شيكا: بعد ما يخلصو ابعتي بيهم الولا اللقط
ام كرم: طاب ما اروح انا اصل الصراحه المهندسه تقي ايديها فرطه وبتراضيني
شيكا: خلاص روحي انتي طيبه وتستاهلي كل خير مش الحربايه ام صلاح
ام كرم: ربنا يكرمك ويستر عرضك ويراضيكي
شيكا: الله يكرمك روحي بقي
لتتركها شيكا وتصعد الي شقه منجي
شيكا: ولا يا سقط غيرله هدومه وانا هعمله لقمه يتقوت بيها شقيان ومتغرب
السقط: حاضر يا معلمه بس ايه ده تلاجته فاضيه مع اني اسمع يعني أن الجماعة المدرسين دول بيقبضو بالهبل بس شكله بخيل
شيكا: وانته مالك تفتح تلاجته ليه متبقاش بارد
السقط: طاب مافيش هدوم هنا غير طقم واحد ومنقوع ف الطبق اهو
شيكا: هجيبلك طقم من بتوع الاستاذ محمد جوز اختي
السقط: ده شكله غالي عندك اوي
شيكا: اخرس
السقط: خرسنا
لتتركه شيكا وتصعد الي شقتها
نعمات: ايه اللي طلعك
شيكا: ابوسريع منه لله غرق الاستاذ منجي ورجع يا حبه عيني تعبان من المدرسه قولت اخدله طقم من عند محمد جوز اختي وأعمله شويت شوربه
نعمات: بلويه بوز شوربه يا حنينه اعمليه يا اختي أو اقولك انا هعمله حرام بردك وحداني
شيكا: حنينه يا نعومه
نعمات: معلش نعمل الخير الا قوليلي صحيح باقي كتير علي رمضان
شيكا: باقي كام يوم يعني مع اجازه نص السنه يا فرحه قلبي اختك هتيجي ف الاجازه تقضي رمضان معانا
شيكا: اه والله يا اما وحشتني اوي
نعمات: انا عارفه ايه مغربها كده
شيكا: يعني عايزاها تسيب جوزها وتقعد جنبك
نعمات: القصد انزلي شوفي اكل عيشك وانا هبقيى انزل الاكل للمحروس بتاعك
شيكا: وبعدين معاكي يعني
نعمات: خلاص سكت
لتتركها نعمات وتنزل الي الحاره لتجد سماره الحلاق يقف أمام محلها
شيكا: خير يا حلاق الغبره
سماره: طاب قوللي عواف
شيكا: عواف يا اخويا خير
سماره: عايز لحمه
شيكا: عايز اد ايه
سماره: خمسه كيلو بس ايه حاجه ملبسه كده
شيكا: وليه التبذير ده كله
سماره: اصلنا هنبعتها عند ام مشمش الفرانة ونتغدا انا والمعلم حلاوه والصبيان
شيكا: الف هنا
سماره: تسلمي يا ست البنات
شيكا: بطل سهوكه
سماره: انا بقول اللي ف قلبي
شيكا: شوف يا اخي مع انك حلاق ومحلك كله مرايات لكن سبحان الله مبتشوفش نفسك فيها ياراجل ده انته كرشك قرب يوصل الأرض
سماره: ده عز يا معلمه
شيكا: طاب خد لحمتك وهوينا اه فين الحساب
سماره: ما بين الخيرين حساب
شيكا: لاء بينهم وبعدين حسابك تقل اوي
سماره: وهو انا يعني هطير
شيكا: طاب متشتري علي ادك ايه الفجعه ديه خدلك كيلو
سماره: كيلو ايه ده ميمسحش زوري
شيكا: اه ما انته زورك عامل زي ماسوره الصرف خد واخر النهار تجيبلي اي فلوس
سماره: هبقي اشوف
وهنا يقترب منهم حلاوه
شيكا: كملت صباح ايه ده بس ياربي
حلاوه: صباحين وحته
شيكا: صباح حلاوه ولمؤاخذه هو الاستاذ منجي ماله
شيكا: صبيك يا اخويا غرقه والراجل يا عيني جاله برد باين ولا ايه
حلاوه: أصله خرع مدرس علي متفرج انا عارف البت نسمه بتي عاجبها فيه
شيكا: نعم يا اخويا
حلاوه: اه والله بتقولي قال ايه شبه احمد مظهر ف فيلم غصن الزيتون
شيكا: وبتك بقي سعاد حسني
ليضحك سماره
سماره: لاء ديه حسني نفسه
شيكا: الا صحيح يا معلم متعملها عمليه تكميم ولا قص معده
حلاوه: ليه يعني ديه بتاكل ف خير ابوها يا ما نفسي نضم القهوه علي الجزاره ونبقو واحد
شيكا: مش ختو اللحمه اتكلو علي الله بقي اصل ديه ساعه رزق وانتو واقفين ف وش المحل سادين السكه اعوذ بالله
حلاوه: كده مسير الحلو يحن
شيكا: ياله يا بابا شوفو حالكم مش عارفه انا في ايه هو الراجل عليه سكر كلهم عينهم منه بس انا لازم اعرف الوليه اللي جات معاه ديه تطلع ايه شكلها كده طالعه من فيلم قديم ولبسها عجيب اوي هو لسه في ستات بتلبس اللبس ده من أيام ستي الله يرحمها وقال ايه استاذ مانجه مانجه ف عينك
لنترك الحاره ونذهب الي المدرسه الابتدائيه
وفي فصل الأبله سنيه كانت تجلس علي الديسك وهيا تشرح
سنيه: بما أن مصر تقع ف الركن الشمالي الشرقي لقاره أفريقيا إذا فمصر
ثم تنام
ليدخل عليها المفتش ومدير المدرسه
التلاميذ: يا ابله ابله
سنيه: ايوه بما أن مصر تقع ف الركن
المفتش: ابله سنيه صباح الخير
المدير: ايه يا ابله سنيه احنا داخلين علي نصف العام وكل ما ادخل عليكي الاقيكي بتقوللي نفس الجمله
المفتش: ونايمه كمان
سنيه: اسفه اصلي عندي صداع
المدير: عندك صدام تيرم بحاله
المفتش: اتمني الزياره الجايه اجي الاقيكي صاحيه وبتشرحي للتلاميذ
سنيه: اه حاضر
ليتركها المفتش
المدير: الله يسامحك انا ممكن اتجازي بسببك
سنيه: ليه ما انا كنت بشرح واهو الجرس ضرب عن اذن حضرتك
المدير: صبرني يارب علي ما بلاني
ونترك المدرسة ونذهب الي الحاره، ففي شقه الأستاذ منجي تجلس السيده نعمات
نعمات: ايه عامل ايه يا استاذ منجي
منجي: بتعب الحمدلله
نعمات: الف حمد خد بقي اشرب شويت الشوربه دول يدفو معدتك
منجي: كتر خيرك
نعمات: الف سلامه عليك
منجي: ربنا يخليكي والله حضرتك زي امي
نعمات (بحنيه): وانته زي ابني مع اني مخلفتش صبيان
منجي: ليه بتقولي كده الست شيكا بميت راجل ماشاء الله
نعمات: انته شايفها كده
منجي: اه طبعا
نعمات: طاب كل بقي ولا يا لقط خلي بالك منه
منجي: شكرا علي الهدوم اول ما اغسل هدومي هبقي اغسلهم واطلعهم لحضرتك
---
نعمات: قوم انته بالسلامه بس الاول ياله انا طالعه اعملك حاجه سخنه، ولا يا سقط ابقي تعالي خد اليانسون
سقط: ايه الباب بيخبط
نعمات: شوف مين
ليذهب سقط ليفتح الباب ليجد نسمه بنت المعلم حلاوه
سقط: خير يا انسه
نسمه (بلهفه): استاذ منجي ماله؟ انا عرفت أنه تعبان، وسع كده خليني ادخل
سقط (ضاحك): اصبري بقا لما افتحلك الباب التاني عشان الباب ده مش هيدخلك
ليفتح لها سقط البابين علي مصرعيهم لتدخل نسمه بصعوبه
نعمات: ايه يابت حلاوه عايزه ايه
نسمه: جايه اشوف الاستاذ
نعمات: انتي عبيطه يابت ده راجل عازب، ولا كتر الحش اللي بتحشيه طفح علي مخك
نسمه: وسعي كده يا خالتي
لتدخل نسمه لتجد الطعام موضوع علي الترابيزه
نسمه: الله اكل ده انا جعانه اوي
لتبدأ ف التهام الطعام
نعمات (بتعجب): انتي جايه تأكلي اكل العيان! يخربيتك هتروحي فين تاني، ياله يا حلوه
نسمه (بهيام): الف سلامه عليك يا استاذ منجي
منجي (باستحياء): الله يسلمك
وهنا تدخل عليهم شيكا
شيكا: انتي ايه اللي طلعك هنا يا نسمه
نسمه (وفمها مملوء بالطعام): الله وانتي مالك
شيكا: وانا مالي! طاب ياله يا حلوه، الراجل عايز يرتاح ولا ايه يا أستاذ منجي
منجي: اه فعلا
نسمه: طيب ابقي اجيلك تاني
ثم تنظر إلى شيكا
نسمه: ناس رخمه اوي
نعمات: استني هاتي الاكل
نسمه: لاء انا جعانه
شيكا: وجايه تأكلي عندنا
نسمه: وايه يعني سلام بقي
شيكا: هو ايه أصله ده
ثم تنظر ل منجي
شيكا: عامل ايه دلوقت
منجي: الحمدلله
شيكا: هيا مين اللي كانت جايه معاك ديه
ليعدل منجي نظارته
منجي: ديه الأستاذه سنيه مدرسه المواد الاجتماعيه بالمدرسه
شيكا: وانا بقولك عايزه اطلعلها بطاقه، انا بسألك تبقي ايه بالنسبه لك
منجي: مجرد زميله مش اكتر
شيكا: والله انا ما عارفه هلاحق علي مين ولا مين، انا نازله
نعمات: انا عارفه هيقطعو نفسهم عليك، علي خيبه! ايه يا له يا شيكا انزلي محلك مش كل شويه تطلعي تتنططي
شيكا: ادينا نازلين
---
وهنا يرن هاتف منجي
منجي: الله ديه امي… ايوه يا اما
السيده نجيه: عامل ايه يا حبيبي
منجي: الحمدلله
نجيه: صوتك مش عاجبني
منجي: اصلي عندي شويت برد
نجيه (بخضه): الف سلامه عليك، صبحيه هاتي اخويا اطمن عليه
حسنيه: لاء انا الاول
نجيه: اخواتك عايزين يطمنو عليك وكمان في حاجه
منجي: خير يا اما
نجيه: اصل حسنيه اختك جالها عريس وعايزين ييجو، بس انا قولتلهم استنو اجازه نص السنه عشان اخوها يكون موجود
منجي: ابن مين العريس ده يا اما
نجيه: شحات ابن عباس بتاع الخضار، ناس غلابه يا ابني وعلي ادنا وشاري اختك
منجي: عباس شاب كويس بس يا اما ده شغال باليوميه
نجيه: وماله يا ابني، خدوهم فقرا يغنيكم ربنا
منجي: خلاص اللي تشوفيه يا اما، لما اجي ف الاجازه نبقي نتكلم
نجيه: خلي بالك من نفسك، وانشاء الله انا مربيه جوز بط هبقي ادبحهم اول يوم رمضان ونعزمهم، وانته بقي ابقي هاتلنا اتنين كيلو لحمه من الجزاره اللى انته ساكن عندها
منجي: منين بس يا اما، انتي عارفه كيلو اللحمه بكام، وزي ما انتي عارفه انا بقبض المرتب وبحوله عليكي، يا دوبك اللي بيفضلو معايا بيمشوني بالعافيه
نجيه: اتصرف يا ابني يعني عايزنا نتحرج قدام نسايبنا
منجي: حاضر يا اما ربنا يسهل
وكان سقط يقف خارج الغرفه، لكنه سمع المكالمه كلها
سقط: يا عيني خوجه اد الدنيا معاهوش حق اتنين كيلو لحمه، يا عيني انا لازم اقول للمعلمه وهيا طيبه وهيصعب عليها وهتديله اللحمه شكك
---
ليدخل عليه سقط
سقط: الف سلامه عليك يا استاذ، انا نازل اجيب حاجه من تحت وطالع
منجي: لاء كتر خيرك
ليتركه سقط وينزل الي الحاره ثم يذهب الي المحل
شيكا: نزلت ليه؟ الاستاذ بخير
سقط: اه بس بصراحه حصلت حاجه كده
شيكا: خير يا ولا فيه ايه
سقط: اصلي سمعت الأستاذ بيكلم الست والدته وبتقوله أن أخته جايلها عريس
شيكا: وايه يعني ربنا يستر عرض الولايا كلهم
سقط: مش ديه العباره، اصلي كان فاتح السماعه اصل تليفونه بايظ، فسمعت الست والدته بتقوله ابقي هات اتنين لحمه من الجزاره اللى انته ساكن عندها، قالها منين يا اما ما انا بحولك المرتب كله، فأمانه عليكي يا معلمه ابقي اديله لحمه حتي لو هتخصميهم مني
شيكا: كتر خيرك، انا هبقي اديله من عيوني حاضر، بس هو مسافر امته
سقط: ف الاجازه قبل رمضان بيوم
---
شيكا: طيب خير انشاء الله، اطلع انته بقي اقعد معاه
سقط: لا تعوزي حاجه
شيكا: لاء، وبعدين لو عوزت لقط موجود
وهنا تدخل عليهم ام كرم
شيكا: عملتي ايه
ام كرم: المهندسه تقي بتسلم عليكي وباعته معايا الفلوس ديه، وبتقولك عايزه بكره انشاء الله خروف يكون لباني عشان عندها عقيقه، وبتقولك عايزه طباخ يكون من طرفك
شيكا: من عيني حاضر، ده انا اطخبو وادويه لغيت عندها
ام صلاح: ايه مبعتتش معاكي اي حاجه ليا
شيكا: جري ايه يا وليه يا ام صلاح مش هتبطلي أمور الشحاته ديه
ام صلاح: جري ايه يا معلمه بتقطعي رزقي ليه الله
شيكا: الله واحد يا اختي،
ام كرم: خدي المهندسه تقي بعتتلك ٢٠٠ جنيه ديه حار ونار ف جتتك
ام صلاح: هاتي يا اختي احسن من عينها
شيكا: صدقي انتي وليه نكاره خير ده جزاتها يعني
ام صلاح: ما هي علي قلبها اد كده وبتكسب فيها يعني لو زودتهم شويه
ام كرم: اما وليه عينك فارغه صحيح شحاته وعايزه عيش فينو
ام صلاح: هو كلكم عليا
شيكا: خلصتي تنضيف السقط
ام صلاح: لسه ده كتير اوي
شيكا: يا شيخه الله اكبر ف عينك
ام صلاح: ليه يعني أنا عيني بارده بس كت قاصداكي ف حتت لحمه يعني لما اروح اشوحها للعيال
شيكا: عشان خاطر عيالك بس، لكن انتي خساره ف جتتك، وانتي يا ام كرم ابقي خوديلك حتت لحمه لعيالك
ام كرم (بعزه نفس): لاء يا معلمه لما اعوز لحمه هشتري بفلوسي، ما انا بكسب الحمدالله انا مبحبش اعيش علي قفا حد ربنا يغنيها من عنده
ام صلاح: يا وليه يا عبيطه طاب خوديها واديهالي
ام كرم: انتي ايه ارحمي نفسك شويه
شيكا: بقولك يا ام كرم تقي مقالتش عايزه الخروف أمته
ام كرم: بتقولك بعد يومين
ام صلاح: لكن هيا هتعوزه لمين ديه مش متجوزه
ام كرم: لاء ما انا هقولك، اصل في صنايعي عندها مراته خلفت وجابت واد فهي قالت هتدبحله خروف علي حسابها وأبوه هيدبح خروف
ام صلاح (بطمع): اهي هيا ديه الشغلانات وله بلاش خروف بحاله وشوف بقي نقطته بكام
شيكا: مش عاجبك المحل مفتح من كل ناحيه مع الفين سلامه
ام صلاح (بخوف): مش قصدي
ام كرم: حقك عليا انا يا معلمه معلش أصلها غشيمه سامحيها
شيكا: خلاص عربيه المجزر جايه استلمو اللحمه وانا طالعه اريح شويه راسي وجعاني
لتتركهم شيكا وفي طريقها لمنزلها الذي يقع بعد محلاتها بثلاثة بيوت من الناحيه المقابله
---
لتجد أن السيدتان نعناعه وشفاعه يجلسان امام منزل نعناعه، وإمامهم طبقا مملوءا بالترمس والحمص وطبقا اخر به كيسا من اللب
شيكا: جري ايه علي الصبح منك ليها
نعناعه: في ايه حد كلمك يا شيكا
شيكا: حد كلمني ده انتو قاعدين ناقرين الرايح واللي جاي مش سايبين حد ف حاله، متخشو تشوفو شققكم الا رجالتكم بيشتكو من عفانتكم
شفاعه (وهي تضع الترمس في فمها): وهما يشتكولك ليه وليه أمرنا انتي اما عجايب
شيكا: هو انتو متعرفوش أن الغيبه والنميمه حرام
نعناعه: احنا حرين وبعدين احنا اللي هنتحاسب ولا انتي
شفاعه: يا اختي عامله نفسك كبيره علي ايه
شيكا: طاب ولما اعملها معاكم
شفاعه: تعملي ايه
نعمات: انتي يا نعمات
لتنظر لهم نعمات من الشرفه
نعمات: في ايه
شفاعه: شوفي بتك عامله نفسها شيخه حاره
نعناعه: قوليلها خليكي ف حالك
نعمات: في ايه يا شيكا
شيكا: مافيش يا اما نسوان شلت
نعمات: ملكيش دعوه بيهم هما واخدين علي قعده المصاطب لغيت ماهدومهم تبفقي كلها تراب ومقرحه
شيكا: خليكم وانتو شبه ريا وسكينه كده
شفاعه: طاب شوفي انتي رايحه فين بقي احسن منعملها معاكي