رواية بيت لا يعرف معنى الخصوصية الفصل الثامن 8 بقلم نجاة محمد


رواية بيت لا يعرف معنى الخصوصية الفصل الثامن 8 بقلم نجاة محمد


«اقسى ما فى الانتقام ان يدفع البرئ ثمن ذنب لم يرتكبه،  فقط لانه ينتمى الى من اراد المنتقم ان يؤذيه» 


«الفصل الثامن» 


*الكاتبه نجاة محمد*


تلفون احمد رن برقم غريب


حنان: مين


احمد: ده رقم غريب


حنان: بلهفه طب رد يمكن يكون ادم


احمد: الو


شخص مجهول: ابنك معايا لو عايزه يبقى تحضرلى اتنين مليون جنيه ولما تحضرهم ابقى كلمنى عشان اوصفلك المكان اللى تيجى تاخد ابنك منه  سلام


احمد: الو الو


حنان: ايه مين


احمد: معرفش ملحقتش قالى عشان تاخد ابنك لازم احضرله اتنين مليون جنيه وقفل


حنان: بعياط واحنا هنجبهم منين، انا عايزه ابنى اتصرف يا احمد


احمد: اتصرف منين ومش هينفع ابيع اى حاجه لان مش املاكى لوحدى ده حق اخواتى ومينفعش اتصرف فيه من مزاجى


حنان: طب هنعمل ايه طيب هنسيب ابننا يضيع طب ممكن تسأذنهم او قولهم يمكن يساعدوك اكيد لو شافوك فى ضيقه هيقفوا جمبك


احمد: معتقدش ثانيه واحده هو ممكن اصلا يكونوا هما اللى ورا اللى حصل وعملوا كده معقول توصل بيهم للدرجه دى


حنان: لا بلاش تظن فيهم بالسوء، هما اه ممكن يتضايقوا منك شويه لكن ميمعملوش كده اكيد


احمد خرج بره على السلم ونده على كامل واسامه بصوت عالى


كامل نزل بسرعه واسامه خرج من شقته اللى قدام احمد


كامل: ايه فى ايه بتزعق ليه




احمد: ابنى اتخطف ولسه رقم غريب رن عليا وقالى انه عايز اتنين مليون جنيه




اسامه: ببرود ربنا يرجعهولك بالسلامه هنعملك ايه ياعنى


مش معانا فلوس لو جاى تطلب مننا وبعدين مانت على قلبك قد كده وكوشت على كل حاجه


احمد: ياعنى مش انتوا اللى ورا الموضوع ده وخاطفين ابنى


كامل: اهو ده اللى ناقص كمان تقول علينا حراميه وتقول علينا بنخطف اطفال دايما بتحب تطلع نفسك انت المظلوم واحنا الوحشين


احمد سابهم ونزل الشارع بيحاول يدور على حل يرجع بيه ابنه


ــــــــــــــــــــــــــــــــــــــــــــــــ


وكامل دخل عند اسامه الشقه


كامل: انت نفذت اللى قولت عليه مش قولنا نستنى شويه عشان محدش يشك فينا اهو عرف وبعدين احنا متفقين على حور وقولنا انها الكبيره واعز واحده عنده


اسامه: انا منفذتش حاجه ما انا معاك اهو


كامل: اومال مين اللى عمل كده ولا يكون حد سمعنا وقاله وهما بيمثلوا علينا انه اتخطف


اسامه: مظنش ان حد سمعنا لان احنا متفقين على حور مش ادم، طب بص احنا هنعمل نفسنا واقفين جمبه وهنساعده وهنفهمه ان مهمها حصل بينا هو اخونا ومنقدرش نزعل اكتر من كده عشان نعرف مين اللى ليه عداوه مع احمد غيرنا




كامل: تمام خلاص اتصل بيه وقوله انت روحت فين ونقوله ان هنروح ندور معاه على ابنه


ــــــــــــــــــــــــــــــــــــــــــــــــــــــــــــ


عند الخاطف 


ادم:  عمو انا عايز بابا 




الخاطف:  متخافش ابوك لو بيحبك يعمل اللى انا قولتله عليه وانا هوديك ليه بس الاول اصفى حسابى القديم اللى كان مع جدك فاروف 




ادم: جده فاروق مات 


الخاطف: منا عارف وعارف كمان ان ابوك كان اكتر واحد بيحبه وكتبله الاملاك ب اسمه وعشان كده هو اللى هيدفع تمن غلطة ابوه اللى بسببه قضيت عمرى كله فى السجن بس انا خرجت وهاخد حقى 


ادم بعياط وصريخ:  انت هتعمل فى بابا ايه انا عايز باباااااا


الخاطف: اخرص يلا وبطل زن بدل ما اخلص عليك 


سكت ادم وهو بيعيط وخايف على باباه 


ـــــــــــــــــــــــــــــــــــــــــــــــــــــــــــــــ


عند احمد تايه فى الشوارع مش عارف يروح فين ولا يعمل ايه وشويه كانوا اسامه وكامل وصلوا لى 


اسامه:  احنا جينالك نقف جمبك مهما حصل احنا اخوات واحنا غلطانين لو كنا ضايقناك بكلامنا 


احمد: ده العشم بردوا ربنا يخليكوا ليا 


كامل: طب انت مجربتش تبلغ البوليس اكيد هو هيعرف يتعامل ويجيبلك ابنك 


احمد: خايف ابلغ اللى خطفه يعرف ويعمل فيه حاجه 


وشويه والخاطف رن على احمد 


احمد: الو 


الخاطف: انا عارف ان انت مش هتعرف تجمعلى المبلغ عشان كده انا هعمل معاك واجب 


احمد: ارجوك بلاش تاذى ابنى ورجعهولى انت ليه بتعمل كده 


الخاطف: هرجعهولك بس مش قبل ما تنفذ اللى هقولك عليه وكمان بلاش تشغل دماغك زى ابوك زمان وتبلغ البوليس عشان بدل ما اطمنك عليه هحزنك عليه 


احمد: هنفذلك كل اللى انت عايزه بس انت تعرف ابويا منين وعمل معاك ايه ابويا كان خيره على الكل وعمره ما عمل شر مع حد 


الخاطف: انا بسبب ابوك اتحبست خمسه وعشرين سنه وكنت شريكه فى الارض الى عليها ورشة الحداده الكبيره من غير ما ادخل فى تفاصيل كتير انا عرفت ان ابوك كتبلك كل حاجه ب اسمك وان انت تقدر تتنازلى عن ملكية الارض دى ولما تلاقى نفسك جاهز كلمنى سلام 


كامل: خير مين اللى بيكلمك 


احمد: ده اللى خطف ابنى وبيقولى ان ده تمن اللى ابويا عمله معاه زمان  بس عمرى ما اصدق ان ابويا عمل حاجه وحشه مع حد طول عمره كان بيحب الخير للكل 


اسامه: طب وانت هتعمل ايه فى حوار الفلوس 


احمد: لا ما هو قال انه مش عايز فلوس هو عايز ياخد الارض اللى عليها ورشة الحداده  


كامل بخبث وهو عارف مين اللى خطف ابنه: اكيد حد بيقول اى كلام وخلاص بلغ البوليس 


احمد: مينفعش قالى لو بلغت البوليس هيإذى ادم 


كامل: طب يلا نروح وفكر بهداوه انت هتعمل ايه بس اوعى تدى حد حاجه من املاك ابوك 


احمد: انا فعلا تعبان يلا نروح 


اسامه:  اه يلا بينا وقفتنا فى الشارع ملهاش لازمه 


كامل بغمزه لى اسامه من غير ما احمد ياخد باله: لا انا رايح اقعد على القهوه شويه 


اسامه بفهم: اه ماشى انا كمان هاجى معاك 


احمد: طب خلاص انا هروح انا سلام 


مشى احمد وكامل واسامه راحوا قعدوا على القهوه 


ــــــــــــــــــــــــــــــــــــــــــــــــ


اسامه: فيه ايه بقى حوار ايه اللى هنتكلم فيه على القهوه ما كنا طلعنا وخلاص


كامل: متخافش انا اللى هحاسب المهم انا عرفت مين اللى خطف ابن احمد


اسامه:  ده بجد وعرفت منين بقى ان شاء الله 


كامل: لما احمد قال ان الخاطف طالب منه الورشه بتاعت الحداده وكمان قال ان تمن غلطه ابويا عملها زمان هو واحد بس الى جه فى دماغى مفيش غيره هو اللى وره الحوار ده بس معقول بعد السنين اللى قضاها دى كلها فى السجن خرج ولسه فى صحه ينتقم 


اسامه: مين ده انا مش فاهم حاجه 


كامل: انا هقولك ابوك كان ليه صاحب عزيز عليه اوى اسمه الحج مصطفى وكان عنده ابن قدى كنت ساعتها فى اولى اعدادى وانت واحمد كنتوا لسه صغيرين وبما انى الكبير قبل ما احمد يكبر وياخد مكانى فى قلب ابويا 


كنت على طول معاه فى كل حته 


وفى يوم الحج مصطفى ده عرض على ابويا انه يشترى حتة ارض ابويا هيشارك بالفلوس والحج مصطفى هيشارك ب انه يشغل الورشه لانه كان شاطر جدا فى الحداده وابويا مكنش ليه فيها بس عشان هو صحبه وبيحبه وكان بيعتبره اخوه اشترى الارض الحج مصطفى  استغل ان ابويا مش بيروح الورشه كتير وبقى يشتغل فى السلاح الغير مرخص وفى حد من العمال عرف وراح قال لى ابويا ولما عرف راح وواجه الحج مصطفى  بس الحج مصطفى قاله ان الشغلانه دى هتنقلهم فى حته تانيه وكده كده محدش واخد باله والكل عارف انها ورشة حداده عاديه وهدده ان لو حد عرف هيبقى خصمه لدرجة انه غضب وقاله انه ممكن يإذى حد مننا 


ابويا خاف لكن مكنش بيحب ان حد يعمل حاجه يآذى بيها الناس وبلغ عنه وحكى كل حاجه للشرطه وانه ميعرفش حاجه عن اللي الحج مصطفى بيعمله عشان ميتاخدش فى الرجلين 


واتحكم عليه بخمسه وعشرين سنه 


اسامه: و اكيد بعد السنين دى كلها خرج عشان ينتقم من ابونا بس لما لاقاه مات قال ينتقم من احمد لانه معاه ملكية كل حاجه ده كويس ان  احنا مخدناش حاجه كان زمان عيالنا احنا الى مخطوفين بس انت بتقول ان عنده ابن قدك ليه لما كبر منتقمش لى ابوه وخد حقه 




كامل: ابنه من قريب عرفت انه سافر المانيا هو كان طول عمره شاطر فى دراسته وبيطلع من الاوائل دلوقتى بقى دكتور مشهور وبيسافر بره مصر كتير وملهوش فى شغل ابوه كل اللى بيفكر فيه انه يبقى ناجح فى حياته بس




اسامه: طب وبعد ما عرفنا الحكايه دى هنستفاد ايه يعنى ما نروح نقول لى احمد ونحبس الراجل ده تانى بدل ما ياخد الورشه ولا يطلب منه حاجه تانى وتبقى كل حاجه ضاعت مننا بجد


 


كامل: لا طبعا هنستفاد كتير احنا هندور على مكان الحج مصطفى ده ونقوله  ان احنا عايزين ناخد حقنا من احمد زى ما هو كمان عايز حقه ونخليه يطلب من احمد اكتر من الورشه ممكن يخليه يتنازله عن كل حاجه هو ممتلكها ونتفق معاه انه لما يتانزله عنهم يدينا حقنا وهو ياخد حقه واحنا هنساعد احمد انه يخليه يتنازل ونقوله ان احنا اخواته ومش مهم اى حاجه المهم ان ابن اخونا يرجع بالسلامه  ولما ناخد حقنا هنطرده طردة الكلاب فى الشارع 


اسامه: دماغك ابوسها يا كبير ايه الحلاوه دى دماغ شغاله مبتنامش 


كامل: المهم نخلى احمد ما يبلغش البوليس ونحاول نوصل لى الحج مصطفى قبل احمد 


ـــــــــــــــــــــــــــــــــــــــــــــــــــــــــــــ


فى بيت كريم ومنى كان يوسف راجع من الشغل ولقى منى وكريم قاعدين زعلانين 


يوسف: مساء الخير مالكم قاعدين كده ليه 


منى: ازيك يا حبيبى 


يوسف: الحمد لله مالك غريبه مقولتليش ايه اخبار العروسه فى الشغل ولا الكلام ده شكلك متضايقه انتى وابويا فى ايه 


الحج كريم: ادم ابن اختك حنان اتخطف انهارده وقاعده تعيط ومش عارفه تعمل ايه هى وجوزها 


يوسف: يعنى ايه الكلام ده وازاى لغاية دلوقتى مبلغش البوليس 


منى: خافوا ليإذى الواد، منهم لله الى بيحرموا الاهل من عيالهم  


يوسف: مفيش الكلام ده الحكومه بتشوف شغلها وبيبقى فى سريه للشغل فى الحاجات دى وبقى حاجات متطوره بيقدروا يحددوا بيها المجرمين وبيوصلوا ليهم كل حاجه وليها حل اللى زى دول لازم يتقضى عليهم ونخلص منهم 


منى: طب لو تقدر تساعد اختك وتقف مع جوزها وتوصلوا للى خطف الواد  دول طالبين منه اتنين مليون جنيه وهو معهوش المبلغ ده


يوسف: انا ليا واحد صحبى اسمه ياسر اخوه شغال فى الشرطه واتعاملنا مع بعض كتير ممكن اكلمه ويقدر يساعدنا 


منى بلهفه: بجد طب كلمه والنبى وقوله 


يوسف: حاضر ورن على اخو صاحبه 


يوسف: الو السلام عليكم 


حازم: وعليكم السلام ليك وحشه يا كبير ايه بقالك كتير مبتسألش 


يوسف: معلش بقى انت عارف الشغل وتعبه انا بس كنت قصدك فى خدمه واسف لو هتقل عليك 


حازم: يا عم متقولش كده احنا اخوات اؤمرنى 


يوسف: الامر لله انهارده ابن اختى كان خارج من مدرسته واتاخر ومرجعش البيت وبعدها جالهم اتصال ان حد خطفه وطلب منهم اتنين مليون


حازم: لا متقلقش ان شاء الله خير خليه يجيلى بكره القسم  اخد منه معلومات عنه والرقم اللى الخاطف رن عليه منه وان شاء الله نقدر نوصله 


يوسف: ان شاء الله معلش ازعجتك 


حازم: ياعم ما انا قولت مفيش بنا الكلام ده لو عوزت اى حاجه انا معاك وربنا يعينك على شغلك


يوسف: حبيبى تسلم 


قفل يوسف مع حازم واتصل على احمد وحكاله وقاله انه هيروح معاه القسم بكره يقابلوا حازم 


ــــــــــــــــــــــــــــــــــــــــــــــــــــــــــ


تانى يوم فى القسم عند حازم يوسف واحمد راحوا عنده


حازم: اهلا وسهلا ازيك يا يوسف، ازى حضرتك يا استاذ احمد 


احمد: الحمد لله بخير 


حازم: يارب دايما، يوسف حكالى وقالى ان ابنك اتخطف ممكن تقولى تفاصيل اكتر 


احمد: هو كان مروح هو واخوه زى كل يوم عادى بس اخوه نسى حاجه جوه المدرسه ورجع عشان ياخدها  وهو قاله انه هيستناه بره 


لما اخوه رجع ملاقهوش ورجعت كاميرات المكان كان فى عربيه من غير نمر والخاطف مغطى وشه 


حازم: طب انا عرفت ان الخاطف اتصل بيك، قالك ايه؟ 


احمد: قال فى الاول انه عايز اتنين مليون جنيه وامبارح رن عليا وقالى انه عرف ان والدى لما توفى كتبلى كل الاملاك وهو عايز الورشه اللى كاتبها والدى ليا  


حازم: هو طالما عارف كل ده يبقى حد قصدك وعارفك هل فى ليك اعداء او حد هددك قبل كده  او شاكك فى حد 


احمد: الصراحه فى الاول كنت شاكك فى اخواتى لانه كانوا بيتخانقوا معايا لما والدنا توفى بسبب الميراث لكن امبارح لما عرفوا نزلوا معايا يدوروا على ابنى وكمان غير كده الخاطف لما كلمنى امبارح قالى انه كل ده غلطه عملها والدى معاه زمان واتحبس بسببه خمسه وعشرين سنه 


حازم: وهل فى فعلا اعداء لى والدك زمان 


احمد: معرفش بابا مكنش بيجيب سيره ليا على زى دى ابدا  ممكن اللى يعرف اخويا الكبير لان انا الصغير 


حازم: تمام فى حاجه تانيه قالها 


احمد: لا ده كل اللى حصل 


حازم: على العموم ادينا الرقم اللى خاطف رن عليك منه ولو كلمك تانى بلغنى واحنا ان شاء الله هنعمل اللى علينا وزياده ونقدر نوصل لى اللى عمل كده 


احمد:  تمام،  شكرا جدا لى حضرتك 


ـــــــــــــــــــــــــــــــــــــــــــــــــــــــــ


عند كامل واسامه عرفوا مكان الحج مصطفى ووصلوا ليه 


فى بيت الحج مصطفى قاعد فى المكتب الخاص بيه والحارس دخل بلغه ان فى ناس عايزينه وخرج عشان يقابلهم 




الحج مصطفى: اهلا وسهلا 


كامل: ازيك ياحج انا كامل وده اخويا اسامه ولاد الحاج فاروق الله يرحمه  فاكرنا 


الحج مصطفى: عارفكم، الله يرحم والدكم ربنا رحمه منى ومن اللى كنت هعملوا فيه بس مش غريبه دى جاين ليا بريجليكوا مش خايفين حد يإذيكوا ولا فاكرين لما تترجونى هديكوا ابن اخوكوا وتروحوا بسهوله 


كامل: لا خالص احنا مش جايين نترجاك بالعكس ده احنا جايين نقولك زود اللى انت طالبه من احمد الحج فاروق زى مانت عارف كتبلوا كل حاجه واحنا عايزين ناخد حقنا منه مجاش فى دماغنا غيرك انت انك تقدر تساعدنا واللى انت عايز تعمله فى ابنه اعمله احنا ملناش دعوه بيه المهم ناخد حقنا 


الحج مصطفى: وانا ايه اللى يضمنلى انكوا مش جايين تعملوا عليا حوار 


اسامه: اسمع بس ياحج احنا مصلحتنا واحده اننا نوقع احمد ف مفيش حوارات بالعكس اعتبرنا دراعك اليمين وكمان نقدر نبلغك خطوات احمد واللى هيعملوا عشان لو ناوى على شر نقدر نعمل حسابنا كلنا قولت ايه 


الحج مصطفى بتفكير: ماشى انا موافق بس انتوا هتنفذوا اللى هقول عليه بالحرف ولو حد منكم فكر انه يلعب معايا ويضحك عليا قبل ما ينفذ تفكيره هكون مخلص عليه اتفقنا 


كامل واسامه: اتفقنا 


الحج مصطفى: تمام، تعالوا اقولوكوا بقى نعمل ايه 


ايه اللى ممكن يعملوه فى احمد؟ 👀


وهل الظابط هيقدر يجيب الخاطف ويرجع ادم ولا اسامه وكمال هيبوظوا خطة الظابط!؟ 👀🙂


 نلتقى الفصل القادم. 🫶♥

وانتوا كمان متنسوش تدعولى دعوه حلوه. 🥹💗.


                   الفصل التاسع من هنا 

         لقراءة جميع فصول الرواية من هنا 

تعليقات
×

للمزيد من الروايات زوروا قناتنا على تليجرام من هنا

زيارة القناة