله والشكر. 

وبقينا كاعدين بالحوش، نسمع ضحكة حسن وحسين وعبدالله جوه والقمر مكتمل فوك راسنه صاير نباوع على القمر ونضحك ..

.

هسة أنا بحضني ريمي وببطني طفل ثاني بعده جاي بالطريق، يحمل وياه بداية جديدة وحياة جديدة أبتسمت وتذكرت كل شي مر علينه كل دمعة كل خوف كل ليلة ما عرفنه بيها شنو راح يصير باجر، وكل وجع حسبناه ما راح ينتهي.

بس انتهى...

والحمدلله، خلص كل التعب..

مو لأن الحياة صارت خالية من الوجع، وإنما لأن الله عوضنا لدرجة نسينه شكد تعبنه حتى نوصل لهاليوم.رفعت عيوني للسماء، وكلت من گلبي ..

ولاية : الحمدلله على كل قدر وجعنه وعلى

كل صبر خلانه نوصل لهناه

يمكن الحكاية انتهت...

بس حياتنا بعدها مستمرة، وبين إيدينه حب جديد، وبطريقي طفل ثاني، وبگلبي يقين واحد...

بعد كل عسر أكو فرج يستاهل كل هذا الصبر

#النهاية 

انتهت حكاية «ظل القدر»...

مو لأن الوجع اختفى،

ولا لأن كل الخسارات انمحت...

لأن هم تعلموا بالنهاية إن بعض الأقدار 

ما تجي حتى تكسرنا...

تجي حتى تغيرنا،...

بعد كل اللي مروا بيه،بعد كل دمعة نزلت،

وكل گلب انكسر، وكل دعوة طلعت

من گلب موجوع للسماء...

وصلوا للنهاية.

نهاية مو خالية من الوجع...

بس جانت مليانة رضا.

لأن مهما جان القدر قاسي،

ومهما أخذ من عدنا،

يبقى بالنهاية...

قدر الله.

وهنا أكدر أكول بكل حب ...

انتهت حكاية «ظل القدر»...

مو لأن الحكايات تنتهي فعلًا،

لأن بعض الحكايات تبقى عايشة بداخلنه

حتى بعد ما نوصل لآخر سطر...

شكرًا لكل شخص عاش وياهم كل لحظةضحك وياهم بجى وياهم زعل منهم،حبهم وانتظر

نهايتهم مثل ما لو جان واحد منهم

شكرًا لكل قلب ظل يقرأ،وكل عين وصلت لهنا وكل شخص ترك جزء من قلبه بين سطور 

هالرواية يمكن اليوم خلصت 

الصفحات بس حكايتهم راح تبقى

بذاكرة كل شخص حبهم....

                        تمت بحمد الله 🤍

            لقراءة جميع فصول الرواية من هنا

تعديل المقال