رواية بلسم الفصل الثالث عشر 13 بقلم هند الهيباني

رواية بلسم الفصل الثالث عشر 13 بقلم هند الهيباني

خالد

الحمدلله على السلامة يا زول والله دي سلامة كبيرة ربك كريم...

ياسر :الحمدلله، تسلم ي عمي الله يسلمك الحمدلله ربنا خارجنا من هناك..

دا موضوع مشربك لكن ربك رب الخير طلعنا...

والحمدلله ربنا كتب لي ولد حلال خارجني

خالد:ي سلام ياخ البلد دي لسه بي خيرا...

ربنا يوفقو  ويفتحا عليه الزول دا ان شاء الله

ياسر :اميين يارب هو بصراحه انت كان لاق...

ندى:السلام عليكم خالد كيف حالك

خالد:وعليكم السلام ورحمة الله وبركاته كيف حالك والحمدلله على سلامة ولدنا ياسر...

ندى :الله يسلمك يارب الحمدلله الله كريم كيفك انت وصحتك

مالكم م جيتو من قبيل...

خالد :والله الحمدلله ماعلينا اي عوجه، نسيت والله اكلمهم الليله انشغلت العفو...

ندى :ولا يهمك الدنيا مشاغلا كتيرة اصلا

خالد:الله يكرمك. 

.. ياسر تعال شيل الصينيه....

#بلسم

رجعنا البيت بعد اتعشينا معاهم  كان يوم غريب...

طوال الفترة الفاتت ومن لاقيت الشاب دا في المواصلات

حاسه بي أي شي بمش بي غرابة. 

بداية من الاحاسيس البحسها كأنو في زول مراقبني دايما..

ولقائي الدائم بيه في اي مكان متوقع وغير متوقع...

ماقادرة اطلع الأفكار دي من راسي..

والزادني غرابة  اكتر وجودو اليوم مع ياسر.

نظراتو وابتسامتو الغريبه.. انسان وجودو ببعث في الروح احساس غريب.. بالخوف، والقلق، بحس دايما انو في شي ح يحصل...

الشاب دا وجودو ما مطمني وحاسه بي انو في شي وراه...

ماعارفه بالضبط الشعور الجواي دا شنو وليه خايفه كده...

حاولت اطرد الأفكار دي من راسي وقررت انوم...

#فاطمه

بداية جديده قررت ابداها...

بداية من تغير مكان الاثاثات..

ورتبت وضع الشفع....

اي حاجه ما كانت في مكانا غيرتها ٣ ساعات

وخليت البيت بقى حاجه تانيه وانا بعاين ليه كده

حاساه مابيتي..

دخلت طلعت باقي قروشي وطلعت على الحنانة بعد نومت الشفع بعد صلاة العشا ومعاهم جارتنا حرستها ليهم ...

خلصت لي واديتا قروشا ونضفت لي وشي ورجعت على البيت. 

غسلت شعري ولفيتو وبقيت اعمل لي في بسبوسه...

خلصتها ودخلتها التلاجه وظبطت مكان نومي. 

وانا بتذكر في كلمات بلسم لي. 

انو المرة ديك ما زايده عني بي شي.. وانا دام قررت اني أكمل معاه وادي علاقتنا فرصه يبقى حا اعمل العلي...

يا صابت يا خابت لكن قعادي في  النص عمرو ما حايسعدني

ولا حا يطلع اولاد سويين..

هم محتاجين بيت هادي واسرة كويسه متحابة

كيف ح يطلعو كده وهم مالاقين  ابوهم الا مرة في الأسبوع ويوم يجي يسمعو هو وامهم متشاكلين...

انا كده بدمر نفسي وبدمر في حياة أولادي معاي ولا يمكن اني اعمل حاجه زي دي واواصل عليها..

الحاصل بينا دا بخصنا سوا ما لي أولادنا اي ذنب في البحصل دا..

حا اعتبرا آخر فرصه ياكملنا زي لظاي اتنين متتزوجين

وربينا أولادنا بصورة كويسه..

يا أي زول يشوف طريقو ويغني الله كلاً من سعته..

ماعارفه احساس للسنوات السيئة الكنت بعيشا

حسيت انو هم كبير انزاح عن قلبي..

حاسه لأول مرة انو لسه في خير انو عندي هدف اكمل عشانو

نمت لأول مرة وانا مرتاحه من جواي وببتسم

وبتمنى تشرق شمس بكره شايلة في طياتا لي خير كتير...

#كلتوم

عشت طوال الفترة السابقه دي وانا ماعندي هم غير بناتي واولادي... عيشه بسيطة نقدر نعيش فيها مبسوطين ومتكيفين.

ماكلين وشاربين وما علينا اي هم لا مرض شوفة خالد وأحوالو متدهورة كانت ماخده من نفسيتي الكتير..

ومن بعد الله هو الصبرني.....

كنت بعد ينومو كلهم بقوم نص الليل اصلي ركعتين وادعي فيها الله يغنينا من فضله...

وبإذن الله تعالى ح يهونا. 

#اسعد

بقيت لاقادر انوم ليل لا نهار طول الوقت تفكيري فيها.  .

بنتظر الساعه ٢ تجي بفارغ الصبر وما عارف ليه الوقت بمر بطئ..... ابتسمت وانا بتخيل نفسي متقدم ليها وهي وافقت. وقاعده معاي في نفس البيت بين الاربعه حيطان دي سوا وهي بتبتسم لي بدل التكشيرة البتقابلني بيها   بتعاين لي في عيوني بدل ما تتهرب مني.. تركب معاي في عربيتي برضاها بدل ما انا احنسا وترفض مجرد الشعور دا خلاني انوم وانا مبتسم... حبيت كتير وحمت اكتر مع كمية بنات  بس زيها  مالاقيت اكون اتذكر واحده وابتسم كده زي الابله.

ضحكت وانا حاضن مخدتي وانا بتخيل في يوم بكره 

الخطوة الحا أعملا، لقاها وردة فعلها .....

#مازن

الساعه ١٢ منتصف الليل..

كنت راقد في الغرفه... بعاين للسقف وانا بفكر في كل الحصل..

امس واليوم والكلمة الرميتا لي امي...

مازن.. ابتسم ابتسامة خبيثه وهو بردد اسم بلسم...

يوم بكره... 

يوم مختلف... ح تبدأ فيه بداية كل الأحداث دي وحا تترابط الخيوط دي بعقده واحده.  

شنو شايل يوم بكره لكل الأطراف دي..... 

أي واحد كان شايل جواه سر... 

وغموض ماف زول بعرفو غيرو... 

كلهم ماشين على أقدار الله. عايشين بخططو لي شي. 

وربنا فوق هو الكاتب قدرهم ماعارفين المكتوب ليهم شنو.  

#يتبع.....

                 الفصل الرابع عشر من هنا 

           لقراءة جميع فصول الرواية من هنا

تعديل المقال